ساعدوني الله يوفقكم و يسهل عليكم

[Mis independent]

قوه بنات شلوووونكم ؟؟؟

انا محتاجه رايكم لاني ظاااايعه و محتاره و نفسيتي تعبت
انا حامل اب بجري ، و باخر السابع ، المهم كنت عند د. روبينا بس للاسف طلعت من السيف و راحت المواساة و لان المستشفى غرفه تيييب المرض قلت بغير الدكتوره

رحت دار الشفا و انصحوني اب د حسام رئيس القسم ، ولو اني ما احب الرياييل بس قلت ميخالف مضره
المهم ، رحت اول نراجعه لي و كلمني عن ابرة الظهر و حاول يقنعني فيها
الحين انا عندي استفسارات وًمخاوف عفيه جاوبوني عليها
اولا : شرايكم بابرة الظهر ؟ انا قويه و مو شايله هم الطلق بس بعرف شرايكم ؟

ثانيا و الاهم : اسمحولي بس قاعده احاتي و ميته خوف انه المهبل عدي يختلف بعد الولاده خايفه اتوسع او يتغير الشكل !!!
من كثر ما احاتي فكرت بالقيصري !!!
و المصيبه انه حماتي ولاده عند حسام تقول انه ضد التجميلي و فعلا تجرات و سالته تدرون شقالي !!!
قالي التجميلي خرابييييط و انا لو قصيت بخيط الي قصيته بس اما لو ما قصيت اخيط ليييه !!!
كلامه خوفني اكثر عفيه فيدوني

شسوي بعمري ؟! انتو مجربينه ؟
اهو زين ؟
اغيره ؟
اولد قيصري ؟
شسوي ؟؟؟؟
ارد حق روبينا ؟

 

[عبق الزمن الجميل]

ماجربته بس اول ولادة مؤ لازم التجميلي توك بجر في تمارين تعمليها تضيق
ان شاء الله الأخوات يفيدونك
موفقه

 

[Aloe Vera]

استغرب ليش يقنعج بابرة الظهر ؟؟؟؟

اسلوبه غريب


تدرين هذي الحركة تكسر ثقة الوحدة بنفسها و يخليها تحاتي

انا ثالث حمل لي و مريت على وايد دكاترة ولامرة وحدة فيهم فاتحتني بالموضوع او حاولت تقنعي فيها


المهم انا ما انصحج تراجعين عن ريال هذي ولادة و فيها تكشف و ماله داعي تستاثمين و الدكاترة الحريم ترس الديرة


و بعدين شغله ثانية المنطقة من تحت اهي عبارة عن عضله تتوسع و ترد تشد بعد الولادة هذي خلقة ربج

في دكاترة معروفين خياطهم يضيجون الوحدة بجميع الاحوال حتى لو بجر مثل دكتورة فوزية القطان و دكتورة خالدة المجيبل برويال حياة و دكتورة امل عبدالعزيز بالسلام

و انا في بجري طلبت تضييج بس الدكتورة مارضت و بعد الاربعين لقيت نفسي ماتغيرت
ثاني ولادة سويت تضييج و تحسفت لان ضيج مو طبيعي يذبح عوار لمدة شهور
و الحين ثالث حمل طلبت ولادة بدون شق و خياط لان علميا اهي افضل طريقة للمحافظة على قوة عضله المهبل

و انتي استخيري لا توسوسين و لا تحاتين بس روحي عند دكتورة انتي ترتاحين لها
و مبين من كلامج انتي مو مرتاحة مع دكتور حسام

 

[آهات الليل]

روحي حق دكتوره زينات تهبل بدار الشفا او دكتور زكريا معروووف
حسام غريب شكو يقنعج عن ابرة الظهر وانا عن نفسي تجميلي بكل ولاده احسلي حمدالله الامور تمام اخر ولاده اضطريت اولد بالحكومه لان يتلي الولاده فجاه لكن خياط عادي موتجميلي استغفرالله فرق كبير حسيت بوسع والله يتمم حملي هذا واولد بخاص واسوي تجميلي باذن الله

 

[Mis independent]

بنات مشكوريييين على ردودكم بس هم ما طمنتوني
الحين ما فهمت التجميلي ضروري للبجر ولا لا ؟؟
و حسام زين ولا لا ؟

 

[faty87]

انا اقولك بس عشان الابرة
انا جربتها في بجري وما تخوف الابرة عادية جدا واهو يقنعك فيها
لانه بمستشفى خاص ياخذ عليها اكتر اعرف بدار الشفا ياخذون 80 دينار زيادة على الابرة
انا ناوية ان شاء الله ارجع اضرب هذي الابرة
ولو انتي مب مرتاحة مع الدكتور حسام جربي الدكتورة زينات انا جربتها وكانت زينة
وعندك الدكتور ابو الفتوح يمدحون فيه
لكن قريبتي ولدت عند اللبنانية نسيت اسمها بالضبط وما عجبتها عذبتها في ولادتها​

 

[Mis independent]

مو بنات حسام رئيس القسم في دار الشفا ماراح يمسكونه رئاسة القسم لو مو زين
خايفه اتسرع و اغيره و اتحسف
انا بس الي خوفني منه لمه كلمني عن الخياط و فهمت انه ماراح يجمل
فيدوني

 

[ملكه الحطب]

حبيبتي لاتخافين وليش تبين تجميلي باول ولاده هم مايسون التجميلي عشان ماتتاذين بالولاده الثانيه انتي اهتمي بخياطج وبنفسج بالنفاس وماراح يتغير شي اكيد الشكل الخارجي للمهبل راح يتغير يعني شكله قبل الزواج نفس بعد الزواج!!؟؟
وابره الظهر انا جربتها بالبجر ومافيها اي شي ولا اي مضره بس عشان الوحده تطول بالبجر فيقولون ابره الظهر احسن وبولادتي الثانيه ماجربت ولاتخدير والحمد الله تساهيل من الله واذا انتي قويه وتتحملين الالم لاتاخذينها وخلج واثقه من نفسج
والله يسهل ويتمم عليج يارب

 

[امـ خــزامـى]

حبيبتي لاتستاثمين وتولدين عنده الحريم احسن وافضل لك
وتجميلي ماتحتاجين خياطه عاديه تكفي

اما ابرة الظهر مااقدر افيدك


بس كل شي طبيعي احسن

 

[Aloe Vera]

عادي مو شرط دكتور رئيس قسم معناته ان اهو احسن واحد
لان بالنهاية الدكاترة مو كلهم يتبعون نفس الطريقة بالتوليد
اللي دارسين في فرنسا غير و اللي دارسين في مصر غير

في دكاترة يهمهم راي المريضة و يسوون معاها خطة ولادة يكتبونها على ورقه هذيلي اللي دارسين برة

و في دكاترة يسوون اللي في بالهم ماهمهم راي المريضة

و بالنهاية الولادة مو مرض و احنا نقدر نتخذ قرار اذا ماكان فيه ضرر

المهم انا قصدي يمكن دكتور حسام شاطر
بس طريقته ما تناسب طريقتج

 

[بسمه غلا]

طيب شوفي الدكتوره ليلي اشكناني يمدحونها وبالنسبه لابره الظهر محد ينصح فيها امي وخواتي يحذروني منها مو زينه لان مكانها غلط وخطر
اعرف وحده اخذتها وصارلها سنتين الليل ماتنامه من عوار ظهرها والسبه الابره مانصحج فيها وانتي كيفج
وبالنسبه للتجميلي مادري يقولون البجر ماتحتاجه وانا مثلج احاتي هالشي وان شاءالله سهالات وناويه عالعرف لان خواتي مجربينه ماشاءالله ماحسو بشي كلش اختي تقول انصدمت عطوني الكمام ونمت وقعدوني لقيت نفسي والده ومخلصه ماحسيت بشي الحمدلله وانا خووووافه حييييل

 

[أميره بلا قصور]

ابره الظهر صراحه رحمه من الله

بس المها يبقى بظهرج ٦ شهور عقب

عاد مو الالم الالم لا عادي بس تحسين في مكان الابره

و على فكره مايطقها الا الاستشاااريين. وانا انصحج بدكتور الخطيب برويال وهم في دكتور مصري بالمواساه هذيل توب حق الابره

اما الولاده شالله حادج تولدين عند ريال والحريم ترس الديره

ناقصين ذنوب احنا

بدايه دخولج الثامن شوفيلج من هالدكاتره الحريم الشطااار فوزيه معصومه امل ....وااايد والله وكل من يمدحهم



وسوي تجميلي عادي انا سوت لي تجميلي ببجري وصج كان شي خياااال حسيت اضيج من يوم كنت بنت واهم شي ريلي مرتاح

 

[أم تروفه]

الله يسهل لك

 

[Mis independent]

مشكوريين بنات
بس صراحه ردودكم حيرتني اكثر

 

[Aloe Vera]

انتي مو بالاساس تبين مستشفى السيف؟؟

خلاص رجعي له بصراحة غرف دار الشفا مو حلوة و المواساة عندهم غرف ارحم شوي بس السيف احلى اذا بتسوين استقبال

و راجعي عند دكتورة شاطرة ليلى اشكناني مثلاً و غيرها وايد يا من المستشفى نفسه او عيادة خارجية و خليها تولدج بالسيف و طلبي منها تضييج و تجميل و اللي تبينه

و بس انا لو منج اسوي جذيه بصراحة بدون تفكير

 

[ربيع_الروح]

بالنسبة لإنج محتارة بين ابرة الظهر أو الكمام
فهذا يعتمد على شيين:
1- مدى قدرتج لتحمل ألم الطلق
2- مدى رغبتج بإنج تكونين مصحصحه وقت طلعة البيبي

وما عليج باللي يقولون لج تنشلين (لأن في آلاف سووها ومو معناة إن 1 من كل 10000 وحدة انشلت يعني انتي بتكونين هالوحدة) خاصة إن الي يقزونها دكاترة تخدير استشاريين أو إن ظهرج راح يعورج (أكيد ظهرج راح يعورج لأنج والدة وتفججت عظامج كلها مو بس ظهرج)
وللعلم ترى حتى الكمام له أعراض جانبيه خطيرة كون إن المخدر يصعد لي الراس ويخليج تغيبين وحتى منظمات الصحة العالمية الحين ما يحبذون استخدامه بسبب أعراضة الجانبية الوايد


أما بالنسبة لاستفسارج عن الدكتور
انا شخصيا ما أفضل انج تولدين عند دكتور كون إن الشغلة فيها كشف للعورة
وفي بديل عنه فصراحة استحرم الولادة عند دكتور


وبالنسبة للخياط التجميلي
ترى في فرق بين الخياط التجميلي والتضويق
انتي بجر فما يحتاج تضويق
لكن التجميلي لابد منه إذا صار في شق اثناء الولادة


وبالنهاية إذا ما عجبوج دكاترة دار الشفا بس انتي ناوية تولدين فيه
راجعي بعيادة عند دكتورة شاطره وخليها تولدج بدار الشفا

وإذا تبين انصحج بدكتورة ما عندي مشكلة ابعثيلي رساله وراح أكون أكثر من سعيدة بالرد عليج

 

[Mrs.H]

شوفي انا استشرت اكثر من دكتورة قالولي احنا نفضل ان البجر تاخذ ابرة ظهر لان طلوقها تطول ولان الابرة تنفع للطبيعي والقيصري..انا حطيتها وسبحان الله ولدت قيصري فما خسرت شي لان اغلب القيصريات بابرة ظهر

اذا تبين راحتج وانج ماتحسين بعوار اخذي ابرة الظهر.. اما اذا كنتي قوية ومو خوافة اخذي كمام

وترى المواساة عندهم غرف يديدة على فكرة لكن دار الشفا عنايتهم افضل وترى حرام تولدين عند ريال

اما الخياط ماعرف اسمحيلي