شفيج مدخله عيالج خاص وحاطه على نفسج تكاليف حتى لو مقتدره شفيها الحكومه !

[Miss_Tiger79]

ماشالله البنات كفوو ووفو

بالعكس
انتي شوفي مستوى الي بالخاص والي بالحكومه
الي اشوفه فرق كبيييير بكل شي
بالدراسه والشخصيه والتعليم والثقه بالنفس

ولا تقولين كانا احنا درسنا ومافينا شي
شوفي مدرسات قبل وشوفي مدرسات الحين
البعض منهم صج صج صج مالها خلق تدريس واول عثره تشوفها بمشوارها الوظيفي تتحبط وتقول شكو انا بعيال الاوادم ادرس وحالتلي حاله وارد البيت مالي خلق عيالي ؟؟؟
هالشي انا سامعته بأذني
تقول الي يفهم يفهم وارد البيت احط طاقتي بتدريس عيالي احسن

وهذا اسمه استثمار حق عيالج

والله يوفق الجميع

 

[Turquoiseya]

مدخله ولدي خاص عشان الاهتمام والمتابعة ونظافة المكان

 

[Baby^Bop]

المعاااااااااااااملة

بعدها


التدريس قوي

بعدها

اللغة اللغة اللغة ( وايد مهمه )


لحد يزعل من كلامي


بس أشوف المدرسات الاجانب تعاملهم ارقى واحن من العرب ( مع الاسف ) لان المفروض العكس

وانا اختي مدرسة وامي كانت مدرسة ( تقاعدت ناظرة ) تنصح بالخاص واختي بس اقعد معاها وتسولفلي عن نماين المدرسات والحش والصراخ وييييييييع تلوع جبدي من هالمستوى الهابط

كل من يبي يشوف اعياله بمكان احسن من مكانه

والله يوفق الجميع سواء بخاص او الحكومة اهم شي انتي يا ولية الامر من شنو مرتاحة وولدج وبنتج تشوفينهم مرتاحين هذا الي نبييييييييييييه

 

[om al ghaleen]

قط فلوسك بالشمس واقعد بالظلال !!

فرق السما ع الارض من صجج يكفي المدارس الخاصه تعلمهم الادب والترتيب وهالشي مو مطلوب منهم
الحكومه للآسف والله الشاهد على كلامي مدرسه ولدي تدرين شنو ينادون الطلبه وانتي بكرامه ياحمــــــــــار

وانا سامعتهم بأذوني ..,, الود ودي ادخلهم خاص ع الاقل استغل ذكاء عيالي
بالحكوومه معتمدين على نفسهم بكل شي " صج حلو بس مهما يكون لازم يكون تأسيسه قوووي
ماعمم ع المدراس كلهم بس تكلمت عن تجربه ولدي بمدرسه حكوميه فاشله لآسف معتمدين ع المظهر والصراخ

وتبقى وجه نظر!

\\

 

[mr000]

شوفي آنا أتكلم عن تجربه عيالي أسم الله عليهم 3 درسوا بالحكومه وتخرجوا منها والأخير دخلته مدرسه أمريكيه ...فرق كبير بكل شي.. المدارس الخاصه بصراحه نظام ونظافه واحترام للطالب ماكو سب من المدرس ولو طالب غلط على طالب يتعاقب على طول وآنا أتكلم عن المدارس السنعه مو المدارس الخاصه الخرطي وأهم سبب خلاني أختار الخاص أنه ولدي هذا فيه ربو وآنا مريت بتجربه سيئه جدا مع مدارس الحكومه لما يكون عندج ولد مريض لأنه أخوه الكبير كان هم فيه ربو وتخسبق بالدراسه مافي تعاون من المدرسه وأهم شي ماكو عياده ولاطبيبه ومافي أحد مستعد يحطله الكمام لما يحتاج أو يعطيه دوا! فمثل ماقالت الأخت حطيت فلوسي بالشمس وقعدت بالظل ووديت ولدي مدرسه خاصه والحمدلله من كان بالحضانه فيه طبيبه وسستر يهتمون فيه لما يمرض ويدقون يطمنوني عليه والمدرسين يراعون حالته لما يضطر يغيب وبالشتا مايطلع بالفرصه بالبرد مو مثل الحكومه أقولهم موزين عليه يوقف بالطابور أو يطلع بالفرصه سووها مشكله ويوم يسمحون له و10 لأ يظل واقف بالساحه ويرد يمرض! ألحين أن شاءالله بنت ولدي راح ندخلها مدرسه خاصه بدون تفكير من بعد ماشفت الفرق!!

 

[سيدة الكويت]

السلام عليكم

سبب تفضيلى للمدارس الخاصه اللغه الأنجليزيه واهيه لغة العصر وما ابى عيالى يسيرون نفسى ابيهم اقوى منى باللغه.....والحين الدراسه سارت كلها انجليزى
وطبعا الأهتمام والنظام ويسمعون اقتراحاتج وشكاويج والنقطه الأهم عدد الصف قليل...............صحيح انا الخاص اصعب وما اقلل من شأن بعض المدارس الحكوميه .......ما تسير زينه الا اذا كان الناظر ممتاز

والله يوفق الجميع سواء خاص او حكومه

 

[Accepted]

السلام عليكم
خواتي ما المفروض تربطون اي شي مو عاجبكم بالمجتمع " بالهبه " كل ام عندها وجهة نظر تحترم سواء اختارت الخاص او الحكومة ..
و مثل ما قالت كذا اخت ان المدرستين مالهم مجال للمقارنه.. حتى الي تقول ان المستشفيات الخاصة هبة .. الي تروح الخاص لو لاقية راحتها بالحكومة ما عافتهم , يعني اهم شيين ما نقدر نقول عنهم كشخه او هبه ( النربية و الصحة )
و من وجهة نظري ان آخر ما اغامر فيه تربية و تعليم عيالي .. اقدر اتنازل عن اي شي بس عيالي يدشون المدرسة الزينه من ناحية التربية اولا و التعليم ثانيا

 

[الورد انا]

بنات اهم شي اي مدرسه خاصه مدخله عيالج

في مدرسه بحولي اسمها الامريكية العربيه الي خلف النقره الشمالي

هي مدرسه انجليزية بس قمه الهلاقة
ماسكتها وحده سورية او فلسطينية اسمها احلام وتعالي شوفي موظفه كل ربعها الزلممات راح تنصدمون لما اقولكم من الروضه تقريبا ل4 ابتدائي الي يدرسون عيالكم مو مدرسات هذيل شغلونهم بالبدايه مساعدات مدرسات يعني خدامه بالصف جم سنه يقعدون يرقونهم بصيرون مدرسات بقدرت قادر والله العظيم سب لي قمه راسج من حمار لي زباله من الكلام الحلو يسمعونه لولدج بالممر انا سامعتهم ويقولونكم احنا مدرسه اسلامية نفصلهم بصف رابع اذا المدرسه وحده وساحه المدرسه وحده شلون فصلتوهم اذا يمشون مع بعض بالساحه غير جذي مايتكلمون انجليزي مع المدرس لانه مدرس عربي يمكن انتي تشوفينه يقط جم كلمه بس هذا مو معناته انه يتكلم لغه
ماقولكم لاتودون عيالكم مدارس خاصه ودوهم بس شوفوا منو يدرسهم اذا من الدول العربية طلعيه من المدرسه اذا مدرسينهم اجانب لا وديه

 

[cutie-lolo95]

السلام عليكم

أنا طالبه فى الأكاديميه العربيه الأمريكيه .....أستغربت من كلام الورد أنا .....شنو هذى الألفاظ؟؟؟؟؟؟؟؟؟؟؟؟؟؟؟؟؟؟ صراحه حتى استحى اقولها ...والله لو أهلى او انا اسمع هالكلام والله ما اقعد يوم واحد فيها...

أصلا ابلتى تنادينى ...هنى ....يعنى عسلى .وأهيه بريطانيه ......اسمها فرانسس.... والأبلات فى الكلاس ما يتكلمون عربى....

وبعدين ما عندنا ....خلط مع الصبيان...كل واحد بروحه ؟؟

......شلون مدرسه خدامه؟؟؟ عيل خل تروح تشتغل بالبيوت ..لولللللللللللللللللل أصلا التيشر مالتى فور لاست ير...كانت مديرة سكول.. شلون خدامه؟؟؟؟ والحمد الله ...أنا اموت على مدرستى aaba

ولا أرضى أحد يغلط عليها ..........ومدرستى كلها عوائل معروفه

 

[قلبي ابيض]

والله انا لو مو الابو والا عيالي كلهم خااااااااااص الحكومة لوعت جبدي ومستوى المدرسات تدهور في تدهور

ومستعدة ادفع تكاليف المدارس الخاصة وانا اضحك مو عشان الوجاهة والخرابيط لأ عشان اتطمن على عيالي

رقابة مدرسية واحترام للطالب ومستوى تعليمي واهتمااااااااااااام

 

[firstlady]

شفيها مدارسنا الحكومه كانا كنا شحلاتنا درسنا فيها وتفوقنا وطلعنا دكاتره ومهندسين ... آنا معاااااج بس الحين مدارس الحكومة غيييير عن اول حتى المدارس الخاصة تغيرت وموووو نفس اول بعضها بس تبي تسحب الفلووووووس من جيوب أولياء الأمووووور ..على العموم يا لييييت كل وحدة فينا تحاول تنمي مهارة القراءة عند عيالنا ونعلم عيالنا الاداب والاخلاق الحميدة مثل ما نهتم باللغة الانجليزية والله يوفقنا ويكونون عيالنا من الذرية الصالحة

 

[حلم الطفولة]

أشكرك أختي عالموضوع الحلو وعلى طرحه بطريقه ذربه وحلوه ..
النقاش راقي والمشاركات رائعه .. أشكركم جميعا ..

خواتي .. اللي حاطه عيالها ودافعه فوق طاقتها مالها عذر لأن حرام تحط على نفسها وآخر شي يمكن بعد ماتقدر تكمل ويتعب الولد عند نقله للحكومه و يتدوده.

لكن الخاص له مزاياه من نواحي كثيره .. أولها احترامهم للطفل وطريقة تعاملهم معاه .. وثانيها تأسيسهم الطالب مو بس باللغه .. بأمور كثيره يطلع فاهم وعنده خبره بكيف يعمل تقرير وكيف يقوم بالبحث و و ... يعني يأسسونهم بنواحي عديده مو بس بالدراسه ..

وناحيه أخرى إهي المناهج اللي مدروووسه ومحطوطه من ستاف متخصص من كبرى الشركات الأمريكيه أو البريطانيه .....
ليه قالو يابو كتب يديده قلنا أكيد أحسن من اللي قبلها ..

التخبط واضح في مدارس الحكومه للأسف .. ومثل ماقلتي الشاطر شاطر والي أمه مهتمه فيه بيكون متفوق وشغل عدل .. بس هناك أمور أخرى تتعدى مسألة التفوق والشطاره ..

تقبلو مروري ورأيي ومشكورين .. كملو تراه خوش موضوع ..

 

[أم فرووحة]

خوش موضوع والله

و قاعده استفيد من نقاشاتكم

بس يا ليت كل وحده امدحت الخاص و مدحت مدارس عيالها تقول شنو اهي مدارسهم؟؟

انا عندي قناعة بعد ان اكيد المدارس الخاصه احسن اكيد لاني مدرسه سابقه و انحشت من التدريس لان الاداره و قرارات الوزارة اطفش المدرسات فمابالكم بالامهات..

لا تنسون كل وحده تتكلم تذكر لنا اسم مدرسة عيالها

يعطيكم العافية بنات ديرتي

 

[cutie-lolo95]

[B]hii i'm a student at american arab bilingual academy well for me english schools are so much better then public cuz in english school u know more english and my school is bilingual so english and arabic so this very good were good at english and arabic and even french which u take from grade 4 and they take more care and when i grow up i wanna let my kids to be in a american school just like me and there is alot of activties at the school like spelling bees , festivals , sports days plus international days [/B]

 

[اللاما]

انا اعرف وحدة تكلم انجليزي وفرنسي والماني بعد لما سافروا المانيا للعلاج ما احتاجوا مترجم وهي خريجة الحكومة بس ما شاء الله عليها
كله تدخل دورات لغات وبعدين ما شاء الله شوفوا اخر السنة الجرايد متروسة من صور خريجين الثانوية العامة يعني الشاطر شاطر درس
حكومة والا خاص والا حتى منازل وبعدين الحين تدفعون دم قلبكم علشان المدارس الخاصة المفروض ترتاحون مو يرد الطالب البيت وواجبات
الدنيا عليه اشوف بنت خالتي عيالها بالرؤية مساكين ما عندهم وقت للعب كله يكتبون الواجبات الحمدلله

 

[يمة يادلبي]

شوفي انا توني صغيرة حتى ماتخرجت
بس مفكرة إن إذا إن ـشالله اتزوجت ماراح أدخل اعيالي الا مدارس خاصة حتى لو بكون حافية امنتفة بدوس على روحي لأن مناهج الحين غير عن مناهجنا أول والمدرسات الحين غير عن مدرساتنا اول تحسين المدرسة اول تدرس من قلب وحريييصة على انج تكونين فاهمة اما مدرسات الحين حدهممممم أي شي وأسلوب مااااكو ومناهج الحكومة اتيييب اليهد واتعب الياهل ومعه هذا تلقين مخه قوطي مايستفيد شي

بس ترا مو شرط كل من دش خاص شاااااااطر الشاطر شاطر بالحكومة وبالخاص بس براييي ان الحين مدارس الحكومية صارت ولا ابيزة والخاص اح ـسن بواااايد بس يبيييييييييييله تعب انا أخوي بمدرسة خاصة ومناهجه كلها انقليزية وامي ميح بالانقليزي فتخيلي كانت توديه عند مدرسة ادرسه كل الموااااد عاد شوفي جم ساعة يقعد بس الحمدالله كل هذا ياب نتيجة واخوي ماشالله عليه الحين واااايد شاطر بس الحلو فيه ان شطارته بديهية يعني اهوا مايدرس وجذي وهذا دليل ان المدرسين ملوتهم يفهمونهم مو يحشون المعلومات براسهم مثل مايسووون مع يهالنا الحين

 

[حروف من ذهب*]

انا عيالي كانو في مدارس خاصه الصراحه انهدت حيلهم من الواجبات وصارو يكتبون في اليوم الواحد ما يقل عن اكثر من 10 صفحات وكلمتهم وقالولي هذي طريقتنا والصراحه اكثر المدارس الخاصه جذي ودخلتهم الحكومه شحلاتها صج التعب على الام بس ميخالف
وعلى الانجليزي انا باديه وياهم طريقه اني كل اسبوع احفظهم كلمتين انجليزي علشان يتقوون في الانجليش

 

[بلبل حياتي]

بسأل اللي مدخلين عيالهم خاص إنتو وين درستو ؟ اللي درسو بالحكومه لهالدرجه دراستج كانت فاشله وما إستفدتو ولا تعرفون لغه ولا خذيتو شهادات وما عندكم طموح وعقدوكم الأبلات من سوء المعامله ؟ أنا درست بالحكومه طبعا المناهج القديمه كنا ندرس الإنجليزي من أولى متوسط مو مثل الحين من أولى إبتدائي ... ومن أولى متوسط وأنا متفوقه بالإنجليزي لأني أحب الماده والسبب أبوي الله يرحمه كان يحفظني كلمات إنجليزيه من قبل لا أدخل المدرسه والحين عيالي صارو مثلي ... الحمد لله كلهم متفوقين وأذكياء بدون دروس خصوصيه ... وبنتي الجعده بأولى إبتدائي كنت ميته خوف من المدرسه لأن ساكنين بمنطقه يديده والمدارس كلها يديده وتوقعت إن ما فيها تنظيم بس من أول يوم شفت الأبلات والناظره والإداريات كلهم ما شاء الله عليهم ما قصروا وريحوني نفسيا وإرتحت أكثر لما شفت بنتي يوم ورا يوم تتعلم أشياء يديده ... والإنجليزي ماشيه فيه وأسولف معاها بالإنجليزي علشان أشيل الرهبه منها ولا تكون متردده بالصف وخايفه تتكلم إنجليزي ... واللي تقول المدرسه تأسيس أنا أقول لها لا البيت والمدرسه مع بعض تأسيس ... أنا إشتغلت في وزارة التربية بإدارة التعليم الخاص وكنت أسمع وأشوف جدامي المشاكل اللي تصير بالمدارس الخاصه وأعرف كل بلاويهم ... واللي تبي تتأكد من كلامي تروح إدارة التعليم الخاص وتسأل عن مدرسة عيالها وإذا تعرفين أحد يشتغل هناك يقولون لج وما يخافون إنج تطلعين الكلام ...

 

[Oregon]

مشكوره على الموضوع الرائع انا برد عليج من واقع تجربتي الشخصيه

انا تأسست صح بأول ابتدائي و اعتقد هذا اللي خلاني متفوقه بجميع المواد و الحمدالله تخرجت بتفوق
لكن حاشني اكثر من موقف من مدرساتي خلاني اكره النظام الحكومي بذكر موقف واحد مابي يصير باعيالي

الموقف كان من مدرسة الرياضيات والله اني ماني ناسيتها اسمها باسمه كنت مريضه و عندي مراجعة طبيب و مع هذا فضلت ارجع المدرسه عقب ما خلصت من الطبيب مابي يفوتني شي .. كانت طايفتني حصة الحساب رحت حق باسمه بكل ادب اطلب منها تشرحلي اللي طافني تدرين شنو قالت؟؟؟ طلعي بره و بصراااااخ انا ماني فاضيه !! و المصيبه جدام الموجودين بالقاعه!!!

تدرين شلي صار فيني عقب ؟؟؟ كرهت الرياضيات و كرهت كل مدرسات هالماده حسبي الله عليها

من هل موقف عرفت ان التدريس السنع رااحت ايامه

المدرسين اللي بالخاص طاقين طريج من امريكا و انجلترا مو عشان الفلوس بس.... يقدرون يحصلون هالفلوس في ديارهم لكن حبهم للتدريس و التعرف على حضارات الدول اهو الدافع انهم يدرسون اعيالنا... حتى لو غالي بس كفايه راحتج النفسيه انج اديتي اللي عليج لعيالج...

ماتسوى على اشوف دمعت بنتي و لا ولدي من حركه سوتها مدرسة مستبده ...
على الاقل بالخاص فلووسي تدللني و الاقي من يحترم اعيالي و يعلمهم الاحترام .. موو مدرسة اتحسسهم انهم مهانين

وحسبي الله على باسمه و من في شاكلتها

 

[mr000]

شوفي أختي آنا مع الأخت أوريغون وكلامي مثل ماقلت عن تجربه يعني جربت الحكومه ب3 عيال وألحين جربت الخاص أول كنت أقول حق ولدي العود أذا مو فاهم روح حق المدرس يشرح لك هو باجتماع أولياء الأمور يقول ميخالف خل أييني وولدي مسكين خايف ومتردد وآنا ألزم عليه ألا يروح حق المدرس وتالي النتيجه شنو أنه حصل زفه من المدرس وفشله جدام المدرسين! وألحين بالخاص كافي أني أدز أيميل حق مدرس ولدي أقوله ولدي مو فاهم الدرس يرد علي ( خليه أييني بالفرصه وآنا مستعد أشرح له اللي يبي) ويروح له ولدي وصج يقعد معاه بروحه ويشرح له بكل رحابة صدر!آنا وحده مستعده أحرم نفسي من السفر ومن كل شي بس ماأشوف ولدي ينهان أو يفشله مدرس أو يحسسه أنه فاشل ومامنه فايده بس علشان ضعيف في ماده معينه كافي اللي شفناه بمدارس الحكومه!!