رحلتي لدبي

[اميرة الغيد]

الملابس هناك خامهم ردي كلش وخياطهم خربوطه يعني ماينفع ينلبس والجناط انواع وايد بس نوعيتهم النايلون الردي ومو حلوين مع ان سعرهم رخيص الواحد ما يتشجع ياخذ منهم ، الشي اللي يستاهل العاب البلاي ستيشن ارخص بوايد من الكويت السوني والبي اس بي والجيم بوي ، وبعد اكثر شي عجيني بهالسوق الكفرات اللي على ماركات تقليد مثل اللي عندنا اهني بس اسعارهم ارخص .

 

[اميرة الغيد]

الحمد لله السوق الصيني في يمه تكاسي ردينا بسرعه ، العصر رحنا مجمع ابو هيل معروف للعبي والملافع ، المجمع هذا مو كبير وفي محلات كل شي بس اكثر شي محلات العبي والملافع ، اللي يميز شغلهم ان عندهم خياطين محترفين يعني اغلب شغلهم يدوي ينقشون لج الرسمه بفن واتقان ماشاء الله عليهم مو اللي عندنا اهني طايحين له بس بتلزيق الفصوص هذا كريستال اصلي شوارفسكي وبس مايعرفون غيره ، البايخ بهالسوق ان كله مخازز يعني الحريم يمرون يخزونج والرياييل يمرون يخزونج وكل من يمر يخزج ، لدرجة ان زوجي كان بيطلعني من هالمجمع بس عشان المخازز اللي عندهم ، يمكن لاني كنت رايحه بدون عبايه وحاطه مكياج ، مع ان مكياجي خفيف بس اهمه مايحطون كلش اللي بهالمجمع .
المهم طلعنا من المجمع وقعدنا يمكن ساعتين ندور على تاكسي المكان هذا مايمرون فيه التكاسي الا قليل كلش واذا مروا يكون معاهم ناس واذا مامعاهم ناس مايرضون يوقفون لنا ، المهم بعد ماتعبنا وانهد حيلنا حصلنا لنا تاكسي اخييرا ورضا يودينا الحمد لله على السلامه اذا شفنا تاكسي جنا شايفين معجزه .

 

[اميرة الغيد]

اليوم ثالث يوم لنا يوم الاثنين ، يعني لازم اليوم نفتر عدل عشان باجر ماشين ان شاء الله
قررنا نروح الصبح الامارات مول طلبنا لنا تاكسي ومشينا الطريج طويل ماشاء الله دبي كبيره
المهم وصلنا للامارات مول وهذي صورته من بره

 

[اميرة الغيد]

هذي بعد صوره للامارات مول



الامارات مول عباره عن مجمع كبير واهوه برايي احلى مجمع بالامارات

 

[اميرة الغيد]

اغلب المحلات اللي فيه عندنا بالكويت ، فيه صوب حق السينمات وصوب حق المطاعم
هذي صوره حق المجمع من داخل

 

[اميرة الغيد]

في شغله وحده اظن بهالمجمع موموجوده عندنا واهيا جناط كاثي اللي اييبونهم بضاعه ، موجودين في باريس غاليري طبعا لازم آخذ لي وحده ، بس سعرهم اغلى من الانترنت بوايد .
وهذي صورة جنطة كاثي بس مو الموديل اللي خذيته ، الجناط هذي بالطبيعه احلى لان خامتهم حلوه

 

[اميرة الغيد]

الحين يينا للجزء الاحلى بهالمجمع ، احلى مكان عندهم صالة التزلج على الجليد
المكان هذا حاطين فيه ثلج وشجر ناثرين عليه ثلج وزحلاقيات ثلجيه وتلفريك بعد ودرجة الحراره 3 او 4 تحت الصفر المكان مسور بالجام دار مداره يعني اللي ايون للمجمع يتسوقون ومايبون يدشون للثلج يتفرجون على المكان منظره حلو .
وهذي صور من صالة الثلج بالامارات مول



وهذي صوره ثانية

 

[أم علاوي حبيبي]

يعطيج العافيه اخت سالميه على هالشرح
بس ترى الامارات معروفه اهلها فيها أقليه اللي تلاقينهم كله الهنود اهمه الاكثريه في البلد عن المواطنين
واعتقد الكويت كل شي متوفر فيها حق اللي بيتسوق لكن اهمه يمكن مجمعاتهم اكثر ومهتمين بديرتهم اكثر احنا ظروف الحرب اثرت علينا
ومع هذا يعجبني في الامارات ملابس الحريم بالعبايه السوده اغلبهم يلبسونها فيه حشمه ووقار

يعطيج العافيه على التقرير وانشالله نلحقج على دبي

 

[اميرة الغيد]

هذي بعد صور الثلج بالامارات مول





وهذا التزلج بالثلج



وهالصورة

 

[اميرة الغيد]

شوفوا الشي الغريب تلفريك داخل المجمع بس عاد الواحد عليه انه يتخيل انه عند الجبل

 

[اميرة الغيد]

حمال الاسيه صح انا نادرا ماشفت اماراتيين بالامارات حتى يوم رديت اهلي يسألوني اشلون الامارات اقولهم الامارات مافيها اماراتيين شفتهم بالمطار بس الموظفين وبمجمع ابوهيل حريم بس
تابعوا الموضوع معاي اتمنى يعجبكم

 

[اميرة الغيد]

خلصنا من الامارات مول وطلعنا لقينا التكاسي بره ماشاء الله ، قررنا نختصر الوقت ونروح حق مجمع ابن بطوطه ، كان قريب من الامارات مول .
هذي صور للمجمع



وهذا بعد

 

[اميرة الغيد]

الحلو بالمجمع ان كل صوب مقسمينه على ديره يقولون لانهم مسمينه ابن بطوطه حاطين الاماكن اللي راح لهم الرحاله العربي ابن بطوطه ، يعني تلقون صوب للصين اول شي مسمينه بوابه الصين ، بعدين صوب للهند ، وغيره وغيره ، بس يكون المكان هذا بس بالديكور يعني صوب الصين مثلا مايكون فيه بضايع صينيه لا بس يكون الديكور جذي بس المحلات اغلبهم اللي عندنا بالكويت مثلهم .
هذا ابن بطوطه صوب مصر (بس الديكور مو البضايع )



يقولون هذي السفينه مثل اللي راح فيها ابن بطوطه حق رحلاته حاطينها باول المجمع وراها على طول صوب الصين

 

[اميرة الغيد]

هذي صور للمجمع

 

[اميرة الغيد]

هذا صوب الهند

 

[اميرة الغيد]

الحين وصلنا لصوب الصين واهو المكان الوحيد اللي شريت منه
خذيت عطر فالنتينو من باريس غاليري

 

[اميرة الغيد]

هذي صور صوب الصين

 

[اميرة الغيد]

نكمل صوب الصين

 

[اميرة الغيد]

خلصنا من مجمع ابن بطوطه مبكر وقررنا نروح حق سوق نايف ، اهو عباره عن سوق شعبي فيه دواعيس وفيه محلات حق الشغلات الشعبيه ، اكثره هنود ، سوق رخيص بالنسبه حق باجي اسواق دبي ، فيه مجمع اسمه المنال فيه عبي حلوه وساعات شكلها مثل الاكسسوار حلوه ، خذيت ملافع عليهم تطريز شغل يدوي حلو الملافع عندهم اسعارهم اغلى من الكويت حتى لو المحل عادي وبسوق شعبي مثل سوق نايف ، انا اتكلم عن اللي فيهم شغل يدوي بس باجي بضايعهم رخيصه ، خلصنا من سوق نايف وطبعا وقفنا ساعتين ننطر تاكسي كالعاده بدبي ، يلله يمرون تكاسي بهالسوق واذا مروا يكون فيهم ناس واذا مافيهم ناس مايرضون يوقفون لنا ، تبهدلنا وانهد حيلنا من النطره يلله رد علينا التاكسي وودانا للفندق.

 

[اميرة الغيد]

الحين اعذروني ابي آخذ استراحه وبالليل ان شاء الله اكمل لكم الموضوع
بقى بس آخر يوم ، يوم ردتنا ابي احط لكم صور المطار ان شاء الله