شلون دريتي بالخبر؟؟؟؟؟؟؟

[yam_yam]

مشاركة: شلون دريتي بالخبر؟؟؟؟؟؟؟

أنا كنت سهرانة قاعدة أطالع الحج متولي بالكويت ( فراغة )
و لا قطعوا كل البرامج و شفت الاذاعة و لا قاطعينها حس قلبي أن في أحد مات
وبعدها قطعوا المارينا قلت لا أكيد أحد بالكويت متوفي
دقيت عالأذاعة و قالولي الخبر


الله يرحمه

 

[[ . . Jee Jee . . ]]

مشاركة: شلون دريتي بالخبر؟؟؟؟؟؟؟

انا كنت سهرانة .. اللي معور قلبي اني كنت اطالع فلم بنفس لحظة وفاته .. احس اني ما احس مادري شلون احساسي كلش مو حلو حيل

فريت القنوات وشفت الخبر تحت بشريط الاخبار .. والله العظيم تميت اطالعه مرة واثنين مو قادرة اصدق

ودي يغلطون يكون غلط

انا ليلحين مو مصدقه والله انه خلاص توفى ومو موجود ماني قادرة استوعب والله

 

[bnt q8 in usa]

مشاركة: شلون دريتي بالخبر؟؟؟؟؟؟؟

ايه والله سبوووج ماتتصورين احنا شنو احساسنا وكله نفكر شلون الديره شصاير بالديره شنو الحين الاوضاع وهات تفكير

بس الحمدالله ديرتنا محفوظه انشالله بحبها للخير والله

 

[@ الرسامة @]

مشاركة: شلون دريتي بالخبر؟؟؟؟؟؟؟

واي صج ردودكم اتعور القلب



انا عن نفسي الساعة ما قعدتني
ما حسيت الا التلفون يرن الساعة ستة ونص
والا اختي داقة علي اتقولي لا تداومين
قلت لها ليش
قالت لي بابا جابر مات توهم اعلنو بالتلفزيون قالتها واهي تبجي

قمت اصرخ لاء
علطول قمت من الفراش وريلي يصرخ وراي اشفيج ؟؟؟
قمت اصرخ واقول شيخنا مات
رحت الصالة وشغلت التلفزيون والا وزير الاعلام يبث الخبر
قمت ابجي واصرخ
وزوجي يقولي موزين لا تبجين عليع ادعيله اهو يحتاج الدعاء مو البجي


والله ان اليوم كان ثقيل
كله بجي

خصوصا يوم شفته واهو يطلعونه من الاسعاف
ما كنت اتخيل اني اشوفه جذيه


الله يرحمك يا ابو الخير

 

[ريماا]

مشاركة: شلون دريتي بالخبر؟؟؟؟؟؟؟

اللهم ارحمة برحمتك يارحمن000
انا كنت نايمة لان دوامى عصر وكنت قبلها سهرانة فكلش دايخة وعلى الساعة تسع قعد زوجى يجيك على تلفونة اذا فية كول مسج ولما بطل التلفون ياة مسج وشهق شقة قعدت من الخرعة قتلة اشفيك قالى الشيخ جابر توفى اخترعت وماصدقت قتلة جذب مايموت مستحيل من الخرعة نطينة انا وياة على التلفزيون وكان خربان نحاول مايشتغل الستلايت ماخليت وحدة من خواتى مادقيت عليها ومحد يرد على من الحزن000ف بطلت النت وقريت الخبر وانا من حزتها بحسرة اقول ياليت الزمن يرجع اشوى واشوفة واقولة عن غلاتة عندى ياااااااى كلة اتخيلة ودى اقولة اشكثر احبة ياااااااااااى اللة يرحمة تكفون بنات تدعون لة تكفون خصوصا بين الاذان والاقامة

 

[الفرحه]

مشاركة: شلون دريتي بالخبر؟؟؟؟؟؟؟

الله يرحمه انشاء الله


انا الساعه 5 ونص الصبح كنت قاعده اتقلب بفراشي ولا تلفون ريلي يرن
واسمعه يقول لا حوله الله الله يرحمه انشاء الله
وانت اشدراك ومن هل السوالف
انا اشتغلت فيني
اول ما سكر التلفون سألته خير شالسالفه
قال الامير توفى
جان اقوله منو شيخنا
قاعد يقول اي الشيخ جابر توفى
وقام من النوم عشان يروح الدوام
وانا منسدحه بالفراش منصدمه
فتحت التلفزيون واشوف قنوات الكويت كلا قران
واحس اني مو مستوعبه
بعدين حطو ابقناة الراي وزير الاعلام يتكلم
احني انصدمت
حسيت ان فيني بجيه على مو مصدقه على ما ادري شنو

الله يرحمه انشاء الله

 

[جوريه]

مشاركة: شلون دريتي بالخبر؟؟؟؟؟؟؟

انا دقت علي فله الساعه 7 تقولي لا تروحين الدوام قتلها لييييييييييييييييش؟؟ جان تقول مادريتي شيخنا توفى حسيته جنه حلم والله وتذكرت ان كنت حلمانه فيه الفير جنه راد شباااااااااااااااااااااااااااب وويهه شاد وشعره اسووووووووووود مثل ماكان بشبابه ويمشي ببدله شحلوه الله يرحمك ويغمد روحك الجنه

 

[سعادتي برضى ربي]

مشاركة: شلون دريتي بالخبر؟؟؟؟؟؟؟

واااي الله يرحمه حبيبي باباجابر مااظن في قبله ولا بعده شيخ بهل الطيبه والكرم والقياده

الله يرحمك الله يرحمك ياشيخنا

انا كنت قايمه عشان اصلي الفجر ولا اختي تقول الشيخ جابر توفى من الصدمه مااستوعب رحت غرفة امي ولا قاعده تكلم مرت خالي ويقولون الله يرحمه وضايق خلقهم اهني حسيت اني مصدومه ومو مستوعبه رحت توضيت وصليت الفجر وقعدت ادعيله وعلى طول فتحت النت عشان اشوف الخبر واكتب عنه موضوع

صج صج صدمه الله يرحمه ويسكنه فسيح جناته

 

[meme33]

مشاركة: شلون دريتي بالخبر؟؟؟؟؟؟؟

والله يا بنات ودي اكون بالكويت الحين بس ما ادري شقول....آنا بامريكا وياني الخبر بتوقيت الكويت تقريبا الساعة 5 الفجر عندكم ...قبلها كنت قاعدة اطالع التلفزيون ومافي شي عادي...وبعدين طلعت بروح اشتري اغراض حق البيت...وياني ذاك المسج والله اني ما قمت اشوف الطريق من دموعي ورجعت البيت...وافتح قناة الكويت واشوف صورة الشيخ...واقعد ابجي ..حسيت اني تيتمت...ودخل علي زوجي بقولي شفيج...ومن نفسة شاف التلفزيون...واشتغلت التلفونات...على الكويتين اللي يداومون مع زوجي....والله ان الخبر كان فاجعة للكل...وقلب معاكم يا اهل الكويت...والله لا يورينا مكروة في عزيز زغالي

 

[دلوعة الدلع]

مشاركة: شلون دريتي بالخبر؟؟؟؟؟؟؟

إن الله وغن إليه راجعون

والله انا كنت قايمه الصبح بروح للدوام

والا اسمع المارينا اف ام تقطع الاغاني وتحط قران

انا خفت وقلت الله يستر منو مات

ولما سمعت الخبر على طول طلعت من غرفتي ورحت لأمي

وطحت على صدرها وقعدت ابجي وانا مو مصدقه انه مات

ومانقول الا الله يرحمه ويسكنه فسيح جناته

 

[Dloo3at^Ahaly]

مشاركة: شلون دريتي بالخبر؟؟؟؟؟؟؟

لا انا سهرانا طول اليووم ودريت من التلفزين وااي زر عقلي يووم دريت انا قلت اكيد مو صج مستحيل رحت قعدت امي وقلتلها وخواني حزتها راحوو المدارس مامداني اقولهم يابعد عمري ياشيخنا الغالي صرنا يتامه من دووونك

 

[lolly]

مشاركة: شلون دريتي بالخبر؟؟؟؟؟؟؟

نا صادف اني سهرانه يومين ومو نايمه واقول حق تاج الوفا هني بالنت شعندج سهرانه روحي نايمه وصار الفجر رحت اشوف صباح الخير والا مافي بس قران ... انصدمت .. قلبي حس بالموضوع .. ودخلت النت مره ثانيه بشوف السالفه وهالمره ما دخلت مواقع ومنتديات عشان اعرف السالفه دورت شات كويتي ودخلت له والا اسمع الخبر وطلعت بسرعه واكلم اخوي وابوي وعرفت السالفه وطلعوا يدرون من الساعه 3 الفجر!!!!!!!!!
الله يرحمه
للحين مو مستوعبه

 

[MaYoOoma]

مشاركة: شلون دريتي بالخبر؟؟؟؟؟؟؟

انا قعدت الساعه 9 على صياح ولدي .. قمت بسكته مو راضي يسكت خذيت موبايلي بدق على الخدامه تيي تاخذه لاني كنت سهرانه ودايخه ومالي خلق انزل معاه .. والا اشوف فيه مسجين قلت مو لازم اشوفهم الحين بعدين لما تيي تاخذ ولدي .. بس بلاغة الشف وماتسوي .... بطلت المسجات وحطيت التليفون يمي قلت يعني بسكت ولدي وبشوف منو اللي دازلي والا مسجين واحد من امي وواحد من بنت خال ريلي .. ومكتوب اول شي عظم الله اجركم .. بس مو مبين باقي الحجي . اخترررررررعت اخترعت جان اقط ولدي بفراشه وابطل المسجات والا الامير متوفي .. اقعد ريلي اقوووله قووم قووووم .. جان يحقرني ويعطيني ظهره .. جان اقووله قوووووووووووووم الشيخ جااااااااابر توفى جان ينقز نقزه من فراشه انا خترعت
بطلنا التلفزيون والا قرآن حطينا عالعربيه وقعدنا نطالع
بس ضااااااق خلقي وايد والله احس الكويت ماتصير بدون بابا جابر !

الله يرحمه

 

[بريسم]

مشاركة: شلون دريتي بالخبر؟؟؟؟؟؟؟

انا قعدت ولدى تقريبا الساعة 6 و قعدت اراجع معاه الامتحان و بعدين لبس و طلع للمدرسة

و دخلت الحمام آخذ لى شور و لما طلعت جابتلى الخدامة البخور و دخلت غرفتى و و قعدت بلبس اروح الدوام

و الا اسمع صوت الباب و صوت ولدى راد تخرعت كل فكرة طرت ببالى الا موت بابا جابر : خربت السيارة - طردوه عشان تاخر - تهاوش مع احد ...... بسرعة فتحت الباب و سالته اشفيك ؟ رد : المدرسة مسكرة و ولقيت ولد هناك يقول الشيخ جابر مات ....و انا اصرخ لالالالا و دموعى تنزل اربع اربع و اركض للتلفزيون و الا قرآن و العربية حاطة الخبر و اقعدله بجى من قلب صج صج صدمة .... و ولدى مخترع و تاثر لما شافنى على هالحالة

و هندياتى اخترعوا و جو يركضون ما يدرون شالسالفة ...... و طول اليوم مجابله التلفزيون و أبجى ليما تتفخت عيونى ... بس ما نقول الا انا لله و انا اليه راجعون ... و الله يرحمه أبونا الغالى

 

[@ دهن العود @]

مشاركة: شلون دريتي بالخبر؟؟؟؟؟؟؟

انا لله وانا اليه راجعون
والله انا وزوجى كنا نايميين وعلى االساعه 4.30الفجر دق تلفون زوجى فانا توقعت انه احد من اخوانه يبى اقعدنا للصلاه
فرد على التلفون وما اسمع الا لااااااااا ؟؟؟ والله ؟؟؟ اشلون؟؟؟؟ متى ؟؟؟؟ اوكى اوكى
انا طاح قلبى من الخرعه
قلت اشفيك قال هذا رفيجى بالدوام يقول تعال عندنا استنفار
انا مت قلت ليش من غزانه والله توقعت غزو
قال لا الشيخ عطاج عمره
قسم بالله يابنات انصدمت ولا عرفت اقول شى الا انا لله وان اليه راجعون

 

[طوق البنفسج]

مشاركة: شلون دريتي بالخبر؟؟؟؟؟؟؟

انا كنت نايمه ماوعيت الا امي اتي تقعدني طوق قومي عاد انا ماحطيت ابلي عادي امي اطفرني جان اقولها يمه تو الناس ماوراي شي جان تقولي قومي الكويت حزينه اليوم جان اطمر شصاير قالتلي بابا جابر توفى انا شنو من قال اشاعات مثل كل مره قالتلي لا شوفي التلفزيون كله اخبار ابطل تلفوني ولا 23 مسج قلت لا الخبر صحيح و بس صار بيتنا هدوء و كل من مجابل التلفزيون و يدعي و يبجي عسى الله يتقبل دعائنا و يرحمه بصالح اعماله

 

[ام مدعج]

مشاركة: شلون دريتي بالخبر؟؟؟؟؟؟؟

انا كنت نايمه توني الساعه 5 الفجر ولا يرن تليفوني الساعه 7 وربع الا رفيجتي قالت لي تاج قومي قومي قلت لها شفيج قالت لي عظم الله اجرج اناا هني اختبص قلبي

قالت لي الشيخ جابر مااات


طبعا ما استوعبت وسكرته منهاااا و رديت اتصلت عليها و عقب رحت الصاله الا اهلي كلهم بالصاله و عند التلفزيون

و بصراحه لي الحين ماني مصدقه يعني مثل ما تقولون مو مستوعبه


بس اطلب من ربي ان يرحمه يااارب

 

[كويتية في لندن]

مشاركة: شلون دريتي بالخبر؟؟؟؟؟؟؟

عسى الله يرحمه ويغفر الله ........................ انا كنت نايمة والساعة عندنا 4 الفجر 7 بتوقيت الكويت ..ياتني مسج من اهلي تقول الامير عطاج طول العمر ..... عاد انا ما صدقت الخبر نقزت من الفراش رحت افتح التلفزيون ادور اخبار مني مناك ما لقيت لان ما عندي قنوات عربية غير ابوظبي وكان بعدها ما ذاعت الخبر وافتح النت وادور قلت يمكن جذب لقيت البي بي سي والجزيرة ذايعين الخبر ...من الصدمة قاعدة طول اليوم بالبيت اطالع قناة ابوظبي اللي ناقلة تلفزيون الكويت ولادرست ولا فتحت كتاب مع العلم اني في فترة امتحانات فاينل

صج والله ان احنا ما فقدنا امير ..فقدنا اب ما يتعوض

اللهم اجعل قبره روضة من رياض الجنة

 

[عنابه]

مشاركة: شلون دريتي بالخبر؟؟؟؟؟؟؟

يومها مانمت الا الساعه 3 وعلى الساعه 7 قمت ورحت التوضا عشان اصلي وان أتوضأ سمعت امي تنادي اخوي وتقول وينه لايروح المدرسه عاد انا رحتلها أسألها ليش مايروح عليه أمتحان جان تقولي الشيخ جابر توفى والله تخرعت واسألها شدراج انه مات جان تقولي خالتج اتصلت هني رحت ركض لتلفزيون عشان أتأكد , الله يرحمه صج فقيده .

 

[جوري الكويت]

مشاركة: شلون دريتي بالخبر؟؟؟؟؟؟؟

انا كنت بذاك اليوم سهرانه بالمنتدى ,,, و مواصله للصبح بروح الدوام ,,, طلعت من الغرفه ولا أشوف اخوي

يقوم لا تروحين عطله ثلاث الأيام ,, بابا جابر توفى ,,, من الصدمه وقفت مكاني مو مستوعبه ,,

رحت التلفزيون بتأكد ,, ولا التلفون يدق .. و خالتي أكدت لي الخبر .. و قعدن أبجي و قعدت كل اللي في

البيت,,, والله العظيم أحس بضيقه و حزن كأنها أيام الغزو الله لا يعيدها ,,


الله يرحمك يالغالي بابا جابر ,, والله من بعدك يتامى