فكرة تراودني بشدة وهي ( الولادة المنزلية )

[shy rose]

يااااااااااااااااااااااااااااااي مستحيل اسويها بالبيت
كلها ساعات وش خسرانه

 

[ام اغلى الناس]

كشف تقرير بريطاني أن اختيار المرأة ولادة طفلها الأول في المنزل يزيد مخاطر وفاة المولود أو معاناته من ضرر دماغي بحوالي 3 مرات أكثر من الولادات التالية
وذكرت تقارير أن الأمهات للمرة الأولى، اللواتي يلدن في المنزل هن 3 مرات أكثر عرضة لإنجاب طفل من الممكن أن يموت أو يشكو من ضرر بالدماغ. وتبين أن وحدات الأمومة التقليدية في المستشفى هي المكان الأكثر أماناً لتلد النساء أطفالهن الأوائل، وتبين أن الأمهات للمرة الأولى هن 2.8 مرات أكثر عرضة للمعاناة في المنزل من مشاكل خطيرة منها في وحدات الولادة بالمستشفى. كما أظهر التقرير الذي نشرته دايلي ميل البريطانية، أن حوالي نصف النساء اللواتي يخترن الولادة في المنزل ينقلن إلى المستشفيات بسبب تعقيدات خلال المخاض.

 

[c a t w o m a n]

انزين شدرى القانون ان الطلق فاجأنا وماقدرنا نوصل المستشفى واضطرينا للولادة في البيت
ثم اني ماراح اولد فيالبيت الا اذا تأكدت من الدكتورة ان كل شي تمام وان الولادة ماراح تكون فيها مضاعفات ولايوجد احتمال خطورة ما ..
اما عن تجهيزاتي مافيها اي كلفة مادية .. :d بكتب بعد شوي شنو راح نحتاج ان شاء الله
اما عن احسن المستشفيات فبهاذي باخذ برايج وبروح آخذ لي فرة على المستشفيات وبسألهم اذا يولدوني بالطريقة الي انا اختارها .. واذا حصلت زين بطاوعك ..


شكرا لك كانومان ..

والله يا عمري التعب تعبج والولد ولدج والقرار قرارج
احنا نكلمج من باب النصيحة


إذا إنتي والدة من قبل أعتقد ماله داعي كلامنا

لكن إذا إنتي بجرية السالفه مو بسهالة ايللي انتي تشوفينها وايد أمور ممكن تتعرضين لها

نبض الياهل يقل لا سمح الله

حبل سري يلف عليه

نزيف

تعسر ولادة


اذا شي حصل من هالأشياء شلون بتتداركينها حزتها

صح قبل كانوا يولدون بالبيت لكن نسبة الوفيات كانت أكبر

بالمستشفى راحة لج تتطمنين عالبيبي عناية ما يلقط جراثيم

جياس دم متوفرة

حاضنات

متابعة لج

سؤال اذا ولدتي بالبيت والياهل برة الشر و بعيد شارب ماي شبتسوين



ملخص الكلام لا تجازفين بصحة الياهل ولا صحتج

 

[ام فوااز]

جربي الولادة المنزلية انتي و قوليلنا تجربتج
يمكن تقنعينا بالكلام جذي ما راح نقتنع والله يسهل عليج
بصراحة فكرتج غريبه

 

[ابدا يالغالي مانساك]

اقووول لوووووول
انتي اقنعوج البناات وماقتنعتي
دااامج واصله الحين شهررج ربي يقومج بالسلامه
اولدي بالبيت وتعالي نقلي تجربتج هنيه ​

 

[أمل المنصوري]

حبيبتي في امور تصصير في غرفه الولادة مالها خص الدكتورة فيها او ممكن تطمنج وتضمن لج ان مب صاير شي

مثل تغير وضعية الجنين فجأة او بدل ما يطلع راسه اول طلعت ايده وتسحبيه بتسببن له مشكله اكبر وهي الخلع

تسكر الرحم والمشيمة ما طلعت ..

صادج بسم الله عليج نزيف ودختي من بيسعفج .. واذا حتى اتصلوت على الاسعاف وجاو احسبي الوقت اللي بياخذونه ..
هاي الاشياء واكثر ممكن تصير فجأه لج وللبيبي ..

خلج في المستشفى وايد ابرك لج ..

 

[اعشق فهاوتي]

سبحان الله الحيوانات يولدون بنفسهم لا شق ولاشي
ذاك اليوم شفت مقطع في يوتيوب عن ولادة فيل يا الله بنفسها الام تعتصر وتتألم لين بعد شوي الفيل البيبي طاح من فتحتها مره وحده ومن فرحتها تحركه بخرطومها
اما الحريم حفله فالمستشفى خخخخ

 

[اعشق فهاوتي]

وأضيف قصة مريم عليها السلام ولدت بنفسها تحت النخله لا جراحه ولا خياطه
يعني ممكن تولدين بنفسج
والله المعين

 

[أنهار الكويت]

حبيبتي خلي سالفة الهياااط لان صح كلامها وااايد يقدرون يولدون من غير شق

بس حتى لو طمنتج الدكتوره ان الوضع طبيعي ماتضمنين بحزة الولاده شنو يصير

بعطيج مثل:
انا عندي حريم اخوان اثنين وولدوا بمستشفيات خاصه

الولى راحت طبيعيه ومافيها شي وماشالله مفتوحه 2 سانتي ابجرها ... حلووو
ودخلوها ولاده والوضع طبيعي ووصلت 4 سانتي وللحين كلشي اوكي وتحت عينهم اهي
وفجأه بقدرة قااااادر شافوا مااااي وسخ يطلع منها ونبض الياااهل نزززززل وجيكت الدكتوره وطلع ان الياهل مخرج ابطنها وعطوووول حولوها عملياااات لان راح يسبب لها تسمم اذا طولت اصلن مانطروا موافقه الزوج لان في حياة الام

والثانيه هم راحت طبيعيه ووصلت والله 4 سانتي وفجأه شافو النبض نزل من غير سبب يمكن تعب الياهل او شي وهم ولدوها عمليه لان اذا كملوا ونزلوه طبيعي بيموت الجنين لا سمح الله

واقولج بعد حماااتي والله وصلت 10 سانتي وشقوووها وقاعده تولد خلاص الراس تحت وفجأه سبحاااااان الله ارتفع الياهل فوق الحوض مو قادرين يوصلون له وحولوها عمليه وخيطوها من فوق وتحت


انتي بهالحالات شنو راح تسوين؟؟ واذا صار بالياهل شي بيكون ذنبه برقبتج

هذا غير ان الياهل يشرب ماي وان بعض اليهال ينخلع حوضهم واللي نقص اوكسجين ويحطونله واللي يحتاج الشيشه وغير وغير

انتي شنو تسوين ويمكن انتي لاسمح الله يصير فيج شي والياهل يطلع عادي هم تتحملين ذنبه وذنبج لان منو له هالياهل

ومنتي مضطره على هذا كله عشان تغامرين بالياهل وفيج ... ملاااايين الحريم قاعدين يولدون بالوضعيه اللي متبعينها المستشفيات والله يخلي الكمام ينسيج امج وابوج مو بس العوار


وبعدين الله خله العلم والتطور يخدم الانسان والا جان ماخلق ناس مكرسه حياتها عالدراسات والاكتشافات هذول الله مسخرهم للناس فليش نرجع لورا

وايد حالات بزمن اول توفوا بسبب ان مافي تكنلوجيا ولا تطور ولو موجوده هالحالات بزمن التطور حلها وااايد سهل *

 

[فرح79]

الفكره غريبه جدا الحمدلله على نعمه المستشفى واهم شي التخدير اكيد مش مجربه الولاده والمها
في اكثر من سبب وسبب يؤكد خطر الولاده المنزليه والبنات فادويك
المهم اقتنعتي ولا لا
جاوبينا

 

[أنهار الكويت]

وأضيف قصة مريم عليها السلام ولدت بنفسها تحت النخله لا جراحه ولا خياطه
يعني ممكن تولدين بنفسج
والله المعين

الحمدلله والشكر ... شوف المنطق والتفكير... انزين برد عليج على قد عقلج .. انزين السيده مريم حملت من غير زوج .. جذي من قدرة ربج حملت .. شلون يعني هم احنا ممكن نصير نفسها !!! والسيده مريم من حملها ليما ولادتها ليما نطق سيدنا عيسى واهو جنين هذا كله مدبر من الله سبحانه والملاااائكه حولها ويكلمونها

لانها كانت اول شي داخل بيت المقدس وياها ملك قالها طلعي وروحي عند الشجره عند نهر واكلي من رطبها ،،،، يعني شلون حتى احنا بيكلمنا ملك ... حبيبتي شهالمقارنه الفاااشله .. هذا الله قاله كن فيكون .. ومو شرط يصير هالشي مع كل الناس

والا الثانيه تقارنا بالبهايم والحيوانات ... شنو انتوا .. انزين البهايم هم طريقة زواجها غيييير سواء بالمعاشره او بالزواج نفسه يتنافسون ذكرين ولازم واحد يذبح الثاني .. شلون يعني لازم نفسنا اهم والا تبين يكون في حيوان مختص للولاده يروحون له

الله سبحان الله خلقهم على انهم قادرين يولدون نفسهم من غير مشاكل (لاجنين يقلب ولاحبل يلتف ولا جنين يخرج ) بس تدفع ويطلع لان الله خالقهم جذي يعيشون عالبركه مايقدرون يدبرون نفسهم ولا يفكرون


والله الردووود غريبه عجيبه

 

[راقيه وجذابه]

انهار هههههههههههههههههههههههه

اهم شي حيوان مختص بالولاده ههههههههههههههههه

الله يقطع عدوج والله ظحكت لين دمعت عيني هههههههههههههههههه

ههههههههههههههههه

اهـ ياقلبي هههههههههههه

عجيييييييييبه

 

[kuwaitiya_84]

اي صح كلامها احنا مانوصل لي مقام السيده مريم هذي معجزه وثاني شي شكلها راعيه الموضوع فاضيه ماعندها شغل وتقول هالكلام وقت الصجيه من اول طلقه نايكه عند باب المستشفي نصيحه لاتضيعين وقتج وقت غيرج بمواضيع مالها معني

 

[أنهار الكويت]

لووووووووول

عساها دوم هالضحكه يارب

 

[سوزي الشرقية]

والله مدري شنواقول يعني حتى لو ولدتي في البيت تحتاجي مستشفى عشان العناية في البيبي وفيش ...وافضل بعد عشان المكان تضمني انه معقم ونظيف ..اني امي ولدت بخوييي في السيارة ومع ذلك راحت المستشفى......
سهل الله علينا وعليش بحق محمدوأل محمد

 

[ام مريووووم]

لا صج ماكوا شغل
حبيبتي حتى حريم قبل كانت عندهم حريم مختصه تولدهم
وهم نصير بلاوي
يوم الله انعم علينا بالمستشفيات والعنايه ندور الشقا
الله يهديج بس
وسالفة مريم ضحكتني هذي يكلمها جبريل اهي منو بيكلمها
والله ضحكتوني ههههههه
بس احس الموضوع. نكته الله يهديكم

 

[فكرة]

:080402ask_prv::080402ask_prv::080402ask_prv: فكرت في كلامكم والآن اعلن استسلامي . .
اقنعتوني وخصوصاً الاخت انهار الكويت ماشاء الله عليها.
والله يسهل علينا جميعاً ويتمم هالحمل على خير يارب.

اشكر تفاعلكم الي لولاه كان يمكن جازفت وسويتهه فعلاً. *

 

[راقيه وجذابه]

واخيراً اقنعتج ههههههههههه

الله يتمم عليج تهوري بأي شي الا صحتج وصحت البيبي

 

[فكرة]

واخيراً اقنعتج ههههههههههه

الله يتمم عليج تهوري بأي شي الا صحتج وصحت البيبي

يارب هالضحكة دوم ياعسل. وانتي بعد ماقصرتي اقنعتيني اشكركم.

 

[راقيه وجذابه]

تدوم انفاسج يابعد حيي

نحن نعين ونعاون ونظحك ونتغشمر خخخخ

^_^