عروس متوهقة في المطبخ

[سبيل المودة]

بنات عندي مشاكل في المطبخ بما أني عروس يديدة ومطلوب مني أطبخ للأسف :0bee2e8d89:

ماعرف لي الحين شنو لازم يكون عندي بمطبخي "مؤنة"
ماعرف شختار من الجمعية..
لما أشتري دياي مثلج "صدور" .. وابي اخذ منه قطعة وحدة .. لازم اخليها تفج عن الثلج قبل لا اخذها.. فراح يفج الثلج عن كل الدياي الموجود! فشالطريقة؟

الخضرة .. اخاف اشتري و يخيس.. مادري شسوي.. احيانا لما بطبخ احتاج شي معين بس مايكون عندي و ريلي بالدوام ! اتوهق..

زوجي ما ياكل عيش .. و احتار في الاطباق اللي تصلح حق غدا بس مافيها عيش .. اعاني وانا ادور اكلات..



فيدوني بهالنقاط خواتي :ada:

 

[أمواج البحر]

شوفي حبيبتي

اول شي لازم تحددين انتي وريلج شنو تحبون عشان تعرفين شنو تشترين من الجمعيه

باالنسبة لصدور الدياي اخذي الباكيت الصغير هذا يكفي لوجبه وحده

اعتقد انتي تاخذين الجيس الكبير

بالنسبة للخضره .. انا اللي اخذهم وما يختربون بقدونس و كزبرة و اشبنت >>> هذيل افرزنهم

فلفل اخضر .. بطاط ... بصل ... ثوم ... ملفوف ابيض (لهانه) .. طمام ... خيار ...هذيل ما يختربون بسرعه

اي شي ثاني اشتهيه اشتريه بوقته مثل الخس يظل عندج اسبوع تقريبا عقبها يبتدي يخترب

وبالنسبة للأكلات ماشاء الله المنتدى متروووووس اطباق وما تحتاج عيش

انتي حوسي فيه وطبعي الاكلات اللي تعجبج

وان شاء الله باجي البنات يساعدونج

 

[الغشمريـــه]

انا مثل حالتج وبسكن بشقه بروحي

 

[غلاتي غلا]

احسن حل الطمام تاخذين كرتون صغير لان اغلب الاكلات تعتمد عليه سواء ريوق عادي او حمس للغدا والعشا
ثاني شي الباجي كله بالكيلو عشان مايخرب
بالنسبه لج اخذي بصل طماط فلفل بارد ملفوف ثوم هاذي الاساسيات
اوكي
بالنسبه للاكلات للغدا
عندج حمسه دجاج او همبرقر او صينيه دجاج((اسهل شي على وجه الارض))
معكرونه باشميل ولاتنسين خلطه كنور للبشمل تهبببببببل بس اخلطي معاها نص كريمه جمرا

وبالنسبه للدجاج
اخذي الصدور سواء كبيره او ضغيره براحتج وخليها للحمسان او اذا مشتهيه ستيك دجاج مع خظار او شبس وسلطه
وبالنسبه للصينيه ياتاخذين قطع الدجاج النها اسههههل حيل او دجاجه كامله وسط حجمها وتبليها ومع شويه صوص وخضار بطاط وطماط وفلفل بارد وبصل واتهى الموضوع

 

[سبيل المودة]

حبيباتي والله ماقصرتوا على هالنصايح الحلوة

اب اب

خلونا نستفيد من الخبرات

 

[الصعيريه]

الطبااخ شي سهل ولازم تعرفين انتي وزوجج شنو تحبوون بالضبط وعلى اساسه تجيبون اغراض المطبخ..
واذا عن الدجااج إخذي اللي تبينه والبااقي حطيه بالفريزر..
واذا عن الخضره هالفكره ماخذتها من امي .. يعني مثلا شريتي بقدونس وكزبره غسليهم عدل وقطعيهم صغااار واخذي الكميه اللي تحتاجينهاا واللي يبقى حطيه بجيس واحفظيه بالفريزر..

واذا تبين اكلات بسيطه وحلوووه انا تحت امرج عطيني خبر وادزلج وصفاات حلوووه وسهله انا مسويه كتاب مجمعه فيه وصفات ماخذتهم من الانترنت ..

 

[قمـة فے الانوثہ]

شوووفي قناة فتافيت مثلا المغرب او بالليل و من الاكلات اللي تشوفينها حددي شنو غداكم باجر ..
او حتى بس شوفي تاخذين افكار او تتذكرين شي انتي مسويته من قبل ..

و هم بالنت و انتي تطقطقين اي شي يعجبج سيفي بفايل عندج و سوييهم ..


و طبعا الجمعيه ..
قبل لا تروحين اخذي ورقة و قلم و سجلي كل شي تبينه حق الريوق الغدا العشا
خبز صمون توست كرواسون و كورن فليكس و هالسوالف
الاجبان و الالبان.. اخذي اللي تشتهينه
زيتون زعتر مرتديلا هوت دوج بيض ..الخ
عصير بيبسي

وحق الغدا شوفي على حسب الاكلات اللي بتسوينها
مثلا عندج الاشياء الجاهزه بس محتاجه قلاي
في اشكاااال و انواع و حتى مبين جنه انتي مسويتها و عاد انتي بدعي فيهم و يصيرون وجبه كامله

و الخضره اشتري الاشياء الاساسيه و اللي تحبونها
مثل : طماط , بصل , ثوم , فلفل اخضر , خس , بقدونس , كزبرة ..الخ
و اخذي على قدج لا تكثرين

و حتى الفواكه اخذوو على قدكم حتى لو تاخذين جم حبه عشان مايختبروون

و بجذي بتكونين خلصتي اغراض الجمعيه اللي انتو تحتاجونها يعني الشغلات الاساسية .. هذا اذا مانسيت شي


وشوي شوي بتتعلمين شنو اللي تحتاجينه و شنو اللي ماتحتاجينه

خلي بالمطبخ ورقه و قلم اي شي قلتي ويي ماعندنا هالشي اعرفي ان هالشي تحتاجونه فخلي مع قائمة الجمعيه

 

[خزااامى]

انا اقول تريقوا متاخر والعشاء تعشوا برا عشان تنحاشين من الطباخ هههههههههههههههههههه
مدام راسج وراسه عادي لاتكثرين المشترى لان راح يخرب وحرام كل شي اشتري شوي
يعني الباستا مايبلها شي وحمسات هم وسلطات وشوربه احمدي ربج ما يحب العيش لان العيش صج تضبطينه بالبدايه
قزريها على السندويشات همبرجر ستيك وهلما جرا هههههههههههه الله يعينج لايكون من النوع الاكول جان توهقتي

 

[ناسي626]

هههههههههههههههههه انا راي مثل خزامى لان كنا جذي اول ايام العرس ريوق مصييف وعشا بره وبالليل خرابيط كيك وعصير وشبس وكاكاو واذا جعنا همبوجر وناجتس وبطاط كله قلاي او نودلز وسلطات كل هذا ما يبيله شطارة

 

[كويتية ذهب]

ررررررفع

 

[يتيمة العقـد]

هذي المشكلة تلاقون الام تركض فبنتها من سوق لسوق وتجهزها من الى واهم شي لقمة الزوج ما تعلمها ، وتكون جاهله بالمطبخ وفنونه فجأة تلقى العروس فاتحه حلجها اذا قاللها زوجها بذوق طباخج الحلو يا حلو ...............