انطباعي عن امريكا
نيويورك
نيويورك من اشهر الولايات في امريكا ولما طبيتها حسيت صج انا في امريكا
شدتني المباني وناطحات السحاب
وحبيت كل شي كنت اشوفه بالصور او بالأفلام وشفته على الطبيعه
بسسس ......
كل اللي قالوا لا تطولون فيها وايد كانوا صاجين
المدينه حدها مزعجه مزعجه مزعجه كأنكم قاعدين بالقاهره
زحمة الناس شي مو طبيعي خاصة بوقت الظهر حزة البريك مالهم الظاهر ووااو افواج من الناس تعبر الشارع وعيونهم بقمة راسهم ،، وافواج بالكفتيريات تشوفونهم ياكلون اكلهم بسرعه بسرعه
والناس اعصابهم اللهم ياكافي تحسوون ضغوووط الحياة تطلع بتصرفاتهم ،، مع ان الأمريكان وايد حليويين بس في نيويورك لأ شي موطبيعي
اما التكاسي هذا عالم ثاني ،، قبل لا تركبين التاكسي تشهدي على روحج ،، انا عندي لعبة قطار الموت وايد اهون من تكاسي نيويورك
سواقتهم تخرررررررع جنكم في فيلم آكشن ،، تخيلوا في زحمة الشوارع وزحمة الناس والباصات يسوووق فيكم تاكسي مينووون واااي نقعد ايدنا على قلبنا ونقول امبيييه الحين بندعم وااااااااي الحيين بيشيل الأوادم كلهم جذيه من غير استثناء ،، وعادي عندهم يوقفون نص الشارع
والله مره شوفة عيني باص طول بعرض فجأة وقف نص الشاااارع والسايق فاتح الباب ويكلم واحد بالشارع والسيارات هرنااااااااااات اووووف
ويمكن مرتين نركب مع تاكسي ويتهاوش ،، تخيلوا مره تاكسينا تهاوش مع واحد راكب قاري و مر جدامه بغى يدعمه جان يهاوشه جان ايي هذاك ويتفل بويهه لوول وانتوا بكرامه وسب وحالتهم حالة واحنا جذيه اشكالنا ورا >>>>
ومره واحد قعد يستعرض علينا مهاراته بالسواقه وااااااي زرر عقلنا بغى يشيل له شايب يعبر الشارع واحناا نصرخ لاااااااااااااااااااااااااااء ويطق له هرن طاااااااااااااااااااااااااااط وينقز نقزه الريال وعليه زين ما وقف قلبه من الخرعه
والازعاج الثاني اللي اهو التلوث ،، تلوث بكل ما يحمله من معاني
تلوث ضوضائي تلوث بيئي كل انواع التلوث ،، طبعا الهرنات وسيارات الاسعاف والمطافي شغالين طول النهار والليل ،، العمارات حدها عاليه تحسون نفسكم محبوسين داخل علبه ماتشوفون السما ،، ووانتوا بكرامه بواليعهم عزكم الله شي عجيب غريب تطلع غازات لا تسألون شنو لأن بصراحه مادري شسالفه
شوفوا
هذا طول منتوا ماشين في الشارع بتشوفون هالبالوعه ام غازات
وما ننسى الموقف اللي صارلنا واحنا بعز نومتنا الصبح والا فجاءة انذار الحرايق يشتغل بالغرفة ويشب ويطفي متتتتتتتنا متنااا من الخوووف ويتكلمون بالمايك يقولون التعليمات وااااي واحنا بالدوووور 16 وننزل الدري وااااي وآخر شي يطلع انذار وهمي لووووووووووووووول
على كثر ما اخترعنا على كثر ما متنا من الضحك على اشكالنا خخخخخخخخخ
هذي حقيقة نيويورك اللي حبيتوها بالصور
بصراحة نيويورك حلاتها 4 ايام وايد عليها لول ،، بس ما اتمنى ازورها مره ثانيه خلاص
حتى سوقها متعب ترى صج انها اشهر مكان واكشخ مكان للتسوق بس والله متعب ،، انا احب مجمع وكل شي يمج ومتى مابغيتي تريحين في كفتيريات وقعدات ،، بس في نيويورك المحلات والبوتيكات بالشوارع الكبيره وعشان تروحين من محل لي محل تعالي امشي وعبري من شارع لي شارع
مادري ما ارتحت لها بصراحة
بس في ناس وايد يحبونها وانا اعرف وحده تقوول اموووت في نيويورك مره قعدت فيها شهرين !!
مادري انا ماتحملتها .....
ايي ونسيت لا اقولكم ،، نيويورك يمها مدن وايد حلوه ويمدحونها مثل نيو جيرسي و بوستن وواشنطن دي سي قريبه من نيويورك
