عندج سوالف حزاوي مواقف ولا كلمات أهلج الأولين يقلونها ما قمتي تسمعينها وايد الحين..

[الصابرة المحتسبة]

ما سوينا شي يا mi corazon

 

[مرت راشد]

موضوووووووع حلو وشيق كب العدو ايه اختي الكبيره تقوله بس بلبدوي يعني كب عدونا لما يطيح منها فنجال القهوه ههههههه وبنسبه للاغنيه الي قبل نهايتها بعد المطر عند الله لا الله الا الله محمد رسول الله نهايتها غير عن ذبحنا دويش عبدالله ما اعرفها وش بعد ايه قصة اسرور حلوه اول مره اسمع فيها وتحزن بعد ومشكورين

 

[الصابرة المحتسبة]

لامالت على ديرتنا الكويت ولا على شيخنا ولا على حكومتنا ولا على شعبنا عسى العدو ما ياليهم والدم ما يجسيهم والسامع يقول آمين .

 

[الصابرة المحتسبة]

صبحكم الله بالخير والكرامه والحشيمه : انشالله تدوم الأفراح على ديرتنا الحبيبة الكويت.

 

[الصابرة المحتسبة]

من الأمثال الكويتيه:- شبعونا طراقات شبعناهم شتايم: يعني اللي ينطق من الأقوى منه تلاقونه ماعنده الا السب والشتم والصراخ.
- اللي هذا أوله ينعاف تاليه:اللي من اوله مشاكل وطلايب فتركه احسن وأبرك.
- أضبط من ساعة الملا : تعبر عن وصف الانسان الدقيق والحريص على مواعيده.
- إما طلعه ولا ِطبعه:تنقال للنوخذه حزة الغوص لي طبع البوم إما يطلعه ولا يخليه يطبع بالبحر.
- حط راسك بين رجليك واشهد على والديك: يعني الواحد يقول الصج لما بشهدونه على شغله صارت.
- طقاق روحه ما يصيح: اللي يجيب المشاكل لنفسه ومن تحت راسه ما يشتكي ويقول ليش واشلون.
- كل بقلبه شقى الليله: يعني تلاقون واحد مستانس ومبسوط والثاني الهم والكدر حايسه حوس ويجي ذاك المستانس ويغشمر المتنكد هذا بصوب وذاك بصوب.
- لي بغيت الخبر يشيع عطه ام بزيع: قبل بالفريج في وحده معروفه ينادونها بام بزيع فكانوا لي بغوا ينشرون خبر أبد ما عليهم إلا يقولونه لام بزيع وهي ما تقصر تنشره للجميع ولا وكالة كونا ألحين.
- يفوتك من الجذاب صج واجد: ساعات الجذاب لي سولف تلقى سوالفه اكثرها جذب لكن بين السوالف يقط له حجي صج فما تعرفله تحسب كلامه كله جذب.

 

[الصابرة المحتسبة]

السلام عليكم...
ياحلات ديرتنا كلها متزينه جنها عروس ياعسى ربي يحفظها...

 

[orangeya]

بااااااااااااااااااااااك

شخباركم يابنيات؟

والله لكم وحشه :hjy5jewf:

وتسلم اناملج صبوره شايله الموضوع شيل اسم الله عليج...

الا صاحبه الموضوع جويهه وينها؟ مالها حس

لي عوده بسوالف وحزاوي تعجبكم ان شا الله

 

[الصابرة المحتسبة]

ياهلا وغلا باللي لفانا من بعيد هلا اورنجيه.....
ارقدي وآمني الموضوع ما يوقف انشالله .

 

[الصابرة المحتسبة]

لامالت على الكويت ولا على شيخنا الغالي صباح ولا على حكومتنا ولا على شعبنا عسى العدو ما ياليهم والخير يجسيهم والسامع يقول آمين

 

[الصابرة المحتسبة]

بسولف لكم عن احتفالات العيد الوطني قبل: كنا نوقف على الرصيف والمركبات الكبيره تمر وكل مركبه تمثل وزاره والبنات فوق معاهم هالزينه ينثرونها وهالورد والأعلام... والمرشدات والزهرات والكشافه مسيره : صيحات وشيلات كانت صج صج احتفالات بمعنى الكلمه....
والحدايق العامه مثل حديقه جمال عبدالناصر والحزام الأخضر يسوون حفلات شعبيه تحضرها الله يرحمها جانها عايشه ولا ميته نوره وفرقتها وصنعه.... وفرقة الحرس الوطني الله كنا نستانس... وكانوا موفرين لنا سينما باليل نفعد وسط العشب ونطالع الأفلام...وناسه حدها.

 

[الصابرة المحتسبة]

عسى ربي يحفظ ديرتنا ويحميها في ظل شيخنا صباح الغالي آمين يارب العالمين

 

[الصابرة المحتسبة]

باجر تبدي الأعياد وعسى ربي يحفظ ديرتنا وعسى الأفراح تدوم

 

[الصابرة المحتسبة]

ألف مبروك يا جاي الضحى على الوسام وتستاهلينه:q8:

 

[الصابرة المحتسبة]

أحب يكون الموضوع بالصف الأول علشان جذيه برفعه

 

[جاي الضحى]

الله بالخير والنور والطيبه؛


الصابره المحتسبه ما تقصرين يا الغالية. سوالفج ونيسه. أحب أقعد بهدوء وأقرى سوالفج تعيشني جو الماضي وتذكرني بأهلي أيام أول. وأقول بقلبي يا زينها كانت من أيام. قواج الله ولا يوقف. :ggdw:


أنفديه حبيبتي سئلت عنج العافيه. وينج انتي الحين؟ ولهنا عليج. يالله ردي نبي سوالفج يا مقدمتنا العزيزه يابتلج مكرفون مزهلق كلا زري مو شوارفسكي لأ زري أول. ههه. ولهت عليج.

كوكو شلونج؟ وينج عسولة. عساج بخير وعافية. فقدنا شوفتج. ولهت عليج.


وما هانو كل البنات.

إن شاء الله الكل مستانس بالايام إلي كلها فرحه وأناسه. كل عام وديرتنا بخير وأمان. :q8:​

 

[جاي الضحى]

الله يسلمكم يا طويلات العمر ذاك اليوم قعدت مع أهلي ويبت ورقه وقلم وقتلهم قولولي كلمات عتيجه ولكن يمكن تكون على اذني يديده. فما قصرووو مع الصحفيه إلي يايتهم وعدولي جم كلمه.

إن شاء الله تذكركم بذكريات حلوه أو تفاجأكم انها كلمات كويتييه وتقولون مثل ما قلت علامنا ما قمنا نقولهم. :eh_s(10):



قالولي إن صبغ الأظافر قبل يسمونه قمعه!

إمجق: يسعني إشلع الشي بقوه وبسرعه. مجقة مجاق.

زخمه: ستيان; حامل الصدر؛ برا. ماني حاطه صوره :tomato2:

سكه سد: سكه الفريج إذا صارت مصكوكه ما كو طلعه منها.

مختله: حمام مكرم القاريء وإلي بالصوره تحت يسمونه الأدب مكرمكم الله ولا الحين الكلمه نقولها.

حب الماي: مثل فخار يحطون فيه الماي عشان يبرد جنة على البرمه بس البرمه على حجم أكبر.
هذي صوره حق حب الماي والحاء عليها كسره

كاروكة: فراش كرفايه أو سرير أضنتي يخصون فيها كرفايت الياهل إذا مني غلطانه.

بلبلي شعري: عجفي شعري.

الشعر إلي بالصوره فوق يسمونه شعر مبلبل يعني معجف. وفيه ناس يقلون عن العجفه جديله.

إنملخ : إنفهق; تمصع. يعني إذا شلتي الياهل شوي شوي لا تمصعينه؛ تملخينه.
مشطر: الشي إذا قلو عنه مشطر يعني منحرف عن مكانه.

ك(g)وتره: فهلوة شطانه وحياكه على قولت المصريين.


إن شاء الله ستانستو على الكلمات. وسلامتكم وتعيشون على قولت كوكو والصحفيه راحت ونامت عقب اللقاء. ​

 

[shoosha_3sal]

مشكووره الموضوع واااااااااايد حلو

 

[الصابرة المحتسبة]

عاشت جاي الضحى وعساج على القوة

 

[الصابرة المحتسبة]

صبحكم الله بالخير والكرامه
اليوم بحطلكم صور عن البيت الكويتي القديم:
- الحوش
- الجليب
- المطبخ
- دار القعده اليومية
- الديوانيه

 

[الصابرة المحتسبة]

ألف مبروك ياجاي الضحى على الفوز في مسابقة تطويري لبلادي تستاهلين والله وانشالله منها للأعلى:eh_s(17):
:stars:
:nbvppw: