شنو و متى اوكل ولدي/ بنتي ؟ تم دمج جميع استفساراتكم هنا

[إستبرق]

رد: كم وجبه باليوم

حبيبتي انا بنتي الحين اسم الله عليها عمرها 11 شهر ووديتها مراجعتها لما كان عمرها 9 اشهر قال الدكتور لازم كل يوم وجبتين حتى قالت لاتعطينها 3 وجبات عطيها بس وجبتين وطبعا بين الوجبات انا قلت له اعطيها بسكوت وخبز شويه وفواكه يعني من هالاشياء

 

[كلي نظر]

رد: كم وجبه باليوم

طيب الفواكه مو عارفه قصتها شلون اطبخها عشان تتلين؟

 

[إستبرق]

رد: كم وجبه باليوم

والله ام سلوم انا ما اطبخها لها ساعات اعطيها بايدها قطعه تفاحه
وساعات اقص التفاحه بالنص واوكلها بقفشه والموز اعطيها بايدها وتاكل والخوخ والمشمش حتى اقصها بالنص واوكلها بقفشه وحتى بنتي ماتاكل وايد يعني بالغصب تاكل شوي شوي

 

[nouna82]

رد: كم وجبه باليوم

الفواكه تهرسينها مع بعض مثلا تافاح و برتقال و موز و خوخ

 

[cute_butterfly27]

رد: كم وجبه باليوم

1- الصبح يرضع ممية طبعا لانه صغير
2- وجبة الريوق (بيض- صمون جبن -توست ومربى ...الخ الخ الخ على حسب شنو الطفل يتقبل ويحب)
3- الغدا شنو يكون غداكم ياكل معاكم الياهل ( عيش مع -لحم -سمج -دياي-هريس -يريش الخ...)
4-العصر (تفاحة - موزة -بسكوت) وابتعدي عن البطاط والحلويات
5-العشا(بطاط - نودلز -خضروات مفيوحة الخ..)
6- قبل لاينام الطفل ممية مره ثانية
(انا هالنظام متبعته مع اعيالي والحمدالله بعافيتهم )
ملاحظة: الدياي واللحم وحتن العيش اذا ما يقدر يمضغة ينهرس شوي بالشوكة وتاكلة انا بنتي بعمر ولدج_03BA:
نصيحة كل شي وكلية علشان باجر لي كبر ما ياذيج وتلوع جبده خليه اللي جدامه ياكله:ggdw:

 

[*دانة الخليج*]

رد: كم وجبه باليوم

لا تثقيل على الياهل بالوجبات ترى بعدين يكره الحليب

 

[كلي نظر]

رد: كم وجبه باليوم

يسلمووووووووووووووووووووووووووووووووووووووووووووووووووووووووووووووووووووووووووووو استفدت منج وايد



يسلمو للكل

 

[هني وعافيه]

بنتي كملت 4 شهور ماادري شعطيها

بنات بنتي توه اكملت4 شهور دخلت الخامس ماادري شنو اعطيها من اكل ياليت الي تعرف تقولي هل وجبه وحده بس باليوم وهل اخفف الاكل بالحليب وواشلون حدي مااعرف وشنو الاكل الي ينخلط مع الحليب عادي بطاط وحليب تشربه قولولي شسالفه :0bee2e8d89:

 

[!! بطاطه !!]

رد: بنتي كملت 4 شهور ماادري شعطيها

عندج ماي العيش وايد زين (خصوصا اذا في اسهال )
عصير برتقال بس خففيه بالماي
الاكل لغراش بس يكون نوع واحد يعني بلشي بالموز
اخذي 3 حبات تمر نقعيه بماي دافي عقب حطيله بالمامه بس الماي وشربيه وايد مفيد يعني مره كل يوم
ولا تحطين البسكوت مع الحليب (يسوي حساسيه ) ديري بالج ماتطلع الحين بعدين لكبرت يصير فيه
وانشالله البنات يفيدونج

 

[اللولو000]

رد: بنتي كملت 4 شهور ماادري شعطيها

الصراحه انا ما افضل اوكل الياهل بهالعمر احسه بعده صغير عالاكل اهم ما يحتاجه اهوالحليب
اما ولدي الحين صار 6 شهور توني مبلشه اجرب معاه الاكل يمكن قبل اسبوعين شوي شوي
اخلط له سريلاك مع شوي ماي
وبسكوت فارليز وشوي ماي بعد وانوع له بالفواكه المخصص للاطفال اللي بالجمعيات احسه يحب اكثر شي الموز لان البجي شوي طعمهم حامض

 

[slk]

رد: بنتي كملت 4 شهور ماادري شعطيها

لا تبلشين اكل قبل 6 اشهر وهذا كلام الاطبه مو منى ووخرى عن الاكل الجاهز حرام وبلشى شوى شوى

 

[همسة ورد]

رد: بنتي كملت 4 شهور ماادري شعطيها

لاتبلشين الا بعد 6 شهوووور .. الدكتوره قالت لي .. بس حليب وماي تمر وميلوبا ..


لي 6 شهوور .. والبرتقال فووق 8 شهور والسمك والعسل فووق السنه

 

[أسـيـل]

رد: بنتي كملت 4 شهور ماادري شعطيها

احسن شي فوق 6 اشهر

 

[نطوووعه]

رد: بنتي كملت 4 شهور ماادري شعطيها

بالمسبه لي ماعطيت ولدي اكل الا عقب ال 6 شهور لاني قريت بالنت ان اطفل قيل الست شهووور يحتااااج الحليب اكثر من الاكل و بعض الاكل بعمر مبكر يسبب للبيبي حساسيه و الدكتور قالي انه الدراسات الحديثه اثبتت صحه اللي انا سويته والحمدلله

 

[DaN-DaN]

رد: بنتي كملت 4 شهور ماادري شعطيها

بنات بنتي توه اكملت4 شهور دخلت الخامس ماادري شنو اعطيها من اكل ياليت الي تعرف تقولي هل وجبه وحده بس باليوم وهل اخفف الاكل بالحليب وواشلون حدي مااعرف وشنو الاكل الي ينخلط مع الحليب عادي بطاط وحليب تشربه قولولي شسالفه :0bee2e8d89:

شوفي الله يسلمج من خبرتي الي توه ومجربه على بنتي قبل ما اقولج
انا الصراحه ما وكلتها ولا شي الا بالشهر 5 ليش ؟؟ لانه لازم الطفل ياخذ حاجته الكافية من الحليب.
وكل ما اسأل اي دكتور يقولي لازم نوكل الطفل من عمره 7 اشهر بس احنا هني من 4 اشهر نوكل
انا عن نفسي من الخامس قمت اعطيها شوي عصير بس طبيعي ومخفف بماي وبكمية قليله ، عطيتها روب العاري وفي انواع روب داناو على ما اعتقد بس في له انواع
بس مو كلهم مره وحده كل مره شي عشان اشوف يتقبله جسمها والا سمالله عليج يصير معاها امساك او اسهال
والحين لمن بدت بال سابع قمت اعطيها شوي من اكلنا لا بخلاط ولا شي عشان الفايده ما تروح وخليها تبربس حتى لو بس تمصه عشان تعرف تاكل وتتعود على الاكل لي كبرت
واذا تبين روحي الطبيب و سـألي بعد والا حوسي بالانترنت وشوفي

 

[^ أم حمود ^]

رد: بنتي كملت 4 شهور ماادري شعطيها

هلا يالحبيبة

مثل ما قالوا الخوات نطري لي 6 أشهر ..
أنا جذي كنت مستعيلة اني أوكل ولدي ( 5 أشهر ) من كلام الحريم ..
بس كل الدكاترة ألحين يقولون أثبتت الدراسات الحديثة ان الياهل لازم ماياكل شي لي 6 أشهر ..
بس حليب و ماي ..

لا تستعيلين مردها ان شاء الله راح تاكل :ggdw:

 

[Anteeka]

رد: بنتي كملت 4 شهور ماادري شعطيها

نطري 6 اشهر !! انا عطيت ولدي قبلها سببتله حساسيه !! نصيحتي لج و الدكاتره كلهم قالولي الياهل يحتاج الحليب بس اول 6 اشهر وبعدين شوي شوي عطيه الاكل ....و لا تسمعين كلام الكبار .....عاد انا يبطون جبدي لي قالو كا كلنا كلينا ما صار فينا شيء @_@ ؟؟؟

 

[الكشخة]

رد: بنتي كملت 4 شهور ماادري شعطيها

عفاف الرومي تعطيج برنامج غذائي للطفل من عمر 4 شهور
وايد ممتاز برنامجها
طبعا النظام الالماني ينصح انه الطفل يبدي ياكل من 4 شهور
و النظام البريطاني من 6 شهور

انا احس الالماني احدث

 

[!! بطاطه !!]

رد: بنتي كملت 4 شهور ماادري شعطيها

امبببببببببببببه من صجكم موتين عيالم من اليوع لازم ياخذ الاكل من الاربع شهور ورحي الجمعيات راح تلقون مكتوب على الاكل من اربع شهور

 

[ZajiL]

رد: بنتي كملت 4 شهور ماادري شعطيها

امس مراجعة وردلي عند دكتوره ودكتوره استشاري سليمان السعد
وقالي ماتبدين معاه الاكل الا لمه يكمل 6 شهور وصراحه بسمع كلامه