عشقي الاولِِي ساعدووني رجاءً

[جوري ونرجس]

مثل ما تلاحظون من العنوان حبيبي هو الكتاب من عمر ستة سنوات وانا اعشقه وعودتني امي عليه كانت اتودني المكتبة واتقولي اخذي الكتاب الب يعجبج كنت اطير واعيش بعالم من الخيال والسعاده بين سطور كلماته واحس روحي مميزة وجميله وانا اقرى
ما ادري ليش

ليمن تزوجت طلع زوجي ما يحب يشوفني اقره مع انه يقول للي حوالي ماشالله زوجتي علاقتها بالكتب وايد عاجبتني
بس ما ادري ليش يغار اذا مسكت الكتاب وبديت اقره فيه
حتى معرض الكتاب صارلي 4 سنين مو داشته ما ادري ليش جذي
انا اليوم بحط النقاط على الحروف وبقوله انا مو مقصرة معاك ولا مع بيتك واعيالك ولا اكلك
ابي يوم بالاسبوع اقرى واستانس بالي احبه من غير لا اتضايقني
ابي اخذ ولدي مهاي المكتبة واشتريله واعوده على الكتب ابي يعيش العالم الي كنت اعيشه ابي يكتسب افاق واشياء محد يقدر يعلمه اياهاالاالكتاب
وحابهاتساعدوني ابي اسويrefrash حق ذاكرتي وابي اسماء كتب قريتوها وتنصحوني فيها
للعلم انا اقرى كل شي وبعدين اصنفه وشكراً
سااااعدووووني

 

[زوجي توأم روحي]

سبحان الله

كأنج بالضبط تتكلمين عنى وعن زوجى !!!!

 

[جوري ونرجس]

يعني مو بس انا الي اعاني

 

[ليلو جبريت]

حبيبتي دشي المواضيع الي في القسم وشوفي الكتب الي نتكلم عنهم ورتبي لج قائمة

انا دوم انزل صور مشترياتي من الكتب وعندج موضوع كتب انصح بها وكتب لا انصح بها

ابتدي من الاخير

 

[جوري ونرجس]

مشكورة حبيبتي
راح اشوف مو ضوعج السابق واشوف الكتب الي تنصحيني فيها

 

[عادت ذكرياتي]

في جم موضوع هني بالقسم لكتب منوعة


ربي يوفقج حبوبة

 

[جوري ونرجس]

حبيبتي تسلمييين

 

[:: Diva ::]

انتي تعاليه من وين ما يتأثر
لو على الدين ففي وايد نصوص تحث على التعلم
و تمدح رفقة الكتاب بسوي بحث مبسط

حاولي تجذبينه الى الكتب
شوفي شنو اهتماماته ..

لقيت لك كتاب عن الرياضه مثلا تخيل ان و سطري له معلومات تهمه
لما يكون موجود لا تمسكين الكتاب جدامه لا يحسبج تعطين هوايتج من وقتج على حسابه و حسب البيت
خلي القراءه لما ما يكون موجود او قبل النوم يوم اليهال خلاص ناموا و ريلج يبي ينام

لا يمسكها عليج
و امج سبحان الله مثل امي من كنت بالروضه
كانت تشتري لي قصص الاطفال البارزه و الورق المقوى
تذكرين قصة ليلة و الذيب بس كان اسمها ذات الرداء الأحمر
و قصة الحذاء الاحمر
و بياض الثلج
بعدين ابتدينا بالسلسله الخضراء عقلة الاصبع و الشاطر حسن و الجزيره المسحوره و جزيرة الكنز
مع تطور العمر تطور الكتب الي كنا نشتريها او تهدينا اياها


اليوم الفضل كله لامي
انتي ان رديتي لعشقج الاول راح تستفيدين
و تفيدين عيالج و بيتج
ما في احلى من الام و الزوجه الواعيه المثقفه


موفقه حيبيتي و قولي لي شيصير معاج

 

[جوري ونرجس]

مشكورة ديفا والله سويت بنصيحتج بس ييتله بعد من باب القشمرة اقوله انا قررت ولازم اتوافق
اني بروح المكتبه مرة بالاسبوع واخذ ولدي معاي عشان يستفيد
وشريت حق ولدي كتب تعليميه قصصيه مناسبه لعمره واستانس عليهم اشوفه يمشي وماسك الكتاب بايده بعد عمري وريلي استانس بعد لم قعد ولدي يراويه الكتاب
وانا بديت على استيحاء وشريتلي روايه وحده اسمها دماء وابناء جميله ومثيرة فيها عبرة حلوة

 

[:: Diva ::]

برافوووو عليج
وااايد حلو الي سويته
خذيتي اول خطوه صح ان شالله تكملين طول الطريج بهوايه راقيه هوايه مافي منها
و اهم مافيها ان وليدج بيستفيد ان شالله

 

[3oosh <3 MJ]

شكلي باضرب عن الزواج عشان لحد يتدخل في كتبي
الله يعينج حبيبتي، بس انتي حاولي انج تصرين على القراءة، يمكن اذا شافج مصرة يتغير موقفه
خصوصاً انه كان يمدح سالفة انج مثقفة وجذي ..
انا انصحج تنوعين من الكتب، لاتقتصرين على مجال واحد بس
وبحاول اكتب لج لستة عن الكتب اللي حبيتها

 

[جوري ونرجس]

شكلي باضرب عن الزواج عشان لحد يتدخل في كتبي
الله يعينج حبيبتي، بس انتي حاولي انج تصرين على القراءة، يمكن اذا شافج مصرة يتغير موقفه
خصوصاً انه كان يمدح سالفة انج مثقفة وجذي ..
انا انصحج تنوعين من الكتب، لاتقتصرين على مجال واحد بس
وبحاول اكتب لج لستة عن الكتب اللي حبيتها

لااا لا تضربين عن الزواج حبوبه بسبتي
انا اتحمل جزء من الغلط لاني اهملت هوايتي
وركزت على الزوج والاعيال والمسؤولية في البيت
بس الحين اوتعيت واشتقت حق الشعور الي يمتلكني وانا امسك الكتاب
بس الحين امسك الكتاب بايد وبنتي 3 شهور بالايد الثانيه
لانه اما اذا حبيت كتاب وعجبني اتعلق فيه وما اقدر اخليه
بس بحاول اخلي قرايتي بس لمن ريلي يطلع لشغله او النادي او قبل النوم
وحبيبتي ناطره نصايحج عن الكتب 

 

[3oosh <3 MJ]

موضوعج خلاني اهتم اني ما اهمل هواياتي مهما كان ..

تفضلي اللستة:
.. الروايات ..
بائع الكتب في كابول - آسني سييرستاد
عاملة المنزل - كاثرين ستوكيت
كفاح طيبة - نجيب محفوظ
سعار - بثينة العيسى
إله الاشياء الصغيرة - أرونداتي روي
طعام.., صلاة.., حب.. - إليزابيث جيلبرت
الارجوحة - حمد الحمد
رياح الشرق رياح الغرب - بيرل باك
ماض اخجل منه - جميلة جمعة

.. منوعين ..
الاوغاد يضحكون - عبده خال ( قصص قصيرة )
ذاكرة من احزان - محمد خليفة ( شعر ونثر وقصص قصيرة )
أحلام من ابي - باراك اوباما
احلى ما قيل في الامهات - ايمان البقاعي
ليالي ونزوات فاروق - سيد صديق عبدالفتاح ( عن الملك فاروق )
دواوين نزار قباني - أمل دنقل - أحمد مطر
ضحك كالبكاء - نور الدين الهاشمي ( قصص قصيرة )
9 شخصيات 9 طرق للنجاح - رينيه بارون & اليزابيث واغيليه ( يخليج تعرفين شخصيتج وشخصيات اللي حولج )
سيطر على حياتك - ابراهيم الفقي (تنمية الذات)
وبس ..

 

[بهبهانيه]

امبيه ...نفس بنت خالتي تموت عالكتب
وريلها يجن يوم يشوفها ملسكه كتاب
يقول لها يعلمونج علي
وكله تعاني معاه

 

[Reema_kuwait]

كتاب ياسر حارب بيكاسو وستارباكس..جميل انصحك بقرأته والقراءه شيء جميل تغذيه للروح الله يوفقج ويحقق لج احلامك

 

[دلوعة أبوهآ]

كتاب ياسر حارب بيكاسو وستارباكس..جميل انصحك بقرأته والقراءه شيء جميل تغذيه للروح الله يوفقج ويحقق لج احلامك

شفت هالكتآب ولفتني عنوآنه
بس ماشريته !!
حمستيني عليه


إن شاءالله بشتريه وآقراه :eh_s(17):

 

[قسى قلبه وخلاني]

شكو هالرياييل يحشرون انفسهم بكل شي