ظاهره غريبه بين اليهال

[بنت الكويت العسل]

السلام عليكم
من يومين رحت بو اميه ولقيت ياهل افتكر بنغالي او صيني في قسم الالعاب ييه ياهل كويتي شوفوا اللي صار وشنو قال الياهل الكويتي له ((انت بنغالي والا كويتي ؟؟))بصراحه صعقت يعني ياهل توه بو خمس ست سنين اشدخل هالسوالف براسه والمشكله مو جذيه المشكله انه ضل فتره تقريبا 3 دقايق وهو معلق على هالسالفه والياهل مطنشه طيب اشتبي في الياهل قام غير السؤال وقاله انت بابا ماما من وين اللي قهرني بالاخير انه مد ايده عليه بسيف لعبه ينغزه فيه فتره طويله وانا بشوف شنو يسوي الثاني الا اهو مرتبك وخايف ويطالعني جنه يقول شوفيه شسوي قمت اهنيه قلت مافيها لازم اتدخل لانه مستقوي على الياهل وادبته باللي يستحقه
شاللي يخلي اليهال يصيرون جذيه السان طويل على الخدم وايدهم طويله واخرتها اللي حصل اليوم عيونهم تفتحت على شغلات احنا في عمرهم ماكنا ندري عنها غير قلة الادب اللي تحصل انا مااعمم بس نسبه كبيره بصراحه في كل مكان اشوفهم بهالاسلوب
رايكم بنات

 

[رفايع]

على حسب التربيه وعيالنا مدلعين

 

[الأميرة النائمة88]

الأطفال دايما يقلدون أهلهم أو ألي أكبر منهم فأكيد أهو شايف أحد يسوي جذي

 

[سبائك]

لانهم تربية خدم

هذا السبب الوحيد

 

[Pink GirL]

عيال الحين مفتحين باللبن وعليه علينا بهالسن كنا الكشة منفوشة ونلعب بالحوش

لاحول الله كل جيل ايي اشطن من الجيل اللي قبله الا ما ندر

 

[ضحـاوي]

اولا واخيرا من التربيه والاهل

انا لما اروح مكان معاي عيالي احيانا يكون في

يهال يتحرشون بعيالي يقرصونهم , يدزونهم , يطلعون لسانهم

والام اطالعهم وعاااااااااااااااااااااااااااااااادي وانا احتر بس شسوي

اقول لعيالي خلوهم هذولي مو حلوين واطالعهم وودي ازف الام مو ازفهم ؟؟؟؟؟؟؟؟؟؟؟؟؟

 

[برميته.]

التربيه لها دور كبير يعني الام تقط الياهل على الخدامه 24 ساعه وتبي كامل الاوصاف؟ شلون بتصير اخلاقه ,لا والي قاهرني ناس عندهم هذا تحضر اذا كان مع الخدامه 24 ساعه يعني اهيا الناني مالته ! امحق ناني!

 

[Filakawyia]

الأطفال دايما يقلدون أهلهم أو ألي أكبر منهم فأكيد أهو شايف أحد يسوي جذي

انا معاج :eh_s(15):

على حسب تربية الاهل . . . ​

 

[BaiTotia]

أكيد مثبت هالشي براسه من أهله أمه و أبوه

و لا ياهل شعرفه بهالسوالف و الجنسيات!!!!!!!!!!!!!!

 

[زلابيا]

تربية الاهل واكيد اهو شايفهم ولا سامعهم

ولا من الخدم اللي مجابلينهم 24 ساعه

ولا تنسون المسلسلات والمسرحيات اللي مالها اي هدف ؟؟ طنازه وكلام وصخ وتعيب ولا يتكلمون عن السنه والشيعه ولا بدو او حضر .. وهالسوالف ما يطالعونها الا اليهال ويطبقونها

الحمدالله والشكر

 

[بنت الكويت العسل]

تسلمون على التعليقات بس على فكره في شغله ماذكرتها انه بعدين يت الفلبينيه اللي تشتغل في القسم وطبعا شافت الحوار اللي صار فقامت قالت انتي شنو يبي في هذا بابا ماما رد عليها من قلة ادبه وقال لها يعني شنو اهو مافيه بابا ماما مال اهو لازم فيه طيب وانت شيخصك ياربي ياهل فضولي ملقووووووووووووووووف من قلب هذا شلون مربينه جذيه انا قلتله انت ليش شيطان قام رد بعد سكوت فتره لا انا بس اخوفه تخوفه وانت تعوره بالسيف اللعبه ياكبرها عند الله شنو ناقص بعد والام طبعا تسرح وتمرح بالمكان والله يبيله طق بعد مو زف بس اخ ماطلعت امه كنت وريتها التربيه والادهى اخته اللي اكبر منه كانت موجوده ومساندته بالموضوع وترا اكله زفه محترمه من الفلبينيه لانه بصراحه موقفه كان سخيف بالمره ومبين انه مو مربى عدل كلنا كانت فينا شطانه لمن كنا صغار بس ماتوصل لي قلة الادب والله على قولتكم تربية خدم العيال مقططين بالمحل والام مادرت عن هوا دارها محد شافها ولا درى عنها

 

[كويتيه مذهله 87]

على حسب التربيه وعيالنا مدلعين

:d :d :d

 

[ضحكة الدنيا]

كلن على حسب تربيته فى اطفال لما يغلطون على طول الام تأدبهم
وتنصحهم وتعلمهم الصح من الغلط
وفى اطفال من يغلطون تتغاضه الام عنه وتقول توه ياهل مايعرف شى
وهذه هو الغلط

 

[شاهة]

التربية وكل طفل يعكس فكر اهلة وطريقتهم في البيت واكيد اهل هالولد هذا مستواهم شنو تتوقعين من الولد الصغير

 

[supermarket]

كلن على حسب تربيته فى اطفال لما يغلطون على طول الام تأدبهم
وتنصحهم وتعلمهم الصح من الغلط
وفى اطفال من يغلطون تتغاضه الام عنه وتقول توه ياهل مايعرف شى
وهذه هو الغلط

:eh_s(15): :eh_s(15):


عدل كلامج ... مرة كنت بسينما الاي ماكس في واحد واخته يعني بو 7 سنين جذي قاعدين وراي ويرفسون الكرسي ... سكت مرة مرتين ثلاث موراضين يوقفون عن الحركة لما التفت عليهم ... قلت لهم : وبعدين !!! ... طالعوا بعض وضحكوا ... وردوا يسوون الحركة بشكل اقوى

طبعا مو بس امهم كانت معاهم .. اعتقد كان الفرييييج كله لان السطرة كلها كانوا اهلهم بس محد فكر يقولهم شي !!!


اعتقد هذي تربية الاهل والخدم مالهم ذنب ... انا عندي يهال بعايلتنا تربية خدم بس اذا قلنا خدامة فلان واحنا نسولف ينقزون لنا ويقولون عييييييييب لاتقولين خدامة قولي اسمها :eh_s(15):






سوري طولت عليكم بس من القهر من تربية هالايام

 

[^ليلاس^]

من اهلهم

يسمع ابوه يقول هندي وهندي والام ويييه مالت عليها هالمصريه وهلم جرا

ومن التلفزيون اللي بس طنازه على خلق الله جنه احنا شعب الله المختار مافي احسن منا

 

[جروح تبتسم]

اقولج شي تصدقين احنا لي عمر 9 سنوات والله العظيم اني اخاف من شغالتنا واسمع كلامها ... وحتى امي ماترضى نكلمها ولا نتأمر عليها بحرف واحد وقسما بالله عمري ماقلت لها جيبي لي قلاص ماي حتى !!
وهالايام اشوف يهال على 5 و6 سنوات مايحركون ارض رابضه معتمدين على الخدم ويزفون ويعيبون
الحمدلله انا عيالي حضانه ماخليهم مع الخدامه بروحهم دقيقه وحده انا اعتقد تربيه الخدم هي السبب ....
صح في يهال مومأدبين واللي يقهر الام اللي تطالع ولدها يقل ادبه وودها شوي وتصفق له ##

 

[المعنقيّة]

قاعدة أتخيّـــــــل شكل الجاهل الكويتي وهو يحارش الهندي

هههههههههههههههه

 

[nero]

الحين الياهل مخه اكبر من اول .. و في شغله يديده بعد.. يا ويله الي يجيس ولدي
هذا الي يخلي الولد يتمرد ويتفرعن اكثر ويطول لسانه

 

[بنت الوفا]

علي حسب التربيه