صب القفشه

[دندره]

قوه يابناتي شلونكم عساكم بخير وعافيه؟و عسى تدشون المطبخ ومبيضين ويهي؟ اي هين اللهم ياكافي ويهي صار سنون منكم ومن طناشكم
اليوم بنسوي صب القفشه . يازينها ويازين ريحتها الخنينه . تراها سهله ومافيها شغل زود بس يبيلها تفجون مخوخكم شوي وتركزون معاي
ابوكم العود دندرمه خنت حيلي من ياكلها يقولي تسلم ايدج يا زينة البنات :$ ويروحج السوق يشتريلها ديرم يديد مع علج البان.. يالله طيعوا كلامي عشان ريايلكم يشترونلكم علج بوطقه او ككاو بونجوم
يالله بس مافي هذرنا وايد خلونا نبلش
سلمكم الله وحفظكم من عين كل خاين وحسود نحتاج حق طبختنا قلاص ونص طحين نخي + قفشة كبيره خميره+ هيل وزعفران+ نص قلاص طحين اسمر + قلاص طحين ابيض العادي + 8 بيضات + زبده او دهن عداني
اول شي تخلطين الطحين مع بعض وبعدين تحطين الخميره مع البيض وتضربينهم عدل وشوي شوي تحطين عليهم الطحين وتحوسين الخلطه مع بعض وبعدين تحطين نص باكيت زبده او نفس الكميه دهن عداني طبعا على حسب ذوقكم . وتخلطين شوي شوي وبعدين تحطين الزعفران والهيل وتخلطين الخلطه مع بعض وتخلينها في مكان شوي دافي 5 ساعات او اكثر شوي . وبعدين تحطين مقله وفيها دهن وتخلين النار زينه وبعدين تاخذين قفشه وتحطين فيها العيينه وتقطينها بالدهن وتحاولين تحركين الدهن عليها من الاجناب عشان شكلها يصير مقبول ومدوره تقريبا ومن يصير لونها محومر شيليها وقطيها بالشيره وبعدين حطيها بمشخال وسلامتكم وعليكم بالعافيه

اي قبل لا انسى ترى في ناس يحطون طحين عيش بعد وهم تصير حلوه .. يحطون ربع قلاص او اقل شوي عاد انتوا وهواكم

والحين وقت ريايلكم اللي عيونهم زايقه
اخذي شوي من الشيره ودهنيها على خشمج واذا قالج شنو هذا؟ قوليله مرت فلان رفيجك نصحتني فيها عشان خشمي يصغر وكل مايقول شي قوليله مرت فلان عشان يكرها ويكره ريلها ويقعد عندج بالبيت


مع تحيات امكم العوده
دندره

 

[xxx]

رد : صب القفشه

ههههههه مشكوووووووووورة

تونسين

 

[دندره]

رد : صب القفشه

يعلج دوم مستانسه وبسعاده وفرح وهنى قولي امين

 

[^^دموع الكويت^^]

مشاركة: صب القفشه

تسلم ايدج امنا العودة ويييييييينج فقدناج من زمان !!!!!!!!!

 

[جارة القمر]

مشاركة: صب القفشه

دندره

يا حلوج


والله يطول بعمرج

وتحطين هالوصفات الحلوه



ومشكوووووره

 

[جسور]

مشاركة: صب القفشه

مشكورين ..وتسلمين ..

 

[النور الهادي]

بعمري ماجربتها لا أهي ولا القيمات

يبطوووووووون جبدي ويفشلوني بعد

لكن هذي بحيل الله بجربها بعد كم يوم وأقولج النتايج
علشان بروح أشتري طحين نخي:eh_s(9): :eh_s(16):

وياااااااااااااااارب تضبط معاي هالمره

ويعطيج العافيه,,,,يهبل شرحج:eh_s(22):

 

[حنـــــان]

مشكوووره