رواية هدية عمري(كامله)..اللي ماتدخل يفوتها نص عمرها

[meen_ana]

::الجزء السادس والعشرون::

بعد أيام من وفاة خالد//دخلت دلال البيت وشافت في الصاله واحد جالس حست إنها تعرفه ويوم قربت وشافت وجهه...
دلال_خاااااالد!!!
خالد_إيه يادلال خالد اللي كان يعتبرك أخته وأنت ذبحتيه
دلال_أناااا!!
خالد وهو يروح_أنت فرقتي بيني وبين اخواني فجر ونواف كرهوني بسببك
دلال_خااالد خااااالد
قامت دلال من نومها مفزوعه وقلبها يدق بقوه(خالد زعلان علي! مات وهو زعلان! قال فرقت بينهم يمكن كان يعرف؟ يمكن كان يفكر في هالشيء يوم سوى الحادث عشان كذا قال إني أنا اللي ذبحته..خالد مات بسببي أنا) وبدت تصيح وهي خايفه من هالفكره لين نامت بدون ماتحس...


في المستشفى//طلع نواف من عند الدكتور المسئول عن حالة زهور واللي ماطمنه أبدا لأن زهور يوم صحت انهارت مره ثانيه وسآت حالتها(الله يقومك بالسلامه يازهور بناتك محتاجينك)


في بيت أم ياسر//كانت أمنيه جالسه في غرفتها وتتذكر للمره الألف الكلام اللي سمعته من لميس(لهالدرجه تكره وجودي في نفس المكان اللي أنت فيه؟ أجل كيف كنت متحمل وجودي؟ ليه كنت تحسسني إنك مهتم فيني هذا اللي للحين مو قادره أفهمه!أبي انساك ياسلطان)


من بكره//تكرر حلم دلال في خالد لكن هالمره كان الحلم أقسى...
خالد_ماراح أسامحك يادلال على اللي سويتيه فينا
دلال_خالد أنا خفت نواف ما يسامحني لكن أنت أنت بتفهمني
خالد_نواف طيب وأنت ماتستاهلينه اتركيه يادلال
صحت دلال وكلمة خالد في أذنها وهي تصيح و ترتجف..وجلست تفكر وتفكر في كلامه(خالد صادق أنا ماستاهل نواف بعد اللي سويته فيهم لازم اتركه وهو لازم يتزوج زهور ويهتم في بنات خالد كذا يمكن أكون صلحت اللي سويته ويمكن يرضى خالد علي)


بعد يومين دق نواف على دلال وبعد ست رنات ردت...
دلال_هلا
نواف_أهلين مساء الخير
دلال_مساء النور
نواف_وش أخبارك؟
دلال تتنهد_نواف أنا آسفه بس مالي خلق أتكلم بعدين أدق عليك
نواف_دلال وش فيك؟
دلال_مافيني شيء بس مابي أتكلم مع أحد
نواف_أنا مو أي أحد أنا نواف ويله قوليلي وش فيك؟
دلال_بعدين بعدين يانواف أمي تناديني مع السلامه
وسكرت قبل تسمع رده أما نواف فتضايق زياده على ضيقه كان داق عليها يبي يرتاح شوي من همه ومن أفكاره وكان مشتاق لها من متى ماتكلم معها(توقعتك تهونين علي اللي أنا فيه لكن هذا حالي معك يادلال دائما تزيدين مشاكلي مشكله!مادري وش فيك أدري إنك للحين متأثره بوفاة خالد الله يرحمه بس ليه تكلميني بدون نفس؟ وين راح الحنان والحب اللي شفته في عيونك يوم العزاء)

من بكره دق نواف مره ثانيه على دلال لكنها ماردت وبعد ساعه دق وبعد ماردت، في هالوقت كانت دلال عند أم خالد اللي استغربت جيتها لحالها...
أم خالد_غريبه أمك ليه ماجت معك لا تكون تعبانه؟
دلال_لا أمي ما فيها شيء بس هي ماتدري إني جايه عندك لأني أبي اكلمك بموضوع وما أبيها تعرف
أم خالد_دلال وش فيه خوفتيني؟!
دلال_خالتي أنااا..أنا عارفه إنه بدري على هالكلام ومو وقته بس أنا كنت أفكر في حالة زهور وو وش بيكون وضعها..زهور ماعندها أحد وتوها صغيره..وبناتها لازم يكون فيه أحد يربيهم ويهتم فيهم
أم خالد بحزن كبير_صادقه يادلال والله هالبنت مسكينه هي وبناتها بس زهور مثل بنتي وهالبيت بيتها وبناتها عمهم ماراح يقصر فيهم
دلال_صح ياخاله بس..بس زهور صغيره مو معقول بتخلينها كذا بدون زواج و...
أم خالد تقاطعها_دلال خالد ماله إلا اسبوع متوفي وأنت تفكرين بزواج زهور!!
دلال_خالتي أنا ما قلت تتزوج اللحين..لكن..لكن أنا اقول نواف لازم يتزوج زهور ويربي عيال خالد
أم خالد انصدمت من كلام دلال هي نفسها مافكرت في هالشيء كيف دلال خطر في بالها...
أم خالد_وأنت يادلال؟
دلال_يتركني أنا بألقى نصيبي لكن زهور....
أم خالد_لا يا دلال مين قال إن أحد بيرضى!
دلال_عشان كذا قلتلك أنت قبلهم أبيك توقفين معي وتقنعين نواف وأنا اقنع أهلي
أم خالد_وأنت يادلال تتطلقين؟!
دلال_أنا ياخالتي اعتبركم أهلي واذا شفتكم مرتاحين أنا بأرتاح
أم خالد_دلال والله الفكره ماريحتني وقلتلك ما أحد بيرضى وأولهم زهور ولا أنا راضيه بعد
دلال_خالتي أنا أمس حلمت في خالد الله يرحمه وهو اللي طلب مني هالشيء إذا قلنا لزهور إنه طلب خالد بتوافق عشان تريحه
أم خالد سكتت لحظه تفكر_ونواف؟
دلال_نواف أنت تقنعينه
أم خالد_أنت ماراح تقولين له؟
دلال_ما أقدر الله يخليك ياخالتي ساعديني خالد طلب مني هالشيء وما بأرتاح لين يصير

وبعد جلسة اقناع طويله دخلت دلال الفكره برأس أم خالد وطلعت من البيت والتفتت على البيت الصغير اللي المفروض يكون لها لكنه للحين ماكمل ولا عمره بيكمل نزلت دموعها وراحت للسياره...
مع أول درب يأخذني بعيد وينهي الموضوع/
أبجمع آخر أحلامي وآمالي وبأحرقها/
غلطت وكانت الغلطه كبيره والخطأ مرجوع/
وخسرت جنه على يدينك بدت تزهر حدايقها/
ولا باقي ورى هذا الهوى إلا العطش والجوع/
وعلى حد الجنون روحي أحاول منك اعتقها/
وأبدأ اعيش في غيابك حزينه والأمل مقطوع/
تجمعني سنين الجرح وتنهيني دقايقها/
رجعت دلال وقالت لأهلها قرارها وهم مو عارفين وش يردون عليها مع إنه كان واضح إنها اتخذت القرار عشان كذا تركوها على راحتها ولا قالوا لها لا ولا إيه يمكن يكون هالقرار تحت تأثير وفاة خالد وبعدين تغير رأيها وبعد هم للحين ماعرفوا رأي نواف في هالموضوع...

 

[meen_ana]

بيت أم خالد//رجع نواف للبيت وهو يفكر في دلال ليه ماترد على جوالها كان يبي يتصل يسأل سلطان لكنه فكر إن أمه أكيد مكلمتهم وتعرف لو صاير عندهم شيء، دخل نواف وشافها في الصاله لحالها والحزن اللي انطبع على وجهها ومايفارقها لحظه من وفاة خالد تقدم وحبها على رأسها...
نواف_مساء الخير يالغاليه
أم خالد بجديه_هلا مساء النور زين جيت بدري
نواف_ليه فيه شيء؟
أم خالد_عندي موضوع بأكلمك فيه
نواف_خير يمه
أم خالد_دلال كانت هنا
نواف_دلال! دقيت عليها ماترد عسى مافيهم شيء؟
أم خالد_لا مافيهم شيء بس دلال جت تكلمني في موضوع تبيني أقوله لك
نواف استغرب ملامح أمه وطريقة كلامها تدل إن الموضوع مو سهل وبعدين ليه دلال تحط أمه بينهم ليه ماكلمته وقالت له اللي تبيه هو من شافها تصرفه حس إن فيه شيء...
نواف_تكلمي يمه وش فيه؟
أم خالد_قبل أبيك تعرف إني مالي دخل في هالموضوع دلال هي اللي بنفسها جت وقالت لي وأنا ما كنت موافقه
نواف_يمه خوفتيني وش هالموضوع؟
أم خالد_أنت عارف ان زهور وبناتها مالهم بهالدنيا غيرنا وأنت اللي بتصير مسئول عنهم
نواف_وأنا ماراح اقصر فيهم وهم عيال خالد الله يرحمه بس وش دخل دلال في هالموضوع!
أم خالد_دلال تبيك تطلقها عشان تتزوج زهور وتربي بناتها
نواف كان بيضحك على هالفكره اللي مايدري كيف فكروا فيها...
نواف بصدمه_أكيد انجنت دلال وش هالخرابيط
أم خالد_نواف دلال مقرره وبتقول لأهلها
نواف عصب_أنتم من صدقكم!!
أم خالد باستسلام_هذا اللي قالته دلال وطلبت مني اقوله لك
نواف حس إن الموضوع جد بس هو رفض إلا إنه يآخذه مزحه طلع من البيت بسرعه وفي سيارته دق على دلال بس مثل ماتوقع ماردت وأرسل لها [دلال لو مارديتي عشر دقايق وتلقيني في بيتكم وماراح اطلع إلا اذا كلمتك] دق مره ثانيه وردت...
دلال_هلا
نواف_دلال قولي ان الكلام اللي سمعته مو صح
دلال_قالت لك خالتي
نواف بعصبيه_إيه بس ماصدقت إنك تتكلمين جد ومابي أصدق
دلال_نواف لا تفكر في نفسك فكر في بنات خالد أنت عمهم و....
قاطعها نواف_ومين قال لكم إني بأقصر فيهم بس مو ضروري اتزوج زهور دلال حرام عليك كيف خطرت لك هالفكره اللي عجزت استوعبها
دلال_نواف أنا حلمت في خالد وهو اللي طلب مني هالشيء وأنت لازم توافق وتريحه
نواف_دلال أنت تبيننا نتطلق؟!
دلال_لازم نتطلق عشان غيرنا
نواف بعصبيه_دلال حرام عليك ارحميني..يكفي اللي تسوينه فيني ولا مره كملت معك فرحتي دائما تهدمينها
دلال تصيح_عارفه إنك ماسامحتني على اللي سويته حتى خالد ماسامحني عشان كذا قال لي ابتعد عنك وأنا بأبتعد عشان اصلح غلطتي
نواف_دلال هالحلم منك من أفكارك مو من خالد
دلال_آسفه يانواف أنا خلاص قررت وقلت لأهلي انساني يانواف وانسى زواجنا وكمل حياتك انت اللحين مسئول عن عائله كامله ولك حياة غير حياتي

سكرت ونواف غمض عيونه وسند رأسه يفكر(وبعدين يعني متى بأرتاح؟ مايكفي خسرت خالد اللحين أخسر دلال والله تعبت والله تعبت ليه تتركيني يادلال في اكثر وقت انا محتاجه لك فيها)
ليه تتركيني..في زحمة احزاني وحدي..
من وجودك حرمتيني..ترى انا ماأقدر..
اعيش في دنيتي من دونك..شمسها تحرق سنيني..
انا بعدك..احس الوحده بتقتلني..
وعتمة ليلي تعميني,,
ليه ياقمر عمري,,
تهجريني بلا ذنب ولااعذار,,
تقولين وحدك تقدر تكمل المشوار,,
غلط يوم ظنيتي في بعدك يكمل المشوار,,
انا عمري تعلق في طرف صوتك,,
فهمسة صدى حروفك,,
فضحكة قلبك الحيران,,
تذوب همومي واحزاني,,
واطويها مع النسيان,,
واذا ذبحي عليك يهون,,
وقتلي منك يرضيك,,
ترى بدمي ونظر العيون,,
وبروحي ياجرح الروح,,
اناااااا افديك,,


في بيت أبوفواز//جلست دانه مع أهلها ولاحظت غياب فواز اللي صاير مايجلس معهم كثير خاصه معها هي بالذات وكأنه يلومها على حبه لسندس(أنا كنت حاسه إن سندس عنده غير لدرجة إنه مايسألني عنها وأنا متأكده إنه يحبها بس ليه مايكلمني عنها؟ليه مايقولي اللي في قلبه؟ زين يافواز يعني مستغني عن خدماتي أنا أوريك وش اقدر أسوي)


من بكره في بيت أبوسلطان//دقت أمنيه على دلال وبعد ماسلمت عليها...
أمنيه_وش أخبارك اليوم صوتك تعبان؟
دلال_مانمت زين وملانه
أمنيه_وزهور وش أخبارها؟
دلال_للحين على حالها
أمنيه_مسكينه زهور الله يقومها بالسلامه
دلال_آمين
أمنيه_زين أنا بس كنت بأتطمن عليك وأنت ارتاحي اللحين وحاولي تجين عندي تغيرين جو
دلال_إن شاء الله
أمنيه_مع السلامه
دلال_مع السلامه
سكرت دلال وما قالت لأمنيه عن اللي سوته لأنها ماتبي أحد يقول لها إنها غلطانه هي من دون شيء نادمه على اللي سوته لكنها ماتقدر ترجع عنه عشان خالد وزهور وبناتهم مع إنها كانت مخنوقه ومحتاجه تتكلم مع أحد(لا إذا تم كل شيء أقول لها)


في كلية الطب//جلست دانه مع سندس وهي ناويه تسوي اللي فكرت فيه امس...
سندس_وش فيك من جلسنا وأنت ساكته وتطالعيني؟!
دانه_أبي اقولك شيء
سندس_قولي كلي أذان صاغيه
دانه_خالي فواز
سندس_وش فيه؟
دانه_يحب وحده ويبي يتزوجها
عرفت سندس اللحين إنه شال أمنيه من باله وهالشيء قهرها يعني على باله إذا شغل ابوها بيصلح اللي سواه...
سندس بعصبيه_وأنا وش دخلني؟
دانه_كنت بأشوف وش رأيك
سندس_رأيي! ليه إذا قلت لا ماراح يتزوج
دانه_طبعا لأنك أنت العروس
سندس حست إن أحد صب عليها ماء بارد و ماستوعبت اللي سمعته...
سندس_دانه أنت وش تقولين؟
دانه_اقول إن فواز يحبك أنت ولأول مره أحس إنه يحب صدق وكل اللي يسويه عشانك انت مع إنه عارف إنك لايمكن ترضين فيه بعد اللي صار
سندس تصارخ_قصدك بعد اللي سواه يتسبب في طلاق أمنيه بعدين يغير رأيه ويحاول إنه يشريني باللي سواه مع أبوي والمفروض إني أصدق إنه يحبني وأطير من الفرح لين حضرته يكتشف إنه مايحبني ويشوف وحده ثانيه لا يادانه نجوم السماء أقرب له قولي له إني ماأبيه وحتى أمنيه كانت ماتبيه واعتقد يادانه صداقتنا وقفت إلى هنا ويكفي اللي جاء منكم

وتركت دانه منصدمه وراحت..شافتها دانه وهي مو مصدقه(أنا وش سويت؟ بأكحلها عميتها كنت أبي اساعد فواز بس ماكان المفروض أقول لها كل شيء مره وحده استعجلت وهي فهمت كل شيء على كيفها وماعطتني فرصه أفهمها وش أسوي اللحين وهي حتى صداقتنا انهتها؟والله لو يعرف فواز وش سويت يذبحني هو ماتكلم يمكن يخطط لشيء أنا عارفه فواز مايترك شيء يبيه وصبره طويل بس الظاهر اني قطعت هالطريق من الاساس)


في شركة أبوسلطان في مكتب سلطان//كان نواف جاي عند سلطان...
نواف_سلطان كلم دلال خلها تعقل عن هالخبال تعبت أدق عليها ماترد
سلطان_وأنا بعد مو مقتنع باللي قالته ولا أحد مقتنع بس مانبي نضغط عليها تعاند كل هذا من تأثير وفاة خالد تدري إننا نعتبره أخونا وهي بعد تحب زهور بالحيل لكن إذا هدت بتعرف إن اللي تقوله مايصير
نواف يتنهد_الله يعين
سلطان_هونها يانواف أنت اللي فيك يكفيك
طلع نواف من عند سلطان وهو تقريبا مرتاح(معقوله ترجع دلال عن اللي قالته؟ ياليتني أتأكد من هالشيء مثلك ياسلطان بس أنا خايف الفكره تدخل رأس أمي بعدين وش يطلعها منها..من وين بأجيب صبر لكل هاللي أمر فيه)


بعد يومين في الكليه//كانت دانه تدور على سندس اللي لها يومين غايبه وكل مادقت عليها صرفتها وشافتها من بعيد مع بنات وجت عينها في عينها وكانت نظرة سندس لها تحذر إنها تكلمها(بهالسهوله بعتيني ياسندس!لا أنا متأكده إن كل اللي تسوينه من ورى قلبك شكلي جرحتك بس والله ماكنت أقصد ولازم أصلح اللي سويته)


في بيت أبوسلطان المغرب//نزلت دلال من غرفتها اللي قليل ماتطلع منها رافعه شعرها ومالها خلق كالعاده طلعت للحديقه وقبل تجلس لمحت واحد يطلع من المجلس كانت بتروح لكن شيء خلاها تلتفت وشافت نواف حاله كان مثل حالها أو أسوأ تقدم منها لكنها راحت بسرعه لكن هو كان أسرع منها ومسكها من يدها وقف قدامها ورفع راسها بيده وشافته قريب منها شافت الحزن والشوق اللي في عيونه شافت التعب في ملامحه وذقنه اللي ماحلقه والارهاق في وجهه...
نواف_دلال والله تعبت لا تحمليني فوق طاقتي خسرت خالد ومابي أخسرك
وبنطق اسم خالد تغير حال دلال وكأنها تذكرت...
دلال_آسفه يانواف أنا عارفه إنكم تآخذوني على قد عقلي لكني قررت وماراح أرجع في كلامي لأني وعدت خالد
وراحت عنه وهو يطالعها ويطالع آخر أحلامه تموت معها...

 

[meen_ana]

::الجزء السابع والعشرون::

في بيت أبوفواز//نزل فواز من غرفته وشاف دانه وأماني في الصاله أماني تشوف التلفزيون ودانه سرحانه وشكلها متضايقه...
فواز_مساء الخير
أماني_مساء النور
فواز يرفع صوته_قلنا مساء الخير
دانه تلتفت له_مساء النور عاش من شافك
فواز_وماعاش من زعلك
دانه بسرعه_بسم الله عليها
أماني تضحك_والله مزعلتك كذا وماترضين عليها أكيد سندس
عرفت دانه إن فواز يطالعها لكن ما ألتفتت عليه(خليه يكمل تطنيشه مو مسوي روحه مو مهتم خلاص لايهتم) كانت محتره وطلعت الحره فيه...
دانه وهي تقوم_أسرار شخصيه عليها رقابه
راحت عنهم وفواز يفكر(معقوله متهاوشه مع سندس! لا أكيد وحده ثانيه )
طلع مع بدر اللي كان بيمر عليه وفي السياره كان فواز جالس مكشر...
بدر_بسم الله ترى جايبك معي تونسني مو تخوفني
فواز_أحس إني مقصر مع البنات خاصه بنت اختي أنا عارف إني أعني لها كثير يوم كانت صغيره كانت تقول إني أبوها ودائما تعتمد علي وأنا بالفتره الأخيره ماجلست معها ولا حتى كلمتها وأحس إنها بعدت عني وأنا مابي اضايقها ..اليوم كلمتني من غير نفس
بدر بدون مايحس_دانه طول عمرها حساسه
أول ماخلص كلامه جمد الدم بعروقه مايدري وشلون قال اللي قاله هذي كانت أفكاره بس كيف طلعت بصوت عالي كان قلبه يدق بقوه وبالغصب قدر يلتفت على فواز وهو مو عارف وش بيقوله.. لكنه ارتاح يوم شاف فواز سرحان في عالم ثاني وفجأه لف بسرعه عن سياره ما كان منتبه لها...
فواز_بدر وش فيك؟!
بدر_سرحت شوي مانتبهت


في كلية الطب بعد أسبوع//شافت دانه سندس جالسه لحالها وراحت لها...
دانه_صباح الخير
سندس_صباح النور
دانه_طاح اللي برأسك؟
سندس ماهانت عليها_دانه أنا عارفه إني زعلتك ويمكن تشوفين إني أبالغ بس....
قاطعتها دانه_لا ما بالغتي هاذي ردة فعل عاديه وأنا بعد غلطانه قلت لك كل شيء مره وحده بدون مقدمات بس أنا...
سندس تقاطعها_دانه مابي تكلميني في هالموضوع
دانه_مو على كيفك أنا بأتكلم وأنت بتسمعيني وبعدين كيفك تقتنعين أو لا
سندس_من اللحين لا
دانه_سندس أنا عارفه إن فواز غلط بس أنا بعد غلطت يوم قلت لأماني ليه سامحتيني ومو راضيه تسامحينه
سندس_سامحتك لأنك صديقتي هو بأي مناسبه أسامحه بعدين أنت كان عندك سبب هو ماعنده أي سبب للي سواه
دانه_سندس أنت مو فاهمه فواز ما أحد فاهمه مثلي الكل يشوفه مغرور ويحب يملك كل شيء لدرجة هو نفسه بدأ يقتنع بهالشيء لكن صدقيني فواز طيب بالحيل ويهتم في الناس على حساب نفسه أكثر من مره حب بس ماتوفق لأنه دائما يكتشف إن البنت اللي يعجب فيها من برى حلوه لكن اذا عرف اللي في داخلها عرف إنها ماتناسبه وأنا متأكده إن اللي خلاه يتعلق في أمنيه إنها غير البنات اللي عرفهم صح في البدايه حب الشكل لكنه بعدين تعلق في شخصيتها من كلامي عنها ولو كان أناني مثل ماتقولين ويحب يملك كل شيء كان يوم سمع كلامي مع أماني راحت أمنيه من خاطره لأن سلطان بيطلقها وكان راح وخطب لميس اللي كانت معجبته بس أنا عارفه إن قلب فواز الطيب هو اللي خلاه يختار أمنيه عشان يحاول يعوضها عن اللي صار لها
سندس_ياسلام كل هالكلام حلو لكنه تغير
دانه_لأن البدايه والطريقه كانت غلط مع إني ما أشوف إنه سوى شيء كل اللي سواه قرب بين أبوسلطان وأبولميس وسلطان ماكان مضطر يطلق أمنيه لكن هالشيء خلاه يحس إنه أخطأ بحقها وهو كان بيساعدها وأنت اللي خليتيه يعرف هالشيء أنت الوحيده اللي حبك فواز لشخصيتك وتصرفاتك تدرين أنا من ذاك اليوم وأنا عارفه إنه يهتم فيك لكن مافكرت أقول لك لين تأكدت إنه هالمره غير كل مره سندس فواز أول مره تغيره بنت لدرجة إن شغله اللي دائما كان أهم شيء بالنسبه له ماصار يهتم فيه
سندس_دانه أنا سمعتك عشان ماتزعلين وأظن قلتي كل اللي تبين ياليت نسكر هالموضوع ولا نفتحه مره ثانيه
دانه_وفواز؟
سندس_إذا كان يريحك خلاص سامحته على اللي سواه في أمنيه لكن شيء غيره مستحيل
دانه_ليه؟ ماصدقتي اللي قلت لك؟
سندس_دانه هذا تحليلك أنت وتبريرك لتصرفات خالك لأنك تحبينه وأنا رأيي مو نفس رأيك وخلاص خلينا نسكر هالموضوع لأننا كل مانفتحه بنتهاوش


بعد يومين يوم الأثنين//اتصلت دانه على سندس وردت عليها أمنيه وبعد ماسلمت عليها...
دانه_وين سندس؟
أمنيه_طالعه
دانه_بتتأخر؟
أمنيه_إيه رايحين يتعشون عند جدتها ويرتبون لجلستهم إذا سافر أبوياسر وأم ياسر
دانه_وأنت بتجلسين معهم؟
أمنيه_لا ماأقدر خوالها اثنين ساكنين في البيت
دانه_وين بتروحين؟
أمنيه_بأسافر معهم
دانه_ودراستك؟
أمنيه_راح أأجلها
دانه_حرام هاذي ثاني مره تأجلين
أمنيه_وش أسوي شكل هالترم مو ناوي يخلص
دانه_الله يعين
أمنيه_تبين شيء ضروري في سندس إذا جت أقول لها تدق عليك
دانه_لا كنت طالعه السوق وفكرت أمر عليها
أمنيه_حياك ماينفع تمرين علي أنا دامك نويتي

 

[meen_ana]

دانه كانت بتعتذر لكن فجأه خطرت لها فكره...
دانه_ماراح أرد عزيمتك نص ساعه وأكون عندك
وجت دانه عند أمنيه وجلسوا يسولفون وبعد ساعه من جلستهم...
دانه_أمنيه أبي اعتذر منك
أمنيه_أنا ليه؟!
دانه_أنا غلطانه في حقك وصدقيني أنا من يومها استحي أكلمك وجتني هالفرصه عشان اعتذرلك ولو ماسامحتيني ما ألومك
أمنيه بإستغراب_دانه وش فيه؟
دانه_في يوم جت سندس متضايقه للكليه وتصيح وضغطت عليها لين قالت وش فيها كانت...كانت زعلانه على حالك مع سلطان وقالت لي إنه كان بيطلقك ويتزوج لميس.
سكتت دانه تطالع أمنيه تشوف تعليقها على اللي قالت لكن أمنيه ماقالت شيء وكانت هاديه وهالشيء خلى دانه تخاف ولا تعرف وش بتكون ردة فعلها والظاهر هالمره بتكون صدق نهاية صداقتها مع سندس...
أمنيه بهدؤ_كملي
دانه_بعدين جدتي كانت بتخطب لميس لفواز وهو وافق وأنا خفت إن أبوها يجبرها وتتزوجه تعرفين إنه يحب الفلوس وهي تحب سلطان قلت لهم يرفضون مارضوا وقلت لأماني اللي قالته سندس و و...و فواز سمعني وأنا مادري
أمنيه بنفس الهدؤ اللي خوف دانه وخلاها تندم على تهورها...
أمنيه_كملي
دانه_أنت عارفه إن فواز من زمان شافك كان قايل لأماني تخطبك لكنه عرف إنك متزوجه ويوم درى إن سلطان يحب لميس وبيطلقك قرب من أبوه وأبوها عشان إذا طلقك سلطان....
سكتت دانه مو قادره تكمل اكتشفت غبائها(أنا وش سويت؟ يعني وش منتظره تقول لي بعد كل هالبلاوي اللي قلتها؟فضحت نفسي وفضحت فواز وفضحت سندس ويمكن تزعل عليها! والمصيبه إن كلامي معناه إن فواز يبيها!!)
أمنيه_خلصتي يادانه؟
دانه عرفت إن هاليوم ماراح يعدي على خير لكن لازم تكمل أحسن من إن أمنيه تفهم إن فواز يبيها ساعتها بتكون المصيبه أكبر...
دانه_لا سندس عرفت باللي سواه فواز سمعته يوم ملكة أماني و..و..مادري كيف أقول لك بس صار بينهم موقف خلى فواز يعرف إنه غلط وندم على اللي سواه معك وكان يتمنى إنه سلطان مايطلقك و..و..بصراحه حب سندس
أمنيه بعد فترة سكوت_سندس تعرف إن فواز يحبها؟
دانه_قبل أسبوع قلت لها وعصبت علي وانهت صداقتنا لكن تصالحنا بشرط إني ما أجيب لها طاريه
أمنيه_وهو أكيد يحبها؟
دانه وهي مستغربه من هدؤ أمنيه وأسئلتها_أنا متأكده أعرف فواز زين هاذي أول مره يحب فيها صدق
أمنيه_خلاص خليه يجي يخطبها الخميس الجاي
دانه مو مصدقه_لكن سندس رافضه!
أمنيه_لا تخافين أنا بأخليها توافق
دانه منصدمه_أمنيه أنت مو زعلانه على اللي سويته فيك؟!!
أمنيه_لا لأن طلاقي كان بيصير بخالك ولا من دونه بالعكس فواز رحمني وجاب لي شيء كان المفروض أسويه من زمان بس ماقدرت..حياتي مع سلطان كانت غلطه ولازم تنتهي وأنا اشكر خالك اللي عجل هالنهايه
دانه_يعني مسامحتنا؟
أمنيه_طبعا مسامحتكم والدليل بأعطيكم سندس وهي أغلى شيء عندي
دانه_ما أظن توافق
أمنيه_لا تخافين أنا متأكده إنها بتوافق
دانه بفرح_مشكوره ياأمنيه بحياتي ماراح أنسى إنك سامحتيني بعد كل اللي سويته
طلعت دانه من عند أمنيه وهي مو مصدقه اللي صار كانت تحسبها سوت مصيبه لكن كل شيء انقلب(والله إنك روعه ياأمنيه صدق إن سلطان مايفهم ولا أحد يعرفك ويتخلى عنك معقوله هالقلب اللي عندك! أنا كرهت نفسي و أنا اتكلم وأنت بهالسهوله تسامحيننا..الله يعوضك باللي تستاهلينه)
أما أمنيه فدخلت غرفتها وهي مو عارفه بأيش تحس(ماراح ألوم أحد؟ ما ألوم غيرك ياسلطان..أنت بنفسك اللي بعتني ما أحد أجبرك وياليت بعد كل هذا اقدر أنساك أو اكرهك.. المهم عندي اللحين سعادة سندس اللي ناويه تضيعها)


رجعت دانه للبيت وشافت فواز في الصاله وجلست عنده...
فواز_وين كنت؟
دانه_رايحه أخطب
فواز يضحك_صدق ولمين تخطبين؟
دانه_لك
فواز جمدت ملامحه والتفت عليها يشوف إذا كانت تمزح لكنه شاف ملامحها جديه...
دانه_وش فيك؟
فواز_دانه وش عندك؟!
دانه_أنا شفت خالي حبيبي مستغني عن خدماتي قلت أقدمها بدون ماتطلب
فواز يعصب_دانه وش تقصدين؟
دانه_رحت لسندس ومالقيتها شفت أمنيه وقلت لها إني بأخطب سندس لك وقالت إنها بتقنعها
ابتسم فواز لكنه تذكر_بس سندس ماراح توافق عشان...
تقاطعه دانه بخوف_أنا قلت لأمنيه
فواز يصارخ_وش قلتي؟؟
دانه بخوف_قلت لها كل شيء لأني كنت بأعتذر منها وأبيها تسامحنا كل ماكلمتها كنت احس بالذنب وماقدرت ارتاح
فواز مو مصدق_أنت انجنيتي؟!!
دانه_لا هذا اللي المفروض يصير لها حق تعرف وهي سامحتنا ومو زعلانه وقالت إنها كان ودها تتطلق من زمان بس ماقدرت وتشكرك إنك عجلته لها وقالت عشان أتأكد إنها سامحتنا تروح تخطب سندس الخميس الجاي وهي بتخليها توافق
فواز ماعرف يعصب ولا يفرح كان مقهور على دانه ومحرج من أمنيه اللي قابلت كل اللي سواه فيها بطيبه بعدين شك إن سندس توافق...
فواز_لاتفرحين سندس مابتوافق حتى لو سامحتني أمنيه بالعكس بتعصب لأنك قلتي لأمنيه
دانه_أنا أول فكرت بكذا بس صدقني سندس قلبها طيب مثل أمنيه بس إنها عصبيه لكنها ترضى بسرعه وماتعرف تزعل من أحد
فواز_مادري يادانه بس ماراح أصدق لين اسمع بنفسي موافقتها
دانه_بتخطبها الخميس
فواز_إيه لأن أبوها مسافر بعد اسبوعين
دانه_إن شاءالله توافق أنا حاسه إنها بتوافق
فواز من قلب_ياااارب
دانه_والله وشفتك تحب يافواز
ابتسم لها فواز وراح وهو مو مصدق معقوله توافق يخاف يفرح ويصدق وبعدين يتحطم(وأنا وش يصبرني لين أعرف! يارب توافقين بس وأنا ماأكون فواز إذا ماخليتك تحبيني نفس ما أنا أحبك)
ياللي نقشت الحب في قلب مغليك*
دام نقشته ليش ماترضى غلاتي*
عهد علي إني على النفس أبديك*
ما أنساك دامي عايش في حياتي*
آمر وأنا لو تطلب عيوني أعطيك*
بس عطني أمل بأيامك المقبلاتي*
مدري كيف وليه صرت دائم أطريك*
أطريك واذكر كلامك وكل الصفاتي*
يمكن غلا ولا نتايج تجافيك*
ولا أدور فيك حلو أمنياتي*


في بيت أبو ياسر//رجعت سندس وأهلها وراحت سندس تشوف أمنيه في غرفتها طقت الباب ودخلت...
سندس_مانمتي؟
أمنيه_لا وش أخبار عمانك
سندس_تمام
أمنيه_تعالي أبيك بموضوع
سندس تجلس_نعم
أمنيه_فيه أحد اليوم خطبك مني
سندس تشهق_أناااا!!
أمنيه_إيه وأنا شخصيا موافقه
سندس_بس أنا مو موافقه
أمنيه_وليه؟
سندس_أول أكمل دراستي توي بأول سنه وأبي أركز
أمنيه_فيه بنات كثار متزوجين ويدرسون
سندس_لكن هذا طب
أمنيه_أنت ماشاءالله ماينخاف عليك
سندس_ومين هذا اللي متحمسه له لهالدرجه؟!
أمنيه_فواز خال دانه
سندس تصارخ_فواااز!
أمنيه_إيه
سندس_لا هذا بالذات لا وألف لا
أمنيه_وليه هو بالذات لا
طالعتها سندس وما عرفت وش تقول...
أمنيه_عشان اللي سواه لي
سندس تشهق_كيف عرفتي؟!
أمنيه_دانه طلعت شجاعه وصادقه أكثر منك وقالت لي واعتذرت عن كل شيء وأنا سامحتهم
سندس بقهر_أمنيه لاتضحكين علي وتقولين إنك مو زعلانه على طلاقك من سلطان اللي فواز هو السبب فيه
أمنيه_زين لو فواز ماسوى اللي سواه وش كان راح يصير كنت بأعيش طول عمري مع سلطان وهو مايبيني ويفكر في وحده ثانيه لين يجي اليوم اللي يطلقني فيه، هذا اللي كنت تتمنينه لي ياسندس؟ أنت بنفسك سمعتي اللي قاله للميس في العزاء سلطان ماكان طايقني..بعدين مو أنت بنفسك كنت تقولين أطلبي الطلاق منه
سندس_ولو هذا مايعطي فواز حق في اللي سواه فينا
أمنيه_زين أنا معك إنه أخطأ لكنه اعترف بخطأه وندم عليه وكان صريح ماراح تسامحينه على شيء سواه بدون قصد كان يبي منه خير رحمني من حياة أنا مارحمت نفسي منها وفوق كل هذا ساعد أبوك عشانك شوفي كيف كنا واللحين كيف صرنا بفضل الله ثم فضله
سندس_وأنا مابي فضله ولا مصدقه اهتمامه ولا كلامه خليه بكره يلقى وحده ثانيه ويروح لها
أمنيه_ياسلام مو هذا فواز اللي كنت تمدحين لي فيه وتكلميني بإعجاب عن اللي يسويه مع دانه مو هذا اللي تمنيتي لو لك أخو مثله
سندس_هذا يوم كان بيأخذك
أمنيه_يعني كنت تكذبين علي عشان إذا تقدم لي أوافق؟
سندس_لا كان صادق
أمنيه_وهالشيء ماتغير
سندس_آسفه ياأمنيه بس أنا ما أبيه
أمنيه_وأنا السبب بتهدمين حياتك عشاني
سندس_يعني اللي خلقه ما خلق غيره
أمنيه_ماراح يجيك مثل فواز شاب ومحترم وأهله طيبين ويحبونك
سندس_قلت لك لا ياأمنيه
أمنيه_اسمعي ياسندس أنت تعرفين إني للحين أحب سلطان وبعد طلاقي منه مابي اتزوج مره ثانيه أنا قلت لدانه يجون يخطبونك الخميس الجاي ولو ماوافقتي وأنا عارفه إنه بسببي والله لأوافق على اللي تقدم لي إذا كنت أنا اللي بأوقف في طريق مستقبلك
سندس بإستغراب_فيه أحد اتقدم لك؟!
أمنيه_إيه أم سالم كلمتني اليوم خافت يتقدمون نردهم وبغت تأخذ رأيي أول
سندس تصارخ_سااالم! توافقين على سالم أنت انجنيتي
أمنيه_لو رفضتي فواز بأوافق عليه لأن سالم هو الوحيد اللي يستاهل إني اتزوجه من دون قلب أو مشاعر وحلفت لك إني بأوافق
سندس بعصبيه_زين ياأمنيه أنا موافقه
تركتها وطلعت معصبه وأمنيه تضحك على الكذبه اللي صدقتها سندس، أما سندس فراحت مقهوره لغرفتها وهي تصيح ماتدري ليه(ماقدر اتخيل إني اتزوجه دائما كنت أفكر فيه لأمنيه! ما اتخيل نفسي معه! أنا وفواز!!!)

 

[meen_ana]

::الجزء الثامن والعشرون::




في بيت أم خالد//رجع نواف البيت متأخر وأمه وفجر نايمين كان زهقان وتعبان ويوم دخل البيت تذكر خالد وحس إنه فاقده بالحيل(ماني مصدق إني ماراح أشوفك مره ثانيه كل الهموم تجمعت علي بعدك هم فرقاك وهم زهور وحالتها اللي مو راضيه تتحسن وهم المسئوليه اللي بأشيلها لحالي ودلال كملت علي والله ماراح أقصر في زهور وبناتك ياخالد بس اللي تطلبه دلال مستحيل يصير)


من بكره في كلية الطب//شافت دانه سندس جايه عندها وبعيونها قهر...
سندس_ودي أذبحك
دانه_وأهون عليك؟
سندس_ليه قلت لأمنيه؟
دانه_ماقدرت ارتاح كل ماأشوفها أو أكلمها أحس إني غلطانه في حقها بالحيل وأبيها تسامحني بس تصدقين ماتخيلت إنها تسامحني وبهالسرعه بعد وتفهم موقفي ولا تعاتبني بأي شيء صراحه أمنيه بحياتي ماشفت مثلها الله يرزقها باللي يعوضها عن كل اللي شافته
سندس_زين قلتي لها عشان تطلبين السماح صدقتها. أقدر افهم ليه قلت إن فواز بيخطبني
دانه تبتسم_مادري جت من الله
سندس_حسبي الله عليك زين
دانه_وأنت وش مزعلك وإذا درت!
سندس_لأن سالم خطبها تعرفين سالم وهددتني إن ماوافقت بتقبل فيه
دانه تبتسم بفرح_خلاص وافقي
ضربتها سندس بشنطتها...
دانه_آآي
سندس_أحر ماعندي أبرد ماعندك
دانه_والله فواز طيب ويحبك بس أنت آخذه منه موقف
سندس بعصبيه_زين ارتاحي أنت وأمنيه وخالك بأوافق لكن اعرفي إني مو طايقته ولا راح أحبه
دانه بفرح_مو ضروري خليه هو يحبك مبروك مرة خالي
وضمتها لكن سندس بعدتها عنها بقهر وراحت عنها للمحاضره ولحقتها دانه وهي تضحك وميته من الوناسه ونفسها ترجع بسرعه البيت عشان تقول لفواز...


في بيت أم خالد الظهر//كان نواف نازل من غرفته بيطلع للمستشفى وشاف سماعة التليفون مرفوعه وشالها...
نواف_مين معي؟
دلال كانت بتصرخ فاجأها صوت نواف ولا عرفت تتكلم أو تسكت لكنها مشتاقه تسمع صوته...
دلال_أنا دلال
نواف حس إن قلبه طلع من صدره يوم سمع صوتها...
نواف_وش أخبارك؟
دلال_الحمدلله وأنت؟
نواف_تاركتني أموت وتسألين عن أخباري!
دلال تنزل دموعها_لو حاولت تفهمني بترتاح
وسكرت لأنها عرفت إنها بتصيح كل ماحاولت تقوي نفسها تضعف زياده وكلامه أثر فيها(آه لو تعرف حالي بعدك يانواف)...
قال أنا بأموت من غيبتك قل لي وش أسوي@
قلت أنا أبغى الموت بعد غيبتك قلي بس وينه@
مادريت أو مابغيت أدري ولا أدري وش بأسوي@
لا شفت طيفك في الممرات الحزينه@
جت فجر وشافت نواف واقف عند التليفون وهو مسكر نادته ولا رد...
فجر تصارخ_نواااف
نواف_وش فيك؟
فجر_أناديك ما تسمع!
نواف_كنت سرحان وش تبين؟
فجر_الخدامه تقول دلال تبيني
نواف_إيه سكرت بعدين تكلمك


في بيت أبوفواز//رجعت دانه وهي متحمسه تقول لفواز لكنه مايجي إلا العصر ولا تبي تقوله في التليفون تغدت ودخلت غرفتها تشغل نفسها بأي شيء، والعصر سمعت فواز يدخل غرفته وراحت له بسرعه ودخلت...
فواز يفز_بسم الله الناس تطق الباب
دانه_عندي لك خبر مايستحمل طقة الباب
فواز بإهتمام_وش فيه؟
دانه_سندس
فواز يقرب عندها وكل خليه فيه مهتمه وتنتظر_وافقت؟
دانه_ألف مبروك
فواز يضحك_ماكنت متوقع ماكنت متوقع أبدا
دانه_بس ترى مو من خاطرها بالحيل للحين حاقده عليك
فواز_مو مهم خليها بس تصير لي وأنا أعلمها كيف تحبني
دانه_ياسلام على الثقه
فواز_تشكين في قدرات خالك
دانه_لا أتمني هالشيء من كل قلبي إن سندس تحبك وترتاح معك
طلعت دانه وفواز رمى نفسه على السرير وهو بيطير من الفرحه وتمنى إنه صدق يقدر يخليها مرتاحه وتحبه(مادري وش مسويه فيني ياسندس؟ ماتغيبين عن بالي قبل كيف اللحين!)

 

[meen_ana]

في بيت أبوياسر يوم الخميس//كانت خطبة سندس اللي كل ماشافتهم فرحانين قهرها يزيد وهي مو متخيله إنه قدر يأخذ اللي يبي هالمره بعد.. راحت لغرفة أمنيه يوم عرفت إنهم بيطلعون عشان شباكها على باب الشارع..وشافته كاشخ وفرحان ويسولف ويضحك وهي ميته قهر دخلت عليها أمنيه وهي ماحست...
أمنيه_فيه ناس كانوا يقولون مو مهتمين!
سندس تفز_أناا
أمنيه_عادي لا تبررين خطيبك ولك حق تشوفينه وأول مايرجعون أهلك بتملكون وتشوفينه وجه لوجه
سندس تصرخ_لااا
خوفتها الفكره ماتخيلت نفسها جالسه مع فواز و نظراته اللي تو شافتها موجهها لها كانت تخاف منه وماتدري كيف قدرت توقف قدامه وتعطيه كف...
أمنيه تضحك_وش فيك جمدت كل هذا خوف من فواز!
سندس_الله يسامحك ياأمنيه على اللي سويتيه فيني
أمنيه_ماسويت شيء عطيتك للي يستاهلك


في شركة فواز//جاء عنده بدر وبعد ماسلم عليه...
بدر_وش عندك شكلك فرحان على غير عادتك هالأيام
فواز_فرحان وبس إلا قل بأطير
بدر_إن شاءالله دوم مو يوم بس اقدر اعرف السبب
فواز_أكيد أنت لازم تكون أول واحد يعرف ويبارك لي
بدر_أبارك لك!
فواز_اليوم خطبت
بدر انصدم_خطبت! مين؟
فواز_سندس صديقة دانه
بدر باستغراب_اللي خالتها أمنيه؟!
فواز_إيه
بدر_وش اللي قلب رأيك؟
فواز_أنا قلت لك إن سالفة أمنيه كانت غلطه لكن سندس مشاعري اتجاهها ثابته وقويه
بدر_بس هاذي توها طالبه و قدامها سنين لين تخلص دراسه ومو أي دراسه هاذي طب
فواز_تدرس على راحتها وهي زوجتي
بدر_أجل دامك خطبت أنا أبي اخطب وحده تدرس طب بعد
فواز_إذا وافقوا أهلها ليه لا
بدر_إن شاءالله يوافقون دام خالها مسوي نفس الشيء
استوعب فواز_بدر أنت...؟
بدر_إيه أبي اخطب دانه عارف إن المكان مو مناسب ولا الطريقه بس أنا قلت اقولك وتعرف رأيها عشان اجيب أهلي آه ونسيت ألف مبروك
ضحك فواز_الله يبارك فيك ومبروك لك بعد
بدر_أول خلنا نسمع الموافقه
فواز_بتسمعها إن شاءالله وماراح تلقى دانه أحسن منك


في بيت أبوفواز//رجع فواز البيت وراح لغرفة دانه وطق عليها ودخل...
فواز_ما نمتي؟
دانه_لا
فواز_أبي اكلمك بموضوع
دانه_تفضل
فواز_بدون مقدمات فيه واحد خطبك مني اليوم
استحت دانه_أنا؟!
فواز_وأنا عندي بنت غيرك؟
ضحكت دانه_بس تو الناس أنا قدامي دراسه
فواز_هذا سندس انخطبت وهي تدرس
دانه_ومين هذا اللي متحمس له لهالدرجه؟
فواز_بدر
دانه كانت بتشهق بس مسكت نفسها دائما كانت معجبه في بدر وتحبه لأنه أقرب واحد من فواز وتعرف عنه أشياء كثير لدرجة إنها كل ماتقول لفواز شيء قال إيه نفس اللي قال بدر لكنها ماتوقعت إنه هو يفكر فيها...
فواز_دانه وين رحتي؟ أبي جواب
دانه_خلني افكر واشاور أمي
فواز_زين اخذي راحتك خلينا نلعب بأعصابه شوي
طلع فواز ودانه طار منها النوم بعد الخبر اللي سمعته(بدر يخطبني أنا! خطبتك ياسندس وجهها حلو علي خلته يتحرك)

من بكره في الكليه//جت دانه لسندس وهي مبتسمه...
دانه_صباح الخير ياوجه الخير
سندس بملل_صباح النور
دانه_ليه هالتكشيره؟
سندس_زهقانه
دانه_ليييه! أنت مخطوبه والمخطوبه لازم تكون فرحانه ومشرقه
سندس_على طاري الإشراق أنت ليه مشرقه؟
دانه_لأني مخطوبه مثلي مثلك
سندس_تمزحين؟
دانه_لا صادقه
سندس_والله!!
دانه_إيه نعم مو أقول لك إنك وجه الخير
سندس_وأنا وش دخلني؟!
دانه_مو خطبتك من خطيبك خلت صديق خطيبك يتشجع ويخطب صديقتك
سندس بعد ماستوعبت_بدر!!
دانه_إيه امس خطبني من فواز بس للحين ماصار شيء رسمي
سندس بفرحه_ألف مبروك يادانه
دانه_وأنت بعد ألف مبروك
سندس تكشر وتقوم_نقوم للمحاضره أحسن


مر شهرين على وفاة خالد و قرر نواف يسافر في مؤتمر طبي عشان يغير جو لأنه اختنق من كل اللي يصير.. خاصه يوم طلعت زهور من المستشفى وتطمن على أهله لأن عمته وزوجها سكنوا قريب من عندهم كذا اذا احتاجوا شيء فيه رجل عندهم كان مايبي يتركهم لحالهم لكن أمه أصرت عليه يسافر بعد ماشافت حالته اللي خلتها تنسى سالفة زواجه من زهور وعشان زهور بعد كانت دائما في شقتها بحجة إن نواف في البيت وهي تبيها تطلع وتجلس معهم وتحاول تنسى لكن نواف حذر أمه إنها تقول لزهور عن اللي يصير مع دلال وطلب بعد منها تقول لدلال ماتكلم زهور بهالشيء لأنه خاف من ردة فعل زهور إن كان هو ميت قهر كيف بتكون هي ويكفيها اللي فيها

أما زهور فمن طلعت من المستشفى وهي إنسانه ثانيه الإبتسامه اللي كانت دائما على وجهها ماتت وعيونها تحكي الحزن والحرمان اللي تحس فيه.. كانت دائما ساكته وماتتكلم إلا بإختصار الشيء الوحيد اللي مصبرها على هالدنيا بناتها..وأم خالد شايفتها بهالحال ومو قادره تكلمها تخاف تفتح جروحها وتذكرها باللي هي نفسها مو قادره تنساه وأكيد زهور بعمرها ماراح تنساه، كانت زهور تحاول تكون عاديه قد ماتقدر قدام أم خالد عشان ماتجدد حزنها على ولدها لكنها كل ماتدخل شقتها اللي مارضت يشيلون منها أي غرض لخالد تجلس وتصيح لين ماتنام أو كانت تتفرج على أغراضه وثيابه وصورهم وتشم عطوراته لين تحس إنه معها وموجود في داخلها ولا يمكن يفارقها...
ليه رحلت فجأه!
يا حلمي الأبيض!
كيف يضمك بعد حضني!
ظلام ماله حدود!
كيف هالخطاوي ماتعذبني!
وأنا امشي!
وأنت تحت هالأرض موجود!
هذا حالي من بعدك!
ماقدرت أصرخ ماقدرت أبكي!
صمتي ذبحني!
وقلبي في الداخل جريح!
ذبحه الشوق!
وشلون تمر حياتي من دون صوتك!
ونظرة عيونك!
من دون دفا يدينك!
من دون حبك وقلبك وحنانك!
من دون عطفك واهتمامك!
أنا من دونك!
ما أشوف لنفسي أي قيمه أو تقدير!
سوى إني لآلامي أعيش!
لكن غلاك ياسيد الروح!
فيني مايتغير!
حتى لو خسرتك ياحلمي!
ياصبحي وليلي!
ياقلبي ياكلي!
آه كيف كنت معاك!
واليوم اعجز ألقاك!
ياللي خذيت القلب ورحلت!
لبعيد!
لمكان ما منه رجوع!


في بيت أبوسلطان في غرفة دلال في الليل//كانت دلال في مرسمها وسمعت جوالها يدق راحت ترد لكنها شافت
<نور دنياي>...
(نواف! ليه ماتفهم وتريحني)
ماردت عليه مع إنه دق أكثر من مره آخر شيء أرسل لها مسج...
[كان نفسي اسمع صوتك قبل أسافر لكن الظاهر إنك مو مهتمه أنا طيارتي بعد ساعتين شاوري قلبك يمكن يكون أحن علي منك]
انتظرها تدق لكن مثل ماتوقع مادقت طلع من غرفته ونزل تحت لكنه قبل يدخل الصاله سمع فجر تكلم بالتليفون...
فجر_دلال مافهمت وش تبين؟......لا ماعندي أحد.... ولا أمي.....زين ليه ماتبين نواف يدري! وليه ماتدقين عليه بنفسك.....خلاص خلاص ماراح أقوله شيء وبأجيبلك تقرير يومي عنه زين كذا؟
طلع نواف وهو فرحان(للحين تحبني الحمدلله كنت أحسبها من جد نست كل شيء مابقى إلا إني أخليها تنسى هالفكره لكن كيف وهي مصممه عليها)
وسافر نواف وسافر أبوياسر....


في بيت أم خالد العصر//طلعت زهور من المطبخ وجلست عند خالتها في الصاله...
زهور_وين فجر؟
أم خالد_راحت لدلال
زهور_نواف غريبه ماتغدى معنا اليوم؟
أم خالد بإستغراب_أنا مو قلت لك إنه سافر
زهور_مادري نسيت خالتي أنا جهزت القهوه وقلت للشغاله تقدمهن
أم خالد_وأنت ماراح تجلسين معنا الحريم جايين يسلمون عليك
زهور_لا ياخالتي مابي أشوف أحد وتعبانه ودي ارتاح
وتركتها زهور وراحت شقتها المكان الوحيد اللي ترتاح فيه المكان الوحيد اللي تحس بوجود خالد فيه...
مثل ماكان حبك باقي بقلبي مثل ماكان/
إذا حسيت في ظلما حياتي شع في نوره/
ولا نور سوى نورك ينورلي سما الوجدان/
ولا فرحه سوى فرحة وجودك عشت بسروره/
غيابك عذب الحال الحزين و ينطوي حرمان/
وأحس إني مدينه موحشه بالبعد مهجوره/
أسافر عن عذابي من عذابي واحتريك أزمان/
حنيني والوله خلى حياتي فيك مجبوره/
دريت بخافقي يبكي عليك ولا له نسيان/
دريت وش صاب حالي من فراقك حيل مخطوره/
لك لعيونك لكل ما فيك أنا ولهان/
أشوفك واقف قبالي سراب وضعت في بحوره/
جمعت أحلى أساطير الغلا بالشعر والألحان/
ونثرت أشواق قلبي ماجمعت اشواق منثوره/
أسافر بالخيال وأعبر بحبك كثير أوطان/
وأرجع والأماني كلها لاعدت منحوره/
أنا مالي سوى ذكرى غلاك بزحمة الأحزان/
وأطالع صورتك عبر الخيال وأبكي الصوره/

 

[meen_ana]

::الجزء التاسع والعشرون::




في بيت أبوفواز//كان فواز جالس في الصاله ودق التليفون شاف رقم بيت سندس و رد...
فواز_مرحبا.....ألو......سندس ليه ماتردين؟
يوم درت إنه عرفها سكرت التليفون في وجهه ماكانت تبي تكلمه أو ماكانت تقدر تكلمه، تفاجأ فواز من اللي سوته(لهالدرجه ماتبي تسمع صوتي! لاتخافين ياسندس كلها أيام وتصيرين تحبين هالصوت وصاحبه)
لا طرقت البال قلبي غدا معك وغدا بك-
واحتفا بك كل عرق عليك يشدني-
من قبل يحكيك بوحي ترى صمتي حكا بك-
ولو مكذب عد نبض الخفوق وعدني-
أقتربلك من مشيتك ولا طلت اقترابك-
مبتدي لك بس خذني بيدك وقدني-
راحت أيامي ظما في رجا مقبل سحابك-
والزمان يحدني عنك وأنت تحدني-
لو ما أحبك ماأتحمل نفسي من صوابك-
ولو ماأبيك إن كان أصدك مثل ماتصدني-


وبعد شهر رجع نواف ومن المطار راح للشركه لسلطان و كلمه عن دلال.. لأنه حس إنه الوحيد اللي بيساعده ويأثر على دلال ولأنه مل من هالوضع اللي هو فيه..و مو قادر يصبر أكثر من كذا...


دخل سلطان البيت وشاف أمه في الصاله لحالها وبعد ما سلم عليها...
سلطان_يمه وين دلال صار لي ساعه أدق عليها ماترد؟
أم سلطان بإرتباك_ليه وش تبي فيها؟
سلطان_أبيها بموضوع مهم وينها؟
أم سلطان_خلاص أنا أدق عليها وأقول لها انك تبيها
سلطان_يمه أقولك ما ترد هي وين؟
أم سلطان_أجل انتظر لين ترجع
سلطان بإستغراب_يمه دلال وين؟ليش ما تبيني أعرف فيه شيء!
أم سلطان_خلاص باكلمها لك على التليفون
سلطان_هي عند خالتي أم ندى؟
أم سلطان بعد ماعجزت تلقى تصريفه_لا في بيت جدتك
سلطان_أنا رايح لهم
أم سلطان تشهق_لا وين تروح؟
سلطان واستغرابه يزيد_يمه وش فيه ماتبيني أدري عنه أول دلال ماترد واللحين أنت خايفه أروح لهم! لا يكون في أمي مريم شيء؟
أم سلطان_لا ما فيها شيء بس انتظر لين ما يهدأ المطر شوي وشلون تسوق بهالجو كلمها بالتليفون
سلطان_لا ماعليك لاتخافين أبروح لهم اللحين واجيبهم معي
وراح سلطان بسرعه بدون مايسمع رد أمه اللي ندمت انها قالت له وين دلال لكن هو فاجأها ومادرت وش تقول راحت تتصل على تليفون البيت وعلى جوال دلال لكن ما أحد رد عليها...


في بيت أم حمد// دخل سلطان لأنه كان معه مفتاح للبيت مثل ماكان مع أبوه مفتاح بعد.. كانوا يخافون إن أم حمد يصير فيها شيء صح كان عندها خدامتها بس للإحتياط أخذوا مفتاح البيت لكنه أول مادخل للصاله طفت الكهرباء وصارت الدنيا ظلام بدأ يتلمس طريقه للمطبخ اللي كان يعرف إن فيه كشاف شحن للطواريء وهو مستغرب من أبوه وشلون طاع جدته ويخليها في هالبيت والحي القديم لحالها بس مين يقدر على أم حمد إذا أصرت على شيء، وهو يمشي ضرب في أحد!! ومن الطول عرف انها دلال شهقت..ومسكها مع كتفها وقال يطمنها...
سلطان_دلال لا تخافين أنا سلطان
حس انها جمدت مكانها للحظه لكنها صارت تحاول تفك نفسها منه بقوه لكنه ماسكها...
سلطان بعصبيه_دلال وش فيك! أقولك أنا سلطان!
هي بحذر وبصوت واطي_اتركني أنا مو دلال
سلطان من سمع الصوت حس ان كل خليه بجسمه توقفت للحظه..حتى قلبه وقف..هذا صوتهااا..عطرهااا الهادي اللي كان يحسب انه نساه.. وهالإحساس اللي يجيه لاصار قريب منها..
سلطان بشرود_أمنيييييه!!!
حاولت تفك نفسها يوم عرفها لكن قبضته عليها اشتدت بكل قوه لين حست ان الدم انقطع عن يدها وكأنه خايف لاتضيع منه سحبها للمطبخ عشان يتأكد من اللي سمعه أو إنه يتخيل ماكان مصدق! ولا وش يجيب أمنيه هنا؟ كانت تحاول ماتروح معه لكن كل قوتها مافادت مقابل قوته، واصراره،
وفي نور المطبخ شافها وماصدق نفسه..أمنيه قدامه وبين يديه..بعد كل هالأيام!! حس ان الزمن..والعمر..وأنفاسه..كل شيء وقف على هاللحظه..تذكر احساسه القوي اتجاهها واللي كان دائما يعانده ويهرب منه لهدؤ مشاعره مع لميس..
شاف ملامحها..نظراتها اللي مليانه حب..وعتب..وحزن ارتخت يده وانتهزت الفرصه وفكت نفسها منه وطلعت لكن شيء خلاها توقف عند الباب وتلتفت عليه كانت مشتاقه تشوفه..مشتاقه لعذابها معه لكن تذكرت إنه اللحين لغيرها وانه تخلى عنها للأبد وراحت لغرفتها كانت تمشي في الظلام وتضرب في الأشياء لكن ما اهتمت كانت تبي توصل غرفتها وتقفل على نفسها عشان تحس بالأمان، أما سلطان فكان واقف مكانه يستوعب اللي شاف مشى في الصاله وطلع للحوش جلس عند الباب يشوف المطر ويفكر بإحساسه(أبو ياسر قال بيسافرون ليش أمنيه بقت!!عشان كذا أمي ماكانت تبيني أجي أكيد عارفه ان أمنيه هنا... ليش هالضيقه اللي أحسها يوم شفتها! عجزت أعرف وش تعنين لي يا أمنيه أنا أحب لميس ليه أهتم لك وأنا من عرفتك ماعرفت راحة البال دائما ما نتفق ماعمري ارتحت معك..أجل ليه كل هذا..من شفتك ورجع كل اللي على بالي نسيته)
تصوري إني نسيت~
نسيت اني نسيت وافتكرتك~
فز قلبي وذاب شوقي~
لحظة لمحتك~
غريبه ترحل الأيام~
ونرجع لنفس المكان~
أنت وأنا بنفس الطريق~
وحلم العمر يصرخ غريق~
يرتجي دمعة حنان~
فجأه وقفت عني بعيده~
تطالعني بنظره شريده~
تضم في رمشها عيني وتحضنها~
تعاتبني على هجري~
ودمعة حب تغمرها~
تقول لي ليش ياظالم~
أنا بهجرك تعذبني~
تعاندني وأنا أسالم~
ببعدك ليه تجرحني~
تكلمني تحاورني بنظرة عين~
وأنا ساكت مادري كيف أجاوبها~
اصرخ بصمتي واقول~
حاولت أبعد حاولت أنسى~
وصدقيني إني نسيت~
لكني هاللحظه بديت انسى إني نسيتك~

راح للملحق الخارجي اللي كان مثل المطبخ فيه كشاف شحن فتح الباب وشاف جدته ودلال اللي شهقت يوم شافته...
دلال_سلطااااان!!
أم حمد_حياك ياولدي تفضل
سلطان دخل وسلم عليهم...
دلال بإرتباك_أنااا..أنا بأروح أسويلك قهوه
سلطان_مايمديك تخبينها عرفت إنها هنا
دلال ظنت انه يتكلم عن شيء ثاني بس يوم انتبهت لملامحه وشلون منقلبه عرفت انه داري لكن وشلون...
أم حمد_اجلس ياسلطان أنا قلت لهم ماله داعي تخبون عليه يعني هو وش دخله فيها!
سلطان التفت على جدته مايدري ليه يحس ان جدته تعرف وش يفكر فيه وتبي تقهره...
رجع النور وراحت دلال تشوف أمنيه وتعرف وشلون عرف سلطان بوجودها...
سلطان_في عزاء خالد الله يرحمه شفت أبو ياسر قال ان عنده شغل ست شهور برى الديره ما سافروا؟
أم حمد_سافر هو وزوجته وعياله جلسوا عشان دراستهم عند جدتهم وأمنيه عشان دراستها أصريت عليها تجي عندي لأن جدة عيال أختها عندها عيال كبار ماتقدر تسكن معهم
سلطان انصدم_يعني هي ساكنه هنا مو زياره بس!!!
أم حمد_ايه نعم عشان كذا مابي أشوفك مره ثانيه هنا والبيت فيه وحده غريبه
سلطان سرح(وحده غريبه!صارت اللحين أمنيه غريبه عني)
أم حمد_وش فيك سكت؟ زعلت من كلامي؟
سلطان_لا يمه معك حق لكن أمنيه خلصت دراستها العام اللي فات
أم حمد_لا هي أجلت الترم الثاني واللحين تدرسه
سلطان_أجلت ليه؟
أم حمد_سلطان انسى البنت مالك دخل فيها خلك في حالك وهي في حالها
سلطان_زين يمه أنا رايح مع السلامه
أم حمد_مع السلامه
وقام سلطان بسرعه و طلع من البيت لكنه وقف عند سيارته يطالعه و لا هو حاس بالمطر القوي اللي غرقه..ولا بالبرد لأن داخله كان قايد فيه نار..(بعد ماظنيت إني نسيتك ألقاك ياأمنيه ووين؟هنا في بيت جدتي جالسه هنا من متى؟ ماتخيلت إني أسمع عنك شيء تقومين تجين بين يديني!ياترى كنت ناسيتني؟نظرتك تقول إنك مانسيتي) انتبه لنفسه انه ابتل من المطر ودخل سيارته ومشى مو عارف وين يروح..صورتها مو راضيه تفارق خياله..وشلون كان ناسيها..أو بالأحرى متناسيها..رجع له كل الألم والحزن كأنه توه مفارقها..ليش كل هذا دامه اللحين مع لميس؟؟راح للبر ونزل من سيارته المكان كان فاضي والجو بارد لكنه ماحس فيه من النار اللي في صدره(أحبها..معقوله أنا أحبها؟ معقول هالعذاب اللي حسيته معها يكون حب؟ وليه خايف إني أحبها؟... إلى متى يعني بكابر وأنكر كل اللي أنا أحس فيه؟ مايكفي إني ضيعتها من يديني بسبب هالعناد كانت لي.. كانت ملكي.. وفرطت فيها كانت تحبني اللحين تأكدت شفت هالشيء بعيونها، ولميس وينها من كل هذا؟ ليه أحس إنها شيء بعيد عني؟؟ رجوع أمنيه لداخلي ماخلى لها أي مكان، معقول كل هالوقت كنت أحب أمنيه وأنا مكابر! يعني الحب ماكان الراحه والهدؤ مع لميس كان العذاب اللي مع أمنيه! حرام عليك ياأمنيه وش سويتي فيني؟)

 

[meen_ana]

في بيت أم حمد//رجعت دلال لأمنيه بعد ماشافت جدتها كانت أمنيه قد طلبت من دلال تتركها لحالها لين تهدأ لأنها من شافت سلطان وهي تصيح ماتخيلت إنها بتشوفه مره ثانيه وانقهرت إنها للحين تحبه ومو قادره تتقبل فراقه وهو مو حاس فيها وخافت أكثر يكون لاحظ الشوق في عيونها له...
دلال_أمنيه أدخل؟
أمنيه_تعالي
دلال_وش أخبارك اللحين؟
أمنيه تمسح دموعها_ماصدقت يوم شفته قدامي مادري كيف حسيت؟ أو وش سويت؟أنا غلطانه ماكان المفروض أجي هنا وش بيقول عني؟ وحده مطلقها و جايه تسكن عند جدته!
دلال_أمنيه لا تقولين كذا سلطان ماراح يفكر بهالشيء بعدين هو قال لجدتي إنه ماراح يجي مره ثانيه عشان تأخذين راحتك
أمنيه_خلينا ننزل تركنا أمي مريم لحالها
دلال_أمنيه ماتبين تقولين لي شيء
أمنيه_وش أقول؟
دلال_مادري
أمنيه_مافيه شيء نتكلم عنه يله تعالي
مشت أمنيه وهي للحين تشوف سلطان قدام عيونها بس ماتبي تتكلم..تخاف تقول لدلال كل اللي في قلبها واللي تحس فيه..وتعرف دلال انها للحين تحب سلطان


ركب سلطان سيارته ومشى لين شاف نفسه واقف عند بيته.. البيت اللي كان ساكن فيه مع امنيه ماكان راضي يدخله بعدها لكن اللحين وهو يعرف انه يحبها حس انه المكان الوحيد اللي يذكره فيها.. دخل وصار يدور في الحديقه ويتذكرها ويتخيلها فكل مكان دخل البيت اللي تركه مسكر من شهور كان فاضي ومظلم وبارد.. كان يخوفه مثل المشاعر اللي مخوفته في داخله(كيف ماعرفت اني احبك ياامنيه!وانا من اول ماشفتك حسيت اتجاهك باحساس غريب في حياتي ماحسيت مثله؟يالله كيف فرطت فيك وجرحتك وظلمتك وظلمت نفسي معك) طلع لغرفة النوم وشغل النور ودخل(انت آخر من كان هنا ياامنيه وش كنت تفكرين فيه وانت تطلعين من هالغرفه ومن حياتي) شاف على التسريحه شيء وراح يشوفه وشاف الاغراض اللي تاركتها امنيه جوالها وشريحتها وذهبها فتح العلبه وصار يتفرج عليه على الاقل شيء منها مسك دبلتها اللي كان دائما يشوفها في اصبعها يوم كانت له.. يوم كانت زوجته..شاف تحت العلبه رساله..و بسرعه و شوق فتحها ..حن لها أول ماشاف خطها..و فرح انه بين يديه شي منها..و قراها..
أنا قلبي غلى الفرقا نوى روحه بدون رجوع
مثل طير بلا سبق و بلا وكر و بلا راعي
تهيأ للجفا خطوه يبي بأقصى الطريق هجوع
يدور للعنا ملجأ طريق قلوب جزاعي
فديتك يالخفوق بحب و جرح و قطرتين دموع
قبل لايجبرك خلك علي و تلوي ذراعي
تعنيت و سبقت الوقت ولا عشت غرامك أسبوع
أنا مابي من الدنيا هبوب تطرح شراعي
لعبت بدوري العاشق و كنت التابع المتبوع
و تلعب عيني أدوار الرساله في يد الساعي
رقيت الحب من ساسه الى راسه ولع و خضوع
رجل تصعد الهامه و رجل تحتضن قاعي
عرفت إن الهوى ظالم مثل ظلم العطش و الجوع
و أظني يوم أنا أعشق شبيه الغافي الواعي
غفيت بعشقي الخاين وعيت بعمري المدفوع
و أشوف القلب لأيامي غدا ناعي و أنا ناعي
و أنا بأقبل على الفرقا و بأضوي للظلام شموع
و لا لي بالشقى حاجه و لابه للسفر داعي
و بأبدي رحلة الفرقا و بأرحل و أنهي الموضوع
مادام ان العذول اللي لبس ثوبي مع قناعي
أبعرف ياترى بعدي من اللي يقطف المزروع
و أنا مالي بهالدنيا سوى خلي و مرباعي
سطى ذيب على المرعى و سلمت بخافق مفزوع
و فدوة لو يموت القطيع و يسلم الراعي

عرف انها كانت تحبه..و هو اللي خذلها..و خسرها..عرف انها سوت كل هذا عشانه..راح انسدح على السرير وهو يحس ان الدنيا تدور فيه شوفة امنيه قلبت حاله وفجرت كل اللي كان يحاول يكتمه من يوم فارقها واعترف لنفسه باللي حاول ينكره كل هالايام انه من فراق امنيه وهو يحس انه عايش جسد بدون روح..و انه بدونها مافيه له فرحه أو حياة أو قلب..(بقى بقلبك شي من هالحب يا أمنيه؟و إلا أنا بغبائي و عنادي خسرته؟بس نظرتك تقول انك تحبيني..انك حنيتي لي..آه يا أمنيه وش كثر تعنين لي و أنا مو عارف) طلعه من افكاره جواله اللي دق وشاف رقم نواف ورد...
سلطان-هلا
نواف-وش صار معك كلمتها؟
سلطان-لا ماقدرت
نواف-سلطان وش فيك صوتك تعبان؟؟
سلطان-مخنوق يانواف
نواف بخوف-سلطان وش فيك؟وش صار؟انت وينك اللحين؟
سلطان-في بيتي
نواف-انا جايك
سلطان-في بيتي انا مو بيت ابوي
نواف استغرب-بيتك اللي...خلاص انا جاي اللحين
سكر نواف وهو مستغرب وش اللي قلب حال سلطان قبل كم ساعه كان معه وتحمس انه يروح يقنع دلال واللحين صوته تغير ورايح لبيت قافله من شهور, بعد ربع ساعه وصل نواف ورن الجرس..بعد وقت طويل فتح له سلطان اللي كانت ملابسه متبلله وحاله مبهدل وفي عيونه نظرة غريبه يمكن حزن او قهر ما قدر يعرف...
نواف-سلطان انت كنت جالس في المطر بهالبرد
سلطان بهدؤ-ادخل يانواف
دخلوا في الصاله اللي كانت بارده والبيت كل انواره مشغله واستغرب نواف سلطان وش فيه وش يسوي هنا...
نواف يعصب-حتى ماشغلت مكيف حرام عليك بتموت برد
وراح يشغل المكيف وبعدين التفت على سلطان اللي جالس على الكنب وفي عالم ثاني وكأنه نسى وجوده...
نواف-سلطان خوفتني وش فيك؟
سلطان يتنهد-شفتها يانواف
نواف باستغراب-مين
سلطان وكأنه يكلم نفسه-امنيه.. تتخيل انا احسب اني نسيتها وشهور وانا احاول اصدق هالكذبه واليوم في بيت جدتي كانت واقفه بين يديني..بين يديني.. اليوم اشوف بعيونها الحب اللي خبته عني.. اليوم اعترف لنفسي اني احبها
نواف مصدوم-انت تحب امنيه!وخطيبتك؟؟
سلطان-لميس.. كنت احسب اني احبها..كان ودي احبها..حياتي معها هاديه مشاعري معها كانت هاديه وعدي لها اننا نرجع لبعض هو اللي خلاني اطلق امنيه اللي من يوم شفتها قلبت حياتي وقلبت مشاعري كنت احس اتجاهها احساس غريب كل شيء فيها يأثر فيني وجودها جنبي كان يعذبني بس كنت احب هالعذاب كنت احس معها بمشاعر متضاربه ما قدرت افهمها لكني كنت احس اني عايش ومن يوم تركتها وان احاول اتقبل حياتي اللي كنت عايشها قبلها بس ماقدرت كل شيء فيني غيرته امنيه كل شيء فيني سيطرت عليه امنيه

نواف انصدم من اللي سمعه ومن حالة سلطان اللي كان يتكلم ومو عارف وش يقول...
نواف-سلطان انت ارتاح ولا تفكر اللحين مادري وش اقول لك بس...
لكنه شاف ان سلطان مايسمعه كان متسند على الكنب وشكله نام قام له بيعدله عشان يرتاح لكنه يوم لمس يده لقى حرارته مرتفعه بالحيل(شكله طول تحت المطر وجالس في هالبيت البارد بهالثياب لازم اوديه المستشفى) راح وحاول يصحيه وسنده لين وصله لسيارته وراح للمستشفى وسلطان مو حاس باللي يصير كان يرتجف من البرد ويهلوس بكلام مافهم منه نواف الا اسم امنيه(شكلك ياسلطان تحبها بالحيل والله مادري وش راح تسوي؟ولا وش راح اسوي انا بعد)


في بيت أم حمد//بعد ماتعشت أمنيه مع أم حمد وعطتها دواها ونامت راحت لغرفتها وأخيرا لحالها مع أفكارها ومع مشاعرها الثايره..والأهم مع طيف سلطان اللي للحين تحسه قدامها..للحين تحس نفسها بين يديه..
ياللي نسيت الحب زاد الشقا زاد"
والقلب من شوقه تعذب ويرجيك"
في داخلي جمر الهوى صار وقاد"
كل ماطفى ناره تشبه طواريك"
تشتعل جروحي اللي مالها طب وضماد"
إلا بدفا أحسه بين يديك"
خليتني للأشواق موطن وميلاد"
تسكن بخفوق يحبك ويغليك"
يبقى الرجا لو زدتني هم وبعاد"
ويبقى غلاك لو ضيعتني صحاريك"
وقت معك مضى ليه مافاد"
كيف ماحرك شعور الهوى فيك"



في بيت أبوسلطان//رجعت دلال وشافت أمها في الصاله...
أم سلطان_وينك عن جوالك؟حتى تليفون البيت مارديتوا عليه!
دلال_كنا في الملحق الخارجي أنت دقيتي ماشفت جوالي
أم سلطان_درى سلطان؟
دلال_أنت عارفه إنه بيجي عندنا؟؟
أم سلطان_جاء هنا يدورك وأول ماقلت له طلع بسرعه دقيت بأقولكم مارديتم وش قال؟
دلال_ماقال شيء ولا جلس طلع بسرعه
أم سلطان_كان يبيك ضروري وش يبي؟
طلعت دلال جوالها وشافت مكالمات سلطان وأمها واستغربت إن سلطان مادق عليها بعد ماطلع...
دلال_بأروح أبدل وادق عليه
دقت دلال على جوال سلطان اللي كان مع نواف لأنه اضطر ينوم سلطان في المستشفى وتركه يرتاح وراح لمكتبه لكنه يوم شاف رقم دلال مادرى يرد أو لا كان مشتاق لها ومشتاق يسمع صوتها لكنه ما كان يدري كيف يكلمها بس خاف إنهم يقلقون على سلطان ورد...
نواف_هلا
دلال قلبها بدأ يدق بسرعه(هذا مو سلطان بس صوته مو غريب)
دلال_مين معي؟
نواف_نسيتي صوتي!
دلال منصدمه_نواااف؟!
نواف_إيه نواف
دلال_حمدالله على السلامه
نواف_الله يسلمك
دلال_ما أحد قال لي إنك رجعت
نواف_لأنه ماأحد يدري أنا رحت من المطار لسلطان
دلال تذكرت إنها داقه على سلطان وش خلى نواف يرد...
دلال_وين سلطان؟ليه أنت رديت على جواله؟
نواف_سلطان..سلطان تعبان شوي
دلال تشهق_وش فيه؟!
نواف_لا تخافين يادلال مافيه شيء بس شوية برد
دلال_قبل كم ساعه شفته متى جاه البرد؟ وبعدين وينكم اللحين؟
نواف_في المستشفى
دلال_في المستشفى! وتقول لي مافيه شيء نواف قول سلطان وش فيه مو معقول أحد يآخذ برد بهالسرعه!
نواف_دلال سلطان وقف تحت المطر كثير بعدين جلس في البيت وهو بارد
دلال_بيت! أي بيت؟
نواف_بيته اللي كان ساكن فيه وهو متزوج
دلال بإستغراب_وش وداه هناك؟ نواف صاير شيء وليه جيت من المطار لسلطان على طول؟
نواف_كنت أبيه يوصل لك رساله ماتحملت أأجلها اكثر من كذا لأني متأكد إنك مابتردين علي لو أدق عليك
دلال تغير الموضوع_أمي بتسألني عن سلطان وإذا قلت لها أكيد بتجي تشوفه اللحين
نواف_سلطان نام اللحين لكن لو صممت أنا أجي آخذكم
دلال_لا ماله داعي أبوي أكيد جاء اللحين وأكيد بيجي معنا يتطمن عليه مع السلامه
دلال_مع السلامه
سكرت دلال وهي مستغربه كيف تكلمه كذا عادي والوعد اللي قطعته على نفسها لكنها اقنعت نفسها إنه مو وقت هالكلام والحقيقه كانت مشتاقه له بالحيل وتتمنى لو تطول هالمكالمه، ومثل ماتوقعت دلال أول ماسمع أبوها وأمها الخبر على طول طلعوا للمستشفى...


في بيت أم خالد//كانت أم خالد جالسه في الصاله خايفه ومتوتره من ردة فعل زهور وبدت تندم إنها طاوعت أم حامد جارتها اللي نصحتها تتخلص من كل أغراض خالد اللي في شقته وإنها تغير في ترتيبها عشان تساعد زهور تنسى وأم خالد طاعتها لأن قلبها كان يتقطع على زهور وحالها اللي صايره كأنها شبح ماتآكل ولا تتكلم ولاتضحك ودائما سرحانه وتتصرف وكأن خالد للحين حي عشان كذا طلبت منها تروح مع فجر السوق بحجة إنها تعبانه وماتقدر تروح لكنهم قبل دقيقه ارجعوا وراحت فجر ترتب أغراضها اللي جابتها وزهور راحت للشقه اللي مابقى فيها شيء من شقتها الأولى التفتت أم خالد لبنات زهور اللي نايمات عندها ومو حاسين باللي صار وباللي فقدوه...
فجر تصارخ_يمممممممه
أم خالد بخوف_بسم الله وش فيك؟!
فجر_زهور سمعتها تصارخ دخلت عليها لقيتها طايحه على الأرض
ركضت أم خالد لها وشافتها مثل ماقالت فجر على الأرض ماتتحرك راحت وشالتها حاولت تصحيها بس ماردت...
أم خالد_روحي اتصلي بعمتك وزوجها خليهم يجون بسرعه


في المستشفى//وصلت دلال وأمها وأبوها وشافوا نواف ينتظرهم سلم على أمها وأبوها وعينه عليها.. ودلال كان قلبها يدق بقوه وهي تشوفه وحست إنها طول الأيام اللي راحت ماكانت عايشه وإن روحها توها ترجع لها، مد لها يده وسلمت عليه ظل ماسكها ويطالع دلال بشوق أما هي فحمدت ربها إنها متغطيه ومايشوف ملامحها وماحست بيدها اللي كانت ترتجف بيده، فجأه وصلهم صوت أبوسلطان وهم بعالم ثاني...
أبوسلطان_نواف وين غرفة سلطان؟
نواف بإحراج_تفضل عمي من هنا
وصلهم لغرفة سلطان ودخلوا شافوه لكنه كان نايم ومو حاس بوجودهم لكن دلال شافت في يده السلسله اللي تحبها أمنيه وكانت دائما تلبسها (وش جاب هالسلسله مع سلطان؟ وليه كان في بيته؟معقوله شوفته لأمنيه أثرت فيه؟يعني مانساها؟)
والتفتت على نواف تطالعه وهو يتكلم مع أبوها وأمها ويطمنهم على سلطان(وش الرساله اللي كان بيوصلها لي سلطان اللي خلت نواف يروح له من المطار قبل حتى يمر على خالتي ويتطمن عليها!)
طلعوا من عند سلطان ووقفوا برى الغرفه...
أم سلطان_متى بيطلع؟
نواف_أنا بأجلس في المستشفى وإذا صحى وشفته تحسن أنا بنفسي رجعته للبيت
أبوسلطان_بس أنت لازم تروح البيت ترتاح وتشوف أهلك
نواف_بكره إن شاءالله أوصل سلطان وأروح
جت الممرضه اللي كانت تهتم في زهور يوم كانت في المستشفى وكانت تمشي بسرعه...
الممرضه_دكتور نواف
نواف_نعم
الممرضه_الإسعاف جاب زهور جتها أزمه قلبيه وأمك هناك مو راضيه تهدأ
شهقت دلال_زهوووور
وراحوا كلهم بسرعه لغرفة العمليات وشافوا أم خالد اللي تفاجأت فيهم وفي نواف...
أم خالد وهي تصيح_نواف! أنت رجعت؟
نواف_يمه وش فيها زهور؟
أم خالد وهي تمسك يد دلال تبي أحد يسندها_أنا السبب أنا اللي سويت فيها كذا؟
نواف بإستغراب_يمه وش صار؟
أم خالد_أم حامد نصحتني أشيل كل أغراض خالد من الغرفه عشان تقدر زهور تنساه
نواف بصدمه_وشلتيهاااا؟؟
أم خالد_إيه وأول ماشافت زهور الشقه طاحت علينا
نواف بعصبيه_حرام عليك يايمه زهور للحين في صدمه وماتحسنت حالتها أعصابها للحين منهاره أنا قلت خليها على راحتها ولا تكلمينها عن شيء وأنت وعدتيني
أبوسلطان_أذكر الله يانواف اللي صار قدر لا تلوم أمك
نواف_ياليتني ماسافرت الحق علي أنا
تركهم وراح ولحقه أبوسلطان وأم سلطان ودلال يهدون أم خالد، بعد ربع ساعه رجع نواف وباس رأس أمه ويدها...
نواف_سامحيني يالغاليه والله ماقصدت والله غصب عني
ضمته أم خالد وهي تصيح وبعد دقايق طلع الدكتور اللي قال لهم الخبر اللي صدم الكل.. زهور ماتت...

 

[meen_ana]

::الجزء الثلاثون::




بعد اسبوع من وفاة زهور// سلطان تعافى من التعب لكن قلبه للحين ماتعافى بعد اللي عرفه ولا يدري وش يسوي في حاله والكل لاهي عنه باللي صار لزهور.. كان ينام في بيته يبي يحس إنه بقى له شيء منها كان يروح لشغله ويرجع وينام ويقوم وفي باله شيء واحد أمنيه وبس...


في بيت أبوسلطان في الليل// كانت دلال في غرفتها وهي للحين مو مستوعبه إن زهور توفت وهي ماشافتها من يوم وفاة خالد إلا يوم تطلع من المستشفى ويروحون يسلمون عليها لأن حالتها ماكانت تسمح ولا حالة دلال النفسيه بعد تسمح، تذكرت دلال بقايا الإنسانه اللي شافتها كأن مافيها روح والحزن والقهر حافر معالمه بوجهها لدرجة إن دلال تأكدت إن زهور مستحيل توافق على الزواج بأي أحد لأنها تعرف وش كثر يعني لها خالد وشوفتها كذا تأكد هالشيء (الله يرحمك يازهور كانت فرحتك أنت وخالد كبيره في بناتكم ولا تهنيتوا معهم) نامت وهي تفكر من التعب لها أيام مانامت زين...


في بيت أم حمد بوقت متأخر بالليل//جلست أمنيه في الصاله وهي متأثره من وفاة زهور كل هالأسبوع ماتدري كيف مر عليها شوفة سلطان بعدها هالخبر كانت تقريبا بدت تغفي في مكانها يوم سمعت صوت شيء يطيح في غرفة أم حمد وراحت بسرعه تشوف، دخلت ولقتها تعبانه وبصعوبه تتنفس ولا هي حاسه فيها خافت ومادرت وش تسوي وبسرعه راحت تتصل في السواق عشان توديها المستشفى لكنه مارد أخذت النوته ودورت على رقم أبوسلطان ودقت ولا رد ولا أحد رد عليها في بيتهم حتى دلال ماترد على جوالها(حرام عليكم ردوا ياربي وش أسوي مين أكلم) كانت بتطلع للشارع وتطق على أي أحد من الجيران لكن خافت أحد يمر ويشوفها طالعه بهالوقت المتأخر ويمكن الجيران مايسمعونها، خطر في بالها سلطان مابقى غيره ماكانت تتخيل كيف بتكلمه لكن خوفها على أم حمد خلاها تدق وهي تتمنى يرد وفي نفس الوقت خايفه تكلمه، وبعد أربع رنات رد وهو مو مستوعب إنه رقم جدته واستغرب مين اللي يدق وليه...
سلطان_هلا
أمنيه_سلطان
سلطان حس إنه ذاب قلبه يوم سمع صوتها
أمنيه_سلطان تعال بسرعه أمي مريم تعبانه بالحيل ومالقيت أحد يودينا المستشفى
سلطان كان سرحان معها ومو مستوعب إلا إنه يسمع صوتها لكن يوم بدأ يركز...
سلطان_أمي مريم وش فيها؟؟
أمنيه_تعبانه ياسلطان تعال بسرعه الله يخليك أنا مو عارفه وش أسوي
سلطان_لا تخافين اللحين جاي
سكرت أمنيه وراحت تتطمن على أم حمد وشافتها للحين تعبانه قالت لها إن سلطان بيجي وهي ماتدري هي تسمعها أو لا وراحت تلبس عبايتها ورجعت عند أم حمد لين جاء سلطان اسمعته يطق باب الغرفه...
أمنيه_ادخل ياسلطان
دخل سلطان وبنظره سريعه مر على أمنيه قبل لايروح يشوف جدته ولقاها تعبانه بالحيل...
سلطان_عطيني عبايتها
مدت له أمنيه العبايه وصارت تراقبه وهو يحاول يرفع أم حمد ويلبسها كانت نفسها تساعده عشان يروحون بسرعه لكنها ماقدرت تتحرك من مكانها ولا قدرت تقرب منه خطوه وحده وبعد ما خلص سلطان شال أم حمد للسياره ولحقتهم أمنيه وعند السياره التفت لها سلطان...
سلطان_بتروحين معها؟
أمنيه_أكيد...إلا إذا كنت ماتبي
انقهر سلطان_اركبي ياأمنيه
وركبت أمنيه مع أم حمد ورى وفي الطريق كان الجو هادي لين تكلم سلطان كان يبي يتطمن على جدته وبنفس الوقت يبي يسمع صوتها قد مايقدر...
سلطان_من متى تعبت؟
أمنيه_تعشينا مع بعض ماكان فيها شيء لكن وهي نايمه فجأه..فجأه سمعت صوت في غرفتها رحت وشفتها في هالحال والسواق ما رد ولا عمي أبوسلطان
سلطان_هدي نفسك يا أمنيه إن شاءالله بتصير بخير
لكن حالة أم حمد كانت صعبه عرفت هذا أمنيه وهم واقفين قدام العنايه المركزه والدكتور للحين عندها، التفت سلطان على أمنيه وشافها واقفه وترتجف من البرد قرب منها وفصخ البالطو اللي عليه ومده لها...
سلطان_أمنيه اجلسي وتغطي البالطو شكلك بردانه
أمنيه_لا مو بردانه
لكن صوتها بين كذبها كان يرتجف لأنها طلعت من البيت بملابس خفيفه رفعت راسها له وحست إن الدنيا تدور فيها خوفها على أم حمد والأسبوع اللي مانامت فيه أثر في صحتها كانت بتطيح لكنها تمسكت في الكرسي وجلست ومد لها البالطو مره ثانيه وهو يطالعها بتفحص...
سلطان_أمنيه وش فيك؟
أمنيه اخذت البالطو_مافيني شيء
حطت البالطو على أكتافها والتفتت عنه وهو وقف بعيد عنها لكن ريحة عطره اللي حواليها ماتركتها في حالها وسيطرت على مشاعرها وذكرتها بأيامها معه اللي تحاول تنساها لكن كيف تنسى وسلطان بكبره قدامها، طلع الدكتور وراح له سلطان و أمنيه وراه...
سلطان_خير يادكتور طمني
الدكتور_السكر مرتفع بالحيل عندها
هذا آخر شيء سمعته أمنيه قبل تسرح في سلطان وهم يتكلم بعدين لاحظت إنه يطالعها مو عارفه من متى..ولا تدري وين راح الدكتور اللي كان يكلمهم ولا وش قال...
سلطان_أمنيه فيك شيء؟
أمنيه_لا ليه؟
سلطان_أناديك ماتردين!
أمنيه_سرحت شوي
سلطان بدون مايحس_أنت للحين تسرحين... آآ بأروح مع الدكتور أكمل الأوراق
أمنيه_وأمي مريم؟
سلطان بإستغراب_ماسمعتي الدكتور! لازم يحطونها تحت المراقبه ثمان وأربعين ساعه
أمنيه_خلاص روح كمل الأوراق أنا بأنتظر هنا
طالعها سلطان للحظه وراح مع إنه ماوده يتركها وجلست أمنيه تفكر(وأنا وين اروح؟ يعني اجلس في البيت لحالي مع الخدامه؟ أو اروح عند عمان سندس؟ أهم شيء تطمنا على أمي مريم وكل شيء يهون)
رجع سلطان وشافها جالسه وهو مايدري وين يوديها ودق على دلال ماردت...
سلطان_أمنيه
أمنيه تقوم وتمشي بعيد عنه شوي_أنا آسفه ياسلطان أنا عارفه إني سببت لك مشكله في وجودي هنا وعارفه إنك ماتدري وين توديني لكن أنا بعد مادري وين أروح عارفه إني ضايقتك برجوعي لحياتك لكن مو ذنبي إن مالي أحد بهالدنيا أنا....
ماكملت كلامها يوم حست إن الدنيا تدور فيها وماشافت شيء قدامها حست إنها ماطاحت على الأرض لأن سلطان مسكها سمعته يتكلم بس ماقدرت تستوعب وش يقول وبعدها فقدت الوعي،، سلطان نادى على الممرضات وشالوها كان خايف عليها من اليوم يحس إنها مو طبيعيه بس كان يحسبها متوتره لأنها معه لحاله مادرى إنها تعبانه، وقف برى الغرفه ينتظر الدكتور اللي يكشف عليها و هو يفكر بالكلام الأخير اللي قالته(كيف قدرت أتخلى عنك يا أمنيه! وأنا كنت كل شيء لك في هالدنيا! كيف تركتك ترجعين تعيشين لحالك ما أحد يهتم فيك! لميس كان عندها أهلها كان عندها كل شيء وكثير يتمنونها ليه اتركك عشانها؟ أنت ماأحد بيهتم فيك مثلي ماأحد بيفهمك مثلي أنا اللي ضيعتك مني ورحت ورى شيء أنا عارف من زمان إني ماعدت أبيه بس كابرت ومارضيت اعترف) وفكر إنه كل هالأسبوع ما مرت في باله لميس أبدا واختفى اسمها من حياته أول مارجعت أمنيه الوحيده اللي معها يحس إنه حي، طلع الدكتور...
سلطان_خير يادكتور؟
الدكتور_خير إن شاءالله هاذي دوخه بسبب فقر الدم وضعفها لازم تآكل غذاء صحي وتنتبه لصحتها أنت زوجها؟
سلطان كان بيقول ايه لكنه مسك نفسه .. كان يحس إنهم للحين متزوجين ولا يحس بالوقت اللي عاشه بعدها قبل دقايق كانوا قريب من بعض ويتكلمون عادي وكأنهم ما افترقوا أبدا...
الدكتور_يا أخي اسألك أنت زوجها؟
سلطان_هااه لا أنا..أنا ولد خالها
الدكتور_المغذي مدته ساعه بعد كذا تقدر تطلع وأنا بأكتب لها على فيتامينات ولازم تأكل
سلطان_إن شاء الله
راح سلطان يصرف الادويه واذن الفجر وراح يصلي واتصل على اهله وقال لهم اللي صار لجدته ولامنيه وبعد نص ساعه كانوا عنده في المستشفى وبعد ماتطمنوا على ام حمد...
دلال-سلطان وين غرفة امنيه
سلطان-تعالي اوصلك
ومشى مع دلال وقبل تدخل...
سلطان-دلال
دلال-نعم
سلطان-امنيه خلاص بتطلع اللحين بآخذكم للبيت عشان تآكل وترتاح
دلال-وامي مريم
سلطان-لازم يحطونها تحت الملاحظه يومين
دلال-اجل انا بأجلس عند امنيه في البيت لين تطلع امي مريم
سلطان-لحالكم؟؟
دلال-عادي كلها يومين
كانت بتدخل لكن سلطان ناداها...
سلطان-دلال
دلال-نعم
سلطان-بأطلب منك طلب
دلال-آمر
سلطان-امنيه تاخذ علاجها في وقته وتآكل زين ولاتطيعينها اذا قالت شبعانه او مالها نفس وخليها ترتاح
دلال طالعته باستغراب وحيره ليه كل هالاهتمام في امنيه كانت ملاحظه تغير سلطان من يوم شافها بس الظروف ماخلتها تجلس معه وتسأله...
سلطان-وين رحتي؟
دلال-لاتهتم انا بانتبه لها
دخلت دلال وشافت امنيه تطالع الشباك وسرحانه...
دلال-حمدالله على السلامه
التفتت امنيه-دلال! الله يسلمك
دلال-اخبارك اللحين؟
امنيه-الحمدلله امي مريم وش اخبارها؟
دلال-صارت احسن يله قومي
امنيه-وين؟
دلال-سلطان بيرجعنا البيت عشان ترتاحين
امنيه بفرح-امي مريم بتطلع؟
دلال-لا انا وانت بنرجع البيت وباجلس عندك لين تطلع
امنيه-لكن...
قاطعتها دلال-يله قومي قدامي بدون اي كلمه
طلعوا من المستشفى مع سلطان وفي الطريق كان مخيم الصمت عليهم لين ماوصلوا ونزلت امنيه ودلال.. وسلطان يراقب امنيه بابتسامه بعد ماقرر خلاص انه يترك لميس ويرجع لها مايهمه لو تخرب الدنيا اهم شيء يرجع لامنيه
دخلت امنيه ودلال البيت وشافوا الخدامه اللي كانت مفزوعه ماتدري وين راحوا و قالت لها أمنيه عن اللي صار و هدتها...
امنيه-مسكينه نسيتها ولا طرت على بالي
دلال تنفجر من الضحك-شكلها كأنه بخ بوجهها جني
امنيه تبتسم-حرام عليك
لكن دلال ماسكتت وزاد ضحكها ويوم شافتها امنيه وتذكرت شكل الخدامه اول مادخلو عليها بدت تضحك مع دلال وبعد دقيقه ياله سكتوا...
امنيه-شكلنا مشتهين الضحك
دلال-ايه والله تعبت من كل اللي يصير لنا
امنيه بعد لحظة صمت-وش اخبار نواف؟
دلال-ماكلمته من يوم عرفنا بوفاة زهور الله يرحمها
امنيه باستغراب-ليييه المفروض توقفين معه!!
دلال-انت مو عارفه اللي صار قبل
امنيه-وش صار؟؟
دلال-بعد وفاة خالد انا طلبت من نواف الطلاق
امنيه-الطلااااااق!! ليه؟؟
دلال-كنت احلم في خالد الله يرحمه كان زعلان مني ويقول اني ماستاهل نواف عشان كذا جتني فكرة اني اطلب منه الطلاق واقول لخالتي تقنعه يتزوج زهور ويربي بناتها معها
امنيه تصرخ-دلال انت صاحيه!لاتقولين انه طلقك؟
دلال-لا رفض
امنيه-وكل هالوقت وما قلتي لي!!
دلال-لاني اعرف انك ماراح توافقيني على اللي سويته وماكنت ابي احد يقول لي اني غلطانه
امنيه-وزهور اكيد رفضت
دلال-زهور الله يرحمها توفت قبل تعرف بالسالفه
امنيه-واللحين بتتخلين عن نواف؟
دلال-لا طبعا بس انا خايفه من ردة فعله انا رفضته اكثر من مره ويوم رجع كان يقول انه جاء من المطار لسلطان على طول عشان يبيه يوصل لي رساله وانا من ذاك اليوم ماشفت سلطان ولا سألته وش يبي نواف
امنيه-زين اسألي سلطان
دلال-مو وقته خلي نواف يرتاح
سكتوا شوي...
دلال-امنيه ابي اسألك
امنيه-عن؟
دلال-انت نسيتي سلطان؟
امنيه تتنهد-سلطان مجرد جرح قديم راح ألمه..بس آثاره تبقى طول العمر
دلال-انا بأ قوم اجهز لنا فطور عشان تاخذين علاجك وتنامين
راحت دلال وامنيه تفكر(آه لو تعرفين يادلال اني انسى عمري ولا انسى سلطان اللي رغم جرحه لي ما قل حبه في قلبي وانا من لي غيره عشان احبه ولولا عزة النفس كان ترجيته انه مايتركني بس أنا أعرف انه يشوفني قويه ولاأبي هالنظره تتغير)...

 

[meen_ana]

في كلية الطب\\جلست دانه تطالع بسندس وهي مقهوره عليها اكثر من شهر وهي مخطوبه لفواز وترفض انها تجيب طاريه وماترضى تسمع عنه ولا شيء..واللي قهرها زياده برود فواز وتذكرت كلامه يوم قالت له عن سندس(لاتلومينها ولاتضغطين عليها هي اللحين عندها فواز مجرد اسم بكره اذا شفتها من ثاني يوم بتقولك انها تحبني)...
سندس-داااانه وين رحتي صار لي ساعه اكلمك
دانه-والله اللي سرحانه فيه ماتبين تسمعين عنه شيء
سندس-اجل ارجعي المكان اللي كنت فيه
دانه-سندس الى متى؟
سندس-ماراح اطول لين يمل خالك وانت ادرى فيه بيمل بسرعه


بعد يومين طلعت ام حمد وراحت لبيتها ودلال جلست مع امنيه اما اهلها فكانوا يزورونهم ويروحون واليوم كانت ام سلطان بتجي عندهم وسمعوا جرس الباب...
امنيه-هذي اكيد خالتي افتحي وانا باروح فوق واذا راح اللي جايبها علميني
دلال-زين
راحت دلال وفتحت الباب وشافت امها ومعها وحده ثانيه ويوم عرفت انها ام خالد فرحت وشافت فجر والبنات اللي صار عمرهم اربع شهور وسلمت على فجر وجلست تلعب الصغار امها وخالتها دخلوا بعدين حست بظل فوقها رفعت راسها وشافت نواف يطالعها ويبتسم وظلت مطيره عيونها فيه بعدين وقفت قباله ومد لها يده وصافحته لكنه مسك يدها ولاتركها وهي ماقدرت تنزل عيونها عنه ولاتدري وش تقول..كل يوم تفكر بهاللحظه وكيف بتتصرف فيها..لكنها اللحين نست كل شي.. التفت نواف على فجر وطالعها وهي فهمت وش يبي واخذت البنات وراحت والتفت على دلال...
نواف يتنهد-تعذبيني بعد هاليوم ياويلك
دلال-ما راح اعذبك لاني تعذبت بعذابك
نواف-واللي اقوله يصير بدون اي اعذار
دلال-وانا موافقه على اي شيء تقوله
نواف-مع السلامه
دلال-وييييين؟؟
نواف يبتسم-لازم اروح المستشفى
دلال-انتبه على نفسك
نواف-لاتخافين اللحين بس ارتحت
راح نواف ودلال الدنيا مو سايعتها من الفرحه صح كان باين بوجهه الحزن والتعب لكن هي بتعوضه عن كل هذا اهم شيء انه مو زعلان منها وللحين يحبها بعد هالفراق والزعل...
صافحت كفي زمان راح و رجعلي يبيني**
مادري صافحته بيدي ولا في صدري حضنته**
كني في رجعته غيمه واختلط رملي وطيني**
ضاعت علومي وصبري كل ماجاني فقدته**
ارتبك فيني شعوري كلي من رجلي لجبيني**
ارتبكت ولا دريت باللي سويته وقلته**
رجع ونظرة عيونه ترتجي لا تخذليني**
مادرى اني في بعده عمري والله ماخذلته**


في شركة ابوسلطان في مكتب سلطان\\كان جالس متردد كيف يقول للميس انه بيتركها ماكان يبي يتركها وابوها اللي يقول لها هالشيء لازم هو يقول لها اول ويعتذر منها عشان كذا ارسل لها مسج<لميس فيه موضوع ضروري تعرفينه ابي اكلمك>
جلس ينتظر على اعصابه لين جاه منها مسج<خلاص ياسلطان بعد ساعه>
وكان في هالساعه يروح ويجي ومتوتر كان يبي يرتاح من هالموضوع بسرعه وبعد ساعه مرت عليه كأنها شهر دق عليها...
سلطان-مساء الخير
لميس-مساء النور
سلطان-وش اخبارك؟
لميس-تمام وانت؟
سلطان-الحمدلله
لميس-خير سلطان وش فيه؟
سلطان-مو عارف وش اقول لك؟ او كيف ابدأ؟ لكن انا راح اسوي هالشيء عشانك وعشاني لانك تستاهلين كل خير
لميس-اي شيء؟
سلطان-لميس انا بأفسخ الخطبه
لميس تشهق-لييييه؟؟
سلطان-انا آسف يالميس انا عارف اني اخطيت في حقك لكن صدقيني لو كان فيه امل اني اسعدك كان حاولت
لميس-وش صار ياسلطان؟اختلفتم مع ابوي مره ثانيه؟
سلطان-لا بس انا...
لميس تقاطعه-تحب وحده ثانيه؟
سلطان-ايه
لميس-امنيه صح
سلطان-كيف عرفتي؟!
لميس-لانك من يوم تزوجتها تغيرت بس انا اللي ماكنت اصدق نفسي اجل ليه طلقتها؟؟
سلطان-لاني وعدتك وحاولت ارجع كل شيء مثل ماكان حاولت انساها بس ماقدرت
لميس-ما صرت تحبني؟ّ
سلطان-لميس انا آسف وعاذرك لو ماتسامحيني او ماتفهميني
لميس-وهي تحبك؟هي اللي قالت لك تتركني؟
سلطان-لا صدقيني هي للحين ماتعرف وانا مادري ترضى ترجع لي او لا بس انا عارف اني ماراح اسعدك
لميس بعد صمت-سلطان ممكن اطلب منك طلب اخير
سلطان-تفضلي
لميس-لاتفسخ الخطبه اللحين خلها بعد اسبوعين
سلطان-ليه؟؟
لميس-زواج بنت خالتي سحر بعد اسبوعين مابي اذا رحت الكل يطالعني ويسألني عن سبب فسخ الخطبه
سلطان كان يبي ينتهي من هالموضوع بسرعه لكنه شاف ان من حق لميس عليه ينفذ لها هالطلب هي انتظرته شهور ووثقت فيه وخذلها..فعشانها بيصبر كم يوم...
سلطان-خلاص انا ماراح اقول لاي احد الا بعد زواج بنت خالتك ولاتزعلين او تتضايقين انت ألف واحد يتمناك
لميس-انا ماراح ازعل على اللي يبيعني ومثل ماقلت ألف واحد يتمناني وما راح اسامحك ابدا ياسلطان
سكرت ومثل ماتوقع سلطان انفجرت بالصياح وبعد ساعات دقت على سحر وجتها...
سحر-خير يالميس وش فيك؟ليه كل هالدموع؟
وقالت لها كل اللي صار وانقهرت سحر وبدت تهاوش وتسبه...
سحر-قلت لك يالميس من يوم يتزوج اتركيه ولا تصدقينه وانت اللي ماطعتيني
لميس-انا ياسلطان تتركني عشان وحده مثل هاذي
سحر-الطيور على اشكالها تقع خليه يستاهل بكره يندم
لميس-ما أكون لميس اذا جاء هالبكره وهم مع بعض.. انت للحين تعرفين البنت اللي في كليتها
سحر-ايه بس وش ناويه تسوين؟؟
لميس-تعرفين بعدين


بعد ايام في الكليه\\البنت اللي وصتها سحر تدور امنيه لقتها لهم وراحت لامنيه تكلمها...
البنت-مرحبا
امنيه-اهلين
البنت-انت امنيه؟
امنيه-ايه
البنت-فيه وحده جايه زياره للكليه معي وتبي تكلمك بموضوع يهمك
امنيه باستغراب-انا! مين؟
البنت-تعالي معي وتعرفينها
وراحت امنيه معها واول ماشافت لميس تذكرتها صح ماشافتها الا مره وحده لكن هالمره خلتها تحفظ ملامحها واستغربت وش تبي فيها...
لميس-صباح الخير
امنيه-صباح النور
تركتهم البنت لحالهم وراحت...
لميس-انا عارفه انك مستغربه من سؤالي عنك
امنيه-بصراحه ايه
لميس-انا بأفسخ خطبتي من سلطان
امنيه مصدومه-ليييييه؟؟!!
لميس-انا ماقدرت احب سلطان لاني حبيت واحد ثاني لكن يوم سلطان طلقك وهدم بيته عشاني رحمته وما قدرت اقوله لا وافقت يجي يخطبني يمكن ابوي يرفض لكنه وافق حاولت احسسه اني ماابيه لكنه يحبني ويتقبل مني اي شيء آخر شيء قبل امس اضطريت اقوله اني ابي نفسخ هالخطبه و تحطم وترجاني اتراجع لكني مااقدر استمر معاه ويوم قال لي انه تركك عشاني وانت كنت تحبينه وراضيه بأي شيء منه حسيت بالذنب قلت له الله بيعوضك لكنه قال مافيه اي وحده بتقبل فيه وقلبه دائما بيكون معي عشان كذا فكرت فيك اذا كان سلطان صادق وانت تحبينه انت الوحيده اللي بترضين فيه كذا وانا متأكده انك اللي بيفكر فيها بعدي يمكن بعد عشان يقهرني لاني ماكنت احبك دام تحبينه هاذي فرصتك استغليها يمكن في يوم يقدر ينساني ويحبك

امنيه كانت تسمع وهي مصدومه ان لميس بعد كل اللي سواه سلطان عشانها باعته واللي صدمها اكثر ان سلطان كان يعرف انها تحبه مع انها حاولت ماتبين هالحب لكن الظاهر انه حس وعشان كذا كان يجبر بخاطرها وبدأ يعاملها زين او يمكن استغل هالحب اللي مايهمه في اي شيء هذا اللي وصلها..الله اعلم باللي ماقالته لميس تركتها بدون اي كلمه وراحت وهي تحمد ربها ان ام ياسر بتجي الاسبوع الجاي عشان تطلع من حياة سلطان هالمره للابد(لا.. يمكن سلطان ما يرجع لي مره ثانيه حتى لو تركته لميس مو معقول يرجعني لحياة العذاب معه وهو مو مهتم الا بلميس بس عشان يقهرها! مو معقول لهالدرجه ماتهمه مشاعري!والا عشان يعرف اني احبه يبيني ارضى بأي وضع معه!مستحيل انا اكون عنده كذا)

 

[meen_ana]

::الجزء الواحد والثلاثون::



في بيت ابوسلطان في المغرب//كانت دلال في غرفتها وتطالع مع الشباك تنتظر سلطان يرجع, امس رجعت من عند جدتها بس ماشافته جاء متأخر واليوم طلع بدري لكنها كانت تبي تعرف وش فيه له كم يوم مو على بعضه ومثل ماتقول امها انه بس في غرفته مايطلع منها الا على برى البيت وهي تنتظر دق جوالها وشافت رقم نواف...
دلال-هلا
نواف-مساء الخير
دلال-مساء الورد
نواف-وش اخبارك
دلال-تمام وانت
نواف-الحمدلله,دلال كنت بأكلمك بموضوع
دلال-خير وش فيه!
نواف-زواجنا
دلال حست قلبهاارتجف-وش فيه؟؟
نواف-ابيه بعد شهر
دلال-شهر!!
نواف-ايه اعتقد انك كنت مخلصه كل شيء
دلال-ايه بس..
نواف-دلال وش فيه بعد؟؟
دلال-زهور مامداها..
نواف يتنهد-الله يرحمها عارف انه ما مر وقت على وفاتها بس ملكتنا طولت بالحيل وانا وعمي اتفقنا نخليه زواج عائلي الا اذا كنت تبين زواج كبير؟؟
دلال بسرعه-لا ابيك انت
انتبهت للي قالت وحست ان وجهها احترق وسكرت جوالها ومن الخوف اقفلته(وش قلت!والله بأموت, اكيد اللحين ميت ضحك علي)
ومن القهر دخلت مرسمها ونست سلطان،
اما نواف فكان ذايب (الله عليك يادلال طلع اللي في قلبك لي! واللي مو راضيه تبينينه لي لكن جت من الله خلينا بس نتزوج وانا اعرف كيف اطلع اللي في قلبك)


من بكره في بيت أم حمد// جت دلال وأمها يزورون أم حمد كانت أمنيه في المطبخ تسوي القهوه ولحقتها دلال...
دلال_أمنيه وش فيك؟
أمنيه_مافيني شيء
دلال_إلا فيك باين إنك زعلانه
أمنيه_اشتقت لأم ياسر ولسندس والعيال
دلال_مابقى إلا أسبوع ويرجعون إن شاءالله
أمنيه_إن شاءالله
دلال_أمنيه زواجي بعد شهر
أمنيه بفرح_والله ألف مبروك
دلال_الله يبارك فيك
أمنيه بلا مبالاه مصطنعه_وسلطان متى زواجه؟
دلال_مادري من زمان ماكلمته
أمنيه_ليه؟
دلال_له كم يوم ماله خلق لأحد ولا يجلس في البيت مادري وين يروح
تأكدت أمنيه إن اللي قالته لميس صح وهذا سلطان مو طايق أحد لأن حبيبته تخلت عنه اللحين ذاق نفس الكأس اللي هي ذاقته بس اللي بيقهرها لو فعلا رجع لها عشان يعوض نفسه عن لميس مع وحده ترضى بأي شيء...
دلال_أمنيه وين رحتي؟
أمنيه_هاه لا هنا دام زواجك بعد شهر نامي اليوم هنا أنا بعد اسبوع بأروح وبأصير قليل ما أشوفك
دلال_بس كذا ولا يهمك أنام


مر الأسبوع ورجع أبوياسر وراحت أمنيه لبيتهم وصاروا يحضرون لملكة سندس اللي أصر فواز إنها تصير بعد أسبوع ودلال وأهلها مشغولين في التحضيرات لزواجها الكل كان فرحان إلا سلطان اللي كان يتحرك معهم بدون روح وكل تفكيره باللي بيقولونه أهله إذا فسخ الخطبه والأهم وش بيكون رأي أمنيه إذا طلب منها ترجع له...


في بيت أبوسلطان في الصبح//نزلت دلال من غرفتها وشافت أمها في الصاله...
دلال_صباح الخير
أم سلطان_صباح النور
دلال_وين أبوي وسلطان؟
أم سلطان_طلعوا
دلال_بدري افطرتوا
أم سلطان_ما أحد افطر
دلال_ليه؟ صاير شيء
أم سلطان_سلطان بيفسخ خطبته اليوم
دلال انصدمت_ليه
أم سلطان بعصبيه_مادري عن أخوك مو هاذي لميس اللي طلق عشان ياخذها ومارتاح لين خطبناها له اللحين صار مايبيها!
دلال استغربت(ليه ياسلطان سويت كذا! أكيد صار شيء بينهم) وهاليوم ماطلعت كانت تنتظر سلطان تبي تعرف وش صار، بعد العصر جاء سلطان وشافها في غرفته كان معصب وطفشان...
سلطان_دلال!!
دلال_بشحمها ولحمها
سلطان_غريب العروس جالسه في البيت اليوم
دلال_إذا اخوي بيفسخ خطبته هاذي مناسبه تستاهل
سلطان_فستخها
دلال_يعني خلاص!
سلطان_إيه
دلال_ليه؟
سلطان_بصراحه ومن الآخر أحب وحده ثانيه
دلال انصدمت_وحده ثانيه! وممكن اعرف مين هاذي؟
سلطان يتنهد_أمنيه
شهقت دلال_سلطان أنت تحب أمنيه!!
سلطان_إيه كنت أحبها بس أكابر ماكنت قادر أطلقها لو هي ماطلبت ولو شفت فيها شيء واحد يدل إنها تبيني كان ماتركتها حاولت انساها بس ماقدرت ويوم شفتها مره ثانيه عرفت إن حياتي ماكان لها معنى بدونها
دلال بفرح وحزن_كنت حاسه إنك تحبها كان باين عليك بس انت اللي مارضيت تعترف
سلطان_دلال أنت اقرب وحده من أمنيه قولي لي تتوقعين توافق؟ كانت تحبني؟ أنا شفت هالشيء في عيونها
دلال_سلطان اللي سويته في أمنيه مو هين ولا أدري وش بتكون ردة فعلها إذا عرفت إنك تبي ترجع لها
سلطان_دلال روحي كلميها
دلال_اليوم؟
سلطان_اللحين أنا تعبت من الإنتظار تعبت من التفكير لازم اعرف رأيها
دلال_خلاص ياسلطان أنا بأروح أكلمها و يارب توافق
سلطان_دلال الله يخليك اقنعيها قولي لها إني أحبها وإني بأعوضها عن كل اللي راح قولي لها إن حياتي من بعدها مالها أي معنى


في بيت أبوياسر//وصلت دلال وشافت سندس وباركت لها وجلست معهم شوي قبل تدخل هي وأمنيه الغرفه...
أمنيه_خير يادلال وجهك يقول إن عندك شيء بتقولينه؟
دلال_سلطان
أمنيه_وش فيه؟
دلال_فسخ خطبته من لميس
أمنيه باستهزاء_سلطان اللي فسخها؟!
دلال_إيه بس غريب ليه ما تفاجأتي!
أمنيه_وأنا وش دخلني؟ بس قولي لي ليه سلطان فسخ الخطبه؟
دلال_آآ أمنيه أنا ما أعرف أحط مقدمات سلطان يحبك ويبي يرجعك أمنيه سلطان يحبك من زمان بس....
أمنيه تقاطعها_دلال خلاص ماله داعي هالكلام اللي بيني وبين سلطان انتهى ومستحيل نرجع لبعض مره ثانيه أنا بديت حياة جديده ومابي ارجع للماضي ونسيته بكل مافيه
دلال منصدمه_يعني أنت ماتحبين سلطان؟!
أمنيه_أنا قلت لك من زمان إني نسيت سلطان
دلال_بس ياأمنيه سلطان يحبك ونادم إنه ضيعك ليه ماترجعين له يمكن الحب اللي في قلبك يرجع
أمنيه_ما كان حب سلطان أول شخص يدخل حياتي وكان طبيعي احس بشيء اتجاهه لكن أنا قررت إني أبدأ من جديد وبعد اللي شفته من سلطان مستحيل نرجع لبعض
حاولت دلال تقنعها لكن برود أمنيه وإصرارها على الرفض خلاها تقتنع إنها نست سلطان،
بعدها رجعت دلال للبيت وهي مو عارفه وش تقول لسلطان اللي ينتظرها وما ردت عليه وهو يدق عليها، وأول ماوصلت للبيت شافته ينتظرها في الحديقه...
سلطان_دلال وينك؟ ليش ما تردين؟
دلال_ماشفت جوالي
سلطان خاف من شاف ملامحها اللي خلته مايحتاج يسأل_رفضت؟
دلال_حاولت اقنعها بس هي قررت إنها تنسى اللي راح وتبدأ من جديد وما أحد يلومها اللي صار لها معك مو سهل تنساه
سلطان_أنا عارف إني ظلمتها بس أنا...
دلال بحزن_انسى يا سلطان لأنه باين إن أمنيه نست لدرجة إنها ما تفاجأت بفسخ خطبتك واستقبلت الخبر ببرود ولامبالاه
سلطان تركها وطلع (ببرود! و اللي شفته في عيونك! الحب اللي حسيته فيها كان وهم؟ لا ياأمنيه مستحيل ارضى إني اخسرك لازم ألقى حل لو اقدر بس أكلمك)

 

[meen_ana]

بعد يومين يوم الخميس في بيت أبو ياسر في ملكة سندس// اللي طلبت من أبوها إنها تكون عائليه وصغيره بس عناد في فواز اللي كان يبيها كبيره وكذا اقتصرت على المقربين بس عمانها وأهل فواز ولا كانت متحمسه للبسها ولا مكياجها لكن أمنيه جلست وراها لين طلعتها قمر بمنتهى النعومه لكن كل شيء هان عندها قدام هاللحظه اللي بيدخل فيها فواز .. حاولت بكل الطرق تلغي هالشوفه بس ما أحد وافق سمعت الباب ينفتح ويتسكر وظل طويل يقترب منها و وقف عندها مد لها يده ورفعت راسها تطالعه توقعت تشوفه مبتسم لكن بالعكس كان مكشر وهالشيء خلاها تخاف زيادة ما هي خايفه..مدت يد مرتجفه تصافحه مسك يدها وجلس قريب بالحيل منها ولو ما كانت في آخر الكنب كان قدرت تبعد عنه حاولت تسحب يدها منه لكنه كان ماسكها وحاطها بين يدينه حست إن ريحة عطره دخلت لين روحها وأخيرا تكلم وقطع هالصمت لكنها ماتوقعت يكلمها بصراحه من أول مره ويحرجها...
فواز_دانه تقول إنك تكرهيني وماتطيقين تسمعين اسمي صح؟
سكتت لأنها ماتدري وش تقول ماجتها الجرأه تقول لواحد مثل فواز أكرهك في وجهه...
فواز_سندس
سندس بصوت خفيف_نعم
فواز_وأنت تكلميني طالعي فيني
سندس قالت في نفسها(كيف ارفع رأسي وأنت لازق فيني وجهك في وجهي)
رفع وجهها بيده وطالعته بخوف كان قريب منها بالحيل و نظرته كانت توترها...
فواز_أنا ما أكذب أنا أحبك وأنت الوحيده اللي خلتني أحس إن مافيه أي شيء بحياتي له قيمه بدونها وأنت بتحبيني قولي أي شيء أسويه يخليك تحبيني وأنا بأسويه
سندس كانت تحس إنها مسحوره باللحظه مسحوره بكلامه مسحوره بالمشاعر اللي شافتها في عيونه ماكانت تتخيل أبدا إن أحد يحبها ويقول لها مثل هالكلام كيف إذا كان واحد مثل فواز...
فواز_سندس تكلمي أبي اسمع صوتك قولي كل اللي مضايقك مني
سندس لفت وجهها عنه_أنا...أنا مو مصدقه متى امداك...
فواز كمل اللي ماقدرت تقوله_أحبك
سندس_إيه
فواز_تصدقين لو أقول لك إني كنت دائما معجب فيك من كلام دانه عنك لكن ماكنت منتبه بس أول ماشفتك كل شيء صار واضح لي
سندس_أخاف أصدقك يجي يوم وتتغير
فواز_يعني أحب غيرك؟
سندس_إيه
فواز_أنا أحب غيرك؟
سندس_يمكن
فواز_لو لي غير هالقلب يمكن
رفع يدها وباسها وانحرجت سندس لأن يدها ترتجف مثل قلبها وطلعت بسرعه من الغرفه بدون ما تلتفت عليه، طالعها فواز وهي تروح عنه وهو مرتاح إنها ماجابت طاري سالفة أمنيه وإن كل خوفها وشكوكها كانت عشان تتأكد إنه يحبها والأهم إنها مارفضت هالحب، أما سندس فما صدقت إنها طلعت تسندت على الجدار وأخيرا قدرت تتنفس طبيعي وتذكرت شعورها اللي انقلب في لحظه(وين الكلام اللي كنت ناويه أقوله؟ ليه سكتني؟ليه راح كل اللي كنت أفكر فيه؟ وماصار شيء مهم غيره!)
قدر يذوب خافقي بسهوله..
يوم تمكن من عروقي شاله..
في كلمتين قالهن معسوله..
خلتني انسى عالمي وأحواله..
قبل يجيني كل شيء بأقوله..
بس المصيبه لا غديت قباله..
تبرد عظامي كأني مشلوله..
ولا اسمع غير كلام قاله..
دايم بعيني مايفارق زوله..
حتى بحلمي صورته وخياله..
حتى زلته صارت مقبوله..
غصب اسامح زلته وافعاله..
جتها دانه وهي سرحانه...
دانه_سندس وش فيك؟
سندس_هااه
دانه_هاه! اللي آخذ عقلك
سندس_انقص لساني ماقلت له الكلام اللي من شهر ارتبه
دانه_أحسن لأني عارفه وش كنت بتقولين
جت أمنيه_هاه العروس طلعت أخيرا
سندس_أووه مابي اسمع أي تعليق
وراحت عنهم...
أمنيه_وش فيها؟
دانه تضحك_الظاهر خالي آخذ عقلها
وقالت دانه في نفسها(الظاهر إنك سويت اللي قلته يافواز)


في بيت أم ندى//كانت نور ماره من عند غرفة نجلاء رايحه لغرفتها لكنها سمعتها تصارخ معصبه وشكلها تكلم في جوالها جاها فضول تعرف وش فيها ووقفت تتسمع...
نجلاء_لميس مو معقول ماأقدر اصدق إن سلطان يفسخ خطبتكم!
نور أول ماسمعت هالخبر كانت بتصرخ من الفرحه لكنها مسكت نفسها تبي تسمع باقي الكلام...
نجلاء_يحب وحده ثانيه! مين؟...... وليه ماتقولين لي؟ وأنت خلاص رضيتي بهالشيء......وش سويتي؟.....وتتوقعين ترفضه بعد الكلام اللي قلتي لها؟....
راحت نور لغرفتها وهي تفكر(سلطان يحب وحده ثانيه! متى حبها؟ وش قالت لها لميس النذله تبي تفرق بينهم لازم اعلم سلطان بس ماقدر أقوله شيء لين افهم السالفه عشان مايطلعوني كذابه زين يالميس الحمدلله اللي افتكينا منك أنا عمري ماحبيتك واللحين كرهتك زياده كنت احس انك طماعه مثل أهلك و مايهمك في سلطان الا مركزه و فلوسه.. مايكفي خسرنا أمنيه عشانك اللحين بتخسرين سلطان اللي يحبها صدق لزقه وذابحينا لميس ألف واحد يتمناها خلاص تروح لهالألف وتريحنا منها!)


في الكليه جت دانه لسندس...
دانه_أقدر أفهم ليه ما فتحتي الجوال تردين على زوجك اللي ازعجنا؟ وليه ماكلمتيني يوم دقيت عليك؟
سندس تطالعها_صباح النور
دانه_سندس؟
سندس_ماكنت مستعده أكلمه ومادري كيف بأكلمه؟
دانه_أنت للحين ماتبينه؟
سندس_مادري؟
دانه_سندس كلنا نسينا اللي صار حتى أمنيه فرحانه لك ليه أنت مو راضيه تفرحين؟
سندس_تبين الصراحه خالك يخوفني
دانه تضحك_يخوفك! توقعت أي شيء إلا إنك تخافين منه
سندس_يا ويلك تقولين له مو تسوين حما علي
دانه_سندس أنت من صدقك؟
سندس_إيه أنا حاسه إنه بيسيطر علي إن كان من أول مره قلب حالي كذا وما قدرت انطق كيف إذا صرت زوجته! بصراحه أنا كنت مخططه اتزوج واحد مخفه و اسيطر عليه
دانه ماتت ضحك_والله إنك شيء! سندس إذا كان الزوجين متفاهمين ويحبون بعض ماله داعي أحد يسيطر على الثاني المهم اليوم تفتحين جوالك
سندس_أحاول
وفي البيت حاولت تفتح جوالها لكنها كل ماتخيلت إن فواز بيكلمها تخاف وتهون (أنا ليه كذا خايفه منه؟ صدق إني غبيه)
سمعت أحد يطق باب غرفتها...
سندس_مين
أمنيه_أبوك دق ويقول يبيك في المجلس
سندس_زين أنا رايحه
وراحت للمجلس ودخلت بسرعه لكنها ماشافت أبوها واللي شافته خلى قلبها يطلع من صدرها شهقت وكانت بترجع لكن فواز كان أسرع منها مسكها من يدها وسحبها داخل المجلس وهي تحس إنها بتموت من الخوف...
فواز بعصبيه_سندس وش فيك؟!!
سندس_ليه جيت؟
فواز_جيت اسألك متى ناويه تفتحين جوالك؟
سندس_وجاي بس عشان تسأل!
فواز_سندس حرام عليك أنا تزوجتك أبي ارتاح لكن أنت مخليتني مثل الخبل، عندك فكره عن الإحراج اللي كنت فيه وأنا اطلب من عمي أشوفك وحنا مالنا يومين مالكين
سندس بإحراج_أنا آسفه ما قصدت
فواز_أنا مو جاي اسمع اعتذار أبيك تقولين وش فيك؟
سندس_خلاص اللحين بأفتح الجوال
فواز_آها يعني مثل اللي يقول مع السلامه
سكتت ماردت...
فواز_زين قولي مع السلامه أشوفك على خير أي شيء
سندس_مع السلامه
فواز_مع السلامه ساده كذا مافيه معها شيء!
فهمت سندس وش يقصد وطالعته بخوف...
فواز يضحك_امزح أنت من دون شيء صايره طماطه أشوفك على خير

ورفع يدها وباسها وسندس منزله راسها رفع راسها وطالع فيها لحظه ثم راح، أما سندس فوقفت على حالها تستوعب اللي صار فجأه تذكرت شكلها وركضت للمرايه وشافت نفسها ببنطلونها الجنز الفاتح و التيشرت الأبيض وشعرها القصير خصلاته متبعثره وجهها كان أحمر عشان كذا قال لها طماطه (وطالعه وشكلي كذا! أبي اعرف كيف واحد مثل فواز يترك كل هالبنات ويحبني أنا؟ صح أنا حلوه بس مو أحلى من أمنيه ليه تركها وحبني أنا؟ وش يشوف فيني أنا مو شايفته! معقول أهمه لدرجة يجي بس عشان يشوف ليه مافتحت الجوال) وتذكرت جوالها وراحت بسرعه تفتحه...

 

[meen_ana]

:الجزء الثاني والثلاثون::

في بيت أبوسلطان الكل كان مشغول لزواج نواف ودلال بعد أسبوعين حتى سلطان كان يحاول قد مايقدر يدخل بجوهم ولا ينكد فرحتهم لأن نواف يستاهل يفرح بعد كل اللي مر فيه وبعد دلال اخته الوحيده والغاليه عليه مو معقول يشغلها عن أهم يوم في حياتها بمشكلته وبهمه بيحاول يصبر لين ترجع دلال من شهر العسل وساعتها يطلب منها تكلم أمنيه مره ثانيه لأنها الرابط الوحيد بينهم، أما دلال فكانت مستغربه من سكوت سلطان واستسلامه لدرجة فكرت إنه يمكن ماكان يقصد اللي قاله أو يمكن حس نفسه مو مهتم بلميس مثل قبل وتوهم حبه لأمنيه...


في بيت أبوياسر فتحت سندس جوالها ومن فتحته وهي تطالعه خايفه يدق وبعد ثلاث ساعات من جلستها دخلت عليها أمنيه...
أمنيه_كل هذا شوق له لك كم ساعه ماتحركتي من عند جوالك!
سندس_آه ياأمنيه احس لو يدق اللحين قلبي بيوقف
أمنيه بإستغراب_وليه كل هذا؟!
سندس_مو قادره أصدقه في اللي يقوله! ومو قادره أصدق إني اللحين زوجته!
أمنيه_سندس أنت لو تهدين بس كان شفتي بنفسك إنك تحبينه
سندس_أنااااا!!
أمنيه_إيه أنت من أول ماعرفتي دانه وأنت تتكلمين عنه بإعجاب لدرجة شكيت إنك تحبينه
سندس_كنت أبي اقنعك فيه
أمنيه_بس هو يحبك واختارك وأنت تستاهلينه
ودق جوال سندس وطالعته بخوف والتفتت على أمنيه اللي ضحكت وطلعت عنها...
سندس_هلا
فواز_مساء الخير
سندس_مساء النور
فواز_وش أخبارك؟
سندس_تمام
فواز_اشتقت لك.....وش فيك ساكته؟
سندس_مادري وش أقول!
فواز_اللي تبين أنا مفضي لك نفسي وعندي استعداد اسمع قصة حياتك من يوم ولادتك إلى هاللحظه..


في بيت أم ندى//في غرفة نور اللي من أيام وهي تراقب تليفونات نجلاء تحاول تفهم سالفة سلطان ولميس لكن ماقدرت تعرف شيء ويوم راحوا عند دلال ماقالت إلا إن سلطان ترك لميس ولا جابت أي طاري لوحده ثانيه وإن كان دلال ماتعرف أجل كيف لميس عرفت (مو باين على سلطان إنه يحب أحد طلق أمنيه وترك لميس مين اللي يحبها أجل!)...


في بيت ابو سلطان قبل زواج دلال بأسبوع// دخل سلطان البيت وراح لغرفة دلال يبي يكلمها لكنه قبل لايدخل سمعها تنطق باسم هز قلبه كانت تكلم امنيه وقف على الباب يتسمع مع انه ماكان يسمع الا صوت دلال لكن على الاقل حس ان هالكلام ينرد على كلام تقوله امنيه وهذا يكفيه وقف جنب باب الغرفه (مشتاق لك ياأمنيه بأموت على شوفتك تعبت اصبر لي اكثر من سنه ماحسيت براحه اول كنت قدامي وانا احاول اكبت حبي لك واتجاهله سميته كل شيء بس ماعترفت انه حب وبعد فراقك حسيت انك اخذتي الروح معك واليوم اعرف اني احبك ومو طايلك ليه رفضتي عارف اني ظلمتك وجرحتك لكن ابي فرصه اعوضك فيها عن كل شيء فرصه اقول فيها اني احبك)


في بيت ام خالد//جلست ام خالد ونواف في الصاله يتكلمون عن الزواج بعدين قالت ام خالد...
ام خالد-نواف انا عارفه انك ماراح ترضى تسكن في شقة خالد وزهور الله يرحمهم لكن انا مابي تسكن في ذاك البيت على طول وانا وفجر لحالنا في هالبيت
نواف-وش تبين اسوي يمه وانا بأسويه؟
ام خالد-اذا رجعت من شهر العسل ان شاءالله وارتحت دورلنا بيت يناسبنا
نواف بحزن-ونترك هالبيت؟
ام خالد-الذكريات في القلب يانواف مو البيت اللي بيذكرنا في اللي فقدناهم الله يرحمهم لكن اللي شفناه كثير ولازم نغير عشان نبدأ من جديد
نواف يتنهد-اذا كان هالشيء يريحك انا بكره اوصي احد يدور لي عشان اذا رجعت يكون كل شيء جاهز
ام خالد-الله يخليك لنا


في الكليه//طلعت دانه وسندس من المحاضره...
دانه-اقدر افهم وين كنت سرحانه في المحاضره؟تعبت أأشر لك ماتشوفين؟
سندس-تأشرين لي ماشفتك!
دانه-وانت شفتي احد مسافره في عالم الاحلام!
ضحكت سندس واستحت...
دانه-انا كنت عارفه انك سرحانه فيه سندس انتبهي لدراستك هذا من اولها كذا!!
سندس-اي شيء يفوتني انت بتشرحينه لي
دانه-يااااسلام فاضيه لك
سندس-طبعا مو انت اللي خاطبتني وان طالبه تحملي انت اللي ورطتيني
دانه-زين وش رأيك بورطتي؟؟
سندس تضحك-تصدقين ما أعرف عنه شيء الا اللي انت تقولينه لي عنه
دانه-كل هالمكالمات ولا عرفتي عنه شيء؟!
سندس-ايه خالك يلعب علي يسألني عن كل شيء ويخليني اتكلم في كل شيء عني وهو بس يسمع
دانه-وانت ليه ماتسألينه؟
سندس-مايرضى يقول مابي اتكلم ابي اسمعك انت واذا تبين تعرفين اي شيء اسألي دانه
دانه-والدلع لاتقولين مايدلعك خالي ياويله؟
سندس-لا جرب حظه مرتين وسكرت في وجهه
دانه-لييييه؟!!
سندس-استحي
دانه-والله ماعندك رومانسيه ياعمري ياخالي!
قبل يوم من زواج دلال//اتصلت امنيه على دلال...
امنيه-صباح الخير
دلال-صباح الورد
امنيه-ألف مبروك مقدما
دلال فهمتها-امنيه لاتحاولين بتحضرين زواجي غصب
امنيه-كيف عرفتي اني بأطلب هالشيء؟!
دلال-لاني فاهمتك
امنيه-دلال وجودي بيكون محرج بعدين خالتك...
قاطعتها دلال-ماأحد بيقولك شيء يضايقك اوعدك والله ياأمنيه ماأتخيل اتزوج وانت مو فيه
امنيه-الله يوفقك يادلال ولايهمك بأجي وعشان عين تكرم مدينه
كملوا سواليف وتخطيط لبكره وبعد ماسكرت منها دلال طرى لدلال شيء يمكن ينفع...


في بيت ام ندى//وصلت دلال وجلست تسولف معهم وتسلم عليهم لانها بكره بتسافر بعد زواجها على طول...
دلال-خالتي ممكن اطلب منك انت ونجلاء طلب؟ان كنت غاليه عندكم؟
ام ندى-اكيد غاليه يابنتي واطلبي اللي تبين
دلال-بكره في الزواج بتكون امنيه موجوده مابي انتم تتضايقون و ماطلب تسلمون عليها او حتى تكلمونها بس مابي تضايقونها
من الملامح اللي صارت على وجيههم ماستبعدت دلال يقولون يااما حنا او هي في هالزواج وخاصه نجلاء لكن خالتها سبقت وبعد ماعطت نجلاء نظره سكتتها...
ام ندى-لاتهتمين يادلال بنعتبر نفسنا مو شايفينها اذا كان هالشيء بيريحك
دلال-مشكوره خالتي
اما نور فكانت فرحانه انها بتشوف امنيه مره ثانيه لكن ماتكلمت خوف من امها وسوت نفسها مو مهتمه, وبعد ماراحت دلال انفجرت نجلاء...
نجلاء بعصبيه-شفتي يمه كل هالمشوار مو عشان تسلم علينا عشان بس تتطمن اننا مانضايق هالامنيه!!
ام ندى-بكيفها انسيها بكره زواج دلال تبيني اضايقها عشان وحده ماتسوى
قامت نجلاء وراحت لغرفتها بس الملامح اللي على وجهها كانت تقول ان قهرها كان على شيء اكبر عشان كذا راحت وراها نور بتكلمها لكنها سمعتها تكلم...
نجلاء-لميس لازم تقولين لي مين اللي يحبها سلطان انت قلتي انك تعرفينها....انا شاكه في وحده وخايفه تطلع هي....لاتقولين انها امنيه...وشو! سلطان يحب امنيه!ويتركك عشانها! مستحيل مستحيل ترجع لنا بعد مارتحنا منها!!
انصدمت نور من اللي سمعته وفي نفس الوقت فرحت.. كانت فرحانه ان سلطان ماراح ياخذ لميس لكنه يرجع لامنيه هاذي قمة الفرحه لانها عمرها ماشافته فرحان ومرتاح مثل ما شافته مع امنيه..لكنها تذكرت(بس وش الكلام اللي قالته لميس عشان تفرق بينهم؟معقوله امنيه ماترضى ترجع لسلطان! بسألها بكره.. لا يمكن الموضوع كبير وماتصدقني لازم اقول لسلطان بس بيسألني كيف عرفت مابي اقول له ان نجلاء تعرف وساكته اخاف يزعل منها وحنا من غير كذا بعدنا عن بعض الفتره الاخيره يله الشكوى لله انتظر لين ترجع دلال واقول لها وهي تتصرف احسن مني)

 

[meen_ana]

في بيت ابوسلطان//رجعت دلال ويوم دخلت غرفتها شافت سلطان واقف عند الشباك...
دلال-انا اقول الغرفه منوره ليه؟
سلطان يلتفت لها-وين كنتي؟
دلال-عند خالتي ام ندى اسلم عليهم
سلطان-وانا مو على قائمة العروس؟؟
دلال-افا عليك انت مسك الختام
سلطان-خلاص بأجلس معك شوي عشان لازم تنامين وترتاحين
دلال-وش شوي هاذي السهره الاخيره لنا لازم نجلس لين الفجر
سلطان-ليه ناويه بكره تنامين عن نواف
دلال-وش وراه بينتظر لين اصحى ماراح يطير
سلطان يضحك-من قلبك هالكلام؟
دلال-اترك اللي بقلبي على جنب وقول لي اللي في قلبك انت
سلطان يتنهد-اللي في قلبي تعرفينه وعرفتيه قبل لا انا اعرفه
دلال-يعني اكيد تحب امنيه؟
سلطان باستغراب-ليه انت كنت شاكه؟؟
دلال-لا بس استغربت انك استسلمت لرفضها بكل سهوله
سلطان-ماستسلمت ومستحيل اتركها تضيع مني مره ثانيه لكن انت الرابط الوحيد بيننا وغصب علي اصبر لين ترجعين عشان تكلمينها مره ثانيه او تحاولين تخليني اكلمها
دلال-ليه ماقلت لي كل هالوقت؟؟
سلطان-هاذي الايام لك يادلال مابي اشغلك فيني لكن اذا رجعت ان شاءالله لازم تساعديني.. دلال انا ياله عايش بدونها
دلال رحمته-ولا يهمك ياسلطان ان شاءالله بترجعون لبعض
طلع سلطان منها ودلال رجعت تفكر(معقوله امنيه نسته صدق؟ مع كل تأكيداتها لهالشيء الا اني مو قادره اصدقها)


في زواج دلال كانت أمنيه متوتره من نظرات الناس لها وتحس إن الكل يسأل وش جايبها وكأنها وحده من العائله خاصه نظرات أم ندى ونجلاء لكن بالمقابل معاملة أم سلطان وأم حمد وأم خالد ونور وفجر خلتها تحس إنها بين أهلها وإن هذا أنسب مكان لها لدرجة فكرت إنها كان المفروض تقبل بسلطان بس عشان ترجع تعيش معهم مره ثانيه لكن كل ماتتخيل كيف سلطان ما اهتم بمشاعرها جرحها يكبر وشوفته مره ثانيه تصعب صح إنه حب حياتها وماراح تحب غيره لكن اللي شافته منه كثير وعشانه منه صعب تنساه...


بعد انتهاء الزواج في الفندق//وقف نواف يطالع بدلال بكل حب وهي تطالعه بإبتسامة خجل...
دلال_وش فيك واقف؟
نواف_والله مو مصدق! أبي اشبع من شوفتك وأخاف اقرب منك اطلع في حلم
دلال_تعال وأنا اثبتلك إنه مو حلم
نواف بإبتسامة مكر يجلس جنبها_يله اثبتي
دلال قرصته مع يده بقوه...
دلال_شفت مو حلم
نواف_اللحين هذا إثباتك؟ أنا عندي إثبات أحسن
دلال بإرتباك_آآ نواف جوعانه
طالعها نواف بنص عين...
نواف_من عيوني
طلبوا عشاء خفيف وتعشوا وجلسوا يسولفون لأن دلال رفضت تنام لين موعد طيارتهم كانت تبي تنام في الطياره لأنها تخاف منها وهم يسولفون فجأه تذكرت دلال شيء...
دلال_نواف أبي اسألك سؤال محيرني؟
نواف_اسألي
دلال_أنت كيف عرفت إني أنا اللي خربت غرفتك يوم كنت في ثالث ثانوي
نواف يضحك_والله إنك رايقه ودامك تبين إجابه ذكرتيني أنا أبي تعويض
دلال_تعويض!!
نواف_إيه عن الأضرار النفسيه والماديه اللي سببتيها لي واللحين
دلال ندمت إنها فتحت هالموضوع لكن نواف أصر على رأيه وأخذ التعويض و بدأ شهر عسلهم وبدأت حياتهم مع بعض...


في بيت أبوسلطان//رجع سلطان متأخر وقبل يفتح باب غرفته تذكر أول مره شاف أمنيه هنا في سريره أول ماتصالحوا(آه ياأمنيه لو اقدر بس احلم إني إذا فتحت هالباب بأشوفك! مادري كيف بأصبر لين رجعة دلال؟ أحسن شيء أسافر أضيع الوقت وارجع بعد اسبوعين لزواج عمر يكون نص الوقت راح) وطلع من جيبه دبلة أمنيه وسلسلتها اللي من يوم شافها وهي دائما معه(يارب اشوفك لابستها مره ثانيه وإلا ماعرف كيف بأكمل حياتي بعدك؟)


سافر سلطان يبي ينسى لكنه هناك شاف أمنيه في كل مكان وعرف إنه لو يسافر لآخر الدنيا بعد بيآخذها معه كان يخطط لحياته معها للي بيقوله لها للي بيسويه وكل ماكبر الأمل في داخله كل ماقل صبره(تعبت أشوف طيفك في كل مكان سافرت عنك وأثرني سافرت لك أنت معي دائما وبتظلين معي للأبد)...
أسافر عنك وتسافر معايا#
ترافقني بحلي وارتحالي#
اغيب واترك العالم ورايا#
ولا أحمل غير طيفك فخيالي#
وجوه الناس فالغربه مرايا#
تصور صورتك دايم فبالي#
وانسى غربتي وانسى عنايا#
واحس إنك معي ماهو بلحالي
مثل مالك بهالدنيا سوايا#
أنا مالي سواك إنسان غالي#
لأنك أول وآخر منايا#
وأول حب لي وآخر وتالي#
حبيبي عدت لك شايل وفايا#
وشوقي وفرحتي ولهفة سؤالي#
هل أنت اشتقت لي وشاقك هوايا#
كثر شوقي لك في ذيك الليالي#

في نفس الحال كانت أمنيه سهرانه في غرفتها مرت أيام من زواج دلال لكن أمنيه حست إنهن شهور فقدتها بالحيل خاصه بعد ماكلمتها دلال اليوم(متى ترجعين يادلال اشتقتلك بالحيل واشتقت لأخبار سلطان ماأقدر اجلس كذا ماعرف عنه شيء)

 

[meen_ana]

::الجزء الثالث والثلاثون::




رجعوا دلال ونواف متمشين و دخلوا الفندق وهم يمشون صادفوا بنت شهقت يوم شافت نواف...
أميره_نوااااف مو معقول!!
نواف يبتسم_أهلين أميره
أميره_عاش من شافك
نواف بإحراج_تسلمين
أميره_وش أخبارك؟
نواف_تمام و مازن وش أخباره؟
أميره_أفا عليك أول اسأل عن أخباري أنا
نواف انحرج من كلامها وكان بيتكلم عشان يعرفها على دلال لكن دلال قاطعته...
دلال_مافيه وقت يسأل عنك وتسألين عنه حنا جايين تعبانين ونبي نرتاح وأنت مو وحده بدون ذوق أو ماعندك دم لاسمح الله عشان توقفيننا معك ونسمع بعض مجاملات مالها داعي عن إذنك
وحطت يدها في يد نواف ومشت وتقريبا سحبته معها وياله أمداه يتكلم...
نواف_مع السلامه
كان يبي يعتذر لها عن كلام دلال أو يبرره لكنه عرف لو سواها بتقوم دلال الدنيا عليه، وأول ماطلعوا في المصعد رمت دلال يده من يدها...
نواف_وش فيك؟!
دلال_وش فيني! نواف اسكت أحسن
نواف فرح انها غارت عليه ويبي يطفشها_وإذا ماسكت؟
دلال_بيكون فيه بكره خبر في الجرايد عن وحده خنقت زوجها في المصعد
نواف_آها وش بيكتبون السبب؟
دلال_أسباب كثيره لأنه خاين وسخيف ومايستحي و...
نواف يضحك ودلال عصبت عليه زياده و وطت رجله بكل قوتها لكنه ضحك زياده...
نواف_أنت للحين مانسيتي هالحركه ماعندك وسائل هجوم جديده؟
دلال_لاااا تضحك
طلعوا من المصعد ودخلوا غرفتهم ودلال نزلت عبايتها ونامت على السرير وغطت وجهها...
نواف_وش تسوين؟
دلال من تحت الغطاء_وش شايف؟
نواف_بتنامين؟
دلال_إيه
نواف_مو كنا بننزل نتعشى
دلال_ما أبي
نواف_أهون عليك أنزل اتعشى لحالي!
دلال تجلس وترفع الغطاء_لا والله انت ماصدقت! مين قال إنك بتنزل تتعشى انطق اتعشى هنا
نواف جاء وجلس جنبها لكنها عطته ظهرها...
نواف_دلال أنت من صدقك زعلانه؟
دلال_ليه حضرتك ماسويت شيء يزعل يعني؟
نواف_لا أنت اللي سويتي..البنت زميله من أيام الجامعه وسلمت علي وأنت ماقصرتي فيها هزأتيها بدون سبب....
قاطعته دلال تصارخ_بدون سبب! واقف تتكلم معها ومافكرت تعرفني عليها مالت عليك وعليها وهي واقفه ومطيره عيونها فيك ومو مصدقه نفسها ولا فكرت في هاللي واقفه جنبك مين تطلع عساها العمى إن شاءالله
نواف يضحك_تدرين كنت زعلان على اللي سويتيه معها لكن زين جت على كلام وما مديتي يدك
دلال_الجايات أكثر
نواف يلف وجهها بيده ويطالعها بحب_لهالدرجه تغارين علي
دلال بدلع_مابي أكلمك
نواف_وأهون عليك؟
دلال_قبل قولي كم بنت عرفت بهالسبع سنين اللي درست فيهن؟
نواف_بنت وحده كل ماكلم أي بنت اتذكرها و كل ماأشوف أي بنت اقارنها فيها هذي مثل شعرها وهذي مثل ضحكتها وكل ما سرحت لقيتني أكتب اسمها بنت وحده في حياتي من سنين مشقيتني ومتعبتني ولا عمرها ريحتني
دلال بشرود_هاذي أنا؟!
نواف_دلال البنت الوحيده اللي تحرك قلبي كرهتك وحبيتك وتذكرتك ونسيتك كل المشاعر اللي مرت علي كانت لك
بدون شعور حظنته دلال بقوه وهو حظنها...
دلال بينها وبين نفسها(لو تعرف يانواف إني أنا بعد أحبك من صغري وكنت تقهرني بإنطوائك وكلامك الجاف معي وأكثر شيء قهرني سفرتك اللي حرمتني منك)
من زمان الطفوله وانت والله حبيب..
مستحل قلبي من حنا صغار..
وقتها كنت طفله وضعها مريب..
داخلي شيء لك ماهو مجرد جوار..
كان عندي شعور لا نظرت لك غريب..
تعتريني سعاده ومن الأطفال أغار..
كان هذا شعوري قبل سن الرقيب..
قبل مايعذبوني أهلي بلبس الخمار..
اختفيت وأنا حافظتك عن ظهر غيب..
وما بقلبي غيرك أنت من الطفوله تذكار..
دلال_سامحني يانواف أنا عارفه إن لساني طويل
نواف_بشرط
دلال_وشو؟
نواف_قولي إنك تحبيني
دلال تصارخ_أحببببببببببببببك
نواف_خلاص يكفي وأنا اللي على بالي بأحرجك
ضحك عليها ورجع يضمها مره ثانيه هاذي هي دلال دائما تسوي اللي مايتوقعه لكنه يحبها بكل عيوبها...
من وين تطلع كنك تقولي ياشمس اطلعي~
يتنفس الفجر بنفس حسنك ويشرق مطلعه~
يمتد ليلي واشعلك شمعة غلا بين اضلعي~
ويمر بي طيفك ويتناثر بصدري واجمعه~
تحتاج تتعبني وأنا احتاجلك وأنت معي~
بعض المشاعر تتعب المشتاق لكن ممتعه~
موقعك من قلبي تدله بس حدد موقعي~
وبعدين خذ قلبي وفي دنيا غرامك ضيعه~


في زواج عمر//كان سلطان تعبان وماله نفس يقابل الناس لكن هذا زواج عمر أعز أصدقائه ولازم يحضره جلس مع عيال عم عمر اللي كان يعرفهم بعيد عن الناس شوي لكنه التفت وشاف فواز يسلم على واحد وهو يضحك والرجل اللي يكلمه معطيه ظهره كان بيقوم يسلم على فواز ويبارك له لكن يوم التفت الرجل اللي مع فواز وشاف سلطان وجهه انصدم...
سلطان_أبوياسر!! وش جابه هنا؟!
بندر واحد من عيال عم عمر_هذا عمه فواز يصير نسيبه آخذ...
لكن سلطان راح بسرعه ولا سمع أي كلمه زياده...
بندر يكلم أخوه_وش فيه راح كذا بسرعه؟!!
أخوه_مادري
أما سلطان فكان كل اللي يبيه..يطلع بسرعه من هالمكان ولا كان حاس بالناس اللي يمر بينهم.وركب سيارته بسرعه...
(فواز! فواز تزوج أمنيه! ليه دلال ماقالت لي؟؟ يعني للحين يبيها من يوم شافها؟ واللحين صارت له! صارت له! أمنيه حبيبتي أنا بنفسي قدمتها لفواز! خلاص خسرتها؟ خسرتها للأبد؟؟)
عجز يستوعب هالحقيقه القاسيه حس بغصه في قلبه وإن كل شيء انتهى امتلت عيونه بالدموع دموع مسكها رفض إنها تنزل نزولها معناه النهايه معناه إنه يعترف بخسارته لأمنيه وهالشيء مستحيييييل زادت الدموع في عيونه لين صار مو شايف اللي قدامه ولا عارف وين يمشي فجأه حس بإهتزاز ثم ضربه قويه تكسر زجاج السياره وانتثر حوله قبل لا يخيم الظلام والهدؤ على كل شيء...

 

[meen_ana]

بعد اسبوع\\دقت دلال على أمنيه اللي فرحت يوم سمعت صوتها...
أمنيه_دلووول عاش من سمع صوتك! أخبار شهر العسل؟
دلال_أمنيه أنا رجعت
أمنيه_ليه كنتم ناوين شهر كامل؟ دلال صار شيء؟
دلال تصيح_سلطان
أمنيه خافت من يوم كلمتها دلال وصوتها متغير واللحين تصيح وتقول سلطان ماحست في نفسها إلا وهي تسكر التليفون (مابي اسمع مابي أعرف إنه صابك شيء.. يكفي متحمله إني فقدتك..اللحين يصير لك شيء يارب يارب خليه لي أنا ماأقدر أعيش بعده..و لمين أعيش؟)
رجع التليفون يدق مره ثانيه كانت تعرف إنها دلال وتبي ترد حتى تتطمن على سلطان لكنها خايفه من اللي بتسمعه وبعد تردد ردت...
أمنيه_....
دلال_أمنيه وين رحتي؟ وشفيك سكرتي؟
أمنيه بصوت مرتجف_وش فيه سلطان؟ دلال قولي إنه بخير قولي إنه ماصار له شيء
دلال بإستغراب_أمنيه أنت للحين تحبينه؟!
أمنيه_ولا بحب غيره ولا في حياتي وقلبي غيره
دلال_لكنك قلت إنك نسيتيه و...
قاطعتها أمنيه_مو مهم اللي قلته قوليلي سلطان فيه شيء؟
دلال_مادري وش أقول لك ياأمنيه بس سلطان صار له حادث ومن أسبوع وهو في المستشفى في غيبوبه وحالته مو راضيه تتحسن
أمنيه وقلبها يدق بقوه وتحس إن أحد يخنقها_وش فيه؟
دلال_كسور في جسمه وضربه قويه في رأسه وهاذي اللي خايفين منها
أمنيه_والغيبوبه إلى متى؟
دلال_هاذي غيبوبه ياأمنيه يعني ما أحد يعرف متى يقوم منها المشكله إن الدكاتره يقولون إن جسمه مو متقبل العلاج وبحالة إستسلام
أمنيه انهارت كل قوتها اللي كانت متمسكه فيها وبدت تصيح وصاحت معها دلال...
أمنيه بعد لحظات_دلال الله يخليك أبي اشوفه لازم اشوفه
دلال_كيف ياأمنيه أخاف أحد من أهلي يشوفك
أمنيه_هو بأي مستشفى؟
دلال_في المستشفى اللي فيها نواف
أمنيه_خلاص قولي لنواف يخلني اشوفه بدون وقت الزياره
دلال_أمنيه كيف أقوله بيعرف إنك تحبينه!
أمنيه_مايهمني يعرف تكفين دلال اقنعيه إذا ماشفته بأموت
دلال_لاتقولين كذا ياأمنيه أنا بأطمنك عليه
أمنيه تصارخ_لاااا أبي اشوفه بعيني ولو ماساعدتيني بأجي أي وقت وماهمني مين يشوفني
دلال_خلاص خلاص بعد ساعه يجي نواف وأقوله
أمنيه_بأقول لأم ياسر إنك رجعتي وبأتعشى عندك اليوم مريني نروح
دلال_اليوم
أمنيه_إيه وعسى أقدر أصبر
دلال_زين مع السلامه
أمنيه_مع السلامه
سكرت دلال وهي مستغربه(تحبه كل هالحب! ليه قالت لي إنها نسته؟ وليه رفضت يوم كان بيتقدم لها؟ وليه خبت علي أنا؟ عجزت افهمك ياأمنيه!)

بعد ساعه جاء نواف...
دلال_وش أخبار سلطان؟
نواف_حالته مستقره إن شاءالله تستمر كذا
دلال_إن شاء الله آآ نواف
نواف_ياعيونه
دلال_أبي اطلب منك شيء وياويلك تقول لا
نواف يبتسم_أبي افهم هذا طلب ولا تهديد عموما أنت تآمرين
دلال_تسلم حبيبي
نواف_عشان هالكلمه اعتبريني موافق
دلال_وش دعوه نواف اللي يسمعك يقول ماعمري قلتها لك!
نواف_لا بس لك ثلاث أيام ماقلتيها
ضحكت دلال_أنت تعدهم
نواف_لا أحس فيهم
دلال تبتسم_زين اسمع فيه أحد يبي يزور سلطان اليوم بدون موعد الزياره
نواف بإستغراب_ليه بدون الموعد
دلال_عشان ما أحد يشوفها
نواف_يشوفها!! هي وحده؟
دلال_إيه
نواف_مين؟
دلال_أمنيه
نواف_أمنيه! ليه بتزوره؟ وش دخلها فيه؟
دلال_طلعت للحين تحبه وأول ماعرفت انهارت وخافت عليه نواف أمنيه مالها غير سلطان وهي عارفه هالشيء لكن توها تعترف
نواف تذكر سلطان_هو بعد يحبها
دلال_يعني موافق
نواف_وأنا اقدر أقولك لا والله يستر
دلال تضمه_ياعمري عرفت إنك بتساعدنا بأروح أكلمها
نواف_كيف بتجي للمستشفى؟
دلال_أنا وأنت بنمر عليها

وبعد ساعه كانوا في المستشفى دلال وأمنيه واقفين عند باب العنايه المركزه وأمنيه ماسكه يد دلال بقوه لأنها خايفه من اللي بتشوفه.. دخل نواف قبل يتطمن على حالة سلطان إذا كانت تسمح وشافه للحين مستقر طلع وقال لأمنيه تدخل...
دلال_وش أخباره؟
نواف_الحمدلله
دلال_ليه ماخليتني أدخل معها؟
نواف_مو مسموح إلا لشخص واحد ليه أنت تخافين تنهار؟
دلال_لا أمنيه قويه بتمسك نفسها
وفي الداخل كانت أمنيه تتقدم من سرير سلطان وعيونها عليه وعلى الأجهزه اللي حواليه.. شافته متمدد على السرير بهدؤ مخيف أغلب جسمه ملفوف.. وفيه جروح وكدمات في وجهه كانت بتصرخ ماتخيلت حالته بهالسوء..بدت دموعها تنزل بصمت مدت يدها المرتجفه وحطتها على يده تبي تلمسه تبي تحس بدفاه.. تحس إنه حي...
أمنيه_سلطان سلطان أنا آسفه إني رفضتك كنت أنانيه مارضيت أكون الثانيه بحياتك كنت أتمنى تكون لي لحالي كنت أتمنى تحبني مثل ما أنا أحبك لكني ندمت مو مهم تحبني المهم إني أكون معك المهم أشوفك واسمعك واهتم فيك.. سلطان أنا ماعرف اعيش بدونك أنت ابوي وامي وأهلي كلهم..سلطان لا تخليني وتروح لاتحبني ولاتفكر فيني بس خلك في نفس الدنيا اللي أنا عايشه فيها.. أنت عمري ياسلطان لو فكرت تموت اعرف إني مت معك

جت بتطلع لكنه مسك يدها شهقت أمنيه مو مصدقه والتفتت له تتأكد لكنه كان مغمض عيونه وعلى حاله عرفت إنها تتخيل لكنها حست بيده اللي للحين ماسكه يدها جمدت مكانها مو عارفه وش تسوي معقوله صحى!معقوله حس فيها وسمع اللي قالت! ماكانت تبيه يسمع اللي قالته...
سلطان بتعب_أمنيه أنت هنا؟ هذا صوتك؟ أخاف افتح عيوني يطلع حلم

لكنه فتح عيونه وشافها صح إنه ماشاف إلا عيونها لكنه عرفها مع إن عيونها كانت غرقانه دمع الدمع اللي ما بحياته شافه فيهن لكنها اللحين تصيح وعشانه هو، حس إنه عذبها عذب أهم إنسانه في حياته...
سلطان_مابحياتي تخيلت إني بأشوف دموعك علي مع إني تمنيت أشوفها يوم فراقنا عشان أعرف إني كنت أعني لك شيء واليوم أشوفها تنزل بسببي ياليتني مت ولا شفتها
أمنيه_سلطان لا تقول كذا أنت لازم تتحسن
سلطان_دائما الظروف واقفه ضدنا مالي حظ معك ياأمنيه كنت لي وضيعتك
كان يطالعها يبي يشبع منها..من صوتها..من وجودها قبل ينحرم منها ومايهمه بعد كذا لو مات دامه انحرم منها للأبد ودامها صارت لواحد ثاني فجأه طراله فواز واستغرب كيف أمنيه زارته وهي متزوجه! وليه تعترف بحبها اللحين...
سلطان_أمنيه كيف جيتي وفواز...؟
مجرد ذكر اسمه خلى الجروح تزيد عليه وتنهي سحر اللحظه اللي كان عايش فيها...
أمنيه بإستغراب_فواز!!!
سلطان بحزن_لا تخبين علي ياأمنيه أنا شفت أبوياسر مع فواز بزواج عمر وقالوا إنه نسيبه
أمنيه صدمتها الفكره سلطان يحسبها تزوجت فواز!...
أمنيه_أنا ماتزوجت ياسلطان.. فواز زوج سندس
للحظه حس إن قلبه وقف من اللي سمعه ماقدر يستوعب طالعها بحب وشوق وفرح لين نزلت دموعه.. لكنها فجأه سمعت صوت الجهاز يزيد وشافته سكر عيونه خافت توها تحس في نفسها إنها جلست تكلمه ونست حالته ركضت برى الغرفه لنواف ودلال اللي كانوا متوترين من تأخرها...
أمنيه تصارخ_سلطان مادري وش فيه؟
دخل نواف بسرعه أما أمنيه فضمت دلال وهي تصيح خافت عليه وحست إنها السبب لو صار له شيء وهي تشوف الدكتور والممرضه يدخلون عليه...
دلال بخوف_أمنيه وش فيه سلطان وش صار له؟
أمنيه_صحى وكلمني
دلال بفرح_صحى!!
أمنيه_إيه لكنه فقد الوعي مره ثانيه أنا السبب أنا السبب
دلال بخوف_ليه وش صار؟
أمنيه_كان يحسب إني أنا اللي تزوجت فواز صدمتني الفكره قلت له إنها سندس مو أنا فجأه فقد الوعي وارتفع صوت الجهاز دلال أنا....
لكنها ماكملت كلامها بعد ماشافوا نواف يطلع لهم...
دلال_وش فيه؟
نواف يبتسم_الحمدلله فاق من الغيبوبه هذا أهم شيء كنا خايفين لاتكون غيبوبه دائمه
دلال_لكن أمنيه تقول إنه فقد الوعي مره ثانيه
نواف_لا تخافين مجرد انفعال بس عشان جسمه ضعيف ماتحمل أهم شيء يرتاح اللحين
دلال_يعني تعافى؟ سلطان رجع لنا
وضمت أمنيه وصاروا يصيحون
نواف_يله لازم نروح اللحين يكفي المشاكل اللي سويتوها لي يوم شافكم الدكتور

ورجعت أمنيه للبيت وهي مرتاحه إنه تحسن بس للحين خايفه عليه ماتخيلت تشوف سلطان في هالحال وخايفه أكثر من كلامها اللي سمعه(عرف إني أحبه، لكن هو كان كلامه ونظرته فيهن شيء عجزت افهمه؟ كأنه يحبني أو أنا اللي اتمنى هالشيء وأتخيله لكنه قام على صوتي! بس لميس للحين في قلبه أو نساها؟ وكل هالحال اللي هو فيه من يوم فراقها، وش سببه لو ماكان يحبها؟؟ أجل أنا إيش بالنسبه له؟ ليه قال لي هالكلام! عجزت افهم!)


بعد أسبوع من اللي صار كانوا قد نقلوا سلطان لغرفه عاديه كانت دلال كل يوم تنقل أخباره لأمنيه لكنها ماسألتها السؤال اللي محيرها ليه أمنيه رفضت سلطان دامها تحبه لهالدرجه بس الظروف ماكانت مناسبه،، وفي يوم قبل ماتجي خالته تزوره انتهز سلطان فرصة إنه لحاله مع دلال واللي في هالأسبوع ماشافها زين...
سلطان_دلال
دلال_نعم
سلطان_أمنيه وش أخبارها؟
دلال_الحمدلله ودائم تسأل عنك
سلطان_تحبني؟ أنا متأكد إنها تحبني اللي أبي اعرفه ليه ماوافقت ترجع لي؟!
دلال_وأنا بعد نفسي اعرف بس ماكان الوقت مناسب اسأل
سلطان_دلال أنا مليت وأنا انتظر أوقات مناسبه اليوم تسألينها بكره إذا جيتي يكون معك شيء يريحني
دلال_إن شاءالله بس ارتاح أنت للحين تعبان
ودخلت عليهم خالتها وبناتها وبعد ربع ساعه جت أمها وجلست دلال معهم شوي بعدين دق عليها نواف وسلمت عليهم وطلعت ولحقتها نور...
نور_دلال دلال
دلال_نعم
نور_أبي اكلمك بموضوع مهم
دلال بإستغراب_وش هالموضوع؟
نور_تعالي بالإستراحه أقول لك
دلال_زين انتظري هذا نواف جاء بأقوله إني بتأخر شوي
راحت دلال وقالت لنواف ينتظرها ودخلت لنور اللي قالت لها كل شيء...
دلال_لميس!! كيف عرفت إن سلطان يحب أمنيه؟ و وين شافتها؟
نور_المهم وش قالت لها
دلال_عشان كذا أمنيه رفضت
نور_أمنيه رفضت سلطان!
دلال_إيه بس أنا بأشوف وش سالفتها مع لميس أكيد هالرفض بسبب اللي قالته
نور_دلال سلطان لا يدري إن نجلاء تعرف أخاف يزعل منها
دلال_ولايهمك ماراح يعرف
نور_ونجلاء لاتدري إني قلت لك
دلال_خلاص يانور لاتخافين مع إني مو مصدقه إن نجلاء تسوي كذا!!
نور_عشانها ماتحب أمنيه
دلال-الله يسامحها


في بيت أبو ياسر//كانت أمنيه في غرفتها وسمعت أحد يطق عليها الباب ثم رأس سيف يطل...
سيف_أمنيه جبت لك معي وحده تحبينها بالحيل
ضحكت له أمنيه وهو فتح الباب ودخلت دلال تفاجأت امنيه يوم شافتها وتأكدت إن سلطان تحسن ولا كان ما زارتها دلال سلمت عليها...
أمنيه_وش أخبارك؟
دلال_اخباري أنا أو....؟
أمنيه_كلكم
دلال_أخباري أنا تمام واخبار سلطان يسأل عنك
أمنيه بإرتباك_أنا كنت اسأل عن صحته
دلال_أمنيه لميس وش قالت لك؟
أمنيه تفاجأت_لميس!!
دلال_إيه لميس وش قالت يخليك ترفضين سلطان؟ كذا ياأمنيه تخبين علي كل هذا!!مايكفي إنك خبيتي علي حبك لسلطان!
أمنيه_كيف عرفتي؟
دلال_مو مهم
قالت أمنيه لدلال اللي صار واللي قالته لميس وخلاها ترفض سلطان...
دلال_ما أصدق كل هذا تسويه لميس!!
أمنيه_ليه مو هذا اللي صار؟
دلال بعصبيه_طبعا لا! سلطان من يوم شافك مره ثانيه وهو عرف إنه يحبك ولا يقدر ينساك أصلا هو من يوم طلقك وهو مو مرتاح.. وكلم لميس وقال لها إنه بيفسخ الخطبه لكنها قالت له ينتظر لين زواج بنت خالتها ووافق عشان مايحرجها مع الناس مادرى إنها طلبت هالفرصه عشان تفرق بينكم

انصدمت أمنيه من اللي سمعته ماهمها اللي سوته لميس المهم إن سلطان يحبها سلطان يترك لميس بعد كل هذا عشانها حست إنها بحلم وخافت تصحى منه معقوله حياتها بتضحك لها أخيرا وترجع للإنسان الوحيد اللي حبته من كل قلبها وللناس اللي تحسهم مثل أهلها، دلال شافتها في عالم ثاني واتركتها تستوعب اللي سمعته وهي فرحانه إن أمنيه بترجع من جديد لحياتهم وتعرف إن أهلها بعد بيفرحون برجعتها...
دلال_أمنيه أنا قلت لأم ياسر إني جايه اخطبك وهي موافقه أنت وش رأيك؟
أمنيه_المهم سلطان يقوم بالسلامه
دلال_عشان يقوم بالسلامه ضروري يسمع خبر يفرحه
أمنيه_أنتم أهلي يادلال تشاوريني إذا كنت أبي ارجع لأهلي!
دلال فرحت وضمتها بقوه...
دلال_مو مصدقه إنك رجعت بيننا!
راحت دلال وأمنيه للحين تحس إنها طايره من الفرحه(سلطان يحبني! كان يحبني كنت احس بهالشيء بس ماقدرت اصدق هالإحساس! معقوله بيجي اليوم اللي اكون فيه معك مره ثانيه واسمع منك كلمة أحبك! يارب تقومه بالسلامه يارب أنا مالي غيره تعبت اعيش بدونه)
بعد ماطلعت دلال من عند أمنيه اتصلت على سلطان ماكانت قادره تصبر و تبي تفرحه..
سلطان-هلا دلوله
دلال-مبروك
سلطان و قلبه يدق بقوه-على
دلال-على ايش يعني؟؟
سلطان يصارخ-وااافقت؟؟
دلال-ايه بس تقول يشد حيله ويقوم بالسلامه
سلطان يتذكر-ليه رفضت قبل؟لايكون وافقت عشان حالتي؟؟
دلال-بتذبحني أنت! مو تقول عرفت بنفسك انها تحبك
سلطان-ايه بس أبي اعرف ليه رفضت من قبل؟
دلال قالت له اللي سوت لميس بس بدون ماتذكر نجلاء..
سلطان-معقوله لميس تسوي كذا؟
دلال-صح اللي سوته غلط بس معذوره فيه
سلطان-هي قالت انها ماراح تسامحني أبدا بس ماتخيلت انها تفكر بهالأفكار!
دلال-الله يسامحها المهم رجعتك لأمنيه هاذي تسوى الدنيا
سكرت دلال و سلطان يحس ان الدنيا مو شايلته من الفرحه نسى لميس واللي سوته لأنها ماصارت تهمه لا من قريب ولا من بعيد..كل تفكيره و احساسه كان لشيء واحد..أمنيه..(ياااه يا أمنيه أخيرا..و هالمره أوعدك بتكون حياتنا غير..نفسي أقولك الكلمه اللي ضاق بها صدري كل هالشهور..أبي أقول اني أحبك..ياقربك يا أمنيه و يابعدك بنفس الوقت)

 

[meen_ana]

::الجزء الرابع والثلاثون::




في بيت أم خالد في الليل// جاء نواف من المستشفى وشاف أمه ودلال في الصاله دخل وسلم عليهم وجلس لكن دلال انتبهت إن ملامحه متغيره وخافت يكون سلطان فيه شيء...
دلال_نواف وش فيك؟
نواف_الأشعه اللي أخذناها لرجل سلطان
دلال بخوف_وش فيها؟!
نواف_الكسور ماكانت سطحيه مثل ماتوقعنا وو...
دلال_و ايش كمل يانواف
نواف_الأعصاب تأثرت
دلال تصيح_يعني ماراح يمشي مره ثانيه!!
نواف_يادلال اهدي أنا توي ماكملت كلامي سلطان ضروري يسافر عشان يسوي عمليه ومع العلاج الطبيعي كلها كم شهر ويرجع مثل أول
دلال_والعمليه نجاحها مضمون؟ وليه مايسويها هنا؟
نواف_مضمونه إن شاءالله أنا اعرف دكتور متخصص في الأعصاب وكلمته وبعد هناك بيآخذ العلاج الطبيعي
دلال_وأبوي عرف؟
نواف_إيه رحت وقلت له
دلال_وسلطان؟
نواف_بكره بأقول له
دلال_ومتى بيسافر؟
نواف_ننتظر لين يتحسن شوي
دلال سرحت في أمنيه ماتدري وش تقول لها اليوم فرحتها وبكره تجيها بهالخبر...


في المستشفى//جاء نواف وأبوسلطان لسلطان وقالوا له عن حالته وعن العمليه والسفر لكن سلطان ماهتم لكل هذا كان باله في أمنيه اللي يعد الأيام عشان ترجع له اللحين بيأخره كل هذا عنها كل هذا بيعيشه بدونها...
نواف_سلطان وش فيك ساكت؟
سلطان يتنهد_يصير خير مو تقول تونا على السفر
نواف_بس لازم آخذ موافقتك عشان أرسل اوراقك ونحجز موعد للعمليه
سلطان_خلاص يانواف جهز اللي تبي ومشكور تعبتك معي
نواف_لاتقول كذا ياسلطان أنت أخوي
تركهم نواف وراح يشوف شغله...
أبوسلطان_سلطان وش فيك؟
سلطان بدون مقدمات_يبه أنا ابرجع أمنيه
أبوسلطان طالعه بإستغراب_أمنيه!!
سلطان_إيه
أبوسلطان بفرحه_زين ماتسوي والله أمنيه مثل بنتي وكنت زعلان على اللي صار بينكم بس إن شاءالله ترضى
سلطان_راضيه دلال سألتها
أبوسلطان_الله يكتب اللي فيه الخير بس أنت ترجع بالسلامه
سلطان_تبيني اصبر لين ارجع
أبوسلطان_أجل تبينا نخطب لك وأنت في المستشفى ما يصير ياولدي
سلطان-بأرجعها أول ثم أسافر
أبوسلطان-مو وقته ياسلطان
سلطان-ماراح أسافر لين أملك عليها..لين تصير زوجتي


في بيت أبوياسر//جت دلال لأمنيه لأنها ماحبت تقول لها عن حالة سلطان بالتليفون وجاء معها أبوها اللي أصر عليه سلطان يروح يكلم أبوياسر واتفقوا بكره يروحون يكتبون كتابهم والزواج بعد مايرجع من السفر،،
دخلت دلال عند أمنيه في غرفتها وبعد ماسلمت عليها سألت أمنيه السؤال المتوقع...
أمنيه_وش أخبار سلطان؟
دلال_أمنيه سلطان بيسوي عمليه
أمنيه تشهق_عمليه!! ليه؟
دلال_الأعصاب في رجله متضرره
أمنيه_والعمليه بسيطه؟ مضمونه؟
دلال_إن شاءالله بس سلطان بيسويها برى مو هنا
دمعت عيون أمنيه بدموع رفضت إنهن ينزلن...
أمنيه_كل هذا يصير فيه وأنا بعيده عنه ياليتني جنبه
دلال_كلها شهور بتمر بسرعه وإن شاءالله....
قاطعتها أمنيه_شهوووور!!!
دلال_إيه لأنه يحتاج لعلاج طبيعي بعد العمليه وهذا يأخذ وقت لين يرجع يمشي مثل أول
أمنيه بحزن_كنت أعد الأيام عشان اشوفه وأحس إنهن سنين اللحين شهور! كيف بتمر علي؟
دلال_أمنيه لاتفكرين بهذا فكري إنك أنت وسلطان بترجعون مع بعض مره ثانيه وهذا الأهم حتى أنا جايه مع أبوي ودخل يكلم أبوياسر سلطان أصر انكم تملكون قبل يسافر و إذا رجع نسوي لكم زواج لا صار ولاإستوى
أمنيه_مابي زواج أبي أسافر معه
دلال_مايصير ياأمنيه سلطان يبي يسوي لك كل اللي ماسواه قبل..يبي تعيشون الفرحه اللي ماعشتوها ويعوضك عن كل شيء
أمنيه_كل هذا مايهمني المهم عندي سلطان أبي أكون معه تكفين يادلال
دلال_حتى لو ماهمك كل هذا سلطان بيكون كل وقته في المستشفى ونواف بيروح معه يعني ماله داعي تسافرين وين بتجلسين؟
سكتت أمنيه شوي_صح المهم صحة سلطان وسلامته وأنا وش لي غير الصبر
راحت دلال وأمنيه اطلقت سراح الدموع اللي حبستها...


في بيت أبوسلطان//رجعت أم ندى وبناتها من زيارة سلطان مع أم سلطان لأنها عزمتهم ..وبعد ساعه جت دلال وسلمت عليهم...
دلال_خالتي سلطان رجع أمنيه
أم ندى_وشو! ليش قلة بنات اللحين يترك لميس ويرجع هال....
دلال تقاطعها_خالتي سلطان يبي أمنيه وإذا رجع من السفر بالسلامه بنسوي الزواج
نجلاء_وهي وافقت؟
دلال تطالعها بشرهه_إيه وافقت
نجلاء عصبت_وافقت! صدق ناس ماعندها كرامه وذابحها الطمع
أم سلطان_ماله داعي هالكلام يانجلاء أمنيه بتصير مرة اخوك احترميها من احترامنا
أم ندى_هذا أولها ياأم سلطان تهاوشين بنتي عشان هاللي ماتسوى كنا مرتاحين وش رجعها لنا؟
دلال_خالتي أمي ماقالت شيء إذا كنتم مو حابين أمنيه على الأقل احترموها عشان سلطان
أم ندى_تخسى هالأشكال احترمها! هاذي أكيد ساحره سلطان ولا أحد يفتك من هالفقر ويرجع لها وأنت على طول وافقت؟
أم سلطان_اذكري الله ياأم ندى وش هالكلام؟!
نجلاء_أمي صادقه ودام هاذي بتدخل بيتكم حنا مالنا جلسه هنا يله يمه
وراحت أم ندى وبناتها ودلال وأمها مستغربين من ردة فعلهم القويه...
دلال_حرام عليهم ليه يكرهون أمنيه لهالدرجه!
أم سلطان بحزن_تعرفين خالتك طول عمرها ماتحب تعاشر اللي على قولتها تحت مستواها كيف اللحين تبينها ترضى لسلطان ولدها بزوجه منهم
دلال-يعني بنقاطع بعض؟؟
أم سلطان-الله يهديهم ان شاءالله


بعد أسبوع.. يوم سفر سلطان في بيت أم خالد//
أم خالد_يله نواف ما تأخرت على سلطان
نواف_وش دعوه الوالده تبي تفتك مني!
أم خالد_لا والله لو مو سلطان كان ماخليتك تسافر وتتركنا وأنت توك عريس
نواف_والله يمه حتى أنا مو هاين علي اترككم لحالكم
أم خالد_أبوسلطان مايقصر و عمتك وزوجها بعد.. إلا وين دلال؟
نواف_مادري قالت بتلحقني بأروح اشوفها
راح يشوفها في بيتهم ولقاها جالسه على السرير لابسه عبايتها ويوم حست فيه مسحت دموعها جاء عندها وباسها على راسها وجلس جنبها...
نواف_دلال لاتخافين سلطان بيكون بخير
دلال_إن شاءالله بس هالدموع مو عشان سلطان
نواف استوعب_عشاني؟!
دلال_نواف بأروح معكم
نواف_مايصير ياعمري وإلا أنا يعني اللي أبي اتركك؟
دلال_نواف انتبه على نفسك وانتبه على سلطان وماله داعي كل ماشفت وحده من زميلات الجامعه تسلم عليها
نواف يضحك_والله إنك رايقه وأنا اقول ماتبي فراقي وانت هذا اللي هامك!
دلال_نواف
نواف_ياقلب نواف
دلال_والله إني أحبك
ضمها نواف بقوه وهو يقول...
نواف_وأنت كل شيء لي فهالدنيا الله يخليك لي يادلال
وصلهم صوت أم خالد تنادي عليهم وتذكر نواف إنه تأخر...
نواف_يله حبيبتي تأخرنا تلقين أهلك اللحين وصلوا المستشفى
وراحت دلال و نواف للمستشفى وشافوا هناك أم سلطان وأبوه وجدته وخالته الكل جاء عشان يسلم عليه لأنه بيسافر من المستشفى لكن سلطان كان كل تفكيره مع وحده ثانيه تمنى إنها موجوده معهم.. هي زوجته ليه مايخلونه يشوفها.. اللي يقول مو وقته واللي يقول لاحق عليها تشبع منها واللي يقول الناس ماعرفت إنك رجعتها للحين.. لكن هو ماهتم لكل هذا كان نفسه يشوفها لو دقيقه...

 

[meen_ana]

في بيت أبوياسر//كانت أمنيه مثل حالة سلطان مو مقتنعه بالكلام اللي قالوه وكان نفسها تسافر معه ومن الصبح ماطلعت من غرفتها ولا شافت أحد..لكنها فجأه دخلت على سندس غرفتها...
سندس_أمنيه!
أمنيه والدموع ماليه وجهها_سندس تكفين أبي أروح المطار
سندس_المطار! ليييه؟
أمنيه_أبي اشوف سلطان قبل يسافر بأموت لو ماشفته
سندس_لكن أهلي قالوا....
قاطعتها أمنيه_ما أحد بيعرف دلال قالت إن مافيه أحد منهم بيروح معه للمطار بيودعونه من المستشفى
سندس منصدمه_زين كيف نروح؟
أمنيه_اتصلي على دانه خليها تجي بالسواق ونروح معها أكيد هي بتعرف أي بوابه رحلة سلطان
سندس وافقت يوم شافت أمنيه بهالحاله,,وأصلا أمنيه ماعطتها فرصه تفكر أو ترفض.. واستغربت كيف غيرها سلطان وحبها له..ولا مين يصدق إن أمنيه البارده واللي ماتهتم لشيء تفكر بهالفكره المجنونه...


في المطار// كان سلطان على الكرسي المتحرك ينتظر نواف يخلص الأوراق ولابس نظاراته الشمسيه تغطي الحزن والألم اللي في عيونه كان يتمنى لو إن الوقت مر واللحين هو راجع وخلاص بيشوفها و وصله صوتها تناديه وابتسم للصوت اللي يحسبه من خياله لكنه انصدم يوم شافها واقفه قدامه...
سلطان_أمنييييه!!
جلست على الكرسي اللي جنبه_سلطان ماقدرت لازم أشوفك قبل تروح
سلطان وهو مو مصدق إنها قدامه_أمنيه أنا أحبك أنت الوحيده اللي حبيتها فكل حياتي أنت دائما معي حتى لو كنت بعيده..أنا رايح بس آخذك بقلبي وتفكيري من زمان كنت أبي اشوفك واقول لك كل اللي احس فيه لكن الظروف وقفت بيننا..أنا راجع لك ياأمنيه وبتصير حياتنا غير..بأعوضك كل اللي سويته فيك انتظريني وفكري بالأيام اللي بنعيشها فكري بسعادتنا وبحبنا لاتفكرين بأي شيء ثاني ولا تزعلين أو تتضايقين عشاني..ياعمري مابي اشوف هالدموع مره ثانيه
أمنيه كانت سرحانه فيه وبكلامه لأنها مشتاقه له بالحيل..كان نفسها الدنيا توقف على هاللحظه ماصدقت إنها مع سلطان وتسمع منه هالكلام حست إن قلبها بيطلع له من صدرها مدت له يدها وتمسك فيها بيديه بكل قوه وكأنهن أغلى شيء يملكه فهالدنيا...
أمنيه_سلطان اوعدني تهتم بنفسك وترجع قريب أنا من اللحظه هاذي انتظرك
سلطان_أمنيه أناااا
قاطعهم نواف اللي استغرب من وجود أمنيه...
نواف_سلطان لازم نمشي اللحين
سلطان وعيونه على أمنيه_انتظر شوي
نواف_سلطان الطياره....
قاطعته أمنيه_خلاص ياسلطان أنا بعد لازم اروح
سلطان شد على يديها_أمنيه مابي اعرف إنك مضايقه نفسك أو مو مهتمه بصحتك وتأكدي إنك في بالي بكل لحظه
أمنيه_ترجعلي بالسلامه ياسلطان
سلطان وهو يترك يدها_اشوفك على خير
أمنيه توقف_مع السلامه
سلطان_بحفظ الله
أخذه نواف وراقبتهم يبتعدون وقبل مايختفي عنها لف لها سلطان وودعها من بعيد ورفعت يدها تودعه بعدها اختفى في زحمة الناس وماصارت تشوف إلا دموعها اللي ملت عيونها، جت عندها سندس ودانه اللي كانوا يراقبون من بعيد...
دانه_يرجع لك بالسلامه إن شاءالله
سندس_يله ياأمنيه خلينا نرجع تأخرنا

 

[meen_ana]

::الجزء الخامس والثلاثون::




مرت ثلاث شهور على سفر سلطان..ونواف مارضى يترك سلطان مع إن أصدقاء سلطان عرضوا عليه يكملون معه لكنه ماارتاح يتركه لحاله..و لأن هالسفره قربت بينه وبين سلطان كثير لين صار يحسه أخو وأعز صديق ولأنه يعرف إن دلال وأهل سلطان متطمنين عليه وهو معه وبعد كانوا يدقون عليه عشان يطمنهم عن حالة وصحته لأن سلطان ما كان أغلب الوقت يقدر يكلم يايكون في العلاج يا تعبان بعده و يرتاح خاصه إنه يجهد نفسه كثير عشان يرجع يمشي بسرعه وهالشيء اللي كان دائما يختلف مع نواف بسببه لأنه بكذا يمكن يضر نفسه ولايستفيد وكل شيء لازم يأخذ وقته لكن هالوقت طال على سلطان وصار مايتحمله،..أما دلال فأشغلت نفسها وأمنيه بتجهيز أمنيه وبيتها بعد ماوصاها سلطان اللي قرر إنه بعد مايرجع بأسبوع بيكون الزواج عشان كذا يبي كل شيء جاهز وماكان باقي عليه من أيام العلاج إلا شهر واحد كان يعده بالثواني متى يخلص...


في آخر يوم من الإمتحانات لسندس ودانه//
سندس_وهاذي السنه الثانيه وخلصناها
دانه_إيه بس فيه ناس بتتزوج آخر هالعطله وناس بتجلس مخطوبه سنتين ياحسره
سندس_اذكري الله
دانه تضحك_الله يوفقكم لاتخافين أنا فرحانه أكثر منك لأنك راح تجين عندي وبعدين فرصه أمل منك سنتين قبل اتزوج وأروح
سندس_ياالله ماأصدق إن زواج أمنيه بعد شهر
دانه_شكلك فرحانه لأمنيه أكثر من نفسك
سندس_إيه والله أمنيه مسكينه ماتهنت في حياتها وانحرمت من أهلها ومن العطف والحب عاشت طول عمرها غريبه لو شفتيها أول ماجتنا كانت إنسانه بدون روح ماتفرح ولا تزعل ولاتتكلم وطولت لين تعودت تعيش وسط عائله عشان كذا احس إنها تستاهل حب يعوضها عن كل هذا
دانه_إن شاءالله سلطان يعوضها عن كل شيء والله يديم الفرحه عليهم أمنيه تستاهل كل خير



مر الشهر على أمنيه وسندس ودلال وهم كل يومين في سوق أحيانا تروح معهم سندس وأحيانا دلال وأمنيه لحالهم وهالمره حست أمنيه بفرحة العروس اللي تتمنى تكون أحلى وحده في عيون زوجها واللي تعد الأيام عشان يوم زواجها اللي كل شيء فيه جاهز القاعه والناس انعزمت والعروس وفستانها وفرحتها كل شيء كامل ما ينقصه إلا وصول العريس اللي بيرجع بكره...

في بيت أم ياسر في الليل// رجعت دانه وأهلها من عند عمانها وراحت على طول لغرفة أمنيه تشوف وش جابت اليوم مع دلال وفتحت باب الغرفه...
سندس_أمووونه
لكنها انصدمت يوم شافت الغرفه فاضيه(وين أمنيه؟ معقوله راحت مع دلال؟بس الوقت متأخر!)
ونزلت لأمها...
سندس_يمه أمنيه مو في غرفتها
أم ياسر_وينها؟
سندس_شكلها عند دلال
أم ياسر_إلى هالوقت! اتصلي على دلال خليها تقول لها تجي
سندس_إن شاءالله
واتصلت سندس على دلال...
سندس_السلام عليكم
دلال_وعليكم السلام وينك فقدناك اليوم
سندس_ماتفقدين غالي أخباركم وش سويتوا بدوني؟
دلال_والله ماكملنا خالتي اتصلت وقالت إن البنات ارتفعت حرارتهم ورجعت آخذهم للمستشفى
سندس_عشان كذا راحت معك أمنيه
دلال بإستغراب_أمنيه ماراحت معي أنا نزلتها عند البيت
سندس تصرخ_وشووو؟!!
دلال_سندس وش فيك؟
سندس بخوف_دلال حنا رجعنا البيت مافيه أحد
دلال تشهق_بس أنا منزلتها من أربع ساعات
سندس_لاااا مو معقول! وين راحت؟؟
دلال_يمكن عند الجيران
سندس_تعرفين أمنيه مالها علاقه فيهم دلال بأسكر اللحين بأقول لأمي نشوف وين راحت
دلال_وقولي لي إذا عرفتوا وينها

وبعد ساعتين انتشر خبر إختفاء أمنيه وأبوياسر بلغ الشرطه...


في بيت أبوسلطان//كانت دلال وأم خالد والبنات عند أم سلطان خايفين وينتظرون أي خبر من أبوسلطان اللي من عرف وهو وأبوياسر في الشرطه حتى أم حمد كانت جايه عندهم عشان سلطان بيوصل بكره لكن هالفرحه ما كملت وإختفاء أمنيه هدم كل شيء...
دلال تصيح_وين رحتي ياأمنيه؟ أنا نزلتها عند الباب معقوله تكون طلعت مره ثانيه!
أم سلطان بخوف_إن شاءالله يلقونها قريب والله مادري وش يصير بسلطان إذا عرف
أم حمد_يارب تحفظها يارب..وترجعها سالمه


وصل الخبر لأهل فواز بعد ماتصلت سندس تسأل دانه يمكن تكون مرتها أو كلمتها لكن مافيه أحد شافها...

في بيت أبوياسر//دخل ياسر عند سندس وأمها في الصاله...
ياسر_سندس فواز هنا سأل عن أبوي وقلت له في الشرطه وقال لي أناديك
سندس تمسح دموعها_وينه؟
ياسر_في المجلس
راحت سندس للمجلس تشوفه حاولت تحبس دموعها لكنها يوم شافته نزلن دموعها أكثر من أول وركضت عنده وضمها...
فواز_لا تخافين ياسندس إن شاءالله مافيها إلا الخير
سندس_خايفه عليها يافواز ليه يصير فيها كذا؟ ليه ما تكمل لها فرحه؟ وينها فيه؟ وينها فيه؟
فواز يبعدها ويمسح دموعها_ادعيلها ياسندس هذا اللي يفيد وأنا بأكلم واحد اعرفه بالشرطه وإن شاءالله يساعدنا
سندس_الله يخليك يافواز اللي تقدر عليه سويه


في مزرعه بعيده بوسط غرفه مظلمه صحت أمنيه.. وهي تسمع أذان الفجر من مكان بعيد شافت نفسها طايحه على الأرض بعبايتها وأكياسها متناثره حواليها وبدت تتذكر اللي صار لها..تذكرت سالم يوم جت بتفتح باب البيت بعد ماتركتها دلال ناداها والتفتت يوم شافته وهو واضح إنه ماكان في وعيه خافت وحاولت تفتح الباب بسرعه لكن من خوفها طاح المفتاح في واحد من أكياسها ومادرت إلا وهو يسحبها مع يدها..انصدمت وانعقد لسانها حاولت تصرخ لكن صوتها ماطلع لأنه سد فمها بيده وسحبها لسيارته ..حاولت تفك نفسها لكن كان مستحيل لأنه حتى وهو مو في وعيه كان أضعاف حجمها وحطها في شنطة السياره وبعدها ماشافت إلا ظلام وحست بخوف لين بغى يوقف قلبها..بعدها ماقامت إلا اللحين وهي بهالغرفه اللي ماتدري هي بأي مكان لكن عرفت إنها بعيده عن الناس من صوت الأذان ومن صوت الكلاب اللي حواليها وفجأه جاء على بالها سالم(ليش سوى كذا؟؟ وش يبي مني!!) لكن الإجابه اللي وصلت لها خلتها تتمنى الموت على هالوضع اللي هي فيه صارت ترتجف بقوه..و دموعها تنزل من عيونها وقلبها بيوقف من من الخوف بدت تتلفت في الغرفه الفاضيه تدور شباك لكنها مالقت شيء وشافت الباب تفكيرها قال إنه أكيد مقفول لكن الأمل خلاها تقوم تفتحه ولقته مسكر ويوم تخيلت إنه بأي لحظه ممكن هالباب ينفتح ويدخل سالم جن جنونها وصارت تضرب الباب بكل قوتها وتصارخ بأعلى صوتها ولكن لاحياة لمن تنادي صوتها ماوصل لأي إنسان ويوم تعبت وفقدت قوتها..وفقدت الأمل..بدت بصياح و صراخ هستيري...


في بيت سلمان صديق سالم//بعد مافتح الباب وشافه...
سلمان عصب_سالم! كم مره قلتلك لاتجي لبيتي؟ لا وسكران بعد!!
سالم_خلاص بأروح بس جيت أقول لك إني أبي أنام كم يوم في مزرعتك لاتخلي أحد يروح لها
سلمان_زين زين بس روح قبل يطلع أبوي ويشوفك
رجع سالم للمزرعه وهو يفكر بأمنيه اللي يبيها من زمان بس عيت تجي بالرضا وهذا هو جابها بالغصب (أنا افلس وأبوياسر يناسب هالأغنياء ويرفض يساعدني واللحين ماعندي اللي يجيبك ياأمنيه إلا هذا وإذا خسرت كل شي تخسرين معي ماأخسر لحالي) وكان يضحك من قلبه فرحان وماشاف السياره اللي طلعت في وجهه إلا متأخر وبسرعه لف عنها وانحرفت سيارته عن الطريق وانقلبت أكثر من مره قبل تستقر أخيرا ومامرت لحظات إلا وانفجرت وهو في داخلها...


في بيت أبوسلطان العصر// مرت الساعات عليهم طويله والحزن والخوف كل ساعه يزيد..ما أحد منهم ذاق النوم وكل تفكيرهم بأمنيه وش صار فيها لدرجة إنهم نسوا موعد طيارة نواف وسلطان اللي ماأستقبلهم إلا أم ندى وبناتها..استغرب سلطان إن أمه وأبوه ماأحد منهم جاء يستقبله سأل خالته وقالت إنها ماتدري عنهم ويوم جت بتتصل عليهم رفض سلطان وقال كلها ساعه ويوصلون ويشوف ليه ما أحد جاء وبينه وبين نفسه كان خايف إن جدته أو أبوه فيهم شيء أكيد هذا اللي ماخلاهم يجون ويوم دخل البيت هو وخالته وشافهم في الصاله والحزن ماليهم عرف إن شكوكه في محلها لكن أبوه وجدته كلهم فيه ولا عرف مين اللي صاير فيه شيء، أول ماشافوه يمشي قدامهم ركضوا له وسلموا عليه وصاحوا من الفرحه لكن نظرة الفرح اللي كانت في عيونهم كان معها نظره ثانيه مليانه حزن وخوف..خاف يسأل لكن خالته قامت بهالمهمه...
أم ندى_خير إن شاءالله وش فيكم؟وش صاير؟
الكل طالع سلطان بحزن..و ماقدروا يتكلمون...
ابوسلطان-امنيه
سلطان حس ان قلبه توقف للحظه وكل تركيزه على ابوه ينتظره يكمل وهو خايف من اللي بيسمعه كان بيسأله لكنه مالقى صوته...
ام ندى من غير نفس-خير ياأبوسلطان وش فيها؟
ابوسلطان-من امس وهي مختفيه وماأحد يعرف وين راحت؟
سلطان ماستوعب اللي سمعه-كيف يعني مختفيه؟يبه قول وش صار؟انا مو فاهم شيء!!
قال له ابوه اللي صار وبدأسلطان يستوعب ويحس بالخوف عليها...
سلطان بصوت عالي-يعني انخطفت؟؟ امنيه بخطر وماتقولون لي!!
جن جنونه وطلع من البيت بسرعه ولحقه ابوسلطان شافه نواف وناداه لكنه ما رد عليه وبعده طلع ابوسلطان...
ابوسلطان-سلطان انتظر وين رايح وانت ما معك سياره
سلطان يلتفت بيأس-وش انتظر يبه؟امنيه مخطوفه!امنيه مادري وش حالتها اللحين؟ لازم القاها لازم
نواف ماصدق اللي يسمعه وعرف السبب اللي ماخلاهم يجون المطار والسبب اللي خلى دلال من امس ماتكلمه...
ابوسلطان-وين بتروح؟؟
سلطان-لبيت ابوياسر مو تقولون مخطوفه من هناك لازم اعرف مين اللي اخذها
ابوسلطان-انا بأروح معك
نواف-وانا جاي معكم

 

[meen_ana]

وصلوا لحارة ابوياسر وشافوه هو وفواز واقفين بيأس...
ابوياسر-سلطان!!!
سلطان بدون مايسلم عليه_وش صار عرفتوا شيء؟
فواز-الشرطه توها رايحه وحققت مع الجيران بس ما أحد شاف شيء
سلطان حس ان الدنيا اسودت في عيونه ليه يصير مع امنيه كذا وماقدر يتخيل حالتها اللي هي فيها وخاف يفكر باللي ممكن يصير لها...


في المزرعه\\صحت امنيه وشافت حواليها الظلام كانت مرهقه من الصياح والجوع والخوف قامت تمشي وتتلمس الجدران تدور مفتاح اللمبات يمكن احد يشوف النور ويجيها واخيرا لقته جنب الباب وشغلته ونور المكان وشافت سجنها اللي هي فيه كان فاضي مافيه اي شيء الا هي واغراضها وفرحتها اللي منثوره على الارض قدامها وتذكرت سلطان (سلطان!! اليوم يجي من السفر..لو صار لي شيء كيف بأقدر اشوفه؟ يارب يارب ارحمني يارب حسبي الله عليك ياسالم) وعلى طاريه ابعدت عن الباب وهي تتخيل انه بيدخل عليها اللحين صارت تتلفت في الغرفه تدور يمكن تلقى شيء تقدر تدافع فيه عن نفسها لكنها ماشافت شيء بس لقت قارورة مويه كانت مرميه تحت ملابس مجموعه في الزاويه وشربت منها شوي مع انها كانت عطشانه بس خلت الباقي لانها ماتدري الى متى بتجلس بهالمكان مع انها تمنت الموت قبل ماتشوف سالم يدخل مع هالباب..لكنها خافت تفقد قوتها ولا تقوى حتى تدافع عن نفسها.. ورجع لها الخوف لين صارت ترتجف و رجلينها ماقدرت تشيلها.. جلست في الزاويه وضمت رجلينها لصدرها ورجعت تصيح..وهي تفكر باللي ناوي يسويه فيها سالم(سلطان..سلطااان..سامحني بأكون عار عليك وعلى اهلي يارب ساعدني يارب..أوعدك اني أدافع عن نفسي لآخر نفس فيني..و أتمنى لو ماقدرت اني ما أرجع لك أبدا)


في بيت ابوياسر في الليل\\جلس سلطان على درج المدخل في الحوش بعد ماسأل الجيران مره ثانيه لو كانوا شافوا شيء او شاكين بشيء لكنه مالقى اي جواب حس انه مقيد..وفي داخله نار تقيد ماتكوي غيره.. امنيه في خطر وهو مو قادر يسوي شيء الا انه يجلس كذا وينتظر..تمنى لنفسه الموت لكن مايجيها شيء.. كره نفسه وكره عجزه حس ان كل دقيقه تمر عليه تذبحه وتبعده عن امنيه.. خاف يصير فيها شيء..خاف مايشوفها بعد هاليوم..خاف انها تتعذب اللحين وهو جالس كذا مايسوي أي شي..وصارت دموعه تنزل بدون انقطاع..حرقه قلبه عليها..وكل مايتذكر ملامحها يحس بطعنه في قلبه...ومن بعيد وقف نواف وفواز يطالعونه بحزن...
فواز-سلطان حالته صعبه ومو راضي يكلم احد ولا اكل علاجه ولا حتى شرب الماء
نواف-كان يعد الايام عشان يرجع لها انهك نفسه بالعلاج كل الدكاتره كانوا مستغربين من حماسه للعلاج وكل هذا عشان يرجع بسرعه وشوف وش صار الله يكون في عونه ويرجعها بالسلامه
تذكر نواف دلال اللي ماشافها وهو كان مشتاق لها بالحييل وقرر يدق عليها عشان بعد يتطمن على حالتها اكيد مثل سلطان لانه يعرف وش كثر امنيه غاليه عليها استأذن من فواز اللي قال له انه بيروح يحاول يخلي سلطان يأكل شيء ودق نواف على دلال...
دلال بصوت مبحوح-هلا
نواف-دلال
دلال اول ماسمعت صوته بدت تصيح بصوت عالي وهو قلبه تقطع عليها مو هاين عليها يخليها لحالها ومو قادر يخلي سلطان لحاله اللي رفض يتحرك من مكانه لين تطلع امنيه...
نواف-دلال اذكري الله لاتخوفيني عليك
دلال-بأموت يانواف انا السبب ماكان المفروض اخليها واروح
نواف-دلال لاتلومين نفسك اللي صار مكتوب وان شاءالله بترجع بالسلامه
دلال-يااارب بس متى؟ كل مايمر الوقت اخاف اكثر
نواف-دلال عشاني لاتسوين بنفسك كذا خليك قويه انا كل تفكيري معك بس مو قادر اترك سلطان لحاله
تذكرت دلال-سلطان! وش فيه؟؟
نواف-من العصر ماشرب حتى الماء ومارضى يأخذ علاجه وسرحان ومايتكلم وحالته تقطع القلب
دلال تصيح-ياعمري ياأخوي ماتهنى لاهو ولاهي امس الدنيا مو سايعتهم من الفرحه وشوف اليوم وش صار آه ياأمنيه وينك يارب يحفظك


رجع نواف لفواز ولا شاف سلطان في مكانه...
نواف_وين راح سلطان؟
فواز_الحمدلله سمع من أبوياسر ورضى يدخل للمجلس يأكله شيء
نواف_زين عشان يأخذ علاجه
فواز_تعال ندخل أبوياسر يقول كولوا معه يمكن يتشجع
ودخلوا وجلسوا يأكلون لكن سلطان ماآكل شيء وكان سرحان طول الوقت لين حس إنه مخنوق وطلع في الحاره يدور يحاول يمكن يلقى شيء يساعده بس بدون فائده،،

في المجلس...
أبوياسر_تأخر الوقت لازم تنامون وبأحاول في سلطان يمكن ينام بأقول للأهل يجهزون لكم مكان
نواف_لا مشكور ياأبوياسر أنا لازم أروح ماشفت أهلي أمي توها متصله تناديني واجيكم بكره
أبوياسر_على راحتك وأنت يافواز؟
فواز_حتى أنا لازم اروح
وراح فواز ونواف وأبوياسر أصر على سلطان يدخل ينام ورضى لكنه ماغمض له جفن وأفكاره كل مايمر الوقت تصير أسوأ...


في سيارة فواز// دق على سندس يتطمن عليها...
سندس_هلا
فواز_هلا قلبي وش أخبارك؟
سندس_آه يافواز..كل مايمر الوقت أخاف زياده
فواز_إن شاءالله خير
سندس_شكلك في السياره؟
فواز_إيه رجعت للبيت وبكره أجي بس عشاني حبيبتي حاولي تأكلين شيء عارف إنك ماأكلتي شيء
سندس_ومن له نفس
فواز_بس كذا ماراح تستفيدين شيء وبتتعبين وأنت المفروض تقوين أهلك مو تزيدينهم
سندس_صادق أمي توها ماقدرت تمشي خطوتين
فواز_شفتي روحي جهزي لكم أكل وحاولي تخلينها تنام وأنت بعد ارتاحي
سندس_إن شاءالله
فواز_توعديني
سندس_أوعدك احاول
فواز_زين عمري تصبحين على خير وإذا صار أي شيء دقي علي ماراح أسكر جوالي
سندس_إن شاءالله وتلقى خير



في بيت أم خالد الصبح//صحى نواف وهو ميت من التعب ويحس برأسه بينفجر كان بيرجع ينام لكنه تذكر اللي صار وقام(لازم اروح لسلطان بس قبل بأمر بيت عمي أبي اشوف دلال واتطمن عليها)

وصل نواف لبيت أبوسلطان ولقى الكل نايم بس الخدامه قالت له إن دلال في الصاله ودخل يشوفها..لكنه لقاها نايمه على الكنب جلس على الأرض جنبها ورفع الخصل اللي نازله من شعرها على وجهها كان مشتاق يضمها ويتكلم معها لكن من شكلها باين إنها ياله نامت وخاف يزعجها أهم شيء عنده راحتها باسها على خدها وقام وقال للخدامه تجيب له غطاء وغطاها وقال لها ماأحد يصحيها ويخلونها ترتاح شافها لآخر مره وراح، بعد دقيقه حست دلال بالغطاء اللي عليها وشمت ريحة عطر نواف تلفتت في الغرفه لكنها مالقت أحد(هذا نواف أكيد هنا)
وطلعت لكنها شافت البيت فاضي سمعت صوت في المطبخ وراحت تركض لكن يوم دخلته ماشافت إلا الخدامه...
دلال_نواف كان هنا؟
الخدامه_إيه
دلال تعصب_ليه ماأحد صحاني؟
الخدامه_قال نخليك ترتاحين
دلال_متى راح؟
الخدامه_ماكمل خمس دقايق
انقهرت دلال كانت تبي تشوفه ويجي لين عندها ويروح وهي ماشافته وصاحت ماتدري من شوقها لنواف وإلا على الحال اللي هم فيها..(الله يردك يا أمنيه و بعدها كل شيء يهون)


في بيت أبوياسر الظهر// صحى سلطان اللي مانام إلا الصبح وراح بسرعه للمجلس وشاف نواف وفواز وأبوياسر وأبوه...
سلطان_ليه ماصحيتوني؟
أبوياسر_وين نصحيك! أنت كل اللي نمتهن أربع ساعات
سلطان_صار شيء؟
أبوسلطان_مالقوها في المستشفيات
سلطان_ابروح للشرطه
فواز_أنا جاي معك عشان نكلم أبوسامي يمكن عنده شيء يساعدنا


في المزرعه//صحت أمنيه من الحر وشربت من مويتها اللي مابقى فيها إلا النص كان حيلها مهدود ومو قادره توقف وتحس بالجوع والتعب وشافت نور الشمس من تحت الباب(هذا يوم ثاني!وش حالتك اللحين ياسلطان بدوني؟ يالله أبي أشوفك..أبي اتطمن إنك بخير..وش ناوي يسوي فيني سالم؟ أكيد يبي كل قوتي تروح عشان ماأقدر اقاومه او اصارخ! كيف بأحاول اهرب منه؟ كيف بأدافع عن نفسي؟ وأنا مو قادره أوقف على حيلي! يارب أموت يارب أموت قبل يلمسني)
ومن التعب وصياحها اللي ماوقف اغمى عليها...


في بيت أبوسلطان في الليل//كانت دلال في الحديقه حست إنها مخنوقه من البيت أم خالد اللي كانت عندهم من الصبح رجعت البيت أما خالتها أم نجلاء فاكتفت بإتصال وأمها نايمه في الصاله وجدتها تصلي وتدعي لأمنيه، شافت أحد جاي عندها ويوم رفعت رأسها وشافت وجهه حست إن قلبها ذاب ركضت له بسرعه ورمت نفسها في حضنه وهو ضمها بقوه، طولت في حضنه حتى شك إنها نامت..بعدها ومسك وجهها بيديه وجلس يطالعها يبي يشبع من شوفتها وهي كانت تطالعه بحب كبير وشوق...
نواف_ماعرفت وش كثر كنت فاقدك لين شفتك ياااه يادلال الدنيا مالها معنى بدون وجودك جنبي
دلال تصيح_نواف لاتخليني مره ثانيه
نواف يمسح دموعها_ماأقدر أخليك!
دلال تذكرت_عرفتوا شيء عن أمنيه؟
نواف_للحين اللي وصلنا إنها مو في المستشفيات
دلال تصيح مره ثانيه_وسلطان وش مسوي؟
نواف_راح من الظهر مع فواز يكلمون واحد يعرفه فواز بالشرطه يشوفون وش يقدر يسوي


في بيت أبوياسر// رجع نواف وشاف أبوسلطان وأبوياسر بس في المجلس واستغرب...
نواف_سلطان وفواز مارجعوا؟
أبوسلطان_سلطان طاح عليه و وداه المستشفى ونوموه هناك
نواف_زين رضى
أبوياسر_مارضى لين هم خدروه
نواف_الله يعينه ماينلام


في المزرعه//صحت أمنيه وشافت الظلام من تحت الباب بس ماقدرت تتحرك من مكانها حست إن جسمها مثل النار أخذت اللي باقي من مويتها وشربته كلها بس ماحست إن عطشها راح حست إن نهايتها قربت كانت بالغصب تآخذ نفسها نزلت دموعها وهي تتذكر حياتها و كل اللي مرت فيه..تذكرت جدها وأم ياسر وسندس وياسر وسيف وأهل سلطان وأم حمد ودلال وسلطان (آه ياسلطان..تمنيت اشوفك..تمنيت ينكتب لي عمر معك..تمنيت اقدر اسعدك..بس أنا دائما كذا عشت عمري وحيده واللحين بأموت وحيده لحالي في هالمكان والله العالم بيدفني سالم وإلا وش يسوي فيني..سامحني ياسلطان على هالعار اللي سببته لك..ليتك ماحبيتني..ليتك رحت مع لميس و عشت حياتك..ليه تعلقت بوحده الفرح معارضها من يوم انخلقت..اللي مهون علي اني بأموت ما لمسني سالم..يارب تنتهي حياتي قبل أشوفه) غمضت عيونها بتعب وماتوقعت إنها بتفتحهن مره ثانيه...


في بيت أبوسلطان//صحت دلال الصبح وهي مفزوعه من بعد حلمها اللي شافت فيه أمنيه ميته، وراحت بسرعه تدق على نواف...
نواف_هلا
دلال بخوف_نواف أمنيه..أمنيه لازم تلقونها أمنيه....
نواف يقاطعها_دلال وش فيك؟!!
دلال تصيح_حلمت فيها شفتها ميته نواف لو أمنيه صار لها شيء ماراح أسامح نفسي إني خليتها
نواف_أنا اللحين رايح لهم وأكلمك إذا عرفوا شيء
دلال_أنت مو عندهم؟
نواف_لا
ولا قال لها إن سلطان من أمس في المستشفى يكفيها اللي هي فيه...