عندي مشروع عطيني افكارج اللي تفيدني و شكرا لكي :)

[wonderwoman]

مرحبا بنات شلونكم شخباركم ؟

انا عندي مشروع و حبيت اخذ ارائكم و افكاركم عشان احسن و اطور من نوعية المشروع واللي اهو كتاب طبخ . فرجاءا جابوا على الاسئلة اللي تحت بعدين اضيفوا افكاركم ومقترحاتكم وشاكرتكم جزيل الشكر .[/u]

1- شنو تحبون تضيفون او تعدلون في كتب الطبخ الموجودة في الاسواق حاليا؟؟؟

2- شنو الشي اللي يشدكم في شراء كتب الطبخ؟؟؟ الغلاف؟ الوصفات السهلة ؟ الصور للاكلات الشهية؟ اسم وشهرة المؤلفة؟

3- هل تحبون انه يكون فية قسم للشوربات وقسم للمقبلات ولا قسم السلطات و الاطباق الرئيسية و الحلويات كافية؟؟؟

4- هل تفضلون ان الكتاب يكون كبير الحجم وكبير بعدد الوصفات؟؟ ولا صغير و خفيف الوزن واعداد الوصفات فيه وسط لا وايد ولاشوية؟؟؟؟؟

5- طبعا المقادير و طريقة الطبخ لازم تكون دقيقة وسهلة وما تاخذ وقت وايد والصور تكون موجودة بجانب كل وصفة و ملونة وواضحة هذا كله معروف ومالا داعي تكررونه ابي اشياء و افكار جديدة تفيدكم انتو يالمستهلكين بالاول قبل ما تفيدني انا!!! و اي وحدة عندها خبرة في هالموضوع تضيفه مثل دور النشر والطباعة الممتازة و المتخصصة في كتب الطبخ في الكويت.....


ناطرة ردودكم واشكركم.........

 

[wonderwoman]

بنات عفية لا تخلون !!! وين ردودكم ؟؟؟ :"(

 

[*الهوا الغايب*]

الله يوفــــــــقج

احب الكـــتب الي تكـــــون الــوصفات سهـــــــله وبســيطه وصـحيه ومـــاتـخذ وقـــــت بطـــخ

بـــــس تـــــــعبنا مـــــن الـــوصــــــــفات الطـــــــويله

ولي يجـــــــــــذبني ويــــــــــشدني علـــــــــــشان اشــــــــــتري الكــــــــــتـــاب كلـــــــــــــمة سهــــل وبـــــــــــوقت قــــــــــــصير

هــلكـــــــلمـات تــــــجذبني

انشـــــــــــالله قــــــدرة افــــيدج حـــــــــيااااااتي

 

[dalal]

خل اقولج شنو الكتب الي تشوقني :

1- اولا ططريقة العرض التصوير اهي بتحببني بالاكله وبتشوقني اني اشتهيها فأشتري الكتاب
2- الخط يكون واضح ومرتب وايظا نوعيه الصفحات اهتم لها.. لانه الي تكون خفيفه وبسرعه تنقطع ما احبها ..
3- مهم جدا عندي الكتاب يكون مترجم بالانجليزي .. يعني مافكر اشتري كتاب الوصفات بالعربي فقط !
4- مو مهم انه يكون متكامل خل الاقسام فيه .. بس حلو انه يكون فيه كل الاقسام الي ذكرتيها .. يعني يكون شامل ..
5- احب المقاييس تنكتب معياريه وتقديريه يعني بالكوب وبالقياس جرام وكيلو وهالسوالف ...
6- وهم حلو انه يكون لبعض المقادير بدائل- يعني ينكتب اذا ماعندج هالنوع ممكن استبداله بهالنوع
7- الدقه في الشرح لانه في ناس مبتدئين فمايفهمونها على الطاير ...
8- افضل الي تكتب الوصفات تكون فاهمه وعارفه بالاكلات الصحيه يعني تحرص على السعرات الاقل .. مو تترس دهن وشغلا تسمن عشان الاكل يصير لذيذ على حساب صحتنا...
9- محتاجين بالكتب وصفات اكثر للأكل الصحي تماما.. يعني يكون حلوو وصحي مو اكل ماله طعم ! يعني تعجبني كتب عبير الراشد لتخصيصها اكلات ذات سعرات حراريه اقل... ولو انهم شويه ...
10- والشي الي ماشوفه متوفر بأغلب الكتب الي مرت علي انه ماتكتب جم سعره حرايه بالاكله .. حته لو تقريبي.. انا يهمني هالشي
الاحظ الكتب الاجنبيه وايد تهتم ...


وبس الله يوفقج بمشروعج ويسهل عليج كل اموووورج ...

 

[أم إلياس]

بصراحة اختي دلال كفت ووفت

كل اللي جا ببالي كتبته وزود ما شاء الله عليها

الله يوفقج اختي ووندر وومن

وان شاء الله يكون الكتاب بين ايدينج قريب ويكون مثل ما تحبين يا رب

 

[wonderwoman]

مشكوررررررررررررييييييييييييين حبايبي فتحتوا عيني !!! يلا لا يوقف لايوقف لا يوقف

 

[A7bni_1]

أنا أحب الخطوات المصورة .. يعني مو بس الصورة النهائيه .. لأ .. كل شي بالخطوات المفصله عشان نفهم لوووول

وموفقه

 

[[]نهاوند[]]

بما اني احب الطبخ واتابع كتب الطبخ دايما بقولج شنو اكثر شي يشدني بالكتاب قبل اشتريه

اولا الغلاف من بره لازم يكون حلو ويشد الناس

ثانيا حجم الكتاب يكون متوسط مو كبير حيل ولا صغير

ثالثا نوعية الورق لازم تكون نوعية جيده لأن الكتاب بيستخدم في المطبخ وتدرين مرات يحوشه ماي والا شي من اثار الطبخ فلازم النوعيه تكون قويه وتتحمل

رابعا لازم الوصفات تكون منوعه ومبسطه حتى لو كانت الطبخه صعبه حاولي تبسطينها قد ماتقدرين وتكون الخطوات واضحه وبأرقام

خامسا لازم لكل وصفه صوره ولازم الصوره تكون واضحه وحلوه يعني لازم تهتمين بالصوره لأنها اكثر شي يشد اللي بتشتري الكتاب لما بنشتري بنفتح الكتاب ونشوف الوصفات والصور فلازم الصوره تكون فيها حركات مادري شلون اوصف لج :eh_s(6):

سادسا لازم تراعين اللهجات المختلفه والتسميات المختلفه للبهارات والمواد المستخدمه بالطبخ عشان ينتشر كتباج برا الكويت وينعرف ان شاءالله

سابعا في بداية الكتاب سوي مقدمه شوفي شنو فكره عندج وسويها في بداية الكتاب عشان تشد الناس على سبيل المثال في كتاب اطباق النخبه المؤلفه حاطه افكار للاستفاده من الأكل الزايد وطريقة تخزين وتثليج بعض الخضار

هذا اللي على بالي الحين واذا تذكرت شي برد واكتبه ان شاءالله

وان شاءالله تنزلين الكتاب بالأسواق وانا اول من يشتريه :eh_s(6):​

 

[لميس]

احب الكتيبات الصغيره الحجم المتخصصه قي جانب واحد من انواع الاكل على شكل سلسله مثل كتيب صغير خاص بالشوربات واخر بالسلطات وثالث بالحلويات ..بحيث يكون رخيص الثمن صغير الحجم مخصص للجانب الذي افضله..

موفقه...

 

[أم حيدر]

1- شنو تحبون تضيفون او تعدلون في كتب الطبخ الموجودة في الاسواق حاليا؟؟؟

احب ان يكون في قسم حق الاطفال وصفات سهله لهم سندويشات شوربات مع صور

2- شنو الشي اللي يشدكم في شراء كتب الطبخ؟؟؟ الغلاف؟ الوصفات السهلة ؟ الصور للاكلات الشهية؟ اسم وشهرة المؤلفة؟

اكيد الغلاف مهم ، الوصفات تكون دقيقة ومضبوطة ومكوناتها متوفرة بالجمعيات لان اول ما اشوف مكونات من مادري وين اهون خير شر

اسم المؤلفة مو مهم يمكن تكون مو معروفة بس شاطرة

3- هل تحبون انه يكون فية قسم للشوربات وقسم للمقبلات ولا قسم السلطات و الاطباق الرئيسية و الحلويات كافية؟؟؟

4- هل تفضلون ان الكتاب يكون كبير الحجم وكبير بعدد الوصفات؟؟ ولا صغير و خفيف الوزن واعداد الوصفات فيه وسط لا وايد ولاشوية؟؟؟؟؟

احب الكتب الكبيرة واللي تضم كل شي

5- طبعا المقادير و طريقة الطبخ لازم تكون دقيقة وسهلة وما تاخذ وقت وايد والصور تكون موجودة بجانب كل وصفة و ملونة وواضحة هذا كله معروف ومالا داعي تكررونه ابي اشياء و افكار جديدة تفيدكم انتو يالمستهلكين بالاول قبل ما تفيدني انا!!! و اي وحدة عندها خبرة في هالموضوع تضيفه مثل دور النشر والطباعة الممتازة و المتخصصة في كتب الطبخ في الكويت.....

صور الطبخات لازم تكون شي حلوووووووو لان العين تشبع قبل البطن يعني شي بروفشناااال

اي وتذكرت في بداية الكتاب حطي صور المكاييل اللي تستخدمينها ونصايح صحية

والله يوفقج