دايسو دايسو حبيب الشعب دايسو

[أحب ترابها]

مو ضوع رائع

 

[أم الحلوة جمان]

ماااااشالله .... طلع شيي هالدايسووووو وانا مادري ..
والله مارحتله الا مرتين بس ماعرفت شاااخذ منه غير رشاشات الماي و مواعين ملونة لعيالي بسس ... بس طلع فيه سوالف مو طبيعية ... يبيلي رووحة عدله اتمقل عدل و ابقق عيووني عدل ....

 

[دانتيل]

شحلااااات الموضوع... انا قبل لا اتزوج شكثر اروح دايسو مع امي و من تزوجت اقول حق ريلي خنروح يقول كله خرابيط... انا اغلب الي اشتريهم منه الشغلات ملوت الترتيب و التخزين.... عليكم بالعافية بناات خوووووش اغراض

 

[الجوري74]

حركات

 

[خالتي قماشة]

فديتكم

ممكن تقولون لي وين اقدر احصل دايسوو

لان عجبتني اغراضه

وايد زينه وتنفع

انه من البحرين وان شاء الله هذولي اليومين راح اجيكم

فخاطري امر على دايسوو هذا

 

[AwradAli]

حيالله اهل البحرين .. حبيبتي دايسو موجود بسوق السالميه داخل سيتي سنتر تحت
أو الفرع الثاني بالشويخ يم هومز ار اس

 

[استغفرك يارب]

دانسنج ... تري علاق الشيلات ما لقيته واللي يسلمك وصفيلي بالضبط من وين ما خذته

 

[supermarket]

دايسو حبيبي لازم كل شهر امره

احب اخذ منه لزقات الريول ولزقات الفيكس وكلينكس الجنطة

وماخذت منهم سدادة الاذن للسفرات والازعاج

ووايد اشياء ... ولما اروح ماحب احد يحاجيني علشان لا يلهيني عن اي شي

خبرج اغراضهم تناتيف لازم التمقل عدل


واذا رحت المرة الياية اصورلكم اغراضي

 

[Dancing^Queen]

ماشاءالله ماشاءالله اوراد خوش اغراااااااااااااض
لقيتلي منافسه في دايسو في اشياء ماطحت عليهم
عيل بروح ونزل المعاش يعني عندنا حفله دايسويه
ولزقات الخشم واللي يرحم والديج ميته ادورهم ريلي ادمنهم كل شوي الجيوب الجيوب (تذكرون سعاد عبدالله مع حسينو الجنين الجنين الجنين بخطر؟)
ولزقهم وطق الفناخر تيربو
وايد مستفيد منهم وطحسنا عليهم طحاس محنا لاقينهم


عليش بالعافيه وشريت اغراض وبما ان عندي دي اس ال باجر بتلقونهم اشنءالله الحين بحطلكم اشياء قديمه عندي من حبيب الشعب
اي بس قبل خل قولكم عن اللزقات

 

[Dancing^Queen]

اول وحده اللي ملقيتنا ظهرها بالطابق الفوقي
قرطاس اخضر
وفي مره ملقيتنا ظهرها ووراها شيره
هذي لجميع مفاصل الجسم
امي تموتن عليهم الله يخليها اهي والحمر


الي يمها الورديه اللي وحده قاعده قرفصاء ولابسه كحلي ان صح ان نقول لابسه
هذي اعزكم لله للامساك تمشي البطن وخوش شي اياويد من ساس اليابان

اللي يمها الحمراء القصيره اللي فيها ثنتين مربعات ومحددين باحمر ورسمه ظهر عليه خصر عجيب
هذي تايتينيوم لالام الجسم والظهر خصوصا ريلي يخشهم عني علشان ماوديهم حق امي وايد قود قود

اللي بعدو البيبي بلو اللي فيها وحده فقيره منسدحه ونقط لين خشمها من لزقه علي صدرها
تراهي مريضه المره و حاطه لزقه فوكس ادعولها بالشفاء العاجل


اللي تحت اول شي جهه اليمين الحمراء ذات القدم السعيده المبتسمه
لاتغشمكم تراها مفلفله
هذي ديتكوس للجسم بفلفل شطه حطه يابطه

اللي يمها بيبي بلو ووحده ام قذله رافعه راسها تراهي اخت المريضه بس هذي مصدعه شوي هذول لزقات للصداع او الصخونه فوكس فري قود


اللي بعدو الخضراء الجميله اللي فيها مربعين عنونين لونهم بييييييييييييجشششششششششششش
هذول ريلي خذاهم بالغلط ومتفلسف علي يقولي هذول لزاقات جراحه وان ااقوله مستحيل اهل اليابان يلزقون جراحه جذي؟ اكيد لهم قمنده ماصدق لزاق ابدااااااااااااااان
وبعدين في يوم اخر خذيتهم ورحت حق حبيب الشعب وطلبت شرح
طلعو حق مسمار اللحم ياليتنا كنا متراهنين علي خاتم الماس جان فزت

اللي بعدو الخضراء اللي رسمه واحد ممقط رويلاته وقاعد وحاط ريل علي ريل هذول دي توكس للجسم ويبعونهم بالوسيط بخمسه وسبعميه وخمسين البواوقه
مابقا احد مالزقته بالعيله من امي لين اختي الصغيره
لين خدمي
لين الجناين (اي رياييل خواتي)
ودمتم سالمين واذن الفير ماكو صور رجعت بكلمتي

 

[الكويت حياتي]

بنات وين هذا دايسو؟؟ اول مره اسمع فيه لا تنصدمون

 

[زلابيا]

لوووووووووووووووول دانسنغ حده شرحج عجيب

الكويت حياتي .. دايسو بالشويخ .. و بسيتي سنتر السالميه - الفروانيه بس مادري اي صوب

 

[Dancing^Queen]

مادري صور مكرره والا لأ بس خل احطلكم
هذول جناط لشبصات بناتي
وحاطه عده البديكير

 

[AwradAli]

لووووووووول كوكو عاد والله متهدده بروح هاليومين بس يختج فلست وليلحين الشهر طوييل وورانا اغراض رمضان .. ولا يبيله قطيني هناك وانسيني .. يبيله اخذ الوالده على يوم نروح مع بعض بس خوفج اني انا اللي اطلع واهي اللي تظل معجعجه هناك ههههههههههه .. بس اللي باط جبدي ان ما لقيت علاق الامطات عشان جذي متهدده بروح مره ثانيه والنافوره ابي وحده ثانيه بس ناطره اييبون منها مره ثانيه.. اشرايج تمريني ونروح مع بعض؟

 

[Dancing^Queen]

النافوره عندي موعاجبه ريلي شاقحها بمكان لاتراه الشمس يقولي احد يخلي ام الضفادع ياخذ هذي! قلته طبعا كل الناس بتخلي ام الضفادع لانها جيكره
خل احطلكم صور
هالسلات الغرض منهم انهم يروحون كبت حمامي اعزكم الله
اصفصف غريضاتي

اهني شكل السله المفرده

والغرض منهم هو هنا

هذي صورتهم بالدرج مال كبت الحمام اعزكم الله
لكن ماحدث هو هذا

هل تشاهدونهم؟
كلا البته؟
ولماذا ياترا؟
لان ريلي طمع فيهم ناشبني علي هالاربع سلات وخذاهم يصفففصف ادويته (هوايته يجمع ادويه الجيوب والصداع والفكس والوازنيت والوازلين) يقول خوش شي يدشون درجيييييييييييي تمام ويني عنهم من زمان
الله علي الظاااااااااااااااالم

 

[GAP]

كوينه شلونج يا قلبي.... ناطره صورج عشان اعرف افلفص اغراضهم عدل ههههههههههههههههههههههه

 

[جنتي امي]

...كذا مره اهلي يروحون له وما اروح:.
يبيله دايسو ...
ومشكوره يا عسل على طرح الموضوع الحلو//
لو كريسيا ضحكتيني هههههههه

 

[Dancing^Queen]

تكمله اللزقات

حق الم الرقبه

هذول بوكسين بلاستيك حجم متوسط تستخدم لتخزين السكر والطحين عزيزاتي

 

[Dancing^Queen]

انكت عليج شاي قهوه تتوصخت ملابسج وانتي بره
نوبروربرم مسحه وحده لامسحتان



اقول مايفضون دايسو ويسون نفسهم بس تشيل ضيقه الصدر والمشاكل الله تخيلو بس مكتئبه مسحي علي ويهج بوايبز وتبتسمين
ريلج يصارخ يبي كلينكسج وبسم الله بسم الله مسحي علي راسه وويهه يقوم يهدا ويغنيلج كل الئصايد والحكي
يبله والله عفيه خل نكتب رساله الي دايسو نقولهم سوولنا كلينكسات تزيل الهموم والمشاكل

 

[Dancing^Queen]

هذا الاخ الكريم يمنع انزلاق الموبايل والخرده بالسياره
حطيه علي الجدام (توني فاطره وماني قادره اجمع افكاري عرفتو الجدام فوق السكان ؟؟) مقدمه السياره <<<ابوك يا العربي
جنه اسمه طبلوم؟
تابلوه؟
مادري الصراحه
المهم فرشو زل وحطي موبايلج لايتكرفس ولايطيح اليوم فرشت سيارتي بالبركه ولاتكرفس موبايلي