عروس في ورطه

[بالاستغفار نسعد]

يسعدلي صباحكم
خواتي العزيزات انا متابعه لهذا المنتدى الرائعه لي اكثر من سنه
وربي استفدت كثير وجزاؤكم الله خير :eh_s(15):

انا بدخل بموضوعي واتمنى من كل قلبي انكم تساعدوني
انا مخطوبه وزواجي بعد اربع شهور ...

انا اكبر خواتي وربي مااعرف محتاجه نصايحكم
عن التجهيزات والنصايح كيف اتعامل مع زوجي هذا اهم شي كيف اكسب قلبه وقلب اهله
كيف مااخليه يمل من الجلسه معاي
ابي اصير زوجه ناجحه ماابيه يلاحظ علي اي ملاحظه مموحلو

ياليت بكل ماتقدرون تساعدوني

وربي ماانساكم من دعوه بظهر الغيب

 

[اسماء المنور]

ان شاءالله البنات بيفيدونك

 

[انا كلي فداك]

ان شاء الله البنات یفیدوونچ

 

[tmneetk]

حيياتي .. اول ششي مببروووك مقدماا ؛؛ و الله يسسعدج و يوفقققج ..

ثاني شي انتي باجي على عرسج 4 شهور ان شاء الله ..
ابدي تجهييز بجايم قمصان اكسسوارات ..
لان الحين فبراير كله تنزييلات و عرووض وايد ..

مكياج و عطور نطري المعرض الشهر الجاي .. و خلصي عطورج و مكياجج ؛؛ .

و قبل العرس بشهرين او شهر و نص ابدي تجهيز دراريع و ملافع و احجزي صالونج و ثووبج و مسكتج ..

هذول بياخذون معاج وقققت .. يعني شهر .. بعدها خلاص سكري كل شي .. ابتعدي عن التفكييير علشان بشرتج :؛
من الحين حطي لج جدول اعتني بجسمج رشاقتج اناقتج ..

اذا عندج مشاكل بجسمج عالجيييها و شعرج لاتنسيينه ؛؛

سوي لييزر ..

بالنسبه لزووجج و اهله انا ما اقدر اقولج غيير .. الكلمه الطيبه تلين قلب اللي جداامج
ابتعدي عن الجذذذذذذب

اذا ماتبينه يمل لا تعودينه على رووتيين وااحد غيري بلوكاتج بطريقه لبسج نووعي ..



و بسسسسسسس

و الله يووفقج

 

[ana almessa]

http://www.q8yat.com/t1008771.html
ان شاء الله يفيدك الموضوع فيه نصايح للتجهيز

 

[Bedor-al.3taiby]

دايم ادعي قولي ياربي ياحبيبي جملني بعين زوجي و اهله

خلي قعدتج خفيفه عندهم لا تكونين حيل رسميه ولا حيل مطيحه الميانه

يعني كل شي بحدوده بس تكون قعدتج معاهم مريحه لهم

ونهائيا ابتعدي عن القيل و القال ولا تسولفيله عن فلانه قالت و. علانه سوت حتى لو انتي مستغربه و مستنكره افعالهم

خلي مواضيعج تفتح النفس

طول ما اهوه قاعد دلعيه خليه يشوفج مهتمه بخري البيت و روحي بخريه و سويله جاي و حطيله حب و بسكوت و قعدي معاه

و تابعي افلامه حتى لو ماتحبين الافلام

و كل شي يحبه مثلي انج تحبينه

و اي شي مايعجبج من تصرفات و اسلوب لازم من الاول تعودينه

و اذا تهاونتي مره بيتمادي كل شي حسب التعويد لا تعطينه مجال يغلط خلج سيدا

بيتج ٢٤ نظيفه و السرير مرتب

كل شي خلي يشاركج فيه رايه حتى لو ذوقه مۆ حلو مۆ مشكله استحملي ههه

و سإلي عن اهله و خل يحسج لما تطلعين منهم انج مستانسه

و ان شالله اكون افدتج بشي

 

[معزوفة عشق&]

ماقصرو البنآآآت

ررررررررفع لعيونك

 

[..~Goolz]

اول شي مبروووك وعسى الله يتمم لج ع خيير

مثل ما اقالو لج البنات وشلون تكسبين اهله بكلمه الطيبه والابتسااامه خليها ما تفااارقج
احترميهم عامليهم مثل اهلج >بس بحذر
يعني مو كل شي تقولينه لهم واسرار بيتج ما تطلعينها لهم ولا تفضفضين للهم عن ولدهم
خليج مرحه وضحكي ع طوول معاهم لا تكون رسميه حيييل ولا مطيح الميااانه خير الامور اوسطها
وخليج سنعه في بيتج واكلج بموعده
راعي وقت دوامه ووفري له الجو الهادي لي رد من دوامه يحصل غداه زااهب
وغرفة جاهزه ومعطره لنومته ولي قعد من نوم قهوتج وحلاج جاااهز

وبس ترى الزواج هيين لا تفكرين وااايد



موفقه يا عمري

 

[khawla&tito]

الله يوفقج

 

[baby qa6wa]

uppp

 

[<<المها>>]

نصيحة لاتكثرين عطور وعقب تتندمين اشتري عطر واحد مع مجموعته اللوشن والبدي سبري للملجه

وعطر ثاني مع مجموعته للعرس ودهن عود وبخور وتمي على عطورج اللي عندج حق فتره الملجه اذا انتو من النوع اللي

تطلعين مع زوجج لانج بتكبين ميزانيه وقدرها وباجر يقولج هذا ثقيل ما احبه وهذا ريحته مادري شنو تر الرجال مايعجبهم

اي شي وخصوصا الريحه القويه مو نفسنا الحريم وعقب يابتوزعينها على خواتج يا تخيس وممكن تحملين وتتنسين

وتكرهين كل شي

اشتري لج مجموعه حقة الجسم من باث اند بودي عندج ببالافنيوز خذي عدد 2 بس لاتكثرين عقب عرفي الرجال شنو يحب واشتري ..

انا ضد مبدأ تكود الخلاقين والمشترى اللي على غير سنع اصلا كل شي له وقت وينتهي والسوق ماراح يسكر متى مابغيتي شريتي وكل يوم نازل شي جديد ..

المكياج شوفي شنو ناقصج وكمله مو تروحين تشترين مكياج كامل من اول وجديد خصوصا اذا كنتي مو راعية مكياج وايد لاتكثرين كله 6 شهور وسنه مدتهم وتنتهي وماكو بنت الحين ماعندها مكياج كملي النواقص بس مثلا كريم اساس مسكره بودره معينه ماعندج من لونها شيكي على ارواجج شوفي شنو بادي يخلص ولونه حلو يصلح للصبح والسهره اشتري الرجال يحبون الوان الروج الهاديه يعني خلي عندج الالوان الاساسيه احمر وردي فوشي برتقالي و بيج يتروالي كافي مع اللي عندج من قبل

قمصان النوم اهم شي حق اول ليله تاخذين قميص طويل مع روبه وشحاطته وعندج الطاهر وانور وقاسم عندهم اشياء تهبل
والباجي خذي قصار وعلى حسب ذوقج بس لايزيد مجموعهم عن 8 وعقب شوفي زوجج شنو يحب واشتري ولاتنسين تاخذين بجايم مثل البرمودا حق وقت الدوره خذي لج 3 مثلا

ملابسج التجهيز امسكي كبتج وشوفي شنو قديم وخلاص مو حلو قطيه وسوي تصفيه الملابس المرتبه واللي تصلح حق زواير وطلعات او اذا جاج زوجج مثل البلايز والبناطلين او التنانير هذي تلبسينها عند اهل زوجج او بالطلعه معاه اذا العدد كافي ومرتبات خلاص لاتشترين الا شيين او ثلاثه

اذا لقيتي تايورات حلوه اخذي لج اثنين حق مناسبات

اهم شي الحين تبدين فيه العلاجات اذا كنتي تحتاجين مثلا رجيم رياضه شعرج بشرتج بس مو تسوين نفسج حقل تجارب كل يوم خلطه وتدمرين الدنيا لا شوفي شنو نوع بشرتج وامشي عليه ومن تجربه انتي من تسوين رجيم ويقل نسبة الدهون ومع الرياضة بتتعدل بشرتج بروحها .. سوي ليزر للشعر .. تبيض اسنان اذا تحتاجين ولو اني ما انصح فيه لانها ترد صفراء اكثر من قبل خصوصا اذا كنتي راعية جاي وقهوه .. هذي الاشياء تستاهل تقطين عليها فلوس لانها بتعيش معاج اما خلاقين وعطور ومادري شنو كلها تروح ياتحملين وتمتنين وتنحرمين منها يا تتغير موضتها والسوق موجود مو طاير اي وقت الوحده تروح وتشتري

ابدي بفستان الملجه اذا لقيتي شي جاهز ولا بتفصلين والشبكه اذا انتي تشترينها ابدي دوري على الحلات اخذي فكره
واشتري جوتي لفستان الملجه وعقب ابدي جهزي فستان العرس اذا بتسوين وحجز صالون وحمام مغربي وتنظيف بشره وهالاشياء ومصوره والدي جي .. الخ الخ

الجواتي الله يعزكم نفس الشي افرزيها واللي ماتبينه او مره عليه سنه ولا سنتين مااستخدمتيه خلاص عطيه اما خواتج ولا تصدقي فيه
اهم شي يكون عندج اسود وبيج وبني وذهبي هذي الالوان ماتستغنين عنها وتجي مع اي لبس وخذي لج واحد فلات وشحاطه حق الدراريع او صندل .. اذا بتسافرين شهر عسل لازم تشترين لج جوتي يكون مريح طبي وبنفس الوقت يكون شكله حلو او جوتي رياضه وخليه جلد عشان تقدرين تنظفينه

الدراريع اذا عرسج قريب من رمضان فصلي لي 3 مو اكثر وحده حق اول يوم ووحده للقرقيعان وحده تغيرين فيها للزواره لان العروس اول ماتتزوج مو حلو تلبس دراريع حلاتج بلبس كخشه وتالي فصلي اذا احتجتي

بالنسبه حق الزوج واهله كل ماكنتي على طبيعتج وتتصرفين على سجيتج كان افضل يعني لاتشتطين وتغيرين شخصيتج مو حلو خليج طبيعيه بس طبعا كوني حذره لما بتقولين كلمة اوزنيها قبل لاتطلعينها واهله تعاملي معاهم بأحترام والكلمه الطبيه ولاتقطين عمرج من البدايه اعرفي اهما شنو وشنو اطباعهم يعني اول سنه خليج رسميه لين تعرفينهم وتالي تقدرين تقررين اهم شي ام الزوج اكسبيها بالكلمه الحلوه والهديه بالمناسبات وعامليها نفس امج هذا اللي يهم الرجال عشان اهوا بالمقابل يحشمج ويعامل اهلج زين ..

وااااي تعبت وانا اكتب ان شاء الله اكون افدتج .. والله يوفقج وتطلعين احلا عروس يارب

 

[لمى الهاجري]

اولا جسمج لازم تشلين شعر كل جسمج كله بالليزر يبي لج كم جلسة
ثانيا الشعر تعتنين فيه عندج زيت خروع زريت الوز حلبة مطحونة روب زبادي كله للشعر وعندج نبتت الصبار للشعر وطبعا لا تنسين تسنفرين جسمج وحمامات مغربية ونبتدي بالتجهيزات تكون متنوعة من قمصان نوم بجايم كلوتات ملابس داخلية المحلات معروفة لاسنزا ايشو وحراير ستان اقطان وبعدها مجمعوة الوشن والشاور جل والباودر والعطر من فيطتوريا سيكرت وعطورات ماركان شانيل يور قوتشي جيفنشي ومسك العروس وبخور وتشترين لج ملابسعملية لشهر العسل جينزات بديهات طويله وتفصلين عبايات كشخة وتفصلين دراريع وجلابيات للزوارات وتشترين كم جوتي وشنطة ماركة عندج شوبارد بربيري ديور وطبعا لا تنسين ساعة الماس رولكس وخاتم فضة وشبكتج تلبسينها بالعرس وسوارة الماس وتشتري مفرش خاص للعروس ومجموعة الحمام المكون من روب وفوطة للعروس

 

[برستيج دلع]

ماقصروو البنااات

موووفقه :*

 

[((غلاي))]

الله يوفقج

 

[درة أهل الطولات]

السنع طبعــاا

قعدي معاهم ،،، وجبيهم ،،، احترمي اهله ،،، لا تطلعين اسرار بيتج برا

 

[reem alflla]

حطيها حلئه بوودنك


لو شنو ماصار لوشنو ماصار يعني لو شنو ماصار


اذا تهاوشتو انتي لا تتكلمين سكتي

وتشوفين


وتذكري دايما ان الرسول قال بما معناه انه لو موحرام جان امرة الزوجه تسجد حق ريلها

 

[بالاستغفار نسعد]

وربي معلوماتكم مفيده مره
وانا بالسعوديه وحجزت عند مساعد الزلال ببداء الجمعه اول جلسه لليزر

وانا الحمدلله بشرتي صافيه وبيضاء وجسمي رشيق
باقي لي التجهيزات والتعامل هي اللي تهمني اكثر
الله يجزاكم خير ويحقق لكم امنايتكم ويستجيب دعواتكم
على وقفتكم معاي


واتمنى المزيد من المساعده

 

[فرفورهـ]

البنات ماقصرووووووووووووووا
بالتوفيق

 

[بالاستغفار نسعد]

لرفع


ومااستغنى عن نصائح البقيه

 

[قطوه بطه]

لا تقولين اهلي يمنعوني من هالشي او ماكنت اقدر اشتري هالشي

لا تقولين انا اكره هالشي فيني لان الرجال مثل الجاهل بيحط براسه

قولي الكل يمدح بشخصيتي وجمالي


وووو ابد لا تقولين اسرارج او اسرار اهلج ومشاكلهم ولا حتى تاريخج وماضيج


وموفقه حبيبتي :*