شق سقف الحلق

[أم الليالي]

أخواتي مدن الياسمين ودانة العجمي ، مشكورين على ردودكم والله يشافي جميع أطفالنا ومرضانا بإذنه سبحانه وتعالى.

 

[قناعتي]

السلام عليكم خواتي انا عندي ولد عمره 15 من ولته كان فيه فتحه بسقف الحلق وسكرناها في البابطين لكن ما زالت عنده مشكلق الخنه ماثره بكلامه والعام قالي خلينا راجع الطبيب علشان الخنه قالوا ما فيه علاج لها بالكويت وهو حبيبي كل مرحله دراسيه يشرح مشكلة علي الطلبه علشان يفهمون هو ليش يتكلم جذي الله يعين

 

[أم عبووووود]

السلام عليكم

مشكووورين خواتي عالردود

خواتي انا بنتي فيها شق بسقف الحلق لكن ماتسكر وسويت لها العمليه البابطين ومانجحت وقالوا لنا لان الفك صغير لما تكبر شوي ويتوسع الفك نسوي لها العمليه مرة ثانيه
الحين بنتي ١٠ سنوات تقريبا الحمدالله تتكلم بس فيها خنه والحروف اللي كانت غير واضحه وضحت ولله الحمد بس يبي لها مراجعات للاسنان والاذن دايما تسكر بسبب الماي سويت لها عمليه بمستشفى زين حطوا لها تيوب بس ما طولت وطاح التيوب تلاحظون عليها السمع بين فترة والثانيه ماتسمع عدل .
قال الطبيب لازم نسوي هالعمليه كل ٣ سنوات مرة لين تسكر الفتحه اللي بحلقها
بنتي الفتحه اللي بحلقها تاثر عليها احيانا اذا كلت اشياء تتلزق تدخل بالفتحه وتحس بدوخه لازم تنزل راسها فترة لين ترد طبيعي

ربي يشافي بنيتي وعيالكم
*

 

[اللاندكروز]

انشالله الدواء موجود لفتحه الحلق وعن تجربه وبدون عمليات !!!!!!!!!!!!!!!!!!!!!!!!!!! وعسى الله يشافي لكم عيالكم ....
" يخرج من بطونها شراب مختلف الوانه"​

 

[أم الليالي]

السلام عليكم ورحمة الله وبركاته ،،، أختي أم عبود أولا عيد مبارك وأسأل الله العظيم رب العرش العظيم أن يشفي إبنتك شفاء تاما لا يغادره سقما ،،، الله يكون بالعون ،،، الصراحة حالة شق سقف معاناة ما يدركها إلا اللي إبتلي فيها وأنا بنتي منهم ،،، حاولي إستشيري أكتر من رأي إلا الله يوفقك بدكتور شاطر وكفؤ ،،، والعادة النطق مع التدريب والعلاج يقولون يتحسن تدريجي بس المهم المتابعة من الصغر .

الله يشفيها بإذنه ،،،،،،،، قلبي معك

 

[أم عبووووود]

السلام عليكم ورحمة الله وبركاته ،،، أختي أم عبود أولا عيد مبارك وأسأل الله العظيم رب العرش العظيم أن يشفي إبنتك شفاء تاما لا يغادره سقما ،،، الله يكون بالعون ،،، الصراحة حالة شق سقف معاناة ما يدركها إلا اللي إبتلي فيها وأنا بنتي منهم ،،، حاولي إستشيري أكتر من رأي إلا الله يوفقك بدكتور شاطر وكفؤ ،،، والعادة النطق مع التدريب والعلاج يقولون يتحسن تدريجي بس المهم المتابعة من الصغر .

الله يشفيها بإذنه ،،،،،،،، قلبي معك

وعليكم السلام والرحمه

هلا فيج حبيبتي ام الليالي عساج من عايدين العيد يارب ويعوده عليج بالصحه والعافيه انتي وانتي يعز عليج

يزاج الله خير ياقلبي وماقصرتي وانا قاعدة احاول اخذ اكثر من استشارة وربي يشافيها ان شالله ويشافي بنيتج ومرضى المسلمين يارب

 

[جامعيه]

السلام عليكم
بنات انا ولدي فيه خنه قويه وحيل مضايقته وماثره عالنطق عنده ووديته لسند الفضاله وقالي لحميه بسيطه ومالها علاقه بالنطق ودربيه ع الكلمات خصوصا اللي فيها س ولدي اسم الله عليه عمره اربع سنوات
السؤال هل هذا يعتبر هذا شق في سقف الحلق ولا لا مع العلم شفايفه مافيهم شي بليز ترا والله موفاهمه الحاله اللي تتكلمون عنها عدل واخاف تكون حالة ولدي وانا قافله عنه

ردو علي جزاكم الله خير

 

[جامعيه]

بناااااات مارديتوا علي ؟؟؟


تكفون طمنوني الله يطمن قلوبكم

 

[أم الليالي]

أختي جامعية إستشيري رأي دكتور تاني وبعدين إذا اللحمية مؤثره على كلامه يمكن يشيلها ، شق الحلق موضوع ثاني رغم إنه في حالات ما يكون الشق فيها ينشاف بالعين وما يكتشفوا الأهل إلا بعد ما ينطق الطفل ويكون له أعراض ثانية ... الله يشفي ولدك

 

[وريف مكة]

السلام عليكم ... تحية طيبة من ارض الرسالة ومهبط الوحي من مكة المكرمة اخواتي سجلت في هذا المنتدى عشان هالموضوع الحمدلله من قبل ومن بعد انا عمري الان ب30 ولدت وانا عندي شق في سقف الحلق وعملت عملية وفشلت فقامو الاطباء بحت اللحم في سقف الحلق كله والان كل مااروح لدكتور يقول صعب لان مافي لحم نوصله ببعض مابقى غير الفكين الحمدلله تخرجت من الجامعه وتيسرت الامور المشكله الان عندي هي في السمع فالسمع اصبح يضعف بشكل سريع اسمع الناس تتكلم بس مااعرف وش يقولون بالضبط الا اذا رفعو اصواتهم وكلموني بوضوح رحت لدكتور الاذن بمستشفى النور في مكة وقالي ممكن تحطين سماعه بس لازم تسكري فتحة الحلق لانه الحلق مفتوح على الاذن وممكن مع الوقت تسوس الاذن وحولني لطبيب التجميل وقال نفس الكلام صعب العمليه بس ممكن تحطين تركيبة متحركة تسكر سقف الحلق بس هل هالتركيبة مفيدة للاذن يقولون لانعلم وموعدي مع دكتور الاذن بعد 5 اشهر تصورو ,,,,, الحمدلله على كل حال ولا حول ولا قوة الا بالله ...

 

[أم عبووووود]

الله يشافيج حبيبتي ويعافيج ان شالله ويشافي مرضى المسلمين يارب

 

[life]

السلام عليكم ورحمة الله وبركاته
أنا عضوة جديد سجلت في هذا المنتدى كي استفيد من تجارب الامهات مع أطفال الشفة الارنبية
أشكر جميع الاخوات وأحب أسال الاخت dana al ajmi ماهي مراحل العلاج التي مريتي بها مع ابنتك ؟؟ وهل بقي للجراحة اثر بعد العملية ؟؟ هل بعد العملية بشهر ذهب الاثر ام لا؟؟ وكيف ظهرت الاسنان هل هناك تشوه ام لا؟؟
ارجوك طمنيني فانا قلقة على ولدي هو الان عمره شهرين ونصف ولم يجري جراحة الشفة بعد
هل هناك معلومات هامة يمكن ان استفيد منها في علاجه؟
الله يجزاك خير
واي اخت عندها تجربة تقدر تساعدني ترد
وجزيتم خيرا

 

[أم الليالي]

السلام عليكم ورحمة الله وبركاته ،، أختي Life ....... الله يشفي ولدك ويصبرك في طريق علاجه .. حالات الأرنبية وشق الحلق دايما يبيله الصبر في العلاج وأكل الطفل ... إختاري الطبيب الأكثر جدارة وخبرة وإستخيري بهذا الخصوص لأنه اذا بديت العلاج عند الدكتور الصح بترتاحي وتريح صغيرك .... الله يشفي جميع مرضانا ومرضى المسلمين.

 

[life]

الله يعطيك العافية أم الليالي اذا كان عندك خبرة ياليت تجاوبي على استفساراتي واسئلتي وطمننيني بمعلومات اكثر أنا الحمدلله اخترت الدكتور ومنتظرة العملية بس ودي احد يشرح لي كيف رح يكون الوضع بعد عملية الشفة الارنبية من اجل اتوقع النتائج وكيف يكون وضع الاسنان ولدي ماعنده سقف الحلق الحمدلله بس شفة ارنبيه مع اللثة

 

[أم الليالي]

أختي Life بودي أساعدك بس أنا بنتي الله يسلم ولدك كان عندها شق بسقف الحلق فقط وعملت عملتين أول مرة بالبابطين عند عماد النجادة وفشلت وفتح الحلق بعد أقل من شهر وبعدين عادتها عند د.هشام بورزق بالسلام والحمدلله العملية نجحت ونتايجها حلوة للحين ما شاء الله ،،، يا ريت الأخوات يفيدونك بحالة ولدك .

للرفع