انا جربت اغلب المواقع بالنت ....
الحين بكتب لج اللي اعرفه باختصار
واذا طلعت بطاقتج و بغيتي تطلبين من النت وتوهقتني .... سئليني باي وقت حبيبتي .....
اول شي
اللي تحتاجينه
بطاقة النت ( فيزا ) وهي اامن طريقة للدفع ..... لانج تحطين فيها المبلغ اللي تبينه
مثلا تبين تشترين نفنوف ب 30 دينار ....
تحطين بالبطاقة .... 30 دينار بس ... علشان تضمنين ان محد يبوق من بطاقتج ... ممكن تحطين دينار او دينارين زيادة علشان فرق العملات لما البنك يبي يخصم من البطاقة ....
والتحويل للبطاقة يتم عن طريق النت ... تدخلين اكاونتج ( شوفي الموقع الالكتروني حق بنكج )
هالخطوة انتي سويتيها تقريبا
الخطوة الثانية ...
تحتاجين شركة شحن ....
انا تعاملت مع ارامكس ....
تقدرين تدقين عليهم .... و يوصل لج المندوب ...
تدفعين يمكن 10 دنانير مرة وحدة بس علشان تفتحين لج صندوق ب ( امريكا و بريطانيا و الصين )
طبعا قيمة الشحن تعتمد عالوزن ....
وبخصوص ان ارامكس ما يجمعون كل القطع مع بعض .....
هالنقطة راح اتطرق لها بعد شوي
الحين
بالنسبة حق المواقع ....
عندج اكثر المواقع ثقة
amazon بلا منازع طبعا
وفي امازون امريكي وفي امازون بريطاني ....
مرات البضاعة تكون مختلفة ....
اذا بتشترين من موقع امازون ....
عندج خيارين ....
اما تحطين عنوانج مال الكويت ( مو كل الشغلات ممكن توصل دايركت للكويت ... انتي حطي عنوانج .. اذا وافق عليه يعني راح يشحنون للكويت )
اذا القطعه اللي طلبتيها ما تتوصل للكويت دايركت ... حطي عنوانج مال ارامكس ( هم راح يعطونج ياه عن طريق موقعهم )
واذا وصل طلبج لحد عندج ... تدفعين حق ارامكس فلوس الشحن
لما تطلبين من امازون ... تأكدي انج تختارين .... ان يتم شحن الطلب كـ مجموعه وحدة .... مو علب متفرقة ....
ثاني موقع اتعامل معاه ....
ebay
وهو عباره عن سوق فيه وااااااايد ناس يبيعون من مختلف انحاء العالم ....
وفي واحد بريطاني وواحد امريكي ....
لما تطلبين من ebay
تحتاجين تسوين لج حساب بموقع paypal
لانج ماتقدرين تدفعين حق موقع ebay الا عن طريق الـ Paypal
الـ PayPal
أامن طريقة للدفع للمواقع اللي ماتثقين فيها .....
اذا لقيتي موقع يتعامل مع الـ PayPal
فاعرفي انه ثقه .... ودفعي عن طريق الـ PayPal
راح اشرح لج عنه بعد شوي
اذا بغيتي تطلبين من ebay
شوفي الـ seller
جم تقييمه ؟
لازم يكون 98% وفوق علشان تشترين منه وتعرفين ان بضاعته مثل الصورة ومثل الوصف
راح تلقين منتجات صينية وكورية .... وممكن توصل دايركت للكويت ( من غير فلوس للشحن )
واحتمال يدقون عليج بريد كيفان علشان تستلمين طلبج ...
او مرات .... هم يوصلونه لج لحد البيت ... ببلاش
في حالة انج بتطلبين اشياء وااااايد من ebay
حاولي تطلبين من نفس ال seller
وتقولين له يخلي طلبج بمجموعه وحدة ....
بالنسبة حق المواقع الصينية ....
شوفي موقع
Aliexpress.com - Online Shopping for Electronics, Fashion, Home & Garden, Toys & Sports, Automobiles from China.
طلبت منه اكثر من مرة
حطي عنوانج مال الكويت دايركت .... عادي ...
الحين نرجع بخصوص الـ PayPal
هو عباره عن بنك .... تسوين فيه اكاونت وتربطينه مع بطاقة النت اللي عندج ....
فرضا شريتي من موقع ... نفنوف ....
ودفعتي عن طريق الـ PayPal
راح تحطين اكاونتج مال الـ PayPal بس ....
ماراح تحطين رقم كرتج او عنوانج ....
لانهم موجودين باكاونتج مال الـ PayPal
والموقع راح يخصم من فيزتج ....
شوفي
العملية مو معقدة ....
بس لازم تطبيق عملي
