دجاج بالخلطة -معكرونة-بطاطس مشوية-صينية بطاط باللحم المفروم وغيرها أطباق منوعة

[شاطىء الذكريات]

أولاً : دجاج روووووعه


ملح - فلفل اسود - كمون - كزبره ناشفه - كركم - كاري - بودرة الزعفران
اخلطيها سوا في صحن

الدجاجه :
غسليها ونظفيها ولا تقطعينها
تبليها بالبهارات اللي فوق من جوه ومن برا

وجيبي بصل حبات قشريه واذا كبير اقطعيه نص
فصوص ثوم قشريها وكثري عادي لانك مابتفرمينه فـ طعمه مابيكون واضح
كزبره وبقدونس واكليل الجبل كلها لاتفرمينها خذيها زي ماهي ورق
ليمون قطعيه ارباع
ودخلي هذا كله في الدجاجه جوه

الخضار :
انصحك تقطعينها وسط عشان تاخذ الطعم مزبوط .. مو صغار عشان لاتنهرس ولا كبار يصير مافيها طعم
بطاطس - كوسه - جزر - زهره - بروكلي - فاصوليا

جيبي نفس البهارات وزيدي عليها ماجي مذوبه في مويه حاره وزيت زيتون
اخلطيها وخليها تصير سائل
تبلي الخضار بها مزبووووط ( البسي جونتيات وحوووووسي على كييييييفك )

جيبي صينيتك وحطي دجاجتك في الوسط و وزعي خضارك على الاطراف
اعصري ليمون على الخضار وحطيه معها وحطي فلفل اخضر حار قرون وانثري كزبره وبقدونس وحطي قطع زبده وصبي زيت زيتون -
امي على حسب المزاج والموجود تحط المقادير
يعني هنا حطت شرايح بصل وماحطت كزبره وبقدونس

وانسيها في الفرن ليييين تستوي
واستمتعي بالطعم مع رز ابيض .. ألذ شي فيها الاعشاب اللي في الدجاج
صور من كم مره

---------------







ثانياً : دجاج ممم بالخلطه


ملح - فلفل اسود - بهارات مشكله - ماجي مذوبه في مويه حاره - جينو موتو ملح الاندونونيسيين الابيض
شرائح طماطم - شرائح بصل - شرايح فلفل رومي - ثوم مفروم على حسب الكميه - عسل شويه عشان يحمر ويطلع لون حلو - اكليل الجبل
افرميه فرم خشن - زيت زيتون - ليمون - صلصة صويا - خل - زنجبيل مفروم - صلصه طماطم - زبادي -
واذا طلعت ثقيله زيدي لبن او مويه

قطعي الدجاج ارباع ونظفيه وشرطيه بالسكين وتبليه بالخلطه وخليه
احنا دايما نخليه يطول في التتبيله يعني اقل شي 3 ساعات
وشيليه زي ماهو وحطيه في الصينيه وحطيه في الفرن لين يستوي ويحممممر

هنا بعد ما استوى

 

[ام دليار]

رد: ادخلوااااااا بسرررررررعه

تسلم أيدك

 

[شاطىء الذكريات]

رد: ادخلوااااااا بسرررررررعه

ثالثا - مكرونة


بصل مفروم لين يصفر
نحط اللحم ( واهم شي يكون مفروم خشن لاني جربت سويتها بمفروم ناعم ماطلعت حلوه ) نقلبه لين تنشف مويته ويصير لونه بني فاتح
البهارات والسر كله فيها ملح - فلفل اسود - كمون - كزبره ناشفه - ماجي - ليمون اسود مطحون - مسمار مطحون -
ورق غار مطحون - زنجبيل مطحون - هيل مطحون - قرفه مطحونه - فلفل حار مطحون
بعدين طماطم مطحونه شويه - صلصه طماطم اكثر من الطماطم
قلبيها لين تتسبك وممكن تحطين بازلا مجمده اخر شي - انا اعشقها بالبازلا -
اسلقي مكرونه على جنب بمويه وملح لين تستوي واخلطيها مع اللحم وخليها شويتين على النار
قبل التقديم افرمي كزبره واخلطيها معها
وبسسس ذووووقوا الطعم ماشاء الله

--------

رابعا - بطاطس مشويه

بطاطس غسليها ونظفيها مزبوط لانك مابتشيلين القشره
قطعيها الشكل اللي ودك بس اهم شي الحجم لا يكون كبير مره عشان تستوي بسرعه ولا صغير مره عشان لاتنهرس
تبليها بـ : ملح - فلفل اسود - ورق زعتر - اكليل الجبل مفروم خشن بالسكين - فصوص ثوم بقشرها ارميها بينها - زيت زيتون
وبكيفكم لو تبغون تحطون كزبره ناشفه او كمون او فلفل حار بودره
دخلوها الفرن وقلبوها بين فتره وفتره عشان تستوي من كل الجهات وماتلصق

---------

خامسا - بشاميل

زيت شويه - دقيق وخليه شويه لين يتغير لونه مو بني .. لا .. ذهبي
حليب سايل لين تنخلط سوا وارخي النار عليها واذا كان ثقيل مره زيدي مويه
حطي بهارات ملح - فلفل اسود - كمون - كزبره ناشفه - ماجي - شوييييه ثوم مفروم بس نكهه - واحيانا موزاريلا
نبدا نرص
اول طبقه نحط المكرونة ونخلط معها شويه بشاميل
ثاني طبقه نحط اللحم المفروم ونصب فوقه شويه بشاميل
اخر طبقه نحط المكرونه ونصب البشاميل الباقي عليه ونحاول ندخله بين المكرونه بالملعقه
عشان كذا تطلع سااااايحه بشاميل

-----------


سادسا - طبخه للي ماعنده وقت

جبنه سايله كاسات يعني ومايونيز وجبنه موزاريلا ونقطة ثوم مفروم واحيانا فلفل حار بودره
افرديها على خبز مفرود مدهون بزيت زيتون
وحطي عليها شرايح طماطم وشرايح فلفل رومي - في الصوره ماحطيت -
زيتون
ودخليها الفرن لين تحمر ورشي عليها ورق زعتر

مررره روووووعه خصوصا وهي حاره

 

[شاطىء الذكريات]

رد: ادخلوااااااا بسرررررررعه

سابعا - صينية بطاطس باللحم المفروم والبشاميل

اول شي هي ثلاث طبقات لكن مو بالترتيب بس عشان نمشي عليها
1- اللحم مفروم
2- البطاطس
3- البشاميل

1- اللحم المفروم /
بصل محمر في زيت بعدين تحطين اللحم المفروم والبهارات ( ملح - فلفل - كمون - كزبره ناشفه
- حبه ماجي ) قلبيه لين يستوي .. اذا استوى حطي عليه نص فص ثوم مفروم اااااخر شي يعني


2- البطاطس /
بطاطس مسلوقه في مويه بس .. اهرسيها وحطي عليها ( ملح - فلفل - كمون ) اعجنيها وكوريها
كور لا هي صغار ولا كبار عشان في الاكل مايطلع طعمها طاغي


3- الباشميل /
دقيق في زيت او زبده لين يصير ذهبي حطي الحليب وقلبي لين يثقل حطي ( ملح - فلفل - نص
ماجي - كمون - كزبره ناشفه - والنص حق الثوم اللي فوق ) وذوقي الطعم وعدليه بكيفك

ترتيبها في الصينية
1- ادهني ارض الصينية بالبشاميل شويه بس مو كثير عشان لا يلصق اللحم
2- اللحم واذا ودك انثري ذره معلب
3- رصي البطاطس
4- صبي الباشميل
5- جبنه بارميزان وموزاريلا

-
-------



ثامنا - صينية الشاورما

- قطعي صدور دجاج صغير ونقعّيها في خل وملح وفلفل اسود وشويه لبن وشويه زيت زيتون
- قطعي بصل وشوحيه مع زيت لين يشقّر وحطي ثوم مفروم وحطي الدجاج وخليه على نار عاليه
مع التقليب لين تجف مويته ويتحمص على خفيف
- سوّي على الدجاج حركة التبخير بالفحم والزيت وغطيه لين يتنكّه بطعم الفحم وذوقي الملح وعدليه
- قطعي بطاطس طوال واقليه عادي ورصّيه في صينية مع رشه ملح
- افردي الدجاج على البطاطس
- سوّي خلطة الباشميل الكذاب
3 ملاعق مايونيز .. 3 ملاعق جبنة سايله .. علبة قشطة
وحطيها على كامل الوجه (اذا ودك تحطين سماق على الوجه) ودخليها الفرن لين تحمر
ممكن تؤكل مع خبز مفرود وطماطم وخس

------------



تاسعا -صينية الخضار

( كوسه - جزر - بطاطس - فاصوليا - زهره - بازلا )
مقطعه سميك تنقلي في زيت نص استواء
افرديها في صينية
كشنة عاديه
بصل لين يحمر حطي طماطم مطحونه - صلصة طماطم اكثر عشان تتسبك
بهارات ملح - فلفل اسود - كمون - كزبره ناشفه - كاري - فلفل حار بودره - ماجي
وخليها على النار لييييييييين تتسبك وتصير ثقيله
شيليها و وزعيها بالملعقه عالخضار وقلبيها سوا
بعدين صبي مويه حاااااااااره تغطي الخضار بشوييييه
ودخليها مكشوفه اذا انتي مستعجله
اذا ما انتي مستعجله غطيها بقصطير وخرميه لين تستوي وشيلي
القصطير وخليها شويه وطلعيها

 

[جارة القمر]

رد: ادخلوااااااا بسرررررررعه

مشكوووووووووووووووووووووره علي النقل الحلو

 

[loly44]

رد: ادخلوااااااا بسرررررررعه

تسلم ايديج على هاي الطبخات اللذيذه صج صج شهيتيني وان شاء الله نجربها وانا بالفعل جربت اول طبخ وطلعت لذذذذذذذذذذذذذيذه

 

[شاطىء الذكريات]

رد: ادخلوااااااا بسرررررررعه

يسلموا ع المرور منوريييييييييين وماشاء الله عليك اختي loly 44 بالعافيه عليك

 

[نفهمها صح]

رد: ادخلوااااااا بسرررررررعه

ليه ليه ليه
تعذيب ومابغي اسسسوي علشان الحميه متخرب
مشكووووووووره روووعه

 

[قمر الكويتية]

رد: ادخلوااااااا بسرررررررعه

جزاك الله خير ،،، شكل الدجاج لذيذ

و الله يوفقك
***********************************************
سبحان الله و بحمده ،،، سبحان الله العظيم

 

[شاطىء الذكريات]

رد: ادخلوااااااا بسرررررررعه

مشكووووووووورين خياتي ع المرور فديتكم والله

 

[قلبي القرآن]

رد: ادخلوااااااا بسرررررررعه

يم يم الأطباااق روووعه
كل طبق يقول الزين عندي
تسلم ايدج​

 

[استكانه1]

رد: ادخلوااااااا بسرررررررعه

تسلم ايديج حبوبه ,,,

 

[دلووووعة نجد]

رد: ادخلوااااااا بسرررررررعه

يممممممم يممممممممم لذيييييييذ ما شاء الله تبارك الله
تسلمييييين

 

[العابده لله]

رد: ادخلوااااااا بسرررررررعه

تسلم اللايادى وعساج على القوه

 

[Kandrya]

رد: ادخلوااااااا بسرررررررعه

يم يم يم يم يسلمووووووو

 

[Tom ♥ Jerry]

رد: ادخلوااااااا بسرررررررعه

/،

رووووووووووعه كل طبخ احلى من الثاني
ماشالله عليج ،

 

[ضحكة الدنيا]

رد: ادخلوااااااا بسرررررررعه

أطباق رووووعه
تسلم ايدج عالنقل الحلووو

 

[ABEER FLOWER]

رد: ادخلوااااااا بسرررررررعه

وصـــفــآآآآآت رائعه

يعطيج ألف عافيه يارب

: )​

 

[أحلى همبه كويتية]

تم تعديل العنوان بواسطتي

يجب ان يعبر العنوان عن محتوى الموضوع

الرجاء الألتزام بقوانين القسم​

 

[سعووديه كوول]

يعطيكي الف عااااااااافيه يالغلا