عندج استشاره قانونية -اتفضلي

[المحامية هبة السهلي]

هلا فيكم بنات عندي ملاحظة :
لاحظت ان الاغلبية ما اتحط اسئلتها على العام مع ان هويتها غير مكشوفه يعني اذا كتبتي مشكلتج او سؤالج محد بيعرفج ولان هذا الملف لا يثرا الا بالاسئله فانا ودي اطلبكم انكم اتحطون اسئلتكم واستفساراتكم اهني عشان الكل يستفيد

علما باني ما افضى مرات اشيك على الخاص فيكون الرد اهني اسرع

ارحب بكل البنات اللي حابين يستفسرون على العام او الخاص مع تحياتي

 

[Swan]

انا عندي استشارة ما عليج امر ليش ما عندي خبره بالمحكمة الادارية

اتوقع تعرفين قرار الكادر للمحامين والمهندسين اللي نفذوه قبل سنه ؟ طبعا فيه فقره تقول ان احنا ما نستحق اي زيادة ثانيه إلا اذا كانت اعلى منها وما نقدر نجمع بين هالزياده واي وحده ثانيه..
الحين انا اشتغل بالداخليه ونزلوا لنا الكادر بس بعدها بسنه نزلوا قانون المساواه بالعسكريين وحددوا بالقانون ان اللي ياخذ كادر التخصص له مبلغ معين يختف عن اللي ما عنده كادر بس المبلغ اقل من كادرنا ...

المهم ان الادارية بعد ما وصلها القانون اليديد دزت كتاب حق الديوان يقول بما معناه ان هالقانون اليديد يتعارض مع القديم بالفقره الخاصه بالكادر وان المفروض ما نستلم اي مكافأه ثانيه ... وعلى فكره الموضوع كان يتعلق بالداخليه والدفاع ... والديوان رد عليهم بعدها انهم بحثوا الموضوع وقالوا بأن هذي الفقره تنلغي للداخليه ونستلم الكادر الاولي بس من غير الكادر المساواه !!! والدفاع لي الحين قاعدين ينزلون لهم الاثنين !

وبعدين انا لما سألت بأماكن ثانيه لقيت انهم موقاعدين يطبقون القرار صح مثلا العدل قاعدين يتسلمون الكادر وزياده ثانيه خاصه بالوزارة .. نفس الشي بمجلس الامه والجامعه ..

اللي اعرفه ان القانون اذا نزل بعده قانون معارض فهو يعتبر كأنه تعديل عليه صح ؟!
وهل ممكن يتعدل القانون مادري بكتاب عادي ولو انه صادر من نفس الجهه؟؟
وشنو نقدر نسوي بهالحاله اذا كان لنا حق بالزيادة مالت المساواة ؟

وسوري على الطواله بالموضوع بس حبيت يكون كلامي واضح

 

[المحامية هبة السهلي]

سوان حبيبتي اول شي قراراتكم وتطبيق لقوانين بوزارتكم الاسوأ بلا مبالغه واكيد انتي تدرين بالهشي

الكادر خلق مشاكل كثيره والديوان حسمها مؤخرا للجميع بان اللي يستحق كادر القانونيين ما ياخذ كادر اخر معارض يعني يا هاذا او ذلك والجهات طبقت القرار كلن على حسب وضع موظفينه ولي الحين في جهات ما استلمت الردود على استفساراتها

بشؤون القصر مثلا وقفوا الامر لحين فصل ديوان الخدمه ولما يا هم الرد اصرفوا كادر واحد فقط ، وايضا الهيئة العامه للمعلومات المدنية بينما وزارة المالية سوت طريقه بحيث انها تفيد موظفينها قالت نصرف اي الكادرين اعلى وهكذا

يعني المسأله فيها سوء تطبيق ولي الحين ما انتظمت

اما ردي على اسئلتج

 

[المحامية هبة السهلي]

اللي اعرفه ان القانون اذا نزل بعده قانون معارض فهو يعتبر كأنه تعديل عليه صح ؟!
وهل ممكن يتعدل القانون مادري بكتاب عادي ولو انه صادر من نفس الجهه؟؟
وشنو نقدر نسوي بهالحاله اذا كان لنا حق بالزيادة مالت المساواة ؟

حبيبتي اذا صدر قانون خاص فهو يقيد القانون العام اما سالفة القوانين المتعارضه فيجب تعديل احدهما صراحة او تنظيم المراكز القانونية بقرارات تنظيمية تبين مجال ونطاق كل قانون

القانون يعدل من نفس الجهه اللي اصدرته والجهه اللي تصدر القانون هي السلطه التشريعيه فقط اي مجلس الامه

اما المتضرر فعليه اللجوء للقضاء لحسم مسألة حقة بالزياده يعني يرفع قضية امام المحكمه الدائرة الادارية ويطالب بحقه اذا كان حاس انه له حق

طبعا هذا جوابي بشكل عام بدون الاطلاع على الاوراق وبدون قياس وضعج بالضبط و بدون معرفة القوانين المتعارضه اللي تكلمتي عنها

 

[Swan]

اي والله صاجه محامية الوزارة حدها خواره من كل النواحي .. الله يعينا عليها
ومشكووووووورة على الرد
في ميزان حسناتج ان شاء الله

 

[فتون علف]

السلام عليكم

اختي اذا اثنين من المذهب السني حصل بينهم انفصال وماعندهم عيال والمرة طلبت نفقة وطلاق
شنو حقوقها اللي تقدر تاخذها من الزوج؟ علما بأنه مقتدر وماعليه قاصر غني يعني وهي طالبة بجامعه خاصة وهو كان يدفع تكاليف دراستها
هل لها حق تطالبه بدفع باقي التكاليف لين تخلص؟
وهل يحق لها ان تطلب سكن او مبلغ بدل سكن؟
وهل يحق ان يوفر لها سيارة مثل اللي عندها عيال ويعطيها القاضي حكم يلزم الزوج بتوفير سيارة وسايق؟

 

[المحامية هبة السهلي]

فتون علف

المطلقه اذا لم تكن حاضنه لاطفال لها نفقة زوجيه مؤقته الى ان تطلق ولها نفقة عدة ومتعه ومؤخر صداقها ، اما باقي الامور مثل مصاريف الدراسه والسائق والخادمه يحكم فيها القاضي للمطلقه بصفتها حاضنه لاطفالها

هذا بشكل عام اما اذا كان الزوج متعهد بالتزام بالصرف على دراستها او غيرها من الالتزامات هذا وضع اخر

 

[فتون علف]

مشكورة حبيبتي على سرعه الرد ماقصرتي

 

[ام مشعل العتيبي]

رفيجتي ابوها وكل ولده وكاله عامه بس مايصرف على اهله ولاعلى ابوه ولا على البيت مكوش على الحلال
وابو ه رجل كبير بالسن وتعبان حيل
شنو الحل بالنسبه لمشكلتهم ويعطيج الف عافيه

 

[المحامية هبة السهلي]

هلا حبيبتي ام مشعل اذا كان الاب بصحته يجب عليه ان يلغي الوكاله ويعلن الوكيل رسميا بهذا الالغاء

اما اذا كان الاب تعبان فليس لهم الا رفع قضية حجر عليه وتعين اما احد ابناءة وصي عليه او الهيئة العامه لشؤون القصر كوصيه طبعا القاضي اذا طلب المدعين بدعوى الحجر تعين الهيئة راح يستجيب فورا لانها الجهه المسؤوله قانون عن الوصاية على القصر والمحجور عليهم والمفقودين

ومن ضمن القضية يطلبون الغاء الوكاله العامه الموجوده بالفعل للابن

ودمتي

 

[قهوة عربية]

يزاج الله خير محاميتنا

أنا ماعندي استفسارات ..بس كل شوي أدخل عشان استفيد

بارك الله فيج وفي ميزان حسناتج آمييين

 

[المحامية هبة السهلي]

الله يسلمج قهوه عربيه والله ما حد امشجعني استمر الا دعواتكم الحلوه لا خلا ولا عدم

 

[سعبولة نحله]

ماعندي أي استفسار
بس حبيت أقولج




ربي يسعدج دنيا وآخره لمجهودج حبيبتي انتي:eh_s(17):

 

[تشتوشا]

السلام عليكم محامية انا عندي مشكلة اخوي مطلق وعندة بنت في حال زواج طليقته هل تذهب الحضانة لامها مع العلم ان لديها حضانة طفلين لاخت طليقتة وأنها تعاني من مرض مزمن وتأخذ ادوية تجعلها نايمة طول الوقت في هذي الحالة يمكن ان يحصل على الحضانة والمذهب السني ومشكورة .

 

[المحامية هبة السهلي]

تشتوشا

ينص القانون على ان الحضانه للام بالمذهب السني الى ان يبلغ الولد مبلغ الرجال والبنت تتزوج وتدخل دخولا صحيحا

اما اذا تزوجت الام فان الحضانه تذهب لامها طبعا اذا طالبت ام الام بها ثم لاهل الام اي الخاله وما الى ذلك

ومن حق الاب ان يطالب بحضانة ابناءة وان يثبت عدم كفاءة ام الام لها بكافة طرق الاثبات عزيزيتي ويبقى الفصل للقضاء في هذه المساله وان كنت مع ان الاب يحاول بكل طريقه رضاءا او قضاءا في كسب الحضانه اذا احس ان الاطفال سيتضررون

 

[تشتوشا]

مشكورة حبيبتي على الرد السريع

 

[^DanaH^]

أنااااااااا عندي مشكلة معوره قلبي ... محاميه راح ادعيلج اذا حليتيها...

الله يسلمج طحت على خياطه (حسبي الله ونعم الوكيل) قصت علي سوتلي موديل وخلتني ادفع المبلغ كله تقريبا 200 دينار وعقب ماشفت شغلها لبدلة اختي غيرت راي وقلتها ابي فلوسي قالت لي العربون مايسترجع!!! واهي ماخذه المبلغ كاااااامل صارلي جم شهر لاخيطت عندها ولا خذيت فلوسي يعني خذت الفلوس وبس .... شنو الحل؟؟؟؟

 

[sara3]

هلا واللة بمحاميتنا عساك على القوة

ذكرتى ان المطلقة لها الحق بحضانة الولد حتى بلوغة مبلغ الرجال يعنى تقدرين اتحددين العمر ؟ واذا كان القاضى اهو اللى يقرر يكون على اي اساس؟

وشكرا

 

[المحامية هبة السهلي]

هلا والله يا ساره

المقصود من مصطلح البلوغ ان تظهر عليه مظاهر الرجوله والقاضي هو اللي يحدد وان كان للقضاة نظره في هذه الامور واغلب الاحكام تذكر ان القاضي حس ببلوغ الولد من خلال ملاحظته الصوت والجسم واسلوب الكلام

 

[المحامية هبة السهلي]

طبعا الكلام السابق خاص بمذهب اهل السنه

اما في الجعفري فالامر مختلف

حيث ان حضانة الام المطلقه تكون للولد الى سن 7 سنوات والبنت 9 سنوات يخيرون بعدها بالمكوث عند الام او الاب