خواتي عندي اكثر من مشكله مع بنتي والمدرسه ومو عارفه اشلون اتصرف

[SARA*]

السلام عليكم خواتي بنتي هذه اول سنه تداوم وهي باولى ابتدائي يعني مادشت روضه وهي بجري وايد انطوائيه وتستغرب وخجوله والله كاعده اكتب ودمعتي على عيني يعني لو تشوف يهال عمره سنتين ياي تخور عن طريجه تخاف تحتك باليهال الا تشوفيني يمهه واشجعه ياله شوي تتقرب منهم بس بالبيت شخصيه ثانيه تضحك وتلعب وتعصب يعني عاديه جدا والحين صارله اسبوع من داومت تكول كاعده اخر البنات وبروحه واساله ماما البنات يلعبون تكولي اي وانتي تلعبين معاهم تكولي لا والمشكله المدرسه الي هي فيها ممنوع تدشين مع البنت للمدرسه حدج لباب اليوم رحت للابله كلمته تكعد معاها بنت وتخليه ببدايه ومادري بعد اسالكم مدراس بناتكم الحكوميه نفس الشي يعني مايخلون الامهات يدخلون للصف او حتى للساحه

 

[فجر@@]

انتي غلطانه الله يهداج
الطفل لالازم يدش الروضه ولا والحضانه بعد علشان هالفتره تكون تهيئه للابتدائي عرفتي
كل المدارس ما يخلونج تدشين بس انتي روحي للاخصائيه وقوليلها الموضوع وخليها تحرص الابلات على معاملتهم لها وانتي شجعيها عطيها هدايا من بو 100 توزعهم على البنات ويوم كاكاو علشان تتشجع وتندمج معاهم عقب البنات يتلزقزن فيها علشان تعطيهم فهمتي وقولي للاخصائيه تقعدها جام والله يعينج ولا تكررين هالغلطه مع اخوانها

 

[استعجلت الرحيل]

رد : خواتي عندي اكثر من مشكله مع بنتي والمدرسه ومو عارفه اشلون اتصرف

انا بنتي بعد بأولى ابتدائي بس مدخلتها الروضه والوضع موغريب عليها

بس اول يوم لازقه فيني وتبجي وبعدها بيوم لا تعودت على الوضع

 

[Princess Lady]

رد : خواتي عندي اكثر من مشكله مع بنتي والمدرسه ومو عارفه اشلون اتصرف

حبوبه فايدة الروضه أول شي تهيئة الطفل لو ما لقيتي حكومه المفروض تدخلينها خااااااااااااااص عشاااااان تفتكين وقت المدرسه

 

[SARA*]

خواتي مشكورات على الرد صحيح انا الغلطانه والحمد لله بنتي الثانيه هالسنه دخلت روضه انتم اكيد تعرفون البجر يكون النا احنا الامهات حقل تجارب والعام خفت من افلونزا الخنازير بس بنتي ابدا مابجت من دخلت المدرسه وبالعكس تضحك على اليهال الي يبجون وحابه المدرسه وايد وذكيه وتفهم بس مشكلته تكون منعزله وتخاف تحتك مع احد وتبي البنات هم يتقربون منها وشخصية ابد مو عدوانيه بس الخجل هو سبب المشكله

 

[on line]

رد : خواتي عندي اكثر من مشكله مع بنتي والمدرسه ومو عارفه اشلون اتصرف

الله يعينج فعلا الاول تجارب
بس شوفي عادي الامر وراح تضايقين بس صبري عليها جم شهر وتنطلق لين تكون صداقات والمحاتاه عادي فينا كلنا دايم مع البجر
بس شوفي اذا مضايقج الموضوع حاولي تودينها نادي العصر في مثلا عندج بعض الحضانات تسوي نوادي تقويه العصر شركيها لو شهر وصدقيني بتتغير شخصيتها انتي بس لاتحاتين

 

[ذكريات الرؤية]

عزيزتي سارة
تصدقين اني فاجة المنتدى عشان بنتي عندها نفس مشكلتج بالضبط والله حاسة فيج
وموشرط تكون بحضانة ولا روضة

بنتي الله يسلمج بجري نفس شخصية بنتج انطوائية وما تحب تحتك باليهال حطيتها العام بحضانة خاصة وما بجت اول يوم
بس صارت بالليل وهي نايمة تبجي وتقول اسماء بنات
لما أسألها الصبح تقول محد يلعب معاااي بالحضانة مع انها مو عدوانية أبدا
لما سألت ابلاتها قالوا ما تحب تحتك في البنات وتبيهم ييون عندها ما تبي تروح لأحد
شريت كاكاو وحلويات وألعاب صارت تستانس لأنها تعطيهم بس همن أقعد احاتيها طول اليوم
امتنعت عن الأكل بالحضانة لحد ما صار فيها جفاف ودخلتها المستشفى ما خليت أحد ما حاجيته لا ابلة لا ناظرة
المهم ناظرتها خوووش وحدة قالت شرايج نسوي لها حفلة وتكون اهي الطالبة المميزة طول الأسبوع
تدرين واااااااااااااااايد استانست بنتي وقامت تقعد الصبح مستانسة عقب ما كانت تبجي ما تبي ترووح
وعدت السنة الللي طافات وانا اكره روحتها لانها تكسر خاطري
حطيتها بالصيف بنادي
والأحد راح يكون دوامها بالروضة حطيتها خاصة بس والله حاطة ايدي على قلبي شلون بتكون هالسنة؟؟؟
دايما ادعي لها وحدي متخوفة يصير فيها نفس قبل

آسفة طووولت عليج بس حطيتي ايدج على جرحي:denya:

أتمنى أتواصل معاج بالخاص يمكن نساعد بعض خاصة انهم نفس الشخصية ونخفف الهم عن بعض

شاكرة لج عزيزتي والله يحفظ لج بناتج

 

[حجيه هيونه]

رد : خواتي عندي اكثر من مشكله مع بنتي والمدرسه ومو عارفه اشلون اتصرف

نطروا عليهم شوي

انا هم بنتي كانت جذي بس الحين اسم الله عليها ناطره المدرسه تبدأ عشان صديقاتها

يحتاجون شوي وقت عشان يتأقلمون مع البنات والمكان

 

[عشق]

رد : خواتي عندي اكثر من مشكله مع بنتي والمدرسه ومو عارفه اشلون اتصرف

حطيها في نادي او معهد
خليها تطلع مع احد من اهلج ولا تروحين انتي معاها وخلي عندها جنطه وفيها فلوس علشان اذا شافت شي تشتريه ولا تستحي انها تطلبه
وديها اماكن الالعاب خليها تلعب

هذا الشي اللي متبعته مع بنتي وهم تبجي بس اهون

 

[كوكو لاتي]

مدرسة بنتي عادي ادش معاها لي الصف اول يومين ليش مدرسة بنتج متحجرين ؟


بس هذا كله لان ما دخلت حضانه على طول المدرسه وهذا غلط كبير والله

بس انشاله اكيد مع الايام راح تتعود لان تو باديه السنه راح تتعود انشاله

 

[SARA*]

الله يجزاكم خير والله ماقصرتوا كثر ماكنت خايفه الحين طمنت يعني في امل تتغير وتصير اجتماعيه وحبيبتي اتشرف اتواصل معاج على الخاص على الاقل نواسي بعض مشكورات خواتي يارب يوفق عيالكم