رواية هدية عمري(كامله)..اللي ماتدخل يفوتها نص عمرها

[meen_ana]

::الجزء السادس والثلاثون::




في بيت أبوياسر العصر// رجع سلطان مع فواز ويوم دخل المجلس انقبض قلبه من شاف ملامحهم اللي تدل إنهم عرفوا شيء...
سلطان بخوف_وش صار؟
الكل سكت مايدري كيف يقول له والتفتوا على أبوسلطان...
أبوسلطان_اجلس ياسلطان
سلطان بعصبيه_يبه مابي اجلس قول لي وش عرفتوا؟!
أبوسلطان_واحد من عيال الجيران شاف سالم يحطها في شنطة سيارته وهدده مايقول شيء ولا يذبحه عشان كذا ماقال للشرطه خاف منه

سلطان ثبت في رأسه الإسم وتذكر إن هذا اللي كان يبي يتزوجها..وعرف سبب خطفه لها وبغى يجن...
سلطان بخوف_وبلغتوا الشرطه؟مسكوه؟
أبوياسر_سالم قبل امس مات في حادث ومالقوا أحد في سيارته ومايدرون وين وداها
سلطان يصارخ_كيف مايدرون! أهله ماسألوهم؟ ماعرفوا الأماكن اللي يروح لها؟
أبوياسر_الولد صايع وله شهور أبوه مايعرف عنه شيء
طلع سلطان وهو مايقدر يتخيل اللي صار في أمنيه حس إن داخله نار ماتطفي تقيد في عروقه (ليته ما مات؟ كنت أبي اذبحه بيدي وينك ياأمنيه؟ وش صار فيك؟ وش اللي شفتيه وأنا هنا مو قادر اسوي شيء!!)
شاف ياسر وسأله...
سلطان_ياسر وين بيت أبوسالم؟
دله ياسر على البيت ودخل سلطان كان واصل حده ويبي ينفجر في وجه أبوسالم على اللي سواه ولده لكن يوم شاف إنكسار الشايب اللي قدامه والحزن والهم اللي بملامحه تراجع وجلس معه وبهدؤ قد مايقدر.. يحاول يعرف منه أي شيء عن ولده، وهو عنده دخل واحد يعزيه...
سلمان_عظم الله أجرك ياخال الله يرحمه إن شاءالله
أبوسالم_الله لا يرحمه سود وجهي الله...
سلمان_لاتدعي على ولدك وهو ميت
أبوسالم_الله انتقم للناس منه ولا يخطف وحده متزوجه فشلني بين الناس
سلمان أول ماسمع هالخبر تذكر يوم سالم يطلب منه المزرعه وتأكد إنه أكيد كان في المزرعه وخاف إن الشرطه ماسكته هناك...
سلمان_عن اذنك ياخال

سلطان مافاته الخوف والإرتباك اللي بان عليه عشان كذا سأل...
سلطان_هذا يعرف ولدك؟
أبوسالم_إيه هذا واحد من ربعه اللي مافيهم خير مثله
سلطان بعصبيه_الله يسامحك ولا علمتني!!
وراح بسرعه وراه وشافه راكب سيارته لكنه وقف قدامه ومارضى يتحرك، وفتح سلمان الباب...
سلمان_نعم فيه شيء؟
مسكه سلطان مع ثيابه_أنت صديقه أكيد تعرف وين وداها؟ انطق وين وداها؟
سلمان بخوف_أنت عن وش تتكلم؟
سلطان بقهر_أنت عارف..تكلم احسن لك ولا بتشوف شيء ماعمرك شفته ولا بتتخيل اللي بأسويه فيكم
سلمان_صدقني ماسويت شيء ولا عرفت عن هاللي سواه إلا اللحين
سلطان يخنقه بيديه ويضربه في سيارته_والخوف اللي بان عليك أكيد أنت معه والله لو كنتم لمستوها مايكفيني ذبحك
سلمان خاف_والله ماأعرف شيء بس آخر مره جاني باليوم اللي توفى فيه طلب مني إنه يجلس في مزرعتي كم يوم

سلطان حس إن أمنيه أكيد في هالمزرعه...
سلطان سحبه وحطه في سيارته_امش معي وقولي وين هالمزرعه يله
سلمان ركب مع سلطان وطول الطريق وهو يطالعه ويطالع الشر اللي في عيونه وهو خايف احساسه يصدق وتكون في المزرعه وخاف من الوضع اللي بتكون فيه أكيد كل هالمصايب بتنقلب فوق رأسه،
أما سلطان فكان كل تفكيره في أمنيه خاف إنها ماتكون في المزرعه..وإن كانت فيها خاف من الوضع اللي بيشوفها فيه..لكن مهما كان صاير المهم يشوفها حيه وهو بيعوضها عن كل شيء...


في المزرعه//كانت أمنيه تصحى لحظات وترجع تفقد الوعي وهي ياله تقدر ترمش..وتحس ان جسمها كلها انشل..و دقات قلبه بطيئه و ثقيله..و كل نفس تأخذه كان متأده انه الأخير..كانت تشوف ناس تخوفها تمر من عندها وتسمع أصوات صراخ و صياح ما تدري وش هي..وماعرفت هي صاحيه أو تحلم..أو حتى إن كانت حيه أو ميته ماكانت حاسه في نفسها ولا جسمها وفقدت الوعي...


وصل سلطان وسلمان للمزرعه وشاف سلطان غرفتين مسكرات وبسرعه راح وفتحهم لكنه انصدم يوم شافهن فاضيات وحس إنه فقد الأمل الوحيد اللي تمسك فيه وضاقت الدنيا عليه لين حس إنه ماعاد يوصله هواء...
سلمان_فيه غرفه بآخر المزرعه
حس سلطان إنه حيا من جديد..وبسرعه راح يدور على هالغرفه ويوم وصل عندها وشاف النور من تحت الباب حس إن الأمل تجدد في نفسه وخاف يفقده من جديد..انشلت خطوته..و حس انه مو قادر يوقف على رجلينه..و حاول يتماسك و يلم الشتات اللي في داخله..و يدعي ربه انها تكون في هالغرفه..و تكون حيه..
سلمان_ماراح تدخل تشوف؟
مالتفت عليه سلطان..ثم راح للباب ولقى المفتاح فيه وفتحه بيد مرتجفه وهو خايف من اللي ممكن يشوفه، وشاف أكياسها,, وأغراضها..منتثره على الأرض وفي آخر الغرفه شافها طايحه في الأرض بعبايتها ركض لها و هو يحس ان قلبه سبقه عليها..وشالها بين يديه بهدؤ و خوف..وشاف وجهها الشاحب اللي مايقول إن فيها حياة لكن من حرارتها العاليه عرف إنها حيه...
سلطان ودموعه تنزل_أمنيه حبيبتي لاتخافين أنا هنا
وضمها لصدره فرحان إنه لقاها ومو مصدق إنها معه من جديد، تأكد من نبضها ولقاه ضعيف بس أهم شيء فيه نبض..شالها بسرعه بين يدينه وركض فيها لسيارته، لحقه سلمان وهو يصارخ...
سلمان_حيه؟ فيها شيء؟
لكن سلطان ماسمعه ولا كان حاس بوجوده من الأساس، وانطلق في سيارته وترك سلمان في المزرعه كان كل همه يتطمن على أمنيه والتفت يشوفها جنبه كيف ذابله ورايح لونها(أمنيه تكفين لا تتركيني وأوعدك ماراح أبتعد عنك مره ثانيه وبأهتم فيك واعوضك عن كل اللي راح، آه ياأمنيه كيف عشتي هاليومين بهالغرفه؟ بدون أكل وشرب؟ وش سوى فيك سالم الكلب..أنا الغلطان كيف تركتك؟ ليه دائما أتركك و أنا عارف وش كثر تحتاجيني!!)


في المستشفى//كان الكل ينتظر الدكتور اللي يفحص أمنيه يطلع بعد ما خبرهم سلطان إنه لقاها..أما سلطان كان للحين يرتجف من فرحة شوفتها..وخوفه عليها...
سلطان بعصبيه_مو ناوي يطلع هالدكتور؟؟
أبوسلطان_اهدى ياسلطان الحمدلله إننا لقيناها وإن شاءالله هي بخير

بعد دقائق طلع الدكتور...
سلطان_خير يادكتور طمني؟
الدكتور_حالتها الصحيه بخير مع إنها ضعيفه مره لكنها بتتحسن مع الوقت
سلطان_صحت؟
الدكتور_هي لسى فاقده وعيها وماراح نعرف حالتها بالضبط لين تصحى
سلطان_ومتى تصحى؟
الدكتور_كل شيء بيد الله
راح الدكتور وسلطان مقهور والتفت لنواف...
سلطان_يعني هي بغيبوبه؟
نواف_لا ياسلطان بس يمكن من التعب والإجهاد تبي وقت لين تصحى لاتنسى ان لها يومين مو آكله شي

وبعد مادخل الكل وتطمن عليها طلب منهم سلطان يروحون لأنه هو اللي بيجلس عند أمنيه...


في بيت أم خالد//دخل نواف ودلال لبيتهم وأخيرا بعد فراق شهور...
نواف_آه وأخيرا ارتحنا
دلال_إيه والله كان قلبي يتقطع على امنيه خفت يصير فيها شيء ماكنت بأسامح نفسي
نواف_الحمدلله إنها بخير
دلال_نواف احس إني صرت أحبك زياده عن أول
نواف يضحك_وليه؟
دلال_لأني عرفت إني ماأقدر اعيش بدونك
نواف_ولا أنا مايفيد اعيش بدونك أنت العمر كله دلال

 

[meen_ana]

في المستشفى//كان سلطان واقف على رجلينه..يطالع أمنيه من ساعات ولا تعب..كان مشتاق لوجهها..و اللحين مشتاق لصوتها..و نظرتها..كان خايف عليها وخاف اكثر إنه مايشوفها لكنها اللحين قدامه ترتد صحتها لكن فيه شيء للحين شاغل باله مع إنه مايشوف على أمنيه أي آثار إعتداء لكن لازم يتأكد سالم وش سوى فيها عشان كذا راح للدكتور في مكتبه وقال له على اللي صار لها وطلب منه يفحصها عشان يعرف وش صار لها ويعرف كيف يخفف عنها..يبي يعرف كل اللي مرت فيه..و يتحمله..ويشيل همها عنها..لكن يوم طلع من عنده الدكتور أكد له إنها ماتعرضت لأي عنف او إعتداء وهالشيء خلاه يطير من الفرحه(الحمد لله كنت خايف إنها مرت بهالشيء ما كانت بتتحمل)..راح للمسجد و صلى ركعتين شكر لله..و دعى ربه يخليها له..و يكمل فرحتهم..


من بكره في بيت أبوياسر// صحت سندس بدري من فرحتها برجوع أمنيه ماقدرت تنام(بعد خمسة أيام زواج أمنيه صح هي تعبانه بس ما توقع يأجلونه لا هي ولا سلطان يبون هالشيء كانوا يعدون اللحظات عشان هاليوم آه عقبال يومنا يافواز) أول مانطقت اسمه دق جوالها وشافت رقمه وردت وهي تضحك...
سندس_صباح الخير
فواز_عساني فدا هالضحكه
سندس_لو ادري إني إذا فكرت فيك بتدق كان فكرت فيك من زمان
فواز_وأنت توك تفكرين فيني! زعلتيني
سندس_توي صاحيه وعلى طول طريت في بالي
فواز_وما حلمتي فيني؟
سندس_ولو بأحلم على بالك بأقولك
فواز_وليه ماتقولين؟ وش صار في الحلم ماتبيني اعرفه؟
سندس استحت_غريبه صاحي بدري؟
فواز_هذا اللي أنت فالحه فيه تصرفيني
سندس_صدق وش صحاك بدري؟
فواز_عندي موعد مهم
سندس_مع مين؟
فواز_مع قلبي
سندس تجاريه_ومتى الموعد؟
فواز_بدأ من دقيقتين واعملي احسابك إنه بيطول لساعات لأني مشتاقلك بالحيل


في المستشفى//صحى سلطان وشاف أمنيه تتحرك وشكلها صحت فز من مكانه وفز قلبه معه..وقف قدامها عند السرير وراقبها وهي تفتح عيونها وهو يحس بشعور غريب مايقدر يوصفه..ماكان في جسمه خليه وحده ساكنه..التفتت أمنيه تطالعه..لكن نظرتها غير النظره اللي توقعها أو تمناها حس في كل جسمه يسكن.. كانت نظرتها غريبه نظره خوفته ..نظره كرهها أكثر من نظرة البرود اللي كان يكرهها منها...
سلطان بخوف_أمنيه حبيبتي أنت بخير أنا هنا معك
مد يده بيلمسها لكنه انصدم يوم بعدت عنه وضمت يدينها لصدرها وطالعته بخوف...
سلطان بصوت مرتجف_أمنيه! وش فيك؟ أنا سلطان ماعرفتيني؟!!
أمنيه بخوف_اشش روح سكر الباب سالم بيجي يقتلني هو قال إنه بيقتلني..اسمع..اسمع هاذي الكلاب اللي اكلتني..أنا ميته..أنا ميته
سلطان وقف مصدوم من كلامها وماقدر يأخذ نفسه رفض عقله يستوعب منظرها اللي قدامه وكلامها ونزلت دموعه...
سلطان بصوت رايح_أمنيه أنت بخير سالم مات ماسوى فيك شيء!
أمنيه تصارخ_لااااا أنا ميته الكلاب اكلتني أنا مييييته سالم رماني للكلاب و اكلتني
دخلت الممرضه ويوم شافت أمنيه ثايره دقت عالجرس وثواني والغرفه امتلت بالممرضات والدكتور يطلب من سلطان يطلع اللي ماكان حاس باللي يصير من حوله وكانت عيونه متعلقه في أمنيه وهي ترتجف وتطالعه بخوف سحبوه لين طلعوه برى الغرفه وهناك طاح على الأرض يستوعب اللي يصير(الدكتور أكد لي إنه مالمسها! هاذي أكيد صدمه من الخوف..اللي مرت فيه مو سهل حبستها في ذاك المكان أيام اكيد ارعبتها معقوله تكون فقدت الذاكره! حسيت إنها ما عرفتني! الله لايرحمك ياسالم الله ينتقم منك)
وبعد دقايق صعبه مرت على سلطان والأفكار تأخذه وتجيبه طلع الدكتور وأول ماشافه سلطان فز وتمسك فيه...
سلطان_دكتور أمنيه وش فيها؟؟
الدكتور_والله ما أدري وش اقولك يا أخ سلطان اللي كنا شاكين فيه صار
سلطان طالعه برجاء وخوف وما قدر يسأل لأن لهجة الدكتور تدل إن اللي صار مو سهل...
الدكتور يكمل_أمنيه فقدت جزء كبير من سيطرة المخ على الأعصاب اللي مرت فيه خلاها تفقد عقلها
سلطان يهز الدكتور وهو يصارخ_لاااا أمنيه لايمكن يصير فيها كذا! أنا لقيتهاااا لا تقول إني بعد كل هذا بأفقدها!! هاذي حاله مؤقته من تأثير اللي صار لها صح؟ تكلم قول إنه صح؟
الدكتور_آسف يا أخ سلطان ياليت اقدر أعطيك هالأمل

طالعه سلطان بقهر وابعده من طريقه ودخل غرفة أمنيه ولحقه الدكتور، وقف سلطان عند سرير أمنيه اللي كانت نايمه بعد ماخدروها ولا هي حاسه بشيء...
سلطان ودموعه تنزل بحسره_أمنيه أنا سلطان تكفين اصحي عشاني..قولي إنك تعرفيني..انسي الكل بس الله يخليك تذكريني أمنيه والله ماصار لك شيء..لاتخليني لحالي أمنيه أنا بأموت من دونك
سحبه الدكتور وسلطان ماقاوم لأنه فقد كل قوته وبعد ماطلعوا...
الدكتور_اذكر الله ياسلطان هذا مكتوب لها
سلطان_دكتور قول لي إن لها علاج قول إنها بترجع لي مايهم وين؟ مايهم الفلوس أنا بأوديها لآخر الدنيا بس اشوفها مثل أول أبيها ترجع لي أبيها ترجع لي
الدكتور_للأسف ياسلطان اللي صاب عقلها مو خلل عضوي نقدر نصلحه هذا شيء نفسي
سلطان رفض يصدق كل هالكلام..رفض يقبل الواقع..وفكر في نواف أكيد عنده حل وأكيد هالدكتور مايفهم شيء وتركه وراح بسرعه لسيارته وانطلق لبيت أبوخالد وهو في السياره التفت على الكرسي بجنبه وهو يتذكر فرحته أمس يوم يلقاها فرح إنها حيه ومافيها شيء واليوم يكتشف إنه لقى جسد بدون روح وحس بالرجفه يوم تذكر كيف كانت تطالعه والكلام اللي قالته...


في بيت أم خالد// كانوا كلهم جالسين يفطرون وسمعوا الجرس يدق بإزعاج ماينقطع...
نواف_خير من اللي يدق كذا على الصبح؟!
أم خالد_الله يستر يمكن أحد من الجيران فيه شيء!
قاموا كلهم مفزوعين وكان نواف بيروح يفتح الباب لكن الخدامه دخلت عليهم...
الخدامه_هذا بابا سلطان.....
قاطعتها شهقة دلال_أمنيييييه!!
وركضت للمجلس ولحقها نواف وأول ماشافت حالة سلطان خافت وعرفت إنه صار فيها شيء لأنها أول مره تشوف سلطان بهالحاله ثوبه متكسر ووجهه مليان دموع ومسود من القهر...
دلال تصيح_سلطان أمنيه فيها شيء؟!
لكن سلطان ما رد عليها أول ماشاف نواف تمسك فيه برجاء...
سلطان_نواف أنا عارف إنك أنت اللي بتساعدني أنت اخوي يانواف ماراح ترضى افقدها الدكتور ذاك مايفهم شيء مايفهم شيء
خاف نواف يوم شاف سلطان بهالحاله الهستيريه وتأكد من مخاوفه اللي حس فيها يوم اطلع على حالة أمنيه بس ما عرف الضرر اللي فيها لأي حد وصل لكن من حالة سلطان عرف إن وضعها أكيد صعب...
نواف_اهدأ ياسلطان وقول لي أمنيه وش فيها؟!
سلطان يحاول ياخذ نفسه_يقول إنها..إنها..فقدت عقلها
شهقت دلال_لاااااا
سلطان_نواف قول إنها حاله مؤقته أمنيه لايمكن يصير فيها كذا
نواف_أنا رايح معك ياسلطان و بأشوف حالتها
راح نواف مع سلطان وعيونه على دلال اللي واقفه مصدومه من اللي سمعته كان نفسه يطمنها لكن عرف إن سلطان ماراح يعطيه هالفرصه، طلعوا ودلال جلست ترتجف ودموعها تنزل بقهر(أمنيه مو معقوله! بعد مارجعت لنا نخسرها وبهالطريقه؟؟ لاااااا! لا يصير فيها كذا يارب يارب)...

بعد يومين..عاشهن سلطان لا حي ولا ميت..أجروا كل الفحوصات وأكدوا لسلطان اللي رفض كل هالوقت يصدقه..حالة أمنيه كانت صعبه وبدون حل..واللي زاد عليه إنهم بيدخلونها مستشفى الأمراض النفسيه لأن حالتها تحتاج عنايه خاصه ولأن صحتها ماصارت تحتاج مستشفى..عارض سلطان هالشيء وقال إنه بيآخذها البيت ويجيب أحد يعتني فيها لكن الدكاتره عارضوا هالشيء لأن أمنيه رغم هدؤها ساعات إلا انها ساعات تعصب وتثور ولا تهدأ إلا بمسكن..و تحتاج لرقابه شديده.

وقف سلطان و هو شايل بداخله حزن الدنيا..حس انها النهايه..النهايه لكل فرح بدنيته..النهايه لقلبه..و طالعها من عند الباب بعد ماحطوها في غرفتها اللي مايتصور كيف بتقضي باقي حياتها فيها..و كيف هو بيروح ويترك روحه هنا..تمنى يعطيها من عمره بس ترجع له..لو مايعيش الا لحظه معها ويموت..آه يالموت..ليته مات في ذاك الحادث ولا شافها في هالحال..كره نفسه ولامها..حس انه هو السبب في كل اللي صار لها..من يوم دخل حياتها ماخلاها تشوف يوم حلو..زاد عذابها..و ظلمها..وكان عقابه انه خسرها..خسر عمره..و قلبه..وحياته...خسر أحلى ذكرى..و خسر كل اللي بقى..
الدكتور_يله يا أخ سلطان لازم تكمل اوراقها
سلطان بيأس_كذا ماراح تتذكر شيء! ليه ما آخذها للبيت عشان تتذكر أنا مستعد اطلعها على مسئوليتي
الدكتور_ياأخ سلطان صدقني لو كان هالشيء يفيد كان طاوعتك لكن حالة زوجتك ماينفع معها هالحل
سلطان يسأل للمره الألف_فيه أمل تتذكر؟
الدكتور_كل شيء بيد الله

 

[meen_ana]

::الجزء السابع والثلاثون والاخيـــر::

بعد سنتين....




في بيت أبوفواز//كان اليوم ملكة دانه اللي وافقت عليها امها بعد اقناع من من فواز اللي أكد لها إن الزواج ماراح يعطلها عن دراستها وإن بدر بيكون متعاون معها مثل ما هو متعاون مع سندس وإنها ماراح تجيب عيال إلا بعد ماتخلص دراستها وعلى هالشروط تمت الملكه وبيكون الزواج بعد ست شهور...

دخل فواز لجناحه اللي في البيت بعد مانتهت الملكه وشاف دانه وسندس جالسين على السرير ويسولفون وبنظرة رضى وإعجاب مر على سندس لكن نظرته استقرت بحقد على دانه...
فواز_حرام عليك لي سنه متزوج نفسي يوم ادخل هالغرفه ما أشوفك متمدده على سريري! متى يآخذك بدر وافتك منك؟
سندس_لا لاتذكرني والله بأفقدها
فواز يطالعها_بتفقدينها؟ زين ياسندس شغلك عندي
سندس_لا يكون تغار من دانه؟
فواز كان بيرد لكنه استغرب من سكوت دانه والتفت عليها وشافها مو معهم وسرحانه (طبعا الأخت شايفه زوجها اليوم! كيف بتسمعنا؟)
فواز_هيه لو سمحتي روحي احلمي في غرفتك مو عندنا
دانه فزت_نعم!
سندس ضحكت عليها...
فواز_الله ينعم عليك أبي انام
قامت دانه بتروح ودق جوالها ويوم شافت الرقم ارتبكت وعرف فواز إنه بدر وقبل ماتنتبه سحب فواز الجوال منها و رد...
فواز_نعم
بدر بإستغراب_فواز!!
فواز_إيه اجل مين
بدر_وش جابك؟
فواز_والله الجوال داق في غرفتي طبيعي أرد
بدر_وجوال دانه وش جابه غرفتك؟
فواز بإستهزاء_ودانه وجوالها متى طلعوا من غرفتي؟
دانه كانت تأشر لفواز تبيه يسكت فشلها وماعرفت كيف بتكلم بدر بعدها...
فواز_دق بعد خمس دقائق تكون وصلت غرفتها
وعطى دانه جوالها اللي اخذته وهي ساكته وطلعت تركض، التفت فواز على سندس وجلس يتأملها...
فواز_آه ياقلبي
سندس تضحك_وش فيك؟
فواز_تدرين وش فيني بس أنت تعودتي على الغزل
سندس بدلع_إيه سمعني


في بيت أم خالد الجديد في شقة نواف//دخل نواف وشاف دلال تدور بولدها ابراهيم اللي عمره شهرين وسماه نواف على اسم ابوه...
نواف_مساء الخير حبيبتي
دلال بصوت واطي_مساء الورد
نواف_ليش قاصره صوتك؟
دلال_اشش ولدك ماصدقت إنه نام
جلست وجلس جنبها نواف يطالع بولده...
نواف_مشكله الولد طالع حلو على أمه المفروض يطلع علي والبنات يطلعون عليك
دلال_ياسلام ومن قال إنك مو حلو أنت الحلا كله
نواف_أوهو هذا إعتراف خطير أول مره اسمعه! إلا وين البنات؟
دلال_فجر اخذتهم معها للملاهي
نواف_دلال تتركينهم مع هالخبله!
دلال_حرام عليك فجر كبرت وتتحمل المسئوليه
نواف_اتركينا منها وروحي حطي ابراهيم عند أمي
دلال_ليه؟
نواف_عازمك على العشاء
دلال بفرح_والله!
نواف_كل هالفرحه! اللي يشوفك يقول عمري ماطلعتك
دلال_إيه لي يومين ماطلعت
نواف_بس!
دلال_إيه يله أنا رايحه اودي برهومي


في المستشفى// مر إنسان..أو بقايا انسان بالمعنى الأصح..ملامحه جامده ويآسه..وفي عيونه نظرات حرمان وحزن وقهر..و الندم مرسوم بملامحه..يمشي ولا هو حاس بالناس اللي تتعدى جنبه وكأنه شبح بينهم...
الممرضه الجديده_وش قصة هالرجل بكل زياره يجي ويجلس ساعة الزياره كلها وبعدين يطلع بملامح تقطع القلب!
الممرضه القديمه_تصدقين له سنتين على هالحال كل اللي يشتغلون هنا يعرفونه
الممرضه الجديده_تعرفين لمين يجي؟
الممرضه القديمه_لزوجته شكله يحبها بالحيل وعلى هالحال اللي هو فيه اتوقع انه السبب في اللي صار لها..غريب كل هالوفاء اللي فيه..سنتين مامل و لانسى..و لا فوت ولا موعد

في غرفة أمنيه..دخل سلطان وشافها جالسه على الأرض وتلعب في شعرها،..كتم آهته من زمان ماشافها فاكته وتذكر أيامه معها واللي بكل سهوله فرط فيها..وبيتم طول عمره يدفع الثمن..لكن مهما صار..ومهما قالوا له عن حالتها..هو كان عنده أمل ولهالأمل عايش..إنها في يوم بتتحسن يكفيه إنه الوحيد اللي ترضى تقابله وتكون هاديه معه وماتنفعل..ومن شهر صارت إذا شافته تبتسم..هالشيء كان بالنسبه له يسوى الدنيا كلها حتى لو كانت مو عارفته ولا عارفه أي شيء عن نفسها..ماراح يتخلى عنها..

دخل الغرفه وجلس جنبها ماكان يقدر يلمسها عشان مايخوفها ابتسمت له كالعاده وبدت تتكلم في أشياء مو مترابطه ولا لها أي معنى وسلطان يجاريها ويبين انه متفاعل معها..لكن الجرح اللي في قلبه يكبر وهو يشوفها في هالحال..وغصب عنه نزلت دمعته اللي دائما يحبسها عشان مايضايقها ويخوفها.. انصدم سلطان يوم حس في يدها تمسح دمعته رفع راسه لها وشافها مكشره...فرح إنها حست فيه وماصدق نفسه لكنها بسرعه لهت عنه وبدت في سالفه ثانيه، ورجع يتكلم معها وهو كله أمل إنها في يوم بترجع أمنيه اللي حبها من كل قلبه واللي كان هو أول من دخل قلبها..أمنيه..هدية عمره..اللي ما قدرها..ولا حافظ عليها..و اللي اللحين صارت له ذكرى لوحده عطاها قلبه..و عمره..لكن الوقت عاندهم..كل مايشوفها بهالحال بين يديه..و في نفس الوقت مو معه..قريب منها وبنفس الوقت محروم منها ..يحس انها تعاقبه على اللي سواه فيها..(ماراح استسلم يا أمنيه بأظل طول عمري معك..بأعيش الباقي من عمري لك..بأسأل كل العالم..بأوديك لكل مكان..لين ترجعين لي..لو اضطريت إني أعلمك كيف الحياة من جديد..بأكون لك الأب و الأم و الأهل..أبي يكبر عقلك و قلبك و احساسك معي..بنتحدى العالم كله..و رغم كل شي مادام فيني عمر..بأكون معك..و ما بفقد الأمل..و الله معنا )

وبدأ سلطان رحله جديده في حياته..رحله يحاول يرد فيها الحياة لعمره..رحله يتمنى بنهايتها..يلقى أمنيـــــه...

جيتك وكلي جرح يامسبب الجرررح
عطني دوى المجروح ياجارح الروووح
جيتك بعد ماتاه فكري من السرررح
سارح أفكر فيك ليلي و أنوووح
تعبت أعيد القول وأزيد بالشرررح
يرجع صدى صوتي من الهم مبحوووح
عود على المشتاق لا تهدم الصرررح
دام الأمل بابه على الود مفتوووح
مايستوي بالحب الجمع والطرررح
كيف بأحيا وأنت عن دربي تنوووح
ياللي احبك صار طعم الفرح جرررح
متى سواليفك على سمعي تفوووح
رغم الألم جيتك أدور عن الفرررح
مثل الغريق اللي تعلق على لوووح




~~~~~{ { تمت..بحمد الله } }~~~~~