سؤال حق طلاب كلية الحقوق

[Fa6Ma6]

قووووة :ada:

شلونكم شخباركم ؟؟


اليوم أنا ياية أسأل جم سؤال حق الناس اللي تدرس بكلية الحقوق بجامعة الكويت ,,

لأني سألت وايد و كلمن يقولي " يقووووولووووووون ,, " يقولون يا بو حظين

المهم ما علينا ,, أنا ألحين خريجة و طموحي كلية الحقوق ,, بس محد من أهلي مشجعني كلش كلش يقولون لي صعب و ما بتقدرين و كيت و كيت ,, بس ما لقيت ناس مجربة عشان آخذ منها صحة المعلووومة

فما عليكم أمر اللي عندها أي شي متأكدة منه خل تفيدني ,,, عشان اشوف اذا يسوى اشد حيلي و لالا

المهم ,, اسئلتي ,,


جدولي يكون زاهب و نازل بروحه و لا أنا أحط مواد ؟؟ و اذا الجدول زاهب جم مادة بالكورس ؟؟

لا سمح الله اذا سقطت بمادة شنو الاجراء اللي راح يصير ؟؟

جم سنة الدراسة ؟؟

جم يبون معدل القبول حق البنات الأدبي ؟؟

شلون دكاترة جامعة الكويت ؟؟

في صيفي ؟؟

و بالنهاية شلون مناهجهم صعبة و لا يبيلها واحد عبقري ؟؟؟

و أبي نصيحة حلوة بما إنه طموحي ادش هالكلية
و يعطيكم العافيييييية انطركم​

 

[garga_girl]

هلا فاطمه اول شي مبروك عالتخرج وانا الحين بشرحلج كلشي عن الكليه

معني توني بروح سنه ثانيه بس ان شالله اكون عندي كل المعلومات واعطيج المعلومات الكافيه

 

[garga_girl]

اول شي نظام الكليه نظام سنوات يعني ماكو تخصص بالكليه تاخذين مواد كل التخصصات الا وهي:

القانون العام - القانون الخاص - القانون الجنائي - القانون الدولي

وتاخذين كل سنه مواد من كل التخصصات

اول شي لي انقبلتي ان شالله يسوونلج مقابلة شخصيه وبعدين يقبلونج بالكليه وهالمقابله بس جذي كل من ينجح فيها

انزين نيي حق التسجيل المواد انتي ما تختارين مواد يعني ماكو شعب مصكره تختارين الماده اللي تبين نفس اللي نظام كورسات

عندنا كل سنه لها موادها وكل الدفعه ياخذون نفس المواد

وفي امتحانات اعمال سنه سهله واعمال السنه عليها 40 والفاينل عليه 60

والفاينل يكون موحد كل الدفعه نفس الامتحان وتمتحنين بكمية الكورس الاول والثاني يعنس مال سنه كامله والتصليح يكون تصليح الكنترول يعني يغطون الاسامي ودكاترة الماده يصلحون الامتحانات بدون لا يشوفون الاسامي يعني ماكو واسطه :dddds:

بس الكنترول يشوف الاسامي.

هممم شنو بعد

من ناحية السهوله والصعوبه لا تحاتين كلشي تدرسينله بيصير سهل

واذا بتدشين شي حابته وتبينه دشي ولا تسئلين اخاف صعب ومادري شنو وما عليج من كلام الناس دام حابته بيصير سهل

والدراسه بالكليه وايد حلوه والمواد حلوه والدكاتره زينين شديدين شوي بس طيبين وحبوبين

والكليه كلها دكاتره مافي دكتورات حريم يعني ماكو نحاسه واعصاب مالت الحريم :dddds:

بس في 3 مادري 4 دكتورات ولا تحاتين احسن من الدكاتره كلهم طيبين... الا وحده !!

عشان اكون صريحه معاج اول سنه راح تكون صعبه لأن مو متعوده على نظام الكليه الا اذا كنتي ثانويه عامه

بس احنا المقررات كنا يايين ومتعودين على نظام المقررات حده غير

اول سنه راح تكرهين الكليه وتتحبطين ومن طريقة تعامل الدكاتره وشي يديد بس انا متأكده ان هالشي يصير بكل الكليات نظرا لأن الانتقال من حياة الثانويه (المدرسه) الى الحياة الجامعيه فيه تغيير وايد وايد كل من يوله على الثانويه اول شي بس انا الحين اقول الجامعه مليووووووووون مره اونس واحلى من الثانويه حتا وانتي تمتحنين ولا تدرسين اونس من الثانويه وانتي تلعبين :gathering: حده فرق

يعني باختصار انا مابي اقص عليج واقولج الكليه وايد ماي وبعدين تدشين وتدعين علي :eh_s(6):
من الحين لازم تعرفين ان كميات الكتب كبيره يعني انا الحين بروح ثانيه عندنا 8 مواد والمواد من 500 الى 700 صفحه حق كل ماده بس جنه فيه محذوف مادري اذا ثانيه فيه محذوف ولا لا اللي بخلصو ثانيه يقولولنا :eh_s(1):

ولا اقولج انها صعبه مثل الكليات العلميه لا الكليات العلميه وايد اصعب

اهي سهله وفيها بهارات صعوبه :eh_s(6):

وترا كل الكليات بالجامعه يبيلها دراسه لا تحطين ابالج انج بتدشين الجامعه وبتصير نفس الصانويه

كل الكليات يبيلها مجابل

يعني الكليه يبيلها مجابل بس ترا سهله

وطريقة اسئلة الامتحانات غالبا تكون على قضايا حدها تونس وعجيبه مو اللي يصير الامتحان ممل وبس سؤال وجواب لا احنا من أولى عطونا قضايا يعني وانتي تحلين جنك قاعده تحلين مشكله صجيه

والدراسه حلوه وممتعه وكلها اشياء تفيدج بالحياة

واخر شي اقولج سهله لحد يقص عليج ودشيها وان شالله بتمشين وراح تتخرجين وانا اللي ما احب الدراسه اقولج سهله

ولا تنسين ان مستقبلها حلو يعني تحملي 4 سنين وبعدين ترتاحين انا وحده تصيرلي توها هالسنه تخرجت تقول وايد حلو مجال الشغل فيها وايد اماكن في

والله يوفقج للي فيه الخير لج وان شالله نشوفج بالكليه واي سؤال انا موجوده

 

[garga_girl]

اي صح نسيت مواد الكليه مافي صيفي

الصيفي بس حق العربي والانقليزي والفرنسي يعني المواد المشتركه

واحنا من اول ما تدشين يعطونج مواد الكليه او مواد التخصص ماكو مواد تاريخ ورياضيات ملوت باجي الكليات بس مواد تخصصنا

بس فيه ماده مالها داعي اسمها مبادئ اقتصاد سياسي داشه بالغلط

وانتي شدي حيلج ورفعي معدلج عشان تروحين المكان اللي تبينه ودام اخر سنه يسوى تحملي والحين كلشي صارو ياخذون معدلات عاليه

واذا تبين نصيحتي كمجربه :klhfl:

دشي الكليه ولا تحاتيتن لانج لي دشيتي راح تحبينها وايد:ggdw:

 

[قرة حسن]

بالعكس حبيبتي اخذيلج تخصص نادر وحلو ومقبول
ولج هيبه كبيره بالنسبه للحقوق ويسمونج حقوقيه
وانا عن نفسي درست دبلوم قانون روعه والحين انا بكالريوس حقوق تحسين جنج بمحكمه وتدرسين شعور حلووو
انصحج ما تغيرين تخصصج لأنه قوي ومقبول ولا تتجهين صوب الاداره ما الاداره نبي محاميات وايد بكويت

 

[محاميه الغد]

حبيبتي مالج شغل بالناس
اهم شي سوي الي بالج
و دخلي الكليه و انتي واثقه من نفسج و قدراتج
بعدين الكليه مو تعجيزيه
يعني يبيلها دراسه
خاصه اذا درستي و جابلتي بتمشين فيها
شدي حيلج و نبيج معانا السنه اليايه انشالله

و الشي اذا حبيتيه راح تنجحين فيه صدقيني

 

[Fa6Ma6]

الصراحة انكم صخر

معاناتي وصلو السقف ..

بعد عمري ما قصرتوووووو كفيتو ووفيتو

يعطيكم العافية

 

[L a w y e R]

ماراح ازيد على كلام خواتي

كافي ان هالكلية ماتقبل الا الصفوة انا اسميهم

يعني باختصار ماتقبل الا المتفوقين

وهذا بحد ذاته شي كبير ينحسب لنا وللكلية

شدي حيلج وموفقة انشالله

وعقبال ماشوفج زميلة حقوقية معانا بالكلية

 

[القلوب الساهيه]

مو صعبه ومو سهله يعني يبلهاا مجاابل وحطي بالج دامج حابه المجاال رااح تمشين فيه لانج لوو دخلتي تخصص لو انه سهل وانتي مو حابته مراح تمشيييين فيه .... ودراسه ينطبق عليهاا نفس الحجي

 

[سمور]

سلام بنات
ممكن اعرف احسن الدكاتره فى الكليه انا مستجده ساعدووووونى