سفرتنا المباشره لامريكا .. (كروز - ميامي & اورلاندو)

[malekatsabaa]

:ggdw: :ggdw: :ggdw:

لا يوقــــــــــــف..

:ggdw:

 

[bobo lover]

متابعينج هني و هناك ههههههه

 

[اوركيدا]

نوصل حق الجزيره ماقبل الاخيره ..
جزر الكايمن

كل اللي اعرفه عن هالجزيره
اولاً انها دوله مستقله او في نفس الوقت تابعه لبريطانيا او هالشي واضح من العلم
عملتهم دولار امريكي بس عليه صورة الملكه اليزابيث! ..
واهما تابعين لها!! .. مافهمت شقصتهم بالضبط مع بريطانيا
لكنها من ارقى جزر الكاريبي ..
وجدا مشهوره بالالماسات .. معظم الامريكين اللي معانا فالكروز يقولون انهم يايين هالرحله عشان الالماسات
اول جزيره شفت معظم بيوتها مرتبين نفس البيوت الامريكيه اللي فالاحياء العاديه طبعا
والسيارات معظمها اخر موديل ..
الشعب "اللي تعاملنا معاهم من الشعب" كانو اكثرهم من استراليا او من الارجنتين! ..
جراند كايمان متكونه من 3 جزر ..
ماكان فيها ميناء ممكن توقف فيه الكروز .. كنا ننتقل عبر العبارات ..
لمكان نفس الميناء .. اهناك جمعونا كل مجموعه لرحلتها اللي حجزت لها مسبقا ..
قبل لانوصل انا اخترت رحله بدون لاشوف الفيديو التابع لها
كان اسم الرحله

Stingray swim & norkel

انا اعرف انه سنوركل .. يعني غطس بالنظاره العاديه او نشوف الاحياء المائيه من تحتنا ..
او هذي اللي كنت ابيه .. لاني سمعت انه مايهم شفاف او وايد حلو على قولتهم مثل الكرستال
فعلطول حجزت هالرحله ..
على امل اني بشوف نيمو او شلته او مرجان او الوان او حاله
المهم
اهلي راحو رحله استكشافيه للجزر ..
او خواني راحو باراسيلنق ..

من اشهر الرحلات في جزر الكايمان مزرعة السلاحف ..
بس وايد ناس قالولنا انه هالرحله ممله نوعا ما
لكن تنفع لمحبي السلاحف .. فيها سلاحف باحجام غريبه

وعندهم رحلة حق الاطفال ياخذونهم في قارب نفس قوارب البايرتس ويعيشونهم الاجواء ..
واحنا فالعبارات ييوون يمنا كأنهم بيهجمون علينا ويطلقون علينا صواريخ اصوات بس .. صج خوفوونا :eh_s(14):
وفالنهايه يضحكون علينا

هذي سفينتهم

المهم

كاميرتي امس بعد حسرتي عليها في جمايكا ..
اول ماوصلت طلعت البتري عشان اشحنه ..
او ركبته او قضيت باقي يومي عادي ..
اليوم الصبح وانا استعد شلتها بسرعه وانا فالعباره رايحه اكتشتف again
اني ماركبت الشاحن بالكهربا فماشحنت
شريت كاميرا تحت الماي .. لكني للحين ماغسلت صورها

عالعموم .. اكمل لكم مقلبنا
اول ماوصلنا الميناء بتدينا ندور مرشدة رحلتنا
ولقيناها بسرعه .. لكن لسوء الحظ الاصطفاف اللي كنا لازم نوقف فيه كان فالشمس الحااااااااااااااااااره
وقفنا وامرنا لله ..
وانتظرنا وايد لانه كنا نازلين من وقت .. وكنا من اوائل اللي اصطفو ..:cxxxp:
المهم بعد مرور اكثر من 20 دقيقه مشونا للباصات ..
واحنا وراهم .. ركبنا الباص او خذنا لمكان سكني .. بين لبيوت فيه معبر مائي ..
من هالمكان ركبنا في قارب يتسع لحوالي ال مئه شخص
مادري شمعنا نروح من اهني
المهم بعد رحله بهالقارب استقرقت قرابة النص ساعه في مياه المحيط وقفونا في نص البحر
وتيينا الصدمه!!! ..
البحر شفااااااااف بطريقه غير طبيعيه
يعني لاتحتاج لا حق نظاره ولا شي
والناس قعدو ينزلون مستانسين
وانا واختي نطالع في بعض :eh_s(1):
اول شي لاني انا المخططه لهالرحله سكت ولا كلمه او نزلت وسط الماي
هالبقعه كانت مليئه بالقوارب الناس واقفين او نازلين
مع انها في وسط البحر
اول ماوصلنا قبل لاننزل المرشد راوانا خطوط سبحان الله ..
البقعه اللي وقف فيها القارب كانت ازرق مائل للشفاف او ورى القارب ازرق غاااااااااااااااااااااامج.. قال لنا بالضبط في هالخط يبتدي العمق على طول اكثر من 3000 قدم
اللي احنا فيه كان الماي يغطي نصنا بس
المهم
نزلت ابي اشوف سمجه وحده!! مرجان ياي بالغلط اي لون غير بقع ضخمه رصاصيه
كلــــــــــــــــــــــــــــــــــــــــــــــــــه لخم

بشكل غير طبيعي
وطبعا المرشد يحذر
لاحد يمسك ذيلها
لاحد يمسك ظهرها
اللي بيلمسهم يلمس اطرافهم الجناحات فقط
لاتمشون على وره يمكن تدوسون على وحده
لاتناطرون (تنقزون, تطمرون) فالماي يمكن تدوسون وحده
يعني رعب!! ..
المهم انا فالبدايه نازله او مو مستوعبه فواقفه في مكاني او اشوف او ادور على سمكه صغيره يايه بالغلط ابد مافي!!!

كــــــــــــــــــلـــــــــــــــه لخم

المهم بعدين وجه اختي او هلعها الواضح خل الخوف يدب فيني
واستوعبت!! اللحين لو تلسعني هاللخمه شبيصير!
اختي راحت فوق او انا وراها .. اول شي قعدت على الدري

بعدين شفت الخوات واصلين لي الدري فتعوذت من الشيطان او صعدت او قعدت يم اختي
فالقارب كان مصور بروفيشنال يصور الناس مع اللخمه او يطبع صورهم او يبيعهم اياها فالناس اللي صورو كانو واقفين ياخذون صورهم
او في مأكولات خفيفه سناكس يعني
فقلت حق اختي ابي اشتري .. بطاقاتنا " اللي ندخل فيهم السفينه" مع لفلوس كانو عند اختي ..
قامت تطلع لي لفلوس .. او بقدرة قادر طاحو البطاقتين .. من يدها في البحر .. مو بصوب الناس .. يمكن المسافه كانت اقل من 3 متر عن الغزير اللي قلت لكم عنه!!!!!!

انا اواهيا قعدنا نصرخ .. قلت لها طيحتيهم ييبيهم!! .. قالت لي وين انزل وسط هالرعب واحنا في خضم نقاشنا كان واحد واقف يمنا او شاف الموقف كله فصرخ على واحد يسبح او قاله تعال اخذهم
او مسكين ماقصر سبح او شالهم ..
رد الدم لويوهنا وماعرفنا شلوووون نشكره ..
القلق ماانتهى الريال اللي شال البطايق حطهم في مخباه او كمل سباحه!!
احنا ساكتين شنقول؟ مالنا غير الصبر!
المهم بعد ماعلنو انتهاء الرحله ركبو الناس الاخ مر يمنا ولا كأنه يشوفنا!!
انا او اختي تطالعنا شالسالفه!
فقالت اختي بروح له
اختي انجليزيتها ركيكه شوي " قالت له Excuse me" لوسمحت
قال لها Yes نعم
قالت له Thank You .. Give me شكرا عطني
قال لها What ? ماذا؟
وعتفس ويها شوي وتصيح قعد يضحك كان يتغشمر
او حط يده في مخباه قال لها
Oh I dont have them ماعندي اياهم
طبعا انا من بعيد اطالع او ويهي يعطي التعبيرات بس!بعدين طلعهم او اهوا يضحك
يااااااااااااابرووووووده حرق اعصابنا
المهم بعد مانزلنا
قعدت اتمشى فالميناء .. اختي صعدت العباره او راحت ..
رحلتنا وايد طولت .. او امي ضنت انه ضعنا .. وقعدت تدورنا .. جيكولها اسامينا عن البوابه قالولها وحده وصلت ووحده لا!!!
اختي كانت قبلي فلما امي جيكت كانت اختي توها داخله ..
انا وانا سرحانه فالسوق سمعت بوق السفينه او رحت بسرعه قالولي يالله اخر عباره ..
امي كانت واقفه عند المدخل .. وميته من الخوف ..
هاليوم قلق كله بس للحين استمتعنا فيه او شفنا دوله يمكن مانرجع نشوفها بحياتنا مره ثانيه ..

 

[fona]

واااااااو الجزيرة جنه ماشاءالله

اوركيدا عليكم بالف عافيه

وايد حبيت التقرير

 

[daloO3a]

اوركيدا عليكم بالعافيه انا متابعه
الصور خيااااااااااااااااااااااااااااااااال

 

[كل الأسامي مأخوذة ليش؟]

كملي تقريرج وايد روعة
صراحة سالفة البطاقات ضحكتني
قلت باقهم

 

[nice smile]

عليكم بالعافيه

والموضوع اكثر من روووووعه

متابعه

 

[dalprincess]

متااابعين )

 

[اوركيدا]

اول شي مشكورين يابنات على متابعتكم والله يعافيكم :tek:


وقفه مع خدمات الكروز للاطفال ...
اولا مايسمحون للأطفال اقل من 6 شهور بالابحار على متن الكروز ..
عندهم فالكروز عدة مرافق للاطفال في الكروز ..
ونشاطات لكل عمر ..
من 6 شهور الى 36 شهر ..
في ألعاب ممكن الام تقعد وتلعب عيالها ..
ومن 4 سنوات الى 5 سنوات .
في مكان نفس الحضانه ..

تدخل العائله ابنائها في هالعمر ..
في ناس متخصصين يلعبون الاطفال ..
الام اول ماتدخل ابنها تسجله ويعطونها نفس التلفون .. هالتلفون يقدرون اهما يتصلون لها في حال ابنها احتاجه او اي شي ..
ممكن للعائله اللي بتنزل جزيره انها اتخلي ابنائها اهناك والتلفون يشتغل حتى برى الكروز ..
وللي عنده سهره بعد الساعه 10 بعد يقدرون ياخذون الطفل لكن يدفع له مبلغ من بعد الساعه 10 فالليل
من برامجهم .. في يوم يلبسونهم او يخلونهم يسوون حق الناس نفس الـشو ...

غير هذي .. فالكروز صالة ألعاب (اركيد) فيه العاب وايد
لكنها بفلوس ..

او حمام السباحه الخاص بالاطفال ..

فيه العاب مائيه حلوووه ..
او طبعا مو غزير كلش..

غيره السيرفنج الصناعي ..

او التسلق ..
او حلبة التزلج .. فيها معلمين للمبتدئين

او فيه جهاز عسكريم اللي يونس فيه انه الطفل يحط حق نفسه بنفسه ..

او هالايس كريم مجاني لكنه مو متوافر بكل الاوقات .. الصبح لي الظهر تقريبا بس

في اول يوم او اخر يوم .. يسون في الدور الخامس Show رووووووعه ..
في كذا يوم فالاسبوع يكون فالمسرح Show مشابه .. وصج على مستوى شواتهم مو اي كلام ...
وهذي صوره من الشو اللي صار فالدور الخامس اخر يوم والتفاصيل بتييكم مع اخر يوم فالكروز ..

 

[malekatsabaa]

:ggdw:اوركيدااااااا:ggdw:

ونااااسه ..صج رحلة ماتنسى!!

 

[ام _خلودي]

وااى ارووكيد تقريرج يشووق
انا هالسنه الله مااكتبلى اروح الكروزز
انشاء الله السنه الياااايه

 

[dalprincess]

متااابعين @_@

 

[قاهرتهم17]

حددددددده وناسه ..
و
عيشتيني الجو بصراحه ..
و
يعطيج العافيه خيتوو ..
و
لا يوقف ..

 

[ام _خلودي]

ناااطرين باااجى التقرير

 

[rawona]

اوركيداااااااااااااا

عليكم بالف عافية رحلتكم اتهبل ماشالله وانشالله تستانسون بعد باورلاندو وتردون بالسلامه ...


اشوى اني كنسلت الكرووووووووووووووز هالسنه والا جاااان حذفت اعيالي من الباخره بسبة حنهم لووووول



وضحكتيني على رحلة السنوركلنغ لوووول الحين انتي متسلطة على عمرج ورايحة حاجزه فيها بس سمعتي سنوركل خلاااااااااااااااااااااااص لووول كاتبين لج stringary swim يعني لخمااااااااااااات يسبحون رازة ويهج وياهم شكووو لوووول


يالله ناطرين الباجي :eh_s(8):​

 

[اوركيدا]

بنات مشكوووووووووووووووووووووووورين كلكم على مروركم وتشجيعكم ..

ملكة سبا .. اي والله ماتنسى ..

راونا .. انا المشكله العوده اني ماكنت فاهمه معنى الكلمه .. يوم وصلنا جريييييييــــب او شفتهم او شفت المرشد يشرح لنا عنهم طلعت عيني!!!! .. لكن فيروز شرحت الموقف عدل في اغنيتها .. تنزكر مابتنعاد هههههههههههههههه

وصرت خبيره فال Stingrey مادري شسمهم! .. وعيالج الله يخليهم صدقيني مب احسن من الحنانيين اللي عندنا اليوم ولد مي العود .. طقته جيسه فيها ثياب او صرخ صراخ .. ماسكت الا عقب ما طقينا الجيسه الحماره اللي طقته .. عقب بخمس دقايق ولا يصرخ بقمة راسه .. قلناله شفيك؟ الا يقول الارض طقتني! .. وصرااااااااخ طقووها .. طقيناها او قعدت جني مينونه اناقز فوقها .. اخر شي صرخ صرااااااااخ وصياح يبي يركب الرولر كوستر مال السي ورلد .. نمر عليه كل يوم يم فندقنا لانه او مادري شذكره فيه نصايف الليل! .. قلت له انشاءلله باجر بنوديك او بالمووت سكت .. نص ساعه ويبتدي لصغير سنفونيته الليليه المعتاده .. صراااااااااااااااااااااخ بدون دموع او بدون سبب! ..

يعني بختصار شديد عندنا وعندج خير .. بس الحمدلله فالكروز كانو هادئين ولا جان انا ومي قطينا روحنا! ههههههههه

 

[rawona]

لوووووووووووووووول يحليلهم ..


خلي المواقف والضحك حق موضوعي وناطرين باجي تقريرج :eh_s(8):​

 

[اوركيدا]

وصلنا يوم الـخميس لجزيره كوزمل فالمكسيـــك
وصلت الباخره وتوقفت فالميناء ماحتجنا عبارات الحمدلله ..

الجو كان مشمس جداً .. كنا حاجزين رحلة غوص (Snorkel) ..
لكن لأنه كنا كلنا حاجزين لهالرحله , فقعدنا كل واحد ينتظر الثاني ايي والثاني مـتأخر وفلان نسى مادري شنو ..
مشت عنا الرحله .. وقفنا فالميناء حايرين شنسوي! .. لقينا واحد يشتغل او قلنا له .. قال لنا للاسف الباصات كلها غادرت لكن اقدر اغير لكم رحلتكم باي رحله تختارونها تناسب وقتكم .. فاخترنا رحله لـBeach ورجعولنا فرق السعر ..

المهم اول شي نرجع حق نشاطات كوزمل (مكسيكو)
كوزمل جزيره جميله جدا مشهوره بالمرجان والاحياء البحريه المتعدده
مركز للغواصين .. والسنور كلرز ..
بوضح مره ثانيه السنوركلنج يختلف عن الدايفنق السنور كلنق .. غطس بلايف جاكت او نظاره ..
الدايفنق غوص بمعدات واكسجين ..
وهذي صوره للسنوركلنق ..

رحله ثانيه جولة بريه في سيارات Jeep Rangler
اللي يبي يسوق يسوق واللي مايبي ممكن يركب مع احد ..
هالجوله تمشي السيارات ورى بعض في طريق بري وعر شوي او ياخذونكم في جوله وتمرون على نهر ..
ماجربتها او ماصادفت احد جربها لكن كان شكلها عجيبه ..

رحلة غيرها جولة للتعرف على Cozemul وياخذونكم لاهرامهم الشهيره
او في رحله شكلها وايد ممتعه اسمها Sea Walk تشبه لسنوركلنق بس يبيلها اجهزه ..
جذي تصير اشكالكم ..

او في رحله ثانيه حديقة فراشات .. او رحله على متن الهارلي ديفدسون .. يا الشخص يكون راكب او سائق على حسب اللي يبيه او اظن يتطلب رخصه قيادة موترسيكل ..

المهم .. احنا بعد ماخيرنا الريال اللي قلت لكم عنه مسبقاً .. شفنا انه انسب شي لنا كان الBeach
فرحلنا لهالبيج ..

ودخلته

يتبع

 

[اوركيدا]

البيج كان رائع او فيه كل النشاطات البحرين مثل الباراسيلنق , تأجير الجت سكي , حمامات سباحه

ومن ظمن البكج مالنا كان فيه غدى قعدته وايد حلوه وايس كريم او مشروبات مجانيه كلها ..

او فرقه مكسيكيه
او السعر كان كلش بسيط مايزيد عن 24 دولار اذا ماخانتني الذاكره ..

المهم استمتعنا كثيــــــــــــــــرا فهالشاطئ .. كان البحر حلو او فيه سوق صغير .. فدخلنا البحر نسبح ..
البحر كان مسور .. فيه خط مايصير نتعداه .. نفس اي شاطئ من شواطئهم .. المهم كنت اسبح او وصلنا قريب من الخط ..
كان البحر غزير ماعرف شكثر غزره بالضبط بس ماكانت ريلي توصل .. المهم مادري شلي خلاني اطل ! وعلى طووول من اول طله سبحان الله!

وهذي المنظر اللي شفته بالضبط! ..
قلت شسالفتي انا ويااااااااااا مخلوقات البحار المرعبه!!

انا او اللي معاي كنا نحاول نسبح! .. نحس انه ماقاعدين نتحرك في مكانه! .. كأنه كل المحاولات او احنا مااااااانتحرك! .. والله زين ماوقف قلبي .. وصرخنا على الناس نحذرهم! .. ولا الاخوان كل واحد لابس نظارته وياي يشووووووف !! .. مايخاوفون

والكل ينادي عياله .Baby Shark Come See " صغير القرش .. تعالو لترو!"
واحنا وقف قلبنا تقريبا من الخوف .. لما طلعنا سألنا ناس على الشاطئ او قالو ان لصغار اهما اللي يوصلون لي الشاطئ ومايسوون شي! .. بس تصدقون عقب اقل من ساعه رجعنا البحر .. لكن قعدنا عند السيف ماغزرنا نفس مساعه!

كان فهالشاطئ سوق بس كانت اسعاره جدا غاليه .. بعد 4 ساعات تقريبا رجعنا الميناء اللي نزلنا فيه .. او تمشينا او كان الميناء مليئ بالمحلات والمنتجات المكسيكيه .. من الملابس القبعات الشنط وهذي صوره سريعه ..

تشرينا او صعدنا لكروز مودعين اخر جزيره نزورها على متن الرويال كاريبيان ! ..

ونستعد للعشى ماقبل الاخير .. كانت عندهم سهره عشاء بعد موعد العشاء فالطابق الـ11 .. بوفيه مليئ بالمأكولات .. خذينا طله عليه او رجعنا ننام بعد تعب اليوم ..

انتظرو اخر يوم فالكروز ..

 

[rawona]

ناطرينج اوركيدا ​