عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[jolie_q8]

الجبا شي بين القرع والكوسا...لاهو كوسا ولا قرع
انا اسميه كوسا لان لونه خضر بس يدتي تضحك علي اذا قلت لها كوسا
تقول هذي جبا ( كسره على الجيم )

ايييييييي عرفته عرفته ,, ايبونه من بريده ,, بس ماعرفت اسمه ,, وصاجه جنه كوسا بس مدلقم

انا حماتي تقولي اهوا بين القرع والكوسا ,,

عاد حطيته مع المرقة ,, شحلوة ,, مشكورة على المعلومة

 

[jolie_q8]

هذي الخضرا اللي اقصدها المدلقمة اللي تحت

 

[الصابرة المحتسبة]

مشكورة ياجولي على التوضيح بلصورة عساج ذخر يارب

 

[daloola]

حي مساكم
شلونكم ...عساكم بخير

ضمى الدهنة ويوع ام عامر؟؟؟؟ شنو يعني؟؟
انا خبري اليوعان كله يقولون له ( يوع ربوع )

 

[daloola]

يا حلوج يا جولي وين لقيتي الصورة
اشوة بردتي قلبي ...طلعتوا تعرفون الجبا
صبربر شعلومج؟
جاي الضحى واورنجيه تخفروا؟ ما يبينون

 

[الصابرة المحتسبة]

بخير عساج بخير انتي شلونج؟؟؟؟؟؟

ههه حلوة تخفروا توهم صغار

الدهنى صوب السعودية اذا مو غلطانه عند الصمان

 

[daloola]

هلا صبربر

اي قصدج الدهنه والصمان
حق الفقع

يطري علي اخواني راحو الصمان بالشتا....ماتو من البرد
اخوي كل يقول بيت الشعر على الصمان
يقول : لاصرت بالصمان والحر حاديك .....اترك حليب نياق واشرب ميرندا لووووووووووووووول


بقول لكم : الاول اذا البنت كبرت ( بلغت ) يخفرونها ...عاد يدتي كل تقول : بنتهم كبيرة تغسل ( تغسل يعني ياتها الدورة وتغسل عنها كل شهر)
عيب يقولون ياتها الدورة

وعلى طاري العيب...الاولين ذربين عيب يقولون عن الريال الكفيف ( عمي ) يسمونة جريم عين ( كريم عين) بس يقلبون الكاف جيم
مثل الكبيرة شلون نقولها جبيرة ... عسى فهمتوني

بعد
وين غطاويكم
يسلمج جولي نبي حزاوي والا غناوي
بنيتي ام 4 اشهر ودي انقزها واغني لها ماني ذاكره الا ( ياعصاقل يامصاقل حبكم بالقلب صاقل )
ابي حزاوي حق الكبيرة وغناوي حق الصغيرة يالله ورونا همتكم

جاي الضحى شلون اميمتج؟ عساها اشوة

اورنجيه اظنتي سافرت.... كلش ماتبين

 

[الصابرة المحتسبة]

ههه ميرندا

الله يادلول امي تنغز عيالي وتقول: عطيتونياه مفصخ وتاخذونه بهديماته

" من ابغضك\ج مات ولاقرى التحيات جعل نسله بنات ولي جاه الولد مات
ولي بتنوم الصغيرين قالت
هوها ياهوها والكعبة بنوها سيدي سافر مكه يجيب ثوب العكه ويحطه بالصندوقي وكملي

وهلا هلاوين بنوارت العين مضاوي مرة والنوري ألفين

ولي عطس الجاهل : عشت وعشعشت ولبست البشت

 

[jolie_q8]

زين طلعت هذي الجبا ,,, والله خوش معلومه انا سميتها كوسا القصيم

وعلى الغناوي للاسف انا وايد نسايه ,, بس بحاول اذكر ,,

مثلا على فطومه ,,

فطومه بنت ابوها ,, سبعه تخاطبوها .. واحد يعد الدرهم ,, واثنين ( ما دري شنو يسون حق ابوها ) لول

ثلاثه بالمسايد ,, يقولون يارب يسخر ابوها ,, ويوم سمعوا ,,, صراخ ابوها تناحشوا وخلوها ,,,,,, << ترى مو صراخ كلمه عيب لول


ونغني حق الياهل ,, مثلا حمودي وه وه ,, ما يشرب القهوة ,, وماعرف الباجي

اقولج شي اخترتي الشخص الغلط انا اكثر وحده تنسى

 

[جاي الضحى]

قوه كويتييات؛
عساكم بخير وعافية؟ :hjy5jewf:

كوساا القصيم :ggdw:.

بدال ما اقرها كسره على الجيم قريتها فتحة على جيم وشدة على الياء وصار الجواب لبس وسيع بدال كوسا القصيم. ههه. قواكم الله على التوضيح.

شفتو شلون قمنا ننسى يا خوفي لا تلاشى ذكرياتنا وتصير كلمة مو صج؛ مليق، زوالي اهي التراث ها جولي!!

صبوره إيه يدتي كانت تغني حق اختي واهي بالمهاد نفس الغنيه تقريباً؛ عشتي وعشعشتي وبيت أبوج نبشتي وبوقتي وإنحشتي بس جنى لبس البشت أحسن من بوق ههه.
دلوله الحمد الله أمي أحسن سئلت عنج العافية. صاجه قبل مو كل شي ينقال والبنت ما تكلم في كل شي خصوصاً الزواج؛ البلوغ ومواضيع من هالقبيل.

وعلى طاري غناوي; أول الموضوع كوفي الله يذكرها بالخير حطت جم وحده كاني بحط الرد عشان عوينات بزه. هههه. لا أضحك. عاد أنا أحب هالاسم مو عشان الاسم نفسه بس لكونه إسم قديم كانو مسمين منه العايله الله يرحمهم برحمته.

هلوووووووووووو بجاي الضحى القمر قريت القبس وذكرت موضوعج واخترت احط منه من اللي امي تقوله

هلا هلا هلي لي
وأخذي الصحن وغني لي
وان جان احد غمز لج
تعالي وقولي لي

خفيفة وجنها ريشة
من قلة المعيشة
ومثلك ومثلك ما يابوا
لو حندبوا لو شابوا


http://www.alqabas-kw.com/article.aspx?id=438755&date=18102008

بييب لكم طاري الحمير أول والدكاتره.
قبل قبل وايد تشوفين حمير بالفريج يتخطرفون. ومره بذيج الأيام كانو ثلاثه من الأهل راكبين ثلاثتهم على حمار؛ ما يعرفون حق الحمير غشمه بس من الشطانه ركبوه و وباعدو فيه وايد عن شرق وعن أهلهم وبيوتهم واهم مو حاسين ومادري شصار جان يقوم يعفر الحمار عليهم ويطيح إلي كان بالنص وإلي وراه وتنكسر ايد إلي ورا ويقعد يفحط فقير من العوار وعلى الحمار يردون كل إلي مشوه بالساعات ليه شرق وتالي وودوه حق واحد ينقاله بو شعبول- كان بحسبة طبيب عندهم -ويجبر ايده المكسوره وبفضل الله وبو شعبول صارت ايده أحسن.

وعلى طاري الدكاتره مستشفى الأمريكاني كان من أقدم المستشفيات بالكويت أظنتي قبل مستشفى الأميري إلي تبطل بالاربعينات.

من تسولف لنا عن الحيامه والولاده قبل؟ سامعين سوالف من هالنوع؟

أنا أمي مسمينها على إلي مولده يدتي في أمي...أضحك مع يدتي مديم وأقول خلصت الأسامي يوم يت على أمي!! هههه.

ويات فتره يعني عقب ما قامت الناس تسافر وقامو يسمون عيالهم أسامي خفيفه عربييه يعني نبيل; هشام ; سامي وإلي خبركم. اتوقع بالستينات وبرغم هالفتره الحريم قامو يلبسون قصير ومزلط بس كان الاحترام سائد كل من لاهي بروحه وعلى النيات ماكو قلة أدب . إيه وجزء من الفتره هبو فيها الحريم في شي...البواريك. ههه. ​

 

[jolie_q8]

هلا هلا بجاي الضحى فقدناج من غير شر

يا حلوها غنيمه الفهد ,, شفتها ذاك اليوم بالافينوز وسلمت عليها

لقيت من الغناوي اللي نعرفها ,,

سبيكة بنت ابوها
سبعة تخاطبوها
واحد يعد الدرهم
واحد يحاجي ابوها
ويالله تسخر أبوها

صفاقة صفاقة
صفاقة حق البابا
ومن طرشته ما خابا

انقز إبيزه تنفع أمي
انقز بلاش اطقني أمي

هذي انا اغنيها حق عيالي اذا بدو ينقزون يسلم قلبهم ,,

خفيفة وجنها ريشة
من قلة المعيشة
ومثلك ومثلك ما يابوا
لو حندبوا لو شابوا

سعودي وهوه
ما يشرب القهوة
بساطين بصري
نص الليل يسري

يا عره اطلعي بره
عن اوليد خلق الله

هذي لازم نغنيها اذا عر الياهل ,,

 

[orangeya]

اهلييييييييييييين بنيات...

شلونكم؟ شخباركم؟؟

واي حده لويه هالايام ,,, مليت كله ركضه ركضه على ولا شي !!

بس تطلع مشاوير واشغال من تحت القاع...

الدنيا تلاهي مثل مايقولون.

وي صبربر بعد عمري جان بخت مسافره !! صامده بهالقيظ بهالجووول بهالغبار الجميل

الحمدلله على كل حال والله ترى رحمة الغبار لازم نحمد الله على كل حال

كافي انه يقلل درجة الحرارة.. وغبار احسن من عواصف وزلازل !

لي طلعت بره ماحس الا بذيك الـ وهياااا اللي تخليني اسيح الا انصهر بمكاني من الحر لاهوب

يالله انك تآجرنا من النار اللهم اميييييييييييييين


بناتوووووووووو

منهي تقولي شنو مرادف (بالعزر) نفس المعنى (بالقوترا) ..............؟

تعبانه وحالتي حاله بس قلت الا اشبك قبل لا انام اشوف احلى بنيات

 

[الصابرة المحتسبة]

هلا وغلا بالحبايب عساكم دووم متجمعين
جولي ماقصرتي
جويهه هلا وغلا نورتي
اورنجية ربي يعطيج الصحة والعافية

بالعزر مثل قولة يالله قدرت أسويه أو ألاقيه امي تقول بالعزر لقيناه.
امي تقول كانت ولادتج صعبة حيل وجدتي الله يخليها إهي اللي قطعت سري وأول ما طب بحلجي التمر تقول امي ما تسكتين لا إله إلا الله تبجين وصراخ ولي حطينا التميرات بحلجج سكتي<<<<<<<<< بطينية من صغري

 

[daloola]

الله ذكرتوني بالاغاني
احنا نقول : انقز نقيزة...اعطيك خبيزة
انقز ببيزة تنفع امي...انقز بلاش تطقني امي

هلا هلاوين...هلا بمغيزل العين
هلا بالناس نوبة ... وهلا بفطومة الفين

تقريبا نفس الاغاني باختلاف المفردات

اكو بعد ...فطومة من تمر..تراجيها الحمر...عزل بو الحلاوة ...بسط بو التمر

و عندكم .. فطومة بنت ابوها ..سبعه خطاب يوها ..واحد يعد الدزة... وواحد يحاجي ابوها ... ابي باجيها ماني عارفتها


اورنجيه : بالعزر يعني بالغصب ( بالموت على قولتنا )

جاي الضحى : الاولين هبوا بالميني جوب والدلعه الوسيعه والظهر كله طالع...وبيوت الحموله عشتو حريم الحما يتنافسون ..بس اذا دش العم والا الحما الكبير يستحون..عاد عشتو بيتغطون يلبسون ثوب تور يكون متسترين ...والا في وحده تقول من الحيا نقط فوطه على راسنا عشان حماي مايشوف شعورنا الريول والفخوذ ميخالف بس الشعر لأ .... مساكين على ويوههم


جولي : يطلع منج تذكري وسئلي بعد

صبربر : صاجه الاول اذا بيدعون على احد يدعون له بالبنات عشان ماييله ولد
واذا وحده يابت بنت كله يغنون عليها : واعليا واعليا ..يابت الحامل بنيه
عاد انا ماعندي الا بنات ياحلوهم والله

ذكرت بيت عمي يغنون : من يقول فطومة شينه...جعل العمى في عينه ...وسويرج في نخرة ... يموت مايوفي دينه

كل هذا عشان قالو عن فطومة شينه

اي واذا الياهل بدا يناغي نغني له : حاجينا من حجاياج...يعل الموت ماياج..ولا طرش مناديبه ...خذا الحساد وخلاج

والله طلعت الغناوي ...بدت بدت المواهب تطلع
بعد لاذكرت رديت لكم

 

[الصابرة المحتسبة]

هلا بالمهلي والشر عنا يولي

عسى ربي يبلغنا واياكم رمضان الله ياقبل شحلو رمضان مع انه بالغيض والحر بس له طعم وجو ثاني.

 

[جاي الضحى]

والله انكم عين السيح. ما شاء الله.

بردتو جبدي بالغناوي. ودي اطبع إلي كتبتوه وأجلد الأوراق واسمي الملف "تراثنا من ذكرياتنا: q8yat.net" واحطه بصندوق مبيت ما أطل عليه إلا عقب سنين إذا الله عطانا عمر!

ما تفقدين غالي جوليتنا,
زين سويتي سلمتي عليها؛ خلهم يحسون إن لهم ناس تحبهم واتابعهم.
ما قصرتي على الكلمات. صج كلمات من تقرينها تسرجعين ذاكرتج.
أخيراً تذكرت كلمات حمودي وهوه وه ما يشرب القهوه كنت أطق بريك لمن يشرب القهوه الحين بكشخ وبكلملها.. بساطين يسري نص الليل يسري.

أفندييا الله يعطيج العافية. أمين يا رب العالمين. بالعزر = بالزور; بالقوه؛ بالمشقه. انتي شنو الكلمه إلي في بالج؟


هلا والله صبربر. تمر ها؟! بسميج من يوم ورايح تميره. ههه

دلوله ما قصرتي. إيه ما شاء الله طلعت المواهب.
أقول إسم فاطمه قايم سوقه أول, كل الغناوي عليه. عندي خاله اسمها فاطمه ما قط ناديناها فاطمه كلا اناديها خالتي فطامي.
صاجه دلوله, أول المره تلقينها لابسه عباتها بس من يقلط الحما أو ريل اختها غطت ويها بالعباة وفجأه تشوفينها تكمكمت معنها أساسا بره البيت ما تلبس بوشية بس كانو يستحون أكثر من إلي يصيرون لهم. ههه.
واي ذكرتيني بالثوب التور كلا يلبسونا فوق الدراعه وإذا طلعو لبسو فوقه العباة.


إن شاء الله يبلغج يا صبربر يا تميرتنا ويبلغنا بشهره الفضيل ويعينه على طاعته. يا حلوه من شهر.​

 

[الصابرة المحتسبة]

اللهم آمين ياجويهه

قبل على أيامي ............ توني صغيرة

لي صار رمضان ماعندنا بالسفرة إلا هالتشريب على خبز رقاق وشربت الفيمتو ولا اللبن والكاستر الله ياحلو الكاستر لي صار ماعلي صيام انخشيت وخليت اميمتي عسى ربي يشافيها تعطيني الجدر والحس باجي الكستر وهو حار ولا اللقيمات لا خرابيط ولا غيره.
ولازم هالتنقص للجيران كل يوم ولي فطرنا هالبخور والعود والتخنن وروحة المسجد لابد منها لصلاة التراويح وناخذ معانا ان كانت قهوة ولا لقيمات واصلي مع امي ساعة وساعة تلاقوني بس أطالع هذي وذيج اشوف منو اللي اعرفها من البنيات علشان الردة والسوالف بالطريج.
ومانشتري اهدوم العيد إلا قبله بيومين او يوم وابوي الله يرحمه يحدر فينا الديرة ويسفط عند براحة المسجد المقابل حديقة البلدية ونمشي مشي ولازم بالردة نمر على راعي اللبن ان كان تذكرونه اللي يم سوق الحريم وتمر الوالدة على سوق الحريم وتاخذ هالديرم بس لازم يكون حار علشان يصبغ ولا موخوش ماركة .

 

[daloola]

لالالالالالالالالالالالالالالالالالا
صبربر انا ايقنت انج وايد كبيرة

راعي لبن ما اذكر
بس ديرم اي

عسى الله يشافي اميمتج واميمتي وام جويهه

وصاجه الاول كل شي يدعسون بحلج الياهل ويسكت بساع

 

[الصابرة المحتسبة]

شدعوة دلولا راعي اللبن مطعم صغير عنده مكينه شربت وعصير ليمون بااارد
وجزاج الله خير على هالدعوة

 

[الصابرة المحتسبة]

السلام عليكم
ياعسى ربي يشرح صدوركم ويسهل أموركم
وتقبل الله منا ومنكم صالح الأعمال
شلونكم خواتي؟؟؟