غروب
New member
- إنضم
- 27 يوليو 2008
- المشاركات
- 1,126
- مستوى التفاعل
- 0
- النقاط
- 0
المقادير:
- ديايه مقطعه ونشيل عنها الجلد. (نفوحها أول مره خمس دقايق ونشيل الزفره اللي فيها وبعدين نغير الماي ونحط بهارات عدلة مشكلة مع بصلة صغيرة وفصين ثوم، ونفوحها ربع ساعة، مع الاحتفاظ بماي الدياي)
- بصلتين مقطعين مكعبات صغار
- 5 أو 6 فصوص ثوم مقطعين ناعم
- كوسا شرايح مدورة
- طماط مقطع مربعات صغيرة
- مشروم فرش مقطع شرايح
- بطاط شرايح مقليه نص قلي.
- بهارات: دراسين ناعم- فلفل أحمر مجروش- فلفل أسود- بهارات مشكلة- كركم- لومي أسود مطحون
- شبنت ناشف أو طازج
- مكعب ماجي
- سمنه مازولا اللي بالزبدة
- زعفران منقوع بماي ورد وهيل مطحون وربع كوب ماي حار.
- فلفل علوب أخضر أو أحمر
- ملح
- عيش منقوع نص ساعة.
الطريقة:
- بمقلى نحط شوية زيت نباتي مع قفشة كبيرة سمنه مازولا ونحمس نص كمية البصل مع نص كمية الثوم ونضيف عليه البهارات المشكلة والفلفل المجروش، لما يتشوح البصل عدل ويتغير لونه، بعدين نضيف عليه شرايح الكوسا والمشروم والفلفل الحار، ونحمسهم معاه، وبهالمرحلة نقدر نزيد السمنه شوي لأنها تعطي طعم حلو بالأكل.
- بعدين نضيف الدياي بعد ما سلقناه، ونقلبه مع البصل ونضيف باجي البهارات، ونخلطهم لما يتغير لون الدياي وينقلي شوي، بعدها نضيف الشبنت اليابس أو الطازج ونخلطهم عدل. بعدين نضيف الطماط المقطع مع ملح، ونقلبه عالنار خمس دقايق ونسكر الجوله ونخلي المقلى على جنب.
- ناخذ جدر تيفال ونحط فيه شوية زيت وسمنه ونحمس كمية البصل الثانية مع الثوم ومكعب ماجي وشوية كركم وملح، لما يتغير لون البصل، نحط العيش بعد مانصفيه من الماي طبعاً، ونقلبه شوي مع البصل عشان ياخذ لون البهارات ويتشرب السمنه، بعدين نضيف ماي الدياي المغلي مع ملح (بعد مانشيل منه البهارات العدلة والبصل) ونخليه على نار عاليه مدة 6 دقايق أو حسب نوع العيش عندكم يعني لما تستوي حبة العيش بس ماتكون لينه ديروا بالكم.
- بعد مانشخل العيش، نحط بقاع الجدر زيت ونحط شرايح البطاط، بعدين طبقة صغيرة من العيش ونصب عليه قفشتين ماي الزعفران المنقوع، وبعدها نضيف حمسة الدياي، ونضيف باجي العيش عليه ونحط عليه مره ثانية زعفران، ونغطي الجدر نخليه يتخدر على نار هاديه مع حديده عشان لا يحترق، تقريبا نص ساعة أو أكثر.
- وقت التقديم نقلب الجدر وبالعافية
أي سؤال أنا بالخدمة،.
