- إنضم
- 24 مايو 2010
- المشاركات
- 19,810
- مستوى التفاعل
- 11
- النقاط
- 0
- العمر
- 33
- الإقامة
- Faiilcha
- الموقع الالكتروني
- WWW.Q8YAT.COM
,
الكلمات اللي قبل أحسها طوع ذهني أستدعي منها متى ما بغيت, للأسف كلها تبخرت في
هاللحظة, لدرجة إني عاجز اوجد مقدمة مناسب لموضوعي هذا. سبحان الله بعض الأحيان
تدور الشي ما تلقاه, وإذا ما بغيته تلقاه قدام عينك. هذا الشيء الحاصل معاي الآن !
خلوني أستفتح بهالموقف لعله يساعدني بطرح فكرتي شوي والله الله بالفهم عاد
:قبل كم من يوم كنت طالع من الكلية ورايح لسيارتي في المواقف, وإلا اشوف قدامي
بنت مو طبيعية قاعدة تتلفت ومرتبكة كأن أحد لاحقها. فللأمانة استثارني الموقف قلت
خل أشوف شالسالفة ؟ المهم تابعتها بعيوني شوي وإلا اشوفها راكبة مع شايب على
وانيت [ ددسن ], أثاري اختنا في الله متفشلة لا يشوفونها زميلاتها وهي راكبة الوانيت
مع ابوها
طبعاً أنا ضحكت ضحك غير طبيعي لما شفت الموقف, واعتقد كل من شافنيفي ذيك الحزة حس إني أهبل أو مجنون قاعد أضحك مع نفسي.
للأسف ان كثير من الشباب بالذات أصحاب السيارات العادية أو الرخيصة بمعنى أصح,
صاروا يستحون يسوقون سياراتهم ويعتبرونها شي يفشل, خاصة إذا كان رايح لمناطق
داخل الديرة. حتى بعض الشباب اللي معاي بالجامعة يصفطون سياراتهم بعيد ومن بين
البيوت عشان محد يشوفوهم وهم نازلين منها والا هم راكبينها, ليش ليش يبا كل هذا ؟
وإذا سألت واحد فيهم : ليش تسوي هالشكل ؟ قالك والله : " سيارتي تفشل ".
بعضهم الآن ما يستحي من اللبس اللي يلبسه, بينما يستحي من سيارته ! أمر عجيب صراحة
تبدل المفاهيم عند الناس, وإعطاء بعض الكماليات مثل السيارة وغيرها قدسية كاملة. حتى ان
الحكم صار على المظاهر أكثر منه على جوهر الإنسان. البعض الآخر يضطر انه يؤجر له سيارة
غالية لمدة يوم يومين يتشيحط فيها عند ربعه, والا يقزقز فيها على شارع الخليج وعلى شارع
الحب عله يظفر بصيد طيب. عاد الله من الثقل اللي يملكونه بعض البنات اليوم, لدرجة انها تبتذل
نفسها عشان ( ابو سيارة كشخة ).
هذا موقف ثاني يدلل على الكلام اللي ذكرته في الأعلى : أحد اخواني موظف في شركة معروفة
ويستلم راتب متوسط. وكون اخوي من النوع اللي يحب " التنصب " بزيادة. ودايماً لما تشوفه
تحسه يبين عليه أكثر مما يملك في الواقع, راح الحبيب واخذ له سيارة غالية بالاقساط, وطبعاً
قسطها [ يقص الظهر ] كل هذا عشان شنو ؟ عشان يكشخ بس ! المهم انه مرت عليه فترة
عسرة واحتاج فلوس, فاضطر يبيع سيارته هذي, وياخذ سيارة البيت ( كامري 2002 ).
عاد يقول لنا : من كثر ما أنا متفشل من ركوب الكامري, أول اسبوع كنت انزل من سيارتي
متلطم عشان ما يشوفوني الربع بالدوام !
أظن الآن وضحت القضية اللي بناقشها في هذا الموضوع معاكم وهي : هل فعلاً تحس ان شكل
السيارة وموديلها يؤثر عليك شخصياً ؟ وإذا كنت من اصحاب السيارات الغالية, هل تحس انها
تعطيك نوع من الزهو والهيبة سواء في الطريق والا بينك وبين ربعك ؟ والعكس ايضاً بالنسبة
لأصحاب السيارات العادية, هل تحس بالنقص وانت ماشي بالطريق ؟ أو وانت قاعد بين ربعك ؟
وهل ممكن انك تقيم شخص بناء على نوع سيارته وموديلها ؟
واعذروني على ركاكة الاسلوب في هالموضوع, وعلى اللهجة العامية اللي استخدمتها. لكن
حبيت اغير شوي من النمط السائد اللي تعودت عليه, وتعودتم انتم علي فيه, عشان أكون قريب
من جميع الشرائح, وبالتالي نحصل على مشاركة أكبر.
في رعاية الله دمتم
.
.
.
منقول :eh_s(4):
