ريجيم اللوفات

[حيادر]

هاي بنات

بنات الحاجة ام الختراع

قصدي التجميع :dddds:

انا من فترة مادري شلون ياني كتيب المنيو مال لوفات
فيه كل وجبة وجم سعرها وعلى شنو تحتوي وجم كالوري فيها

وعليج الحساب

عاد قمت شسويت

سويتلي ريجيم منه

كااااااااامل

قلت بجربه اكيد اكيد عقب ملجة اخوي لان الحين المصاريف الصراحة زايدة مع تجهيزات الملجة وخلافه
يعني عقب عيد الضحى انشالله انشالله ببدى فيه صح ومع جهاز مشي ورياضة غصبا عن اللي خلفوني :dddds:

بيصك عمري 25 وجسمي جسم مرة متزوجة وعندها عيال
( لاتصدقون عاد جسمي مرتب حيل بس انا طماعة وويهي كله خدود ):krkrkr:




الحين
بحطلكم الرجيم حق اسبوع بس

واذا عجبكم راح احطلكم المنيو كلما وكل وحدة تسويلها ريجيمها اللي يناسبها ويناسب ذوقها بالاكل
وتقدرون تحصلون الكتيب من اي محل لوفات طبعا وكلوحدة تسوي ريجيمها

**********

اليوم الاول

الريوق:
ساندويتش جبنة لوفات ( 261 كالوري ) ......... 1.450 د.ك
+ شاي

********

الضحى طبعا ماي بس

********

الغداء:
سلطة سيزر الدجاج قليلة الدسم (265 كالوري)........ 1.600 د.ك
+ عصير برتقال
+ راب الدجاج تورتيلا (365 كالوري )....... 1.600 د.ك

*********

العصر شاي اخضر او عصير طازج وبس

*********

العشاء:
سلطة خضراء ( 162 كالوري ) ........... 1.300 د.ك
+ عصير ليمون ونعناع

**************

( ماني متاكدة بالضبط من سعرات العصاير والشاي بس بكذا موقع تبين ان :
عصير البرتقال = 90 كالوري
عصير الليمون = 70 كالوري
الشاي = 50 كالوري )
المجموع الكلي حق هاليوم =
1213 كالوري تقريبا ْ
5.950 د.ك

******************************************


اليوم الثاني

الريوق :
ساندويتش البروشتينا ( 341 كالوري) .............. 1.550 د.ك
+شاي
********

الغداء:
ساندويتش تونا ( 251 كالوري )............. 1.300 د.ك
+ سلطة جرجير (302 كالوري ) ............ 1.450 د.ك
+ عصير ليمون ونعناع

*********

العشا :
سلطة خضار مشوية ( 285 كالوري ) ............ 1.200 د.ك
+عصير برتقال

*****************************

المجموع الكلي حق هاليوم =
1339 كالوري
5.500 د.ك

******************************************


اليوم الثالث
الريوق:
خبز الافطار الطازج ( 572 كالوري )........... 1.200 د.ك
+شاي

********

الغداء :
بيتزا خضار لوفات ( 690 كالوري ) .............. 2.350 د.ك
+دايت بيبسي

********

العشا:
سلطة خضراء ( 162 كالوري )............ 1.300 د.ك
+ عصير برتقال

*****************

المجموع الكلي لهاليوم =
1424 كالوري
4.850 د.ك
************************************

اليوم الرابع:
الريوق :
راب الاومليت (317 كالوري )............... 1.350 د.ك
+شاي
**********

الغداء:
رافيولي الدجاج ( 375 كالوري )............... 2.050 د.ك
+سلطة قيصر بدون دجاج ( 182 كالوري ).......... 1.450 د.ك
***********

العشا :
سلطة جرجير ( 302 كالوري )............. 1.450 د.ك

*********************
المجموع الكلي لهاليوم =
1176 كالوري
6.300 د.ك

***********************************
اليوم الخامس :
الريوق :
ساندويتش الدجاج المشوي ( 380 كالوري )............... 1.550 د.ك
+شاي
***********

الغداء :
راب اللحم تورتيلا (356 كالوري )............. 1.600 د.ك
+سلطة الستيك المشوي ( 296 كالوري )........ 1.550 د.ك
+دايت بيبسي
***********

العشا:
راب الجبنة بالخس ( 70 كالوري )................ 1.450 د.ك

*******************************
المجموع الكلي لهاليوم =
806 كالوري
6.150 د.ك

*********************************

اليوم السادس والسابع ريجيم التمر واللبن للتخفيف وتغيير روتين الاسبوع :ggdw:


الميزانية حق هالاسبوع تكون = 28.750 دزك
وطبعا حطي بميزانيتج انج تشترين ليمون طبيعي وبرتقال علشان تسوون عصير بالبيت اوفر واضمن
وتشترون دايت بيبسي او دايت سفن يعني قولوا توصل الميزانية 30 د.ك

مو احسن من دايت سنتر اللي ياخذون 50 دينار بالاسبوع واكلهم ما يشبع _03BA:

ولوفات يوصلون للبيت :ggdw:



شرايكم

منو تتبرع وتبدي فيه وتواظب عليه
وانا انشالله انشالله عقب عيد الاضحى ببتدي فيه وبحطلكم يومياتي بعد :ggdw:
طبعا مو شرط تاكلون نفس اللي انا حاطته
كل وحدة تاخذ المنيو وتنقي الاكل اللي يعجبها بحدود المعقول واللي مايتعدى 1300 سعرة حرارية باليوم
وكلما قل وشبع كلما كان احسن



وحاليا بكمل بريجيم التمر واللبن الين عيد الاضحى
حتى لو خربطت بتم اكمل فيه خلاص
ضربت براسي فكرة ريجيم اللوفات

والفكرة حصرية لمنتدى كويتيات وبس :ggdw:

 

[شيخه***البنات]

شغل عدل حيااادر ... بس مصاريييييييف لوووووووووووول انا جذي برووح فيها .

عاد رفيجتي تقوول اكلهم اينن ..

انا اذا مثلا اشتهيت شي او مثلا كان عندي يوم فري اكل من دايت سنتر ..

يعني يوم اذا ابي اكل فري بحوول ماكل من هالاماكن دايت سنتر او لو فات ..

بس من وين هذي اللسته يايبتها شغل عدل هذذي ؟؟

و وين فرووعهم بالضبط ؟؟

 

[حيادر]

اهو مصرف مصرف
بس مادام تقولين اكلهم لذيذ
يبيييييييييله
انا الصراحة ماجربته بس من الصور سعابيلي ساحت :dddds:
مادري والله من وين ماخذه الكتيب
بس عجيب
كل اكله وحاطين يمها شكثر السعرات الحرارية وشكثر الدهون ومادري شنو
وجباتهم شكلها يشوق

مكتوب ان عندهم فرع بالجابرية وعندهم بالشعب البحري وبالافنيوز

رقمهم 22250666
والله خلاص عقب عيد الاضحى ببلش فيه

بدل لا اقط 50 دينار حق دايت سنتر واكلهم مايشبع
اقط 30 بالاسبوع وانا مرتاحة واشبع بعد _03BA:
واعد نفسي متعاملة مع شركة توصل

لان اهما يوصلون للبيت :ggdw:

 

[شيخه***البنات]

اهو مصرف مصرف
بس مادام تقولين اكلهم لذيذ
يبيييييييييله
انا الصراحة ماجربته بس من الصور سعابيلي ساحت :dddds:
مادري والله من وين ماخذه الكتيب
بس عجيب
كل اكله وحاطين يمها شكثر السعرات الحرارية وشكثر الدهون ومادري شنو
وجباتهم شكلها يشوق

مكتوب ان عندهم فرع بالجابرية وعندهم بالشعب البحري وبالافنيوز

رقمهم 22250666
والله خلاص عقب عيد الاضحى ببلش فيه

بدل لا اقط 50 دينار حق دايت سنتر واكلهم مايشبع
اقط 30 بالاسبوع وانا مرتاحة واشبع بعد _03ba:
واعد نفسي متعاملة مع شركة توصل

لان اهما يوصلون للبيت :ggdw:

والله احسن لج اذا تقدرين سويييه والله يووووووفقج ياااااااارب ...

 

[كويتيه بالرياض]

مشكووره اختي

طريقه حلوووووه
وارخص بعد خخخخخخخ

 

[مع حبي]

يعطيج العافيه

 

[حور العين 2008]

دشي

http://www.q8yat.net/showthread.php?t=122817

 

[^^اليتيمه^^]

انزينننننننن ليش ماتسوين سلطه بنفسج؟؟؟؟؟؟؟؟؟


بعدين سندويشااااااااات مثل تونا مايبيلها شي:>>>>>>>> شكلي بفتححححح محل دايت وابيع لكم

 

[The Boutique]

والله خوش فكره اوفر بحدود 80 دينار واكل اللي بخاطري

 

[أميرة حالمة 33]

اقول بنات

تقصون على نفسكم

خلو عنكم هالسوالف

باجر تشتركون وفوق الفلوس اللي بتدفعونها هم بتاكلون من اكل البيت

انا اقول يهديكم الله

وتبدون معاي رجيم المطوع 4+2+1

اسبوعين ونجرب

قبل لاتستعيلون وتحذفون فلوسكم

واذا فلوسكم زايدة عطوني اياها

وانا منكم وفيكم واولى من الغريب لووووول

ها شقلتو انا مبلشة بالرجيم من اليوم

 

[كويتيه دوم]

والله صج حيادر صاجه عاد انا من جم يوم طلبت منهم واكلهم صج اينن ومحسوب السعرات الحرارية وفكرت صج ان اسوي رجيم على وجباتهم اوفر واصح

عاد انا كان فيني دوده الا اشترك بوجبات الدايت كير او سنتر بس سعات البنات يذمونهم حنى يوم رسيت على دينا ولينا بعد همن عذربوا البنات فيهم وعلى قولت رفيجتي حرام عليج عطيني ال 200 دينار وانا اسوي لج كل يوم توست بجبن لووووووووول لان صج الشركات وايد غاليه لا والمشكله لازم تستمرين عشان تحصلين نتيجه طيبه والمشكله اكلهم سعات يجي ماصخ والا بارد ولا منكت بالبوكس

عشان جذي فكرت بااللو فات والحلو انه موجود بالافنيوز وانا مستعده احط يومياتي بالتفصيل الملل

اشرايكم عاد دعواتكم اضعف

 

[ام دانه]

:cxxxp:السلام عليكم انا ودى اسوى رجيم بس ما اقدر اصك حلجى كل ما زعلت اكل

 

[ام دانه]

انا بعرف الناس اشلون تسوى رجيم وتضعف يعنى شلون

 

[كويتيه دوم]

ويه خساااره يابنات لوفات مايوصل للمنطقه اللي انا فيها

 

[حيادر]

يالله بنات فوقه

انا بسويه انشالله عقب ملجة اخوي

يعني عقب عيد الاضحى او قبله بجم يوم


حور العين يعطيج العافية وفرتي علي:eh_s(3):

****
اليتيمة مالي خلق ادش المطبخ واسوي :cxxxp:
ابي شي جاهز :eh_s(3):

****

اميرة حالمة لووووووووول

انا صج صج فلوسي زايدة
اخذ مصروفي من ابوي لاني ما اشتغل للحين وفوقه اطر من امي لوووووووووول

وصج عاد ولا مرة قطيت فلوسي على شي سنع
كله على خرابيييييييييييييييييط :jumpon:
مالي ابدي ريجيم وانا اكون مسؤولة عن الوجبات
اشتريهم جاهزين احسن
وانا من زمان ودي اشترك بدايت سنتر بس الصراحة استغليتهم
ومادام في الارخص والالذ واللي يشبع ليش لا
بدل ال50 نقط 30 ماكسيمام ونشبع
والاحلى انهم يوصلون

اطلب وجبات اليوم كله من الصبح واقعد اكل فيهم طول اليوم
والكالوريز محسوبين
يعني تمام :fun22:

****

كويتية دوم لوووووووول

انا من زمان دودتي بردت واشتركت شهر مع هيلث واتشرز
كانوا اول شركة توصل اكلات ريجيم بالكويت
اول مافتحت الشركة اشتركت معاهم
هم كانوا 50 بالاسبوع
مانزلت وايد
السخيف بهالشركات انج تنزلين ببطء

يالله فوقه بجرب لوفات انشالله وبلتزم كنت ناوية اكتب يومياتي انشالله لان بمشي يوميا واقولكم لو خربطت او ماخربطت
يعني ابي متابعتكم لي :tek:

صج لوفات في مناطق محدودة يوصلون لها
انتي روحي الافنيوز واشتريلج اكل مال اسبوع :eh_s(3):

****

ام دانة
انا عكسج
لو تضايقت لو اقعد اسبوع بدون اكل عادي عندي
بس ماي وادوية
قبل فترة كانت نفسيتي زفت وقعدت 3 ايام بدون لا اكل ولاشي
بس ماي وبنادول وفيتامينات
نزلت 3 كيلوات بهال3 ايام




يالله بنااااااااااااااااات فوقه وحور العين ماقصرت
المنيو موجود كامل باللينك اللي حطته
ضبطوا ميزانيتكم وريجيمكم oster_av1:

 

[كويتيه دوم]

هاي بنات صج اني خربطت بالريوق اليوم شوي لان البنات بالدوام طالبين ريوق وحننوا عليا الا اتريق معاهم وانا ماصدقت لووووول



بس لا الاراده موجوده لحد الحين <<<<<<<<<<<طل


لالا صج رحت مريت الافنيوز وشريت لي غدا رافيولي جكن وسلطه سيزر وعطر اسمه صن ست يجنن طبعا اول مره اغامر وطلب عصير غير البرتقال لوووووول بس همن فيه برتقال

عباره عن عصير برتقال واناناس وفراوله

وها بنات اشرايكم احط لي يوميات رجيم لو فات او اكمل كتابه هني لهالموضوع

بس ها حطو ببالكم ترا همن تصرفين فلوس لان تقريبا طلبي باليوم يوصل خمسه دنانير او سته لو تضربينهم ب 30 يوم يطلع لج نفس تقريبا شركات التوصيل بس الحلو ان انتي تدفعين باليوم وحلو اكلهم وساخن ولو مععجبج لا تكملين مو ان تشتركين بشركه ويجيبون لج واول اسبوع تمام والباقي يخورونه ومايرجعون لج فلوسج


انا قلت بعد ان مثلا الريوق مجرد قهوه بالدوام ايا كانت والغدا اطلب منهم ولو بغيت سويت همن عندهم والعشا يا اشتري صمونه من حزت الغدا و اكلها بالليل بس احطها بالميكرويف واسخنها لان هم يغلفونها عدل او اتعشى عصاير او روب

لان مومعقوله اروح الافنيوز مرتين باليوم

واذا على الرياضه يكفي المسافه اللي من مصفط سيارتي لين المطعم

 

[كويتيه دوم]

ويه ويه ويه بدليه كتبت عطر صن ست لووول اظاهر خاطري بعطر

 

[حيادر]

لوووووووووووول قاعدة احاول استوعب

شربت عطر @@ لووووووووول


اي والله على قولتج
حتى لو مصرف بس اهون من باجي الشركات والاكل على كيفج ويشبعج ومايتعدى 1200-1300 سعرة حرارية

ويوم اللي تنضكين وماعندج ميزانية تقدرين تاكلين من البيت..
او خربطتي بالاكل يعني مثلا يوم تكونين معزومة او شي تقدرين تاكلين على كيفج وماتطلبين من اللوفات

وماتتحسفين انج قاطة همجة ومشتركة مع شركة وهم تخربطين باكل البيت

متى ما بغيتي تقدرين تشترين منهم

يعني لو بغيتي حق اسبوع او 10 ايام بس تقدرين تضبطين ميزانيتج

انا حسبتها فوق بالاسبوع وعلى حسب الوجبات اللي اخترتها يطلع بالاسبوع تقريبا 30

اهوا اقل من 30 لان حسبت حساب البرتقال اللي بشتريه علشان نعصر بالبيت ( ترشيد لوووووووووول)

وحسبت حساب دايت بيبسي مع اني ماحبه بس احتياط
يطلع كله مايتعدى 30 دينار


كتبي يومياتج هني احسن

ولما ابدى الريجيم نسوي يوميات يديدة بعدين علشان نشجع بعض واللي بيبدي معانا يبدي

 

[كويتيه دوم]

هاي بنات اول يوم رجيم

الفطور قهوه فرنسيه

الغدا

رافيولي دجاج معكرونة رافيولي طازجة محشية بالدجاج تقدم مع الطماطم , كوسة , صلصة الزيتون و أعشاب الريحان الصحية دك 1.850


العشا
ساندويش لحم سولير قطع من اللحم المتبل والمشوي مع صلصة الحامض حلو الخفيفة تقدم مع بصل, طماطم , مشروم , جبنة التشيدرقليلة الدسم الذائبة على خبز الباجيت الأسمر دك 1.500

 

[كويتيه دوم]

ومع الغدا نسيت اخذت سلطة قيصر قليلة الدسم (مع دجاج) دك 1.450