رحلتي لدبي

[اميرة الغيد]

السلام عليكم ورحمة الله وبركاته
اشلونكم حبيباتي يا احلى منتدى
انا توني رديت من رحلتي لدبي رحت 4 أيام وقلت ابي احط لكم الرحله عشان تستفيدون وحق اللي يبي يروح انا جاهزه لأي سؤال .
على فكره انا ماصورت كلش بس ابي احط لكم صور منقوله .
اول شي رحلتنا كانت على الخطوط الكويتيه يوم السبت الساعه 10 و45 دقيقه المفروض تطير الطياره ، طبعا لازم تتاخر شوي ، ركبنا الطيارة الكويتيه وصار وقتها تقريبا ساعه وثلث قبل مانوصل مطار دبي صار غيم وايد بالجو فقام الكابتن ينزل الطياره شوي شوي الظاهر الغيم كان حاجب الرؤيه لان انا اول مره اشوف غيم هالكثر يمكن من الرطوبه ، المهم وصلنا لمطار دبي اول ماطلعنا منه انصدمنا بالرطوبه صحيح ان الكويت حر ودبي الحراره اقل بس الرطوبه تخلي الواحد يتلصق هههههههه
المهم خذينا تاكسي ورحنا لفندقنا بشارع الرقه اسمه جراند موف 4 نجوم
هذي صورة الفندق من بره

 

[اميرة الغيد]

هذي صورة مدخل الفندق

 

[اميرة الغيد]

هذي صورة لوبي الفندق

 

[اميرة الغيد]

الغريب بالسالفه ان اللوبي كله هنود وباكستانيين وايرانيين ، مافي عرب ابدا ، الهنود هادين عيالهم يلعبون ويركضون باللوبي كانهم بالحديقه مالت بيتهم واللي لابس سكيتنج رول وناقص اييبون معاهم كره ويتبارون باللوبي
هذي صوره ثانيه حق اللوبي

 

[اميرة الغيد]

الفندق مستواه معقول وبعض الديكور حاطين معاه احمر ، ويم اللوبي في كافيه صغير حق القهوه والكيك
هذي صورة الكوفي شوب

 

[اميرة الغيد]

صعدنا لغرفتنا بالدور السادس حلوة مرتبه وديكورها بعد معاه احمر
هذي صورة الغرفه

 

[اميرة الغيد]

المهم ريحنا بالفندق شوي وحطينا اغراضنا وقت وصولنا كان زين يعني العصر خلصنا كل شي عشان نبدي بالفراره بالمجمعات لأن اهم شي بدبي المجمعات والاسواق .
اول يوم العصر مبكر خذينا تاكسي ورحنا حق مجمع الغرير ، اغلب المحلات اللي عندهم عندنا مثلهم بس وانا افتر لفت انتباهي محل ماكنت اتوقع في منه بدبي محل baby phat
خذيت منه هالجنطه

 

[اميرة الغيد]

وخذيت بعد منهم ساعة بيبي فات هذي



بالطبيعه احلى الوانها من داخل تتغير

 

[اميرة الغيد]

بعد خذيت منهم عطر حلو بس خفيف حيل بسرعه يروح
هذي صورته

 

[fona]

يعطيج العافيه حبوبه
والحمدلله على سلامتكم

 

[اميرة الغيد]

لما طلعنا رحنا نتمشى حوالين المجمع كنا ندور مطعم عشان نتعشى صدفه لقينا مطعم مأكولات بحريه جان يتذكر زوجي ان رفيجه قايل له عنه ويمدحه اسمه الشوكه الذهبيه تختارين السمك او الربيان اللي تبينه ويسوونه بالطريقه اللي تبينها مشوي او مقلي نتعشينا ورحنا نتمشى حوالين المجمع .

 

[اريام القحطاني]

الله يعطيك العافيه

 

[اميرة الغيد]

واحنا رايحين نتمشى حوالين الغرير شفنا مجمع قريب منه اسمه الريف مول مادشينا له ويم المجمع هذا مبنى كبير حق مارك سبنسر يوم دشينا الا المجمع دورين الارضي للرجالي والاكل والدور اللي فوق نسائي والله عجبني اكثر من اللي بالكويت .
شريت منه ساعه سيرها ابيض وككاو اللي قرطاسه بنفسجي اللي يجيبونه بضاعه مع ككاويات لندن .
وخذيت منه هالعطر ما ادري في منه بالكويت والا لأ هذا اهوه العطر .

 

[اميرة الغيد]

اللي ردوا علي مشكورين على ردودكم وتابعوا باجي الموضوع

 

[مـزيـااان]

واااو روعة وحمداللة على السلامة ودبى انا رحت لها العام حلوة بس كل اللى عندهم عندنا ولكويت احلى

 

[اميرة الغيد]

شريت عطر ثاني من مارك سبنسر حلو بس طلع خفيف شوي بعد ما ادري في منه بالكويت والا لأ
هذي صورة العطر

 

[اميرة الغيد]

طلعنا من مارك سبنسر قعدنا اكثر من نص ساعه ننطر التاكسي مالقينا ليما تعبنا وكأنا شايفين معجزه يوم شفنا تاكسي ورضا يوقف لنا احس اكبر مشكله بدبي مشكلة التاكسي صادفتنا وايد هناك هالمشكله .

 

[اميرة الغيد]

ثاني يوم برحلتنا يوم الاحد الصبح رحنا للسوق الصيني اسمه سوق التنين ، الطريج كان بعيييد حيل عن فندقنا اللي كان بشارع الرقه ، السوق هذا بينه وبين عمان 100 كيلو بس يعني اقل من ساعه .
هذي صورة السوق الصيني

 

[اميرة الغيد]

هذا السوق الصيني من بره

 

[اميرة الغيد]

لما دخلنا للسوق لقينا ان السوق كبير حيييييييييييييييل ومن كبره مجزئينه صوب للملابس وصوب للالكترونيات وصوب للجناط وصوب لاغراض البيت وصوب للادوات الكهربائيه وغيره وغيره اشياء وايد .
هذا السوق من داخل