شلون تتصرفين مع طفل غيوور وانتي توج والدة؟؟!!!! امبي مشكلة

[om MaRyooM]

السلام






بنات الاسبوع الياي ولادتي باذن الله ..

وبنتي الوحيدة عمرها سنتين ونص بالظبط


كثر ماقولكم تغاااااااااااااار شوية

تطق اليهال اذا تشوفني العبهم

وتعضهم من تحت لي تحت


العايلة قامو يسمونها (جكي) لووول عرفتوه ؟

لأنها بس تأذي اليهال .. بعد عمري تكسر خاطري فيها فظول غير طبيعي


والحين كله تأشر على بطني تأشر على عيونها تفقصهم تقولي (بيبي .. آآآيوووووناااااه) يعني عيووونه
لووول


والله خااايفة بوجود البيبي شنو بسوي ؟؟؟
احس رح تينني ؟ ؟


ندااااء لذوات الخبرة


شلون تتصرفون مع عيالكم بحيث ان
1) مايغارون من البيبي اليديد
2) مايأذونه ؟؟

 

[معجزات]

يااااااحلاتها الله يخليها لج يارب وانا بعد اسبوع ادش شهري

اي والله بنات انا عندي بنت عمرها 5 سنوات وهذا ثاني حمل لي

والمشكله بنتي تقولي بوجهي اشكره انا اكره البيبي اللي ابطنج

واذا شافته يتحرك ابطني تحط ايدها على مكان حركة البيبي وتغفص بطني حيل وتدخل ايدها داخل بطني

وتحط حلجها عند بطني يعني بتسولف مع البيبي وتقوله ياكلب يا حيوان عزكم الله انا اوريك اذا طلعت

المشكله انا دلعتها وايد ...... واللحين ذبحتها الغيره وضعفت حيل


سوري ام مريوم بس والله اثرتي قريحتي

 

[لمسات فتاة]

وعليكم السلام ..

الله يسلمج لوول انا لا ام ولا شي توني صغنونه ..

هاالغيره موجوده خصوصا بنت اختي وولدها يغارون من البيبي الي بالطريج ..
فـ أختي شنو بتسوي ... الله يسلمج تبي تشتري لهم ألعاب قبل الولاده واهيا راده من المستشفى مع البيبي بتعطيهم الالعاب وتقول لهم هذا هديه لكم من البيبي .. عشان من اول نظره لهم للبيبي يتذكرون انه الهدايا من البيبي بعدين كل ماتشوفين بنتج لعبي وضحكي معاها جدام البيبي والبيبي لا تعطينه اهتمام جدامها .. وبسس وتولدين بالسلامه يا رب

 

[om MaRyooM]

معجزات

لووووووووووووووووووووووووووووووووووووول
صج ظحكتيني على سالفة المسبات

خخخخخخخخ والله يظحكون هاليهال .. بس صج مشكلة

انشالله احد يفيدنا

 

[om MaRyooM]

لمسات


حبيتبي مشكورة ماقصرتي
وانشالله الله يرزقج بالزوج الصالح والذرية اللي تترسلج البيت

 

[لمسات فتاة]

ام مريووم ومعجزاااااات >>> تولدون بالسلامه ياارب :*** ...
​

 

[لمسات فتاة]

حياتي احرجتيني ام مريووم ..
ان شاء الله جذي تنكتب :*** لان حيل في فرق بالمعنى فديييتج

 

[المسكـ]

انا ولدي مايغار وايد يعني ما يهمه لووول لمن يشوفني ماسكه بنت اخوي العب معاها بس ايي صوبي يتسال هذا شلون اسوي يعني اشياء اهوو عارفها بس يبي يجذب انتباهي فانا اول ما اولد بييبله هديه واقوله من البيبي ومن الحين امهدله انه بتيله اخت ولا اخو يلعب معاه ويساعد ماما ويمشط شعره اهو عمره 4 سنين فاعتقد راح يغار بس مو وايدد

 

[om MaRyooM]

المسك

اسمالله عليه الله يخليه لج ويحفظه
انا اسمع ان الصبيان مايغارون وايد
وصج اخوي كان عديم الاحساس واهو صغير مايغاار
لووول

 

[معجزات]

لمسات ........ مشكوره على النصيحه

ام مريوم اي والله المسكين سمع انواع السب واهو ماطلع ع الدنيا تدرين اذا اهو يتحرك وهي غفصته بايدها يكش ويقعد فتره مايتحرك

كاسر خاطري .....

 

[om MaRyooM]

معجزات

لوووووووول حرام ..
يلا لازم ندير بالنا شنسوي ..
بس انتي مومدخلته روضة او حضانة شي ؟؟؟ لأن الياهل لازم يلتهي
انا ناوية ادخلها حضانة .. انشالله تنفع هالحركة عاد

 

[ام سليمان 2008]

هلا والله ام مريومة
شوفي انتي حاولي على كثر ماتقدرين لاتهتمين بالبيبي جدامها واشتري لها العاب او الوان ودفاتر وقعدي معاها واذا في مجال بعد وديها عند امج فترة النهار او دخليها حضانة المهم اشغليها عن البيبي
الله يسهل عليج وعلينا ييارب:yaaaaaarb:

 

[^noonaa^]

لووووووول ان شاءالله تولدين بالسلامه وماكو الا كل خيير

اول ماتولدين حببيها بالبيبي وخليها اتساعدج بس طبعا عينج عليها ٢٤ سااااعه
والغيره لااااازم لابد منهاااا والله يعينج


وعلي سالفة جكي لووووول حرام لا اتقولون لها جذي لا تمشي عليها ،، لانه اخوي الصغير كان مجرم وانقوله جكي وللحين ماشيه عليه واهو اشكبررره :/

بس هذي بنيه حرااام لوول

 

[engnera]

الغيره لازم موجوده مهما سويتي
فتره وتعدي

 

[om MaRyooM]

بعد عمري ماقصرتووو

 

[فاقده ابوهاااا]

ام مريوم ... اشلونج حبيبتي وربي يقومج بالسلامه ويفرح قلبج بالمولود اليديد

انا نفسج خايفه من ردة فعل ولدي الله يستر منه ما ادري يوم شفت صوره جاكي تخيلته ولدي
اذا لقيتي حل بلغيني الحال من بعضه

 

[اترجة]

أول شي أختي أخذي منى هالنصايح انا خبرة باليهال
1- لا تعطين البيبي اليديد أي أهمية طول ما هي قريبة عندج .
2- فترة الصبح دخليها حضانة خليها تختلط مع اليهال .
3- خلى عيونج دايم على البيبي لأن ما تدرين فجأة يصير شي تاذية بأكبر ما عندها ههه .
4- عطيها اذي هي مو موجودة الأهتمام الأكبر لها لانها أذي شافتج تبوسين البيبي وتهتميله اكثر تحس أنج تكرهينا الطفل ذكي يعرف تتجة لأبوها أكثر أنا بنت عمتي جذي طول فترة النفاس البنت بس تبجي تبي أبوها لأن كل البيت محد يعطيها أهتمام وقبل كان الأهتمام كله لها نقطة مهم.
وإن شاء الله تولدين بالسلامة وتكون النصايح أفدتج لو بالقليل .

 

[om MaRyooM]

فاقدة ابوها

حبيبتي وانتي بعد الله يقومج بالسلامة
ودام ان عندج ولد لاتحاتين ..يقولون الصبيان غيرتهم خفييفة مو مثل البنات يخرعووون لوول








اترجة

بعد عمري ماقصرتي
والله فادتني نصايحج وحطيتها في بالي

 

[Daleela]

الله يخليلج جكي قصدي مريومه لوووول عادي كل اليهال جذي انا عيالي يغارون من بعض ومن اي ياهل اشيله

شوفي ام مريوم فديتج اشتري لها العاب حتى لو العاب بو 100 فلس وكل مره قولي لها هالبيبي الحلو عطاج اياه

واهيا تحبج وقولي لها انتي اختها ولازم تحبينها ومع الوقت بتحبها انشالله ومافي احد ما يغار

 

[om MaRyooM]

^
^

انشالله
اي ماكو غير جذي والله


والله يهديهم هاليهال ويعقلووون

مشكورة حياتي