~* ديوانية التصوير الفوتوغرافي *~

[جاي وحليب]

السلام عليكم..

حياكم الله مصوراتنا بديوانية التصوير الفوتوغرافي..

ياليت اي وحدة يكون عندها سؤال او استفسار
وودها تعرف الجواب.. تشاركنا.. وراح نتعاون ونجاوبها على سؤالها

او حتى لو اقتراح للقسم .. افكار يديده.. اي شي ودكم فيه
شاركونا اهني بالديوانيه... بهالموضوع راح نطور من قسمنا
ونخليه القسم الاكثر فعاليه ان شالله .....



لاتترددون بطرح اي سؤال..
لاتقولين لا والله فشله ولا اخاف يضحكون علي..
العلم مافيه مستحى.. احنا اهني نتعلم ونعلم بعض
وكل هذا علشان نطور من مستوانا بالتصوير بهذا
الفن الراقي والهواية الممتعه....

ولاتنسون .... من اخطائنا نتعلم ونستفيد..



طرحت الموضوع هذا علشان يصير في تنظيم اكثر للقسم
والاسئله لي صارت اهني ممكن تفيدكم وتفيد غيركم....

حياكم الله واي استفسار او سؤال ان شالله نجاوبكم عليه

:tek:

 

[معبوده الجماهير]

السلام عليكم
مشكوره مشرفتنا على طرحج لهالموضوع اكيد بينفعنا وايد


انا حبيت اسال سوال ...
انا عندي صفحه بفلكر وانزل فيها صوري
ف شلون اقدر احمي صوري من انهم ينبااقون طبعا ماشالله الناس على طول يسوون كوبي وبيست
مع ان مكتوب تحت الصوره او عليها ان حقوق الطبع محفوظه
انا شخصيا شفت صوره من صوري باحدى المنتديات ومت قهر
فشلون نقدر نحمي صورنا بفلكر من السرقه
؟؟؟

 

[جاي وحليب]

فعلاً في ناس ماعندها لاذمه ولا ضمير
المصورين يتعبون على اللقطات هاذي
وبكل بساطه بعض الناس ياخذونها.. وينسبونها لهم!!
وبعضهم يشارك فيها بمعارض باسمه تخيلي!!
حتى لو بتاخذون الصوره بتحطونها بتوقيع او بتصميم
لازم نستأذن من المصوره نفسه... احتراما لعمله وتصويره..
قليييل من يفهم هالشي للاسف..


عموماً ..
بفلكر في ميزه بالاكاونت عندج انج تخلين ميزة حفظ الصور بس لج انتي
بحيث ان اذا اي احد حط رايت كلك بيحفظ الصورة .. يطلع له مربع فاضي..
وبنفس الوقت الدقمة اللي فوق الصوره مكتوب عليها All sizes ويمها صورة مكبـّر
راح تختفي وتظل تطلع لج انتي بروحج....

وحتى لو سوّو للشاشه برنت سكرين.. تأكدي ان القياس اللي يوفره فلكر
صغير.. يعني ماراح يفيدهم بالطباعه الا بحجم صغير جداً...

هذي الخدمة اللي يوفرها لج فلكر...


وغير هالشي.. لاتنسين توقيعج على كل الصور..
ونصيحة مني.. اذا صوره متعوب عليها حيل وحيل حلوه
حطي عليها توقيع كبير بنص الصور او بجزء اساسي من الصوره وخليه شوي شفاف
علشان لو حاولو يمسحون التوقيع راح يخسرون الشي الاساسي بالصوره


هذا اللي نقدر نسويه برايي .. والله يوفقج

 

[smilmoon]

مشكوره اختي جاي و حليب على انج فتحتي المجال انا نسأل كمبتدئين ،
حبيت أسأل شنو رايج بكاميرة فوجي فيلم ،لاني ناويه ابتدي كشبه محترفه بالتصوير فمدحها لي شخص ،لان كان ابالي اخذ كانون جي 9 ،بس على قولته ان كانون و نيكون وغيرهم ماخذين اسم بالسوق ليس الا ،وان فوجي افضل من ناحية الالوان والسنسور وغيره .

 

[جاي وحليب]

smilmoon

حبيبتي كل كاميرا لها مميزاتها ولها سلبياتها..
وصح كلامه بالنسبه للالوان والسنسور فوجي متفوقه بهالشي
وانا حضرت مره عرض صور لمصور كبير يستخدم فوجي..
بصراحه الالوان روعه.. واهو قالنا ان مايعدل عليهم.. وهالشي جدا يميز الفوجي
لكن بالمقابل الفوجي بطيئة بالتصوير.. ونفس الشخص قالنا ان كان رايح يصور حصن
واللي معاه بالكانون صورو صور كثيره واهو اقل منهم بالعدد..
والسبب نفس ما قلت لج انها بطيئة بالتصوير...

طبعاً الكانون متفوقه عليها بهالشي..
لكن بالالوان يمكن تحتاجين لتعديل وزيادة تشبع الالوان قد تكون لاغلب الصور اللي تصورينها
اذا مو كلها... انا ماودي اصف مع شركه ضد الثانيه ولا اتوهج زياده...

بس انتي سألي اكثر.. وبحثي بفلكر عن صور تم تصويرها بالكاميرتين
وشوفي صور اكثر.. على اساس حتى بدون تعديل تشوفين وتقارنين
وبالتالي القرار يرجع لج...

وبالتوفيج

 

[معبوده الجماهير]

مشكوره حبيبتي جاي حليب
رحت غيرت الاعدادات وسويته مثل ماقلتيلي

 

[miss_lavendar82]

مشكوره حبيبتي مشرفتنا الغاليه

وانا اضم صوتي لصوتج اهم شي حطي التوقيع بالنص واشوي يكون شفاف عشان مايخرب الصوره

عشان اذا بتحطينها في مكان ثاني غير الفلكر

وحيالله ما زارنا

حياكم حياكم

القهوه والحلو عند باب الدوانيه

يبت لكم حلو تراثي اشوي

زلابيا ورهش

^_*

والقهوه عربيه مره وحلوه

حسب الاختيار

واذا تبون قهوه فرنسيه لا يردكم الا الكيبورد

^_^

 

[miss_lavendar82]

ياريت حبيبتي جاي وحليب تثبتين الموضوع هذا احسن

^_^

 

[ام مهودي]

مشكووووووووووووووووووووووووووره جاي وحلييب وانت صج صج ما تقصرين بشي ويعطييج العافيه

بس عندي سؤال
شلون اذا بصور شغله وتكون بارزه والخلفيه مشوشه يعني مضببه شنو الاعدادات اللي احطها

وابي اعرف شنو فايدة الايزوو بالضبط يعني متى اقلله ومتى ازييد الرقم

واذا عندي اشيااء متحركه جم احط سرعة الشتر

واسفه الازعاج ومشكوره

 

[SabaQueen]

و الله خوش ديوانيه و يا حلو القعده فيها

ام مهودي اذا تبين تصورين ورده مثلا و تبين الخلفيه تكون مشوشه مثل ما قلتي تصغرين رقم فتحت العدسه يعني مثلا تخلينها عندج 2.8 او 3 او 4 ... و تركزين الفوكس عل الورده بس علشان تعزلين الخلفيه

و الأيزو تزيديه اذا حسيتي ان الاضاءة الضاإءة العاديه

اتنمني انتي افدتج
و في انتظار راي باجي البنات )

 

[طوق البنفسج]

يعطييج العافيه على هالمجهود المتميز

 

[جاي وحليب]

معبوده الجماهير

زين سويتي.. هذا اهم شي
حياج الله..




miss_lavendar82

شكراً حبوبه على حسن الضيافه
وماودي اثبت وايد مواضيع.. بعدين بما ان هذا الموضوع عباره عن ديوانية
فـ تطمني ماراح ينزل دايما راح يكون بالصفحه الاولى اذا في اي استفسار من البنات..




ام مهودي

مثل ما قالت الغاليه SabaQueen
- بالنسبه للسؤال الاول تصغرين فتحة العدسه علشان تحصلين عزل اكثر للخلفيه
- والايزو تحتاجين تزيدينه لما تحتاجين اضاءه اكثر، بس حطي ببالج كل مازاد فوق الـ 400
يصير في تحبب بالصوره وممكن يقل الكوالتي مال الصوره
- اما للاشياء المتحركه فـ تحتاجين شتر سريع لتجميدهم ..
مااقدر اقولج رقم معين بس انتي جربي وصوري مثلا قطرة ماي وزيدي الشتر
لين تحصلين اللي تبينه.
وحياج الله




SabaQueen

حياج الله بالديوانيه وماقصرتي يالغاليه




طوق البنفسج

الله يعافيج حبيبتي.. وانتي لج شكر خاص :tek:
اتمنى نشوف مشاركاتج معانا ...
واي سؤال او شغله موعارفتلها سألي بالديوانيه وان شالله نساعدج

 

[miss_lavendar82]

اوكي حبوبه شورتج وهدايه الله

بس حبيت اسال اشلون اصغر العدسه سؤال محيرني وايد

 

[toot^o^mishmish]

:68_asmilies-com:


مساء الخيييييييير....:tek:
جاي وحليب ودي اقولج شغله وعندي سؤال ...
اول شي الله يعطيج الف عافية على هالمجهود الي قاعده تبذلينه .....صراحة ونستينا خليتينا انحس بقيمه التصوير ..انا واااااااااااااايد اموت بالتصوير بس كنت ما اتشجع الا بالسفر ...لان اهني محد احسسج بقيمة هالشي...بس الحين ردت هالهواية تاخذ مكانها بقلبي...موفقة ياعمري ويزاج الله كل خير..


بغيت اخذ من وقتج بشغله ودي اعرف فن تصوير السوائل وشنو احسن الاعدادات الي تساعد بتصويرها ...
يريت اتفيديني بهالشي
:eh_s(17)::eh_s(17)::eh_s(17)::eh_s(17)::eh_s(17)::eh_s(17)::eh_s(17):

 

[فراولة^فوشيا]

وناااااسه خووووش دوانيه

مشكووووره جايونه خوش مكان نتيمع فييه ونستفيد منه

وعلى فكره الديزاين روعه ماشالله وايد عجبني

يعطيج الف عافيه

 

[جاي وحليب]

miss_lavendar82

عفواً مافهمت سؤالج ممكن توضيح اكثر..
ماادري يمكن قصدج شلون تصغرين فتحة العدسه؟

اذا اي هذا سؤالج..
فـ الجواب اهو:
لما تصورين على وضع المانيوال
وانتي تضبطين الاعدادات قبل التصوير..
عند حرف الـ F تغيرين الرقم

اما اذا شي ثاني.. فـ اتمنى توضحين لي اكثر
وحياج الله



toot^o^mishmish

مساء النور يا هلا..
مشكوره حبيبتي على هالكلام الطيب وفعلاً التصوير له قيمة كبيره عند كل مصور
واهو فن راقي وممتع..

بالنسبه لسؤالج بتصوير السوائل.. مااقدر اقولج ارقام معينة
لان ماكو قاعده ثابته لكن طبعاً لازم شتر سريع..
ولكل نوع من تصوير السوائل بحتاج شتر اسرع
يعني بعضهم يستخدم حليب لانه اثقل من الماي
وبعضهم ماي.. وبعضهم يخلط معاه عسل.. او الوان صناعية
وشغلات كثيره فـ يعتمد على كثافة السائل..
وانتي طبعاً تجربين ارقام من بالج وتحددين الافضل لما تشوفين النتايج بالكاميرا

شوفي الصفحة هاذي -17- من ورشة قديمة كنا حاطينها بالمنتدى
من اكثر من سنه.. وفيها شرح لهالدرس وتطبيقات...
وان شالله تستفيدين اكثر ونشوف تطبيقج

الموضوع




فراولة^فوشيا

الله يعافيج .. شكراً حبوبه على المرور

 

[بنت الشاميه]

سؤالي حده مال الغشم في التصوير بسأل شالفرق بين 5ميغا بكسل و10 ميغا بيكسل في التصوير وشنو الأحسن لأن المصور يقول ال5 أحسن لأن كل ما زاد الميغا بيكسل تصير الصورةفيها فراغات بين أجزاء الصورة

 

[جاي وحليب]

بنت الشاميه

حياج الله بالديوانيه.. بالعكس احنا اهني موضوعنا علشان تسألون
ونجاوبكم باللي نعرفه ونستفيد من بعض ان شالله.....

بالنسبه للبكسلز.. بالضبط عكس اللي قلتيه.. كل مازاد عدد البكسلز كل ما كانت
الصوره دقتها عاليه وعدد البكسلز اكبر وبالتالي حتى بالطباعه والحجم الكبير بالطباعه
يكون دقيق وواضح... هذا اهو البكسلز واحتياجنا له...

لاحظي معاي هالصورة....

تذكري هالصورة وحطيها في بالج..
كل مازاد رقم البكسلز... 8.. 10.. 12 Mega Pixels
كل ماكان افضل.. ودقه اعلى خصوصاً بالطباعه مثل ما قلنا

والعكس.. كل ما قل البكسلز كل ماقلت الدقه ووصار عدد البكسلز بالصوره محدود
وبالتالي لي كبرنا الصورة باي برنامج بالكمبيوتر راح نوصل لي حد ونلاحظ المربعات واضحه بالصوره والدقه تروح...

والكاميرات عموماً من الـ 5 او 8 بكسلز وطالع.. تكون الصورة واضحه بالتفاصيل بشكل جيد
يعني اقل من جذي لاتاخذين افضل...


ان شالله يكون الشرح واضح... وحياج الله مره ثانيه.....

 

[supermarket]

مرحبا بنات

هالايام حيل مشغولة ... وماقريت الديوانية

بس دشيت اسلم عليكم

جايونة ماشاء الله القسم نور وياج .. مواضيع بالوان وصور وحركااااات ... تسلم ايدج


لي عودة بس افضى ... بحيل الله

 

[جاي وحليب]

سوبر ماركت حياج الله
زارتنا البركه..

خلاص ان شالله ننطرج ترجعين لنا وترجعين بنشاطج معانا