فهموني انا غلط؟؟

[خوخة سمسم]

مراحب بنات

فديتكم صارلي فترة ابي انزل هالموضوع ومتردده حاسه اني ماعرف اكتب شي

انا متزوجة من سنه ونص تقريبا والحمدلله ريلي ريال ماعليه قصور

وطبعا ساكنه مع اهل ريلي وهم بعد امه وابوه وخواته عسسسسسسسسسل ماشاء الله عليهم


عاد بتقولون وين المشكله؟؟؟؟


المشكله ياحبيباتي زوجة اخوه


وولدها بعد


زوجي متعلق بولدها حيييييل يمكن اكثر من ابوه بعد

ومن قبل زواجنا
انا ماقلت شي بالبدايه بس بعدين اكتشفت ان الموضوع زااااااااااد عن حده والسالفه امصخت ..



هالولد صار ناقص يسكن بغرفتنا وكل دقيقه طلبات
هذا غير اذا نسيت باب غرفتي مومقفول يجي يفتش الغرفه

او إذا لقى الباب مقفول يطقه طق اليهد وفي اي وقت يحلاله

تفاهمت مع ريلي انه يخفف اهتمام بهالولد قال اوك بس بعد فترة رد ع نفس الحاله وتناقشنا ليما يأست..


مع اخذ بعين الاعتبار ان هالولد دلووووووووووع وتصرفاته مرات مو سويه ..


كلمت امه وفهمتها ترا يابنت الحلال ولدج سبب مشاكل بيني وبين ريلي


تفاجأت ان الاخت بنفسها تلزق عمرها بريلي
اخر مرة من كم يوم ريلي يترياني يالسيارة نزلت من البيت لقيتها قاعدتلي عند دريشة السياره تسولف مع ريلي ولا تنادي ولدها عشان يروح معانا بعد


ومرة تهاوشوا ولدها وحماي الصغير بو 10 سنين وقعدت تتوعد لحماي
..والله لقول حق فلان<<ريلي>>> يطقك ويذبحك ومن هالحكي

وكل ماقال احد ابي اروح مكان قالت لو قايل لي بقول حق فلان يوديك ..والمقصود ريلي ..


وفوق كل هالشي تشوفينها الطيبه الساكته


هذا وانا قايله لها ومكلمتها وطبعا كل هالمواقف تسبب مشاكل بيني وبين ريلي

انا حامل ووالله مشاكلها تتعبني
هذا غير اتصالاتها


ولو فرضنا تبي منه خدمة

حتى خواته اذا بغوا منه شي يجون عندي يقولون لي مو يتجاهلوني ومايقولون لي شي
مع العلم اني اشوف ماله داعي خواته يعلموني لانه فالنهاية اخوهم..


وزوجة حماي الثانيه نفس الشي تطلب الشي مني وبكل احترام

الا هذي بس ناقص اعطيها ورقه تنازل عن ريلي

تخيلوا انصدمت مرة دازة ولدها يقوله تقولك امي تعال تبيك بسرعه

انا لاعت جبدي من اللفظ


ويييييع لهالدرجة ماتعرف تتحجى هالادميه ؟؟؟


هذا ريلي ياناس ما احب وحدة اي كانت تتعامل معه جيه والشيطان حي مامات

احس نفسي بطفر والله
هذا غير عن بنتها اللي تتجسس عند باب غرفتي


كم مرة صايدتها ...

تعبق ريلي بولد اخوه غير طبيعي والاغرب اي شي تبيه هالادميه يسويه لها بدون نقاش ولو كان اللي كان ..


فهموني انا غلط؟؟؟؟؟؟
​

 

[بتبوتااا]

بس تولدين ياقلبي راح يتفرغ ريلج لولده اكثر

صح في شغلات تغث بس ماعليج الا الصبر

 

[-_-Designer-_-]

الله يعيينج حبيبتي سمعي و طنشي لان اذا ما طنشتي بتتعبين , ولا تشتكين وايد لان اذا شكيتي حق ريلج وايد يمكن يزهق و يمل و ما رده انشالله تولدين بالسلامه و يشووف ولده وبيلها عن ولد اخووه

 

[بــــدره]

هذه خبيثه الله يفكج منها
لا تتواجهين معاها و لا تراوينها انج منقهره لانها بتعاند و تزيد
طنشيها خليها تحس ان تصرفاتها السخيفه هذه ما تأثر فيج و لما تحس انها ماكو فايده منج راح تمل و توقف
شكلها حاطه راسها براسج و تتعامل معاج مثل الحيه تحت التبن بس صبري عليها لا تطلعين بصورة الشريه النسره و اهي الملاك الطيبه

بس تبين اقول لج شي يونسج ؟؟؟

ان شالله اذا يبتي بيبي راح ياخذ قلب ابوه و يخليه ينسى الدلعلع ولد حماج
و لي صار عندج ولد فرضيه على حماج و مرته عساس ان بيلعب مع ولدهم و خليه يقعد على قلوبهم ٢٤ ساعه مثل ما اهي تسويلج الحين

 

[كليـ دلعـ]

واااي ظغطي ارتفع!

زوجهها وين طيح الله حظه!؟

صججج

جليله حيا

وجليله ذوق

وجليله ذات

قطييييييعه

ويييع

شنو هذا!؟

اول مره اسمع بجذي!

اي متعلق اي بطيخ

يروح يتعلق فأبوه

اخاف ابوه ميت!!

يااااويلج اذا اهو ميت!!>>> اسلوب تخررريع!!

لاحبيبتي

روحي لزوجهاا وقوليله يعطيك العافيه

انا مومكلووفه اشيل بلاويك !

قوم في الغوله مرتك وفكني منهاا

اهي وبزر السوو اللي صارلي شريجه!

كلميه اذا حي يرزق>> اتمنى

واذا موحي<<< الله لايقووله!

الطمي ياااختي !!>> قلبتهاا منااحه!

كلمي خالتج وعمج قوليلهم الولد ولد اخوه

بالعينه وساكتين لكن اللي ماتستحي

شكووو مشاركتني فيه!

لاوكله كوم وسالفه *جان قلتولي اقول لفلان يوديكم!!

وانتي اسم االله عليج ياايج داء الطرم!

اي ردي ياحظي وقولي شكوو تقوليله

بصفتج شنوو تقوليله لهدرجه موتارسه عينج!؟

لازم تكون لج ردت فعل موساكته جدامها

وتحنين ع زوجج!

كلمي عمج

وخالتج

وقبلهاا كلمي زوجهاا

لاوبنتها تسمع!

وييييييييع

وين عايشه هذي بالعشيش!؟

شخباري التسمع اول يتسمعون الحين موضه قديمه>>> ههههه والله مادري شقول!

وزووجج لازم يكون رسمي مورووح رووح

تعال تعال!!

اهي لوموشايفته شخشيخه ماتجرأت!

وان شالله لماقالتله بنت اخوه امي تقولك تعال بسرعه

عسا قعدتي وخليتيه يروح بروووحه!!

وي وي وي جان سويتيهاا

لابالله العيب فيج انتي

من راسج لي ريوولج

انا اقول جااان سويتيها

فزي يابنت واحمي مملكتج اللي اخترقووهاا

هالشرذمه ~>>> وي شهالكلام شفيني!

مادري بس محتررره حدي!

يالله طبقي وعلمينا شصااار*

 

[آجمل نسآء آلدنيآ]

وااااااي شهالادميه قطييييييعه نوعيه خايسه

الله يعينج عليها

 

[فـلـ 50 ـس]

هذي وين زوجها عنها ؟
كلمي زوجها و لا كلمي خالتج عنها صج مصختها


و ولدها جم عمره ؟
اذا كان صغير مو مشكلة يمكن ريلج يحب الاطفال و بعد الولادة بتعلق بضناه و يخف عن ولد اخوه
​

 

[مـهـرة]

قوليله عقبة بن عامر أن رسول الله صلى الله عليه وسلم قال : "إياكم والدخول على
النساء فقال رجل من النصار: يا رسول الله أفرأيت الحمو؟ قال : الحمو الموت
" رواه البخاري ومسلم.

يحذر النبي صلى الله عليه وسلم في هذا الحديث من الخلوة بالمرأة الأجنبية والدخول عليها،
وهنا يسأل أحد الصحابة "أفرأيت الحمو؟"
والحمو: أخو الزوج وما أشبهه من أقارب الزوج كابن العم ونحوه. "
قال النووي: اتفق أهل اللغة على أن الأحماء أقارب زوج المرأة كأبيه وعمه
وأخيه وابن أخيه وابن عمه ونحوهم"، فهذا الصحابي يسأل عن أقارب الزوج
الذين يدخلون على المرأه في طمأنينة ويسر، ما الحكم فيهم؟ فيجيبه النبي
صلى الله عليه وسلم بإجابة قاطعة قائلاً: "الحمو الموت" فهو أولى بالمنع
عن غيره لأن الفتنه منه أكثر لتمكنه من الوصول إلى المرأة من غير نكير
عليه .

ادعي الله يسخره لج ويحفظه وحاولي تناقشينه بأسلوب حلو وهادي

 

[مطيرية والعزليه]

لا تقولين لزوجها ولا شي ..

احفظي نفسج عنها ولا تنازلين لها بتمسكها عليج ممسك وتعاندج بالطالعه والنازله

كلها جم شهر ويشرف ولي العهد ويلحسسسسس عقل ابوه وينسيه الدنيا ومنوعليها

واحتمال ينساج انتي بعد ( اضحك معاج) والله وعن تجربه ..

وراح تقولين قالت مطيريه.

والله يسهلج

 

[Sportiya.cute]

قطيعه مالت بس

يبا طنشي هالبشر عقليتهم صغيره حدده لا تصغرين مخج

و الله صج انها حرقه قلب حركاتها بس نطري لي ولادتج صدقيني بيلهى بولدج و يمكن ولدها يغار منه بعد ما استبعد
بس وقتها زوجج راح يتضايق من ولدها ماراح يحس براحه مع ولده

و بعدين شنو شهالهلاقه بنتها تتسمع ويع اقدم شنو هالحركات قطيعه
و مبين من اسلوبها عقليتها صغيره لا تهتمين طنشي و ردي لا تسكتين اذا قالت فلان يوديك قوليلها وين ابوه ؟؟؟؟ قطيها بالوي و لفي ويهج سوي نفسج لاهيه عشان لا يصير ملاشط و تصير مشكله
دايما قطي قطه و لفي ويهج خل تفهمها عشان لا تصير سالفه

و نصيحه لا تكبرين الموضوع لي خالتج و مادري منو هذي عقلها صغير لا تصغرين عقلج نفسها ختولي ويع
ويييع شنو وين ريلها احس فيها نقص و عينها علا ريلج !!!

و شنو سالفه الي ابيك بسرعه شنو هذا شنو كانت تبي قولي الموقف بلييز بعرفه حاشني فضووول !!!!

 

[AL3OoOoBA]

استغفرالله
حماتج مالقت لها رجال يسنعها لا زوجها ولا زوجج مع احترامي
كل الرجاجيل يحبون عيال اخوانهم وخواتهم بس مو لهدرجه ويييع

حبيبتي انتي مو غلط مالومج اذا انغثيتي

بس لاتحاتين كلها ايام وليالي ويشرف ولي العهد وينسيه العالم كله
صدقيني اذا جبتي الولد او البنت بيطير عقله معاهم وبيسحب على الامه العربيه ههههه

 

[امـ خــزامـى]

كلي دلع هههههههههههههههههههه بدعتي بصراحه
سوري صاحبة الموضوع بس بجد ضحكني ردها ياحبي لقلبها

المهم ياقلبي استني لحد ماتولدين وبتتغير الاحوال باذن الله

اما اذا ماحترمت نفسها وقفيها عند حدها وخلي احد يكلم زوجها مو انت لان بتكبر السالفه وممكن تصير هوشه

الله يكون بعونك

 

[فرزاتشى]

حبيبتي اولا انتي ماعندج جناح خاص فيج ؟
قفلييييييييييييه لاتمشين الا المفتاح بيدج ولاسالج ريلج قولي فس اغراض خاااصه وماحب احد يتعبث فيها
ثاني شي كلمي ريلج السالفه مو سالفه الولد الحين احنا بزوجه اخووه قولي له لو تكلمت مره ثانيه وعطيتها مجال بكلم خالتي تتفاهم وياها
حبيبتي كل شي له حد وصدقيني اللي يحط حدود بكل شي بحياته يحترمونه الناس ويحبونه سوي كل هالاشياء بكل موده ومن باب ماحب احد يتدخل ويخرب بيتي وفهمي ريلج هالشي وانتي تتفاهمين وياه
مو تصارخين وتدعين علي هههههههه
على فكره انا طموشه بس صارت لي خبرره من رفيجاتي واختي ههههههه

 

[مموريز]

للا وألف لا ,,,,انت موعلى غلط......
هذي وين زوجها عنها,,,,,,,لاحيا ولامستحا.......
وبعدين ليش تطلب من زوجك يودي عيالها ويجيب لهم اغراض وابوهم موجود, ,,,وليه ماتخليهم يطلبون من ابوهم....
هذي المراة مو مظبوطة,,,,,لازم تحطين لها حد,,,,,,وتكلمين زوجك عنها وعن حركاتها وشنو تتبي هي بالضبط منه,,,,ولازم هوبعد يحط لها ولعيالها حد ولايخليهم يتمادون اكثر من كذا,,,,
شوفي انا كان عندي نفس السالفة زوجي مايجيب شي لعيالي الاويجيب لولد اخوه نفس الشي ,,,واخوه اذا جاب شي لولده مايكلف خاطره ويجيب شي لعيالي بالرغم من عيالي صغارواي شي يسكتهم,,,,,,,وتغاضيت عن الموضوع وسكت وقلت مايخالف ولده اخوه مثل عياله,,,,بس مع الوقت سار يبديه عليهم ويشتري له اللي يبيه حتى لو وصل لالالف ماعنده مشكله وهنا ماقدرت اسكت وتكلمت ووقفت زوجي عند حده.....وصارت مشكلة بس بالاخير حط حد للولد ,,,,,,,,
انا اقول هالكلام عشان تستفيدين وتعرفين ان هالنوعيات من الحريم والعيال ماينعطون وجه ويتمادون بكل شي......
وقفيها عند حدها عشان ماتوصل الامور لاكثر من كذا.......

 

[شادن33]

ومازال السؤاال هاي وين ريلها؟؟؟؟؟
الحل يعتمد ع الاجابه
يمكن يحليله تعبان ولامريض عشان جي تطلب من ريلج يعني تعودت

 

[ماني من الناس]

طلعي بشقه اجار مع ريلج وايد ابرك من هالعيشه والتلزق


قله ادب صراحه مافيه تفسير ثاني

 

[حبيبي مالكني]

الله يعينج
لا حبيبتي منتي بغلطانه
ووقفيها عند حدها
واذا طرشت لج ولدها لا تدخلينه غرفتج
وبنتها فشليها جدام كل اهل ريلج قولي جدامهم انها تتجسس عليج
عشان تتفشل وامها تتفشل بعد
وحاولي ما تتركين لها مجال تكلم ريلج
وإذا سمعتيها تتكلم عن ريلج قولي لها هاي ريلي انتي شكوا تتكلمين عنه وقولي لاها لا تتكلمين عنه لا بخير ولا بشر واذا تبين شي عندج ريل طلبي منه
وقعدي مع ريلج
وقوليله يبدل رقمه او يحقرها مو لازم يرد عليها
والله يسخرلج ريلج

 

[اميره1980]

ان شاء الله فترة و تولدين بالسلامة و البيبي ياخذ عقل ابوه ان شاء الله و ينسيه ولد حماج
قولي ان شاء الله يكون ضناج بنوته لانها صج راح تاخذ عقل ابوها بدلعها

 

[love love]

غلطتي لما كلمتيها وبينتي انه ولدها يسبب مشاكل بالعكس عطيتيها الجواب اصلا

لهي ريلج وياج وباغراض البيبي ولي شرف بيلهى فيه

وكلمي ريلج مالها حق تتلزق خل يخدم ولد اخوه ومرت اخوه بس مو بهالتلزق اسلوبها غلط

 

[فوفو22]

غالبا الازواج بفتره العزوبيه يتعلقون بعيال

خواتهم او اخوانهم

ويستمر التعلق الغير طبيعي الى

ان تحمل زوجته وتجيب ياهل

شوي شوي يتوجه الاهتمام والرعايه والحب الى عياله

حبيبتي بالج قصير

وتنقصج الحكمه

وفضفضتك عند ام الولد غلط بغلط

شدي حيلك وترسي البيت عيال

شوفي بعدين زوجج اشلون يتغير

فوفو