طالبة كاتبة كلام وصخ.... معلمات أبي رايكم بهالمشكلة لاني (محتارة)

[kuwaitya-frawla]

الله يعينج اختي منال


ماقول الا الله يوفقج يارب ويفتحها بويهج

 

[حبي حبيبي]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

لازم تتدخل الاخصائيه النفسيه

عشان تعرف ليش سوت جذي البنت

شنو الاسباب !!

واذا مانفع تستدعي الاخصائيه والدة البنت وتسألها عن طبيعة البنت وشنو نظامها بالبيت
يمكن اهلها لهم ايد بهالشي اللي خلا البنت تكتب هالكلام وتعطيج اياه
شي نفسي اكيد
البنت صغيره محتاجه احد يوعيها
مايصير تكبر على هالاخلاق

 

[om deaj]

كنت أوطه مغمضه

خنت حيلي احنا صج كنا غشم
والله يستر من هالجيل ويستر على عيالنا

بس انا من راي الاخت الي قالت

استدعاااااااااء الام (الام وليس الاب )


بحضور الاخصائية النفسية

هذا الاجراء المتبع والصحيح

 

[الدلوعه2008]

لي عوده ان شاء الله

 

[كويتية عيمية]

ما شاء الله عليج اهنيج والله امبين شخصيتج وايد حلوة ومدرسة ناجحه

والله يعينج :/

 

[myaar]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

مسا الخير بنات

اسفه على التأخر بالرد، بس يالله فضيت وهذا كاني أكتب لكم

اليوم بالنسبة لي يوم " الأعصاب العالمي" امبي امبي لو تدرون شصار

على أساس أبي أأدب البنت لكن اليوم 3 ادبتهم + بجيتهم..

خلني أقولكم عن سالفة البنت الي كتبت عنها هالموضوع:


(عمشة) اليوم كنت عليهم الحصة الثانية، دخلت وانا ما أضحك ولا ضحكة وداشة معصبة وهذي أبدا مو عوايدي حتى البنات بالصف مستغربين. طبعا في جم بنت تشيطن عاد مرة وحدة عطيتهم خزة + اتكلم بصوت عالي وكل وحدة سكتت ولا تكلمت طول الحصة. جان اقول حق عمشة. بعد الحصة أبيج تيين القسم بكلمج.


بعد نهاية الحصة طلعت معاي وكل شوي تقولي: ابلة شنو فيه؟ أبله فيه شي.؟ وانا حاقرتها وما أكلمها كلش لحد ما وصلنا قسم العربي جان اقولها نطريني برا. الحين اطلعلج.


دخلت القسم وطلعت دفتر التعبير مالها + الورقة وقلتها: شوفي عمشة نفس الخط ونفس طريقة كتابة حرف الواو

ألحين تعترفين وتقولين انج انتي الي سويتي هالكلام ولا أوديج عند الاخصائية.


طبعا قعدت تحلف مليون حلف انها مو الي مسويتها، جان اقولها عمشة ترا انا مو هندية علشان تقصين علي. الحين مافي أحد الا انا وانتي اعترفي وقولي احسن. جان تبجي وتقول ابلة شلون انا ارضى اسب امي واكتب عنها كلام وصخ والله مو انا الي كاتبة


بالصدفة مرت بنت عمها الي بصف تاسع جان تشوفنا وتفولنا ابلة ديري بالج على عمشة وزيديها درجات الخبلة. جان عمشة تضحك بنص بجيتها وتسوي حركة بلسانها وبس راحت بنت عمتها ردت تبجي امبي يعني قاعدة تمثل جدامي لا أكثر!!!



قلتلها: للأسف انا انصدمت فيج وبأخلاقج وانا عرفت ليش سويتي كل هالقصة وكتبتي كلام وصخ عن نفسج كل هذا علشان تبيني ازيدج درجات >>> طبعا البنت ما تكلمت ولا كلمة



انا الصراحة ما وصلت المسألة عند الاخصائية لان الطاقم الاداري عندنا بالمدرسة الله بالخير. يعني اذا دزيتها ولا ما دزيتها واحد. طبعا قلت حق عمشة بكل جدية وعصبية، الي كتبتي هذا أسلوب شوارع وبنات الشارع يكتبون هالكلام مو طالبة داخل مدرسة ياية تتعلم، شنو خليتي حق الصبيان؟


قلتلها: بس اشم ريحة خبر انج مكررة هالسالفة والله وبالله لا اسويلج استدعاء ولي امرج وافصلج واخليج تندمين على اليوم الي درستج فيه عربي. يله جدامي اشوف روحي صفج. وراحت


اليوم عاد كان عندي حصة ثانية بنفس الصف وكانت السابعة فلما رحت كانت تشيل الوصخ الي على الارض ومطيعة وما تتكلم ولا كلمة وتسوي نفسها مو فاهمة شغلة انا كاتبتها وتقول ابلة جذي يعني، ابلة شوفي انا كتبت جذي صح؟


بتحاول تنسيني السالفة وانا جاريتها. وتناسيت الموضوع. المشكلة بنات ان هالطالبة بالصف عندي هادية وما تسوي مشاكل والي سوته بإنها كتبت ورقة فيها سب بس علشان ازيدها درجات لان مستواها ضعيف


سبت نفسها على ورقة وحطت اسم زميلة لها بالصف كل هذا علشان أنا أرأف فيها !!!!!


-------------------------------


الحين راح اقولكم سالفة ( موضي) هذي هم بسادس بس صف ثاني وصارت اليوم معاها مشكلة لكن من نوع ثاني

اليوم وزعت عليها درجات الاختبار القصير. وللعلم ابلات. اني عطيت كل بنت اكثر من ما تستحق من درجات

لأني أبي أشجعهم وتجاوزت عن اخطاء بسيطة ومشيت الصف وهالبنت ماخذة 8.5 من 10 مع ان درجتها الاصلية

7.5 من 10 المهم وزعت الاوراق وقلت كل بنت تشوف درجتها واذا عندها اي تعقيب تقولي واناقشها. الحمدلله

ولا بنت سألتني الا اهي يتني وقالت ابلة انا حاطة على الاختيار هذا صح وانتي حاطته غلط. مسكت ورقتها

ولا اثاري الاخت حاطة دائرة على الاجابة الصحيحة >> تبي تستهبل علي عبالها انا ياهل تمشي علي هالأمور

جان اقول تعالي موضي اوقفي هني والصف كله يسكت الحين. جان اقولها شنو سويتي انتي؟

جان تقول: ابلة شسويت؟

قلتلها (بعصبية ): موضي الحين تتكلمين ولا ادزج على الناظرة

جان تقول: ابلة مادري شسويت؟

قلتلها: ليش مصححة الخطأ؟

بعدين مسكت الورقة ووريتها للطالبات وقلتلهم اياني وياكم تسوون هالحركة البايخة لأن تعديل الخطأ أو اللعب بالدرجات فيه فصل نهائي وما راح تقدرون تدرسون. هذا جزاتي الي زايدة كل وحدة فيكم؟ جذي تجازوني يعني؟


المهم جان اتذكر بنفس اللحظة ان " موضي " من فترة قالتلي ان امها ماتت، وقالتلي هالكلام في أحد الايام

لما كنت أصلح الواجب ومالقيتها حالة الواجب. جان اقولها بوقتها. الله يرحمها لكني استغربت من داخلي

ان امها ميتة وهي مداومة. ولما صار لقاء اولياء الامور شفت امها ياية تسأل عن بنتها امبي انا لا تشوفون ويهي

فتحت حلجي 60 كيلو متر من الصدمة ان بنت صغيرة قصت علي. بس شسويت بلعتها وقلت طاف. ولما سوت موقف

هذا اليوم عاد طلعت خياسها كلها. جان تبجي وقلتلها روحي قعدي مكانج. واهي رايحة تقعد مكانها قلتلها اكو وحدة

تفاول على امها وتقول امي ماتت بس علشان تتنحش من حل الواجب؟ هذا بدال ما تقولين الله يطول بعمرها.

غسلت شراعها عدل علشان مرة ثانية ما تفاول على امها. لما خلصت الحصة طلعت ولا تيييني وتقولي ابلة يعني ما راح تقولين حق أهلي؟ >> جان اعطيها نظرة احتقار وامشي.

--------------------

الموقف الثالث صار مع طالبة بصف انا ما أدرسه. صف موضي ما غيره ( وقبل لا تبدا سالفة موضي ) كان توه

طاق الجرس فطبيعي بعض البنات يوقفون برا عند الصف ينطرون الابلة. دخلت صفي ولا اشوف بنت

واسمها ( خزنة ) قالت حق وحدة من الطالبات:


تــف عليج وعلى ويهج، ورقعت باب الصف وراحت على بأسرع ما يمكنها لدرجة اني ما قدرت امسكها

وكل هذا جدامي!!!!


المهم بعد نهاية الحصة عرفت من الطالبات انها بصف 6/2

رحت ومسكتها من ايدها ووديتها على طول عند الوكيلة امبي لو تشوفون شلون ماسكتها هههههههههههه احس كل المدرسات انصدموا ان ابلة منال الهادية فجأة تغيرت ههههه . دشيت على الوكيلة وقلتلها السالفة

قالت هذي عليها شكوى متهاوشة مع طالبة والحين مع شكوتج صاروا اثنين وراح تسوي لها استدعاء ولي امر. وتدرون شنو الي انصدمت منه؟


ان ابوها " ناظر مدرسة " وااااي مت قهر. ناظر مدرسة وجذي مربي بنته. وقالتلي الوكيلة بس اذا حضر ولي امرها

لازم تكلمينه. قلتها اي عادي. والبنت طبعا طول الوقت تنفي وتقول ما تفلت


----------------


على طبعا كنت نفسية داخل صفوفي.

الي يقرا سوالفي يقول ابلة منال القلب اكيد في مدرسة صبيان

بس الواقع اني بمدرسة بنات. يعني لو انتقل حق مدرسة صبيان الصراحة

ما راح أنصدم بأي شي لأن الي قاعدة أشوفه من البنات ألعن والعن مليون مرة من الي يسوونه الصبيان

وحدة تكتب كلام وصخ والثانية تفاول على أمها والثالثة تدخل اشكره الصف وتتفل وترقع الباب جدام الأبلة.


وقلت اليوم حق صفوفي ماكو هدايا وتعاملي معاكم راح يصير خايس من يوم ورايح. ابلة منال ال تحبونها والي

متساهلة معاكم ودعوها. بنات صج صج الصف صار هدوء. لأن انا من النوع الي اتغشمر وياهم واعطيهم

هدايا كل اثنين والحين حرمتهم من ضحكتي.

عاد في طالبات شاطرات طالعين ويقولون ابلة لاتزعلين ابلة عفية ضحكي. واييبون لي بنات ويقولون ابلة ضحكي قاعدة

تسويلج حركة تضحكج وانا بو لباس. بس صج على حرق اعصاب الي صارلي اليوم بس عطيت حصتي كلها

وكانت حصتي قمة قمة في الهدوء


^^^^^^^


الله يستر على بنات هالجيل جد الله يستر

مادري الجيل الي بعده شنو بيطلع اذا هالجيل جذي......



وهذا كان ملخص حق يومي بالمدرسة طبعا بس رجعت البيت

بجيت بجي جنه احد ميت عندي والسبب ان طبعي هادية وما أحب اعصب فسكتت طول الوقت ورجعت

البيت خريتها مثل الحنفية......... بس الحين الحمدلله احسن

وناطرة باجر يصير علشان اشوف البنات الــ 3 شصار وياهم وهل تسنعوا ولا لأ

لاني ناطرة الشارة عليهم :yaaaaaarb:


اشكر كل معلمة وكل وحدة ردت وساعدتني ماقصرتوا فديتكم


:bluesmclr:

ايي والله شصــاير بالدنيا !!

الله يعينـــج والله ..

أنا بقولج شغله .. لازم ماتـصيرين طيبـه أكثـر من اللازم

صيري حازمه .. بدون عصبيه ولا طيبه

بـ النص يعني

لما يستاهلون أحد يضحك لهم ضحكي ..

 

[سارحة بالغنم]

اللة يستر علينا وعلى بنياتنا وبنات المسلمين يارب واللة بمدرستنا أفضع وأبشع أخاف أقول وتنصدمون اللة يرحم زمانا قبل ويخلف على الأمهات صج تربية ثم تربية والدين قبل كل شي.

 

[دريم ويب]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

الله يلوووم اللي يلوووووووومك

الحين صف سااااادس يخرعوون مااتقولين عمرهم 11 الا بناات ثاانوي وعليهم سوالف وانا والله ابله ماا اعرفهااا

نفس الوووووضع مع طالبه عندي لكن كاانت رااسمه رسمه تخدش الحيااء

كاانت رااسمتهاا بحصه مااكنت عليهم
المهم رااسمه مره ورجاال وكل شــــــــــــــــــي هي شفهمهاا هالسوالف


كل مادخلت الصف اقووول يااربي منو هالبنت اللي تفكيرها وصصصصخ <<< مااكنت اعرفهاا بس كل بنت صرت اشك فيهاا وكرهت الفصل بكبره

 

[ابله رشا]

من غير تفكير تحول لجهة الاختصاص اللي تتمثل بالمديره و تنقل لمدرسة اخرى هذي مافيها فصل مو شي هين ولا هوشه عاديه او تعدي على معلمة

 

[*أم*خالد*]

البنت اللي سوت هالفعايل بدون سبب .. بدون لا احد يدوس لها على طرف

كفو تنير من كشتها عند الناظره واستدعاء ولي امر بعد !!

 

[فطووومة]

الله يعينج حبيبتي على هالبنات

والله يهدي بنات المسلمين حطي اعصابج بثلاجة خخخخخ

 

[ماريي]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

السلام عليكم
الله يعينج اخت منال الجيل دلوقتى صعب
لي عتاب بسيط ارجوا ان يتسع صدرك لى
اتمنى ماتكونيش كتبتي الاسماء الحقيقية للبنات
ولي راي احب ان اضيفه
اولا بالنسبة للبنت اللي كاتبة كلام وسخ دى محتاجة تعديل سلوك وطبعا مفروض دي مهمة الاخصائية النفسية بمساعدة الاخصائية الاجتماعية ولكن للاسف اللي بيحصل ان الموضوع بينتشر بسرعة كبيرة بين المدرسات والطالبات وبتبدأ المشكلة تتفاقم خصوصا مع وجود الغمز واللمز واجتناب معاملة البنت وغيره والموضوع للاسف لايحل بل تزيد المشكلة سؤ
ولو تم ابلاغ الاهل ودا بعتبره ضروري الا ان الاهل بينفوا الامر وبيكدبوا المدرسة والامر ايضا بيتفاقم
وننسى الطالبة هانعتبر الامر مرض ومحتاج علاج وطبعا قبل العلاج لازم استشارة
حبيبتى البنت دى بتعانى من مشكلة واعتقد انك بالنسبة ليها طوق نجاه وبتحاول تطلب منك انت بالذات المساعدة بس على قد تفكيرها
حاولي تقربي منها وتكلمى معاها واعطيها الامان احتمال والله يحميها تكون متعرضة لسلوك سئ من احد -او بتطالع انترنت - او بيتردد الكلام ده على مسامعها كشئ عادى كل دي احتمالات بس اللى لازم ماتتجهلهيش انها اخترتك انت فياريت تكونى عونا ليها وتكسبي فيها ثواب وحاولي تصادقيها و تحلي مشكلتها وطبعا لو الامر كبير لازم ولي الامر يعرف بس لازم الكتمان ثم الكتمان عشان ماتصيرش وصمة على البنت وخصوصا نحن في مجتمع لايرحم وللكلام بقية

 

[ماريي]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

السلام عليكم
بالنسبة للطالبة وما ادعته علي امها من الموت اعتقد ان البنت لاتلاقي اهتمام من ناحية الام او تتكاسل عن كتابة واجباتها وهذا يدل على قصور واضح من الاسرة تجاه البنت ودي ايضا مجتاجة تعديل سلوكها والله يعينك - زمانك هاتقولي ماري عايزانى اصلح الكون - صدقينى ابنات واضح انهم بيحبوكي جدا عشان كده ياريت تستغلي حبهم ليكى فيى توجيههم وتعديل سلوكياتهم وخصوصا ان السن ده بيبدأ يتمرد على الاهل وبيدور على صديق خارج محيط اسرته عشان يحس بذاته وباهميته طبعا اكيد انت احسن صديقة وخوفك عليهم كأم هايكون له تأثير رائع و لن ينسو فضلك ابدا
البنت حاولي تشجعيها على كتابة الواجبات واية بادرة منها كويسة اشيدى بيها امام البنات ورددى على مسامعها انها اصبحت مميزة عندها بسبب اهتمامها بمذاكرتها وحلول الواجبات كلميها عن الام ومسئوليتها وانها بتحب الجميع بس ساعات بتكون مضغوطة وانها لازم تعبر لامها عن حبها بين الوقت والتانى حتى لو برسمه حلوة والله يعينك

 

[ماريي]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

السلام عليكم
واخيرا مشكلة البنت الثالثة
وهذه اساءة ادب من البنت ودا طبعا لان الاهل اعطوها الضوء الاخضر على التطاول واخذ حقها بيدها وعدم احترام المدرس
اقول ايه فعلا كل ولي امر بيقول لابنه دلوقتى لو جيتلى مضروب هاضربك لو حد سبك سبه لو مدرس اخطأ ولي الامر بيسب المدرس امام ابنه طيب الاحترام هايتعلموه ازاى زمان كانوا يقولولنا كاد المعلم ان يكون رسولا ولكن الحين ولي الامر بيعين ابنه على عدم احترام المدرس او الزملاء الله يعين الجميع
ايضا تحتاج تعديل سلوك بس الاهم هي البنت الاولى واحتوائها
وشكرا لسعة صدرك لي

 

[بحر الذكريات]

الله يعينج

 

[منال القلب]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

تسلمون بنات
على النصايح وعلى كل كلمة كتبتوها وكل دعوة دعيتوها لي
وان شالله راح أسوي كل الي قلتولي عليه. الحمدلله الي مساعدني
ان الطالبات على الرغم من اني اشد عليهم فهم يحبوني

فمثلا موضي اليوم انا كنت حاقرتها واكلمها بنفسية فلما خلصت الحصة قالت ابلة نقصيني بالامتحان بس كلميني عدل. أما عمشة صايرة تخاف من نظراتي ودايما تفتح دفترها وتقول ابلة انا حليت الواجب. أما البنت الثالثة لحد الحين ما وصلني خبر ان استدعوا ابوها، يمكن ابوها ماله ويه اييي المدرسة من عقب ماعرف سوالف بنتها


اكرر شكري لكم بنات

وبالنسبة للأخت الي محتارة تدرس متوسط او ابتدائي

شوفي انتي شنو تميلين حقه بس انا عندي تدريس المتوسط احسن لان كبار شوي اما الابتدائي تأسيس وشلاع قلب.


مشكورين بنات

احبكم

والله يسهل عليكم ويفرج عنكم مثل ما عاونتوني وطيبتوا خاطري

الله يفتحها بويهكم ويسخر لكم ازواجكم أو يرزقكم بأزواج صالحين ان شالله امييييييين

 

[قمورهـ]

رد : طالبة كاتبة كلام وصخ.... معلمات أبي رايكم بهالمشكلة لاني (محتارة)

واي الله يعين قلبج

سادس جذي يسوون!!!!!!!

بس ماشاء الله عليج مبين عليج تعطين من قلبج

بتكلم كـ ولية امر .... لو واحد من عيالي سوى هالتصرف لا سمح الله

ابي احد يبلغني ويقولي هالشي عشان اعرف مواطن الخلل من وين

دايما لما اروح اجتماع اولياء الامور .. اول سؤال شلون اسلوب عيالي وياكم

شلون اسلوبهم معاكم

اسم الله عليهم عيالي متفوقين بس بنفس الوقت وايد حركيين

فلما الابله تقولي ان ولدج كله يحووس >_< بس اسم اله عليه خلوق وما يغلط على احد (الحمدلله)

تلقيني على طووول اروح حق ولدي

اقوله الابله زعلانه منك وتقول انك ما تقعد عاجل .. صج يضيق خلقه لان وايد يهمه الابله رايها فيه
.
.
.
الخلاصه ... برايي ان بعض المواقف لازم يكون في استدعاء ولي امر

عشان الاهل ينتبهون لهالشغلات ويتداركونها قبل لا تكبر

وقواج الله

هذا اللي انا كنت بقوله

بس الحمدالله قريت رد امواج كـ ولية امر يساند كلامي

لازم امهات البنات يدرون ضروري

لان اللي سووه موشويه خصوصا اللي كاتبه كلام وصخ

ان عدت السالفه راح تتوقع انه كل سوالفه راح تعدي وتطمئن وتكرر هالفعل

لازم الامهات يدرون عشان يصلحون الخلل

ماتدرين مثل ماصدقتيها بالاول يمكن تستخدم نفس الاسلوب مع امها وامها وقاعد تسبب مشاكل لاخواتها او بنات خالتها ..الخ انتي موتقولين حطت اسم زميلتها يعني تبلت عليها والله اعلم بالبيت اهيا قاعده تتبلى على منو

فـ قولي الحمدالله انه الورقه طاحت عندج يمكن الله عز وجل له حكمه تشوفينها وتحلين المشكله مع ولي امرها لان البنت لو سكتي عن الموضوع راح تتمادى بالجذب

اهيا وموضي اللي فاولت على امها

باين هالبنتين خلاص خربانين ويبيله تدخل من امهاتهم عشان يضبطونهم بكل مرة ينحرفون فيها

فنصيحه لله بلغي اهاليهم دام انهم توهم صغار قبل لايكبرون وتكبر عادة الجذب معاهم ومحد يقدر يسيطر عليهم