سألتوا نفسكم هالسؤال مره !!

[هاديه وايد]

صباح الخير


شلونكم !!



بنات حبيت اليوم اطرح عليكم سؤال

هل مره سألتو نفسكم ان بالمنتدى بنات يعانون من الصم والبكم !!

او من الصم بروحه


انا بكتب عن حالتي الخاصه انا عمري 21 سنه ومصيبه بالصم من عمر معين

بس الحمدالله واحمد ربي على فضله علي و اختباره فيني انا جدا مؤمنه بربي و صحيح اني فاقده حاسه السمع ولكني مو اخر الدنيا

بالاول كنت ما احب اقعد مع احد لاني احس نفسي عاجزه و ما اقدر افهم فا كنت كله بروحي لكن الحين عادي قاعده اتجاوب مع حياتي

وعلى قولتهم عايشه بدنيتي و حامده ربي على نعمه علي

طبعا انا مو موظفه لكن معاي شهاده الثانويه وخذيت دورات وايد تتعلق بالكمبيوتر لانها تصلح لي واقرب شي حقي و اطبق عليها كل شي



وبس باختصار هذي حياتي


بس في شي دايما يزعجني ان الناس تنظر لفئه الناس المصابين بالصم والبكم انهم مو قادرين على شي لا اههما شطار و قادرين


وانا لي صديقات من فثه الصم والبكم و نطلع و نروح و ندش سينما و نروح مطاعم بس يزعجني نظره المجتمع لنا ما ادري ليش خصوصا لمن نسولف بلغه الاشاره كأنهم اول مره يشوفون ناس جذي



انتو شرايكم اتمنى التفاعل لان احنه بجد نبي نصير مع المجتمع و يشوفونه حالنه حال الانسان العادي

 

[ترانيم الروح]

صباح الورد

انا بصراحه ماعمره جاء علي بالي هالسؤال
واذا كنتي ماتسمعين ياقلبي انتي مثلنا مافيك شي كامله والكامل الله

ماشاء الله عليك تطلعين مع صاحباتك وتروحين وتجين وربي الاصم او الابكم او مهما كانت اعاقته احسن بكثير من اللي مافيهم شي واذا علي المجتمع هاذا مجتمعنا جاهل الي الان
وعندك اكبر مثال الداعيه عبد الله بانعمه شوفي حياته اول والحين سبحان الله

وعيشي كل يوم بيومه

 

[سفييره الكويت]

معروف الابتلاء هو كفاره للذنوب وزياده للحسنات..!

كم من انسان صاحي اصبح مشلول ولكنه استطاع ان يكمل الحياه

الاهم التأقلم مع الحياه ونعيشها كما يجب الا ان يتوفانا الله سبحانه

الحمد لله على كل حال

 

[توايلا]

م قد سالت نفسي هالسؤال

بس جد شي احسن من شي

 

[المرتاحة]

سبحان الله

عاد انا احياناً اتساءل في نفسي و انا اتصفح المنتدى اذا في عضوات صم بكم

اختي ما عليج من الناس

ترى في فئه من الناس تنقد على كل شي مو بس الصم البكم.. شافوا وحده متينه خزوها واذا شافوا وحده قصيرة همن خزوها شافوا وحده سمرة همن خزوها و اذا شافوا وحده بيضه خزوها

بعدين ترى مو كل من طالعكم معناته ينتقدكم.. يمكن معجب فيكم مثل حلاتي ..بس طبعا ما اخز و اضييق صدور الناس.. اطالع نظرة خاطفه

و بصراحه بيني و بينج انا مره في مطعم شفت واحد من فئة الصم البكم و قاعد يسولف مع رفيجه لغة الاشارة وايد انبهرت منها ما شا الله عليه..تعجبني لغة الاشارة بس ما اعرف منها الا كلمه وحده اهي"الكويت" ههههه وحاولت اتعلم بس تكيسلت محد يشجع اسولف معاه

اختي ما عليج من احد وما عليج من اي كلام سلبي ترى محد مرتاح من "المثبطين" حتى الناس الصاحيه مو مرتاحه منهم

كفو عليج والله ..طلعي مع الناس ولا تنخشين خليج مثل المنخل ..انخلي الكلام الزين و الكلام الشين قطيه ورا ظهرج

وعسى الله يوفقج يااارب

اقري هالحكمة نزلتها من فوني واديم اقراها

:eh_s(7):

 

[كراميلا مرة]

انا ماجاء على بالي هالسؤال
بس قريت مره موضوع بنت تقول انها سمعها خفيف
وسبحان الله ياخذ شيء ويعوض بشيء ثاني
انا دايما اللي اشوف عندهم اعاقه في مجال يصيرون مبدعين في مجال ثاني
والناس يا حبيبتي بتتعبين معهم
مايعجبهم العجب حتى لو كنتي صاحيه ومافيج شيء بيدورون شيء ينتقدونه
فعيشي حياتك وتركي الناس عنك

 

[حلوة الكويت_]

هادية
انتي انسانة و ما تختلفين بشي عنا
و هذا اختبار من الله عزوجل اشكري ربك دائما و قولي الحمدالله على كل شيء
اهنيك على جرأتك يا قلبي
و عسى الله يوفقج حبيبتي

 

[حلوة الكويت_]

و ابي اضيف شي ثاني
ترا ما حد يتكلم عن حد الا اذا كان غيران منه وانشالله انتي عندج ثقة بروحج و لا تهتمين لحكي الناس
موفقة حبيبتي

 

[معلمة شيسمونه]

عادي حبيبتي انتي انسانه طبيعية مارسي حياتج مثل ما تبين

انا لي صديقات وايد عندهم عجز باشياء مختلفه لكن ما اشوف هالعجز البسيط منعهم

يعني عندي صديقة عمري كفيفة .. وكانت زميلتي بالجامعه .. وكنت عادي اتحرش فيها واخليها تشيل كتبي لاني كنت امسكها واوصلها لقاعات المحاضره .. يعني ما كنت اشوف انها عاجزه ابدااااااااا بالعكس وهي ما شاء الله الحين معلمة لغة عربية بمدرسة المكفوفين

وغيرها وايد بس انا ضربت لج مثل قريب مني

انا معاج ان انتم مظلومين بالناحيه التعليمية وناحية العمل وتستاهلون تشتغلون باماكن افضل
لكن ما اشوف انه هالشي يمنعج كملي طريقج وتعليمج هو اللي بينفعج لا توقفيــــــــــــــن

وبالنسبة للناس لا تهتمين لهم انتي ما شاء الله عليج مبين انج واعيه وعندج اسلوب من طريقة كتابتج وصياغتج للموضوع

والناس اللي حولج وتشوفينهم بالمجمعات عقليات مختلفة لا تظنين انهم كلهم فاهمين

اسعدني موضوعج واسعدتني مناقشتج حياج خيتووووو​

 

[PuPa^^SWeeT]

الصراحة ماخطر ببالي هالشي


لا عمى ولا بكم و صم و اي شي من الصعوبات اللي اتواجه الانسان


اللي افكر فيه اخلاق العضوة اكثر من شكلها و مظهرها



وربي يوفقج بدنيتج و يبعد عنج الاحقاد و الابتلاءات

 

[عادت ذكرياتي]

هذا مو عجز بالعكس إنتي تقولين تطلعين وتروحين ومتعلمة ما شاء الله عليج غيرج مشلول أو مصاب بجلطة وعايش حياته في المستشفى ...


الله يوفقج حبيبتي

 

[فطوم 84]

حياتي انتي بعكس انتي الله يحبج اكثر منا المومن مبتلي )والله سبحانه اذا حب عبد ابتلاه سبحانه )))فلا تتوقعين انه احنا ننظرج نظره غير عنا بالعكس والله انتي نفسنا والصم والبكم. حيل انا اشوفهم مختلطين بمجتمع انا مره شفت كتاب للغه اللي يتكلمون فيها وتعلمت منها حبيت اني اعرف هاللغه وحسيتها سهله وترا صدقيني لما نطالعكم مو لانه فيكم شي حشا. بس ممكن نشوف الكلام شنو معني هالحركه فهمتيني بالعكس وايد بنات مبدعات في مجلات وايد ومايهتمون لاي اعاقه بجسدهم لانه الاعاقه بالعقل والتفكير عند الناس الجهله بعقلهم وبتفكيرهم ))اما انتوا بنظرنا كاملين والكامل الله وعجبني كلامج والله واعتبريني بهالمنتدا من صديقاتج واتشرف. فيج. حبيبتي

 

[ام فلاح7]

انا خطر على بالي السؤال هذا كثير ,, هذا ابتلاء من رب العالمين/size]​

 

[كسرنى الهم]

الحمدالله على كل حال انه مامره خطر على بالى هسؤال
بس بلعكس الله ياخذ ويعطى وانتى مشالله مقتنعه وعارفه انه مافيج شي كاااامله مو ناقصج شي
بس البعظ يمكن لازم هنظره الى مالهال داعى

 

[قمر بيت أبوها]

شوفي دام المشكله عندك بالسمع مافكرت تسوين زراعة قوقعه الأذن او تركبين سماعه خارجيه
وماادري عندنا بالسعوديه تقدم قوي لصالح المعاقين واللي عندهم مشاكل صحيه يمشي لهم راتب واعانات كل فتره ولهم حق بالوظائف بمراكز حلوه وشغلهم كل علي الكمبيوتر
ومن ناحية سوالك انا دايم افكر ان معانا من الفئه ذوي الاحتياجات الخاصه هالشي دايم يجي في بالي والله
واعرف كم وحده عمياء بس ماشاء الله عليها اسنع منا ونظيفه نظافه ماشاء الله
واعرف قريبه لجارتنا ماتسمع وسوت زراعه بس ياقلبي ماعاد تتحمل الاصوات تعودت علي الصمت
واعرف وحده من صديقاتي من اهل الشمال عندهم وراثه بهالشي تقول والله العظيم اخواني واحد اصم والثاني اعمي متزوجين من بنات عمهم وعندهم نفس المشكله
بس تدرين ماشاء الله عليك متعلمه وهالشي يدل علي انك فكرتي لقدام
الله يوفقك ويسعدك ويرزقك الوظيفه والرجال السنع يارب

 

[Tom ♥ Jerry]

.


ماشالله عليج تبارك الرحمن َ

الصراحه انا صارلي فتره طوييييله حيل بالمنتدى
و آول مره اقرا مثل هالموضوع او اشوف مثل هالحاله ..

الله يعوضج باشياء ثانيه .. دايما اسمع انه الي عندهم مشكله بالصم او البكم
الله يعطيهم اشياء ثانيه .. و كافي ارادتج الحلوة
و كل مالج تصعدين فوق بالعالي

لا ياثرون عليج الناس ! و كملو مسيره حياتج
روحي و تعالي و تعلمي و وصلي اعلى المراكز ..
اقري عن حياه العظماء اغلبهم يعانون من شي معين .. !
ماكو شي مستحيل :*


الله يوفقج يارب

 

[هاديه وايد]

اشكركم كلكم على ردودكم المفرحه للقلب فعلا وانا جدا فخوره فيكم لان لقيت اللي يرد عالموضوع وهذا دليل ان يهمكم الموضوع

بالعكس بنات والله العظيم و الله فوقي يشهد انا لمن كبرت وعرفت ان هذا بلاء من ربي واختارني انا من بد هالبشر اكيد فرحت

ما يضايقني ابدا يضايقني بس ان بخاطري اسمع اصوات عيال اختي وصوت القران الكريم لمن اروح المسجد اصلي ايام المسجد الكبير بالتراويح الله يا زينها من ايام وصوت ولدتي ودي اسمعه مره ثانيه بس الحمدالله اني سمعت هالاصوات الا اصوات الاطفال اللي عندنه اللي اهما عيال خواتي يا حلوهم الله يحفظهم


وصدقوني انا الحمدالله الحمدالله مو منزعجه من هالشي و بالنسبه حق اللي قالت ازرع او احط سماعه السماعه ما تنحط حق اللي مثل حالتنه لان من الاساس ما نسمع تنحط حق اللي اهما سمعهم بسيط جدا موجود السمع ولكن بنسبه قليله جدا هذول ممكن يستخدمونها اما اللي مثل حالتنه ما نقدر

و زراعه القوقعه هم ما اقدر لظروف علاجيه و ما يصير

بس جدا متضايقه من عدم الدراسه مافي مدارس خاصه لنه ويقولون لنه وين تشتغلون ما تسمعون والشغل بالكويت كله مراجعين ومن هالامور فا صعب واايد

لكن انا حاليا بحثت وبحثت لقيت في مجموعه اطفال بحضانه هم من فئه الصم والبكم وبا اني دارسه لغتنا الصم والبكم فا تبرعت اني اعلمهم انا و زميلاتي العزيزات بدون مقابل مادي ولا شي نبي نلعب و نستانس وندرسهم

هههههههه

اهم ما في لامر ان اخر شي الدراسه لا لا اتغشمر لكن اكيد هذا بمصاحبه المعهد للصم والبكم بيعطونهم دروس تكثيفيه اكثر

والله يارب يسهل

بنات انا السؤال اللي دايما يزعجني وساعات يخليني متضايقه ان اقرب الناس لي من عايلتي يعني بنات خالتي و بنات عمي احبهم ويحبوني وايد بس كله يقولون لي انتي سعيده لان دايما بروحي وحتى لو اقعد معاهم بس ابتسم واقعد يقولون لي انتي شلون عندج كنترول تبسمين على جذي عادي عندج احنه نسولف وانتي ساكته تكلمي دام تقدرين تتكلمين لكن انا صرت قليله الكلام اصلا كله استخدم الاشاره و صوتي صار خفيف جدا ما احب اتكلم احب اكتفي بالابتسامه

لان حتى لو اتكلم ما اسمع صوتي
فا ما احب اقع في الاحراج حتى لو مع نفسي لاني عارفه نفسي اقدر اعمل و اسوي حتى لو ناقصه عندي حاسه واللي خله عندي هالثقه والعزيمه والاستماريه فيها دكتور بريطاني للصم والبكم شفته في هولندا في مركز للصم والبكم هناك


اهما ينزعجون من جذي مع ان امي و ابوي وخواتي و اخوي يكلموني بالاشاره وافهم واريح لي انا

بس ما ادري ليش تهقون ليش يحبوني اهما عشان جذي يسألوني كله عبالهم كاسره خاطرهم مع ان انا وايد عادي عندي وراضيه ولله الحمد

ويسألوني عندج هوايات اقولهم انا انسانه مثلكم عندي هوايات شكثر مثلكم والبس واحب اشتري

بس بجد انا نزعج من هالاسئله

ما يحسسوني اني عاديه مثلهم وانا صراحه اعتبر نفسي حالي حال البنات و واثقه بنفسي الحمدالله وراضيه كل الرضا عن ابتلاء ربي كل الناس عبالهم انا مكسوره الخاطر !!!!!!!!

 

[زَهر تِشرينْ]

.. }



​

ماشاء الله تبارك الرحمن ما أقدر أقول إلا أنك أنسانة
رائعة بكل مَعنى الكلمة ولك قلب وإحساس فريد من نوعه ,,
ويكفي هالقلب الشفاف الطاهر الي راضي في قضاء الله تعالى
يمكن ناس كثيرة من البشر الي عطاهم الله نعم فوق تصوراتنا ومع هذا دايماً عايشين في هم وغم وحسرة وحقد وحسد لغيرهم ,,
..
الي مثلك المفروض يكون مَثل أعلى يحتذى فيه لأن الي مثل
قلبكِ ماشاء الله عليكِ حبيبتي نادر وجوده في هالدنيا ,,
..
وانتي قاعدة تتكلمين عن نفسك تخيلت إبتسامتك الجميلة المشرقة الي اكيد تبعث في نفوس أهلك وكل الي يحبونك
السعادة والفرح ,,
..
عيشي حياتك حبيبتي بحلاوتها وجمالها ومثل ما تشوفينها
بنظرتك البريئة الطاهرة وارمي اي شئ وراء ظهرك من النظرات الغريبة او التساؤلات الي تضايقك وتتعبك ,,
واحمدى ربك على انه اعطاك هالروح الجميلة والقلب الي
هو كنز بحد ذاته ,,
..
عظيم تقديري لك يالغالية { :eh_s(17):​

​

{ :eh_s(17):
​

 

[هاديه وايد]

.. }



​

ماشاء الله تبارك الرحمن ما أقدر أقول إلا أنك أنسانة
رائعة بكل مَعنى الكلمة ولك قلب وإحساس فريد من نوعه ,,
ويكفي هالقلب الشفاف الطاهر الي راضي في قضاء الله تعالى
يمكن ناس كثيرة من البشر الي عطاهم الله نعم فوق تصوراتنا ومع هذا دايماً عايشين في هم وغم وحسرة وحقد وحسد لغيرهم ,,
..
الي مثلك المفروض يكون مَثل أعلى يحتذى فيه لأن الي مثل
قلبكِ ماشاء الله عليكِ حبيبتي نادر وجوده في هالدنيا ,,
..
وانتي قاعدة تتكلمين عن نفسك تخيلت إبتسامتك الجميلة المشرقة الي اكيد تبعث في نفوس أهلك وكل الي يحبونك
السعادة والفرح ,,
..
عيشي حياتك حبيبتي بحلاوتها وجمالها ومثل ما تشوفينها
بنظرتك البريئة الطاهرة وارمي اي شئ وراء ظهرك من النظرات الغريبة او التساؤلات الي تضايقك وتتعبك ,,
واحمدى ربك على انه اعطاك هالروح الجميلة والقلب الي
هو كنز بحد ذاته ,,
..
عظيم تقديري لك يالغالية { :eh_s(17):​

​

{ :eh_s(17):
​

اشكرج جزيل الشكر على كلامج الرائع اللي مثل صاحبته ,,الحمدالله انا راضيه كل الرضى على ابتلاء ربي سبحانه

صحيح كلامج ان في ناس عايشين في هم وغم رغم ان الدنيا جميله و حلوه في ناسها

والله كثير علي ان اني اكون مثل :eh_s(22):

بس بجد انا اشكرج

الحمدالله ترا الابتسامه جميله و لها معاني كثيره و كل معانيها تعبر عن السعاده والراحه وانا اعشق الابتسامه ودائما مبتسمه عشان اجعل اللي جدامي مبتسم مثلي


ان شالله باذن واحد احد اساسا انا احس نفسي سعيده وراضيه بحياتي واقربائي و زميلاتي يعني مستانسه الحمدالله

ارجع اجدد شكري مره ثانيه واشكرج واايد وايج على اهتمامج بالموضوع يالغاليه

 

[زَهر تِشرينْ]

.. } ​

​

يرفع الموضوع لروعة صاحبته
باركها الله ووفقها لكل خير وأسعد قلبها ..}​

​

{ :eh_s(17):​