صرنا خاتم بيد الحاجه إلى الخدم وقمنا نبرر مشاكلهم بمقولة الخدم شر لابد منا رايج مطلوب

[كندية]

الله يحيييج حبيبتي...اعتقد لوو تساليين اي وحدة تغربة بتقوولج نفس الكلام..واكثرهم هم قااموووا بالبييت مع الدراااسه وشغل او اليهاال والحمدالله بيضوو الويه...مااعتقد البااجي ماايقدروون يسوون نفسهم....بس انتي قلتييهاا الناااس حااطه العذر في مخبااتهااا...وكل مااتكلمتي قالووو عيشتهم غيير عيشتهم ...الاعذاار مااتخلص وهذي الازمه راااح تكثر مااتقل...لو مهما اكثرة مشااكلهم

 

[حيادر]

انا الحين ببيت ابوي
عسااااااااااااااه مايخلى من الخدم لوووووووووووول
لاني كسلانة وحتى غرفتي ماحب ارتبها
اعفسها اي
لكن ارتبها لااااا

بس باجر ببيت ريلي
غصبا علي بصير هبة ريح
الصراحة لاتزوجت ابي اجابل ريلي ومابي ثالث بيننا الا الشيطان نياهاهاهاااااااا
لووووول ترى انا مواصلة وفاصلة لوووووول

لاصج صج باجر لاتزوجت مستحيل اييب خدامة باول سنتين زواج على الاقل

ابي ريلي حقي واخذ راحتي معاه ببيتي بروحنا
ولو يبنا ياهل يمكن اييب خدامة نص دوام بس
مابي وحدة تقعد معانا بالبيت وتجابلنا وترتز لنا بالصالة وتخوزز
وكافي ان مشاكل الخدم زادت والحكومة قوت باسهم علينا بهالقوانين اليديدة
صج انها تحميهم
لكنها قوة باسهم ورفعت خشومهم وصاروا اهما المعازيب
المعازيب نفسهم قاموا يخافون يتصرفون اي تصرف معاهم والسبة ان من حق الخادم او الخادمة ان تقاضيهم ومادري شنو


والله خدامة خالتي تغار منها ومرة شافتها حاطة حمرة ومستشورة شعرها عشتوا ولابسة ضيج
خالتي زفتها قالتلها شنو هذا.. شكو حاطة كل هالمكياج وشنو هاللبس !
قالتلها ليش انتي تحطين وتقعدين جدام سير ( يعني ريل خالتي )
انا بعد بحط.. انتي مو احسن مني @@
اهم شي انها مناشبتها بريلها !!!!!

خالتي ذلفتها بنفس الليلة



اهم شر لابد منه
لان المشاغل كثرت بهالزمن وصار صعب ان الوحدة توفق بين اهتمامها بنفسها وريلها وبين مجابل بيتها وطلباته وطلبات العيال
فلازم خدامة تجابل نص والمرا تجابل النص الثاني
مع ان مشاكل الخدم وايد وسوالفهم تخرع
.
.
.
شر لابد منه !

 

[داريني]

كلااااااااامج كله عدل
بسسسس خلاص صار فينا ادمان عليهم وما نستغنى عنهم عمت عينهم

 

[جاي الضحى]

كندوش: كلامج ممتاز، احنا لمجرد إن عندنا القدره على إحضار خدم إلي من أرخص العماله في السوق قمنا نييبهم و كل يوم نكتشف عماله أرخص من إلي قبلها و احنا مستانسين و نيب بدون تفكير مستقبلي ...ما قط فكرنا يا ترى شنو التاثير المستقبلي علينا...بس لاسف يوم عن يوم الأثار قاعده تطلع واحنا نغمض عنها ونقول شنسوي شر لابد منا!!! وأرد وأقول الله يبارك فيج وفي أهلج يا كندوش .

حيادر: مشكوره عزيزتي انج شركتينا بإسلوب حياتج الحين وشنهي مخطاطتج السمتقبلييه بسالفة الخدم...شفتي شلون لهدف الحصول على خصوصيتج مع رجل المستقبل مستعده تستغنين عن الخدم وشلون بقوة اراده وعزة نفس منتي مستعده تقبلين شر الخدامه من ناحية تطفل عليج انتي وزجج؟ ليش ما نفكر نوسع نطاق هالفكره ونبتعد عن مقولة إن الخدم شر لابد منا؟!...في وجهة نظري اهم شر احنا نبيه مو لا بد منا...الشي إلي لابد منا اهو ماي؛ هواء؛ أكل؛ درجة حراره مناسبه لانسان مسكن ملبس؛ هذي أمثله لاشياء لابد منها!! الخدم نوع من أنواع الرفاهيه إلي حلو تكون موجوده بس إذا وصلت مرحله شر ما ليش نستحمل الشر...لا هالدرجه قمنا إختيارياً نتحمل شرور؟!!!! من جذيه ما أحب هالمقوله مو مقنعه بنسبه لي...أحسها تبرير من النوع الساذج...وحياج الرحمن عسوله والله يرزقج بالريال الزين الصالح. :yaaaaaarb:

حياج الله حبيبتي داريني....:eh_s(7):..مرورج أسعدني جداً....صراحه الواقع إن احنا مختارين الشي ...أبداً مو مغصبين فيه أو عليه...شي مؤسف جداً إن نقول عنا شر ومع ذلك مو مستعدين نغيره أو حتى نخفف منا و نعدل الوضع وعلى الأقل شي نفكر شلون نحل هالقضيه؟!! هل وصلنا إلى مرحلة الأستسلام و اللا حيله إلي قمنا نعرف إن شر وإدمان ونصبر عليه؟ ليش؟ ليش؟ ليش؟!!​

 

[منوووووله]

ماما كلو نفرات ماما سلم ئليكو
بعدين ماما ليس قول كدامه مسكل لا ماما مو كلو كدامه مسكل فيه كدامه جين هبي بيت ماما وبجا كلو
ماما مسكوره على هزا موزوع

:dddds::dddds::dddds::23_asmilies-com:

 

[manorah]

صبحكم الله بالخير
احيي اختي و حبيبتي جاي الضحى على هالموضوع وو صج حطيتي ايدج عالجرح...
و اضم صوتي حق اختي كندية ان بالغربه سواء سياحه او دراسه تخلي كل وحدة فينا تكتشف انها تقدر تسوي كل شي بالبيت بدون الحاجه لاي مساعده من شخص غريب تعطيه فلوس عشان يخلص لها شغلها وشغل البيت.. انا ما انكر حاجتهم في بعض البيوت ضروريه بس برايي لازم ما نتكل عليهم اتكال كلي و وجودهم بالبيت يكون عامل مساعد فقط.. يا جماعه ترى اسرار البيوت كلها بيد هالخدم الله يكافينا شرهم وو صج "يا من شراله من حلاله عله" لا و ما يقدر يستغني عنها !!!!

 

[شموع الفرح]

اذا تبونا نستغني عن الخدم قعدونا بالبيت ومشي معاش حق كل حريم الكويت وشرط لج ولا وحده بتطلب خدامه ولا نصي قاون ان المرا تطلع من الدوام الساعه 12 الظهر ترد بيتها وتجابل عيالها وتطبخ علشان تستغني عن الخدامه ترا المسأله مو سالفة ضروري يكون عندي خدامه بس ظروفج تحتم عليج تييبين خدامه

 

[orangeya]

عدنا والعود أحمدوو

ما شا الله البنات ماقصروا ،،،
واخص بالذكر خواتي كوفي + كنديه
وباجي البنات لاهانو




المهم....

انا اضم صوتي لصوتج يا جويهه وبقوة بعد



الخدم وجودهم يتعب النفسيه +الميزانيه


احنا حاليا من غير خدامه والله لا يعوزنا لهم ,,,
صج فرقاهم عيييييييييد

:nbvppw::nbvppw::nbvppw:





يعني بتدخلين بيتج وحده انتي عارفه شنو ظروفها اللي خلتها تتغرب عن ديرتها واهلها وتخدم بالبيوت!

وشي طبيعي انها بتقارن نفسها فيج...

بتقول اهيا شاحسن مني فيه؟؟؟
-هالكلام عن المعزبه والمقارنة تشمل بنات المعزبة ان كانو كبار-؟

اقل شي تسويه بتقعدلج وتخوزر فيج @@

وتقارن.........................

انتي عندج موبايل ... اهيا لا

انتي عندج اهلج يمج ... اهيا لا

انتي عندج سيارتج متى مابغيتيها تحت امرج ... اهيا لا

انتي عندج فلوس تفسفسينها وتشترين اللي بخاطرج ... اهيا لا

وانتي دارسه ومتعلمه ولا مازلتي تدرسين وتروحين محاضرات...
واهيا لا

وانتي اي.. واهيا لا..

وانتي اي.. واهيا لا..



ترى وايد منهم فيهم امراض نفسيه بدليل كثرة انتحارهم ؟
وتصرفاتهم الـ مو طبيعيه ! :eh_s(12):


بعدين ماتدرين شنهي البيئه اللي يايه منها؟

شنو معتقداتها؟ طريقة تفكيرها؟

ماتخافين على عيالج لما تهدينهم معاها فتره طويله؟

يشوفونها شلون تصلي ويتأثرون بعاداتها....

الام ماتراعي ان اليهال يحبون يقلدون لانهم يدورون قدوة ويكتسبون خبرات يديده عليهم:080402ask_prv:

ولما تشوف عيالها يسوون مثل الخدامه تنزرهم!!!

والله شي عجيب! مو انتي اللي خليتي الخيط والمخيط بيد الخدامه؟

مو انتي بيدج وبرضاج خليتيها تجابلتهم اغلب الوقت؟

طول الضحى الام يا بالدوام يا مكبره المخده...

وبالليل تكون الام معزومه ولا رايحه السوق...

شلون ماتبين عيالج يتاثرون بالخدامه؟ هاااا ؟؟
قوليلي شلووووووووووووون؟؟؟





ولا اللي تسافر مع ريلها وعيالها:ioljnmlk: وتاخذ الخدامه معاها!

لهالدرجه ماتستغنين عنها؟!!!!!!!
انا محد يحرني كثر اللي يسفرون خدمهم معاهم




ترى الرياييل ماينلامون اذا كانت المره متكّله عالخدامه باغلب الاشياء اذا موكلها ..

يعني تنظيف + ترتيب + غسيل + أوتي + طباخ لا وفوق هذا تربيه يهال... شبقى بعد؟

وماتخليها تنام الا تالي الليل وفوق هذا تبيها تقعد من فير الله !


يعني مادري شنو لزمتها راعيه البيت!!!!!!!!!!!!!!!!!!!!!!




انا للاسف اعرف نماين جذيه وحدّي منقهرة منهم بالاحرى متضايقه عليهم... الله يهديهم ان شا الله

انا ما اعمم بس هذا حال الاغلبيه الحين

وماينفع احصر كل الحالات...

لان مهما اتكلم ماراح اخلص ,,, وكل حاله غير عن الثانيه


ولا في بنات الله يحفظهم سنعين وعارفين يديرون بالهم ووقتهم بعد
عسى ربي يبارك لهم ...



وهم في خدم زينين... يعني الظليمه شينه
وهالشي نااااااااادر جدا


نرجع حق محور حديثنا اللي اهوا سلبيات الخدم




يا بنات...


لازم نعوّد روحنا عالحركه وشغل البيت,,,
مثل ما انتو خابرين الحركه بركه

كل شي ممكن ويسيربالتدريج مو مره وحده عشان تقدرين تتقبلين الموضوع هالحجي حق اللي مو متعوده




ولازم اتعودون اللي معاكم بالبيت على الترتيب عالاقل مانقول تنظيف وانا اقصد بكلامي: الصبيان الصغار والشباب وحتى الرياييل!


يعني:

*لما تفسخ ملابسك لاتقطهم عالارض او عالسرير قطهم بسله الغسيل,,,

*لما تقعد بالصاله قبل لا تقوم رد الريموت مكانه ورد كل شي مكانه السالفه بدون مبالغه ماتاخذ دقيقه...
ان طولت طولت 2-3 دقايق!!!!

لاحظاو اني اتكلم عن ترتيب مو تنظيف


*لما تخلص اكل شيل صحنك ووده المطبخ :082502bye_prv:
(إيه هيّن ! بقولج: هذا اللي كان ناقص) لوووول

هذا اذا ما عطاج ذاك الراشدي اللي يطير ويهج لول اقل شي بينزرج


اوكي مو لازم هالشغله بس عالاقل النقطتين اللي قبلها

كل وحده تدرس شخصيه الريال اللي معاها بالبيت سواء كان ابو - اخو - ريل - ولد ... وتقرر مدى تقبله للموضوع.....

بس بشكل عام البنت الذكيه باسلوبها وشطارتها تقدر تقنع الريال



ترى حتى الياهل نفس الشي...
اذا كان بسن يميز فيه خلينا نقول من الروضه نعلمه يحط كل شي مكانه ، وحتى القراطيس يقطهم -وانتو بكرامه بالزباله مو عالارض-




والله هالشغلات البسيطه بتوفر عليج مجهود حتى وان كان مايذكر بس تحسين انج مو لازم 24 ساعه تشيلين وراهم





بالنسبه لشغل البيت:

لا اتجعسين الاغراض وخلي كل شي مرتب وواضح مو تضطرين تعفسين الدنيا عشان تلقين اللي تبينه


وترى الاثاث كل ماكان بسيط مع اضافات ناعمه يطلع احلى و هم اسهل بالتنظيف ..

يعني عصفورين بحجر :sfg:




شي ثاني ,,, على قوله الوالده الله يخليلها :

حلاته تخلصين شغلج اول باول,,, عشان مايتكود الشغل عشان وتتعبين فيه





بالنسبه للتنظيف:

مستحيل او خلينا نقول شبه مستحيل تخلين كللللللللل الشغل مرة وحده بيوم واحد بالاسبوع!

اولا بتاخذين وقت طوييييييييييييييييييييل وبينهد حيلج

فوق هذا يومج بروح عليج !

حتى لو خلصتي مبجر بتكونين متليشه ومنهد حيلج وماااالج خلق




واحنا بنات هالجيل نفشل - الله المستعان- كله ظهري يعورني.. بطني يعورني..
شعري يخترب (اذا كان مستشور) لووووووول...
ماقدر... ماعندي وقت... بعدين... مو لازم .............................





ممكن تقسمين الشغل على ايام الاسبوع

مثلا الايام الفلانيه حق - وانتو بكرامة - الحمامات

والايام الفلانيه غرف النوم وجذيه


بتلقون افكار وايد حلوة بالمنتدى بقسم : ركن التنظيف والترتيب

وهم قسم: تبادل الخبرات والتجارب الحياتية و المنزلية




بالنهايه هذا رايي الشخصي وكل وحده تختار اللي يناسبها


وعذروني اشتطيت ويمكن طلعت شوي عن الموضوع الاساسي

بس اتمنى يكون كلامي خفيف ولطيف وظريف


ودمدمدمدم دمدم دمتم سالمين:eh_s(7):

 

[كندية]

اختي orangeya كفيتي ووفييتي حبيبتي...وكلامج صح 100%:icon30:

 

[جاي الضحى]

manorah: الله بالخير حياتي، كلامج مريح ومعقول ومنطقي جداً...ونبهتينا حق نقطه مهمه إن أسرار البيوت كلها عن الخدم. مرورج ومشاركتج أسعدتني جداً يا عسل. :hjy5jewf:

شموع الحب: حياج الله. عطيتنا إقتراح جميل. السؤال شنو نسبة الحريم إلي راح يستغنون أو يقللون من حاجتهم للخدم حين تطبيق الأقتراح إلي قلتيه؟!...الله يكون في عنج وعون الكل.

orangeya:وعدتينا انج تعلقين على الموضوع وفيتي بوعدج وقلتي كلام في منتهى العمليه...اسمحلي اعبر عن اعجابي في ردج...تبارك الرحمن ردج دليل نضوج عقليتج. الله يسمح دروبكم انتي وإلي أمثالج... الحركه بركه والعمل عباده وخصوصاً العمل لقضاء حاجات الأهل.. الأولى بالمعروف...تسلم إناملج على ما كتبتي..:hjy5jewf:.




كندوش حياج يا عسل.:eh_s(7):..الزين لازم نشجعه.​

 

[nice-girl]

شنهي إستعدادتج شنهي أفكارج للقضاء على مقولة الخدم شر لا بد منا؟
هذا الحديث

اشتكى علي وفاطمة -رضي الله عنهما- إلى النبي صلى الله عليه وسلم ما تواجهه من الطحن والعمل المجهد فسألته خادماً، فقال رسول الله صلى الله عليه وسلم: {ألا أدلكما على ما هو خير لكما من خادم؟ إذا أويتما إلى فراشكما فسبحا الله ثلاثاً وثلاثين، واحمداه ثلاثاً وثلاثين، وكبراه أربعاً وثلاثين؛ فتلك مائة على اللسان وألف في الميزان هاذي صوره من صور الاستغناء عن الخدم
انا ما ايد وجود الخدمه مع انه عندي وحده ه هالوحده
على قوله امي الله يحفظها انتي من حقج اطالين ريلج ابخدامه اذا بيتج مافيه غساله ولا جوله ولامخمه ...
والحين الخدم مو مثل اول من مظاهر التفلسف المبهاة
لاالحين صارت من اساسيات البيت مثل ماعندج ريل عندج خدامه
انا اهم شي يكدر خاطري انه ليهال لي قعدو مع الخدامه التأثير على البيبي اول شي راح ينترك البيبي ساعات معاها وبنات في اطفال وايييييييييييد صارو مرضى نفسين بسبه هالشي لانه كانو يعانون من حرمان عاطفي كبير
ماتشوفون اذا اليهال شاف امه اشلون يركض لها(احنا عبالنا من كثر مو متعلق بالام)ولا اذا بترضعه اشلون يشرب بسرعه بسرعه لين يشرق من كثر لهفته على امه 24 ساعه مقطوط بيد الخدامه

بس حبيبتي ايد وحده ماتصفق لازم بو العيال يساعد
استعداداتي ان شاءالله اول مايدخلون اعيال الحضانه راح امشيها باذن الله لانه اهيه بدال ماتنفع قاعه تضر بتربيتي لعيالي اعيالي تعودو على الاتكال مع انه اعمارهم 4 و2
تخيلي الصدمه اللي جنها طراق بالنسبه لي
ولدي واقف عن المطبخ يم البراده وينادى الخدامه فلانه bring water for me
شي صراحه حز بخاطري
هذا واهوه عمره 4 سنين عيل لي كبر شبيوسي!!!
الله المستعان
شاكرتلج طرحج للموضع الهادف

 

[katko0ota]

العزيزه جاي الضحى( صراحه على هالجو يبيييله قعدت جاي ضحى ) هههه

بصراحه الموضوع الي طارحته مهم لدرجه ما تتصورين خاصه ان هذي الظاهره منتشره في مجتمعاتنا العربيه و الخليجيه بشكل ملحوووووووظ اما بالنسبه في الكويت فالمسأله صارت تفلسف زياده عن الزووووم.

انا من اشد المعارضيييييين لوجود الشغاله في البيت , ليش انه لها آثار وايد اعتبر السلبيه اكثر من الأيجابيه على افراد الأسره.العيب تري في الأوادم هالأيام الي صارو يتعييزووون اييبون لهم قلاص ماي من المطبخ!!!

ما شاء الله الوالده الله يخليها و يخلييي لكم امهاتكم لي 3 عياااال بدون شغاله تطبخ بالليل و احنا لما كنا صغار من الصبح يلفووونا بذاك الكنبل الي ليما الحين موجووود و على بيت يدتي على طووول و موعدنا معاها بعد الدوام مع العلم ان الوالده مدرسه و العام تقاعدة !! بس على اخر العنقوووده يابت شغاله و في نفس الوقت انتقلنا حق بيت اكبر يابت الشغاله.و مثال ثاني وحده من رفيجاتي عدد الشغالات الي ابيتهم اكثر من عددهم هم يا اهل البيت مووو شي يضحك بالله !! كل وحده لها شغالتها !!! الحمدلله و الشكر!

الشغالات انيييبهم و بعدين نقوووول يسووون سحوووره و شر لا بد منه , اييي مو انتو الي قاعدييين تييبون الشر بيدكم لي عند باب بيتكم الله يهداكم.

عن نفسي الشغاله في بيتنا غرفتي ما تدشها الا مره وحده بالأسبوع يووم اجازتي تنظف لا و انا فوووق راسها, الزباله انا اطلعها من داري و هدووم الغسييييل انا احطهم بالسله بره الدار و الكوي لما تخلص منهم تحط السله عند باب الدار و انا الي اردتب. ( على قووولة الوالد حشششه قاعده بفندق ههههه)

المهم ما احب اطول اكثر من جذي وجوود الشغالات بالبيت يأثر على الأبناء بطريقه غير مباشره يمكن محد يحس فيها في نفس الوقت لكن على المدى البعيد النتائج تكووون واضحه في الوقت الي نفقد فيها السيطره.

تقبلي مروري

 

[ghalaty]

انا افتكيت من المشكله واستغنيت عنهم ترا العيب مو بالخدم العيب القوانيين الي خلتهم يتمادون شنوا ةتنحاش تروح تفررفر بالابيوت تشتغل والا تغعد بدعارة الجليب ولمن تمل تروح تسلم نفسها يدقون على الكفيل علشان يقص لها تذكره وعلى الخوط الكويتيه توديها لديرتها ولاحتى يسؤلونها وين كنتي.... وبعدين الصراحه الحريم دلع كل وحده تمشي وراها بالسوق خدامتين وثلاث ليش ما ادري الصراحه دلع ماسخ وفي البيت الحريم ما يبون يشيلون عود كسل نوم ورباده

 

[جاي الضحى]

nice-girl: حياج الله حبيبتي، الحديث إلي ذكرتيه أعده اضافه جميله جداً؛ طرحت التأثرات النفسييه السلبيه على الأطفال إلي الكثير غفل عنها لأسف...وصج يحز بالنفس تشوفين إن اليهال واهم صغار يتشكلون ويتربون على حاجة الخدم...ردج قيم جداً...باراك الله فيج...تسلمين عسوله.

katko0ota: منوره يا كتكوتا، نعم قمنا نشوف مبالغه في الإعتماد على الخدم..مجرد إن المعاش مقدور عليه ; فئه من الناس قامت تييب حق كل شخص بالبيت خادم بدون الأهتمام بالاشياء الشينه إلي تيي من ورى الخدم والتأثير السلبي على الديره من جرايم وأمراض ومزاحمه ومشاكل وإدخال عادات غريبه على مجتمعنا!!!ا الله يبارك فيكم ويخلي الوالده.

يا حيا الله ghalaty: كلامج صريح ولفتي نظرتنا إلى التمادي من قبل الخدم واصحابها...تسلمين عسوله مررج أسعدني.​

 

[(om sulaiman)]

تسلمين جاي الضحى عالموضوع الحلوو .. يبيلي أمر على موضوعج مرة ثانية لأني الحين بروح عندي شغل بيت :eh_s(6):

بس كنت كاتبة رايي بهالموضوع http://www.q8yat.net/showthread.php?t=269549&page=5 وتوني أشوف موضوعج الحلو،، زين والله حسيت موبروحي في أحد معاي

 

[برونزية رشيقة]

الموضووووووووووووووووووووع حده عجيب ... ويعطيج ألف عافية عليه ....

ومستعدين نستغني عن الخدم بسسسس منو يقعد مع أعيالي أذا دوامج يخلص 3 والريل 2 ونص واليهال 1 الظهر ...

وأمه بالسبعين وأمي بالستين ومنطقتنا بعيدة عن بيت أهلي .. وعن بيت أهله ؟؟؟؟؟

هذي نقطة ... وبعدي الريال الكويتي أناني مراح يساعدج على تطبيق هالشي يعني راح تموتين جدامه من الكراااااااااف وهو حتى قرطاس مراح يشيله من الأرض ( أخذوا الكلام من وحدة مجربة هالشي ) !!!

وبعدين الحياة الأجتماعية تغيرت ؟؟؟؟؟.............. 100 أستقبال بالأسبوع 100000 عرررررس بالشهر ..... مليون زيارة وواجبات أجتماعية بالسنة ... منووووووووووو مستعد يصكككككككككك حلجه إذا مار حتي لهم ولا وجبتي ؟؟؟ وقالوا خل تجابل بيتها وأعيالها ؟؟؟؟

لو تروحين لهم وتوجبينهم كلهم بس على يوم ولدج مريض وألا بنتج تسنن ومسخنة ..و لا حمدااا ولا شكووووووووووووورا ...

ويسوونج ما تعرفين السنع ؟ ولا توجبين ؟ ولا تقدرين أحد ؟؟؟؟ وما تستحين على ويهج ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ما يقولون : بارك الله فيها ... مرة صالحة ألزم ما عليها ريلها وبيتها وأعيالها ؟؟؟؟؟؟؟؟؟؟


أصحوووووووووووووووووووا سالفة الأستقبالات والعروس وعشا فلانة وزاورة علانة اهي إلا مودرتنا ... صرنا مظااااااااااااهر بمظاااااااااااااااااااااااهر ...
أعيالكم صاروا (((((((((((( تربية خدم ))))))))))))))))) والسبة توجبين الناس ؟ بالطقاق خل تزعل فلانة وعلانة أهم شي أعيالج ... وبيتج ..... وريلج ....

وبعدين ليش ما يقلصووون ساعات الدوااام ؟ وأحنا مستعدين نجابل بيوتنا ؟؟؟؟؟ منو يجابل أعيالي ؟؟؟؟؟؟؟؟؟؟؟؟

الخدامة ضرووووووووووووووووورة .... نوقف إيد وحدة ونغير القوانين بالوظايف !!!!! عقب ذيك الساع نقولج ((( لا للخدم ))))

ونسكت عن جملتنا الشهيرة ((( شر لابد منه )))) مازالت شر لابد منه ألحين مع هالظروف بالمجتمع الكويتي !!!!

 

[أحلى همبه كويتية]

عايشة بدونهم الله لايردهم صارلي 4 سنوات
ومتحملة وصابرة على اللي شفته


بقولج سالفة خدامة فلبينية يابتها رفيجيت من مكتب مسترجعة

قعدت عند رفيجتي اسبوعين كانت تبيها مؤقت بس من الأول ما بلغت المكتب عشان ما يرضون عالمؤقت
زينة وتشتغل بس بمزاج - اظافرها بدكير ونكير احسن من أظافر المعزبة رفيجتي
كان يومها عندهم عزيمة وأنا حاضرة العزومة وناس بالبيت والخدامة عصبت ما ندري من شنو وماترد لما تناديها واترادد وتصارخ علينا بعد
تقول رفيجتي كنت دايم اشوفها تمر بالصالة لما ريلها موجود رايحة ورادة وخصوصا اذا اهي بغرفتها
شكت فيها وقامت تراقبها

عقب العزيمة والله والناس بعدهم مو رايحين خفنا منها تطق احد بسكين وإلا شي وتبلينا مع الضيوف
اخذتها انا وزوجي رديناها المكتب ويوم ثاني ودينا اغراضها عشان نفتشها
اذكر لقينا شي كانت ماخذته من البيت وخاشته بين اغراضها
سلمناها فلوس اسبوعين

عقب 3 ايام ريل رفيجتي يقول انها رايحتله بالدوام
امبييييييييييييه من وين دلت المكان والمفروض هي بالمكتب اشلون أطلعت ؟؟

لاوحضرتها لابسة حجاب ورايحتله وهو كان عنده اجتماع وقايلة حق الاستقبال هو داق علي ومواعدني يشغلني عنده (بس مو قايلة أنها خدامة ) على أساس موظفة بالدوام عندهم

يقول طلعت والا اهي بويهي قلت لها شتبين
تدرون اشقالت - بابا انا احبك وايد

طبعا طردها

انا بس قالت لي رفيجتي
طيران عالمكتب معاها
سألنا عنها قالوا لها اخت بالكويت وطلبتها تقعد عندها يومين بياخذونها ناس يجربونها

اثاري الخدامة كانت ناوية تتبلى عالريال عشان يتزوجها
وماخذه كرته من مكتبه في البيت ورايحة بتكسي والحجاب تمويه عشان ما تبين خدامة

واااااااااااااااااااي مصيبة
رفيجتي قالت له الحين تتصلون باختها تييبها بشوفها
ونقعد بالمكتب ساعة ننطرها ولما شرفت الحجاب على كتفها
قلت حق المكتب صدقتوا هذا حجابها على كتفها - لما قلت لكم السالفة مساع تقولون مو معقولة تسوي جذية
وأقوم وألخها كف بس حسافة ما حاشها على ويهها - راح على كتفها

تقول حق رفيجيت انتي ما تدرين ريلج يحبني ومواعدني بالزواج وهو عطاني الكرت وقالي تعالي بشغلج عندي
وااااااااااااااااااااااااي

خذوها المكتب طورقوها داخل والحمد لله ما كنا محولين الإقامة وافتكينا منها الله لا يردها

هذوووووووووول الخدم اللي ما تستغنون عنهم

 

[kikoo]

لله الحمد أنا وحده بطلت عيوني بيت يدتي وما عندها خدامه تعلمت منها
والحين صرت ام وما عندي خدامه اذا بيتي وصخ أخليه نهايه الاسبوع اتفر له عدل :>
وريلي ما ايقصر ايعاوني
وامي وخواتي بعد اجابلون بنتي لي كنت بالدوام
ولله الحمد عايشه مندونهم

 

[همس الورود]

انا من اشد المعارضيييييين لوجود الشغاله في البيت
بس منوووووووووووووووووو يسمع

 

[الصابرة المحتسبة]

خوش موضوع يا جاي الضحى وعساج على القوة
- الحمدلله الوالدة يعل ربي يشفيها ويعافيها معودتنا من الصغر على ان نساعد في تنظيف البيت وماكان عندنا خدامة يعني كانت أمور مرتبة ومقسمة الشغل علينا ولما كبرنا دشت الخدامة بيتنا بس ماغيرت من طبايعنا يعني احنا نخدم روحنا واذا كانت مشغوله ما ناديها ومانحسسها ان احنا معتمدين عليها 100%100 علشان جذي تلاقينها تخدم وتحاول تبين انها شاطرة وسنعة ونخليها عندنا ولما تزوجت ولله الحمد قعدت حوالي أربع سنين وانا من غير خدامة ولما كان وجودها ضروري كان حدها التنظيف عيالي لأ لأ لأ ماراح تكون أحرص مني عليهم وكانت تسأل : ليش ماتخليني أشيلهم أو أغسلهم أو انهم ينامون عندي مثل باجي ربعي الخدم؟ وعيالي كبروا وخليهم يمسكون المخمة وينظفون مو عيب ولا هو حرام بيتهم وخليهم يشيلون الزبالة كرمكم الله وما يتأففون ليش ؟ لأن ابوهم وانا عودناهم من الصغر ولما نطلع ماتطلع معانا لأن وجودها وعدمه نفس الشي والناس من حولي يستغربون ويسألون وانتوا تعرفون أهلنا حق بلاغة الشف مافي مثلهم ليش ما يبتيها ؟ علالأقل تساعدج ومن هالحجي لكن حلو انج تطلعين وياعيالج ولج خصوصياتج , وغرفة النوم ماله داعي أصلا تدخلها الصراحة لأنها خط أحمر . وسامحوني طولت عليكم.