** رحلتي الثانيه لاسطنبول شتاء 2009 **

[bambena]

السلام عليكم


شلونكم بنات

للي تابعت واللي ما تابعت هذا رابط رحلتي الاولى لاسطنبول بالصيف


http://www.q8yat.net/showthread.php?t=328798



والحين ان شاءالله بانزلكم صور رحله الشتا

في ناس تفضل الصيف لكن انا الشتا عندي واااايد احلا

صج برد موووووووووووووووووت

لكن يهبل


للاسف لانها ثاني مره ماعندي صور كثر ذيج الرحله

ولا عندي ترتيب للاحداث لاني الصراحه ما اذكر :|

المهم احط لكم الصوره والتعليق عليها


تابعوني..................

 

[أم عزيـز]

في انتظار تقريرج مع الصور يالغاليه
لا تطولين علينا ناطرينج

 

[bambena]

ان شاءالله تابعيني حبيبتي بس قاعده اعدل الصور

 

[نــوف]

متابعينج bambena ....

وناطرين تقريرج ..

 

[bambena]

حياج نوف

 

[bambena]

بنات هالرحله مختلفه

يعني سفرة اجانب

اخترنا فندق اللي يسمونه بوتيك هوتيل جنه بيت صغير والسفره كانت مشي بمشي واكل بمطاعم شعبيه


تابعوني

 

[bambena]

حبينا نجرب اسطنبول بالشتا

استغلينا عرض الجزيره وحجزنا

هذا موقعهم

www.jazeeraairways.com


عاده طياره اسطنبول تطير 7 ص لمده 3 ساعات تقريبا توصل 10 بتوقيت تركيا او 10 ونص

 

[bambena]

هالمره تهورنا

حجزنا فندق من اللي يسمونهم بوتيك هوتيل الصغار

المره اللي طافت قعدنا في تقسيم وماحبيتها

منطقه السلطان احمد وايد احلا واشرح واونس

وطابع فنادقهم اغلبه من هالطقه

عجبني الفندق وفعلا كان حلو بس ماينفع للي ما يحب المشي الا اذا بتركبون تاكسي

احنا نركب مترو ونحب نمشي وايد نفس الاجانب

لازم نمر بالممر كله متروس فنادق بعدين ندش على بازار اسمه ارستا بازار وبعدين باخر البازار نطلع على منطقه سلطان احمد وفيها المترو

 

[bambena]

موقع الفندق

وارد اقول اللي بيحجز فيه معناته بيمشي مسافه او يطلب تكسي لي الباب

للامانه موظفين الفندق يهبلون حبوبين حيل يطقون الباب نص الليل اول ما نرد بصينيه القهوه التركيه السنعه

واللوبي فيه عربانه 24 ساعه شاي وقهوه وكب كيك وبسكوت

وصغييييير ونظيف ومرتب وخدمتهم ممتازه


موقعهم


www.fermanhotel.com

 

[bambena]

بداية صور من موقع الفندق

 

[bambena]

حجزنا كان اوشن روم مع الريوق والتوصيل من والى المطار
وعطونا عشا هديه وحرام مارضوا ندفع للقهوه التركيه اللي كانوا اييبونها لنا فشلونا الصراحه شحليلهم

 

[bambena]

صور للفندق من تصويري

اللوبي

 

[bambena]

ممر الغرف

يمين ويسار الفراش حاطين اجياس فيها نوع من البهارات ريحته وايد حلوه

 

[همسQ8]

خوش فندق وينة عن سنتر اسطبول

 

[bambena]

ماعندهم سنتر

مناطق

يعني المولات واماكن المطاعم بكل مكان

هذي تعتبر احسن منطقه للسياح سلطان احمد

ترى الفندق نتفه بس يهبل شويه مشي عن اياصوفيا وتوبكابي والمترو

 

[نــوف]

حلوو تصويرج

والفندق نظيف ومرتب

كملي ناطرين الباجي ..

 

[bambena]

المنظر اللي تطل عليه الغرفه

بيوت وسكه قطار والبحر

المنطقه اللي بره الفندق ماتملين من التمشي فيها

كلها محلات صغار ومطاعم وقهاوي وفنادق ممر شطوله كله فنادق


مقتطفات

هذيل كلهم فنادق

 

[bambena]

شكرا نوف

 

[bambena]

نكمل

الشارع اينن انا احب هالاماكن واحب اتدعس واستكشف

والجو عجيب ومطر والمحلات تشوق ويبدي يوسع الشارع وتكثر المطاعم

 

[bambena]

وباخر الشارع Arsta Bazar

بازار صغير بس عنده بلاوي استكانات وخواتم من اللي يبيعونهم هني بالافنيوز والمارينا دبلات دبلات الاسعار وجناط