شلون تضبطون الصف ؟

[*أم*خالد*]

السلام عليكم

شلونكم مدرساتي

اكيد معانا وايد مدرسات يدد واللي طالعه من تربيه عمليه واللي توها تتوظف

ودي أسألكم يا أبلات .. شلون تضبطون الصف ؟

صفي السنه اللي فاتت كان منضبط معاي وزين بس المشرفه تقول يبيلهم شد أكثر .. انا احبهم ومابي ازفهم يعني اخليهم على راحتهم

ومن التربية العمليه الى اليوم ماعرفت الا طريقتين يا الزف ( مو خوش لأن عقبها تأنيب ضمير ومرات الياهل يطنش )

او Time out وبعد مو ماشيه وايد .. لأن اللي مسوي غلطه صغيره واللي مسوي غلطه كبيره عقابهم واحد فـ مو خوش حل

وجربت الحرمان من الفرصه .. طبعا مو كل الفرصه بس أول خمس دقايق يشوفون اليهال يلعبون واهم قاعدين عشان مايعيدون الغلطه اللي سووها .. تنفع حق الفتره الأولى من الدوام بس عقبها يزيد النشاط والخبال والله يكون بالعون

ادري انه التوجيه السنع مانع كل الطرق اللي قلتها لووووووووول
حتى القرآن ذاكر ثواب و ( عقاب )

والثواب .. ماقصروا وزارتنا منعوا الحلاو والكاكاو كـ مكافأة للطفل عشان مايغص .. وبصراحه بصراحه انا مو قاعده على بنك عشان اشتري العاب وهدايا .. اكتفي بلعبي وياهم والتصفيق والامور المعنويه مثل اللمه والحبه او اوديهم الفرصه بالـ لاصفي .. يستانسووون حدهم
وبألوان الوي ارسم على ايدهم نجوم .. منها الوان حلوة وتكون النجمه كبيره وراهيه .. وبنفس الوقت انظف لأنها تروح بالماي والصابون ماتظل وايد
كلش كلش ما اقرب صوب ويوهم

وشلون تتعاملين مع الياهل اللي يعاندج ويختبرج ؟

ناطرين اجاباتكم

اللي مو مدرسه روضة وعبالها احنا وحوش .. يا خواتي والله انه نحبهم ولا جان ماصبرنا عليهم .. بس الأم تزف عيالها عشان تأدبهم فـ ما بالج بأبله جدامها 25 طفل .. لازم اكو طريقه لفرض النظام وتكون حلوة وماتكره الياهل بالروضة

بانتظار مشاركة زميلات المحنه

 

[Namlah]

يعطيج العافيه...اول الايام ماعطيهم وجه اسوي نفسي ثقليه ....
واعاقبهم بالاركان يعني الشيطان الي ينرفزني ماخليه يلعب ...انفعت معاي كان عندي واحد من اول السنه مجنني مانفع معاه شي لين ماخليته يلعب بالاركان قام يبجي وابله خلاص اصير عاقل..طبعا مو من اول مره خليته....ومرات اذا اكثر من 3 ماذيني ماطلعهم فرصه ولا يشوفونها...والحمدلله في نتيجه....والله يعينا....احب اليهال وهذا اللي مصبرني علي وظيفتي

 

[فرحه ولكن؟]

والله انا مسويتلي مكان مكان معاقبه كل الاطفال يخافون منه وهو ركن زاويه مافي ولا شئ بس ان الطفل يوقف فيه خمس دقايق ويرجع وانفعت معاي كلهم قاموا يخافون منه وعلى بالهم انه محد يجيه الا اللي نكره وتهببببببببببببببببببببل هالطريقه

 

[عبق الورد]

العقاب ما اخليه يوقف اول واحد اذا طلعنا من الصف ... وبنفس الوقت يكون ثواب اخلي المؤدب يوقف اول واحد ..تلاقيني انسى الاطفال يذكروني ابله فلان شيطان لا تخلينه يوقف اول واحد
سويت لوحه اي واحد يسوي سلوك خاطيء اكتب اسمه واحط تحته اكس اذا سلوك زين احط له نجمه عاد شوفي شلون يفتنون ابله فلان طلع من الركن حطيه له اكس بالانصراف اللي اكثر نجوم اعطيه هديه الباجي ترضيه ككاو اما اللي فيه اكسات وايد احرمه
في اطفال الثواب انه تخلينه يصير قائد او مساعد لج ..
اما اللي حده شيطان اخليه يصير شرطي الصف يراقب الشياطين .. عندي ولد شيطان وذكي خليته شرطي لبسته وشاح بالبدايه استانس عالحركه بعدين قام يتشيطن قلته مايصير انت شرطي لازم تصير شاطر قال صح ابله ههههههههه فديتهم اشتقت للاطفال بس ما اشتقت للدوام
سوري ادري طولت

 

[*أم*خالد*]

مشكوووورات على مروركم العطرررر

 

[ابيار]

حلوة سالفة النجمة والاكس
بجربها السنة

 

[KARAMILLA]

شوفي انه عن نفسي مدرسة ابتدائي بنات
بس لما ادرس اولى احس انهم للحين يهال فاستخدم معاهم كذا اسلوب بقولج جم طريقة انشالله تفيدج
اولا خلي كل طفل يحفظ مكانه بالصف وما يغيره حتى لو في احد غايب محد يقعد مكانه
تقدرين تحددين مكان كل طفل برسومات كرتونية او دوائر...تقدرين تحطين رسومات ورد للبنات وسيارات للأولاد
حتى شكل الصف بصير حلو..
فوقت ما حسيتي ان الصف احتاس تقدرين باشارة معينه سواء صفقة او صفارة انهم يرجعون لاماكنهم
انه عن نفسي استخدم اسلوب العد.. اعد لهم للعشرة فيركضون حق اماكنهم

ثاني شي اول ما ادخل الحصة ارسم شخصيتين على الصبورة happy face وحده حلوة ومرتبة وبايدها وردة والثانية سمايلي مبهدل وشعره كشه والزهيوي واقف على ريله والذبان فوق راسه والسناسيل... يعني حاته حاله

حق شنو كل هالقصة... عشان اللي تصير شاطرة وما تأذيني اكتب اسمها عند الصور الحلوة والعكس
واذا الحلاو ممنوع يامعودة بفك هللي قللي...حطي في طاسة كبيرة وكل شوي لقميهم

انه عندي كامرة دجيتال استخدمها ساعات اذا ملو من الوسائل التشجيعية
اصور الشاطرة او الشيطانه(و اهيا تشيطن او تتنطط)
واحط صورتها على ستاند جدام الفصل او عند الادارة واذا مافاد اقول حق الشيطانه انها اذا ما تأدبت ادز الصورة حق امها تعاقبها(يعني صايدة عليها دليل)

والله يوفقنا اجمعين

 

[*أم*خالد*]

كراميلا سالفه التصوير يديده

اخاف اليهال يستانسون على التصوير

 

[فرحه ولكن؟]

حلوة سالفة النجمة والاكس
بجربها السنة الجديدة ان شاء الله
يعطيج العافيه

 

[miamy]

وايد عجبتني فكرة الشرطي

انا اييب عطور للبنات وعطور للأولاد

بالانصراف الشاطر احط له عطر وااااايد يستانسووووووووووون

تعرفون التستر العنونات ييبوهم حقهم

 

[miamy]

اي اي

انا مرات اييب لهم حليب كاكاو حق الشطار

 

[ms. hana]

اللهم انك عفو تحب العفو فأعفوا عنا وارحمنا

 

[moone GRL]

ارسم بقلم السبوره نجمه كبيرة علي يدينهم .. واللي يزعجني احرمه من الاركان بس ماطول عشان ما تدخل المشرفه تشوفه قاعد ما يلعب ممنوع خخخخخخخخخخخخخخخخخخخ

اللي يزعجني بعد احطه اخر واحد اذا بغوا يصفون حق الفرصة او المطعم لما يطلعون من الصف

اكثر شي يحبونه الاطفال الستيكرز .. تلقون بو 50 فلس بعد بالمباركية انواع للبنات وانواع للصبيان وبس كان الله غفور رحيم .. ينهبلون عليهم الاطفال

بس انتوا افرضوا نفسكم من اول شي لا تعطون الجهال وجه عشان ينضبطون ويتعودون على النظام بعدين شوي شوي نرخي

 

[انشودتي الكويت]

ان والللللللللله ما اوقف اي طفل لان حرام ..بس عقابي يكون بالحرمان من كل المميزات مثل الكاكاو والحلويات او انه يوقف جدام او حرمان من فرصه او هديه واذ ا متشيطن وايد اخليه يقعد بروحه بعيد عن الاطفال بس علي كرسي اسميه كرسي الشياطين واستحدم احيانا الستكرز .ةسمله عليهم زي الساعه يمشون ويموتوووووون علي يعني مرة اشد بالمعامله ومره ارخي والله حتي برد اي لهم اذا تسنعوا ولم اقول مافي حلاو يعني ما في خلاص اهم يعرفوني عدل لو يموت من البجي ما اعطيه وحلاوي اهو عارة عن فواكه مجففه يعني كشمش موز انانس افيد لهم ويحبونة واللله ومرات ايبلهم بطاط او كاكاو وحلاتهم

 

[*أم*خالد*]

فواكه مجففه ؟؟

اخاف يغص واتوهق انا بعمري :s

اسم الله عليهم اسم الله عليهم

ترى ولهنا عليهم ماتحسون جذي ؟

 

[miamy]

اي ولهنا والله

 

[nero]

انا ما ولهت على احد

ياربي شفيكم لاحقين على الشقى استمتعو باليومين الي بقو

 

[*أم*خالد*]

نيرووو لوووووووووول

ترى انتي قدوتنا بهالركن

والله احنا مستمتعين فيهم بالطول وبالعرض والمخده قامت تبجي تبي مفارق ويهي هاهاهاهاا

بس يبيلي اتفرغ للسوق قبل رمضان والله يسهل

بس بذمتج ماتحسين انج ولهتي على الكتاكيت خاصه لمه اتييلج بنت فيها لتقه وتقولج سوالف تضحك ؟ واي يحلاتهم

 

[شمس]

لا حرام تعاقبونهم يا معلمات


ياحلوووووو كراميلا افكارج حلوووووه احس انج فاهمه والله شلون تتعاملين معاهم

 

[*أم*خالد*]

شمس مو عقاب يعني اذبحهم من الطق .. بس شي يخليه يتوب عن افعاله الشينه مثل اذا طق واحد او تشيطن وخرب على الباجي
كل مكان لازم له نظام