السلام عليكم ورحمة الله وبركاته
صبحكم الله بالخير ان اصبحتو ومساكم ربي بالنور والكرامه ان امسيتو حبايبي ياكويتيات وياخليجيات وكل عضوات منتداي الحبيب اللي يحبوني ويتابعوني من جميع الجنسيات :eh_s(7):
اتمنى تكونون جميعا بخير وصحه وسلامه ادري مقصره بحقكم لكن اغلبكم يدري ما ابتعدت الا لظروف صحيه
واشكر كل من سالت عني وتواصلت معاي عالوتس اب وطولت بالها علي طول الفتره اللي طافت رغم قلت تواجدي معاكم:eh_s(17):
واشكر كل من سالت عني وتواصلت معاي عالوتس اب وطولت بالها علي طول الفتره اللي طافت رغم قلت تواجدي معاكم:eh_s(17):
ومالكم بالطويله حبايبي كعادتي اغيب واردلكم بشي مفيد وبيسركم وبيعجبكم والاهم من جذي خفيف وسهل والمفعول عجييييييب
تلبيه لطلبات اللي كلموني عالوتس اب من خارج الكويت وداخلها بشي يبيض وبدون كورتيزون ومكوناته متوفره لعدم قدرتهم الطلب وتحمل مصاريف الشحن ، وهم بنفس الوقت لعضوات منتداي الغالي اللي ينطرون جديدي بفارغ الصبر..
اهدائي لكم خلطه من نوع يديد سنفره كريميه صابونيه وتجربه تفوق الروعه بياض ونعومه ولمعه وترطيب يتم ايام يعني اللي مالها خلق تدهن تسويها كل يومين او ثلاث وترتاح غير جذي بتودع شي اسمه شعر تحت اليلد، حب الشباب واثاره وتوحيد لون وتفتيح مع الاستمرار غير تغذية البشره وتقويتها وتمنع حساسية البشره الناتجه عن عمليات نزع الشعر
ومناسبه جدا للحمام المغربي او خيمة البخار ان توفرت والاهم من هذا كله الشي اللي يميز كل خلطاتي انها طبيعيه وتناسب البنات والعرايس والنفاس والحوامل والمرضعات يعني خلطه امنه 100%
وهذي صورة جميع الاغراض اللي تحتاجونها
ونيي حق مكونات الخلطه وعقب بعطيكم نبذه عن بعض المكونات المهمه وليش اخترتها
الصابون:صابونة افوكادو للتبييض،صابونة خيار للتبييض،صابونة جلوتاثيون بالفيتامينات للتبييض،نص صابونة غار اصليه عشان تعطي ليونه للصابون
السنفرات:سنفرة كريم كاب للتبييض،سنفرة الخيارللتبييض وممكن استبدالها باي نوع سنفره مثل المشمش او البابايا
اما الزيوت:زيت الافوكادو،زيت الشاي الاخضرالمركز،زيت الاركان المغربي الاصلي،زيت الجوجوبا،زيت اللوز المر،زيت المره،زيت الليمون
الاملاح:ملح يوكو باللافندر- ملح يوكو بالخيار
المبيضات الطبيعيه المستخدمه
مبيض العروسه الطبيعي، مبيض زيت الزيتون والليمون،الهرده الشاميه
مبيض العروسه الطبيعي، مبيض زيت الزيتون والليمون،الهرده الشاميه
وبطل ماي ورد ايراني
الصابون والسنفره مومحتاج اتكلم عنه لانه فوائده وحده اللي اهي التبييض والسنفرات كذالك لكني حابه انوه اتحصلونهم عند الفلبن وبعض محلات العطاره
اللي حابه اتكلم عنه اهو اختياري للزيوت التاليه بالتحديد:
زيت الافوكادو:غني بالفيتامينات والمعادن المفيده والمغذيه للبشره والبروتينات والاحماض الدهنيه مثل الاوميغا 3 ،يساعدعلى تخفيف علامات السن ويعالج الحبوب واثارها ويحارب علامات تقدم السن والتجاعيد بالاضافه للتبييض
زيت الشاي الاخضر اللي لاتخلو منه معظم خلطاتي:يتميز بخواصه المضادة للفطريات والبكتيريا،مما يجعله علاجاً جيداً للتخلص من حب الشباب والالتهابات المصاحبه لها وغنائه بمضادات الاكسده
زيت الاركان المغربي:يرطب البشرة مضاد للتجاعيد ويأخر ظهورها لاحتوائه على نسبه عالية من فيتامينe ويعتبر مبيض طبيعي للبشره
زيت الجوجوبا: زيت سريع الامتصاص غني بالكولاجين الطبيعي وفيتامين e معالج للبشره وحب الشباب
زيت المره:زيت قابض للبشره ويساعد على شدها وتوحيد لونها ومعالجة الحبوب واثارها والتبييض
اما الاملاح المستخدمه:ملح اللافندرغني بالكولاجين،فيتامين e، فيتامينB3، وملح الخيارللتبييض والتنعيم
اما المبيضات اللي استخدمتها : مبيض العروسه الطبيعي يتكون من لوز-ليمون-جلسرين،مبيض زيت الزيتون والليمون يتكون من خلاصة الزيتون وشجرة الغار-الليمون-صابون خفيف،الهرده الشاميه تتكون من اعشاب مبيضه وتشد الجسم
والصوره تتكلم ولاحظو اني حطيت دوائر على عدم احتوائهم على مواد كيميائيه يعني بالعربي الخلطه طبيعيه كعادتي 100%
والحين عقب ماعطيتكم شرح شبه مفصل عن المكونات الطبيعيه الخاليه من الكوريتزون نيي حق طريقة عمل السنفره الكريميه الصابونبه بحيث انها تطلع بقوام كريمي مخملي وتتلذذون بالاستحمام وتدعون لي:rerrerek:
حبابيبي الطريقه مفصلتها لكم بالشرح والصور
نبلش بطريقة عمل السنفره:
تفضون سنفرة الخيار كامله مع نص سنفرة كاب واتضيفون عليها مقدار ملعقين كبار من جميع الزيوت الا زيت المره تصبونه كامل مع المحافظه على تحريكها بالخلاط اليدوي لين تمتزج امتزاج تام الزيوت بالسنفره وبتلاحظون تغير لون السنفره على حسب كثافة والوان الزيوت وبعدين اتضيفون معقتين كبار من ملح الافندر وملح الخيار وتخلطونهم عدل لين يتجانس تماما بالضبط مثل خطواتي المصوره:
اما طريقة عمل الصابون مافي اسهل منها والكل حافظها:
تغلون ماي الورد واتضيفونه على الصوابين المبشوره طبعا مو كل البطل تصبونه بس لين تغطون الكميه المبشوره كامله وتوزعونها وبعدين تنقعونها 10 دقايق تقريبا وعقب تضربونه بالخلاط الكهربائي لين يصير القوام كثيف ولزج وتضيفون مقدار ملعقتين كبار من جميع المبيضات اللي ذكرتها وعقب ماتصير دافيه الى بارده اتصبونها فوق السنفره وتخلطونها مره ثانيه بالخلاط عشان تتجانس وتصير كريميه وخفيفه تماما بالضبط مثل خطواتي المصوره:
وعطتني هالشكل تلاحظون بالصوره انها مزيته شوي
ضفت لها باقي علبة الكاب لين صارت بهالقوام الكريمي الخفيف واللطيف والرائع :eh_s(9):
وعطتني هالشكل النهائي الكريمي اللي يشوووق تسلم اديني و كثافتها ونعومتها مثل الكريمه المخفوقه فسميتها سنفرة الكريمه:eh_s(22):
وطبعا تقدرون تسوونها بالمكونات اللي تقدرون توفرونها بس ركزو عالزيوت المختاره وعدد الصوابين وحجمها واللي ماتحب ريحة سنفرة الخيار لانها نوعا ما قويه تستبدلها بسنفرة المشمش وبنفس طريقتي المصوره بشكل احترافي عشان تظبط معاكم
طبعا قوامها مخملي وكثيف وبنفس الوقت خفيف وكلمة روعه شويه عليها سنفره كريميه وناعمه والاحلى من جذي فيها صوابين مبيضه يعني بياض ونعووووووومه موووصج وبشره رطبه وتلممممع نظافه ونضاره مثل البيبي
ونيي حق طريقة الاستخدام :
اهي ماتعتبر بديل للصابون ابدا لانها تعتبر كريم سنفره تستخدم بعد الاستحمام توزعونها عالجسم كامل
وتتنقعون فيها 3 دقايق او اكثر طبعا عشان تمتص البشره فايدتها تتوزع مثل الكريم، وعقب تفركون جسمكم عدل مدل تطلع معاكم رغوة الصابون الموجود فيها ومايحتاي اقولكم شكثر بتنصدمون لما تشوفون البلاوي اللي تنزل وشلون لون الرغوه الابيض بيتغير للبني بدس البودي شوب وعقب تغسلونها بالماي فقططط
وبتلاحظون الفرق من اول استحمام نظافه ونضااااااره وشوية تفتيح ونعومه ولمعه ومع الاستمرار راح يبلش التتبييض وتوحيد اللون اكيد
تقدرون تتنقعون فيها يوم وترك عادي لكن ما تتفركون فيها الا مره او مرتين بالكثير بالاسبوع
وعليكم بالف عافيه يارب :yaaaaaarb:
هالموضوع تعبت فيه وعلى فكره انمسح واضريت اعيده من اول بسبب الشبكه التعبانه وسويته لعيونكم مع علمي انه في ناس لعبتها تبوق مواضيعي للاسف والتقليد عليها لكن هالشي ماراح يمنعني من افادتكم ومشاركتكم خبرتي لانه التقليد يأكد اني استحق الثقه ورائده بهالمجال ومثل ماتثقون فيني واثقه بامانتكم حبايبي اللي تبي تنقل الموضوع تذكر اسمي
*ماي ورداسم يستحق الثقه*
ولاتحرموني من دعواتكم الطيبه وهالله هالله بالترحيب الحار حدي مشتااااااقه لكم، واتمنى منكم ماتحرجوني بالاستفسارات لاني ماقصرت فصلت تفصيل ممل وبالصور، شنو هدفي؟؟ هدفي ارد الثقه بنفس كل بنوته وكل متزوجه وابيكم تتميزون بكل مناسباتكم ومايتم شي بخاطركم ماتلبسونه، وترقبوووو المزيد والمفيد معاي انا ماي ورد:sfg:
احبكم في الله ياكويتيات واحبكم الذي احببتموني فيه
تمت..
