روايتي الثالثة (( يا دنيا ارحميني )) .. قصة واقعية .. ReRez

[^noonaa^]

وااااي القصه اتعور القلب وكل روايه اقراها من رواياتج اعيش فيها


مشكوووووره حبيبتي وناااطرين روياتج اليايه

 

[ReRez]

في وايد بنات اسألو ليش بنزل بارت مو القصه خلصت منزمان ؟ اي بنات القصه خلصت بالبارت ال31 بس لأني بنزل كتاب ان شاءالله مابي النهاية تكون اوبن ايندنق ( نهاية مفتوحه ) .. علشان جذي زدت هالبارت اتمنى اشوف رايكم فيه كبارت نهائي للكتاب اذا نزلته ان شاءالله


- 32 مابعد الاخير / نهاية أتمناها –

- مرت 3 سنين على غيبوبة ندى -
( بالمستشفى أمل وفاطمة قاعدين يسولفون عند سرير ندى .. فجأة ندى حركت اصابعها - طبعا طول هالفتره ماكان يدش جسم ندى الا سوائل فتخيلوا شكلها .. وحق اللي مايقدر يتخيل .. كانت بس جلد على عظم )

فاطمة : ( امسكت ايد أمل وماتكلمت .. بس عينها كانت على ايد ندى )
أمل : اشفيج ؟ ( طالعت المكان اللي قاعده تطالعه فاطمة .. جان تقوم بسرعه وتمسك ايد ندى .. و قلبها يرقع ) يمه ندى
فاطمة : ( راحت يمها .. واهي مرتبكه ) انادي الدكتور ؟
أمل : ( دموعها معلقه بعينها ) اي ناديه بسرعه
فاطمة : ( اطلعت من الغرفة واهي شبه تركض )
أمل : يمه ندى تسمعيني ؟

- ندى ماكانت تحرك الا اصابعها عالخفيف .. يت فاطمة ومعاها دكتور ودكتوره –

أمل : ( دموعها تنزل ) دكتور بنتي قاعده تحرك ايدها
الدكتور : الحين اشوفها .. لو سمحتي شوي
أمل : ( وخرت عنه )
الدكتور : ( يطالع الجهاز و يمسك ايد ندى ) ندى انتي معانا ؟ ضغطي على ايدي اذا تسمعيني
ندى : ( اضغطت عالخفيف على ايد الدكتور )
الدكتور : ( ابتسم ) بفضل الله راح ترجع لكم
أمل : ( اشهقت وادموعها تنزل ) صج ؟
فاطمة : ( تضحك و تبجي بنفس الوقت ) الحمدلله والشكر لك يارب
الدكتور : اي شفتو مافي شي بعيد عن الله سبحانه

- بعد جم ساعه و اطباء داشين طالعين على ندى .. كان الكل ناطر بره .. أمل .. فاطمة .. سامي .. فرح .. نوره .. ريم .. ساره .. جنان ( اختهم اللي كانت مسافرة بره ) .. فهد .. و حتى مشعل .. الكل كان ناطر –

( طلع الدكتور )

الدكتور : ( يبتسم ) تقدرون تشوفونها بس مو كلكم
سامي : ممكن ندخل احنا الاربعه ؟ ( يقصد أمل و فاطمة ومشعل و اهو )
الدكتور : اي بس لا بهدوء .. تفضلو معاي
فرح : يمه طمنيني
فاطمة : ( امسحت دموعها ) ان شاءالله ( راحت داخل مع مشعل )
سامي : ( مسك ايد أمل و دشو وراهم الغرفة )

- بالغرفة كانت ندى منسدحة عالسرير واهي مبطلة عيونها .. أول ما شافوها أمل وفاطمة بجو حيل و راحو يمها –

الدكتور : ( يبتسم ) راح نخليكم الحين .. بس لا تعبونها وايد عن اذنكم ( طلع مع باجي الدكاترة وخلاهم )
أمل : ( تبوس راس ندى وخدها ) الحمدلله على سلامتج يمه
فاطمة : ( باست ندى و دموعها ماتوقف ) الحمدلله اني شفت هاليوم
ندى : ( ارمشت ونزلت دموعها ) اشلونكم
أمل : ( اول ما اسمعتها تكلمت اقعدت تضحك بصوت عالي وتبجي ) زينين يمه الحمدلله زينين بشوفتج
سامي : ( ماقدر يمسك دموعه اكثر ) ممكن تعطوني مجال ؟
فاطمة و أمل : ( وخرو عنه )
سامي : ( باس راس ندى ) الحمدلله على سلامتج يبه
ندى : ( بصوت واطي ) صج صارلي 3 سنين ؟
سامي : اي يبه صج .. والحمدلله على رجعتج
فاطمة : يبيلج وااااايد تغذية .. طلعي من اهني خل نوكلج ذبايح ليل نهار
مشعل : ( قرب يم سريرها ) يبه الحمدلله على سلامتج
ندى : الله يسلمك
مشعل : ( باس راسها ) يللا شدي حيلج نبي نشوفج تركضين جدامنا
ندى : ( ابتسمت ) ان شاءالله يمه فاطمة وين فرح ؟
فاطمة : ( استانست حيل لأنها نادتها ب يمه ) بره خل اناديها لج

- اطلعت فاطمة و ارجعت معاها فرح –

فرح : ( اول ماشافت ندى اقعدت تبجي و راحت لمتها ) اشتقت لج وايد الف حمدلله على سلامتج
سامي : يبه موزين وخري خليها تتنفس
فرح : ( وخرت عنها واهي تبجي ) آسفه
ندى : ( دموعها تنزل ) لا تبجين كاني رديت الحمدلله
فرح : ( امسحت دموع ندى ) وانتي بعد لا تبجين .. ويللا خليج قوية عشان تطلعين وتشوفين اعيالي
ندى : اعيالج ؟
فرح : ( ابتسمت ) اي الحين غير نواف عندي بنت تهبل سميتها ندى على اسمج
ندى : ( ابتسمت ) صج ؟
فرح : اي صج
ندى : ( مستغربه ) يعني رديتي حق حمد ؟
أمل : ( خافت ) وي بنتي اشفيها ؟
سامي : ( يضحك ) لا هذا شي طبيعي بعض الاشياء تنساها .. زين انها مانستج
فرح : ( مبتسمه وتكلم ندى ) حياتي ماعليه كنتي نايمه فترة طويلة شكلج نسيتي وليد
ندى : ( اسكتت مده بعدين ابتسمت ) بلى تذكرته
فرح : ( ابتسمت ) الحمدلله
---

- بعد جم يوم طلعو ندى غرفة خاصة .. و يت لها فرح و يابنت معاها ( نواف 4 سنين ونص ) و ( بنتها ندى 6 اشهر ) .. و يت أمل ويابت معاها ( عبدالله 6 سنين ) –

ندى : ( تطالع عبدالله و عيونها دمعت ) عبود صرت ريال ماشاءالله
عبدالله : ( يبتسم ) اي كبرت
ندى : وايد كبرت اسم الله عليك .. تروح المدرسه الحين ؟
عبدالله : اي انا بالصف الأول الحين
ندى : ( تبتسم ) ماشاءالله
نواف : انا بعد ريال
ندى : ( تضحك عالخفيف ) اي ماشاءالله آخر مره شفتك كان عمرك سنه ونص يعني كنت توك تمشي عدل
نواف : انتي شسمج ؟
أمل : خلاص عبود نواف تعالو بره زعجتوها
ندى : لا عادي يمه خليهم .. اسمي ندى حبيبي
فرح : ( شايله بنتها ) اشرايج بسميتج ؟
ندى : تهبل اسم الله عليها .. بييضه عكس نواف
فرح : ( اضحكت ) طالعه علي وعلى ابوها بياضه يخرع
ندى : ( تضحك ) عاد اتصدقين نسيت ويه وليد ما اذكره عدل
فرح : بتشوفينه وتذكرينه
أمل : ( امسكت اليهال ) تعالو يمه اشتريلكم شي تاكلونه ( اطلعت وخلتهم )
فرح : ( اتطالع ندى واهي تبتسم ) ماني مصدقة والله ماقدر اوصف اشكثر مستانسه لأنج قمتي
ندى : ( ابتسمت ) انا بعد مستانسة .. فرح اشصار على عثمان ؟
فرح : اشوف ذاكره عثمان و ناسية وليد
ندى : ( ابتسمت ) زين صج اشلون عثمان ؟
فرح : مر عليج اول ماصارلج الحادث و بعدها رد يدرس بالأردن .. ومادري عنه من يومها
ندى : ( اسكتت )
فرح : اشتقتيله ؟
ندى : اشتقت حق كل شي
---

- اقعدت ندى بالمستشفى تقريبا شهر كانو يشرفون على صحتها وتغذيتها و كانوا يسوولها علاج طبيعي حق اطرافها وظهرها –

( مكتب الدكتور )

الدكتور : ( يكلم أمل و سامي ) في خبر حلو اذا كان صحيح راح يكون بمثابة معجزة صارت حق بنتكم
أمل : ( ابتسمت حيل ) شنو هالخبر دكتور ؟
الدكتور : دكاترة الأعصاب و بما فيهم دكتورها الشخصي .. كلهم اجمعو ان الحادث أثر على الفقرات العليا لعمودها الفقري اللي اثرت بدورها على الدماغ و سببت رد فعل عكسي على النوبات اللي كانت اتييلها
أمل : ( تبتسم ) عفوا مافهمت
سامي : يعني تقصد ان الصرع راح عنها ؟
الدكتور : اي و ان شاءالله يكون تشخيصهم صحيح
أمل : ( عيونها غورقت ) بنتي راح تصير طبيعيه ؟
الدكتور : ان شاءالله بس مو اكيد هالشي يعني تقدرين تقولين ان هالخبر صحيح بنسبة 60 %
أمل : ( تكلم سامي ) سامي ندى راح تصير طبيعيه
سامي : ( يبتسم ) ان شاءالله بس تره يقولج مو اكيد
أمل : ( تبتسم ودموعها تنزل ) بلى ان شاءالله اكيد
---

- اطلعت ندى من المستشفى وكانت على ويل جير ( كرسي متحرك ) وكل يوم ايولها لي البيت اخصائيين علاج طبيعي .. يساعدونها انها ترد تمشي مثل قبل –

( بيوم ندى كانت قاعده بغرفتها ومعاها فرح .. جان يرن تلفونها .. اهو نفس رقمها القديم .. كانت فرح تبطله بين فتره وفتره عشان تطمن أي احد يسأل عن ندى )

ندى : ( تطالع الرقم ) هذا رقم خارجي
فرح : ردي
ندى : ( ردت واهي متردده ) الو ؟
عثمان : ندى ؟
ندى : منو ؟
عثمان : ماعرفتيني ؟
ندى : عثمان ؟؟
عثمان : انا مو مصدق اني قاعد اكلمج .. ندى انا كنت كل شهر ادق على المستشفى اسألهم عنج وكانو يقولولي انج للحين بغيبوبه .. ماصدقت يوم قالولي انج طلعتي بالسلامه .. كنت ادق على جهازج القاه مغلق الحين الحمدلله سمعت صوتج والله مو مصدق بعد 3 سنين ارد اسمع صوتج .. ندى انا كنت ...
ندى : ( قاطعته و فيها بجيه ) انت اشلونك ؟ واشلون دراستك
عثمان : الخبر اللي سمعته عنج خلاني اسقط .. بس الحمدلله رديت شديت حيلي و باقيلي سنه و أتخرج
ندى : الحمدلله
عثمان : تنطريني ؟
ندى : انطر شنو ؟
عثمان : تنطريني اتخرج و اتقدملج ؟ وتصيرين ندى مرت الطيار عثمان ؟
ندى : ( تضحك ودموعها تنزل ) اي انطرك

- بعد ماخصلت ندى سوالفها مع عثمان سكرت التلفون و اهي تضحك –

ندى : قال راح يتقدملي اول مايتخرج
فرح : ( استانست ولمتها ) صج ؟ يحلييله
ندى : اشتقت له وايد
فرح : بس اهو ؟
ندى : ( اضحكت ) والله اشتقت حق كل شي تتصورينه كل شي بالدنيا اشتقت له الا النوبات
فرح : ( اضحكت ) الله لايردها
ندى : امين يارب
---

- بيوم نواف راح بيت أهل ابوه ( حمد ) –

نواف : بابا تعرف ندى ؟
حمد : اي اعرفها اشصار عليها ؟
نواف : قامت من النوم
أحمد : صج ؟
نواف : اي و قالت انا صرت ريال
أحمد : تكلمت يعني ؟ انت متأكد ؟
نواف : اي
أحمد : ( قام )
حمد : أحمد وين رايح شبتسوي ؟
أحمد : ولا شي ( طلع بره و دق على ندى )

ندى : ( طالعت الرقم وماقدرت تتذكره .. ردت عليه ) الو ؟
أحمد : الف الف الف حمدلله على سلامتج
ندى : منو ؟
أحمد : انا احمد
ندى : ( استغربت ) هلا احمد
أحمد : ندى طول ما انتي بغيبوبه وانا افكر فيج و رحت الحج دعيتلج وايد
ندى : حجيت ؟
أحمد : اي الحمدلله حجيت العام ودعيتلج وايد والله
ندى : تسلم ماتقصر
أحمد : ندى .. انا ودي اتقدملج بعد فترة ومابيج ترديلي خبر الحين فكري على راحتج
ندى : أحمد انا قلتلك اني ...
أحمد : لا تردين الحين عفية فكري على راحتج
ندى : لا أحمد مابي افكر ولا تتقدملي
أحمد : ليش ؟ عشان حمد و فرح ؟
ندى : لا .. عشاني انا
أحمد : ندى انا تغيرت وايد
ندى : ادري تغيرت والله يرزقك ببنت الحلال اللي تسعدك
أحمد : ( سكت )
ندى : يللا انا لازم اسكره الحين .. ومشكور لأنك تحمدتلي بالسلامه
أحمد : زين لو ييت تقدمتلج رسمي ترفضيني ؟
ندى : اي
أحمد : خلاص عيل.. ديري بالج على نفسج
ندى : ان شاءالله .. مع السلامه ( سكرت التلفون و ابتسمت ) سبحان الله .. هذا اللي كان مايبي يتزوج .. صج السنين تغير
---

- مرت سنه .. و ردت ندى تمشي مثل قبل و رد جسمها ملى و صار فيه لحم .. و الدكاتره اكدو ان الصرع راح منها و لله الحمد .. و راحت اعتمرت مع اهلها و احمدت ربها على رحمته الواسعه .. وردت من العمره و اهي متحجبه –

- رجع الطيار المدني ( عثمان ) و تقدم حق ندى و وافقت عليه .. الكل استناس و سوولها حفله صغيرة على قدهم لأنها كانت خايفه يصيرلها شي مره ثانيه .. بس الحمدلله ماصار .. فترة الملجة تمت 3 اشهر كانت ندى وايد مستانسة مع عثمان .. و صار العرس .. ادخلت ندى على زفة شيخة الزينات ( حسين الجسمي ) -

شيخة الزينات واجمل من خلق رب الوجود .. يللا يا ورد الجناين رحب باحلى الورود

اقبلت ربي يحرسها من نظر عين الحسود .. اقبلت احلى البنات واصدق واوفى العهود

شرفت اجمل عروس وبالدلال تمخطرت .. كنها عالغيم تمشي والدلع يزهى بها

من حلاها كل عين في محاسنها سرت .. ومن حياها تخطف قلوب الملا ولبابها

عذبة مثل المزون اللي بالاحساس امطرت .. هادية مثل النسيم اللي هدى باسبابها


- كان شكلها وايد حلو كانت لابسه نفنوف ناااعم مع طرحه مموجه من تحت التسريحة .. و مسكتها وايد ناعمه .. باختصار كانت طالعة قمر –

( أمل بهاليوم وايد بجت .. بنتها بفضل الله قامت من غيبوبتها و افرحت فيها عروس )

- ندى و اهي تمشي رايحه حق الكوشه ابتسمت حق امهاتها الثنتين ( أمل و فاطمة ) .. الكل كان مستانس فيها بهاليوم .. و بالأخص زوجها ( عثمان ) –

( بعد شهر العسل .. صارت ندى تسافر مع عثمان تقريبا بكل رحلاته .. افترو وايد دول .. و حييل كانت مستانسه معاه .. وبعد سنه يابت له ولد سمته سامي على اسم ابوها وكان الولد يهبل وكله صحه وعافية .. و فرح بعدها بجم شهر هم يابت ولد وسمته خالد .. و حمد على حطته وماتزوج للحين )
---

The End

بس بالأخير ليس كل مايتمناه المرء يدركه .. وهذي مجرد نهاية (( اتمناها )) واهي اللي بحطها بالكتاب ان شاءالله
بس النهاية الصجية كانت بالبارت اللي قبل هذا


مشكورين عالمتابعه

تحياتي
ⓡⓔⓡⓔⓩ

 

[ba6re8a]

لييييييييييييييييييييييييييش جذي جان صج صصصصصصصصصصصصصصصج



ريري ليلحين نددددددى بغيبوووووووووووبه يارب تقوم

 

[dlo3t^baba]

الله يسمع منج يارب
الله يقومها بالسلامه يارب

 

[بيـــشو17]

الله يوفقج يارب بالكتاب وانا اول وحده بشتريه بس قوليلي اول ماينزل والحمدالله على سلامت ندى ويارب الله يشافي كل مسلم ومسلمه:aha::eh_s(11):
والله يسعدهم ويوفقهم ويهنيهم يارب كلهم :wqedqw::e3:
مشكوووووووره حبيبتي ريرز صج صج القصه تعور القلب بس الحمدالله النهايه وااايد حلو:33_1185028183::balo::eh_s(21)::nbvppw:

 

[UNiQe^PRiNceSs]

اخييييييييييييييييييييييييييييييييييييه

رورو انا كل مره اكتبلج قصيده واعلق تعلييق كبر ويهي

بس هالمره امتنع عن التعليق بس اتمنى من كل قلبي ان الي قلتي كله يصير

وما راح اغني لوووووووووووووووول

احبج :friends:​

 

[3rbawia 7lwa]

الله خوش بارت وايد حلو ماشالله
الله يشافي ندى و قومها بالسلامة و تصير مثل النهاية الصجية

 

[ارجوان]

فديــــــــــــــــــــــــــــــــت هالطله ياريريز اشتقت لك ولرواياتك وان شاء الله ينزل كتابك بالسعوديه بشتريه واخليه ذكرى عندي والنهايه روعه وان شاء الله تصير حقيقيه يــــــــــــــــــــــــــارب


وبالتوفيق ياقلبي

 

[MeeMeeYoo_2]

اخيييييييييييه

جان زين صج هذي النهايه


الحمدلله على كل حال

يعطيج العافيه حبيبتي والله يوفقج

 

[صباح الليل]

الله يسمع منج وتكون هذي النهايه الصجيه

عسى الله يشفيها ويفرح اهلها فيها

امين يارب العالمين

خوش نهايه ريريز بس لاتنسين تعلميني اذا نزلتي الكتاب والله اني ناطرته على نار
عشان بس اذا ضاق خلقي اتسلى برواياتج.

 

[spongebob93]

ياارب انه تصير هالنهايه بالصججج :eh_s(2)::eh_s(2):
الله يشافيها انشاللله ويردها لأهلها ..
خوش نهايه تسلم ايدج

 

[^ليلاس^]

اي والله صاجه ليس كل ما يتمناه المرء يدركه

الحمدلله على كل حال والله يقوم ندى بالسلامة يارب

حلوة النهاية

تسلمين حبيبتي

 

[zooz92]

انا في البدااية عبالي صج النهااية

بس ان شاء الله تصير صج وتقووم ندى بالسلااامة يااااااااارب

يعطييج العااافية حبيبتي والله يووفقج ;**

 

[شيخهـ ..~!]

يا ريت تحقق هالنهاية وتقوم ندى بالسلامة يارب
الله يوفقج ريريز وتنزلين كتاب و اثنين و ثلاث بعد
ونشوف مسلسلاتج عالـ TV

 

[MC ANFAL]

a5eeeeh walla ana g3adt abchi jdaam omi
ya raaab hatha y9eer 2nshallah
allah ygaweem nda besalama

 

[so_what]

انشاء الله يصير هالبارت النهايه الصجيه حق القصه

 

[jtbnmk]

الله يقوم ندي بالسلامه يااارب
بس مادري اذا تتقبلين كلامي
افضل تخلين القصه على اخر بارت قرينه افضل
لانه انتي خليتي القصه نهايتها سعيده وعثمان مانساها وماندري اذا هذا صج ولا لأ الزمن قادر ينسي
اتمني ماتزعلين من كلامي حلو كل واحد يحط له نهايه في باله مو شرط كل قصه لها نهايه
وبالاخر اتمني ماتزعلين من اقتراحي:>
عاد يالله ناطرين جديدج

 

[قلب^الوله]

الللللللللله يسمع منج

وتسلميييييييين علي الباااااااارت

يعطييج العافيه

 

[zqertya]

انشالله تكون النهايه جذي وندى تصحى من الغيبوبه والله انه اخنقتني العبره لما قلتي صحت احس راح اموت من البجي اذا صحت من صج وانشالله يصير هالشي يااااااااااااااااااااااارب

يسلمو عالبارت

 

[readflawer]

الله يسمع منج ويصير هالشي

الله يشافيها ويعافيها

تحياتي لج