ديوانيـة --> بجريآت <-- : تعالوا نفضفض ونسولف !

[نور الضي]

الف مبروك للي ولدوا والفال للباقي بالولاده السهله

 

[لوولوو_88]

الله يسهل على همس اشواقي و فيلسوفه .. طمنونا لا ولدتو و فرحونا

استراحة محارب لستة بجريات ههههه

 

[لوولوو_88]

بنات في قصص بتجمع سبتمبر اقروهم

 

[أمورته]

يارب يسهلها علينا يا رب

 

[مذهلة2013]

بنااااااااااات

نامووووووو كثر ما تقدرون اكيييد نومه التاسع فلم
بس اهون من يمج بيبي يبجي

اذا ولدتو ماكوووووو نووووووم

ربي يسهل عليكم كلكم

 

[نور الضي]

اي والله مذهله
انا احاتي دوامي مع هالنوم المخربط

 

[لوولوو_88]

همس اشواقي ولدتي @@ ولا بعد طمنينا

 

[أمورته]

اي لولو توني قريت ردها بسبتمبر والده الحمدالله ع سلامتهاااا

يارب تسهلها عليناااا قرب العداد

 

[لوولوو_88]

قائمة بجريات 2014 و 2015
------------------★



1- فيلسوفة تتفلسف ( 2/9 )

2- ( 5/10 ) zoz_ota

3- طهر ( 5/10 )

4-5- أمورته & لوولوو_88 ( 7/10 )

6- اهذريبك~ ( 14/10 )

7- مهابه ( 21/10 )

8- بدون بس مغتربه ( 24/10 )

90 ( BaRBya ( 26/10

10- الفوز الحلو ( 28/10 )

11- أم عبو_د ( 15/11 )

12- ام_حوريه ( 19/11 )

13- دآآآنه ( 28/11 )

14- ام احلى بيبي ( 7/12 )

15-( 12/12 ) th7awe

16- ( 21th ( 14/12

17- مايو 95 ( 4/1 )

18- شوكة رنانة ( 7/1 )

19- maha26 (7/1 )

20- غزل ( 18/1 )

21- بنت الكويت 90 ( 30/1 )

22- زمرده ( 2/2 )


♥♥♥♥♥♥♥♥♥♥♥♥♥


الف مبروك ولادة ( همس أشواقي ) الحمدلله على سلامتج حبيبتي و سلامه البيبي وربي يجعله من الذريه الصالحة انشاءالله ♡


الفال ل فيلسوفه و زوز و طهر و لي انا و لامورته ربي يرزقهم الولاده الميسره و يا رب تهون عليهم و تقر عيونهم ابيبياتهم بصحه و عافيه يا رب ♡

 

[أمورته]

يارب السهالات منك تسهلها علي وعلى كل الحوامل يارب

 

[فيلسوفة تتفلسف]

شيلي اسمي لولو مكبسه عليكم وموقفه اللسته :eh_s(2):

 

[monaty89]

الف مبروك ماجاكم بنات كل من ولدت
والله يسهل علي وعالباقيات
صج للحين باقي علي وقت لي شهر 4 بس بما ان الاخ بيبي بجر ف خايفه شي جديد علي
الله يسهل علي وعلى كل الحوامل ويرزقنا الذريه الصالحه المتعافيه
ويرزق كل محرومه يارب

 

[لوولوو_88]

لا فيلسوفه ما ينشال لمن تولدين بالسلامه و تبشرينا ..

مناتي ربي اتمم عليج انشالله و الحمل حلوووو استمتعي فيه بكل لحظاته بحلوه و مره نصيحه ..

 

[بنفسجيه_Q8]

الله يتمم عليكم
ويسهل ولادتكم
ومبروك للي ولدوا والحمدالله على سلامتكم

 

[انتظار حلم]

مرحبا بنات

الله يسهل عليكم ان شاء الله حابه استفسر منكم بشغله

انا الحمدلله حللت وطلعت حامل الحمدلله ياربي بس مادري انا ام كم اسبوع خخخ لان توي اليوم رايحه المركز الصحي
بس طلع دمي نازل حححيل 8 ونص وعطوني حبوب آسمه فيروفول كبسولات اهوا حدهااا تخرررع

عمري ماكلت حبوب ابد ومن يوم عطوني اياها وانا مصدومه منها المهم فيه احد منكم خذاها ؟؟

لان خايفه اخذها خواتي واللي اعرفه ان الحامل يعطوها الحديد لحال والفوليك لحال !!

الحين ذي الكبسولات جامعه الاثنين الحديد والفوليك وتقول الدكتوره انها احسن من ذيليك بس مادري خايفه

قلت اسالكم اذا احد جربها

يارب تردون علي

 

[طموحه بزياده]

فيلسوفه لي الحين ما ولدتي صار التاريخ16_9 هههه
الله يهوووون عليج يارب وتبشربنا بولادة ميسره وسهله

انا حاليا اعاني من النووووم المخربط واحاتي دوامي عاد انا مدرسه ولي الحين ماجتني خدامه

وعمي بعينهم اذا خذيت امومه ينقلوني علطول ومابي انقل من مدرستي

 

[طموحه بزياده]

انا ولدت بجري قبل 3 اسابيع

وما كتبت قصة ولادتي لانشغالي ويبيله مخ فاااظي

وكاني الحين بقولكم قصتي

بسم الله الرحمن الرحيم

ولدت بتاريخ 26_8 ساعه 5 الفجر بدار الشفا عند الدكتور زكريا ابو المعاطي بديت اراجع عنده اول مادشيت التاسع وجبت احلا بنوته وجبتها بالاسبوع 38 و5 ايام


من دشيت التاسع ما حسيت بوادر ولادة واكثر شي كثرت منه المشي واكل تمر ( هذا اقصاي يعني مسويه شي هههههههع)

وفي يوم فصلت قلت ابي اوووولد جان اكل اناناس من الصبح لي الليل وانطر بوادر شي ماشيات ولم تظهر اي اعراض

ورديت للمشي مشي مشي مفيش فايده طبعا بحكم العطله والفراغه والزهقه والرطوووووبه مكثره مشي بالبيت ولا انا كسوله ومالي خلق

المهم وقفت كل شي لمدة 10 ايام بس منسدحه وابلع قلت بنفسي الولاده بتجي من الله شحقه ابجر بالشقا خل استانس بلعه ونووووووم

وفعلا اخر عشر ايام قبل ولادتي كانت سعيدة نوم وبلعه وسدحه وعطله لا مشي ولا بطيخ ومخي مطفي ماعندي مسؤوليه كلش


مراجعاتي كانت كل اسبوع وعطاني الدكتور موعد يوم الاثنين 25_8 عالساعه 4 العصر وكنت بالاسبوع 38 و4 ايام وقالي انه راح يسويلي فحص داخلي يشوف الرحم شلونه مبطل ولالا لين ولالا .. طبعا انا حدي مستانسه وانطر موعدي بفارغ الصبر لان جذي احس الصجيه قربت خخخخخخخخ

لا تلوموني بجر ومدري شسالفه ومستانسه لان لاعت جبدي من العطله وروووتين ممل ابي اكشن
جا يوم الاثنين المنتظر ولكن الساعة 4 الفجر مو العصر اللي هو موعدي هههههه (مشفوحه)

كنت سهرانه كالعااااادة منسدحه وابلع اخر شي كليته توست وحمسة مشروم وسلطة شمندر وبقدونس جزر

فجأة حسيت بعوار مثل عوار الدوره خفيف +تيبس بطني استمر دقيقه عقب فج
ما انتبهت الا يوم تكرر بعد 5دقايق نفس الطريقة عوار خفيف وتيبس بطني مدة دقيقه

عاد انا ماكو شغل واقوم اوووقف اشتطيت ليش واقفه مدري ههههههه

واوقف جدام الساعه بتأكد هل فعلا هذا هو الطلق اللي اسمع واقرا عنه انه منتظم كل خمس دقايق؟

وتمر خمس دقايق يالضبط ويجي نفس العوار والتيبس

واقوووووم انقز من الفررررررحه هياااااااا

وقالي قبل الدكتور اذا جا عوار كل خمس دقايق لمدة ساعه روحي المستشفي

عاد قلت لازم اتأكد انه كل خمس دقايق مدة ساعة
واقعد من 4 الفجر لي 5 وطلع فعلا كل خمس دقايق

وهني بدت استعديت رحت تسبحت واستشورت شعري وجهزت النواقص اللي بجنطتي حسيت وقتها باحساس اللي بتسافر سياحه هههههههه
وعقب ما تزهبت رحت قعدت زوجي من نومه وكانت الساعه 6 وقلتله فلان احس بعوار كل خمس دقايق ويقوم ينقز مخترع حسباله دقيقتين وبولد بغرفه النوم خخخخخخخخخخخ

ويقوم يدش الحمام ويطلع ويشوفني طبيعيه وعقب يصلي وشافني عاديه وماقال شي لان العوار توه خفيف

وصعدنا السياره وقالي وين اللي بالمسلسلات؟؟
ههههههههه

عاد فهمته ان العوار يزيد مع مرور الوقت كل مافتح الرحم زياده راح يزيد العوار وهالشي ياخذ ساعات علا ماينتفح اكثر <<< تقولون عاشر بيبي من الخبره هههههه ماخليت قصه ولادة ماقريتها وعرفت كل شي بالطلق والولاده فرايحه وانا عارفه ان اكيد بكون مفتوحه شويه

ودشينا طواري دار الشفا وفحصتني الدكتوره قالت 2سم طبعا الفحص عادي سهالات مادري ليش الحريم يهولون ويخرعون الوحده بس اهم شي اخذي نفس عميق وصكري حلجج وتنفسي من خشمج شهيييييق عميييييق وطلعي من حلجج زفير بطيء وقت الفحص

وسوت تخطيط مدة ساعه وطلع في طلق منتظم كل 5 دقايق

قالتلي العوار تتحملينه؟ قلت اي محتمل قالتلي انتي بجر راح تطولين واحنا ندخل الولاده علا 4 سانتي فأحسن لج روحي البيت وتعالي بالليل علي مايتبطل الرحم اكثر او اذا زاد العوار لدرجة غير محتمله تعالي واذا تبين ندخلج الحين كيفج بس الافضل لج ماتطولين عندنا

عاد ماصدقت علي الله تقولي روحي وتعالي باليل لاني سهرانه ودااااايخه ابي النوم حزتها ماهمتني الولاده همني النوم
اكل ومرعا وقلة صنعا هذي حالتي بالعطله ههههههههههه

وزوجي يوم طلعت من الطواري حسباله بطلع وبيدي البيبي ههههههه مسكين مو فاهم الولاده

ردينا البيت العوار زاد حبه بس محتمل ونمت ساعه 9 لان وراي ولاده الله اعلم متا بتجي وقعدت 2 الظهر العوار زاد بعد حبه ورحت الحمام عزكم الله ولا اشوف مخاط فيه خيوط حمر وخضر وعرفت انها سدادة الرحم اللي يقولون

حسيت اني كنت ادرس وقت اللي اقرا قصص ولادات والحين ميداني اشوف اللي قريته هههههههههه

وطبعا ماننسي ان موعدي مع دكتوري زكريا ساعه 4 العصر فقلت اروحله بس بيني وبينكم ما ودي اروح موعدي ابي اتأخر بالروحه اكثر مابي اروح المستشفي الا حده حده ما ودي يبهدلوني ويسوولي تجارب

ويدقون علي المستشفي ساعه 3 العصر يقولون مواعيد الدكتور اللي من 3 لي 5 تكنسلت لظروف خاصه

هههههه ابيها من الله سبحان الله وقلت حطولي موعد ثاني بنفس اليوم عند اي دكتور ( لان الزياره راح تكون مجانيه فما ودي يروح علي ابلاش)
وعطوني موعد عندي دكتور وائل ساعه 8

وتغديت عيش ومرقه لحم وكان غداي المفضل واحس العوار يزيد ماقدرت حسيت اني تعبانه فرحت نمت عشان العوار يفج وانام من 4 لي 6 العصر
واحس فعلا وقت مناسب اروح المستشفي واكل 7 تمرات واروح لدار الشفا عالساعه 7

ووقت الانتظار بالكراسي اهني حسيت صج عواااااار اقوا من بداية اليوم قلت لزوجي احس بعوار حيل شوف متا يدخلونا عالدكتور واتافف من العوار اففففف اففففففف طبعا افف هذي نفس عميق مو اف اف اللي مالي خلق <<<< تطبيق ميداني ههههههههه بنات استفيدو خخخخخخ

وندخل عالدكتووووور وقلت لزوجي لا يدش حسيت شي شخصي فحص داخلي خخخخخخخ

ويووم جا الدكتور بيفحص والسستر هنديه تمسك فخوذي وتقولي بحماس مملوء بالرعب سوي نفس عميق ولما جا الدكتور بيدخل ايده هذيج تصرخ نفس نفس والدكتور خوووووودي نفس ولما دخل ايده تصرخ السستر نفاااااس والدكتور يعفس وجهه جنه اللي يترقب صرخه مني بتفجر اذونه

صراحه حسسوني اني بولد مو بيفحصوني شدعوه لهدرجة الحريم يصرخون وقت الفحص ههههههههه استغفر الله

طبعا انا خذيت نفس وكتمته يوم دخل ايده وكان الوضع محتمل ولله الحمد

وقالي انتي قويه انتي تستاهلي قايزه نوبل انتي شاطره اوي ماشاءلله عليكي وانا جني بالروضه استانست يمدحني لان ماصرخت

وقالي مفتوحه 5 سانتي يلا دخوووول ويتصل عالطوارئ لان هة دكتور بالعيادة النساء ويقولهم بتجيكم وحده بسم الله ماشاءالله عليها ان شاءالله مش حتتعبكم خخخخخخخخخ واروح الطواري وتستقبلني الدكتوره وبعد ما كلمها الدكتور وسوا زوجي اجراءات الدخول واتصلوا علي دكتوري زكريا ابو المعاطي لاني ابيه يولدني ويخيطني بعد ما سويت سيرج مكثف عن احسن دكتور عموما كل دكاترتهم يمدحونهم

وودوني فوق لغرف الولاده وانا امشي مع السستر وهي توديني للولاده ومستانسه خخخخخخ وكل ماجا العوار كشرت .. انفصام بالشخصيه ههههههههه


طبعا سالوني احد بيدخل معاج بالولاده قلت لا وقالت ماشاءالله ليش ؟ قلت منو يدخل زوجي مابيه هههههه وماما موت اهي اهي وخواتي وحده مسافره ووحده عندها اعيال صغار مو ملزومه وعموما انا ماااااااابي احد

اول شي قلته يوم دشيت الولاده حتا مالبست اللبس الاخضر قلت ابي ابره ظهر هههههههههههه شكلي مايوحي اني خوافه من كلامي صح؟

بس فعلا ماني مستعده اجرب العوار لي زاد وابي ولادتي تكون ذكري حلوووه مو مرعبه وكلها ألم

حطولي حقنه شرجيه صراحه اسوا ذكري بولادتي وييييع حطتها وبعد عشر دقايق بدا المفعول وركض عالحمام عزكم الله اسهااااال


حسيت بدوخه من تكرمون الحمام حتا مارضت اقفل باب الحمام واشوا ماقفلته بعد خفت يغما علي

ورديت غرفتي الولاده الخاص العاديه
.وبعد ربع ساعه حسيت ابي الحمام وقلت للسستر بروح حمام جني طالبه استاذن من الابله خخخخخخخخ لان الحمام برا غرفتي مو حمام خاص

واروح ركض وحسيت بدوخه من الاسهال عزكم الله اأااه شعور خايس ومتعب

المهم رديت غرفتي ونمت عالسرير وخذو عينه من دمي عشان يشوفون تناسبني ابره الظهر ولالا

وصارت الساعة 10 فحصتي دكتوره الطواري قالت 6 سانتي واهني حسيت زاد اكثر العوار قالت انتي متاكده تبين ابره الظهر؟ قلت اي ليش؟؟ قالت السستر انتي ماشاءالله مافي صرخ لما سوي فحص خودي كمام احسن

قصدها ابره الظهر للي مايتحملن الفحص وراعيات صرخات تفجر الاذاني هههههههه


قلت وينها ابره الظهر ابيها وانا بقلبي : الله منعم علينا ليه ما اجرب ابرة الرحمة <<< متاثره بقصص الولادات خخخخخخخ

طبعا العوار زاد بس كاتمه الالم عن طريق التنفس شهيق زفير عميييييق .. اف عوار دوره مغص باسفل البطن شديييييد صج عوار عمري ماجربته يعني اقرب وصف له عوار دوره بس دبلاااااات الدبلااااااات

الساعه 10 ونص باليل
وجا الفرج وجا دكتور التخدير ومعاه ممرضته الخاصه ويقعدوني علي طرف السرير ويعطوني المخده المها وادنق وانا قاعده وانزل راسي عشان يتقوس ظهري ولاني قاريه واجد عن ابره ابظهر وشلون طريقتها فعارفه كل خطوه بسويها الدكتور عشان جذي ماخفت

ولما جتني طلقه قلتله في عوااار لحظه لان مايصير يشتغل لما يجيني عوار بعدين ما اكون ثابته وقت اللي بحط الابره ولما راح قلتله راح ويبخ مخدر موضعي ويشرحلي كل خطوه قبل مايسويها بس الله يهداه يوم غزني الابره ماقالي عشان استعد لاني مو قاعده اشوفه شنو بيسوي فنقزت نقزه من المفاجاة صج في عوار كاي عوار ابره بس فاجئني فقلتله بليز قبل اي خطوه قولي شنو بتسوي عشان اعرف

وقولي ابرة الظهر مرح تخليج تحسين بالتالي : الطلق والفحص الداخلي ولما الدكتور يخيطج اما وقت طلعة الراس مرح تحسين بالم بس راح تحسين بمثل شعور شي يضغط من تحت مو عوار



وبعد ربع ساعه تخدرت رجولي وراح عوار الطلق نهائي ويبين بجهاز التخطيط ان اكو طلقه قويه تجي بس ماحس فيها ماشاءالله صج حسيت براحه
وممرضة التخدير كل شوي تسالني اذا في عوار قولي
لان ابره الظهر جرعات ينتهي مفعول الجرعه ب ساعتين

وقعدت من ساعه 11 عالسرير وجدامي الساعه انام واقعد لي شوي

ساعه 1 وحسيت في عوار وسط مثل عوار يوم كنت 4 سانتي وقلت يجي عوار يجي ابيهم ينادون سستر التخدير قبل لا يروح المفعول كله واحس بالعوار الصجي وفحصتني 7 سانتي

وانطر وانطر ويجي ذاااك المغص القوووووووووووي افففق وينها السستر مالت التخدير نادووووها

عز الله كانت كل شوي تطل علي وتسالي يجي عوار ولالا خخخخخخ

الحمدلله جت وحطتلي بالدرب مالت ابره الظهر جرعه ودقيقتين وراح العوار نهااااائي وارتحت

ملاحظه: لاتنطرين تحسين بعوار قوي عشان يحطون لج جرعه ... اي عوار خفيييف اعرفي ان مفعول الجرعه بدا بخلص لازم تبلغينهم . هذي غلطتي قلت لا احسن انطر لما يزيد العوار ابلغهم


ساعه 3
فحصوني 8 سانتي وانا ماحس يالله لك الحمد والشكر

ساعه 4 الفجر جااااا دكتوري زكرياااااا يالله حيه وعليه لبس البيت و ماله خلق هههههه لبس دسوس وفحصني 9 سانتي

بدت الصجيه راح الدكتور برا

ساعه 5 الا ربع

دش الدكتور ولبس اللبس الخاص فحصني 10 سانتي

ورفعو رجوووولي ويقولي يالله شدي سوي بووش وانا ابي اشد بس مو حاسه بشي يعني منطقه مخدره يقولون شدي وانا احس جني اتنفس ماشد ويجووون ويضغطون علا بطني السسترات ثنتين بدينهم يضغطوني ويحاولون ينزلون البيبي ويقولون يلااااا سوي بوووش سيم سيم كاكا خخخخخخخ

فشله عند الدكتور بس خلصت بعد مفصخه من تحت
.واشد حيييييييل ابي احس اني اشد حسيت راسي عورني وعروق راسي بينت وانا احاول اسوي بوووووش وانا مو حاسه بالمنطقه التحتانيه ابووووووشش

جان يصرخ الدكتور وقفييييييي كفايه بين الراس يعني الحمدلله نفع البوش الي سويته

وبعدها حسيت بدوووووخه الظاهر قزوني ابره مخدر او شي جذي مادري صراحه بس شفت بنتي يوم يطلعها ويرفعو وونهاااا فووووق جدامي واحس جنه حلم جنه خيال ما كنت بمثل وعيي لما كنت اسوي بوش اكاد اجزم انهم اعطوني حقنه ما ههههههه


واسمع صراخ بنتي فجر اذني واااااا وااااااا واااااا واااااا وجسمها ابيض ويقطونها علي صدري فعلا فجرت اذني خخخخخخخ وانا بين الخيال والواقع اشوفها بعيوني وترفس وتتحرك والدنيا تدور فيني فديتهااااا الي ترفسني ابطني هذي هي جداااامي

يارب يرزق كل محروم بالذريه الصالحه


وقعد يخيطني الدكتور وانا اشوف بس احس بدوووووخه والغرفه مو ثابته كل شي يدور وحطولي كمام قالتلي السستر انه اكسجين عاد مادري هل هو الكمام اللي يخدر اللي يخلي الوحده تخربط ولالا بس ماخربطت انا

الساعه 6

خلص الدكتور الخياط وطلع هو والسسترات

وحسيت بعوار الخياط وتجيني نوبه بجي مو طبيعيه واقعد ابجي وابجي واشاهق جني بموت ودموعي اربع اربع من البجي مادري شفيني هل ابجي من العوار ولا من الصدمه ولا من الهبوط الحاد بالهرمونات بعد الولاده وتجي السستر ليش يبجي واقولها مافيني شي روحي

بعد ساعه كامله من البجي هجعت وتعوذت من ابليس وحمدت الله علي النعمه وعلي السلامه وقلت بنفسي عوار الخياط مرح يطول كلها جم يوم ويروح


ساعه 8 ودوني غرفتي

حجزت الجناح الملكي بدار الشفا

الخدمة ممتازه من سسترات واكل ونظافه وتعقيم وتنظيف شي يفتح النفس

وثاني يوم سويت استقبال

لله الحمد والشكر والمنه علي هبته اول العطايا


ادري طولت بالكتابه بس سهرانه حاليا وبنتي نايمه وماكو شغل هههههه


ادعولي بخدامه زينه اهي اهي

 

[مذهلة2013]

الحمدلله على سلامتكم

 

[# غنوجة بيبي #]

الحمدلله على سلامة اللي ولدو

والف مبروك للحوامل الجدد

 

[qoot]

طموحه بزياده حمدلله ع سلامتج ومبروك ماياج

ياحلووووج وياحلو كلاامج