سؤال وفضفضه عن الرضاعه الطبيعيه

[frfr]

بنات شلونكم مع الرضاعه أنا صج ما توقعت الرضاعه الطبيعيه جذي صعبه
ويبيلها صبر وتحمل قوي

أنا يوم كنت بالاربعين الرضاعه كانت وايد احسن من طلعت من الاربعين وانا كل يوم اقول
هذا اخر اسبوع ارضع فيه المشكله انه بنتي تعودت عالمميه ما تبي صدري يعني اشفط لها
تشرب بس من صدري لا و لحد الحين صامده اعطيها من صدري طبعا عقب بجي لمن تقتنع
واشفط لها حق بليل

سمعت عن حلمات بليتكس playtex ينفعون حق بنتي؟ صج تخليها ما تتعود عالمميه؟
والشي الثاني متى ارتاح متى احس الرضاعه متعه وبنتي تشرب من صدري وبدون اي
تعب أنا الحين بيصير لي شهرين ولحد الحين احس الرضاعه جهاد مو شي طبيعي وروتين
يومي

 

[frfr]

شكله محد يرضع كله صناعي

 

[Zaina-al-zaina]

ههههههههه صاجه الاغلبيه صنااااااعي

الرضاعه الطبيعيه احسن بوايد بس مثل ماقلتي يبيلها خلق ههههههههه

واحنا يابنات هالجيل ماااااالنا خلق ومافينا صبر ....


انا بنتي ماتبي صدري كلش ،،، حبت الصناعي تمنيتها تشرب من صدري
بس مااااااكو فايده ....

الله يعينج ع قولتهم لازم بكون صدرج مدرارر وتشيل الفريزر وتخلين فيه الحليب
وطلعي لج الحليب عشان يدفا قبل بفترااا

واذا انتي تبين ومصرااا ان البيبي يرضع من صدرج
لازم تاكلين وتطولين لي ماتسلم بنتج بالامر الواقع وماتلقى الا صدرج
وانتي ساعديهااااا.....

 

[frfr]

والله أنا قاعده أحاول بس ما يندرى ليمتى اصبر

 

[нάγoηά cнεмίsтяγ]

بالعكس حبيبتي انا والله عكسج

ماتعبت بالرضاعه الطبيعيه كثر ما تعبت فيها بالنفاس

يعني عادي بنتي سمالله عليها طول اليوم على صدري و ظهري كان يتكسر وجرح القيصري من القعده نغزات و عوار

اسمالله عليها ما تكمل الساعه الا تبي صدري تفحط بجي والله كان هلاك هلاك عسى الله ياجرنا

من طلعت من النفاس هم تعب حييييل بس اخف من النفاس لان عدد رضعات البيبي كلما كبر كلما تقل ف كلما تكبر بنتي كلما اسمالله عليها تنام اكثر مع انها ميننتني بنومها المقطع بس شسوي

ك تجربة جربتها الرضاعه الطبيعيه اريح من الصناعي لان لو فز البيبي نص الليل وانتي نايمه مجرد ما تعطينه صدرج حتى وانتي منسدحه

اما الصناعي بعز نومج تقومين تحطين الماي الحار و الحليب وتعالي بردي المميه ومادري شنو والله عباله

الحمدالله الله مريحنا ومعطينا هالنعمه لا تخلين الشيطان يوسوسلج رضعي لي اقصى حد تقدرين عليه او اقصى حد يتقبله وليدج

ترا الصناعي متعب

انا ببدي اقطع الطبيعيبالتدريج لمه بنتي تبدي تاكل وجبات

ما بقى شي الحمدالله شوي و تخلص السادس وبدايه تجربتي كنت مثلج كل يوم اقول حدي شهرين حدي 3 الحمدالله اللي الله قدرنا و وصلنا لي اهني

استمري... وحاولي تعطينها صناعي مرتين او ثلاث بالاسبوع عشان تتعود عالاثنين ماتعبج وايد لا بغيتي تقطعين *

 

[نـعـومـه]

انا نفس راي الاخت اللي فوقي

عندي الرضاعه الطبيعيه اسهل اذا بجت بليل وانا نايمه بس اشيلها ويلا اعطيها صدري لا اقوم من نوم وتعالي حطي ماي حار وحليب والياهل يبجي وعقبها تعالي غسلي المميه النومه طارت جذي !!


بس من ناحيه الظهر ظهري بسرعه يعورني مادري من الرضاعه او الولاده او الحوسه والتجندس !!

والسلبيه الوحيده بالرضاعه طبيعيه لما اطلع اتوهق ماقدر ارضعها كل بيت بجذي عودتها عالصناعي حزه طلعه ارضعها صناعي ويالله تعودت وبطلعه الروح

وترا شفط يذبح من التعب جربت اشفط لها تعبت غصب طلع حليب وحسيت اذيه اشفط واحط بالثلاجه ولويه

 

[حنطاااويه]

انا بالاربعييين
وقاعده ارضع طبيعي
بس يبيلهااا صبررر وطووله باال

 

[frfr]

شجعتوني اكمل وان شاء الله اقدر

وصج لمن اطلع تحتاج صناعي للازمات وهم قاعده اشفط للطلعه

واللي ما ضبط معاها الشفط جربي نوع ثاني او ماركه ثانيه يمكن اللي شاريته
ما والمج

 

[أغلى حبيبه]

انا انصحج بالطبيعي

والله اريييح من الصناعي تالي الليل

ومنها بعد اتشد الرحم والجسم

الحين بنتي كملت سنه وقامت تفهم اسم الله عليها واذا بترضع عادي جدام الناس تقعد بحضني واطقطق على صدري

بس من اشوفها مجبله علي اسويها مميه بس بالزوارت والطلعات يعني تقريبا بس الويك اند

 

[فرح79]

والله اختى انا انصحك بالطبيعي كتير اريح وخاصه بالليل لكن انا للاسف ابني مثل بتك ما يرضى صدري ابدا تعود على الرضاعه الصناعيه وصرت اشفطله لحد ما خف الحليب نهائي للاسف

 

[ميس:)]

انصحج كملي اهو بالبدايه صعب والياهل مايكمل رضعته وينام بعد فترة ايوع وهكذا بس يعد شهرين ونص يتعدل رضعته وتصير كل ثلاث ساعات تقريبا او ساعتين ونص وشفاطة ميدلا حلوة حق الطلعات او عطيه حبة حلوة او ماي تمر وتحسين انج مسوية انجاز عظيم لمن ترضعين ومناعته تقوى وصحة ويتعلق فيج واريح بلا تعقيم ولا شي وكلها جم شهر وفطمي اوسنة

 

[opera]

وانا بعد ويااااكم

الطبيعي اسهل يصير عقب الاربعين انا كنت اتعب فتره النفاس بس عقب شوي شوي تقل الرضاعات و الساعات و شوي شوي تكبر وتاكل

انتي اصلا اذا خلصتي جم شهر خلاص كملي معاها لانها لي بدت تاكل بس تبي وقت النوم فحده بيصير اسهل

 

[Om Ghalia]

موضوع حلووووووووووووووووووووو

 

[ام نيوفي]

انا في عيالي الثنينه الكبار ما كنت ارضع لان دوام الكليه كان متعب من الصبح للعصر فحرام البيبي يكون متعود على الصناعي
اما بولدي الثالث الحمدالله رضعته طبيعي لاني اخذت اجازه من الدوام ست شهور و قابلته عدل و الحمدالله الحين عمره سنه و ثلاث شهور
و للحين يرضع بالعكس الرضاعه الطبيعيه وايد حلوه و تقوي العلاقه بين البيبي و امه و بعد الحمدالله ما كان متعبني بالنفاس لان ما في غارات و لاشي
و صج الحين وقت قيلولته لما يبي ينام وبالليل عشان ينام
و انصحكم ترضعون
و انا ما جربت الشفاطات لاني احسها تقليل الحليب
و بعد ولدي ياخذ صناعي بس مو واي بالاسبوع مرتين او ثلاث

 

[طيبة83]

شوفي paytex زينه بس تنفع اكثر للياهل الي يرفض المميه ويبي الصدر لان شكل حلماتها نفس الصدر

اما بنتج خلاص تعودت على ا المميه فانصحج نحطين هذول ع صدرج عشان تقبله

والرضاعه فعلا فعلا متعبه بس كل ما يكبر البيبي تصير اسهل

وثاني شي تذكري ان حليب الام فيه ٣٧ مكون مب موجود في الحليب الصناعي فيه كريات دم بيضا واجسام مضادة تقوي مناعة البيبي

لج الخيار بين راحتج او صحة بنتج؟؟!

 

[frfr]

الله يصبرني ان شاء الله الحين بنتي كملت
الشهرين واحس صرت اعرف لها احسن من قبل
وان شاء الله اكمل لل ٦ اشهر وصج يا بنات أنتو بطلات
عندكم اراده وقدرتو ترضعون