روآإآيـة غمووض خآإآلـد
- بادئ الموضوع ŦSЩД3УФИУ
- تاريخ البدء
اْستلمــــــــؤؤ ,,,
* 22 *
الساعة 12 في الليل
رن جوالي ,,, هذا اكيد خالد ,,, القيت نظرة وفعلا ( خالد يتصل بك )
انا = هلااا خالد
خالد = هلا فيك ,,, السلام عليكم
انا = وعليكم السلام ,, وش الموضوع اللي تبي تكلمني فيه
التفتت لمصدر صوت الازعاج اللي جا مع دخلت خلود للشقة ,,, وقفت خلود وطيرت عيونها فيني
خلود بهمس = الى الحين تكلم .؟
بغيت اضحك ,,, خلود راحت وانا اكلم وجت وانا اكلم بس طنشتها وركزت مع خالد
خالد = امممم وش رايك نعتمر انا وانت ,, الحين مالك عذر لا شغل ولا مشغلة
سكتت ومارديت
خالد = هذاك اليوم كنت توك متوظف ,,, والحين ماعندك شي ,,, هاه وش قلت
انا = واخواني
خالد = كنت عارف انك بتقول واخواني ,,, بنعتمر مع اهالينا ,,, انا مع خالي وخالتي وانت مع اخوانك ,,, الصراحة ودي اخذ امي واخواتي بس صعب الحين وفكرت اخذ خالي وخالتي بدالهم ,,, هاه وش قلت
انا = وقلت لخالك .؟
خالد = لا ,,, اول شي ابشوف عنك واذا وافقت قلت لخالي
حكيت راسي ,,, الصراحة فكرة مش بطاله بس
انا = تقدر انت تعتمر وانت بحالتك هذي .؟
خالد = وش فيها حالتي .؟
رفعت حواجبي ,, مسوين له عزيمة لطلعته بالسلامة ويقول وش فيها حالتي
انا = تقدر تعتمر وبدر مشرّحك قبل اسبوع ,, تقول طبيب مشرحله مريض
خالد = هههههه ايه اتقدر افاااا عليك ,,, وترانا اذا وافقت انت بنمشي يوم الاثنين ,,, يعني بتصير مكة فاضية
تفاجأت
انا = يوم الاثنين والدراسة .؟
خالد = ياااخي كلها يومين وحنا راجعين
انا = طيب وليه ماتخليها خميس وجمعة وش حادك على وسط الاسبوع
خالد = ابروح للرياض خميس وجمعة
شهقت ,, مدري ليه صرت اخاف اذا قال ابروح للرياض ,,, المشكلة اهله هناك و بدر وربعه هناك ,,, يعني مافيه مجال امنعه ,,, و ماسألت ابراهيم وش ناوي عليه وهو بلغ الضابط والا لا
خالد = الوووووو
انا = آآآآ معك ,,, خلاص اقول لاهلي واشوف
خالد = اوكي ,,, بس حاول تقولهم اليوم ,, عشان الاحد تتجهزون والاثنين نمشي
انا = اهااا
وسكرت عنه ,,, والله فكرة حلوة ,,, حنا من زمان ماعتمرنا (ابتسمت بحزن) اخر مرة مع امي وابوي قبل سنتين
خلود = ودايم تقولي انتم يالبنات اذا مسكتوا التلفون ماتسكتون ,,, هذا انت ,,, رحت وجيت وانت الى الحين تكلم
انا = هههههههههه خلود يامجنونة يوم رحتي هذا اتصال ويوم جيتي اتصال ثاني بس صدفة وافق الاتصال الثاني مع جيتك
خلود وهي تجلس = ايه ايه صدقتك
انا = المهم فيه موضوع ابي اكلمك فيه
التفتت لي وعطتني بالها
انا = وش رايك نعتمر .؟
شهقت خلود من الفرحة والمفاجأة
خلود = ايه ايه ايه ايه
انا = بسم الله الرحمن الرحيم هههههههههههههه شوي شوي
خلود بفرح = ايه ايه نبي نروح
حكيت راسي ,,, الحين وشلون اقول لها اننا مع خالد واهله
انا = اكيد تبين تروحين .؟
خلود = طبعا وفيها شك
انا = بس ترا ماحنا رايحين لحالنا بيسافر معنا احد
قطبت خلود حواجبها مستغربة
خلود = معنا احد ,,, منهو .؟
انا = ابو عبد الله وام عبد الله بس ينتظرون موافقتنا ,,, هاه وش رايك .؟
ابتسمت خلود = احلى شي مالهم لا عيال ولا شي ونقدر ناخذ راحتنا وااااااااااو ايه خالد بنروح بنروح ,,, الله واخيييييييرا بنعتمر
انا = احم ,,, وخالد معهم ,,, خالد يعتبر ولدهم
سكتت خلود وتغيرت ملامحها من الفرحة للضيق ,,, بسم الله والله اكبر بتبدا الهوشة الحين
خلود بعصبية = ويرز وجهه معنا ليه ,,, ياخي ماقدر اخذ راحتي ,,, لا ,, لا يروح
انا = خلود اكيد بنصير حنا بشقة وهم بشقة او الحريم بشقة والرجاجيل بشقة
سكتت خلود شوي وهمست ( ايه صح )
انا = اذا كنتي ماتبينا نعتمر وتضيعين الفرصة علينا خلاص كيفك
خلود = لا لا انا ماصدقت تقول بنعتمر ,,, الشكوى لله طيب متى قال ابو عبد الله بيسافرون .؟
خلود فاهمة غلط تحسب اللي مخطط للسفر ابو عبد الله ابتسمت خلها على عماها احسن ,,, المهم ماتخرب علينا الفرصة
انا بابتسامة = يوم الاثنين
خلود مستغرب = يوم الاثنين .؟ والدراسة
انا = كلها يومين وراجعين ان شاء الله
خلود = اهاااا ( وقامت بفرح ) ابروح اقول لامي
وراحت
قمت ورحت غرفتي واتصلت بخالد عشان خلود ماتسمعني
انا = الوووو
خالد = هلا خالد ,,, هااااه بشر ,,, اقول لخالي .؟
ابتسمت
انا = ايه ,,, خلاص وافقوا الاهل ,,, بس تعتقد ابو عبد الله بيرضى يخليك تسافر وانت بهالحالة
خالد = رجع وقال حالتي ,, ياشيخ انا بخير لا تخاف ,,, واذا بغيتني اطوف فيك بعد ماعندي مانع
انا بمزح = هههههههه خلاص تراك قلت تطوف فيني ,,, وابيك تسعى فيني بعد
خالد = ههههههههههه ماتنعطي وجه ,,, المهم الحين خالي نايم بكرة ابقوله بس انتوا تجهزوا وانا ابستاجر سيارة مناسبة لنا ,,, يله مع السلامة
انا = خالد واذا عيا خالك يسافر ,,, او عيا عليك تسافر وانت توك طالع من المستشفى
خالد = ماعليك خل خالي علي ,,, خالي مايرفض لي طلب واكيد بيوافق
انا = على خير ,,, مع السلامة
يوم الاحد
طوال اليوم وانا مع اخواني وخلود بالذات اللي رايحة وراده تجهز شنطتها وشنطة سلمى ومعاذ واما انا اجهز نفسي واجهز سالم ,,, وبعد صلاة العشا بساعة انتهينا من التجهيز وكل شي مشى مضبوط ,,, الا الاحرامات اشتريها من مكه ان شاء الله
وبعدها رحت مع خالد لاحد محلات تأجير السيارات وجبنا السيارة اللي بنسافر عليها
وكانت جمس سوبربان ملكي
الاثنين
بعد صلاة الفجر تجمعنا حنا وعايلة ابو عبد الله
بس طلعت لنا مشكلة وهو خالد
قدام ماياخذ الى شخصين وابو عبد الله طبعا احتراما له لازم يصير قدام وبنفس الوقت لازم نريحه ونتكفل حنا بالسواقة وماحد يقدر يسوق الا انا ,,, لكن طحنا بمشكلة وحدة اللي هو خالد ,,, مايقدر يجلس ورا مع الحريم خاصة ان وحدة مرت خاله والثانية اختي وصعبة يجلس ورا عندهن وبنفس الوقت خالد مايقدر يسوق عشان انا اروح ورا ويصير بيني وبين ام عبد الله خلود ,,, يعني خالد لا يقدر يسوق و يصير قدام ومو محرم للحريم ويصير ورا
انا = وين نوديك الحين وين نقلعك
خالد = ياااخي اجلس انت ورا وانا اسوق ( وجا بينزل الشاش اللي يعلق يده فيها برقبته )
انا = وش بتسوي .؟
خالد = ابنزلها عشان اسوق
كنا واقفين انا وخالد قدام السيارة وجا ابو عبد الله عندنا يوم شافنا نتناقش
ابو عبد الله = وش فيكم .؟ ليه ماتركبون
خالد = آآآ ,,, خال انا اقول لخالد يصير ورا وانا اسوق بسـ
وقاطعه ابو عبد الله معصب
ابو عبد الله = تسوق وانت يدك تعورك ,,, وش قلتلك امس ,,, ماقلت شرطي انك ماتسوق وتخلي السواقة لي ولخالد ,,, لا اشوفك تسوق فاااهم
ابتسمت بحرج لبوعبد الله
انا = طيب وين نوديه ياعم ,,, مايقدر يجلس ورا مع الحريم
التفت ابو عبد الله للسيارة وبعدها التفت لنا
ابو عبد الله = خلاص انا اصير ورا
خالد وانا متفاجئين = هاااه
خالد = انت ياخال .؟
ابو عبد الله = ايه يله يله امشوا تأخرنا
وراح ينظم البزارين والحريم
انا وخالد طالعنا بعض وحنا منحرجين من ابو عبد الله
انا بحرج = نخليه يجلس ورا وحنا قدام
خالد = كله منك ,,, ياخي الجرح هنا ( وأشر على عضده اليسرى ) واقدر امسك الدركسون
انا = كله منك انت ,,, ليه ماستاجرت سيارة تاخذ ثلاث اشخاص قدام
خالد = هذا اللي لقيت ,,, وبعدين جايب سوبربان عايلي وش تبي بعد ,,,تبيني اجيب باااص
صاااارخ علينا ابو عبد الله معصب
ابو عبد الله = يلللله تأخخخخخرنااااااااا
ركبنا وحركنا وكنت انا اللي اسوق وخالد بمكان الراكب ,, وابو عبد الله وراه وبجنبه زوجته ووراي خلود ,,, وسالم وسلمى ومعاذ بالمركبة الثالثة
البزارين متحمسين وضحك ولعب وصراخ ,,, ولما وقفت عند المحطة اعبي بنزين ,,, نزلهم خالد يشتريلهم خفايف وكيكاوات ,,, ورجعوا وكل واحد ومعه كيس هذا غير الكيس الكبير اللي معه
واخيرا طلعنا من الديرة
وساعة وساعتين وبعدها خف حماس البزارين واخيرا هجدوا
الساعة 9 ونص الصباح وحنا بالطريق
رن جوال خالد والقى نظرة عليه وبعدها فتح الدريشة اللي عنده ورد بصوت خفيف عشان اللي ورا مايسمعون
خالد = بسم الله من كل شيطان وهامة ومن كل عين لامة
التفتت لخالد مطير عيوني ,,, وش هالترحيب الغريب بالمتصل
خالد = ,,,, وش تبي ,,,,, لا ,,,,,, ماتسمع اقولك لا ,,,,,, والله عاد كيفي ادفع الرواتب والا مادفعها مالك دخل ,,,, نويصروه يازفت انا ابي اعرف تحشر خشمك ليه .؟ ,,,,, قسم بالله نفسي اشوفك واشرب من دمك كرهتني بعيشتي
شهقت ناااااصر
خالد = وانت وش عليك ,,,, اقول فارق بس فارق ( وسكر معصب )
التفتت لخالد وسألته متردد
انا بتردد = هذا نـ ,,, ناصر
مال خالد ناحيتي وقرب مني عشان اللي ورا مايسمعون
خالد بعصبية = قصّر صوتك
ملت ناحيته وقربت راسي من راسه
انا = هذا ناصر .؟
خالد = ايه ,,, الكلب يحشر نفسه بامور ماله دخل
انا = وش يبي .؟
خالد = يـبـيني ادفع الرواتب للموظفين
رفعت حواجبي ماني فاهم شي
انا = ماني فاهم ,,, ممكن تفهمني
قرب راسه لي
خالد = انا مابي خالي يسمع ( قربت راسي له اكثر ) انا مأخر دفع الرواتب لموظفين العيادة عشان اضغط على وينلي
ابعدت عنه وطالعته معصب
انا بعصبية = ووش ذنب الموظفين ماتدفع حقهم
خالد بعصبية = ياحمار قصّر صوتك ( قربت اذني له وانا اسوق ) وينلي معهم مادفعت راتبه
انا = من متى مادفعت رواتبهم .؟
خالد = اممم تأخر نزول رواتبهم اسبوعين هذا الاسبوع الثالث
انا = حرام عليك ,,,, اعط الأجير أجره قبل ان يجف عرقه
خالد = تحت المكيف من وينلهم عرق
ضربت فخذه وضحكت
انا = هههههههههههههههه انت فاهم قصدي لا تتغيبى ,,, خويلد حرام عليك انت الحين رايح عمرة ,,, ترضى تروح والموظفين يدعون عليك لأنك اخرت حقهم ,,, ياخي لا تنسى بعضهم محتاجين ,,, مشاكلك مع وينلي حلها بعيد عن الموظفين اللي مالهم ذنب ,,, تبي تأخر راتب وينلي أخره كيفك اما الموظفين ادفع رواتبهم كل راتب بوقته
خالد = الرواتب اللي يستلمها وينلي وهو يوزعها على الموظفين بطريقته ,,, ماقدر اخر راتبه الا اذا اخرت رواتب الموظفين ,,, وبعدين انا قصدي اضغط عليه عن طريق الموظفين ,,, تعبت وانا افكر بطريقة اتخلص فيها من وينلي ,,, قلت مالي الا الموظفين
انا = الحين يمديهم يدعون عليك ويقولون صاحب المستشفى مادفع رواتبنا ,,, الله ياخذ حقنا منه ,,, ترضى احد يدعي عليك والحق تراه معهم ,,, ولا ورايح للعمرة بعد ,,, كيف تبي الله يتقبل عمرتك وانت ظالم موظفينك
سكتت احتري رد من خالد ,, التفتت له بطرف عيني ولقيته يفكر ,,, ابتسمت ان شاء الله آثرت عليه ,,, الصراحة خالد غلطان بتصرفه هذا ,, لكن والله عاذره شكله من كثر مايهوجس بطريقة يتخلص فيها من هالامريكي لجأ لظلم المساكين
اعتدل خالد بجلسته والتفتت له ولقيته يفكر ,,, اخليه يفكر براحته احسن وان شاء الله يحط عقله براسه ويدفع حق الموظفين ,,, بس الحين خلاص حنا بسفر ومافيه بنوك الا اذا وصلنا الطايف او مكة
انا = خلاص خالد سدد رواتبهم اذا رجعنا او من مكة
أخذ خالد لاب توبه اللي حاطه بارض السيارة تحت رجليه وشغله
رفعت حواجبي ,,, مالت عليه راح يلعب بالاب توب ,,, وانا على بالي آثرت عليه ,,, شكله ماعليه من كلامي ولا تآثر فيه
خالد = معك حق ياخالد ,,, مابي احد يدعي علي
ابتسمت بفرح ,,, زين والله اثرني اعرف آآثر على غيري
انا بابتسامة = خلاص اذا رجعنا رح للبنك
التفت لي خالد مستغرب
خالد = ليه .؟
قطب حواجبي ,,, ومن الصبح وش نتكلم عنه
انا = وش اللي ليه ,,, عشان تسدد الرواتب والا غيرت رايك
ابتسم خالد
خالد = ابسدده من هنا ( وأشر على الاب توب ) مايحتاج اروح للبنك
رفعت حواجبي مستغرب وشلون ,,, من وين انتر نت وحنا مسافرين ,,, بس سكتت عنه يمكن خالد ضاربة فيزواته الحين
شفت خالد بطرق عيني يطقطق بالكيبورد ,,, التفتت وركزت بشاشة الاب توب ولقيته فاتح على بريد هوتميل
طيرت عيوني منهبل ,, انترنت وحنا بالطريق
انا بصدمة = دااااااخل انترنت .؟ وشلوووون
خالد = عندي كونكت ,,, تقدر تدخل الانترنت فيه من أي مكان
انا مستغرب = وش كونكت .؟
خالد = هذا (وأشرعلى شي مثل الفلاش ميموري )
ورجع يطقطق ,,, وطول وهو يكتب ,,, استغربت وش يكتب ذا ,,, حاولت اركز بشاشة الاب توب وانا اسوق ,,, لكن ماستفدت شي ,, كله اللي يكتبه انجليزي
وبعدها فتح موقع وشفت شعار لاحد البنوك وعرفت انه داخل على موقعهم شكله بيحول الرواتب ,,, صدق اني على نياتي ,,, انا اقول مايقدر يسدد الا اذا رجعنا او من مكة ,,, عصر السرعة شنقول بعد
طلع خالد جواله وضغّط فيه شوي وبعدها رفعه لأذنه
خالد بصوت خفيف = هلااا سلطان ,,,,, وشلونك ,,,, الحمد الله طيب وشلونك انت ,,, ياربي لك الحمد ,,,, امممم سلطان تو ارسلت رسالة على بريدك ,,, وحولت لك بحسابك رواتب الموظفين ,,,, ابيك لا هنت تاخذ الرسالة اللي ارسلتها لك وتطبعها وتسلم الدكتور انتلانس الرواتب بس اهم شي ماتسلمه الرواتب لين يوقع على الرسالة اللي انت طبعتها ,,, مهم ياسلطان لا تسلمه الرواتب لين يوقع على الرسالة ,,,, شف تراه يمكن يعصب عليك ويمكن يلفعك باللي قدامه هههههههه ,,,, بس انت لا تسلمه ولا عليك منه قلّه يا توقع وتستلم والا لا تستلم ابد ,,,,,, هههههههههه اقرا الرسالة وتعرف وش فيها ,,,, بس من الحين اقولك خذ معك اسعافات اوليه ههههههه ,,,,,, لا اذا عيا يستلم اتركه وخله انا اذا رحت للرياض اتفاهم معه ,,,,,,,,,,,,,, معليش تحمله ,,,,, ادري والله بس وش تبيني اسوي,,,,,, والله ادري ياسلطان ادري,,, سلطان ياليت تروحله اليوم ,,, تراي انتظر اتصالك ابي اعرف وش سويت معه تكفى لا تتأخر علي ,,,, مشكووور تعبتك معي ,, مع السلامة
تحمست ,, وش السالفة ,, وش فيها الرسالة
التفتت لخالد وسألته
انا = شسالفة .؟ منهو سلطان هذا اللي سلمته الرواتب .؟
قرب خالد راسه لي وقربت راسي له
خالد = اول شي افتح الدريشة اللي عندك عشان الهوا يغطي على صوتك العالي
التفتت ورا اشوف ابو عبد الله ولقيته يسولف مع مرته
انا = خالك يسولف مع خالتك ماهو معنا ( وفتحت الدريشة )
خالد = سلطان اخو خويي اللي قلتلك عليه اللي عينته يتابع العيادة بغيابي
انا = طيب وش الرسالة اللي تكتبتها تو ويمكن يعصب وينلي عليها .؟
خالد = ههههههههههه الرسالة يوقع عليها على انه استلم الرواتب كعادتنا كل شهر ,,, انا اذا بغيت اسلمه الرواتب اخليه يوقع اول وبعدين يستلم ,,, لكن هالمرة دخلت مع استلام الرواتب تنازله عن حقه في تعيين ممرضين واطباء للعيادة بتوقيع واحد ,,, ابوي معطيه تصريح التعيين قبل تنتقل العيادة لي,,,,, تذكر يوم كنا بالرياض يوم طلب مني وينلي اني استقدم ممرضين جدد وعييت وبعدها قالي انه راح يعين ممرضين مخالفين للاقامة مثل ماسوى مع الطبيبين المخالفين ,,, انا خفت الصراحة وخفت يعين من دون علمي واتورط زيادة ,,,, لكن انشغلت ودخلت المستشفى ,,, وتو طرت علي اني ادخّل مع استلام الرواتب تنازله في التعيين بتوقيع واحد ,,, يعني اذا بغى يوقع على استلام الوراتب لازم يوافق اول على تنازله في التعيين ( وابتسم ابتسامة عريضة )
سكتت استوعب وبعدها ضحكت
انا = هههههههههههه ذييييييييب ماينخاف عليك
خالد بتنهيدة = احتري سلطان يتصل ,,, المشكلة اذا عيا يستلم الرواتب عشان مايوقع على التنازل ( وزفر ) الله يستر ,,, متى ارتاح منه متىىىىىى
ياااارب انه يوقع على التنازل ,,, على الاقل خالد يرتاح من استقدامه لمخالفين الاقامة ,,,, يارب يسر لخالد الخير وابعد عنه شر كل من فيه شر ,,, امه وخاله ورولا واخواته كلهم بحاجته ,,, وخالد حياته كلها ,,, مخاطر يارب سلمه لهم
الساعة 12 ونص الظهر وصلنا الطايف وقررنا نتغدا فيها
نزلنا انا وخالد وحجزنا طاولات للحريم وطاولات لنا وطلبنا غدانا وكل واحد اخذ مكانه
وقبل نبدا بالاكل رن جوال خالد ,, القى نظره عليه وارتبك
وقام بيطلع من المطعم عشان يكلم
ابو عبد الله = كل يابوك ,,, لاحق على جوالك
خالد مرتبك = آآآآ ,,, هذا خويي ,,, تغدوا انتوا ,,, اكلم شوي واجي
وطلع بسرعة ,,, هذا اكيد سلطان ,,, ودي اطلع واشوف وش سوا ,,, بس مستحي من ابو عبد الله ,,, التفتت لبوعبد الله ولقيته كاف يده
انا = سم بالله ياعم ,,, الحين يجي خالد
ابو عبد الله = لا وانا عمك نحتريه ماورانا شي
مرت ربع ساعة وخالد ماجا ,,,, تضايق ابو عبد الله من تأخره
ايييييييييييه وين راح ذا
انا = آآآ ,,, ابروح اشوف وينه واجي
وطلعت على طول ,,, دورته ولا لقيته ,,, ورحت للحمامات ولا لقيته ,,, رحت عند البياعين ولا لقيته ,,, ورحت للتموينات ولا لقيته ,,, اففففف وين راح هذا
رحت عند مواقف السيارات وانصدمت
لقيت خالد جالس على الرصيف وحاط راسه على ركبه ,,, ربي سترك وش فيه خالد
ركضت لين وصلته وانحنيت عليه
انا = خاالد عسى ماشر وش فيك ,,, تعبان .؟
رفع خالد راسه وانصدمت بدموعه
خالد بصوت باكي = عيااا ,,, عيا ياخالد ,,, قهرني ,,, ذلني ,,,, ابوي وثق فيه لين ضيعني ,,,, ماني قادر اتخلص منه ماااااني قااادر ,,,, تعبت ابي ارتاااااح
انا = خالد ,,,, آآآ ,,, هد شوي وعلمني وش صار ,,, وش سوا سلطان معه .؟
خالد بقهر = عيااااااا ,,, عيا يوقع ,,,, يقول سلطان انه عصب وقاله يوصلي كلامه ,,, يقول انه اليوم بيعين ممرضة مخالفة للاقامة بالتصريح اللي عطاه ابوي بس لأني ابطيت ماستقدمت
انا = خلها يعينها ,,, عقوبة التستر بتصير عليه لأنه معه تصريح التعيين
خالد بقهر = بس العيادة لي ,,,, ابوي وثق فيه لين ضيعيني ( وبكى وكمل بصوت باكي ) هذا غير الاطباء المخالفين اللي ادري عنهم ,,, ورواتبهم تمشي ,,, ولاني قادر اطردهم بسبب المخالفات الثانية اللي يهددني فيها ( ونزل راسه على ركبه) تعبت معه تعبت ,,, احس اني بدوامة ماني قااادر اطلع منها
حطيت يدي على ظهره احاول اهديه ,,, حتى وهو رايح يعتمر ماهو مرتاح
انا = خالد امسح دموعك الحين وامش ,,, ابو عبد الله يحتريك ,,, الله يخلصك من هالامريكي ان شاء الله
رفع خالد راسه ورفع فنيلته يمسح وجهه ووقف ,, والتفت لي معصب
خالد = وتقولي ادفع الرواتب ,,,, ماني دافع الرواتب وماني مستقدم وابطرد الكلب من العيادة واسفره وخله يسوي اللي يسوي ,,,, خلهم يسجنوني ويعاقبوني على التستر وعلى اي مخالفة مدبرها الكلب لي ,,, انا برئ ومظلوم خلهم يسوون اللي يسوون ( وتغير صوته ) يمكن بالسجن اعرف انووووم
قربت منه وضميته متأثر
انا بصوت هامس = ادع الله وانت معتمر وقل اللهم اكفنيهم بما شئت ,,, انت غالي علينا كلنا ياخالد
لف خالد يده اليمنى على ظهري ورصني بقوة وهو يبكي حتى اني خفت على الخياطة اللي بصدره
خالد = انا خلاص ضعت ,,, ضعت ياخالد ,,, وينلي من جهه وبدر وراكان من جهه ووو ( وزاد بكاه اكثر وسكت)
و ناصر من جهه ,,, ناصر ياغالي اللي مدري وش ماسك عليك و مهددك بقضية تنتهي حكمها بقصاص ,, ليتني اعرف وش وراه هالناصر
انتبهت للناس اللي يطالعونا مستغربين ,,, وابعدت عنه
انا = خلنا نروح لبوعبد الله لا ينتبه علينا ,,, امش ياااغالي
رفع خالد فنيلته ومسح وجهه
خالد = لا ,,, مابي اروح ,,, رح انت ,,, عطني مفتاح السيارة بحتريكم فيها لين تجون
انا = لا ,,, امش معي
وبعد اصرار مني ,,, رجعنا للمطعم
تغدينا وخلصنا ووصلنا الميقات وخالد مزاجه متعكر وطوال الطريق من الطايف للميقات وهو سرحان ويفكر وماهو معنا بالمرة ,,, حتى بالغدا ماتغدا الا كم لقمه قدام خاله ,,, طوال الطريق وانا احاول امزح معه واسولف واحاول اطلعه من مزاجه المتعكر ولا فلحت ,,, واذا كلمه خاله رد عليه بكلمة كلمتين ويسكت
بالميقات
انشغلت مع خلود واخواني ورحت اشتري لنا اللي ناقص للعمرة ,,, وابو عبد الله مع زوجته ,,, وخالد راح لحاله يشوف اللي ينقصه
انا = هااه خلصتي
خلود = ابي اشتري لمعاذ احرام هههههههه بيصير شكله فله
ابتسمت اتخيل معاذ بالاحرام
انا = ههههههههههههه هذا من وين نلقى له احرام على قده
رحنا ندور لمعاذ احرام ولا لقينا له بالتالي اكتفينا بملابسه العادية
خلود = خالد
كنت مشغول باللي قدامي
انا = همممم
خلود = السيارة فيها دي اس ال .؟
قطب حواجبي والتفتت لخلود
انا مستغرب = هاه ,,, دي اس ال .؟
خلود = ايه ,,, وحنا بالطريق شفت خالد يدخل على موقع ,,, وكني شفته داخل على مانسجره ,,, يعني في انترنت بالسيارة
ابتسمت وبعدها ضحكت ,,, خلود استغربت مثلي يوم شفت خالد داخل على النت بالطريق ,,,, بس لحظة مو كأن خلود تراقب خالد طوال الطريق
انا معصب = تراقبين الرجال .؟
متغطيه ماشوف وجهها
خلود = والله عاد هو قدامي وشغّل الاب توب قدامي ,,, وش تبيني اسوي اغمض عيوني ,,, المهم خالد ,,, الله يخليك الله يخليك انا ماشبعت من الاب توب والانترنت ,,, الله يخليك قل لخالد يعطيني الاب توب وحنا راجعين ,,, الله يخليك الله يخليك
طيرت عيوني فيها ,,, مهبولة ذي الناس وين وهي وين ,,, اصلا خالد حالته حاله اقوم اطلب منه طلب زي وجهها
انا بعصبية = خلصتي .؟ ,, اذا خلصتي اذلفي لقسم الحريم وخلصينا ,,, وانا اباخذ سالم ,,, وش قالت قالت ابي الاب توب وحنا راجعين اشوف روحي شوفي شغلك
واخذت سالم ودخلت قسم الرجال
وفائي سبب احزاني
New member
- إنضم
- 24 فبراير 2011
- المشاركات
- 616
- مستوى التفاعل
- 0
- النقاط
- 0
وفائي سبب احزاني
New member
- إنضم
- 24 فبراير 2011
- المشاركات
- 616
- مستوى التفاعل
- 0
- النقاط
- 0
وفائي سبب احزاني
New member
- إنضم
- 24 فبراير 2011
- المشاركات
- 616
- مستوى التفاعل
- 0
- النقاط
- 0
احترت وياك
New member
احترت وياك
New member
اْستلمـــــــؤؤ ,,,
* 23 *
طلعت من القسم الرجالي بعد ضرب وضريب مع سالم اللي كان خايف من الماء البارد
وصلنا سيارتنا ومالقيت الا ابو عبد الله وخالد اما الحريم مابعد جو
ابو عبد الله متمدد بالمرتبة اللي ورا وشكله نام وهو يحتري الحريم ,,, وخالد جالس بمكان الراكب وتارك الباب فاتح وياكل من علاجه
وقفت عند خالد وسالم بجنبي
انا بابتسامة = ماجو الحريم .؟
خالد = لا ( ونزل نظره لسالم وابتسم ) سلومي ماشاء الله عليك عرفت تلبس الاحرام ,,, بس لا يطيح منك وتطلع البلاوي هههههههههه
سالم مازال زعلان مني لاني غصبته على التروش
سالم بزعل = الماء بارد ,,, اقول لخالد ابلبس هذا ( واشر على احرامه ) بدون اتروش وعيا
( وضربني )
خالد بابتسامة = وهو تروش .؟
سالم = ايه
خالد = خلاص وحدة بوحدة انت تروشت بماء بارد وهو تروش بماء بارد وانا بعد تروشت بماء بارد وكل الناس يتروشون بماء بارد ,,, وبعدين حبيبي حنا بالحر عادي
وطلع حبة من الشريط وحطها بفمه وشرب بعدها ماء ,,, انتبهت على شكل الشريط ,,, اممم هذا مو احد اشرطة الادوية اللي عطانيهم الصيدلي يوم خالد بالمستشفى ,, التفتت لسالم
انا = رح ادخل للسيارة لا تمرض علينا
راح سالم وركب السيارة بس بمكان السواق لان ابو عبد الله نايم ولا حبينا نزعجه
والتفتت لخالد ولقيته مازال ياكل من هالحبوب ياخذ نوع وياكلها وياخذ من النوع الثاني وياكلها
رفعت حواجبي مستغرب
انا = كل هالحبوب تاكلها يوميا .؟
رفع خالد راسه لي وبعدها التفت لخاله يشوفه ورجع يطالعني وقرب وجهه لوجهي
خالد بهمس = كلها ثلاث حبوب وواحد مسكن عند اللزوم ( وابعد وجهه عني )
انا = طيب وشوله ,,, لاتقول عشان اعتداء بدر وراكان ,,, لانه مو معقول كل هالحبوب عشان كم جرح
خالد بضيق = خالد وش فيك قصّر حسّك خالي نايم ( والتفت لابو عبد الله يشوفه ورجع يلتفت لي ),,, هالعلاج عشان هذا ( واشر على راسه ) وخلاص لا تسأل
استغربت وش فيه عصب
سكتت عنه والتفتت ابروح لمكان السواق بس خالد وقفني
خالد = خالد
التفتت له بصمت
خالد = لا تزعل مني ماكنت اقصد
انا = لا عادي ,, لا زعل ولا شي
ابتسم خالد
خالد بابتسامة = ادري نفسك طيبة بس ماحب احد يحقق معي عن مرضي ,,, اللي عندي مجرد صداع وخلاص
ما ارتحت لكلامه بس سكتت عنه ,,, ليه مايحب احد يسأله عن مرضه مااشوف فيها شي,,, حتى عصبيته قبل شوي مالها داعي ,,, دايم اسأله ويسألني ونعلم ونفضفض لبعض عادي وش معنى الحين ,,, الصراحة بديت اشك ,,, وش الحبوب اللي ياكلها خالد
خالد = خالد وانا اتروش اضطريت افك الشاش عن يدي وابيك تحطلي واحد ثاني ,,, تعرف .؟
انتبهت له
انا = هاااه ,,,, آآآآآ ,, هات نجرب
حط خالد علاجه بالجيب الامامي لشنطة الاب توب ,,, واخذ شنطة الاسعافات الاولية
خالد = الشاش اللي بشنطة الاسعافات قليل وشريت شاش زيادة ,,, الجرح اللي بصدري بعد ماتروشت صار يطلع منه دم واخاف يوسخ احرامي
رفعت حاجب واحد
انا = وش تبيني اسوي اجل ,,, الف صدرك كله .؟ ليه ماشريت لزقه كبيرة يثبت على صدرك احسن من الشاش واريح
خالد = لا ,,, اللزقة تضايقني ,,, حاول فيه ياخالد المهم مابيه يطيح وانا اعتمر اخاف يجي احرامي دم منه
انا = اهاااا طيب هات نحاول
نزل خالد ردائه وفعلا كان جلده اللي حوالين الخياطة صاير لونه احمر مرررة
انا = يعورك .؟ ( واشرت على صدره )
خالد = لا بس يحكني
لفيت اول شي عضده ,,, وبعدها بديت الف صدره بمكان الخياطة وبصعوبة حاولت اثبته بصدره على الاقل الين يخلص من العمرة
انا = ان شاء الله مايطيح
رفع خالد راسه لي يطالعني
خالد = احسه ماثبت زين
انا = انـ
سالم = وانا بعد ابي
التفتنا لسالم مستغربين
انا = وش تبي .؟
سالم = ابي مثل خالد
التفتت لخالد مستغرب وبعدها التفتت لسالم
انا = تبي مثل خالد بأيش .؟
سالم = لفوا علي انا بعد ابي
ضحكنا عليه
خالد = هههههههههههه سلومي انت مافيك شي
سالم = الا فيني ( وراح يدور بنفسه جرح او دم او أي شي ينفع يلفه )
التفت خالد لي وهو يضحك
خالد = هات هات انا ابحط له الباقي من هالشاش ,,, الصراحة اخوك منسّم هههههههه
انا = ههههههههه اخاف اذا شافته سلمى تقول بعد ابي
اخذ خالد مني الشاش ولف يد سالم ,,, ابتسمت سالم عرف يطلع خالد من مزاجه المتعكر من دون مايدري ,,, انا طوال الطريق من الطايف الى الميقات احاول انسيه ولا قدرت ,,, وسالم بعفوية منه نساه وينلي وهم وينلي او يمكن صفى مزاجه وهدت اعصابه بعد ماتروش,,,
خلص خالد من لف يد سالم وبعدها لبس ردائه
خالد = خالد ليش مالبستوا معاذ احرام .؟
انتبهت لخالد ولقيته يطالع شي وراي ,,, التفتت ولقيت خلود ومعاها معاذ وسلمى وام عبد الله
التفتت لخالد
انا = مالقينا له احرام على قده
ورحت الحق على خلود قبل توصل عند السيارة ابي اكلمها من دون ماحد يسمعنا ,,, خلود اخر مرة اعتمرت وهي صغيرة تقريبا عمرها كان 14 والحين ماعندها احد يعلمها في امور العمرة
وصلت عند خلود وشلت عنها معاذ ,,, وحمدت الله ان ام عبد الله راحت للسيارة وتركتنا بحالنا
انا = خلود تسننتي سنة الاحرام .؟
خلود = مدري ,, بس خالتي ام عبد الله قالت صلي ركعتين وصليتها ,,, هي هذي سنة الاحرام .؟
ابتسمت تصلي على عماها هذي والا ايش
انا بابتسامة = ايه
خلود = اهااا ايه صليت ,,, خالد ام عبد الله قالت لي مايجوز البس النقاب والقفاز وانا معتمرة ,,, وغطوتي خليتها في البيت ,,, هناك وانا في البيت قلت اخذ النقاب وماله داعي الغطوة ,,, ماكنت ادري ,,, والحين ابي غطوة
توني ادري ان النقاب مايجوز للمعتمرة ,,, سوالف الحريم واحكامهن ماعرفها ,,,, اشوى ان ام عبد الله معها تعلمها
انا = طيب واللي عليك هذا وش .؟
خلود = هذا طرف شيلتي متغطيه فيها
رحت انا وخلود لمحل العبايات وشريت لها الغطوة اللي تبي ورجعنا مستعجلين للسيارة
وكل واحد اخذ مكانه وانطلقنا لمكة
بالسيارة سمعت خلود تسأل سالم بخوف
خلود = سالم ليه وش فيها يدك .؟
طالعت المرايا الامامية اشوف خلود اللي جالسة وراي وانا احتريها تشوف عيوني عن طريق المرايا عشان اشر لها تقصر صوتها ,,, لكن الحمارة ملتفته ورا تشوف سالم
سالم = تعورني
طيرت عيوني ,,, يالكذوب
التفتت لخالد ولقيته منزل راسه ويضحك بصمت
خلود = وش منه عورتك .؟
طالعت المرايا مرة ثانية معصب على خلود ابيها تشوفني وتقصر صوتها ,,, بس الى الحين ملتفتها ورا ومصدقة سالم وجه العنز
خلود = سالم وش منه تعورك .؟
ساكت الحمار مايرد عليها ,,, اكيد ماعنده جواب
ام عبد الله = ليه وش فيه ,,, اشوف سالم تعال عندي وش فيها يدك .؟
اووووه ,,, خلاص حريم لازم يكبرن السالفة
انا = احم ,,, لا مافيها شي ,,, هو بس كذا شاف الشاش قدامه وحط لنفسه
واخيرا وصلنا مكة ,,, نزلنا انا وخالد نستاجر ولأننا بوسط الاسبوع لقينا شقتين على مواصفاتنا بسهولة وقريبة من الحرم
شقة للحريم وشقة لنا ومتجاورات لبعض ,,, نزّلنا اغراضنا ورحنا ناخذ عمره
انا وخلود ومعاذ وسلمى,,, وابو عبد الله وزوجته ,,, وخالد وسالم
كنا كذا متفقين ,,, كل واحد ينتبه للي معه ,,, ونجتمع عند بوابة السلام
انا الصراحة ضعت بين خالد وخلود ,,, خلود مصره تاخذ سلمى معها وخالد مصر ياخذ سلمى معه وانا ضعت بينهم ,,, اول شي طلب خالد مني سلمى تصير معه وانا ماكان عندي مانع بس تفاجأت باصرار خلود على سلمى ,,, اروح لخالد واقوله الاهل يبون سلمى معهم ويقول انا راح انتبهلها ولا تخاف وطمن الاهل ,,, واروح لخلود واقولها سلمى بتصير مع خالد وتقول لا انا خايفة عليها وابيها معي ,,, اخر شي قال خالد خلاص اجل انا اباخذ سلمى وسالم معي للسوق بعد العمرة ونتمشى ,,, عيت خلود مرة ثانية بس انا سكتتها ,,, خلود عنيدة وخالد اعند منها وسلمى وسالم يميلون لخالد اكثر
وبالاخير استانسنا ان الحرم كان شبه فاضي ,,, خاصة ان كان وقتنا العصر ,,, وماضطرينا نتفرق ,,, لو اني داري اننا ماحنا متفرقين كان طنشت الثنين خالد وخلود
بعد صلاة المغرب بنص ساعة
خلصنا عمرتنا في وقت قصير ,,, وكل شي صار بسهولة ويسر ,,, صحن الحرم والسعي كان شبه فاضي ,,, ماخذين راحتنا على الاخر ,,, واكثر واحد استانس سالم وسلمى ومعاذ يركضون بعييييد عنا ثم يرجعون فرحانين لأن مافيه زحمة واذا مروا على شرطي او عامل يسلمون عليه ,,, وخاصة سالم النشبة ,,, سلمى اركد منه واعقل ,,, يوم كنا نطوف حول الكعبة سلم سالم على واحد من العساكر الواقفين سبع مرات ,,, يسلم عليه ويدور ثم يلقى العسكري واقف بمكانه ويرجع يسلم عليه ويدور ثم يلقى العسكري واقف بمكانه ويرجع يسلم عليه ,,, لين سبع مرات ,,, والعسكري معطي سالم جوه وصابر عليه
صلينا العشا بالحرم وبعدها رجعنا للفندق ,,, وكل واحد طاح على فراشه هلكان ونمنا حتى من دون مانتعشى
خالد وانا بغرفة وابو عبد الله وسالم بغرفة بس العلة سالم ازعجني الا ينام معي ,,, ولأني نايم ومعطي سالم ظهري كل شوي احصل بكس على ظهري من ركبته الكريمة ,, والحمد الله على كل حال بكس بالظهر ولا بكس بالوجه ,,, ومن تعب السفر والسواقة نمت على بكوس سالم
انزعجت من صوت منبه جوال ,,, رفعت راسي بضيق عن المخدة ادور هالجوال اللي ازعجني ,,, وكان جوال خالد ,,, افففففف ياهو ثقيل نومه هذا وهو قريب عند راسه مايسمعه ,,, نزلت راسي وانا متضايق المشكلة ماقدر اطفيه يمكن موقت الجوال لشي مهم ,,, القيت نظرة على جوالي اشوف الساعة وكانت 2 ونص صباحا ,,, رفعت حواجبي ,,, ليش خالد موقت الجوال بهالوقت ,,, وش عنده .؟
واخيرا تلحلح خالد وقام يسكر المنبة ,,, غطيت راسي بالبطانية بسرعة احط نفسي نايم وفتحت فتحه من تحت البطانية اشوف وش يسوي خالد ووش هالوقت المهم عنده بأخر الليل
توجه خالد لطاولة موجودة بالغرفة حاط فيها لاب توبه وطلع من جيب شنطة الاب توب الادوية ,,, اهاااا موقت الجوال عشان موعد علاجه ,,, ابتسمت الله يشفيه يااارب ,,,
بس اموت واعرف وش هالمرض اللي خالد مايحب احد يسأله عنه ,,, ومعقول زي مايقول كل هالادوية عشان صداع .؟ ,, ثلاث انواع من الحبوب ومسكن ,,,
خلص خالد من علاجه وتفاجأت فيه ينزّل بلوزته وقعد يفك الشاش عن صدره ورجع يلبس بلوزته مرة ثانية ,,,
شكله يوم رجعنا من الحرم نام من التعب من دون ماينزّل الشاش مع انه كان طوال وحنا نعتمر وهو متضايق منه
رجع خالد لسريره واخذ جواله ومحفظته وطلع من الشقة ,,, طيرت عيوني وين بيروح بهالوقت ,,, نقزت من سريري وفتحت الباب بشويش ,,, ولقيته يحتري المصعد ,,, عجييييييييب وين بيروح هذا .؟
رجعت بسرعة لغرفتنا ولبست ثوبي على عجل ,,, ورحت اتبعه ,,, احتريت المصعد لين رجعلي وبعدها نزلت ,,, طلعت من الفندق وتلفتت يمين ويسار ادوره ,, وشفته من بعيد يمشي متوجه للحرم ,,, ابتسمت بفرح ,,, الحمد الله اللي هداه ,,, فرق بين خالد هذا وخالد اللي شفته يغني ويرقص بمقطع بجواله ,,, الله يهدي بدر وراكان والبقية مثل ماهداك ياخالد ويزيح عنك همهم
رجعت لغرفتنا ,,, ونزلت ثوبي ناوي اكمل نومتي ,,, طاحت عيني على الطاولة اللي فيها الاب توب ,,, وحدثتني نفسي اشوف ادويته ,,, امممم طيب واذا شفتها وش راح استفيد ,,, بس ابي اعرف وش قصة هالادوية هذي كلها
رحت للطاولة وطلعت كل الادوية من جيب شنطة الاب توب ,,, وتفاجأت بخمس انواع حبوب ,,, غريب خالد قالي ياكل ثلاث حبوب ومسكن اجل الخامس هذا وش .؟
يالله ياخالد تاكل كل هالحبوب هذي يوميا ,,, ماني مرتاح لين اعرف وش قصة هالحبوب وليش بهالكمية هذي
قمت وطلعت جوالي من ثوبي المعلق ,, وكتبت اسماء الادوية الخمسة كلها ,, ماني مرتاح لين اسأل صيدلي او اي احد ,,, رجعت الادوية وبعدها رحت لسريري انام
الفجر
= خااالد ,,, خاااالد
انزعجت من اللي يناديني وفتحت عيوني متضايق ,,, اووووه ابو عبد الله
انا بكسل = سم ياعم
ابو عبد الله = قم صل وانا عمك ,,
وراح للحمام يتوضى ,,, جلست بكسل والتفتت لسرير خالد وكان فاضي ,,, انصدمت الى الحين ماجا
طلع ابو عبد الله من الحمام وشغل الانوار وقرب عندي
ابو عبد الله = ماتدري خالد وين راح .؟
انا = راح للحرم قبلنا
ابتسم ابو عبد الله
ابو عبد الله = الله يحفظه ,,, يله امش ياولدي لا تتاخر عن الصلاة ( وطلع )
توضيت ومريت قسم خلود واللي معها وفتحت لي ام عبد الله وسألتها عن خلود وقالت نايمة ,,, اهااا مدام ان ام عبد الله عندها اكيد راح تقومها للصلاة
تركتها ورحت اصلي وبعد الصلاة وانا بالحرم كنت اتلفت احاول القى خالد ,,, بس وشلون القاه وانا بهالمكان الكبير والمقدس ,,, اكيد ماني محصله ,,, بالتالي تخليت عن المحاولة ورجعت للفندق انام
حسيت بواحد يهز كتفي ويهمس باسمي ,,, قمت منزعج وكان خالد مقرب وجهه مني ويناديني بهمس
انا بكسل = خالد ,,, وش تبي .؟
خالد = قم ,,, خلنا نتمشى شوي قبل يقومون
قطبت حواجبي ليه كم الساعة
انا = كم الساعة الحين .؟
خالد = ثمان ونص
انا مستغرب = بدري وين تبينا نروح بهالوقت .؟
خالد = مدري ,, نروح أي مكان
جلست وطالعت خالد ,,, وقطبت حواجبي مستغرب من شكله ,,,, الهالات واضحة تحت عيونه اكثر من قبل ووجهه شاحب وشفايفه صايره بيضا كنه عطشان ,,,
خالد = وش فيك تطالعني ,,, يله قم
انا = شكلك مانمت امس ,,, خالد ارجع نام وخلني انا انام بعد
وانسدحت
خالد = مافيني نوم ,,, قم قبل يحس فينا احد
انا = شف وجهك وشلون صاير ( واشرت على وجهه ) رح ناااام
استغرب خالد ,, وتلمس وجهه
خالد مستغرب = وجهي ,,, ليه وش فيه .؟
انا = ليه مانمت امس ,,, قمنا الفجر ولالقيناك بفراشك ,, وين رحت .؟
حطيت نفسي ماعرف بس عشان مايحس اني اراقبه او شي
خالد = امس نمت ,,, بس طلعت شوي اتمشى ,,, يله خالد قم
قمت ولبست ثوبي ,,
خالد = انا ابروح اجيب فطور لخالي وللحريم ,, القاك جاهز
وطلع ,,,, رحت لشقة خلود ,,, بس طلعت لي ام عبد الله بعد ,,, احم انحرجت كل شوي ام عبد الله هي اللي تطلعلي ,,,
انا بحرج = آآآ ,,, خلود وين .؟
ام عبد الله = نايمة ,,, تبيني اقومها لك
مالت عليها كل مابغيتها قالت نايمة ,,
انا = ,,, آآآ,,, لا ,, بس اذا قامت قولي لها اني طلعت مع خالد وخليها تنتبه للصغار
ام عبد الله = انا انتبهلهم ,,, روحوا واستانسوا
انا بحرج = تسلمين ,,, وماتقصرين
ام عبد الله = سالم معكم والا نايم .؟
انا = لا نايم ,,, طيب جزاك الله خير ياخاله تعبناك معنا
وصّل خالد فطور الحريم وعطاه خالته ,,, وطلعنا من الفندق ,,, مرينا مطعم وافطرنا ,, وبعدها رحنا نفرفر بالشوارع وحنا بالسيارة قررنا نروح لجبل عرفة وبعدها مزدلفة ,, ولانني لا انا ولا خالد ندل شي بمكة وبعد السؤال عن المكان وصلنا عرفة بعد ساعة
وناااااااااسة عرفة كانت فاضية بالمرة ,,, بس واضح انه يجيها زوار كمنتزة
فيه محلات صغيرة مسكرة وسيارات الاسكريم وخيول ,,
انا = وش رايك نحج الحين ,, مو احسن هههههههه
خالد بابتسامة = قدااام
نزلنا من السيارة ورحنا مشي لجبل عرفة ,,, انا عن نفسي ركبت الجبل لين القمة حاول خالد يركب بس ماقدر بسبب يده وصدره
اخذت شوي مستانس بالهواء الطلق ,, نزلت نظري اشوف خالد وهو تحت الجبل ولقيته يصورني ,,, استغربت
رفعت صوتي عشان يسمعني
انا = وش تسوي .؟
رد علي خالد بصوت عالي
خالد = انقز ابصورك فيديو
ضحكت على خباله
انا = هههههههههههه وش بيفيدني تصويرك اذا تكسرت
رحت اتمشى بقمة الجبل وتركته ,,, الله وناسة ,, الجو حلو فوق اخذت شوي مستمتع وبعدها نزلت لخالد
ورحنا مزدلفة ,,, الصراحة اعجبني المكان بمزدلفة ,,, ودي اجيب اخواني يستانسون شوي ,,, التفتت لخالد اللي كان جالس بمكان الراكب
انا = متى قال ابو عبد الله نمشي للديرة .؟
التفت لي خالد مستغرب
خالد = مدري بس اكيد يوم الاربعاء ,,, ليه .؟
انا = الصراحة ودي نتعشى هنا ابي اخواني يستانسون شوي
ابتسم خالد
خالد بابتسامة = فكرة حلوة ,, خلاص ابقول لخالي نبي نتعشى الليلة بعرفة
انا = لا مزدلفة
خالد = عرفة
انا = مزدلفة
خالد = عرفة
انا = مزدلفة
خالد = وش تبي بمزدلفة ,, لايكون صدقت انك حاج
انا = هههههههههههههههههه لا ياخبل بس ابي مزدلفة
وحركت السيارة راجعين للفندق وانا ابتسم ,,, بتستانس خلود
وصلنا على آذان الظهر بس صلينا اول بالحرم وبعدها رحنا للفندق
ولقيت سالم مزعج العالم بالصياح ,,, يبكي لاننا رحنا عنه وخليناه ,,, وعشان يسكت وعده خالد ياخذه العصر للسوق ويمشيه هو وسلمى
طلع خالد عشان يجيب الغدا لنا وللحريم
وانا رحت اشيك على خلود ,,, من صلاة العشا امس ماشفتها ,,,استاذنت من ام عبد الله وراحت لشقتنا عشان تخلينا براحتنا ولقيت الاخت المصون معصبة علي
خلود بعصبية = وييييييين رحت وخليتني
انا = رحت تمشينا شوي وجينا ,,, ليه معصبة
خلود بعصبية = حتى وحنا بمكة تروح مع خاااالد ,,, المفرووووض تصير معي ماتصير معه
انا = انا مريت عليك ولقيتك نايمة وش تبيني اسوي ,, احتريك لين تقومين
خلود بعصبية = ايه ,,, المفروض تمشيني انا ما تمشيه هو ,,, انا من يوم ماجيت مكة ماطلعت لأي مكان
انا = وانت وينك ,,, من يوم رجعنا من الحرم وانتي نايمة
خلود = العصر تمشيني ,,, ماهو تطلع مع الزفت خالد
تنهدت
انا = طيب هدي اعصابك ,,, ان شاء الله العصر نطلع انا وانتي ,, بس ترا سالم وسلمى بيرحون مع خالد العصر ( وجت بتتكلم وقاطعتها ) هاه هاه امس وش قلنا ,, بالعمرة انتي اخذتيها ,,, هالمرة هو بياخذها ويمشيها
وطلعت عنها قبل تلفعني بشي
رحت لقسمنا وقعدت ام عبد الله شوي تسولف مع زوجها وهي متغطيه ,,, انحرجت منها الصراحة ,,, والمشكلة خالد طالع ,,, احس شكلي غلط ,,, افففف مدري وين اروح ,,, اخاف ارجع لخلود وهي معصبة ونرجع نتهاوش
رحت ادور سالم ولقيته يلعب بالحجرة اللي نمنا فيها مع سلمى ومعاذ
وجلست على السرير
انا بملل = سلمى خذي معاذ وروحي لخلود
سلمى = لا ابلعب
التفتت لسالم
انا = سالم خذ سلمى ومعاذ ورح لخلود
سالم = ابي هنا
انا بملل = رح سلوووم
سالم = لا ابقعد هنا اخاف تروحون مرة ثانية
افففففففففففففففف
انسدحت على السرير مستلقي احتري خالد
بعد فتره دخل خالد علي الغرفة ومعه كيس الغدا ,,, وجلس على السرير اللي متمدد عليه انا ,,, ومد الكيس لي
خالد = خذ ,,, انا وديت الفطور ,,, هالمرة انت ود الغدا للحريم
انا بملل = وليه ماتوديه انت ,,, وترا خالتك هناعطهياه
نزل خالد كيس الغدا على بطني ,, واخذت الكيس ونزلته على السرير ,, مد خالد يده واخذ الكيس وحطه على بطني مرة ثانية بصمت ,,, اخذت الكيس ونزلته على السرير ,, ورجع خالد وحطه ببطني مرة ثانية
انا بعصبية = ياااخي خله هنا ( ونزلت الكيس على السرير بعصبية )
خالد = هههههه قم ياكسلان ,, انا رحت قبل شوي لقسم الحريم احسب خالتي هناك بس قالت لي اختك انها عندنا ,,, وخالتي شكلها راعية طويلة جالسة تسولف مع خالي ,,, والصراحة مستحي اقولها خذي الغدا ووديه ( وضرب راسي ) قم لا تصير كسووول
اخذت الكيس وقمت ,,, طقيت الباب على خلود وفتحت لي ,,, وعطيتها الكيس
خلود = وين خالتي ,,, جوعاااانه اباكل ,,, ايه صح اذا رحت نادلي سلمى ومعاذ
لفيت عنها ابطلع وتذكرت شي والتفتت لها مرة ثانية
انا = خالد مر قبل شوي هنا .؟
خلود = ايه وسأل عن خالتي ام عبد الله من ورا الباب وقلتله عندكم ( وفتحت الكيس ) مالت عليه ماجاب بيبسي جاب نوع ثاني ماحبه
انا = وهو وش يدريه عنك وش تحبين ووش ماتحبين ,,, هو جاب لكم كلكم ,,, الحين انا انزل واجيبلك
روحين في رـوح
New member
- إنضم
- 3 يناير 2012
- المشاركات
- 2,734
- مستوى التفاعل
- 0
- النقاط
- 0
- العمر
- 31
رؤؤحيين نؤؤرتـــي قلبـــي ,,,
خلؤؤد مـآ تگ ـرهه ,, بس تشؤؤف
انـه يقعـد مـع أخؤؤهآ گ ـثيير و هـي يتيمـــةة ,,,,
فتغـآر منـه
احترت وياك
New member
اْستلمــــــؤؤ ,,,
* 24 *
العصر
صلينا انا وخلود بالحرم ,,, وتركنا معاذ نايم عند ام عبد الله بالفندق ,,, وسالم وسلمى طلعوا قبلنا مع خالد
بعد الصلاة طلعت انا وخلود للمحلات المنتشرة حول الحرم
خلود = خالد ابي اشتري لامي هديه
كنت عارف انها اذا راحت مكة بتزيد طلباتها واخذت احتياطاتي وتسلفت الفين مع الالفين اللي معي وصاروا اربعه ,, يكفّون
مسكينة خلود ,,, ليت امي تفكر فينا زي ماتفكر خلود بأمي,,, انا الى الحين زعلان من امي ومن تخليها عنا ,,, ولا قدرت امنع نفسي اكتم اللي بصدري
انا بسخرية = هه هدية ,,, ولمن لامي .؟ ,,, خليها تتذكرنا اول ,,, وبعدين قولي ابي هديه لها ,,, وش قالت قالت هدية
التفتت خلود لي وبعدها لفت وجهها عني
خلود = امي ماتخلت عنا ,,, زوجها هو اللي يمنعها
عصبت بس وش الفايدة ,,, اعكر مزاجنا بس على الفاضي وحاولت امسك اعصابي
انا = امشي ,,, تحركي قدامي اشوف
خذنا نص ساعة وحنا نتمشى ونلف وندور ونتفرج ,, فجأة رن جوالي والقيت نظرة عليه
( ناصر يتصل بك )
اففففففففففففف وش يبي ذا ,, ماني راد خله يولّي
رن رن رن لين سكت
خلود = خااااالد احم ,,, ابقول شي بس لا تعصب
رفعت حواجبي مستغرب ,,, وش عندها
انا مستغرب = خير
خلود = ابي اشتري لاب تووووب ,,, خالد الله يخليييك ابي لاب توب
طيرت عيوني فيها
انا = لاب توب .؟ مجنونة انتي .؟ ,,, من وين لي ,,, انا مامعي الا اربع الاف ونصهم متسلفهم ,,, وفيه اشياء اهم من الاب توب نحتاجها
خلود = بس خالد كل الناس عندهم الا حنا ,,, وبعدين قهر عندنا انترنت بس ماعندنا كمبيوتر ,,, خالد الانترنت يسليني وقت فراغي
تنهدت وسكت ,,, انتظرت خلود مني رد ,,, ويوم شافتني طوّلت ساكت وهي تنزل راسها ومشت
ادري ياخلود اني مقصر معكم واجد بس مابيدي حيلة ,,, وش تبيني اسوي ,,, اسرق .؟
شرت خلود اللي تبي ,,, بس ظلينا نتمشى ونتفرج على الرايح والراد ,,, رن جوالي مرة ثانية ,,, افففففففف هذا اكيد نويصر ,,, والقيت نظرة عليه
( ابراهيم يتصل بك )
ابتسمت ورديت
انا بابتسامة = هلاااا والله
ابراهيم = هلا فيك ,,, السلام عليكم
انا = وعليكم السلام والرحمة
ابراهيم = وينك يارجااال ,,, غايب يومين
ابتسمت ياحليلك يابراهيم كل ماغبت سأل عني
انا بابتسامة = انا بمكة الحين
سكت ابراهيم شوي
ابراهيم = مكة .؟ وش القصة كل الناس رايحين لمكة ,,,, صالح يقول ان خالد و ابو عبد الله واهله بعد معتمرين ,,, والحين انت بعد
انا = ههههههههههه برهوم ,,, انا وخالد بسيارة وحدة
سكت ابراهيم شوي
ابراهيم بمزح = ايها الخالدان الخائنان ,,, ويحكم وويح وجيكم المتنفخة ,,, ليش ماعلمتوني اروح معكم .؟
انا = هههههههههههههه حلوة وجيهنا المتنفخة
ابراهيم = انت وخالد صايرين ثنائي مشاء الله عليكم ,, بس ثنائي غير شكل ,,, تمشون مع بعض وتسافرون مع بعض واسماءكم مثل بعض حتى التكفخ تتكفخون مع بعض ههههههههه
ابتسمت
انا = ماسألت صالح ليش ماراح مع ابو عبد الله وعمته .؟
ابراهيم = الا سألته ,,, يقول ابوي عيا ههههههه ,,, ابوه صاير متشدد عليه بعد سالفة خالد
انا بحزن = على الاقل عنده اب يخاف عليه
ابراهيم = امممم اقول خالد انا اتصلت عليك ابي اسألك عن خالد ,,, انت متأكد انه يبي يروح للرياض خميس وجمعه ,,, اشوف الرجال راح لمكة وانا هنا اهوجس وافكر
انا = ايه متأكد
ابراهيم = تراك من يوم ماعلمتني عن توعده للشباب وانا بس اهوجس
انا = تدري ليه اعمترنا بوسط الاسبوع .؟
ابراهيم = ليه .؟
انا = عشان يمديه يروح للرياض خميس وجمعه
تنهد ابراهيم وسكت
انا = ماقلتلي وش سويت ,, تقدر تروح معه للرياض .؟ ,,, ابراهيم مانبي نتركه لحاله ,,, الرجال طافح الكيل معه وانا الصراحة خايف يصيرله شي
ابراهيم = يصير خير ان شاء الله ,,, اجل ابروح للضابط الحين واعلمه
انا = وشوله تروح للضابط ماراح يفيدينا بشي ,,, بالعكس يمكن تورط خالد اكثر ويعلم ابو عبدالله ,,, وبعدين انا مابي خالد يعرف اني علمتك ,,, اخاف يزعل مني ,,, انا بس ابيك تروح مع خالد للرياض وكأنك رايح معه كذا لشغلة لك
ابراهيم = واذا الضابط علّم ابو عبد الله .؟
انا = والله مدري انا محتار ,,, من جهه ابي ابو عبد الله يدري ومن جهه مابيه يدري ,,, ابو عبد الله هو الوحيد اللي يقدر يمنع خالد انه يروح ,,, بس المشكلة اهل خالد هناك ,,, امه واخواته يحترونه ,,, واذا الضابط علم ابو عبد الله بيمنع خالد اكيد ,,, وخالد عنيد ,,, واخاف تصير بينهم مشكلة ,,, وغير كذا خالد بيزعل مني لانه ماعلم احد الا انا
ابراهيم = خالد درء المفاسد مقدم على جلب المصالح ,,, ايهم احسن نخليه يروح عشان اهله ويمكن يصير له شي والا نمنعه عشان سلامته
انا بحيرة = والله مدري
ابراهيم = خالد فرصتك الحين مدام انك مع ابو عبد الله
انا مستغرب = فرصتي ,,, وشلون .؟
ابراهيم = حاول بابو عبد الله تقوله يمنع خالد يسافر للرياض الاسبوع هذا
انا مستغرب = وشلون
ابراهيم = مدري شفلك طريقة واقنع ابو عبد الله يمنع خالد يسافر للرياض,, وصح كلامك الضابط ماراح يفيدينا بالموضوع هذا خاصة ان استراحة خالد بالرياض ( تنهد وكمل ) ليت استراحته هنا كان قدروا يمسكونهم من دون كمين وبالراحة بعد لأنهم الحين داخلين استراحته بالغصب ,, اخ بس ليت الاستراحة هنا
تنهدت وسكتت
ابراهيم = طيب اخليك الحين ,, متى بتجون .؟
انا = مدري الصراحة ,, الشور عند ابو عبد الله
ابراهيم = توصلون بالسلامة ان شاء الله ,,, يله اتركك الحين ,, مع السلامة
انا = مع السلامة
وسكرت عنه
خلود = الحين حنا اعتمرنا بوسط الاسبوع عشان خالد .؟ مو تقول اللي اقترح عليكم ابو عبد الله .؟
انتبهت لخلود وضربت جبهتي ,,, صح انا وشلون نسيت انها تسمعني ,,
تذكرت معاذ وقلت عشان انسيها
انا = صح خلود خلينا نرجع يمكن معاذ قام الحين ,,, والا تبينا نصلي بالحرم اول .؟
خلود = لا ,, نبي ننزل الاغراض بالفندق وابي اروح معك للحرم ,, صح خالد شف
وطلعت من شنطتها جوال بس مثل جوالات الشيبان ,,, استغربت من وين لها هالجوال
انا مستغرب = من وين لك هذا .؟
خلود = من خالتي ام عبد الله ,,, عطتنياه تقول خليه معك اخاف تضيعين من اخوك ويمكن تحتاجينه
ابتسمت وبعدها ضحكت ,,, شكل ام عبد الله تحب خلود ,,, الحمد الله
خلود = ابي اضيع منك عشان استعمله
مت ضحك عليها وعلى خبالها ,,, وعجزت امسك نفسي عن الضحك لين دمعت عيوني
المغرب
صلينا بالحرم بس مامدانا ننزل اغراضنا بالفندق ونزلناه في مكان شوي آمن وبعد الصلاة رجعنا لاغراضنا والحمد الله لقيناهن موجودات
وحنا بالطريق رايحين للفندق ,,, رن جوالي والقيت نظره عليه
( ناصر يتصل بك )
تضايقت ورديت
انا بضيق = خير
وتفجأت فيه معصب
ناصر بعصبية = اسمع خويك بيضيّع العيادة بسبب جهله وعناده
انا = وانت وش عليك منه ,,, العيادة عيادته وهو حر
ناصر بعصبية = لا ماهي عيادته ,, اكثر الموظفين رافضين العمل احتجاج على تأخر الرواتب ,,, اسمع ولا ابي اكثر الكلام معك ,,, ابي اقابلك بكرة وضروري
انا بملل = انا الحين مسافر متى مارجعت قابلتك
ناصر = ومتى ترجع .؟
انا = مدري بس يمكن بكرة
ناصر = خلاص اجل اذا جيت اتصل علي
انا = انت وين الحين .؟
ناصر = بالقصيم ,,, خلاص بكرة اقابلك .؟
انا = لا ,,, اشوف يوم الخميس واتصل عليك
ناصر = اسمع انا وسعت صدري على خويك ومالي خلق اوسع صدري عليك ,,, تفهم .؟
وسكر بوجهي ,,, فاااارق مالت عليك وعلى وينلي من وراك
رجعنا الفندق ,,, ودخلت خلود لقسمها ورحت انا لقسمنا ودخلته ,,, واعترض طريقي سالم فرحان ,,,
سالم = خاااااالد شف
لابس بنطلون جيشي وفنيلة سودا ,,, طلع خالد من الغرفة الثانية وهو يضحك ووقف بجنب سالم
ابتسمت توني افهم سبب فرحة سالم ,, خالد بعد لابس بنطلون جيشي وبلوزة سودا
خالد = نشبه بعض صح ههههههههههههههههه
انا بابتسامة = ايه تشبهون بعض حتى بالعقل سبحان الله هههههههههه
ومشيت متخطي خالد ابي اروح للغرفة الثانية ,, بس تعرقلت بشي وطحت على الارض
جلست اشوف اللي تعرقلت فيه ,,, وكانت رجل خالد ,,, ماد رجله بطريقي وطحت
انا بعصبية = ياااااحمااااار
خالد = تستاهل
راح سالم يناقز مستانس على طيحتي بالارض
انا اصلا تعبان من الفرفرة مع خلود والحين عاجز اقوم ,,, اجلس بالارض احسن
انا بمزح = اصلا انا كنت ابجلس بالارض ,,
ضحك خالد وجلس بجنبي على الارض ,,, انتبهت انه معلق يده اليسرى برقبته ,,, خالد من المقيات الى اليوم العصر ماعلق يده
انا = ليه يدك تعورك.؟ ( واشرت عليها )
حط خالد يده اليمنى على عضده الايسر
خالد = ايه ,,, تراني قلت لخالي بنتعشى اليوم برا الفندق ووافق ماعنده مانع بس يقول بنطوف الفجر طواف الوداع ونمشي قل لاهلك يتجهزون
انا = اهاااا
بعد صلاة العشا
طلعنا من الفندق وركبنا السيارة وكل واحد اخذ مكانه
مرينا المطعم اول ونزلنا انا وخالد وشرينا عشانا ورجعنا للسيارة
خالد = رح لعرفة
انا = لا مزدلفة
خااالد = لا عرفة
انا = مزدلفة
خالد = عرفة
انا = طيب نسأل البقية ونشوف رايهم ,,, هاه ياعم تبي عرفة والا مزدلفة .؟
ابو عبد الله = والله ياولدي التمشية هذي لكم ,,, شوفوا انتم وين تبون وانا معكم
طالعنا انا وخالد بعض
انا = مزدلفة
خالد = عرفة
طالعت قدام
انا = مزدلفة ابرد واوسع
خالد = بس عرفة احسن ( وطالع قدام ووجه الكلام لخالته) هاه خاله تبين عرفة والا مزدلفة .؟
ام عبد الله = على كيفكم انتم
انا بتنهيدة = مزدلفة وخلاص
خالد = عرفة وخلاص
انا = ياااخي وش تبي بعرفة ,,, وبعدين انا مابي البزارين يركبون الجبل
= الا انا ابي
رفعت نظري للمرايا الامامية اشوف خلود اللي تكلمت فجأة ,, متغطية ماشوف منها شي بس شفتها حاطة يدها على فمها
ضحكت ام عبد الله وشفتها تضمها وهي تضحك ,, الخبلة خلود انا قلت مابي البزارين يركبون الجبل وهي قالت الا انا ابي ,,, الا اذا كانت تعتبر نفسها بزرة هذا شي ثاني
التفتت لخالد ولقيته يطالع دريشته ويحاول يمسك نفسه عن الضحك ,,, وحاط يده على صدره بمكان الخياطة ,,, شكله عوره الجرح
انا = يعورك صدرك .؟
حرك خالد راسه باية وهو ماسك ضحكته
انا = احسسسسن
وكأني قلت نكته ,,, زاد بالضحك ,,, مالت عليه وعلى خلود
ام عبد الله = روحوا عرفة ,,, خلاص نبي عرفة
انا = إن شاء الله
خالد بابتسامة عريضة = كان تكلمتي من زماااااان ,,, من الصبح وانا احاول فيه
وصلنا عرفة ونزلوا ورحت انا اوقف السيارة بمكان مناسب ورجعت لهم ولقيت ابو عبد الله وزوجته جالسين يسولفون وخالد جالس عندهم ويسمعهم وسالم وسلمى ومعاذ راحوا يلعبون بعيد عنا شوي
وخلود كانت جالسة لحالها على صخرة تحت الجبل ,,, رحت لخلود وجلست عندها
انا = السلام عليكم يابزرة
خلود = مانتبهت لنفسي
انا = انا قلت البزارين ,,, الا اذا كنتي تعتبرين نفسك من البزارين .؟
خلود = وش اسوي فيك ,,, انا ابي عرفة وانت تبي تودينا مزدلفة
رحنا نتمشى شوي انا وخلود ,,, وانا افكر وشلون اكلم ابو عبد الله يمنع خالد عن السفر للرياض ,,, المشكلة خالد دايم يامعي يامع ابو عبد الله ,,, مافيه مجال نكون لحالنا ,,,, شسوات الحين وشلون اصرفه
شرا خالد للبزارين اسكريم وهالمرة الكل صار بزر حتى ابو عبد الله شراله خالد اسكريم
تعشينا بعرفة ورجعنا للفندق والكل خلد للنوم
قمت من النوم ابي اروح للحمام لكن انصدمت بخالد اللي جالس بسريره وحاط راسه على ركبه ,,, ظليت منسدح ولا قمت ,,, وصرت اطالع خالد ,,, وش فيه ليه ماينام ,,, اليوم وش زينه يضحك ويسولف
ايه صح تذكرت ,,, هو دايم يقولي انا ماانام الليل ( طيرت عيوني ) معقول يجلس كذا يوميا طوال الليل يفكر ويهوجس ,,, والا فيه سبب ثاني .؟
اخذت جوالي بشويش من تحت المخدة وحاولت القي نظرة بس الغرفة مظلمة ,,, واخاف اولع نورالجوال وينتبهلي خالد ( غطيت راسي باللحاف ) وشغلت نور جوالي والقيت نظرة على الساعة
الساعة 3
3 آخر الليل ,,, متى ينام هذا اجل ,,, ووش يفكر فيه بالضبط بوينلي والا بناصر والا ببدر وربعه
توكلت على الله وقمت من سريري وجلست على سرير خالد ,,, انتبهلي خالد ورفع راسه يطالعني
خالد بتعب = خالد ,,, ليه قمت .؟
استغربت تغير صوته
انا = ليه مانمت .؟
نزل خالد راسه
خالد بهمس = ماجاني نوم
انا = وش تفكر فيه .؟
خالد = بكل شي
حطيت يدي على ركبته
انا = الله بيخلصك منهم كللللهم ان شاء الله ,,, كلهم ياخالد ,,, خلنا نروح للحرم يمكن ترتاح شوي
خالد = ماقدر مصدع مرة ,, راسي يعورني ,,, اخاف افقد وعيي وانا بالحرم
انا = اكلت علاجك .؟
خالد بتنهيدة = ايه ( حط راسه على ركبه ) رح نوووم ماعليك مني
قمت وجلست بجنبه ملاصق له ولفيت يدي على اكتافه
انا بابتسامة = طار عني النوم ابجلس معك
خالد بهمس = خالد
انا = سم
تكلم خالد بكلمات ماسمعتها بسبب صوته الضعيف ولانه حاط راسه على ركبه
انا = وش تقول ارفع صوتك ماسمعتك
رفع خالد راسه والتفت لي ,, ولقرب وجهه مني شفت ملامحه بوضوح ,,, شكله حزين ,,, حزين مرة ,,, هالات وشحوب وعيونه ناعسة
خالد = ابي اقولك سر بس اوعدني ماتعلم احد
تفاجأت منه ,, و مدري ليه خفت ,, سر ,,, سترك ياارب
انا بخوف = آآآ ,, اوعدك ,, سرك ببير ياغالي
خالد = لا تعلم أي احد ,,, احس ابنفجر اذا كتمت بصدري اكثر
انا = فضفض ياخالد قل اسمعك
طيرت عيوني فيه لما شفت الدموع تجتمع بعيونه تبي تنزل ,,, غمض خالد عيونه ونزل راسه وسكت
انا بصدمة = خااالد
خالد = خلاص انسى انسى ( وحط راسه على ركبه ) رح نوم ,, رح خالد خلني بحالي
انا = قل اللي بخاطرك ياخالد يمكن اقدر اساعدك
وكأني جرحته بهالكلمة
بكى بصمت
انا بخوف = خالد وش فيك خوفتني ياشيخ
انسدح خالد على ظهره وغطى نفسه بلحافه
خالد = خلاص رح نوووووم
انا = خالد قلي وش فيك ,,, وينلي سوا شي .؟
مارد علي
حاولت اسحب اللحاف عن راسه بس تمسك فيه اكثر
انا = وش تبي تقول ,, اسمعك ,,, فضفض
ساكت ولا يرد
تنهدت و سكتت وظليت جالس عنده وانا افكر وخايف وش كان يبي يقولي وليش غير رايه ,,, لا يكون متورط بشي بعد وماحد يدري ,,, حياتك متعبة ياخالد وتتعب اللي معك
قمت ورحت للحمام وبعدها جلست على سريري وانا اشوف خالد يتقلب بفراشه ,,, حاولت فيه مرة ثانية يتكلم يقول اللي بخاطره وعيا وحاولت فيه يروح للحرم وانا معه وعيا
لين آذن الفجر وهو على هالحال ,,, وشلون الحين شكله تعبان مدري مهموم مدري وش قصته ,,, والمشكلة بعد صلاة الفجر بنطوف طواف الوداع ,,, بالله وشلون بيطوف هذا وهو على هاالحال
طلعنا انا وابو عبد الله وخالد نصلي الفجر والحريم جلسوا عند البزارين النايمين
طوال وحنا بالحرم وانا ملازم خالد ,,, وبعد مانتهينا من صلاة الفجر
ابو عبد الله = نبي نوادع الحين بس لازم ارجع انا وخالد للفندق وناخذ الحريم ( والتفت لخالد ) خالد اكلك علاجك وجهك ماهو عاجبني
خالد بهمس = ايه اكلته ,,, خلاص روحوا وانا احتريكم
ابو عبد الله = نبيك توادع الحين وترجع للفندق عشان تجلس مع البزارين مانقدر نتركهم بالفندق لحالهم
خالد بهمس = طيب
ابو عبد الله بخوف = خالد فيك شي .؟ تعبان .؟
خالد = لا بس مانمت امس
ابو عبد الله = الله يهديك كم مرة اقولك اترك عنك السهر
التفتت لخالد ,, وشلون بيطوف لحاله وهو تعبان ,,, لازم ارافقه بالطواف
التفتت مرة ثانية لبو عبد الله
انا = عم انت رح الحين وانا بوادع مع خالد
ابو عبد الله = واختك .؟
خالد بتعب = لا ,,, روحوا للفندق وانا بوادع واجيكم
انا بخوف = ايه بس انتـ
خالد = خلاص قلتلك رح
مسكت يد خالد وجريته بعيد شوي عن ابو عبد الله
انا بعصبية = انت خبل والا خبل
تأفف خالد وسكت
انا = ياخي شف شكلك وشلون صاير تقول طالع من قبر ,,, وشلون بتطوف لحالك .؟
خالد = انا بخير واقدر اطوف عادي ,, واخذت مسكن قبل اطلع من الفندق والحين الصداع خف ,,, وماهي اول مرة يجيني صداع ياخالد ,,, رح مع خالي
انا = خلني اوادع معك ونرجع مع بعض
خالد = واختك
انا = اطوف بعد معها مرة ثانية مو مشكلة
خالد بضيق = خالد ماهي اول مرة يجيني صداع ,,, صدقني انا بخير لا تخاف ,,, رح لخالي تأخرت عليه
وراح متوجه لصحن الحرم ,,,
عنيييييييييييييد
