دورة برجوازي (اسرار التوفير وطريق الثروة)

[يارب الفرج القريب]

روعه كملي معاج ضارلي 8 سنوات اشتغل 10 دنانير ما وفرت قصيت ظهري بقروض و ماستر
الله كريم الله المستعان

 

[@يسرى80@]

متابعينج
جزاج الله خير ع وقتج وجهدج

 

[مفرفشه عالاخر]

حبيبتي ننطرج

 

[أم سيف وسلطان]

حلو الموضوع متابعينج اختي

 

[Pearla & Ribbons]

يعطيج العافية

نبي تتكلمين عن شركات الاستثمار بليززززززززز

في دعاية على الوطن دايما ماني فاهمتها عن دخل ثابت اتوقع شهري عن شركة الاستثمار الكويتي اتوقع هذا اسمها نبي نعرف شنو طريقة الاستثمار

اشكر متابعتج وردج بس سوري ماعندي فكرة والله

 

[Pearla & Ribbons]

روعه متابعينج بليز كملي

في شي اسمعه بالبنوك اسمه صندوق يعني شنو مو نفس الوديعه؟؟؟؟[/quoرte]

هلا فيج اشكر ردج بس والله ماعندي فكرة ياليت تروحين تسألينهم وتفيدينا

 

[Pearla & Ribbons]

اشكر ردودكم كل اللي ردو والحين ان شاء الله بكمل باجي دورتنا

 

[Pearla & Ribbons]

الحين بعض الاستراتيجيات اللي تحد من الصرف ؟؟

لازم تراقبين مصروفاتج وفلوسج وتراقبين نفسج ..نصيحة ...

احتفظي بفواتيرج بملف مثل هذا

شوفو ملفي شرايكم فيه؟
شوفو فواتيري شكثر ؟
هنيه بهالفواتير يوم افسفس الحلال

لهالطريقة فائدتين اولا بتعرفين فلوسج وين تروح
ثانيا بتخليج تقللين من مصروفاتج وتكونين اكثر حذر وتوفرين ...اكمل؟

 

[Pearla & Ribbons]

طريقة الاظرف اكيد الكل سمع عنها واكيد معظمكم راح البقالة وشرا مكاتيب مالت هنود وشخبط لين خاب ثناه وهو يكتب كل ظرف شحقة ويعيد الحسبة كل شي ...

طبعا هذه الطريقة ليست للتوفير او الادخار هي فقط من اجل تقسيم الراتب لمصاريف واقساط والتزامات وديون ومواجيب انتي عارفة انها قادمة وبالعكس طريقة حصيفة وحكيمة عشان ماتخربطين الراتب بعدين تتذكرين ان في اشياء مهمة ماحسبتي حسابها ...
يعني خلي الالتزامات اولا تالي شيلي ووفري الباجي بمكان ماتوصلين له مو بالظرف ...واللي ماعندها التزامات تقدر تشتري الحاجات اللي ناقصتها وتستمتع بجزء من الراتب...

 

[Pearla & Ribbons]

قصة قصيرة :
اعرف وحدة موظفة شاطرة وتعرف تسوي تقسيمات وتدير ميزانية بيتها حتى زوجها يعطيها الفلوس والميزانية بيدها لأنه يثق فيها انها موخبلة ...شتسوي ؟؟
تاخذ كل معاش تخيلو كل معاش وتحطه بالتجوري تخيلو تجوري ..

تطلع منه الالتزامات والاقساط ومصاريف عيالها ..والبيت وكل شي وتقفل عالباجي بالتجوري ماشاء الله خوش وحدة سنعة ...شرايكم حلوة طريقتها ؟؟

 

[Pearla & Ribbons]

نجي لاسترتيجيات التوفير ؟؟
وشلون نحط فلس على فلس ...

اول شي طريقة الحساب الثاني ..
يعني تسوين بطاقة توفير واستقطاع شهري من معاشج ...بعد ماتدرسين مصروفاتج والتزاماتج من اقساط وفواتير...


اللي ماتقدر تسوي بطاقة اللي بمية في بطاقة الخير ببيت التمويل بس ماجربتها ..جربت لك من الوطني والدانة من الخليج بس هذيل شنو عيبهم ؟؟

ماتقدرين تسوين استقطاع اذا سويتي يخصمون عليج خمس دنانير اذا راتبج ينزل فبنك ثاني وبالنسبة لي خمسة وايد..
ميزتهم ان البنك مايلزمج بالامية يعني تحطين امية وتسحبينها عادي والدانة ميتين وهم تقدرين تسحبينهم عن طريق الصرافين بالبنك ...
حلوين حق مهر او مبلغ كبير بتشيلينه

يعني انصحج ببطاقة الخير اوفرلج ...


واللي تحس نفسها سوري على هالتعبير موكفو بطاقة ..مثلي يعني يعني عارفة نفسج بتسحبينهم مهما كانت الظروف الجوية والسياسية ...

تسوي هالطريقتين ؟؟
الجمعيات ..بس ها موتدشين جمعية تقص ظهرج حدج امية ويطلعلج مثلا الف حلوين ...طبعا حلوين ..وانصحج تستثمرينهم بوديعة مثل وديعة السدرة بيت التمويل (كله دعاية لهم حسبي الله عليهم)
موتفسفسينهم ترا راح تدفعين من معاشج عالفالضي

الحصالة ..نعم ومادراك مالحصالة حلوة حق المبالغ الصغيرة والخردة

واختاري وحدة ماتنفتح ابد ..
وطبعا لازم كل وحدة عندها حصالة حتى اللي عندها حسابات توفير ...

في طريقة سويتها روعة ...وراح اقولكم عليها بعد شوي ...

 

[Pearla & Ribbons]

ابي اشوف ردودكم اول شي بعدين اقولها يلا اب ابي تشجيع ابي تصفيق ابي دعوة صادقة ولكم بالمثل

 

[Pearla & Ribbons]

الطريقة الناجعة جدا :

اذا كنتي متزوجة وعندج بيتين يعني بيت زوجك وبيت اهلج ...وكنتي تقضين الويكند عند اهلج ...
وتفسفسين بالهويكند ...
حطي فلوسج بمكان سري بالكبت
واخذي معاج مبلغ يكفيج هاليومين ..

وكل مرة سوي هالطريقة ..وثقي عزيزتي انها بتنجح تدرين ليش ؟؟

لأنج لما تكونين عند اهلج وصديقاتج بتبذرين بشكل جنوني ...واساسا الكل بيطلب منج فلوس عيالج اخوانج واللي يبي سلف ...طبعا ماقول لاتعطون بس الفقارى واللي عليهم ديون مومضطرين يفسفسون ويسلفون ويوزعون فليساتهم ...

ولأن الزوج لما تكونين عنده وهذه اهم نقطة ماراح تصرفين معاه فلوس وايد واساسا ماراح يخليج تشرين وتسوين شوبينغ جنوني على راحتج ..
صح ولا لأ؟

 

[Pearla & Ribbons]

ثاني طريقة :
حاسبي نفسج اول بأول عند كل فلس صرفتيه بكل دقيقة بكل ساعة ..(ادري حركات شحفانية) بس لازم لأني انا اكبر مبذرة موبس انتم ولما احاسب نفسي اتردد وافكر مية مرة بعدين...مثال اقول الشي اللي شريته اليوم ماكنت بحاجته ليش شريته..المكياج اللي كودته ماستفدت منه شي ...من زين القيفة.. عادي عادي ازف نفسي دايما ...العطر اللي شريته ومارشيت منه ولابخة شاللي خلاني اخذه ..لأنج بتعرفين مرة ثانية ان اي شي موبحاجته المفروض ماتاخذينه...

فرويديات :
طبعا الدراسات النفسية تأكد أن جلد الذات ومحاسبة النفس موبس بالامور المادية تحدث علاقة شرطية تقلل السلوك الغير مرغوب فيه ...

من السنة الشريفة:
حتى رسولنا الكريم قال بما معانه ودرسونا بالمتوسط اعتقد : الكيس من دان نفسه (يعني الذكي الفطين يحاسب نفسه على سوء اعماله حتى لو كان انسان زين) لازم يتفكر ويستخدم عقله ويوزن الامور صح ..

 

[Pearla & Ribbons]

التثمير أو الاستثمار :

طبعا هناك طرق كثيرة بعضها آمنة وبعضها فيها مخاطرة مثل المشاريع والبورصة ..

الآمنة :

سبائك الذهب شراء الذهب وقت انخفاض اسعاره وبيعه وقت ارتفاع السعر ..وهي طريقة ناجحة وبالامكان الاستفادة منها حتى لمن لايملكون اموال طائلة يكفي مئة دينار من الراتب ...
بس تأكدو من وجود الختم الاصلي عليها...

المشاريع ...راح اسرد تجربتي بهالمجال

الودائع : تحفظ اموالك مع نسبة ارباح بسيطة كل عام حسب نوع الوديعة ...

انصح بوديعة السدرة اقل شي الف
دك

لمزيد من المعلومات اسألوا اهل الاختصاص واحذروا الشركات الوهمية

 

[Pearla & Ribbons]

بالنسبة للمشاريع ..
طبعا راح اسرد تجربتي بهالمجال ..
وقصة مشروعي باختصار :

اول شي اللي خلاني افكر بالتجارة معاناتي من القروض وحبي لهوايتي خلطات العطور والتبييض ...

طبعا مشروعي على قدي ماتهورت وقطيت فلوسي ففكرت بشي اتقنه واحبه لقيت اول شي خلطة للتبييض كنت اسويها ونجحت معاي وبيضتني بس مارحت وسويت كميات لأ بس انحصرت على الاهل والصديقات وزباين محدودين توقعون ليش ؟؟

لأني ماملك الوقت الكافي ولا عمالة تساعدني بعمل كميات تجارية للملاحظة حتى بالمنتدى ماحطيتها لأني بكل بساطة عندي زباين الحمدلله كافية وخاصة العرايس اللي اعرفهم واللي تخلص تطلبها مني مرة ثانية وثانيا تاخذ مني وقت وجهد ومال يعني ما اقدر لكميات وطلبات تجارية..
ثاني شي الخلطة اللي نسويها حق تعطير البيت تعلمتها من الوالدة ونزلتها للمنتدى والحمدلله بعت كميات وماتاخذ وقت وجهد ...بس التوصيل مشكلة يالله ادبر احد يوديها

يعني اهم نقاط طلعنا منها من تجربتي :
انج تسوين شي متوفر عندج وتجيدينه يعني لما سويت مشروعي ماجبت شي يديد كله من روتينا وخبراتنا ..

ثانيا تبتدين المشروع قد امكانياتج موتفسفسين فليساتج عالمشاريع وتالي ماتربحين شي تفلسين من المعاش والمشروع ...

صحيح التجارة يبيلها مغامرة بس موحق المبتدئين حق الهوامير اوكي؟؟
اكمل ...؟؟؟

 

[Pearla & Ribbons]

طبعا محد يمي وبجذيه ماراح اخلص لذلك بنهي الدورة اليوم وكل عام وانتم بخير

 

[Pearla & Ribbons]

طبعا لمزيد من المعلومات والثقافة المالية :

انصحكم بقراءة هذه الكتب ...

 

[Pearla & Ribbons]

بالنهاية اشكركم واحمدالله على تجمعنا هذا واسأله البركة والغنيمة بكل شيء لي ولكم ...
وسامحوني على تقصيري واللتي لم تجد ماتبحث عنه بموضوعي انصحها بالكتب السابقة قد تجد ضالتها من مواضيع عن التثمير (الاستثمار) والادخار ...

واحب اقولكم فلنحلم ولنتوكل ولنعمل ونسعى حتى نصل للنجاح وتحقيق الاحلام والفوز ان شاء الله


وليس هناك من شيء اهديه اجمل من هذا المقطع ...
‫أروع ما قال الشيخ الشعراوي مقطع راائع سيغير تفكيرك‬‎ - YouTube

 

[Pearla & Ribbons]

مع السلامة