طريقك الى الخمسين الاوائل و التفوق والقبول للكليه اللي تبيها ...

[لذة شقاوه]

سلام عليكم ورحمة الله وبركاته ..
اتمنى كلكم تكونون بخير ^^..

بصراحه عجبني هالموضوع وحيل قوي حبيت احطه عشان تستفيدون منه وعسى الله يوفقها الي حطته
وأنا نقلت الموضوع بالتفصيل عشان تستفيدون منه واي شي تبونه انا حاضره

ما راح اطول عليكم اتوقع الكل يعرفني وللي ما يعرفني ..
باختصار انا دارك لجند طالبه من العشره الاوائل على الكويت خريجة 2011 تم قبولي بالطب ولله الحمد وان شاء الله راح اكمل المشوار لما اوصل لهدفي طب الطوارئ ^^..

تقسيمه الموضوع راح تكون

1) نصائح بدونها ما راح توصل ^^.
2) طريقة دراستي ( ويقسم الى عاشر - 11 -12 )
3)التغلب على المشاكل من الامتحانات وحتى القدرات
4) كلمة اخيره + خاتمه

---------------------------------------

بسم الله الرحمن الرحيم ابدي


1) نصائح بدونها ما راح توصل

هالنصائح او الخطوات اللي كنت اتبعها عشان امسح شي اسمه توتر ورهبه من مخي وامسح كلمة مستحيل


1) لازم تؤمن انك تقدر توصل لكل شي ..

يعني لو انه درجتك 60 انك تقدر توصل للي تبي .. اي نعم تقدر توصل لل90 .. تقدر توصل لل100 لو تبي .. بس تدري شنو اللي بيوصلك شي واحد اسمه الثقه بالنفس والاقدام .. لو انت بتقول عن نفسك فاشل وما تقدر .. تبي الناس تقول هالانسان فيه خير .؟ طبعا مستحييل .. اذا انت واثق من نفسك و مؤمن بقدراتك واتبعت خطوات معينه انت حطيتها لنفسك صدقني بتوصل .. ولا تقول مستحيل انت مو ناقص لا ايد ولا ريل مو ناقص عقل عشان تخلي اللي يابوا بال90 احسن منك .. ليش اهم مخهم اكبر من مخك .. ولا يدرسون من كتاب غير كتابك .. لا اخوي .. لا تقول انا ادرس واتعب وما اييب واهم ما يدرسون وييبون درجات .؟ بجذي اهم احسن مني .. الله خلقنا كلنا بنفس العقل وبنفس المستوى ماكو احد احسن من احد بس في اللي يدرس دراسه على الطاير وفي اللي يدرس بضمير في اللي يستحضر النيه انه الدراسه لله و في اللي بس يبي يفتك من الكتاب .. عشان جي خلك واثق و داايما قول انت قدها وقدود ومحد يقدر عليك ومحد احسن منك وان شاء الله باللي راح اكتبه راح يتحسن مستواك باذن الله ^^.. ودايما حط ببالك الاميه ولا ترضى بالقليل .. اقولك ياها ازعل على الدرجه لانها راح ترفعك وازعل على النص لانه راح يرفعك ..لاتقول شدعوه لما تتخرج راح تحس بقيمه الدرجه لما ما تقبلك الكليه اللي تبيها .. لا تقول الاميه مستحيل ان حطيت الاميه بتييب بالتسعينات وان حيطت 90 بتييب بالثمانينات وجي .. واتوقع الكل يبي التسعينات ^^


2) اختار غرفه معينه و قلم معين ..

اي نعم وفق لدراسات علميه اكتشفوا انه اذا انت التزمت بنوع واحد من الاقلام او بشكل واحد من الغرف تركز المعلومه اكثر .. يعني لما مثلا احنا نختم القران برمضان ليش كله الاهل يقولون لنا التزموا بمصحف واحد عشان ما تتخربطون .. هاذي اهي .. لا تقول شكو .. شوف انا وحده من ثامن بدا يرتفع مستواي قبلها كنت مقوعه على قولتهم

.. ليش اني اخترت مكان دراستي اللي ارتاح فيه و التزمت بنوع واحد من الاقلام احل فيه الامتحان .. جربها وما راح تخسر شي انا وحده كنت احب اقلام pilot (f اهو نادر شوي لوول كله تلقون M بس انا كنت مصره على الf .. لاني تعودت اكتب فيه واستانس عليه ^^.. وكنت ازينه و لحد اللحين اكتب بقلمي مال ثامن بس اغير الحبر لي خلص .. اما الغرفه فلازم على نمط معين ايام الامتحانات يمكن تضحكون بس انا وحده احسن اتخربط لما اقعد ادرس بالغرفه و الدار متغير شكلها يمكن لاني صعب اني اتعود على شي يديد بس عشاني متعوده على نمط معين اقدر اركز فيه ^^.. يعني باختصار اختارلك غرفه هاديه معزوله عن الكل مافيها صوت تلفزيون ولا يهال يناططون و يفضل انها تكون مهويه يعني فيها درايش واايد عشان يدخل النور وتركز والوانها هاديه حاول تكون بهالدرجات من الالوان وما تكون فاقعه ^^.. وسمعت مره انه الاصفر يساعد على التركيز .. و اذا كنت من النوع المتوتر دايما اخذ البنفسجي مو شرط تكون لون الغرفه انت البس بنفسجي غلف كتابك بنفسجي .. جي ..

3) رتب الغرفه و هيأها ..

اذا قربت الامتحانات روح الغرفه اللي تدرس فيها انت رتبها لزق على الطوف عبارات تشجيعيه تونسك او حط الالوان اللي تحبه اكييد بتقول هاذي شتخربط بس جربها و صدقني نفسيتك قبل الامتحان وحتى اثناء الدراسه بتصير احسن ^^. حط دايما سمايل فيسس و انا شخصيا كنت حاطه صوره house ( مسلسل طبي هه يطلع على ام بي سي فور ) هههه اهو قدوتي بالطب لوووول

4) عاهد نفسك ..


من اليوم افتح الوورد و اكتب عهد .. يعني سوه جنه صجي
انا فلان الفلنتاني اعاهد نفسي اني راح ارفع من مستواها و اييب الدرجه الفلانيه والخ عاد انتوا وشطارتكم ^^.. وحط اخر شي صورة الشي اللي تطمح له ووقع وحطه بالغرفه اللي تدرس فيها ^.^ واذا تستحي حطه بكتابك اللي تخاف منه

..

5) العصير السحري ..


ايام الامتحانات الاحظ واايد طلبه يلجأوون للوجبات السريعه ووحده منهم اختي .. متى ما توترت على طول وجبات سريعه ايام الامتحانات .. هذا اكبر غلط .. اخواني وخواتي الدهون تشغل المعده و تضغط على المخ او شي جي وهاذي دراسه قاريتها مره بس ما ادري وين وبس احصلها احطها لكم .. المهم عشان جي حاولوا تخففون من الوجبات السريعه والدهون ايام الامتحانات و اصلا اهي راح تزيد ضغط الدم بالتالي يزيد التوتر وانتوا مو ناقصين توتر عشان جي اخذوا العصير السحري .. انا بالنسبه لي احب البرتقال عشان جي كنت واايد اشرب منه ايام الامتحانات ممكن تحطون ليمون - برتقال -تفاح - اناناس - فراوله اللي يحبه قلبكم بس ما يكون فيه واايد شكر ولا وايد كريمه و هالخرابيط .. حاولوا يكون اكلكم صحي على الاقل ايام الامتحانات فحط صحنك على الغدا و حط اللي تبيه بس مو تترسه مره ثانيه لا خلها مره وحده عشان ما تنغث بعدها .. واياكم واللبن يوم الامتحانات هذا خراب بيووت لوووول ييب النوم .. عيش ولبن و نومه هنيه لوول حاولوا تبتعدون عنه ^^.. وكثروا من الخضره و هالسوالف الصحيه .. وو الكاكاو و ما ادراك ما الكاكاو عند معشر البنات خاصه .. حبايب قلبي صج انه الكاكاو يصحصح و بالفعل يرفع نسبه الذكاء بس يزيد الوزن بعد .. و بعد في شي غلط فاهمه الكل مو الكاكاو المصنع بالمصانع واللي فيه بلاوي زرقه اهو الكاكاو اللي يرفع نسبة الذكاء لااااااا .. الكاكاو المر الاسود اهو اللي يرفع نسبه الذكاء لانه ما فيه منكهات و خرابيط و زايدين عليه شكر وهالسوالف ^^..

6) انسب وقت ..


دايما اختار انسب وقت للدراسه والحفظ و هاذا غلط الكثيير من الناس ينام طول اليوم و يقوم المغرب او العصر ويواصل لي الصبح هذا اكبر غلط .. وفقا لدراسه علميه يقولك بعد صلاة العشا سبحان الله الجسم يبدي يخرج فضلاته و ينقي الجسم بالتالي عقلك الباطن بيكون مشغول بتنقيه جسمك .. وهاذي العمليه تنتهي قبل صلاة الفير .. وهاذي المعلومه من الدكتور شعبان رمضان (لوول اهو اسمه جي كان ياينا بالمدرسه ^^) .. عشان جي انسب وقت للدراسه والحفط اهو الصبح بعد صلاة الفير ..وانا جربت هالشي القصايد كنت احفظها بخمس دقايق ( ماشالله ) الصبح بس العصر كنت واايد اطول عليها .. وايام الامتحانات نفس الشي .. يعني باختصار اقعد الصبح صل الفير .. جهز غرفة الدراسه .. ترييق وعين من الله خير وابدي ادرس ..^^ راح تشوف نفسك حتى بالفاينل ما تصير الساعه 4 العصر الا انت خاالص وصاك كل شي ^^.. وبجذي تنام بكيير وتصحا بكيير ^^.. وتركز بالامتحان

7) المراجعه ..


اهم جزء من الدراسه اهي المراجعه .. شخصيا كنت اقعد من الساعه 1 الصبح لي الساعه 2 ونص اراجع او ساعات تكون اقل .. مجرد انك تراجع على السريع المعلومات المهمه وبعدين تنام وبالفعل هالطريقه تخلي مخك يخزن بالعقل الباطن بسرعه ..( فرقوا انا قلت دراسه ما ينفع الفير بس مراجعه اوكي لانه اساسا مخزنه المعلومات ^^) ..

8) رضا الوالدين ..



والله العظيم انه دعوتهم بالدنيا .. قبل لا تدرس جرب تبوس راسهم يوم وتقولهم ادعولي حتى لو متهاوش معاهم جرب وشوف .. وشوف شلون ربك بيفتح ابواب الدنيا بويهك ^^..

9) لا تبخل ..


وهالشي خاصه للفائقين .. يا حبايب قلبي مثل ما انتوا تحتاجون المعلومه ساعات .. غيركم يحتاجها .. ولا تخافون لو انكم شطار ما راح يصكون عليكم .. دايما يكون تفكير الشطار ما اساعد فلانه عشان ما تصير احسن مني .. شكو .؟
يبا دامها صارت احسن منج اكيد درست اكثر منج يعني عليها بالعافيه .. درسي وصكي عليها .. هاذي المنافسه الشريفه .. مو اضرها عشان ما تصير احسن مني .. اسمحيلي انتي عايشه بقوقعه الحسد وعدم الثقه بالنفس وعمرج ما راح تصيرين احسن منها حتى لو درجاتج احسن .. يا بشر المتفوق مو متفوق بدرجات بس ترا المتفوق متفوق بالاخلاق .. بعد 10 سنين محد راح يتذكر جم كانت درجتك .. تكفون منو يتذكر درجة منافسه ولا درجته يوم كان بثانيه ابتدائي .؟ بس تدري شنو بيتذكرون بيتذكرون اخلاقك بيقولون اي والله فلان الله يذكره بالخير كان يساعد .. ياخي كافي الاجر من ربك .. صدقني اللي الله كاتبه بيصير .. وشحلاة الابتسامه لما تشوفها على انسان بينه و بين السقوط شعره و حل سؤال رفعه انت كنت معلمه ياه وربي ونااااااسه ما تضاهيها وناسه .. ولا انسان ساقط 3 سنين ورا بعض و مسكته من اول السنه لوجه الله وساعدته و دق عليك قالك انا نجحت والله ونااسه وانا جربتها ...

10 ) لا تتنرفز .. ولا ترافج المتنرفزين ..


شوف المتوتر و المتنرفز و اللي يخرع البشر هذا انسان الكل يكرهه و ينفر منه .. وانت بعد لازم تنفر منه تدري ليش لانه راح ينقلك هالداء .. ان شفت واحد متوتر وخر عنه .. لا تقرب منه يمكن ما يكلمك بس ترا الاشارات السلبيه بتعابير ويهه تنتقل بسرعه .. عشان جي خلك كوووول دايما .. ودايما حط ببالك انه الامتحان مجرد ورقه كل 99% من اسئلتها بالكتاب واللي حاطها مو نبي ( استغفر الله ) انسان عادي نفسنا مطلع الاسئله من الكتاب واكييد مثل ما كثير يقدرون يحلون هالاسئله انا بعد اقدر احلها .. انت دايما تذكر هالشي وصدقني راح تكون كووول ^^..

يرجى عدم الردالموضوع لم ينتهي

 

[لذة شقاوه]

) لا تراجع قبل الامتحان بساعه

.. ديرباااااااااااااااالكم وقاعده احذر .. ديرباااااالكم تفتحون الكتاب قبل الامتحان بساعه او نص ساعه .. ترا راح تطير معلوماتك وراح تتوتر .. و دامك راجعت الصبح ودرست عدل ماله داعي تراجع قبلها بساعه خلك كوول ولا تفتح الكتاب وارتااح نفسيا .. الا اذا ساعات سؤال نسيت اجابته تقدر تطل فيه بس انك تفتح وتراجع من اول نصيحه من اختك لا تسويها والله تطير المعلومات ...

12) انت مميز ..

شوفوا كل انسان يختلف عن انسان ومولازم تكون طريقة دراستي تنفع للكل .. يعني كل انسان له طريقة الخاصه .. اعطيكم مثال انا وحده ما اعرف ادرس من ملخصات دايما من الكتاب وما ادرس وانا امشي ادرس وانا قاعده عكس اختي مع انها شاطره مثلي وبنفس مستواي تقريبا بس اهي تدرس من الملخصات وما تعرف تدرس واهي قاعده لازم تفر .. عشان جي لا تقول فلان الاول يدرس من المذكره الفلانيه يعني بس ان درست منها خلاص انا بصير الاول لا يا اخوي .. خل هالمذكره نفس نموذج تحله عقب ما تدرس .. خلك واثق من طريقه دراستك ومالك شغل بغيرك ^^..

13) دايما استغل كل فرصه ..

باختصار اي شي يطيح بايدك من نماذج اسئله .بنوك . مذكرات استغلها وحاول تدرس منها ^^.. وان انصحكم صراحه بمذكرتين ( جمعية المعلمين والله مايطلع من افكارها الفيزيا وموضوعي الرياضيات كوبي منها .. و مذكرة التبسيط بس مذكرة التبسيط يحطونها بس بامتحانات الفاينل بجمعية العمريه ^^) .. اعييد واكرر هالمذكرات خلوها مراجعه لكم مو دراسه اساسيه وانا دايما انصح انه المواد العلميه تندرس من الكتاب ما ينفع ماده علميه تدرسها من ملخص لانه يي من بين الاسطر اما الادبيه على راحتك ^^.. تبي ملخص تبي كتاب انت وكيفك ^^


14) اسال بكل شي ..

وانت تدرس حطلك ورقه بيضه اكتب اي سؤال يخطر ببالك حتى لو سخيف وتافه اسأل .. ترا ما يخربط الا الاسئله التافهه .. بالصح والخطأ اسألوا دايما المدرسين و اي شي بالحصه مو فاهمه اسأل لا تستحي .. ما في شي عيب تستحي منه انت قاعد تطلب العلم وهالشي تاخذ عليه اجر .. ^^ دايما اسال ولا تستحي ^^..

15) اخر نصيحه نظم وقتك


يعني انا قبل لا ابدي دراسه كنت احط ورقه اقسمها اربع اقسام ( يعني احط خطين مثل الزائد ) القسم الاول اللي تحت على اليسار كنت اكتب فيه عبارات تشجيعيه يعني مثلا ( الطب تنطرج - انتي قدها وقدود -الخ ) ا\ القسم اللي فوق على اليسار كنت ارسم الامتحان رسم بسيط يعني احط مثل مربعات واكتب انه الامتحان 5 صفحات اول صفحه مصطلح و صح او خطا والصفحه الثانيه جي ..ألخ \ القسم اللي فوق على اليسار احط فيه نفس اوامر لي يعني ( ادرس الكتاب والدفتر- ادرس النماذج - احل المذكرات -الخ من الاوامر ^^عشان ما انسى شي )
القسم اللي تحت على اليمين .. احط فيه تقسيمه الكتاب يعني مثلا عندي كتاب الكيميا كان كميه كبيره بس انا خلصته بسرعه لاني قسمته فمثلا خذيت من اول الكتاب لي الالدهيدات والكيتونات هذا قسم من ص 1 الى ص30 مثلا .. وبعدين القسم الثاني من الكربوكسيليه لي الامينات منص31-60 مثلا .. والقسم الثالث التحليل النوعي من ص70 لي ص 90 مثلا وبعدين التحليل الكمي من ص90 لي ص 130 .. مثلا .. وكل قسم اخذ عليه ساعتين و نص وبين كل قسمين اخذ رااحه ربع ساعه ^^.. و بين كل قسم وقسم اخذ راحه 5 دقايق ^^.. بجذي اخلص بسرعه .. وانظم وقتي .. ( اتمنى يكون فهمتوني ^^) ,,

يرجى عدم الردالموضوع لم ينتهي

 

[لذة شقاوه]

طريقة دراستي

..

اول شي بقولكم معلومه حلوه ..
( كمنهج عاشر اصعب من 11 و 11 اصعب من 12
اما كامتحانات عاشر اسهل من 11 و11 اسهل من 12 )
يعني كل ما زادت مرحلتك قلت صعوبة المننهج وزادت صعوبة الامتحانات هذا من وجهة نظري ونظر ابلاتي ^^.. قصدي من صعوبة الامتحانات يعني امتحانات دقيقه .. يعني ادرس من الكتاااب بالنسبه لعلمي اما ادبي اتمنى احد من الاخوان ينفعنا خاصه الاخ خريج واخير اهو شاطر بهالسوالف ^^...

دراستي و سبب اختياري لعلمي ..

انا وحده تفكيري علمي بحت .. حفظ صفر اما فهم افهم عدل ^.^ غير انه طموحي طب فلو يقطوني بالنار بعديها عشان اوصل لطموحي وهذا اللي ابيه منكم ^^..

دراستي كانت اول باول يعني بليل وانا ارتب اغراضي كنت اشوف جدولي يعني مثلا باجر علي فيزيا - احياء - دستور - عربي - انجليزي - رياضيا -اختيار
كنت قبل لا احط الفيزيا بالجنطه اراجع الدرس اللي طاف واحفظ كل شي فيه ونفس الشي لكل المواد حتى العربي كنت احفظ الفكر وكل شي اول باول والانجليزي بعد + اذا في مواد يطالبون اني احضر كنت احضر لهم ^^ كنت اروح اجهز اغراضي الساعه 7ونص واخلصهم 9 تقريبا وانام مع العلم اني ما انام العصر ونصيحه من اخت كنسلوا نومة العصر هاذي والله ترا فيها تخسروون وقت كبير ادري انها مفيده بس تكون مفيدة اذا ما تتعدا 45 دقيقه بعدها يبدي الجسم يخمل حتى لما تقعدون تحسون مو عارفين شتسوون + دراسه الامتحان سبق وذكرتها ^^..


بالنسبه لاصعب واسهل المواد ( انا ما احب كلمة اصعب اقدر اقول ادق المواد لانه كل شي تقدرون تتغلبون عليه ان شاء الله ^^)

عاشر :
الاجتماعيات ( هالماده اذا ما تراجع اول باول انت ضاااااااااااايع وانا وحده ضعت اول كورس وبجيت لما شبعت وبلعت العافيه بس الكورس الثاني تغلبت على هالمشكله باني كنت احفظ كل درس بيومه اما الكورس الاول كان كله فوق بعض بيوم واحد )
العربي ( ما اقولكم العربي صعب نو بس امتحاناتهم مغثه وتغلبت على هالمشكله باني كنت انزل مراجعات من هالمنتدى وملخصات للدروس وكنت اطلع اسئله على كل سطر والنحو كنت اقوي نفسي بنماذج امتحانات احلها ^^ )
الرياضيات ( انا ما حسيته صعب بس بما انه الكل يجمع انه صعب خلوني اقولكم شلون تغلبت عليه لوول طبعا كان الكورس الاول مأساة لانه فوق ال6 ابلات درسوني بس الحمدلله يبت فل مارك ماشالله ^^.. باني كنت احل كل شي وبعد مثل ما قتلكم الموضوعي ما طلع من مذكرة جمعية المعلمين و انا شاطره بالمقالي وكنت احل كل اسئله الكتاب كلها حتى اللي الابله ما حلتها ^^ )


حادي عشر :
طبعا الفيزيا : ( انا بالنسبه لي ما كان بالصعوبه اللي مهولين فيها . .يمكن لانه ابلتي واايد زينه وتشرح كل شي بس همن اسئله الامتحان كلها من مذكرة جمعية المعلمين لوول حتى امتحان الكورس الثاني كوووووبي واقسم بالله كوبي من مذكرة جمعية المعلمين ..+ المراجعه اول باول واسأل الابله على طول باي شي ما فهمته ^^)
الكيميا : مم بالنسبه للكيميا مو صعب كثر ما اهو كميه .. الكيميا كان كميه كبيره بس بالمراجعه اول باول و تقسيم الوقت يوم الامتحان خلصت بوقت مبجر ^^...
الاحياء الكورس الاول : انا وحده عاااشقه احياء فما واجهت فيه صعوبه لووول الا الكورس الاول لانه عن النبات والابله كانت ما تشرح عدل وتغلبت عليه بالمراجعه بعد ( شفتوا المراجعه شتسوي والله مو القصد اكرر الاجابه بس هذا بالفعل الجواب

)
الرياضيات : الكورس الاول غثيث الكورس الثاني سهل .. الرياضيات لانه دمجوا رياضيات واحصاء فكان كميه مهوله بالنسبه لنا بس لاني كنت اقعد الفير وابدي دراستي بعد الصلاة على طول كنت اخلص على الساعه 6 مع بريكات بين كل جزء ^^..

الثاني عشر :

والله والله والله ان 12 اسهل مرحله راح تمر عليكم بحياتكم كلها و كل نص راح تتحسفون عليه من كثر سخافة المناهج .. صج مناهج سخييفه .. لوول اما الرياضيات فالله يعطيها العافيه ابلتنا كانت دايما تعطينا نماذج امتحانات خارجيه وجي ونحلها و بعد كتاب جمعيه المعلمين و مراجعه و تنظيم الوقت الحمدلله واذا تبون نماذج الامتحانات اللي تعطينا ياهم الابله اهم موجودين بموقع وزارة التربيه اليديد ^^.. وايد حلوين ما انصحكم تطوفونهم لان الرياضيات خاصه الموضوعي ترا واااايد يتكرر يعني امتحانا الفتره الثالثه والاولى كان كوبي منهم ^^..

-----------------
بالنسبه لامتحان القدرات ^^..


طبعا الكل يسمع انه دمار وخرااب والخ .. طبعا بدون امتحان القدرات ماكو لا طب ولا هندسه ولا اداريه عشان جي القدرات مهم ومو بس نجاح لازم نسبه فيه بعد وتلقون موضوع عن امتحان القدرات كنت مسويته مثبت ^^ يشرح كل شي عن القدرات اذا ما فهمتوا قولولي ما عندي مانع اشرح .. بالنسبه لي ولله الحمد امتحاناتي القدرات كلهم فوق ال90 الحمدلله بالتالي ودي اقولكم عن طريقة دراستي


الانجليزي :
لا تفر ولا تحتار غير مذكرة الدورة لا تختار (( لوول جنها صارت اغنيه ..
المهم طبعا الفوكابلري والغرامر ما تطلع من المذكره وعلى ضمانتي الشخصيه انا وحده امتحنت 3 امتحانات وانا ادرس من مذكرة الدوره مالت الجامعه وكل مره احل شويه منها لما اخر امتحان حليت كل المذكره والحمدلله يبت فوق التسعين و صج 99% من الفوكابلري من المذكره اما الواحد بالاميه ما ادري يمكن على حظكم يغيرون ^^.. و القرامر ما يطلع بعد اما الفقرات فطبعا تعتمد على فهمكم^^ويبت بالانجليري 91 (ماشالله )

الرياضيات :
هذا همن من دورات الجامعه مو بس المذكرات يعني الانجليزي لو تتسلف المذكره وتحلها بدون لا تروح الدوره عادي تيب درجه حلوه بس الرياضيات مذكره بدون دوره ما تنفع .. انا حبيت شرح بدر الشمري و وفاء امين و يمدحون سامر السحار واايد بس انا كنت عند وفاء واخر كلاس عند بدر بالفعل يعطونكم طرق مختصره تحلون فيها الرياضيات بسرعه ^^ وبعد ما انكر دور ابلتي بالمدرسه كنت اي سؤال ما افهمه اروحلها وتشرحلي ياه سواء من المذكره او من امتحانات موقع القدرات ..^^ وخذيت 95 ( ماشالله )

الكيميا :
ممم هذا ما ادري شلون يبت الدرجه لوول بس كنت اساسا يايبه مدرسه تحل معاي المذكره مالت القدرات و الدورات وبالفعل ما طلع من افكارها و 98% من الامتحان من مذكرات الدورات ويبت فيه 96 ( ماشالله )

يعني باختصار لا تروح اي مكان غير دورات الجامعه او مذكرات الدورات راح تغنيك بالنسبه للانجليزي والكيميا انت محتاج المذكره بس بالنسبه للاقويا بالكيميا والانجليزي اما الرياضيات ما تنفع مذكره بدون دوره صراحه ^^..



-----------------------------------------


يتبع يرجى عدم الرد
​

 

[لذة شقاوه]

اخر كلمة : ​

يا اخواني وخواتي والله انتوا تقدرون والله تقدرون بس جددوا العزيمه بنفسكم و اقنعوا نفسكم انكم تقدرون اقعد بغرفه بروحك و غمض عيونك و كرر بنفسك ان اقدر اقدر ليما تحسها تتكرر لا اراديا .. محد احسن من احد واكرر طريقة دراستي ممكن ما تنفع للكل عشان جي انت حط جدول للامتحانات و اتخذه نفس عهد لك تلتزم فيه لو شنو يصير وغير جي الجدول خله يبدي من اخر امتحان لي اول امتحان مثلا لو جدول امتحاناتك
فيز
كيميا
احيا
عربي
انجليزي
رياضيات ​

انت جدول دراستك يصير
رياضيات
انجليزي
عربي
احياء
كيميا
فيزيا
جي عشان كل ما صار الامتحان اقرب صارت المراجعه اقرب له ان اجي احط جدولي وعلمت اختي نفس الشي واهي قاعده تمشي اللحين على نفس الشي ووايد مرتاحه عليه ^^.. ​

خلك قدها و نافس بشرف مو بحقد وحسد ترا كلنا هدفنا وااحد نعمر هالديره ونرفع راسها وراس اهلنا ^^.. مالك شغل باللي يحبطك و يقولك صعب ماكو شي صعب على ربك ان شاء الله وانت ان توكلت عليه وما تواكلت اكييد بيجزيك على قد عملك ^^.. لا تعترض على شي يمكن هالشي خيره بالنسبه لك يعني شوفوا انا وحده مره اعترضت على شي وبجيت بس والله حمدت ربي وسجدت له لانه الشي اللي بغيته ما صار لانه الحمدلله كان خيره لي ^^.. حط هدفك من اللحين وادخل قدرات لاحد يلعب بمخك ويقولك القدرات مو مهم ترا والله يساوي نتيجه الثانويه بالاهميه وااايد مهم ..
---------------------------------------------------------------------​

انطلقوا بالردود واتمنى ما اكون طولت عليكم بس حبيت احط كل شي بالتفصيل ^^ ​

 

[لذة شقاوه]

16 مشاهده ولا رد !!!!!! زعلتوني

 

[7lawah]

يعطيج آلف آلف عععآفيـه ،

مآ قصرتي ،.

موضوع روووعـه ،

و تشجيعي . . . و بصرآحة آستفدت منه حيـل ‘

جزآج آلله ألف خيـر ،

و تسسلمؤ . . .



,

 

[تذبحني عيونك]

بس هذاااااااااااااااااااااااااااااااااااااااااا منقول
المهم ثااااااااااااااااانكس على النقل ويعطيج الف عاااااااااااااااااافيه

 

[لذة شقاوه]

يعطيج آلف آلف عععآفيـه ،

مآ قصرتي ،.

موضوع روووعـه ،

و تشجيعي . . . و بصرآحة آستفدت منه حيـل ‘

جزآج آلله ألف خيـر ،

و تسسلمؤ . . .


,

الله يعافيج حياتي
مرورج الاروع اي والله روعه وانا وايد استفدت منه
وياج حبيبتي
الله يسلمج ومنوره

 

[لذة شقاوه]

بس هذاااااااااااااااااااااااااااااااااااااااااا منقول
المهم ثااااااااااااااااانكس على النقل ويعطيج الف عاااااااااااااااااافيه

اي حبيبتي انا ذكرت انه منقول وانا نقلته عشان تستفيدون منه
ويل كوم حبيبتي وحياج الله

 

[PO PO22]

جزاااااج الله خير حبيبتي ع النقل انا قاريته منها بس اكيد شكةر بنات ماقروه
يعطيج الف عافيه والله يوفقنا ويوفقها الكاتبه

 

[لذة شقاوه]

جزاااااج الله خير حبيبتي ع النقل انا قاريته منها بس اكيد شكةر بنات ماقروه
يعطيج الف عافيه والله يوفقنا ويوفقها الكاتبه

وياج حبيبتي
اي حبيبتي انا حاطيته انا في بنات وايد ما قروه وذكرت اسمها ويعطيها الف عافيه وعسى الله يوفقها يارب
والله يعافيج ياقلبي
اجمعين يارب

 

[e.ngland]

صراحه انا من الحين بطبع اتحانات ومراجعات بصراحه شجعتني و بشتري مذكرات جمعية المعلمين و مالت القدرات
ثينكيو حبيبتي ع النقل المفيد

 

[e.ngland]

امتحانات لوول سوري شابكه من الفون

 

[ற!ŚŚ 7ŎǾř]

يعطييييج الع ــأأأفيــه ..~

 

[غلآة امي]

وآيد رفعتي من معنوآتي انا وحده مو مخرب علي بالدرااسه الا التووووووتر



وو يعطيج الف الف الف عآفيه عالموضوع المفيد صراحة

 

[قمر ونجمه]

بصراحه ما قصرتي
بس ما فهمت امتحان القدرات

 

[للابداع اصول]

يعطييييج العافييييه حبوووبه

 

[أحلى البشر]

يعطيج العااافيه

 

[لذة شقاوه]

ان شاءلله قريبا راح انقل لكم موضوع القدرات انتضروووني

 

[للابداع اصول]

ثانكسس فدييييتج الله يعطييج العافييه 