علامات دكاترة الولادة الاستغلاليين و التجاريين

[Aloe Vera]

السلام عليكم


بنات الدكتورة شلون تعرفون استغلالية او لا؟

هذي علامات من رايي بالدكاترة الاستغلاليين او التجاريين و انتو شرايكم؟


اول شي يكون عندها مراجعات فوق طاقتها و تحسين بالضغط بعيادها و مواعيدها بعييييدة و صعبة و غثيثة
و ساعات عندها دكتورة مساعدة عشان الضغط الهايل من المراجعات
تحاليلها وايد و سوناراتها اغلى من باجي الدكاترة!
تحرض على الولادة قبل اوانها يعني تشجع الوحدة تدخل ولادة و اهي مافيها بوادر ولادة فا بالتالي تزيد احتمالية المضاعفات و طلق صناعي و ابرة ظهر او بيبي يتعب او يدخل شيشة او قيصرية هذي كلها من نتائج استعجال الولادة اللي ما حان اوانها
تولد حسب جدول اعمالها
اذا بتسافر تولد اللي داخلين شهرهم جذي عشان ماتطوفها الولادة و تخسر
ما تنطر الوحدة تكمل شهرها لازم تولدها قبل لاي سبب من الاسباب المهم تولدها
سعر الولادة مالتها اغلى من غيرها و التجميل عندها والتضييج اجباري و ما تستشيرج فيه
مع ان الشق و الخياط شي قلييييل بالدول الاجنبية شمعنه !!
و تحسسج ان الولادة الزينة بايدها و الخياط الزين عندها و بس!
في الغالب تكون استشارية و تستقبل جميع الحالات حمل سليم او حرج
مع ان بالدول الاجنبية الاستشاريين لحالات الحمل الحرج فقط اما حالات الحمل السليم دكتورة او ممرضة او قابلة تقدر تقوم بالمهمة



للاسف هذي النوعية موجودة عندنا بالكويت بكثرة

و انا قررت بحملي الثالث اني اقاطعم و الله رزقني احلى رحلة حمل و ولادة هادئة و مطمئنة بعيدة عن زحمة و شوشرة هذيك العيادات!

انتو شرايكم؟
وشنو بعد لاحظتو عليهم؟

 

[Aloe Vera]

و بنات رجاءاً من دون ذكر اسماء الدكاترة

 

[مذهلة2013]

اولا مشكوره على هالموضوع الحلو
بصراحه وايد متنشر هالنصب خصوصا اغلبهم حريم
والله شكثرررر!!!! انا كرهت الحريم من هالسبه
وراح اقولكم امثله والله العظيم صج واقرب الناس قالولها لي
1- في دكتوره غصبن عليج قبل مااتدشين لها تسوي لج تحليل بول
وتحسبه بمبلغ فلاني!!! طيب انا ماافيني شي ليش اسوي غصبن
عليج تسوين !!! مو حرام هذه بدايتها جذي!!

2-في وحده اعرفها حامل بتنونز وراحت لدكتوره فلانيه
ببدايه الحمل وخذت سعر السونار بمبلغ ...وراجعت بعد مده
جان تقول لها لا السونار الحين اغلى لانه اليهال اكبرو !!!!
الحمدلله والشكر


3- دكتوره مااحضرت العمليه وحضرت مساعدتها وبالحساب
حاطين حساب الدكتوره الي ماحضرت !!! هالكلام من وحده وياانا بالمنتدى

الحمدلله الحين اراجع عند احد مرتاحه وااااااااااايد ومو تبع هالنصب

 

[Aloe Vera]

عدل كلامج مذهلة


انا راجعت عند دكتورة مو استغلالية سعر تحليل البول من ضمن سعر المراجعة و سعر السونار ماتغير طول الحمل
و سعر الولادة ارخص من غيرها معنها ممتازة

 

[مــتــنــحــة]

كل هالسوالف متوفره عند الدكتورات الحريم

ماراح اقول الكل بس تاكدوا انه الاغلبيه

والدليل ان لما تدشين عليها حتئ ماتعطيج حقج بالوقت اللي انتي اصلا دافعه فلوسه!!!

تلقينها تركض ركض بالسونار والمادري شنو دقيقه الا اهي مقضبتج الباب !!

تكون عندج اسئله او شغلات صايره لج تبين تستفسرين عنها بس تصرقع الوحده وتخليها تنسى شتبي ؟

والتحاليل اللي تطلبها منج تقراها وتقطها على صوب !

زين فهميني شنو بالتحاليل اللي طلبتيها حق شنو ليش ؟؟ تقول كل شي سليم

وتسوي السونار عالصامت اغلب الوقت كان الموضوع كله يتعلق فيها

انتي مالج وجود ولا ضروره ! المهم هي تشوف هي تعرف هي تدري وانتي مثل الاطرش بالزفه !

انا بعد مقاطعتهم بالثلاثه .. بس مضطره ارد لهم وقت الولاده لان حرام تولدين عند دكتور

 

[حمرة الورد]

انا كنت اراجع بعد جان يقولون لي صعدي الحين فوق سوي دخول عندج حمل خارج الرحم لازم ينزل البيبي بسرعه انا عارفتهم عدل هالمستشفى جاان اطلع منهم والعصر اروح لدكتورتي زفتني وقالت كله جذب يبون فلوس مافيج الا العافيه وحمل خارج الرحم الم ماتقدرين تقعدين وصوره التقرير وقالت يمكن الله يهديج وتروحين تشتكين عليهم الحيوانات والحمدلله كمل حملي وجبت ولدي مافيه الا العافيه

 

[Aloe Vera]

متنحة


انا راجعت عند دكتورة لبنانية و ولدت عندها ماشفت منها الا كل خير صبورة و ما تستعيل و هادية



و ترا هم في دكاترة رياييل تجاريين بس مو كثر الحريم

 

[قرمووشه]

حرام عليهم اللي يولدون المره وهي ماافيها لا طلوق ولا شي
قطيعه شكثرهم اللي يبون الفلوس ومايهتمون بصحه المراجع
وهلكلام مو بس لدكاتره الولاده
لجميع الدكاتره حسبي الله ونعم الوكيل

 

[سـٌگر معـقـود]

والله كلامج عدل وتعبنا نقاطع شنو ولا شنو محدودين عليهم

في دكتوره من هالنوعيه حاطه اعلان عند الرسبشن " مع كل موعد تحليل بول كرمج الله وتحليل مادري شنو وهذا اجباري ماذري شنو " يعني لاتناقشوني فيه

قبل لا تدخلين تشوفينها تسوين هالتحاليل !! وغير اللي ماشبعت شفط والمره دخلت التاسع جربت تولد وتفلس منها خلاص فقامت تعطيها كل اسبوع مراجعه تخطيط كل انواع التحاليل واشياء مالها داعي
ولما ترفض تقول ها كيفج ترى على مسؤليتج جنه البيبي فيه شي ! واهو مافي الا العافيه


الله يبعدنآ عنهم ويرزقنآ الامينين النصوحين

 

[لوولوو_88]

انا قبل ما احمل يوم افحص طحت بدكتوره جذي كتبت لي تحاليل و تعاليلي كل أسبوع أو لا رحت قالت تعالي بعد يومين استغرب و ما تعطيني لا حق ولا باطل أطر الحجي طر منها ابيها تشرح لي اطمني ماكو لا وعلاجها نفس ويها يوم رحت دكتوره ثانيه انصدمت و قالت ما فيج شي مالت حتى مالت ..

الحين انا عند دكتوره هندية و مو مشهورة و مرتاحه معاها قالت لا تيني إلا بعد اسبوعين و عطتني رقم تلفونها أبلغها بالتطورات جد فرق عن المصريه ..

و نصيحه بنات استخيرووو ابدايه حملكم و الله يسهل

 

[Aloe Vera]

صح لاحظت عليهم اسلوب التخويف كله البيبي تعبان و لا وزنه مو طبيعي و اهو مافيه الا العافية


و في وحدة دكتورة تقول لها انتي ثقيله دخلي ولادة خل اولدج ترتاحين من الثقل!!!
و اهي توها ما كملت شهرها و ما اشتكت لها و لا فيها شي
و تدخل ولادة و تشتغل عليها مابقا طلق صناعي و تحاميل و تبربس لين خلاص استعسرت الولادة جان تحولها قيصرية!!

 

[Aloe Vera]

و هم اعرف وحدة ولدتها دكتورة مشهورة و سوتلها تضييج و تجميل بدون لا تشاورها و لا تستأذن منها و النتيجة عوار مو طبيعي بالجماع لمدة سنة و اهي تتعذب
انزين التضييج مايناسب الكل و في ازواج ما ببون ليش غصب تسويه؟ عشان الفاترة

 

[مذهلة2013]

وجم دكتوره تتاخر عن موعد الولاده
والله اعرف وحده قاعده تولد وطلع راس البيبي
والدكتوره مايت والسسترات والله العظيم يصكرون ريولها
ويدخلون راس البيبي!!عشان الدكتور تولد وتاخذ الفلوس
!!!! وبالاخير صار لها انفجر رحمها ودخلوها عمليه

 

[حمرة الورد]

ياساتر حسبي الله عليهم

 

[Ranoon]

دام دكاترة استغلاليينوما خافوا من ربهم
ويتاجرون بالبشر


ليش ما تذكرون اساميهم
هذي جريمة مو بس نصب
حسبي الله ونعم الوكيل


ما شبعوا فلوس همهم الدنيا

 

[مناوووي]

الله يكفينا شرهم

 

[Aloe Vera]

رنون


الزين في هالدكاترة يخافون على سمعتهم يعني ما يضرون الوحدة بشكل مباشر عشان جذي ماشي سوقهم يعني بامور الولادة مافي احد يقدر يرفع قضية ان والله المرا تعبت بولادتها او ان طلعت الفاترة غالية او ان شقتها و اهي مو محتاجة مثلاً مافي عشان جذي اهي ما تعتبر جريمة حسب القانون ماحد يقدر يمسك عليهم شي
و الناس اللي ماتفهم بالامور الطبية و امور الحمل و الولادة بسرعة ينقص عليهم او يصدقون لو تقول الدكتورة بيبي تعبان او شي علطول او ساعات مايروحون يشوفون راي دكتورة ثانية يكون عندهم ثقة عمياء يعني حسب

 

[ريتاج_90]

الله يكفينا شر هالدكاترة التجاريييين
والله يهديهم ومايتأجرون بالبشششر
ومذهلة سالفة اللي تولد ويسكرون رجولها حرام عليهم
بسس صجح ماعندهم لاذمة ولاضممير اذو المرة والبيبي

 

[!الجادل الصعب!]

ولله موضوع مهم بس بدون ذكر اسماء صار موضوع تخويف و بس

الي لها تجربه تذكرها مع الاسم مفروض عشان خواتنا الحوامل يحتاطون منهم
والا شرايكم ؟

 

[Sol6ana]

افضل المراجعات الحكوميه شهريا تحليل بول يشوفون نسبة السكر والزلال ويقيسون الضغط ويسمعون دقات الجنين من غير سونار وبالشهر الخامس سونار واحد عشان يشوفون الجنين ووضعه موعشان يقولون لج شنو نوعه واذا سالتيهم عن النوع يعلمونج وسونار بالشهر السابع بس ولما تدشين التاسع يحولونج من التخصصي مال منطقتكم لي مستشفى الحكومي التابع للمنطقه ويكون المراجعات سبوعيا وطبعا نسيت اقول ياخذون تحاليل شامله مرتين اول مره بالشهر الثالث ومره بالشهر السابع موذاكره بالضبط بس اتوقع بهالشهرين وكلا فبلاش ودقيقين ويعلمونج بكل شي مونفس بعض المستشفيات اذا في شي اسكتو وثاني شي اذا دخلتي شهرج وحسيتي بالولاده واعراضها تقدرين تروحين للحكومه يفحصونج ويشوفون الوضع اذا الرحم مفتوح او هذي علامات الولاده وحابه انج تولدين بالخاص روحي الخاص او اذا حسيتي ان صج هذي الولاده والطلوووق او ماي نزل او دم وخلاص يعني واثقه ان ولاده وحابه تولدين بخاص روحي وبعدين تأكدين ان التساهيل بيد الله سبحانه لا الدكتور ولا المكان
لاتعبين نفسج بالمراجعات بالخاص وكلها مراجعه والحكومه الحين في مراجعات صبح وعصر وشهريا تحسين انج رايحه لمعنى مو مثل الخاص اغلب زياراتج لهم سونار