ريحة فروة الراس الكريهة هل لها من حل :(

[أمجاد الكويت]

السلام عليكم
بنات الله يخليكم انا تعبت من فروة راسي ما خليت شامبو ما خليت غسيل لين حت شعري كله علشان ابي ريحة فروة الراس تروح وانا شعري دهني استشوره هم نفس المشكلة

انا سمعت انه في شي يوخر ريحة الشعر بس مو وعارفة شنو اهو لا تقولون لي ليمون او خل تفاح كلش صعب

ساعدوني بنات الله يخليكم لانها تحرجني وايد هالمشكلة

 

[غلا الأيام]

واي انتي نفس حالتي

شوفي اشتري اي شامبو طبي حق الشعر الدهني من الصيدلية ترا اللي بالجمعيات كله خرطي

وخلطي مع الشامبو جاي الاخضر المنقوع واذا تتضايقين من الليمون حطي قفشة صغيرة ليمون معاه

وشرط شعرج حييل راح يتغير ويخف الدهون

وحبيبتي لا تاخذين شاور كل اشوي بيحت شعرج ولا تستعملين زيوت او ادهنين شعرج كل اشوي مو زين

واذا تبين ادهنين حطيه على شعرج نص ساعه او ساعه بالكثير

واذا تبين اسم الشامبو اللي استعمله لانه حده فظيع وما يدهن شعري الا بعد 3 او اربع ايام

وسلامتج وما اتشوفين شر

 

[احساس شفه]

رد : ريحة فروة الراس الكريهة هل لها من حل

آستعملــي آالســدر << روعــه للشعر




وآاللـه يحميـك يآرب

 

[كويتيه فرنسيه]

هذي مشكلتي قبل

بس لله الحمد لقيت الحل

شوفي اشتري سدر وكل ماتسبحتي حطي قفشه سدر مع مااي واخلطيها لان تصير مثل الشامبو وفركي الفروه عدل وتالي اشطفيه بمماااي والله تروح الريحه

طبعا معروف السدر مفيد خصوصا للشعر الدهني اذا تقدرين تحطينه كل اسبوعين مره او كل شهر تحطينه مثل الحنا او استمعلي طريقتي سهله مايبيلها وقت

دعواااتج لي

 

[أسرار الطبيعة]

هيد اند شولدرز

 

[ناتشوو]

رد : ريحة فروة الراس الكريهة هل لها من حل

اظن الحنة والسدر ينظفون فروة الراس من الريحة

 

[أمجاد الكويت]

رد : ريحة فروة الراس الكريهة هل لها من حل

غلا الأيام : يا بعد قلبي والله صج معاناة وترا انا ما ادهن كلش شعري والسبب اني اخاف ازيد من الطيبة بله انزين حبي شكثر كمية الجاي الأخضر وتنقعينه اكيد بماي بس شكثر بعد والله يعافيج لو تحطين لي اسم الشامبو مالج اكون شاكرة لج يا قلبي


احساس شفه : مشكوووورة فديت قلبج راح اجرب ان شاء الله


كويتيه فرنسيه : مشكورة حياتي وااااايد عاد تصدقيين عندي خووووش سدر بجرب اسوي طريقتج بس بعرف طريقتج الثانية هل تحطين السدر مثل الحنة ؟؟؟يعني تخلينه على راسج وبعد جم ساعة تغسلينه؟؟؟؟


أسرار الطبيعة : تصدقين انا عبالي بس للقشرة مشكوووورة حياتي


anood : قلبي انتي وحبي من وين تجيبنيه بالضبط لأن المشكلة عندي مو بنوع الشامبو انا مشكلتي الفروة نفسها اتصدقين شعري الباجي تكون ريحته شامبو

 

[أمجاد الكويت]

رد : ريحة فروة الراس الكريهة هل لها من حل

ناتشوو : حبي انا فترة جربت الحنا وحلوة بس بنفس اليوم يعني ان غسلت راسي عقبها مرة ثانية ترجع المشكلة

 

[اليسا كويتيه]

مادري حبيبتي بس اعتقد ان الريحه طلعت بسبب ان بشرة راسج دهنيه معناته تحتاجين تنشيف وانشاءالله شامبوو فاتيكا بالليمون وضد القشره يفيدج اختي فيها قشره وشعرها دهني حييييييييييييل فادها وغسلي شعرج فيها كل يوم وريحته تهبل وتعلق بالشعر
وبعدين اول ماتطلعين من الشاور وشعرج مبلل تبخري ببخور بخري شعرج واشتري الولاعه الى تشب البخور بالغلرفه عشان ماتظطرين تنزلين المطبخ وصدقيني ان ريحة البخور بتظل يومين بشعرج اذا بخرتيه واهو مبلل
وبعدين حطي عطر شانيل الخاص للشعر ينباع بدبنهامز والله ان بتصير رييييييييييييييييحته تهببببببببببببببببببببببببببببببببببببببل وادعيلي الله يوفقني

 

[وآحشنــي زمآنـك]

رد : ريحة فروة الراس الكريهة هل لها من حل

الليمــوون مو طبيعي فركي فيهاا فروه رآسج صج تحسينهاا شوي تحرق بس ريحتهاا إنتعــآش حدهاا ..


ولاا تربطين شعرج ولاا تلبسيين الملفع وشعرج رطب وبخرييه ..

 

[KOKO_284I]

رد : ريحة فروة الراس الكريهة هل لها من حل

انشاللله البنات يفيدونج

 

[om deaj]

انا كانت هذي مشكلتي لما كنت اعاني من القشرة

وهالشي يدل على انه شعرج دهني لازم تغسلينه كل يوم ولا تثيرين فروة راسج باللعب فيها او تمشيطها زيادة عن اللزوم

استخدمت شامبوات ونفعتني >> سل سن - وشامبو كلير للرجل وبالليمون

ومعلومة عقب الحمام لفي شعرج بقوطة لمدة 5 دقايق وعقب فليه خليه ينشف طبيعي او نشفيه بهوا وعقب سشوريه

وعندج الخمريات الي تعجبج ريحتها اشتريها وحطي منها

 

[كرز أخضر]

نقعي ملعقة سدر وملعقة حنا في لتر ماي لمدة 6 ساعات بعدين بتلقين الماي فوق والسدر والحنا بقاعة الماعون..اخذيه شوي شوي بدون ماتحركينه واعزلي الماي عن السدر والحنا واغسلي فيه شعرج..سويها مرتين او ثلاث بالاسبوع ..وان شاء الله بتختفي معاناتج.

 

[miss alreem]

الله يعين

 

[أمجاد الكويت]

رد : ريحة فروة الراس الكريهة هل لها من حل

الله يجزاكم خير بنات يعني تقريبا الاغلب اجمع على السدر والليمون
خن نشوف بعد راي البنات الباجين ياريت يعطونا تجاربهم بمثل هالحالة

 

[@الياسمين@]

انا رايي مثل البنات اللي قالوا عن السدر
اهو فعلا زين غسلي شعرج فيه
انتي مشكلتج ان فروة راسج دهنيه عشان جذي تطلع ريحه
نصيحتي لج استمري عالحنه مرتين بالاسبوع وراح تكون انشالله افضل علاج حق مشكلتج
لان ماشالله صج مفعول الحنه عجيب حق الشعر وعلاج لكل مشاكل الشعر

 

[مس كرز]

رد : ريحة فروة الراس الكريهة هل لها من حل

حني شعرك كل اسبوع وحطي ليمون وسدرمعا وشوفي شلون يتغير ان شاء الله وادعيلي يا قلبي الله يخلي زوجي وعيالي واهلي امين

 

[كويتية بروما]

روحي طبيب جلديه اخاف فيج فطريات او بكتريا لان على كلامج ريحه فروه الراس فايحه يعني اكيد في مشكله كلنا شعرنا دهني بس الريحه ماتفوح او تطلع
الله يشافيج

 

[نوفاتي]

رد : ريحة فروة الراس الكريهة هل لها من حل

الحنه والسدر

 

[أخصائية تخاطب]

تغلي لتر ماء و بعد الغليان تحطي عليه ملئ اليد من البابونج
و تتركيه ينقع يوم و بعد ذلك تصفيه
تحطيه في بخاخ و تبخي منه شوية على فروة الرأس كل يوم مرة

و شوفيالنتيجة الروعة , يقلل التساقط و يمنع الرائحة تماما