السلام بنوتات
سالفه تنظيم الوقت تكون
اول شي : تشيلون نومه الظهر نهائياً لانها اول شي تضيع وقتكم و تخليكم كسولين و خاملين و تخليكم ما تنامون بليل مبجر و هذا يأثر على قعدتكم الصبح و يخليكم ما تنتبهون مع الدرس
اذا انتوا موافقين بهالنقطه راح تمشون معاي 100% صح
و جربوا الاسبوع الاول و بتشوفون التغير الكبييير الي راح يصيرلكم
ثاني شي : اذا عندج واجب بحث تقرير ... الخ ، حاولي تخلصينه بيومه عشان هالشي بيفيدج حق موعد تسليم الدفتر ما يكون دفترج ناقص و ما تلاحظ ابلتج انج مهمله
ثالث شي : ايات القرآن حفظيهم اول ما تعطيج ياهم الابله عشان لا يتراكمون عليج و حطي فبالج لج اجر من الله حفظتي ايه يعني هالشي لا تستخسرينه على روحج كلش
رابع شي : حضري و دوري معلومات خارجه بس متعلقه بنفس تحضيرج (( مثال )) : كانت عندنا وحده كل يوم اتييب معلومه من برا فصارت الابله متعوده تطلب منها المعلومات الخارجيه
تبين اقولج شلون ؟
و اهيا تشرح الابله لا تقاطعينها بس رفعي ايدج و قوليلها بعد اذنج ابله عندي معلومه متعلقه بالنقطه الي ذكرتيها ممكن اقولج ياها و طبعا راح تقولج اي من زود وناستها
سوي صور خارجيه متعلقه بالماده حبي الماده غصب سوي بوسترات ، صور ، بطاقات اي شي يحببج بالماده و بالعكس هذا مو تبذير وقت بتلاحظين هالشي بينفعج بيوم الامتحان المعلومات راح تكون اساسا راكزه بمخج
خامس شي : سوي ملخصات للموادمن بدايه الوقت عشان يوم الامتحان لا يتراكم عليج و لا سمح الله مرضتي يوم الامتحان تكونين من قبل عندج معلومات و عندج شغلات ثابته فمخج لا تعتمدين على يوم الامتحان هذا اكبر خطأ ، لو تدرسين نص الكميه قبل الامتحان يكون واايد زين عشان الظروف اهيا الي تتحكم بالانسان و احنا ما ندري شنو بيصير يوم الامتحان
سادس شي : ماده الانجليزي الي تشوفها صعبهه ، تحفظ كلماتها اول بأول ، و تحط كل كلمه بجمله لما تخلص من الحفظ و تفهم اسأله الست بوك قبل لا تحفظهم ، و الانجليزي دايما تدربي عليه بالكتابه لان يساعدج عالسبيلينق ، والله انا ما كانت اعرف ولا شي بالانجليزي و لما رحت تاسع خذيت امتياز و من بعدها دريت ان انا لي رغبه بتعلم الانجليزي و صرت حتى بالعطله اسمع اغاني انجليزيه و اترجمها اطالع مسلسلات بدون ترجمه و صرت اقره انجليزي وااايد و الحمد الله وايد تقويت بالانجليزي بس للاسف ما تخصصت انجليزي معني دشيت كليه الاداب عشان هالتخصص بس صارت الامور صعبه علي و ادعولي اتخصص اعلام
سابع شي : ماده العربي الاغلب ما يحبها ؟؟؟ ليش ما ادري !! يمكن نشوفها صعبه ,, الله العالم بس حفظي ابيات الشعر ، حاولي تتنتبهين بدروس النحو راح تفهمين و ماله داعي تحفظين و استعيني بأسئله الكتاب و الله يسهل ان شاء الله
ثامن شي : اكلي اكل خفيف قبل لا تنامين عشان لا تقلب معدتج
تاسع شي : الغيااب ، الغياب ، الغياب .. احذركم منه واايد لان صج ينزل مستوى الطالب , واذا اضطريتي تغيبين لا تغيبين بيوم عليج ماده درسها صعب ، يعني انا ايام الثانوي اكون حدي تعبانه بغيب بس اذكر ان علي تاريخ و انا ما احب دروس التاريخ تتراكم لانها احداث نفس القصه فأقوم و اداوم و استمتع بالدرس لاني احب التاريخ
اي استفسار انا حاضره و اتمنى تكونون استفدتوا و طبقوا سالفه نومه الظهر لان الاغلب ينامها ادري بس جربوا اسبوع و راح تحسون بالفرق
خل اقولكم سالفه و انتوا حكموا على نومه الظهر
انا بالاساس ما انا الظهر كلش
مره من المرات كان علي امتحان جغرافيا و الكميه كانت كبيره فقلت خل انام و اقوم ادرس ما يأثر مو كل يوم انام الظهر
المهم قعدت من النوم متأخر المهم ان الساعه 7 مسكت الكتاب ، من الخمول الي فيني ما درست و رديت نمت ع الكتاب
و بعدها أجلت الامتحان و تحسفت ليش نمت الظهر :ch12:
و لا انتوا شرايكم ؟؟
بصرااحه كلامج عسل عل عسل وانا معاااااااااااج بنومه الظهر صج صج انه لمن تقوومين منها مالج خلق تدرسين وراسج يصدع انا ايام الامتحانات ما انام اما الايام العاديه عااااااااي وطبعا كلامج عدل عدل عن الغيااااااب الانه صج يضيعنا انا اكره نفسي اذا غبت يووم واحد وارووووح المدرسه متنحه ماادري وين الله قاطني
بس صدقيني العربي مهما درسنا وحقظنا وفهمنه كل شي لازم نبدع بالامتحااااان الانه كله اشياء من بره اول مره نقراها لوووووول
وعندي تعلييييييق عل المعلوومات الخااااارجيه<<احنا يالله يمدينا ندرس درووسنا وطلبات المدرسات بعد معلومات خااارجيه>>بس معاج حق راح تفيدنا وتفتح عقلنا اكثر
عل الماده وجذي
يالله خلصت من التعلييييييييق
ومشكوووووووووووووووووووووره مشكووووووووره واسفين عل الازعااااااااج هههههههههههههه وادري قرقت وايد وثينكس اقين
