رجيمي عند الدكتورة ميري بالعوضي سنتر اللي بشرق....امدحها وانا كلي ثقه فيها

[ليالي نجد]

مرحبا بنوتات اخباركم

طبعا بعد جهد جهيد مع الوزن الثابت واللي لوع جبدي موراضي ينزل مع انواع الرجيمات اللي جربتها من النت توكلت على الله ورحت حق دكتورتي القديمه اللي قبل 4 سنوات نزلت عندها 17 كيلو بدون لا احس بتعب او دوخه او اعاني من تساقط شعر او غيره من سلبيات الرجيم

طبعا اول شي خذت تحليل الانسولين واتقول هذا اهم شي علشان الشهيه واتحدد نوع الرجيم منه

وكانت بتسوي لي تحاليل ثانيه علشان فقر الدم وقلت لها مايحتاج توني مسويه وكل شي اوكي علشان توني والده بقيصريه ولازم افحص الدم كل شهرين او ثلاث لاني فقدت دم واجد بالعمليه

المهم نظامها الاسبوع الاول قالت يمكن تنزلين اربعه او خمسه مع الرياضه المنتظمه واذا بدون رياضه 3 كيلو
طبعا خيتكم ماتسوي رياضه لان جهازها المشي خربان والحر والغبار عامل عمايله فنزلت 3 كيلو بس مثل ماقالت

ملاحظه : قلت لها جربت رجيم دشتي وتزلت بس كيلو ووقف وزني وزفتني وقالت شلون رجيم مافيه فواكه وبعض الخضروات ؟؟؟!! شلون جسمج يعوض الفيتامينات اللي يفقدها بالرجيم....سوي اي رجيم الا رجيم اتكنز اللي هو يستخدمه الدكتور حسين دشتي....يرفع الكولسترول والضغط
والفواكه ميزتها اتوفر للجسم الفيتامينات والمعادن اللي يحتاجها وسعراتها الحراريه قليله جدا

المهم قرقت واجد وهذا النظام ان شاء الله يفيدكم وانا مبلشه الاسبوعين اللي وراه بس اخلصهم احط لكم النظام والنتيجه
ملاحظه : هذا النظام صرفته تبع عاداتي الغذائيه وكنت ماعطلت بعدني وما اتغدى فلاحظوا مافي وجبة غدا
الاسبوع الاول

الصبح على الريق : كوب ماي دافي + نص ليمونه معصوره معاه (نتيجتها فتاكه من تصفية الجسم من السموم )

بعدها بنص ساعه وقبل الريوق : حبة فواكه (برتقاله - تفاحه - 2 كيوي )

الفطور بعدها عالاقل بساعتين : 2توست اسمر + جبن او لبنه قليل الدسم او بيضه + سلطه (خس- طماط-خيار-بقدونس ....الخ ) حسب الرغبه واحط معاهم عصرة ليمون وشوي تتبيلة السلطه ريحان بالزعتر يمي يم لذيذه والله جربوها + شاي او نسكافيه لايت نروبيكانا موجود بالجمعيات

بعدها بساعتين :عصير انانس او برتقال للرجيم مثل كي دي دي او لبن قليل الدسم + خمس تمرات

العصاري بعدها عالاقل باربع ساعات : حبة فواكه او 4بسكوت ماري + شاي حليب او كابتشينو لايت

قبل العشا بساعه عالاقل : مشي او ممارسة رياضه بسيطه لمده نص ساعه عالاقل

العشا: شوربة خضار اما جاهزة مثل Honig او بالبيت اتسوينها مع فلفل اسود وملح لكن نهت عن شوربة كنور اتقول سعراتها كثيره + مشويات ( 2همبورجر او ربع دجاجه مشويه او 2كباب او 8 قطع شيش طاووق او سمك مشوي ) + دايت

ان شاء الله يعجبكم

ودمتم سالمين

ادعوا الله يثبتني واوصل للوزن المثالي يااااااااااااااارب

 

[نشميه]

يسلمو حبيبتي على الرجيم الحلو وانشاء الله ينكسر الون الثابت وتضعفين بس المشكله بأغلبيه الرجيمات فيهم فواكه وخضروات وطبعا انا ما اكل اي نوع منهم ادري ان جذي مو زين بس شسوي حاولت بس ما اقدر

 

[نوال]

مشكورة وايد حلو الرجيم

بس مايصير اغير بالعشاء احط سلطه بدل الخضار

 

[NoWay2know]

الله يعطيج العافية

 

[أوكسجين]

يعطيج العافيه

 

[حبنا الله عليه]

الله يتم عليج وانتي بصحه وعافية

ومشكوره على نقل التجربة

 

[مخروووشة]

جزاج الله خير خووش رجيم

شربي عقب الوجبة شاي اخضر عجيب

 

[قبيطه]

والله ميرى تهبل وايد امينه الحلو فيها مايهمها انج بس تضعفين تخاف على الوحده وتشجع حتى لوتنزلين نص كيلو بس العيب الوحيد فى العوضى سنتر مواقفهم تلوع الجبد والريحه تمنع الشهيه يهنى اول ماتسفطين تبدين الرجيم

 

[انصار]

دكتورة ميري تهبل حبوبه

الله يوفقج يارب ويتمم عليج
وياريت لو تحطين باجي الاسابيع اذا عندج

 

[snow^white]

مشكووووووووره
وميري تينن انا نزلت وياها 5 كيلوا

موفقه يارب

 

[ليالي نجد]

مشكوووورين على المرور الطيب وعسى ينفعنا وياكم اجمعين

نوال حبوبه عادي تقدرين اتغيرين براحتج بس بشغله سعراتها الحراريه تماثل سعرات الخضار او اقل منه يعني حسب تقديرج والسلطه سعراتها قليله واتشبع

انتظروني مع باقي الاسابيع مع النتيجه وادعوا لي ربي يثبتني واقدر اقاوم واكمل

 

[ليالي نجد]

قبيطه لوووووووووووووووووووووووووووول

انا اصفط بمواقف البنك ورا وسيييييعه وماكو احد

 

[نوال]

مشكووووره حبيبتي على الرد والسلطه سعراتها الحراريه قليله

 

[قمر ضاوي33]

بالتوفيق حبيبتي بالريجيم

ميري دكتورة ممتازة للريجيم ما تحرم الوحدة من اي شي وتنزلين بصحة وعافية

عاد كملي معانا باقي الأسابيع بس مع غدا لو سمحتي ( :

 

[ورد الجوري]

الله يعطيج العافيه مبين عليه خوش ريجيم

بس ممكن سوال


وين الغدا ؟؟ فيه غدا او ماكو ؟؟؟

وشكرا

 

[ليالي نجد]

نورتوا قلبي
ورده انا قلت لها مابي غدا لاني بالدوامات ما اتغدى ما اشتهي الحمدلله بس الوزن طاق بسبة الكاكاو احم احم ما اقاومهم بس شسوي بحاول وامري لله

هذا نظام حق اسبوعين وراهم وارجع واقول اهي حاطته حسب عاداتي الغذائيه وشنو اشتهي :

الاسبوعين الثانيين :
الصبح او الضحى او متى ماقعدتي من النوم : كوب ماي دافي بليمون او بدون براحتج لانها اتقول خلاص الدهون المترسبه في المعده راح اتروح بالاسبوع الاول وماله داعي ليمون

بعدها بنص ساعه : حبة فاكهه او 2 شابورة بشاي حليب او 3 تمرات علشان مستوى السكر في الدم يتعدل ومايتبعه من شهيه نتيجة لانخفاض السكر

الغدا : اختاري اللي يعجبج من الخيارات الثلاثه
1) شوربة خضار جاهزة (سبق ذكرها بالرجيم الاول ) +سلطه + ربع دجاجه مشوي+كوب لبن خالي الدسم

2) سلطة خيار بالروب (طبعا روب قليل الدسم) +2كباب او همبورجر + كوب خضار سوتيه + دايت اي نوع

3) شوربة خضار +سلطه او تبوله +شمك مشوي + حبة فواكه

ملاحظه : احرصي تكون الشوربة واللبن والفواكه في بداية الوجبة علشان تترس المعده

العصاري وبعد الغدا بساعتين على الاقل : حبة فواكه او 4 بسكوت ميري + شاي حليب

بعدها على الاقل بساعتين على الاقل: مشي او رياضه بسيطه نص ساعه على الاقل

بعد المشي عصير برتقال طبيعي او كي دي دي او حبتين فواكه
العشا : (حسب اختيارج للغدا يتحدد اختيارج للعشايعني انتي رتبي الغدا براحتج لثلاث ايام ومنه شوفي العشا شنو )
1) نفس ثاني يوم غدا

2) نفس ثالث يوم غدا

3) نفس اول يوم

ملاحظه : العشا نفس الغدا بالضبط بس بدون لبن او فواكه

من الاسبوع الاول من هذا النظام نزلت كيلو ونص وباقي لي يوم منه يمكن انزل جم غرام مع اني مو منتظمه بالمشي والله.... يوم اي وعشره لا

ان شاء الله اتكونون استفدتوا ولاتنسونا من دعواتكم الطيبه