طبخات (غدا) للموظفات

[ماما فله]

طبخات (غدا) للموظفات...شاركينا

الله يعطيكم العافيه
أنا بصراحه دشيت علشان الاقي موضوع خاص للموظفات اللي يرجعون البيت وما يمديهم يسوون الغدا فقلت شرايكم نتعاون وكل وحده تحط لنا طبخه سريعه تصلح للغدا
وربع تعتونوا ما ذلوا:friends:
وياليت كل البنات الموظفات تحط لنا جدول حق الغدا اللي تسويه كل يوم :gr4uu:
واذا في وحده من النوع(مثلي) اللي تطبخ الغدا بالليل وتالي تسخنه الصبح هم ياليت تفيدنا بتجربتها
والله يعطيكم ألف عافيه

يالله منو الحلوه اللي تبي تبدي أول ؟؟؟
:eh_s(9)::eh_s(9)::eh_s(9)::eh_s(9)::eh_s(9):

 

[randomy]

تقدرين تسوين مجبوس دياي تطبخين الدياي بالليل وتحطينه بالثلاجه

تالي ثاني يوم تغسلين العيش وتطبخينه بماي الدياي وتقلين الديايه

جذي يطلع فريش واسرع ونفس الشي مع اللحم والكبسة

او تسوين اطباق فرن مثل المسقعه او الباشاميل من الليل جاهز بالثلاجة وثاني يوم تدخلينه الفرن

 

[dandooosh]

انشالله البنات يفيدونج
تقدرين تسوين دجاج أول لحم متبل بالخلطة قبل بيوم وبس ترجعين من الدوام تطلعينه من الثلاجة وع الفرن

 

[ليان]

أنا الحلوه​

شوفي يا قلبي​

قبل لا تطلعين من بيتج متوجهه للدوام​

طلعي الدجاجه وحطيها بالجدر بدون ماي​

لما ترجعين بس قطعيها ونظفيها وركبيها ماتاخذ منج نص ساعه​

بهالنص ساعه قطعي سلطه زهبي الشربه والماي وحطيهم بالصينيه​

سوى فلفل معبوج​

نقعي العيش ربع ساعه​

من تخلص الدجاجه حطي العيش واحسبي ربع ساعه يكون اكلج جاهز​

حطي الصفره والسلطه والمقبلات والشربه والماي​

واغرفي عيشج وادعيلي​

هذا طبعا المجبوس​

اذا تبين حمسات وتغلين الدجاج وحشو اجليه للويك اند احسن تتفننين على راحتج​

 

[روج وردي]

تدرون انا على وجه خطبه وزواج
ومتوهقه بالسالفه ذي
امي تقول لوبيتج قريب مني كل يوم بطرش لي
بس للاسف بين بيت امي وبيتي تقريبا ساعه الا ربع لان جنب بيت اهله
جان زين اهله يصيرون ذربين وكل يوم يطرشون لنا غداء
المصيبه هو يطلع قبلي وهو دوامه جنب بيتنا
بس انا دومي بالمدينه يعني تقريبا اكثر من نص ساعه عشان اوصل بدون زحمه

 

[مقمش لولو]

انتى في البدايه سوي جدول اسبوعى بالغدا خلي يومين بالاسبوع مثلا للطباخ الجايد مثل المجابيس وغيرها وباجىالايام
الاطباق السريعه اللى منها المعكرونات والبشاميل حتى المقليات والهمبرغرات والناغتس والبطاطس ولاتنسين السلطات

بهالطريقه يصير اسبوعج حافل ومشكل وسهل عليج موفقه

 

[randomy]

أنا الحلوه​

شوفي يا قلبي​

قبل لا تطلعين من بيتج متوجهه للدوام​

طلعي الدجاجه وحطيها بالجدر بدون ماي​

لما ترجعين بس قطعيها ونظفيها وركبيها ماتاخذ منج نص ساعه​

بهالنص ساعه قطعي سلطه زهبي الشربه والماي وحطيهم بالصينيه​

سوى فلفل معبوج​

نقعي العيش ربع ساعه​

من تخلص الدجاجه حطي العيش واحسبي ربع ساعه يكون اكلج جاهز​

حطي الصفره والسلطه والمقبلات والشربه والماي​

واغرفي عيشج وادعيلي​

هذا طبعا المجبوس​

اذا تبين حمسات وتغلين الدجاج وحشو اجليه للويك اند احسن تتفننين على راحتج​

حبيبتي في موظفات ( مدرسات ) يردون هلكانين طريقتج وااايد صعبه علي

وخاصه اني ارد مييييته من الجووووع لوووول

 

[Q8Buying]

آنا أفضل طريقة أطباق الفرن!..
أو أطبخ قبلها بيوم،.. واحط بالثلاجة..
واكمل الطبخة ليمن أرجع من الدوام ..

مثلاً .. أتبل دجاج، سواء أقطع دجاجة وأسلقها مع بهارات، وأحط عليها بقسماط متبلته وممكن احط معاه جبن مبشور ..
وأنقع العيش، أو أنقع بطاطا مقطعة مع ملح .............. واليوم الثاني بعد الدوام بس أقلي.. وعلى ما أقلي أسوي سلطة طازجة..

وأطباق الفرن عددوها خواتي... من مثل: معكرونية بالباشميل .. مسقعة .. صينية الدجاج بالسبانخ والبطاطا ..

وبعد دجاج بالفرن،.. تقصين الدجاجة قبلها بيوم،.. وتتبلينها بخلطة من الخلطات اللي يكتبونها، أو تبتكرين خلطة (مثلي!) وطلعت لذيذة ... وتخلينها تتنقع بالثلاجة ليلة كاملة،.. كل ما تتبلت وتنقعت راح تحسين فيها طعم أحلى!.. واليوم الثاني تحطينها بالفرن،.. بصراحة مادري شكثر تاخذ وقت،.. يمكن ساعة .. عاد إنتي قطعيها صغار.. عشان تستوي بسرعة ..
وتقدم مع عيش أبيض منخول.. وما أسهله! يمكن ياخذ منج فقط 10 دقايق!.......... نقعي العيش وحطيه بالثلاجه .. عشان تصير حباته كبار ... بالنسبة لي: أنقعه بماء ساخن من غير لا أخلطه.. أو أحوسه ... عشان ما تتكسر حباته ..

آنا أعتقد بأن حسب اليوم.. لو كان متعب بالنسبة لج سوي شغلة خفيفة .. لو كنتي مرتاحة سوي شيء صعب .. !
وخلي الأكلات اللي يبيلها شغل ومبيت بالمطبخ .. وتقديمات طازجة ..... في أيام الويك إند !


وآنا مو موظفة!.. لكن جديدة في هذه الحياة.. وفكرت لو بصير موظفة شلون ممكن أدبر عمري
وأتوقع بطبق هالطريقة .......

 

[Q8Buying]

عندي إضافة بعد..

إذا زوجج يرد قبلج
وصيه يحط الطبق اللي جهزتيه مسبقاً .. بالفرن مثلا!
التعاون وايد مفيد!..

وإن شاء الله ما تخترب أكلتج هههه

 

[جارة القمر]

تفضلي طلبك::

http://www.q8yat.com/t723309.html



http://www.q8yat.com/t361147.html



http://www.q8yat.com/t781862.html


http://www.q8yat.com/t56716.html




http://www.q8yat.com/t834235.html

 

[ام خالد.]

البنات قامو بالواجب واكتر

 

[dandooosh]

عندي إضافة بعد..

إذا زوجج يرد قبلج
وصيه يحط الطبق اللي جهزتيه مسبقاً .. بالفرن مثلا!
التعاون وايد مفيد!..

وإن شاء الله ما تخترب أكلتج هههه

عجبتني الفكرة :krkrkr:

 

[Q8Buying]

إيييييييييييي عاد بمجرد إن حط الأكلة بالفرن
بتعجبه! .. لان حاط إيده فيها .. ! لول

 

[جمال الجمال]

الله يعينكم جينو من المطاعم سوي اليل عشاء انا مشتركه جديدة من السعوديه

 

[مس كرز]

افضل شي اطبخي قبل بالليل ولما ترجعين من الدوام بس ردي العيش وسوي سلطه

 

[krkooora]

الله يعينكم