:eh_s(3):بنات شلونكم شخباركم
هالفترة قاعد افكر واااايد بمستقبلي مادري اذا البنات الي بعمري قاعد يفكرون مثلي ولا لاء ؟
خلوني ادش بالموضوع دايكرت انا عمري 25 سنة سبق اني ملجت وفليت الملجة لان الي ملج علي كان يخوني واااايد هذا وانا بالملجة وكانت معاملته معاي كلش كلش لا اسلوب وكل حركاته نفاق بس كان ماخذني عشان وظيفتي وشهادتي وشكلي لكن قلبه بعد الملجة مانبض لي كلش المهم ان انا فليت منه بالملجة قبل لا يدخل علي ورديتله مهره
الي ابي اوصله لكم ان زواجي الاول ( الي ما اتعبره زواج اصلا:krkrkr: ) كان تقليييدي يعني خطبة اهل ومن فليت من هالملجة وكلا يتقدمولي شباب لكن سبحان الله كنت اكتشف بكل واحد شغله ماتغتفر يا عنده شقه من ورا اهله يا راعي سياكل و24 ساعة فرارة عالحب ومادري وين ( وانا اخاف منهم الصراحة ) واحسنهم احسنهم طاقله فلبيني من الي يشتغلون بماكدونالدز يعني بذمتكم الفبينيين وينهم وين الهواش فحزتها خفت على عمري ان اذا رضيت فيه يكوفني بزاوية :eh_s(4):
هذا غييير الي داش علينا في البيت واهوا محشش واكتشفت هالشي سبحان الله لمن رحنا نسوي الفحص جان يقولي الخبل ويعترفلي ان اهوا يحشش بهولندا وقالي راح اونسج حيييل اذا خذيتج طبعا انا انصدمت ان اهوا يتحجى عن عمره ومشيت معاه الموضوع على ابو ان عادي على شان اسحب حجي ولا الحبيب منطلق بالكلام وقالي ان حتى لمن دشيت بيتكم كنت محشش وقعد يقولي ترا هالشي مو ادمان لكن يرفع المزاج وانا حدي انصدمت ونطرت يخلص التحليل جان اطلع وارفضه رفض قاطع
ومرة تقدملي واحد قعدت ابجي عليه بالصاله لان اهله غشوني فيه دخلو علي واحد معاق من كثر ماعور قلبي قمت ابجي حده كسر خاطري مادري ليش اهله قصو علينا وخلونا نقابلهم وماقالولنا ان ولدهم مريض حزتها ماقدرت امسك نفسي جان اقعد ابجي بويهه واهوا الفقير يقولي اشفيج انا من ايدج هذه لي ايدج هذه وانا من سمعته قال هالجملة جان ازيد بالبجي :eh_s(2):
وكل واحد يتقدملي اكتشف فيه عيييبه شكبرها طبعا انا كنت اتقاضى عن شهاداتهم المتوسطة من حنت امي مع ان انا جامعية وقاعد اكمل ماجستير بس شسوي امي كلا تقولي الريال مو بشهادته وسبحان الله كل الي يتقدمولي متوسطة ماكو الا واحد تقدملي جامعي ولمن وافقت عليه طلع عنده شقه ومتهاوش مع ابوووه مادري شلون يايين يخطبون هذوله :eh_s(10):
ونسيت اقولكم ان كل واحد من الي فوق ذكرتهم تقريبا ثلث ارباعهم عن طريق خطابة والباجي مادري من وين يووونا لا تسألوني :eh_s(10): حتى لمن سألناهم انتو من طرف منو ماقالولنا وكل الي قالو عرفناكم من عيال الحلال وانعتو بنتكم لنا :eh_s(10):
ومن صارتلي هالمغامرات مع هالخطاطيب عقبها حلفت على امي ان لو شنو ماراح اتزوج عن طريق خطابة لان الخطابة ماوراها الا الردي طبعا مو الكل بس من كثر الي شفته يعني شدعوة ولا خطابة يابتلي واحد زيين المرييض مريض والي يشرب يشرب والي محشش محشش شنو هالاشكال الصراحة خلاص مابي عن طريق خطابة وحزتها قررت انطر نصيبي بس لمن افكر بيني وبين نفسي الاقي ان اهلنا ومعارفنا شوية وماوراهم لا خطبة ولا يحزنون يعني صعب ان اتزوج من طريقهم لانهم مادرو عنا ولا عن هوا دارنا فقعدت افكر شلووون اتزوج بس بطريقة ترضي ربي قلت خلاص شوية استغفار مع توكل على الله مع ثقة عمية بالله مع كشخة وترزز بالعروس والمناسبات وامورج كلها تمام بس هم عروسنا ومناسباتنا شوية فاضطريت اكشخ اذا بغيت اطلع جود احد ينعجب فيني ويصير ريال بدال هالي يرقمون ويتحرشون ويدش من الباب واتزوج وسويت هالفكرة وما حصلت الا هالشباب التافه الي بس يبي يرقم ويكلم والصراحة انا حدي حدي مو صوب هالسوالف قطيعه يعني ينعجبون ويستذبحون بس عشان القيهم ويه واخر شي يطلع الحبيب يبي يتعرف
عقبها قلت اووووووه خلاص ماراح اتعب نفسي نصيبي راح ايي لي عندي بس ردلي خوفي مرة ثانية بس هالمرة غيير الصراحة اخاف اتزوج واحد ما اعرفه كلش ملش وابتلش بخياسه مثل اول واحد ملج علي خو انا مو كل يوم لي ريل واخاف اروح اتعرفلي على واحد ويطلع ما منه فايده ويقص علي هذا غير الذنوب الي اكسبها بسبته خو هابين الحين الشباب بتعشيم البنات واخر شي يقولون لهم امي ماترضى ابوي مريض:s141: اختي طاحت من فوق السطح اخوي باقته عصابه بنيويورك :eh_s(13)::j013:والخ الخ الخ من افلامهم الي مالها اول ولا لها تالي وانا مو مستعدة اعور راسي معاهم ولا مستعدة اضيع وقتي
بس والله ودي قبل لا اتزوج شريك حياتي اني اعرفه لو شوية بس شوية لا اتقولونلي بفترة الخطبة كلميه جربت اكلم الي خطبوني بفترة الملجة وكلهم قاعد يظهرونلي احسن ماعندهم واخر شي طلعت بلاوي بلاويهم
انا الي ابيكم تفهمونا معاي ان انا مابي اتزوج زواج تقليدي لان جربته حتى الي نزوجني قبل كلمته بالخطبة وماطلع خياسة الا لمن ملجنا
يبا من الاخر انا ابي اتزوج واحد يكون معجب فيني واهوا الي ايي يتقدملي ويقولي لو سمحتي جم رقم بيتكم عشان اهلي يدقون ويخطبونج :eh_s(17)::eh_s(7): بشرط ان اكون شايفته من قبل يعني مثلا معاي بالدوام مثلا مثلا او يكون معاي بدورة او بسفرة او او او يعني اهم شي ما يكون بيتنا اول لقاء معاه فيه ودي اتزوج واحد اناظره ويناظرني ويصير بينا حب بالنظرات وتكون بينا قناعة ان انا مقتنعة بشخصة واهوا مقتنع بشخصي يعني مثلا يكون معاي بالدوام ويقعد يناظرني واناظره ويكون معجب فيني ومعجبة فيه وبدون سوالف الشباب التافهة المكالمات وما المكالمات يتقدملي ونتزوج لاني والله مو مستعدة اغضب ربي واوصخ سمعتي وانا بهالعمر واهم شي مو اييني عن طريق خطبة اهل وخطابة ومادري شنو
بنات شلووووون والله شلووووون يصير هالشي ورب الكعبة وااايد احاتي مااااابي اتزوج زواج تقليدي كافي انقرصت مرة مابي انقرص مرتين خو مو كل يوم لي ريل يبا بالعربي انا تعقدت من الزواج التقليد وبنفس الوقت مابي اروح اتعرف على شباب واوصخ سمعتي واغضب ربي
والله خايفة مابي اتزوج واحد ما اعرفه مابي مابي مابي بس شلوووووون والله الدنيا الحين تخرع وتحتم على الوحدة انها تكون تعرف شريك حياتها قبل لا تتزوجه لان الدنيا الحييين غييييييير:eh_s(2):
بنات ادري طولت عليكم بس انا كنت مجبورة اقولكم عن خطاطيبي وكل اموري عشان ماتقولون ليش ماتتزوجين عن طريق خطابة وليش ماتتزوجين عن طريق الاهل وليش وليش وليش .... عشان جذي قلت لازم اقولكم كل سالفتي عشان تفهمون وضعي ووضع اهلي وتلقولي الحل المناسب لمشكلتي الي اهيا ( شلون اتزوج واحد تكون بيني وبينا معرفه سابقه بس بدون ما اغضب ربي واوصخ سمعتي؟) لا تقولونلي روحي كلمي شباب وجربي حظج خل نفترض كلمتلي واحد وطلع مامنه فايدة راح اروح للثاني ويمكن يطلع نفس الاول وراح اروح للثالث وعلى ما افتر على الكل راح اكون كلمت كل شباب الكويت لا يبا مابي مابي مابي بس والله ابي اعرف شريك حياتي بس شلوووون
في بنات ما شاءالله عليهم يتزوجون عن حب وهالفئة تعجبني بس انا ماعرف ولا عندي مثل ذكائهم واذا رحت وكلمت اكيد راح يقصون علي ومالي خلق هالسوالف بصراحة
بليز ابي كل البنات وكل الحريم الي متزوجين ينصحوني ويرشدوني شسوي .؟ وهل مريتو بالحيرة الي انا مريت فيها ؟ وشنو سويتو؟ :eh_s(2):
ماكل حب يدخل القلب سكان بعض الهوى لخذ ايام راحي يروح كنا ماتصور ولا كان) تأملي بيت الشعر اللي كتبته لج في حقيقه كبيره وسألي اي احد تزوج عن حب بيقولج الاحترام هم الاهم من الحب والحب يختفي بعد الزواج ويبقى الاحترام بس وانا سمعت كثير يقولون هالكلام وحتى الاجانب يقولون نفس الكلام مع مجتمعاتهم منفتحه انا اقولج توكلي الله وادعي ربج يرزقج بانسان صالح 
